OCIPAMA CELILONGISO 19
OCISUNGO 22 Usoma u Kasi Ale Oku Viala—Wiye!
Anga hẽ Tua Kũlĩha Ndomo Yehova a ka Sombisa Omanu Kovaso Yoloneke?
“Yehova . . . ka yongola okuti umue o nyõliwa.”—2 PET. 3:9.
OCIMÃHO CELILONGISO
Tu pondola oku kolela okuti eci Yehova a ka sombisa omanu kovaso yoloneke, eye o ka ci linga lonjila yimue ya sunguluka.
1. Momo lie tu popela okuti tu sangiwa kotembo yimue yi komohĩsa?
CILO tu sangiwa kotembo yimue yi komõhisa calua! Koloneke vilo, tua siata oku mola lovaso etu oku tẽlisiwa kuovitumasuku Viembimbiliya. Ndeci, tua siata oku mola uyaki u kasi oku lingiwa lo “soma yo konano” leyi “yo kombuelo,” locimãho coku viala oluali. (Dan. 11:40) Tu letevo oku kundiwa kuolondaka viwa Viusoma wa Suku koluali luosi kuenda omanu valua va kasi oku nõlapo oku vumba Yehova. (Isa. 60:22; Mat. 24:14) Handi vali, tua siata oku tambula okulia kualua konepa yespiritu “votembo ya sokiyiwa.”—Mat. 24:45-47.
2. Nye tua kolela kuenda nye tu sukila oku limbuka?
2 Yehova o kasi oku amamako oku tu kuatisa oku kuata elomboloko liovina, vi laika oku pita ndopo. (Olosap. 4:18; Dan. 2:28) Tu pondola oku kuata ekolelo liokuti, eci ohali ya piãla yi ka fetika, tu ka kuata ukũlĩhĩso weci tu ka sukila oku linga oco tu tẽle oku pandikisa lekolelo kuenda oku likuata omunga vokuenda kuotembo yaco ya tĩla. Pole, tu sukila oku limbuka okuti kuli ovina vimue viatiamẽla kovaso yoloneke okuti, ka tua vi kũlĩhĩle. Vocipama cilo, tu konomuisa tete esunga lieci tua lingila apongoloko kelomboloko tua kuatele kosimbu, liatiamẽla kovina viaco. Noke tu konomuisavo ovina vimue tua kũlĩha viatiamẽla kovaso yoloneke kuenda eci Isietu wo kilu a ka linga.
CECI KA TUA KŨLĨHĨLE
3. Nye tua enda oku popia catiamẽla komanu vana ka va fendela Yehova kuenda momo lie?
3 Kosimbu, tua enda oku popia okuti eci ohali ya piãla yi ka fetika, omanu vana ka va fendela Yehova, ka va ka kuata vali epuluvi lioku nõlapo oku u vumba kuenda oku puluka kuyaki wo Harmagedo. Momo tua simaile okuti, ulandu wetande wa situlula ovina via laikele oku li pita kovaso yoloneke. Tua endavo oku sima okuti, ndeci Yehova a yika epito liocimbaluku osimbu Etande ka lia fetikile, cimuamue haico okuti kefetikilo “liohali ya piãla,” lomue vali o ka kuata epuluvi lioku ka vumba Yehova kuenda oku popeliwa.—Mat. 24:37-39.
4. Momo lie cilo ka tu popela vali okuti ovina viosi via pita kotembo ya Noha, vi kuete elitokeko lialua koloneke vilo?
4 Ca sunguluka hẽ oku popia okuti ovina viosi via pita kotembo Yetande, vi situlula eci ca laikele oku pita kovaso yoloneke? Sio. Momo lie? Momo Embimbiliya ka li ci lombolola. a Ocili okuti Yesu wa sokisa ‘oloneke via Noha’ lotembo yoku tukuluka kuaye. Pole, eye ka popele okuti ovina viosi via pita kotembo ya Noha, via laikele oku tẽlisiwa calua kovaso yoloneke, ndeci Yehova a linga poku yika epito liocimbaluku. Pole, eci ka ci lomboloka okuti ka tu pondola oku lilongisila kulandu wa Noha kuenda Wetande.
5. (a) Nye Noha a linga osimbu Etande ka lieyile? (Va Heveru 11:7; 1 Petulu 3:20) (b) Catiamẽla kupange woku kunda ekalo lietu li sokisiwa ndati leli lio koloneke via Noha?
5 Eci Noha a yeva esapulo lielungulo lia Yehova, eye wa lekisa okuti wa kuatele ekolelo poku tunga ocimbaluku. (Tanga Va Heveru 11:7; 1 Petulu 3:20.) Cimuamue haico okuti, omanu vana va yevelela olondaka viwa viatiamẽla Kusoma wa Suku, va sukila oku lekisa ekolelo pocakati covilinga viavo, loku kapako ovina va kasi oku lilongisa. (Ovil. 3:17-20) Petulu wa tukula Noha okuti, “ukuakukunda esunga.” (2 Pet. 2:5) Pole, ndomo tua ci lilongisa kocipama ca pita, ka tua kũlĩhĩle nda okuti Noha wa kundila omanu vosi va kala kilu lieve osimbu Etande ka lia fetikile. Koloneke vilo, tu kasi oku likolisilako oku kundila omanu voluali luosi kuenda oku lekisa ombili kupange waco. Pole, ndaño lalikolisilo aco, ka tu ka tẽla oku kundila omanu vosi osimbu esulilo ka lieyile. Momo lie?
6-7. Momo lie tu popela hati ka tu ka tẽla oku kundila omanu vosi voluali londaka viwa, osimbu esulilo ka lieyile? Ci lombolola.
6 Sokolola eci Yesu a popia catiamẽla kupange wetu woku kunda. Eye wa popele okuti olondaka viwa viusoma via laikele oku kundiwila “koluali luosi, ha vi lingi uvangi kolofeka viosi.” (Mat. 24:14) Ocitumasuku eci, ci kasi oku tẽlisiwa calua koloneke vilo okuti, kosimbu ci sule. Esapulo Liusoma lia sandekiwa ale kueci ci pitahãla 1.000 kalimi kuenda pocakati conumbi yo jw.org omanu valua voluali luosi koloneke vilo, va pondola oku lilongisa olondaka viwa Viusoma wa Suku.
7 Yesu wa sapuilavo kolondonge viaye okuti ovo ka va ka “tẽla oku tokeka alupale osi,” ale oku kundila omunu vosi osimbu eye keyile. (Mat. 10:23; 25:31-33) Olondaka via Yesu vi pondolavo oku tẽlisiwa koloneke vilo. Momo, cilo omanu valua va sangiwa kovitumãlo vina okuti vamanji ka va kuete elianjo lioku kunda. Handi vali, ekukutu lekukutu kua siata oku citiwa oloñaña vialua. Omo liaco, ka tu ka tẽla oku kundila komanu vosi mulo voluali osimbu esulilo ka lieyile, ndaño okuti tu likolisilako oku sanda omanu vo “kolofeka viosi, kovikoti viosi, kuenda kalimi osi lolondaka viwa.”—Esit. 14:6.
8. Apulilo api tu pondola oku linga atiamẽla konjila ndomo Yehova a ka sombisa omanu kovaso yoloneke? (Talavo ociluvialuvia.)
8 Omo lieci tua konomuisa kovinimbu via pita, ku votuiwa apulilo amue: Nye ci popiwa catiamẽla komanu vana ka va kuatele epuluvi lioku yevelela olondaka viwa osimbu ohali ya piãla ka ya fetikile? Yehova kuenda omõlaye una eye a nõla va ka sombisa ndati omanu vaco? (Yoa. 5:19, 22, 27; Ovil. 17:31) Ocisonehua kua kunamẽla osapi yocipama cilo, ci popia hati, Yehova “ka yongola okuti umue o nyõliwa” pole, o yongola okuti “vosi va likekembela.” (2 Pet. 3:9; 1 Tim. 2:4) Ndaño okuti tua kũlĩha ovina viaco viatiamẽla ku Yehova, pole, eye handi ka tu sapuilile ndomo a ka sombisa omanu vana ka va kuatele epuluvi lioku yevelela olondaka viwa. Ocili okuti Yehova ka kisikiwa oku tu sapuila ovina eye a linga ale, levi a ka linga.
Nye Yehova a ka linga lomanu vana okuti pamue ka va la kuata epuluvi lioku yeva olondaka viwa osimbu ohali ya piãla ka yeyile? (Tala ocinimbu 8) c
9. Nye Yehova a tu situluila Vembimbiliya?
9 Yehova Vondaka yaye, o tu situluila ovina eye a ka linga. Ndeci, Embimbiliya li tu sapuila okuti, Yehova o ka nena komuenyo omanu “havakuesungako” vana okuti, ka va kuatele epuluvi lioku lilongisa catiamẽla kolondaka viwa, loku linga apongoloko kekalo liomuenyo wavo. (Ovil. 24:15; Luka 23:42, 43) Omo liaco, ku votuiwa apulilo akuavo a kuete esilivilo.
10. Apulilo api akuavo a votuiwa?
10 Anga hẽ omanu vana va ka fa vokuenda kuohali ya piãla va ka kunduiwa otembo ka yi pui okuti, ka va kuata vali elavoko liepinduko? Ovisonehua vi lekisa okuti Yehova kumue lolohoka viaye ko Harmagedo, o ka kundula vana vo suvuka kuenda ka va ka pinduiwa vali. (2 Va Tes. 1:6-10) Oco hẽ nye ci ka pita lomanu vakuavo? Ndeci, vokuenda kuohali ya piãla vamue va pondola oku fa omo lioku vela, oku kuka, ale oku fa omo liocilunga cimue, pamue oku pondiwa lomanu vakuavo. (Uku. 9:11; Sak. 14:13) Anga hẽ vamue pokati komanu vaco, va ka kongeliwa ku vana “havakuesungako” va ka pinduiwa voluali luokaliye? Ka tua ci kũlĩhĩle.
CECI TUA KŨLĨHA
11. Onjila ndomo omanu va ka sombisiwa ko Harmagedo, yi ka kunamẽla pi?
11 Etu tua kũlĩha ovina vialua vi ka pita kovaso yoloneke. Ndeci, tua kũlĩha okuti, ko Harmagedo omanu va ka sombisiwa lonjila ndomo ovo va tata vamanji a Kristu. (Mat. 25:40) Vana va ka tendiwa ndolomeme, va ka lekisa okuti va kuatisa olombuavekua kuenda Kristu. Tua kũlĩhavo okuti olombuavekua vimue, handi vi ka kala palo posi eci ohali ya piãla yi ka fetika, toke koku panda kuo Harmagedo. Osimbu vamue pokati ka vamanji a Kristu va kamamako oku kala palo posi, citava okuti omanu vamue va ka kuata epuluvi lioku tava kokuavo kuenda oku eca ekuatiso kupange va kasi loku linga. (Mat. 25:31, 32; Esit. 12:17) Momo lie ci kuetele esilivilo oku kũlĩha ovina viaco?
12-13. Nye vamue va ka linga poku mola oku nyõliwa kuo “Bavulono Yinene?” (Talavo ociluvialuvia.)
12 Eci ohali ya piãla yi ka fetika, citava okuti omanu vamue poku mola oku nyõliwa kuo Bavulono Yinene, va ka ivaluka okuti Olombangi Via Yehova vokuenda kuanyamo alua, via popaile ovina viaco. Anga hẽ vamue eci va ka mola oku nyõliwa kuo Bavulono Yinene vokuenda kuohali ya piãla, va ka lekisavo ekolelo ku Yehova?—Esit. 17:5; Esek. 33:33.
13 Nda oco, ci ka kala ndeci ca pita Kegito koloneke via Mose. Tu ivaluki okuti, ‘owiñi walua womanu’ wa likongela ku va Isareli eci ovo va siapo o Egito. Citava okuti, va fetika oku lekisa ekolelo ku Yehova eci va mola oku tẽlisiwa kualungulo a Mose atiamẽla Kafengi Ekũi. (Etu. 12:38) Nda okuti elinga limuamue lieya oku pita noke lioku nyõliwa kuo Bavulono Yinene, anga hẽ tu ka yeva esumuo omo okuti omanu vaco va kuata epuluvi lioku likongela kokuetu, osimbu kua kambele ño kamue oco esulilo liye? Ocili okuti sio! Momo tu yongola oku kala nda isietu wo kilu una okuti, “ukuahenda, ukuacikembe, o livala konyeño kuenda ukuacisola calua haico ka ci pongoloka, haeye ukuacili.” b—Etu. 34:6.
Omanu vamue eci va ka mola oku nyõliwa kuo Bavulono Yinene, va ka ivaluka okuti Olombangi via Yehova va enda oku popia ovina viaco (Tala ovinimbu 12-13) d
14-15. Anga hẽ epuluvi liomunu umue oku ka kala komuenyo kovaso yoloneke liatamba kolofa viaye, ale kocitumalo a kasi? Ci lombolola. (Osamo 33:4, 5)
14 Vamanji vamue pamue va pondola oku popia okuti: “Hĩse nda umue ukuepata liavo una ka kasi oku vumba Yehova o fa osimbu ohali ya piãla ka yeyile, momo pamue o ka kuata elavoko liepinduko.” Ocili okuti, kuli asunga oku popia ndoco. Pole, epuluvi liomunu umue oku ka kala komuenyo kovaso yoloneke ka liatambele kolofa viaye. Yehova onganji yimue ya lipua kuenda olonjila viaye olonjanja viosi via sunguluka. (Tanga Osamo 33:4, 5.) Omo liaco, tu pondola oku kolela okuti, “Onganji yongongo yosi,” yi ka linga eci ca sunguluka.—Efet. 18:25.
15 Ca sungulukavo oku popia okuti nda omunu umue o kuata epuluvi lioku kala otembo ka yi pui, ka ca tambele kocitumãlo eye a kasi. Yehova lalimue eteke a ka sombisa omanu “ndolohombo” omo okuti, ovo va kasi kovitumãlo vina ka va la kuata epuluvi lioku yeva esapulo Liusoma. (Mat. 25:46) Onganji yongongo yosi, o li sakalaisa vali calua lomanu vaco. Ka tua kũlĩhĩle ndomo Yehova a ka endisa ovina vokuenda kuohali ya piãla. Citava okuti ovina omanu vamue va ka mola vokuenda kuohali ya piãla, pamue vi ka va vetiya oku lekisa ekolelo ku Yehova eci eye a ka kemãlisa onduko yaye kolofeka viosi.—Esek. 38:16.
Anga hẽ eci ohali ya piãla yi ka fetika omanu vamue poku mola ovina vi ka pita . . . va ka pongolola ovisimĩlo viavo?
16. Nye tua kũlĩha catiamẽla ku Yehova? (Talavo ociluvialuvia.)
16 Omo lioku lilongisa Embimbiliya, tua limbuka okuti omanu va kuete esilivilo lialua ku Yehova. Eye wa eca omuenyo womõlaye, oco okuti vosi yetu tu kuata elavoko lioku kala komuenyo otembo ka yi pui. (Yoa. 3:16) Vosi yetu tua siata oku limbuka ocisola ca Yehova. (Isa. 49:15) Eye wa tu kũlĩha konduko. Yehova wa tu kũlĩha ciwa, okuti ndaño tua fa o ka tu pindula momo ivaluka ovina viosi viatiamẽla kokuetu kuenda olonjivaluiso vietu viosi! (Mat. 10:29-31) Omo liaco, tua kolela okuti Isietu wo kilu ukuacisola, o ka sombisa omunu lomunu lonjila yimue ya sunguluka haiyo ya lipua kuenda yohenda.—Tia. 2:13.
Tua kolela okuti Yehova o ka sombisa omunu lomunu lonjila yimue ya sunguluka haiyo ya lipua kuenda yohenda (Tala ocinimbu 16)
17. Nye tu ka konomuisa vocipama ci kuãimo?
17 Omo okuti cilo tu kuete elomboloko eli liokaliye, tua limbuka okuti upange woku kunda u sukila oku lingiwa lonjanga okuti kosimbu ci sule. Momo lie tu ci popela? Nye ci tu vetiya oku amamako oku lekisa ombili kupange woku kunda? Vocipama ci kuãimo tu ka konomuisa ondongosi atambululo aco.
OCISUNGO 76 Nye o Yeva Vutima?
a Oco o kũlĩhe alomboluilo a lekisa esunga lieci kua lingiwila apongoloko a-a, tala ocipama losapi hati: “Eyi Oyo Onjila wa Tava” Vutala Wondavululi 15 Yelombo wo 2015 kemẽla 3-8.
b Noke lio Bavulono yinene oku kunduiwa, afendeli vosi va Yehova va ka setekiwa vokuenda kuyaki wa Goge ya Magoge. Omunu wosi o ka likongela kafendeli va Suku noke lioku kunduiwa kuo Bavuluno Yinene, o ka pitavo voseteko.
c ALOMBOLUILO OVILUVIALUVIA: Ovindekaise vitatu vi lekisa esunga lieci omanu vamue ka va sangiwila kupange tu linga woku kunda koluali luosi, ndeci: (1) ukãi umue o kasi kocitumãlo cina okuti etavo liaco li kisika omunu oku kakatelamo (2) ohueli yimue yi kasi kocitumãlo cina okuti ekalo lio pulitika vofeka yaco ka lia lelukile kuenda ka li va ecelela oku kunda kuenda (3) ulume umue o kasi kocitumãlo kuna okuti ocipãla calua kuenda ka kua lelukile oku pitĩlako.
d ELOMBOLUILO LIOCILUVIALUVIA: Ufeko umue wa siapo oku vumba Yehova, ivaluka ovina a lilongisa viatiamẽla ko “Bavulono Yinene.” Eye o nõlapo oku tiuka ku Yehova loku enda kolonjali viaye Olombangi Via Yehova. Nda ovina viaco vieya oku pita, tu sukila oku kala nda Isietu wokilu okuti, ukuahenda haeye ukuacikembe kuenda oku sanjukila omunu waco wa tiuka.
