STÙDIO 19
CÀNTICO 22 Che vegna el Regno de Dio!
Come che Geovà el ndarà giulgar le persone nel futuro?
‘Geovà no’l vol che gnanca un el sìpia destruto.’— 2 PIE. 3:9.
COSSA CHE NDAREMO IMPARAR?
Noantri podemo esser sicuri che Geovà el ndarà far quel che l’è giusto quando el giulgarà le persone nel futuro.
1. Che bele robe vedemo suceder ancoi?
ANCOI, l’è drio suceder tante bele robe. Cossa? Noantri vedemo che tante professie dela Bìblia le ze drio suceder. Par esémpio, “el rè del nort” e “el rè del sud” i ze drio vegner un contra quelaltro par veder chi che ga de pi poder. (Dan. 11:40) Noantri anca vedemo che le bone notìssie del Regno de Dio le ze drio esser predicade in tuta la Tera e che milioni de persone le ga belche dessidio servir a Geovà. (Isa. 60:22; Mat. 24:14) E semo drio ricever tante publicassion e aiuto par capir la Bìblia “nel tempo giusto”. — Mat. 24:45-47.
2. De cossa che podemo esser sicuri, e cossa che ghemo de ricordarse?
2 Geovà l’è drio giutarne a capir le robe che sucederà nel futuro. (Pro. 4:18; Dan. 2:28) Alora, podemo esser sicuri che quando scominsiarà la granda tribolassion, noantri ndaremo saver tuto quel che ne ocore par seitar leai e unidi. Ma ghemo de ricordarse che, par intanto, ghen’è un per de robe che no savemo mia. In questo stùdio, vederemo arquante robe sora el futuro che la organisassion de Geovà la ga capio meio. Dopo, ndaremo veder cossa che belche savemo sora el futuro e quel che Geovà el farà.
COSSA CHE NO SAVEMO?
3. Cossa che una volta credeino, e parché?
3 Una volta, noantri credeino che dopo che scominsiesse la granda tribolassion, pi nissuni podaria scominsiar a servir a Geovà. Parché? Penseino che arquante robe che gavea sucedesto nel Dilùvio le era pròpio compagne a quel che sucederia nela època del fin. Par esémpio, vanti de scominsiar el Dilùvio, Geovà el ga serà la porta dela arca e no’l ga assà che pi nissuni vegnesse rento. Alora, penseino che dopo che scominsiesse la granda tribolassion pi nissuni i podaria vegner adorar a Geovà e esser salvi. — Mat. 24:37-39.
4. Parché che no disemo pi che quel che ga sucedesto prima che vegnesse el Dilùvio ga mostrà quel che sucederia ancoi?
4 Alora, sarà che podemo dir che quel che ga sucedesto nel Dilùvio ga mostrà quel che sucederia ancoi? Nò, parché no ghen’è mia un testo che dise quel lì. a L’è vera che Gesù el ga dito che i ùltimi giorni i saria compagni ai “giorni de Noè”. Ma lu no’l ga mia dito che tute le robe che le ga sucedesto prima che vegnesse el Dilùvio sucederia ancoi. Ancora cossita, podemo imparar tante robe de quel che ga sucedesto nel Dilùvio.
5. (a) Cossa che Noè el ga fato vanti del Dilùvio? (Ebrei 11:7; 1 Piero 3:20) (b) Come che el laoro de predicassion ancoi l’è compagno a quel dei giorni de Noè?
5 Noè el ga obedio a Geovà e el ga mostrà fede quando el ga fato su la arca. (Ledi Ebrei 11:7; b 1 Piero 3:20. c) Ancoi, dela stessa maniera, le persone che le scolta le bone notìssie sora el Regno le ga de meter in pràtica quel che le impara. (Ati 3:17-20) Piero el ga dito che Noè l’è stà un “predicador dela giustìssia”. (2 Pie. 2:5) Ma, come ghemo visto nel stùdio prima, no savemo mia se Noè l’è stà bon de predicar a tute le persone dela Tera vanti del Dilùvio. Ancoi, anca se se sforsemo tanto, no saremo mia boni de predicar a tute le persone vanti che vegna el fin. Parché nò?
6-7. Parché che capimo che no saremo boni de predicar a cada persona dela Tera vanti del fin? Spiega.
6 Gesù el ga dito che le “bone notìssie le saria predicade in tuta la tera in testimònio a tute le nassion”. (Mat. 24:14) Semo sicuri che questa professia la ze drio realisarse ancoi. Come? Ghen’è publicassion in de pi de mila léngue e, par meso del site jw.org, quasi tute le persone dela Tera le pol imparar sora le bone notìssie.
7 Gesù el gavea dito ai so dissìpoli che lori no i saria mia boni de predicar pròpio in tute le cità e a tute le persone. (Mat. 10:23; 25:31-33) Quel che Gesù el ga dito sucede anca ancoi. Milioni de persone le vive in posti ndove no semo mia lìberi de predicar, e ghen’è sempre tanti bambini che i nasse tuti i giorni. Noantri femo el nostro meio par predicar a “cada nassion, tribo e léngua”. (Apo. 14:6) Ma no saremo boni de parlar con cada persona vanti del fin.
8. Cossa che fursi se domandemo? (Varda anca la ilustrassion.)
8 Ma fursi se domandemo: ‘Cossa che sucederà con quei che no i sarà boni de scoltar le bone notìssie vanti dela granda tribolassion? Come che Geovà e Gesù li giulgarà?’ (Gio. 5:19, 22, 27; Ati 17:31) El testo de questo stùdio el dise che Geovà ‘no’l vol che gnanca un el sìpia destruto, ma el vol che tuti i se ciame grami’. (2 Pie. 3:9; 1 Tim. 2:4) Noantri savemo come Geovà el pensa. Ma lu no’l ne ga gnancora dito come el giulgarà quei che no i sarà boni de scoltar le bone notìssie. E anca ghemo de ricordarse che Geovà no ghe toca contarne tuto quel che el ndarà far.
Come che Geovà el ndarà giulgar quei che no i ga mia podesto scoltar le bone notìssie vanti che scominsiesse la granda tribolassion? (Varda el paràgrafo 8.) f
9. Cossa che Geovà el ne ga dito par meso dela Bìblia?
9 Par meso dela Bìblia, Geovà el ga parlà sora arquante robe che el ndarà far nel futuro. Par esémpio, la Bìblia la dise che lu el ndarà ressussitar i “ingiusti”, o sia, quei che no i ga mia podesto imparar sora lu e cambiar la so vita vanti de morir. (Ati 24:15; Luc. 23:42, 43) Ma fursi se femo anca altre domande.
10. Che altre domande fursi se femo?
10 Sarà che quei che i morirà nela granda tribolassion no i gavarà mia la speransa de ressuression? La Bìblia la dise che i nemighi che Geovà el finirà fora nel Armagedon no i sarà mia ressussitadi. (2 Tes. 1:6-10) Ma cossa che sucederà cole persone che le ndarà morir nela granda tribolassion parché le era belche vècie o par causa de malatie, violensa o assidenti? (Ecl. 9:11; Zac. 14:13) Sarà che le sarà intrà i “ingiusti” che i sarà resussitadi? No savemo mia!
COSSA CHE NOANTRI SAVEMO?
11. Cossa che Geovà el ndarà vardar par giulgar le persone nel Armagedon?
11 Noantri belche savemo arquante robe che le ndarà suceder nel futuro. Par esémpio, quando Geovà el ndarà giulgar le persone nel Armagedon, lu el ndarà vardar come le gavea tratà i fradei de Cristo. (Mat. 25:40) Quei che Geovà el giulgarà come piégore i ze quei che i ze ndati drio a Cristo e i ga giutà i untadi. Noantri anca savemo che arquanti untadi ancora i sarà nela Tera quando scomìnsia la granda tribolassion e i ndarà al cielo poco prima del Armagedon. Alora, intanto che ghen sìpia untadi nela Tera, le persone le pol vegner servir a Geovà e giutarne. (Mat. 25:31, 32; Apo. 12:17) Parché che l’è tanto importante capir questa roba?
12-13. Cossa che fursi arquanti i farà dopo che “Babilònia, la Granda”, la sarà finida fora? (Varda anca la ilustrassion.)
12 Cossa che fursi ndarà suceder quando scomìnsia la granda tribolassion? Dopo la destrussion de “Babilònia, la Granda”, pol esser che arquante persone le ndarà ricordarse che le Testimònie de Geovà le gavea sempre parlà che questo ndaria suceder. Alora, fursi arquante de lore le scominsiarà a gaver fede in Geovà. — Apo. 17:5; Eze. 33:33.
13 Quando i israeliti i ze ndati via del Egito, ga sucedesto una roba cossita. La Bìblia la dise che una mùcia de persone che no le era mia israeliti le ze ndate via insieme. Fursi le ga scominsià a gaver fede in Geovà dopo de veder che gavea pròpio sucedesto quel che Moisè el gavea dito sora le diese piaghe. (Éso. 12:38) Alora, pol esser che arquante persone le scomìnsie a gaver fede in Geovà dopo che “Babilònia, la Granda” la sarà finida fora e poco prima del Armagedon. Ma no ghemo mia de restar disgustadi gnanca pensar che no l’è mia giusto che ancora le possa adorar a Geovà. Pitosto, volemo esser compagno al nostro Pare “che el ga misericòrdia e compassion, che l’è passiente e pien de amor leal e che el parla sempre la verità”. d — Éso. 34:6.
Dopo che Babilònia, la Granda, la sarà finida fora, arquanti i ndarà ricordarse che le Testimònie de Geovà belche le parlea che questo sucederia (Varda i paràgrafi 12 e 13.) g
14-15. Parché che podemo dir che tuti i podarà gaver speransa de vita eterna, no importa quando i more e ndove i ze de star? Spiega. (Salmo 33:4, 5)
14 Fursi noantri ghemo belche pensà: ‘Saria meio che quei dela me fameia che no i serve mia a Geovà i morisse vanti dela granda tribolassion. Cossita, lori i gavaria la speransa de esser ressussitadi.’ L’è vera che questo mostra che volemo tanto ben a queste persone. Ma no ne ocore mia preocuparse con quando una persona la more, parché Geovà l’è el Giuis perfeto e lu sempre el fà dessision con giustìssia. (Ledi Salmo 33:4, 5. e) Alora, podemo esser sicuri che el “Giuis de tuta la tera” el farà sempre quel che l’è giusto. — Gén. 18:25.
15 Milioni de persone ancoi le vive in posti ndove mai le sarà bone de scoltar le bone notìssie del Regno. (Mat. 25:46) Ma questo no vol mia dir che Geovà el ndarà giulgarle come cavre. Cossita capimo che tute le persone le pol gaver la speransa de viver par sempre, no importa ndove le ze de star. Ghemo de ricordarse che Geovà el ghe vol ben a tute le persone. L’è vera che no savemo mia quel che el farà nela granda tribolassion con queste persone. Ma pol esser che dopo che la scomìnsia, arquante persone le scominsiarà a gaver fede in Geovà quando el santificarà el so nome davanti de tuti. — Eze. 38:16.
Sarà che arquanti i scominsiarà a adorar a Geovà durante la granda tribolassion?
16. Cossa che noantri savemo sora Geovà? (Varda anca la ilustrassion.)
16 Quando studiemo la Bìblia, noantri imparemo che Geovà el dà tanto valor ala vita dele persone. Lu el ga dato la vita del so caro Fiol par darne la speransa de viver par sempre. (Gio. 3:16) Sicuro che tuti noantri sentimo che Geovà el ne vol tanto ben. (Isa. 49:15) La Bìblia la dise che lu el sa el nome de tuti noantri e che el ne cognosse pròpio ben. Par quela, lu el sarà bon de ressussitarne compagno èrino vanti de morir! (Mat. 10:29-31) Cossita, semo sicuri che el nostro Pare, Geovà, el ndarà giulgar a cada un con giustìssia, parché lu el ga sabedoria, misericòrdia e sempre el fà quel che l’è giusto. — Tia. 2:13.
Podemo esser sicuri che Geovà el ndarà giulgar a cada un con giustìssia, misericòrdia e de maniera perfeta (Varda el parágrafo 16.)
17. Cossa che ndaremo veder nel pròssimo stùdio?
17 Adesso che ghemo capio meio come che Geovà el giulgarà le persone nela granda tribolassion, vedemo che l’è tanto importante far el nostro meio nela predicassion de pi che mai. Parché che de adesso avanti ghemo de sforsarse de predicar ancora de pi, e parché che volemo seitar a far questo laoro? Noantri ndaremo rispoder a queste domande nel pròssimo stùdio.
CÀNTICO 76 Un sentimento spessial
a Par capir meio parché l’è stà fato questo cambiamento, varda el stùdio ‘Esse é o modo aprovado por ti’, nela Sentinela de 15 de marso de 2015, pàg. 7 a 11.
b (Ebrei 11:7) Par via dela fede, Noè, dopo de gaver ricevesto aviso de Dio dele robe che ancora no se le vedea, el ga bio tanto rispeto par Dio e el ga fato su una arca par la salvassion dela so fameia. E par meso de questa fede, lu el ga condanà el mondo e lu l’è stà considerà giusto par via dela so fede.
c (1 Piero 3:20) che i ze stati desobedienti quando Dio el spetea con passiensa nei giorni de Noè, intanto che lu el fea su la arca, e poche persone, o sia, oto persone, le ze state salve passando par la àqua.
d Dopo de “Babilònia, la Granda”, esser finida fora, Goghe de Magoghe el vegnarà contra i servi de Geovà. Alora, noantri gavaremo de seitar fedeli. E anca tuti quei che i ndarà insieme al pòpolo de Geovà dopo de questo i ndarà infrontar tante dificoltà.
e (Salmo 33:4, 5) Parché la parola de Geovà la ze la verità. Tuto quel che lu el fà l’è de fidarse. 5 Lu el ama la integrità e la giustìssia. El to amor leal el ga impienio tuta la tera.
f ILUSTRASSION: Vedemo arquante persone che fursi no le sarà bone de scoltar le bone notìssie del Regno: (1) una dona la ze de star nte un posto ndove no se pol mia cambiar de religion, (2) un omo e la so dona i ze de star nte un posto ndove el governo el proibe le Testimònie de Geovà de predicar e el proibe le persone de scoltarle, e (3) un omo l’è de star nte un posto pròpio distante, in meso el mato, ndove l’e tanto fadiga rivar.
g ILUSTRASSION: Una gióvena che la se ga fermà de servir a Geovà la se ricorda che la gavea imparà che “Babilònia, la Granda” la saria finida fora. Ela la desside tornar ala casa de so pare e so mare e tornar a servir a Geovà insieme de lori. Se una roba cossita sucede, volemo restar pròpio contenti, compagno al nostro caro Pare, che sempre el mostra misericòrdia e compassion.
