MWAHA ONTHOKORORIWA 19
ETXIPO 22 Omwene wa Muluku Orwe!
Eheeni nisuwenlaahu woohima sa moota Yehova onrowaawe othoriha muhoolo?
“[Yehova] . . . khanatthuna wi akina eriheye.” — 2 PED. 3:9.
ELE NINKELA AHU OXUTTERA
Ninrowa woona weera onnatthuneya ororomela weera moota Yehova onrowaawe othoriha muhoolo onrowa okhala wa xariya.
1. Mwaha wa heeni ninhimaahu weera ninkhala etempu yeeyo sineereyaaya itthu sintxipale?
NINKHALA etempu yeeyo sineereyaaya itthu sintxipale! Nenne nxiiye ninnoona iprofesiya sa mBiblyani sikwanelaka. Mwa ntakihero, ninnamoona “mwene a elapo yotá” ni “mwene a elapo yohittó” ewanelaka olamulelo wa elapo yootheene. (Dan. 11:40, enoota) Ninnoona mitthenka sooreera sa Omwene wa Muluku silaleiwaka ni atthu antxipale ennaakhulela mitthenka iyo. (Yes. 60:22; Math. 24:14) Ni ninnaakhela yootxa yoomunepani yintxipale mwa “ehuhu yophwanela.” — Math. 24:45-47.
2. Eheeni nintthuneyaahu ororomela, mene eheeni nintthuneyaahu osuwela?
2 Yehova onnavirelela onikhavihera wiiwexexa nnene sene itthu sitokweene sinrowa okhumelela. (Mir. 4:18; Dan. 2:28) Hiyo pooti ororomela weera vaavo maxupo matokweene enrowaaya opatxera, nnoorowa osuwela itthu sootheene nintthuneyaahu osuwela weera niwere ovilela moororomeleya ni okhala oohakalala mpuwa mwa etempu eyo yooxupa. Nto, onnatthuneya osuwela weera sookhala itthu ikina nihisuwenlaahu woohima sa muhoolo. Mwa yoosoma ene yeela, nnoorowa othokorora mwaha wa heeni nitthikenlaahu othokorora woohima sa soowereya iya. Avinyaka nnoorowa othokorora itthu nisuwenlaahu woohima sa muhoolo ni moota Tiithi ahu a wiirimu onrowaawe opaka itthu.
ITTHU NIHISUWENLAAHU
3. Eheeni ninhimaahu woohima sa liini Yehova onrowaawe weemexera eparakha ya atthu ovolowa mmarehereroni mwa Yehova, ni mwaha wa heeni ninhimaahu eyo?
3 Khalayi, hiyo naahima weera vaavo maxupo matokweene enrowaaya opatxera, khaavo mutthu oohiroromela eera avirelele weemela ohoolo wa Yehova ni ovuluwa mpuwa mwa ekhotto ya Harmagedoni. Naahihima eyo mwaha wooweera niiwexexa weera, yooweereya ya epula ya mirupi yaari eprofesiya. Mwa ntakihero, nuupuwela weera, okhala weera Yehova aahiwala mulako wa nikula ehinaayeene opatxera orupa epula ya mirupi, vaavo-tho yeeraaya epatxereke maxupo matokweene, aamurowa “owala milako” sa elapo ela yoonanara ya Satana, ahiweemereraka atthu antxipale weera evuluwe. — Math. 24:37-39.
4. Neereke ninnoona yooweereya ya epula ya mirupi ntoko eprofesiya? Muthalihe.
4 Neereke hiyo onnatthuneya oweha yooweereya ya epula ya mirupi ntoko eprofesiya? Waakhula ti wooweera hooye. Mwaha wa heeni? Mwaha wooweera khiyaavo yoolepa ya mBiblyani enhima eyo. a Ekhaikhai weera Yesu aahilikanxera “mahiku a Nowa” ni emaara owo onrowaawe otthika. Mene owo khaaxuttinhe weera epula ya mirupi yaari eprofesiya. Mene hiyo pooti oxuttera itthu sintxipale ni yooweereya ya Nowa ni itthu seereñye etempu ele.
5. (a) Eheeni Nowa aapankaawe ehinaaye orupa epula ya mirupi? (Aheberi 11:7; 1 Pedru 3:20) (b) Woohima sa muteko woolaleera, moota heeni mahiku ahu ala enlikanaaya ni mahiku a Nowa?
5 Emaara yeeyo Nowa iiwalaawe mitthenka sa othoriha wa Yehova, owo aahoonihera nroromelo apakaka nikula. (Mmusome Aheberi 11:7; 1 Pedru 3:20.) Moolikana niiyo, atthu ale eniiwa mitthenka sooreera sa Omwene wa Muluku ennatthuneya opaka itthu moovarihana ni ele eniiwaaya. (Mit. 3:17-20) Pedru aahimwiitthana Nowa okhala “namutthenka a exariya” (2 Ped. 2:5) Mene ntoko nuulummaahu mwaha ovinre, hiyo khanisuwenle waari weera Nowa aahihoolela ekampaanya yoolaleera weera aalaleere atthu ootheene yaakhala valaponi ehaakunveene ophiya epula ya mirupi. Olelo-tho hiyo ninnakhavihera muteko woolaleera oneereya elapo yootheene, mene ninnilipihera vantxipale weera nivare muteko ola mwanthiti. Mene nnaamweera niilipiheraka vantxipale, hiyo khaninrowa owera waalaleera atthu ootheene enkhala elapo ela mitthenka sooreera ehaakunveene ophiya emalihero. Mwaha wa heeni?
6-7. Mwaha wa heeni ninhimaahu weera khaninrowa owera waalaleera atthu a elapo yootheene ehinaaye ophiya emalihero? Muthalihe.
6 Moone etthu Yesu aahimmaawe woohima sa yootthuna ya muteko ahu ola woolaleera. Owo aahimme weera mitthenka iya sooreera saamurowa olaleiwa “elapo yothene ntoko onamona wa amalapo othene.” (Math. 24:14) Eprofesiya ela ennakwanela olelo va opwaha khalayi. Mitthenka sooreera sa Omwene sinnalaleiwa muulumo oopwahaka 1.000, ni moorweela mwa esite ahu jw.org, atthu antxipale valaponi ennaxuttera woohima sa Omwene wa Muluku.
7 Menento, Yesu tho aahaaleela atthareli awe weera khiyaarowa owera “omaliha mittetthe” naari neere, waalaleera atthu ootheene owo ahinaakuve otthika. (Math. 10:23; 25:31-33) Nave-tho masu ala a Yesu ennakwanela mahiku ahu ala. Atthu antxipale mahikwaano enkhala mapuro yaawo muteko ahu woolaleera onkhoottihiwaaya, opwaha mwa yeeyo, yeele eri eminuutu ennayariwa anamwane antxipale. Hiyo ninnapaka ele ninweraahu weera naalaleere mitthenka sooreera atthu a “nihimo, nulumo ni muloko ori wothene.” (Apok. 14:6) Mene ekhaikhai ti yooweera hiyo khaninrowa owera waalaleera atthu ootheene valaponi mitthenka sooreera ehinaakuve ophiya emalihero.
8. Makoho heeni apaale nniikohaahu woohima sa moota Yehova onrowaawe othoriha muhoolo? (Nwehe efootu.)
8 Vanonto ninnakhumelela nikoho: Nankha atthu ale ehinrowa okhalano eparakha yoowiiwa mitthenka sooreera ehinaakuve ophiya maxupo matokweene? Yehova ni Mwanawe enrowa opaka eheeni, taani omuhiyenraawe othoriha? (Yoh. 5:19, 22, 27; Mit. 17:31) Yoolepa ya mwaha ola onthokororiwa ennoonihera weera Yehova “khanatthuna wi akina eriheye.” Opwaha mwa yeeyo, owo ontthuna weera “othene erukunuxe murima.” (2 Ped. 3:9; 1 Tim. 2:4) Mwaha wa yeeyo, hiyo onnatthuneya osuwela weera Yehova khanlenle waakhuliwa wa nikoho nna. Ekhaikhai ti yooweera, hiyo khanimmukhanyerera Yehova weera anleele etthu apankaawe naari anrowaawe opaka.
Moota heeni Yehova onrowaawe waathokorora atthu ale ehinrowa okhalano eparakha yoowiiwa mitthenka sooreera ehinaaye opatxera maxupo matokweene? (Nwehe eparagrafu 8) c
9. Moorweela mwa Biblya, Yehova onilenle eheeni?
9 Moorweela mwa masu awe, Yehova onnanleela itthu ikina onrowaawe opaka. Mwa ntakihero, Biblya onnahima weera Yehova onimwaatthikihera ekumi atthu ale “òhiloka” yaawo yahaarinono eparakha yoowiiwa mitthenka sooreera ni otxentxa mikhalelo saya. (Mit. 24:15; Luka 23:42, 43) Nto eyo ennakumihera tho makoho makina otepa otthuneya.
10. Makoho heeni makina enkhumelela?
10 Neereke ootheene ale enrowa okhwa mpuwa mwa maxupo matokweene enoorowa onyaanyiwa moomalela ehiwehereraka ovinyererihiwa? Soolepa sinniiwanyeiha nnene weera anamavaanyiha yaawo Yehova ni ikuru sawe onrowaawe waanyaanya mpuwa mwa ekhotto ya Harmagedoni, khenrowa ovinyererihiwa. (2 Ates. 1:6-10) Mene ankha akina, mwa ntakihero, ale enrowa okhwa mwaha wa irisa sa ephattu, acidente naari mwaha woowiiviwa ni atthu akina? (Koh. 9:11; Zak. 14:13) Neereke atthu akina a yaawo enoorowa okhala eriyari ya atthu ale “òhiloka” enrowa ovenxiwa mu elapo enyowani? Hiyo khanisuwenle waakhula waya.
ITTHU NISUWENLAAHU
11. Mpuwa mwa ekhotto ya Harmagedoni, atthu enrowa othorihiwa moovarihana ni eheeni?
11 Noosuwela itthu sintxipale woohima sa itthu sinrowa weereya muhoolo. Mwa ntakihero, noosuwela weera mpuwa mwa ekhotto ya Harmagedoni, atthu enoorowa othokororiwa moovarihana ni moota yaathokororaaya asinna a Kristu. (Math. 25:40) Ale enrowa othorihiwa ntoko iputtiputthi, enoorowa woonihera weera ennaakhavihera asinna ala oothanliwa vamoha ni Kristu. Nave-tho noosuwela weera asinna ala a Kristu enoorowa okhala elapo ela ya vathi vaavo enrowaaya opatxera maxupo matokweene ni enoorowa wiirimu ehalelaka vakhaani ekhotto ya Harmagedoni. Vaavo asinna ala a Kristu enrowaaya okhala elapo ela ya vathi, onnooneya weera atthu a murima wooreera enoorowa waakhavihera ni muteko awo empakaaya. (Math. 25:31, 32; Apok. 12:17) Mwaha wa heeni itthu iya siraaya sootepa otthuneya?
12-13. Atthu enrowa woonelaka hayi vaavo enrowaaya omoonaka “Babilonia mutokwene” anyaanyiwaka? (Nwehe efootu.)
12 Vaavo enrowaaya opatxera maxupo matokweene, atthu akina enrowa woona onyaanyiwa wa “Babilonia mutokwene” enoorowa wuupuwela weera Anamoona a Yehova yaahuuluma yooweereya ela ehinaaye. Neereke atthu akina enrowa woona yooweereya ela khenrowa otxentxa muupuwelo aya? — Apok. 17:5; Ez. 33:33.
13 Etthu ntoko ela yaamurowa olikana ni etthu yeereñye wExipitu etempu ya Mose. Muupuwele weera ‘muloko mmoha mutokotoko’ waapwexeererana ni ana a Israeli, akina a yaawo pooti weeraka yaapatxera wunnuwihera nroromelo naya emaara yeeyo yonnaaya itthu Mose aapankaawe woohima sa ipahu 10 seiyo saari seekhaikhai. (Ott. 12:38) Wakhala weera mukhalelo ola onimwinnuwiheriwa emaara yeeyo anrowaawe onyaanyiwa Babilonia mutokweene, neereke hiyo naamukhala ooxupeya owoona atthu epwexeereranaka vamoha ni hiyo ehalaka vakhaani ophiya emalihero? Waakhula ti wooweera hooye! Hiyo nintthuna woonihera mikhalelo sa Tiithi ahu a wiirimu, yoowo ori “Muluku òpixa murima ni òsapwanyeya, òtxerewa osarasareya ni òsareya mahala ni ororomeleya.” b — Ott. 34:6.
Atthu akina enrowa woona onyaanyiwa wa “Babilonia mutokwene” enoorowa wuupuwelela weera Anamoona a Yehova yaahuuluma yooweereya ela ehinaaye (Nwehe eparagrafu 12-13) d
14-15. Yooweherera ya mutthu ya muhoolo neereke enlipa ni vaavo owo ankhwaawe naari nipuro onkhalaawe? Muthalihe. (Nsalmu 33:4, 5)
14 Ikwaha ikina hiyo ninnawiiwa asinna akina yuulumaka woohima sa mmusi aya yeeraka, “Vaala mmusi aka aakhwiiye ehinaaye opatxera maxupo matokweene weera akhaleno yooweherera yoovinyererihiwa.” Moohihovela, yookhala etthu enweeriha asinna awo wuuluma eyo. Mene yooweherera ya mutthu ya muhoolo khenlipa vaavo mutthu onkhwaawe. Yehova Mphuki a xariya, owo onoorowa opaka soothanla mwa xariya. (Musome Nsalmu 33:4, 5.) Hiyo nroromeleke weera “[Mphuki] a elapo yothene” onoopaka itthu mwa xariya. — Eph. 18:25.
15 Nave-tho ti wamiruku ohima weera yooweherera ya mutthu ya muhoolo khenlipa ni mapuro mutthu owo onkhalaawe. Khiwaarowa okhala wamiruku Yehova waathoriha ntoko “ipuri” atthu antxipale yaawo enkhala mapuro yaawo yahaakhanlaayano eparakha yoowiiwa mitthenka sa Omwene. (Math. 25:46) Wakhala weera hiyo ninnaapwattha atthu awo, ankha Mphuki a exariya a elapo yootheene? Moohihovela, owo onnaapwatthaxa atthu awo. Hiyo khanisuwenle moota Yehova onrowaawe weettiha itthu mpuwa mwa maxupo matokweene. Pooti weeraka, atthu akina a yaawo enoorowa okhalano eparakha yooxuttera woohima sa Yehova, wunnuwihera nroromelo naya wa owo ni weemela ohoolo wa Yehova emaara yeeyo onrowaawe othoriha miloko sootheene. — Ez. 38:16.
Vaavo enrowaaya opatxera maxupo matokweene, . . . neereke atthu akina enrowa woona yooweereya ela khenrowa otxentxa muupuwelo aya?
16. Eheeni nisuwenlaahu woohima sa Yehova? (Nwehe efootu.)
16 Moorweela mwa yoosomaahu ya Biblya, hiyo noosuwela weera Yehova onnattittimiha ikumi sa atthu. Owo oophiyera ovaha ekumi ya Mwanawe weera ootheene hiyo nikhaleno eparakha yookhala mahiku ootheene. (Yoh. 3:16) Ootheene hiyo ninnoona nsivelo noohimala na Yehova. (Yes. 49:15) Owo oosuwela nsina na mutthu ori poothe. Mweekhaikhai, owo oonisuwela nnene sene ntoko mutthu, ni emaara yeeyo onrowaawe onivinyereriha owo onoorowa ontthikihera mikhalelo sahu, muupuwelo ahu yoowo onrowa woonihera omutthu ahu! (Math. 10:29-31) Moohihovela, nookhalano mathowa ooreera weera naakhuleleke weera Tiithi ahu a nsivelo a wiirimu onoorowa omuthoriha mutthu ori poothe mwa mukhalelo wooreerela, weeriyari-neeriyari, waxariya ni mwa ikharari. — Yak. 2:13.
Nroromeleke weera Yehova onoorowa omuthoriha mutthu ti mutthu mwa mukhalelo wooreerela, wa eriyari-neeriyari, wa xariya ni mwa ikharari (Nwehe eparagrafu 16)
17. Eheeni ninrowaahu othokorora mwa yoosoma enttharelana?
17 Wiiwanyeihiwa nno moohihovela onneeriha muteko ola woolaleera okhala muteko ontthuneya ovara moowakuveya. Mwaha wa heeni ninhimaahu eyo? Ni eheeni enneeriha ovirelela olaleera mitthenka sooreera moohikhulumuwa? Yoosoma enttharelana nnoorowa wiiwa waakhuliwa wa makoho ala.
ETXIPO 76 Nooneleke Sai Olaleerya?
a Weera mwiiwexexe nnene mwaha wa heeni epakinwaaya matxentxo ala, nwehe mwaha oneera ‘Esse é o modo aprovado por ti’ va A Sentinela a 15 a Março a 2015, epaax. 7-11.
b Noomala Babilonia mutokweene onyaanyiwa, arumeyi ootheene a Yehova enoorowa weereriwa mpuwa mwa otuphela wa Gogi a elapo ya Magogi. Mutthu ori poothe onrowa okhala vamoha ni atthu a Muluku anyaanyiwa vale Babilonia mutokweene onoorowa-tho weereriwa.
c OTAPHULELA WA EFOOTU YA : Soowoonihera iraru sooniheraka mwaha wa heeni atthu akina ehinrowaaya wiiwa mitthenka sooreera: (1) Muthiyana mmoha akhalaka elapo yeeyo ettiini emmweerihaaya wiisoona okhala oohivareleleya, (2) ntheli nimoha nikhalaka elapo yeeyo itthu sa epolitika siraaya soohixariya ni soowoopiha, ni (3) mulopwana mmoha akhalaka elapo yeeyo geografia araawe ottayi ni ooxupa.
d OTAPHULELA WA EFOOTU: Mwali mmoha ohiñye ekhaikhai onnuupuwela woohima sa ele oxuttenraawe woohima sa “Babilonia mutokweene.” Ni owo onnatxentxa miyuupuwelo sawe ni onnatthikela wa asitiithi awe eri makristu. Wakhala weera itthu iya sinimweereya, nintthuna omutakiha Tiithi ahu a wiirimu nooniheraka mukhalelo wa omoriwa ikharari, ni oreera murima nave ohakalala ni namattheka otthinke.
