MWAHA ONITHOKORERIWA 19
NSIPO 22 Omwene wa Muluku Orwe!
Moota Xeeni Yehova Onrowa Awe Waaphukela Atthu Muhoolo?
“Yehova . . . khoniphavela wiira mutthu opwetexiwe, nnakhala mmosa”. — 2 PED. 3:9.
ELE NINROWA AHU WIIXUTTA
Mwaha ola, onoonikhaliherya olipiha okupali wahu wiira okathi Yehova onrowa awe waaphukela atthu muhoolo, onoopaka eyo moomoriwa ikharari ni mwa xariya.
1. Exeeni enniiriha ohimya wiira ninkhala okathi woohakalaliha?
HIYO ninkhala okathi woohakalaliha! Ninniwerya woona iprofesia sa mbiibiliyani siiraneyaka khula nihiku. Mwa ntakiheryo, ninninweha “mwené òkusini” eyo piiyo mwene a onorti ni “mwené ònikela epheyo” eyo piiyo mwene a osuuli ewana-wanaka ni yoophavela ya olamulela elapo. (Dan. 11:40) Nave ninniweha wuncerereyaka olaleiwa wa ihapari sooreera olumwenku wootheene, ovikana khalai. Nave-tho atthu imilyau sinceene annithanla omurumeela Yehova. (Yes. 60:22; Math. 24:14) Khaninliyala eyoolya nnaakhela ahu yeeyo enlipiha waamini wahu “okathi wooreerela”. — Math. 24:45-47.
2. Exeeni ninreerela ahu okupali ni wuupuwelela?
2 Khula okathi, Yehova onninikhaliherya wiiwexexa oratteene itthu sihinatthi wiiraneya. (Mir. 4:18; Dan. 2:28) Nikupaliki wiira okathi maxakha maalupale anrowa aya opacerya, nnoosuwela etthu yoopaka wiira nihihiye ororomeleya wa Yehova ni okhala oowiiraana. Nave ti vooloka wuupuwela wiira khanisuwenle itthu sikina sinrowa wiiraneya muhoolo. Mwaha ola nnoothokorerya marukunuxo nipanke ahu moovarihana ni itthu nniiwexexa ahu. Nuumala-vo, nnoorowa wuupuxeriwa itthu ninsuwela ahu sa muhoolo ni moota Tiithi ahu, Yehova onrowa awe opaka itthu iyo.
ITTHU NIHINSUWELA AHU
3. Khalai, xeeni naahimya ahu wiira atthu khiyaarowa woopowa okathi wa maxakha maalupale, ni mwaha wa xeeni?
3 Khalai, nuupuwela wiira vaavo maxakha maalupale yaarowa aya opacerya, khuuvo aarowa okhalana eparakha ya omurumeela Yehova aahiiso woopowa okathi wa Armagedoni. Ninnihimya siiso, mwaha woowi nuupuwela wiira etthu yiiraneyale okathi wa Epula ya Mutaaseke, yaarowa wiiraneya etthu emosa-ru okathi wa ekhotto ya Armagedoni. Mwa ntakiheryo, hiyo naanikupali wiira siisaale Yehova aawanle awe mukhora wiira atthu ahikele mukalawani, mwa enamuna emosa-ru, khuuvo-tho aarowa omurumeela Yehova aahiiso woopowa okathi wa maxakha maalupale. — Math. 24:37-39.
4. Xeeni nihinreerela ahu ohimya wiira itthu siiraneyale mahiku a Nowe sinrowa wiiraneya itthu simosa-ru muhoolo?
4 Niireke vaarowa okhala vooloka, ohimya wiira etthu yiiraneyale okathi wa Mutaaseke enimwiiraneya etthu emosa-ru muhoolo? Waakhuliwa waya ti woowi nnaari. Mwaha wa xeeni? Mwaha woowi Biibiliya khonihimya eyo. a Ekeekhai wiira Yesu aahilikanyiha okathi onrwa awe ni “mahiku a Nowe”. Masi owo khaalikanyinhe itthu siiraneyale okathi ole ntoko owaliwa wa mukhora ni itthu sinrowa wiiraneya muhoolo. Hiyo ninniixutta itthu sinceene voohimya sa Nowe ni itthu siiraneyale okathi ole wa Mutaaseke.
5. a) Moota xeeni Nowe oonihenrye awe waamini? (aHeeberi 11:7; 1 Pedru 3:20) b) Mwa enamuna xeeni muteko ninvara ahu olelo-va, onlikana aya ni moota Nowe aalaleerya awe?
5 Okathi Yehova aamulenle awe Nowe itthu saarowa wiiraneya, owo aahaamini ni aahipacerya oteka ekalawa. (Mmusome aHeeberi 11:7; 1 Pedru 3:20.) Moolikanasa, vaavo atthu aniiwa aya ihapari sooreera voohimya sa Omwene wa Muluku, awo ahaana weettela itthu yiixuntte aya. (Mit. 3:17-20) Pedru aahimuhimya Nowe okhala mutthu “aalaleya exariya”. (2 Ped. 2:5) Ntoko niwenhe ahu mwaha ovinre, hiyo khaninsuwela akhala wiira Nowe aahiwerya omulaleerya khula mutthu a okathi ole. Olelo-va, ninniimananiha vanceene wiira naalaleerye atthu olumwenku wootheene, nave ninnipaka eyo mwa enamuna yooloka. Hata niimananihaka vanceene, khaninrowa owerya waalaleerya atthu ootheene olumwenku ola ohinatthi omala. Mwaha wa xeeni?
6-7. Xeeni ninhimya ahu wiira khaninrowa waalaleerya atthu ootheene ohinatthi ophiya wanikisa? Mutthokiherye.
6 Nkuupuwelani etthu Yesu aalavunle awe voohimya sa muteko woolaleerya. Owo aahimmye wiira: Ihapari sooreera sa omwene “sinoolaleiwa elapo yotheene, wiira atthu otheene yiiwe”. (Math. 24:14) Olelo-va, eprofesia ela ennitepa wiiraneya ovikana khalai. Ihapari sooreera sa Omwene, sinnilaleiwa mattaava oowiiraka 1.000, nave atthu anceene anikhala valaponi, anoowerya wiixutta voohimya sa Omwene wa Muluku arumeelaka esaiti jw.org.
7 Masi Yesu aahaaleela awiixutti awe wiira khiyaarowa omaliha “weetta mittetthe sootheene”, aahiiso khiyaarowa owerya omulaleerya khula mutthu, nihinatthi ophiya nihiku noophukela. (Math. 10:23; 25:31-33) Nave-tho masu ala a Yesu, annivareleya muteko mahiku ahu ala. Imilyau sinceene sa atthu, anikhala mapuro yaale nihinwerya ahu olaleerya mootaphuwa. Ohiya-vo, khula minuutu aniyariwa anamwane. Masi hata vari siiso, hiyo ninnipaka ele eniwerya ahu wiira naalaleerye ihapari sooreera “atthu anikhala mulaponi, atthu a maloko otheene ni a mahimo otheene”. (Wiis. 14:6) Ekeekhai ti yoowi, khaninrowa owerya waalaleerya atthu ootheene wanikisa ohinatthi ophiya.
8. Nikoho xeeni nikhanle ookhumelela sa moota Yehova onrowa awe waaphukela atthu muhoolo? (Nwehe ifootu.)
8 Masi moovarihana ni ittima nithokorenrye ahu, pooti okhumelelaka makoho ntoko ala: Exeeni enrowa owiiraneela atthu yaale woonasa wene ahinrowa okhalana eparakha ya wiiwa ihapari sooreera, ahinatthi opacerya maxakha maalupale? Yehova ni Yesu yoowo ororomeliwe ni Tiithi awe wiira aaphukeleke atthu, anrowa owiiriha exeeni atthu awo? (Yoh. 5:19, 22, 27; Mit. 17:31) Yoolepa ekumihiwe aya mwaha ola, enihimya wiira Yehova “khoniphavela wira mutthu opwetexiwe”. Ohiya-vo, owo oniphavela wiira “atthu otheene arukunuxe murima”. (2 Ped. 3:9; 1 Tim. 2:4) Nave hiyo, nihaana osuwela wiira Yehova khonatthi onileela moota onrowa awe waaphukela ale nlelo ahinatthi wiiwa ihapari sooreera. Ekeekhai wiira Yehova, khonikhanyereriwa onileela etthu opanke awe ni ele onrowa awe opaka muhoolo.
Exeeni Yehova onrowa awe owiiriha atthu yaale woonasa wene yahaarina eparakha yoowiiwa ihapari sooreera, ehinatthi maxakha maalupale?(Nwehe ettima 8) c
9. Etthu xeeni Yehova onrowa awe opaka muhoolo?
9 Omurumeelaka Biibiliya, Yehova onninleela itthu sikina sinrowa awe opaka muhoolo. Mwa ntakiheryo, vaavo ninsoma ahu mbiibiliyani, ninnoona wiira Yehova onoorowa waahihimuxa “ale ahikhanle anaxariya”, aahiiso ale yahaarina eparakha ya wiiwa ihapari sooreera ni oturuka mweettelo aya. (Mit. 24:15; Luka 23:42, 43) Nto eyo, enniiriha okhumelela nikoho nirina efaita yinceene.
10. Makoho xeeni makina akhanle ookhumelela?
10 Niireke atthu ootheene anrowa oopwetexiwa okathi wa maxakha maalupale, khanrowa-tho okhalana nlipelelo na ohihimuxiwa? Biibiliya, onnitthokiherya oratteene wiira yaale anrowa omurukunuwela Yehova, anoopwetexiwa okathi wa Armagedoni ni khanrowa okhalana-tho eparakha ya ohihimuxiwa. (2 aTes. 1:6-10) Masi atthu akina okathi wa maxakha maalupale, woonasa wene pooti okhwa mwaha wa mathowa oovirikana. Mwa ntakiheryo, animookhwa mwaha wa eretta, wuuluvala, mwaha wa asitenti aahiiso wiiviwa ni mutthu mukina. Masi exeeni enrowa owiiraneela atthu awo? (Mus. 9:11; Zak. 14:13) Masi niireke atthu awo anrowa okhala vamosa ni “ale ahikhanle anaxariya”, yaawo anrowa ohihimuxiwa elapo esya? Hiyo khaninsuwela waakhuliwa waya.
ETTHU NINSUWELA AHU
11. Okathi wa Armagedoni, atthu anrowa ophukeliwa moovarihana ni exeeni?
11 Sookhala itthu sikina ninsuwela ahu sinrowa wiiraneya muhoolo. Mwa ntakiheryo, noosuwela wiira okathi wa Armagedoni, atthu anrowa ophukeliwa moovarihana ni moota yaathokorerya aya axinnawe Kristu. (Math. 25:40) Ale yaakhaliherya makristau oothanliwa vamosa ni Kristu, anrowa ophukeliwa ntoko ipwittipwitthi. Nave-tho ninnisuwela wiira makristau makina oothanliwa, yaawo anrowa wiiraka nlelo ari ene valaponi yapacerya maxakha maalupale, anoorowa wiirimu ehinatthi ekhotto ya Armagedoni. Okhala wiira makristau makina oothanliwa anrowa wiiraka aryeene valaponi, woonasa wene atthu akina ooreera murima pooti ophavelaka waakhaliherya ni okhaliherya muteko anivara aya. (Math. 25:31, 32; Wiis. 12:17) Xeeni vari aya va faita osuwela itthu iyo?
12-13. Muupuwelo xeeni woonasa wene anamunceene anrowa aya okhalana nuumala onweha “Babiloonia Muulupale” opwetexiwaka? (Nwehe ifootu.)
12 Yapacerya maxakha maalupale, woonasa wene atthu akina anrowa onweha “Babiloonia Muulupale” opwetexiwaka, animuupuwela wiira mwa iyaakha sinceene Anamoona a Yehova yaanilaleya itthu sinrowa wiiraneya. Niireke atthu awo pooti opacerya omwaamini Yehova? — Wiis. 17:5; Ezek. 33:33.
13 Vakhala wiira eyo enimwiiraneya, enoorowa onuupuxerya etthu yiiraneyale iyaakha sinceene wExiitu okathi wa Moise. Muupuwele wiira “atthu akina anjene” yaahaahoola aIsarayeli okathi yaakhuma aya wExiitu. Woonasa wene, akina a yaawo yaahipacerya omwaamini Yehova nuumala oweha siiraneyaka Ihukhumu Muloko Moise aalaleya awe. (Okhum. 12:38) Moolikanasa, nuumala Babiloonia opwetexiwa, niireke nnoorowa oxankiheya ni woona okhala voohixariya atthu akina otakaahana ni hiyo? Nnaari! Masi hiyo nimphavela okhala ntoko Tiithi ahu, yoowo ori “Muluku oomoriwa ikharari ni oovilela, oopisa onanariwa, ooreera murima ni oororomeleya”. b — Okhum. 34:6.
Atthu akina anrowa onweha “Babiloonia Muulupale” opwetexiwaka, animuupuwelela wiira Anamoona a Yehova yaanihimya mwa iyaakha sinceene etthu yaarowa wiiraneya.(Nwehe ittima 12-13) d
14-15. Niireke nlipelelo na okumi woohimala na mutthu, ninlipa ni okathi onikhwa awe ni opuro onikhala awe? Mutthokiherye. (Esalimo 33:4, 5)
14 Ikwaha sikina, woonasa wene ninniwiiwa anna ni arokora alavulaka voohimya sa mmusi aya, ahimyaka so: “Vaarowa okhala vooloka aakhwiiye ahinatthi opacerya maxakha maalupale, okhala wiira aamukhalana eparakha ya ohihimuxiwa”. Okhala wene, mutthu pooti olavula eyo ni mathowa ooloka. Masi nlipelelo na okumi woohimala mutthu orina awe, khaninlipa ni okathi mutthu onrowa awe okhwa. Yehova namaphuka oohittheka, owo onnipaka eyo mwa enamuna yooloka ni mwa xariya. (Musome Esalimo 33:4, 5.) Nto nikupaliki wiira ‘Mulamuli a elapo yootheene’ khula okathi onrowa opakaka itthu mwa enamuna yooloka. — Maph. 18:25.
15 Nave nihaana osuwela wiira nlipelelo na okumi woohimala wa muhoolo khaninlipa ni opuro mutthu onikhala awe. Yehova khaakhala-khala aaphukelaka atthu imilyau sinceene ni waathokorerya ntoko “ipuri”, mwaha woowi atthu ankhala mapuro ihapari sooreera sa Omwene wa Muluku sihilaleiwale aya. (Math. 25:46) Vakhala wiira hiyo ninnaathokorerya atthu awo, ankhi Yehova oniwoonela sai? Mukhulupale a xariya a elapo yootheene, onnaathokorerya vanceene atthu awo. Hiyo khanikhanle osuwele etthu Yehova onrowa awe owiirela okathi wa maxakha maalupale. Woonasa wene, akina a yaawo nuumala woona etthu enrowa wiiraneya okathi wa maxakha maalupale, pooti opaceryaka omwaamini Yehova ni okhala mpantta awe, vaavo onrowa awe otteeliha nsina nawe elapo yootheene. — Ezek. 38:16.
Niireke atthu akina pooti oturuka moonelo aya, . . . nuumala opacerya maxakha maalupale?
16. Exeeni ninsuwela ahu voohimya sa Yehova? (Nwehe eteseenyo.)
16 Mwaha wa yoosoma ahu ya Biibiliya, nihiixutta wiira khula mutthu ookhalana efaita yinceene vamaithoni va Yehova. Owo oovaha okumi wa Mwanawe mmoseene, wiira atthu anceene akhalane eparakha ya okumi yoohimala. (Yoh. 3:16) Ootheene ahu, ninniwerya oweha moota Yehova onniphenta awe. (Yes. 49:15) Owo onnisuwela nsina na khula mutthu. Nave onninisuwela oratteene nto hata nikhwaaka onoonihihimuxa sintoko naari ahu aahiiso ni muupuwelo naarina ahu. (Math. 10:29-31) Hiyo khanikhanle oowaanyiherya wiira Tiithi ihu a wiirimu, onoorowa omphukela khula mmosa mwa xariya, moomoriwa ikharari ni ankhili. — Yak. 2:13.
Nikupaliki wiira Yehova onomphukela khula mmosa a hiyo mwa xariya, moomoriwa ikharari ni ankhili. (Nwehe ettima 16)
17. Exeeni ninrowa ahu othokorerya mwaha onittharelana?
17 Okhala wiira noosuwela wiiwexexa nno wa niinaano, nto nihaana okhalela nthiti muteko ahu woolaleerya ovikana khalai. Xeeni ninnihimya ahu siiso? Exeeni enniiriha okhalela nthiti muteko woolaleya ihapari sooreera? Nnoothokorerya waakhuliwa wa makoho ala mwaha onittharelana.
NSIPO 76 Nooneleke Sai Olaleerya?
a Wiira musuwele etthu yiirinhe opakiwa marukunuxo ala, nwehe mwaha oni: “Esse é o modo aprovado por ti” ori Owehaweha 15 a Março 2015 ipaax. 7-11.
b Nuumala Babiloonia Muulupale opwetexiwa, arumeyi ootheene a Yehova animweehereriwa, okathi yoowo anrowa aya otupheliwa ni Gogi a oMagogi. Nave nuumala Babiloonia Muulupale opwetexiwa, ale anrowa ohala emukokhorelaka Muluku animweehereriwa.
c OTTHOKIHERIWA WA EFOOTU: Ifootu tthaaru sinooniherya nthowa naya vahiniweryaneya aya atthu akina wiiwa ihapari sooreera: (1) Muthiyana mmosa ori elapo onikhoottihiwa aya ohiya etiini oneetta awe, (2) Anamathelana ari elapo enikhoottihiwa aya ni vari aya vowoopiha wiixutta ekeekhai ni (3) Mulopwana onikhala elapo makhalelo ari aya ooxankiha ni vahiniweryaneya aya olaleiwa ihapari sooreera.
d OTTHOKIHERIWA WA EFOOTU: Mwali mmosa yoowo ohiyale omurumeela Yehova, onnuupuwelela itthu aixuntte awe voohimya sa opwetexiwa wa “Babiloonia Muulupale”. Owo onnuupuwelela omutthikela Yehova ni ovekela nikhaliheryo na anamuyari awe. Vakhala wiira enooniiraneela etthu emosa-ru, hiyo nimphavela omutakiha Yehova yoowo ori Tiithi ihu oophenta ni oomoriwa ikharari. Nave nihaana ohakalalaka ni ale alakenle omutthikela Yehova.
