XANNAˈIYO HUUPHE YOHUWA 19
MAZAMURE 22 Kawotettay Eqqiis—Haa Yo!
Yihooway Mata Wode Pirddiyo Pirddaabaa Nuuni Eriyobay Aybee?
“Godai . . . ooninne xayana mala koyenna.”—2 PHE. 3:9.
TAMAARANABAA
Yihooway matan asaa bolli pirddiyo wode xillobaanne suurebaa pirddanaagaa ammanettana danddayoos.
1. Nuuni keehi ufayssiya wodiyan deˈoos giyoy aybisee?
NUUNI keehi ufayssiya wodiyan deˈoos! Geeshsha Maxaafay kasetidi odidobay polettiiddi deˈiyogaa nuuni ubba galla beˈoos. Leemisuwawu, ‘huuphessa kawoynne tohossa kawoy’ alamiya haaranawu koyiyo gishshawu, issoy issuwara olettiyogaa nuuni beˈoos. (Dane. 11:40) Xoossaa Kawotettaa mishiraachoy saˈaa ubban sabbakettiiddi deˈiyogaa nuuni eroos. Qassi daro miiloone asay Yihoowawu haggaazanawu dooriis. (Isi. 60:22; Mat. 24:14) Hegaa bollikka, kumi palahida ayyaanaabaa qumaa “koshshiyo wodiyan” demmoos.—Mat. 24:45-47.
2. Nuuni ammanettana danddayiyobay aybee, qassi nuuni akeekana koshshiyabay aybee?
2 Mata wode hanana gitabata nuuni loytti akeekanaadan Yihooway nuna ubbatoo maaddees. (Lee. 4:18; Dane. 2:28) Gita waayee doommiyo wode, nuuni ammanettidi deˈanaadan erana koshshiya ubbabaa eranaagaanne he keehi wayssiya wodiyan issippetettan deˈanaagaa ammanettana danddayoos. Shin sinttanaabaa xeelliyagan nuuni erenna issi issibati deˈiyogaa akeekana koshshees. Ha huuphe yohuwan, kase nuuni yootido gitabatuppe amaridaageeta laammana koshshidoy aybissakko koyro beˈana. Yaatidi sinttanaabaa xeelliyagan nuuni eriyo amaridabatanne saluwan deˈiya nu Aaway hegaadan oottiyo ogiya beˈana.
NUUNI ERENNABAA
3. Yihoowa ammanenna asay gita waayee doommiyo wode waananaagaa nuuni kase yootidoo, qassi nuuni hegaadan qoppidoy aybissee?
3 Gita waayee doommiyo wode, asay Yihoowa ammaniyonne Armmageedoona olaappe attiyo injjiya demmenna giidi kase yootida. Nuuni hegaa giidoy Bashshaa Haattaa wode asay huuphiyan huuphiyan, qassi hanotati ubbay sinttappe hananabaa bessoosona giidi qoppido gishshataassa. Leemisuwawu, Yihooway penggiya gorddi simmin ooninne markkabiya giddo gelana danddayibeennaagaadan, gita waayee doommiyo wode ooninne Yihoowa ammanananne attana danddayenna giidi qoppida.—Mat. 24:37-39.
4. Nohe wode hanida ubbabay ha wodiyan polettiyabaa bessees giidi qoppana koshshennay aybissee? Qonccissa.
4 Bashshaa Haattaa wode hanida ubbabay sinttappe hananabaa bessees giyogee likkee? Likke gidenna. Aybissi? Geeshsha Maxaafay hegaabaa yootenna gishshataassa. a Yesuusi I simmiyo wodiya ‘Nohe wodiyara’ geeddarissidoogee tuma. Shin I Nohe wode hanida ubbabay, hegeekka Yihooway markkabiya penggiya gorddidoogee sinttappe hananabaa bessees gibeenna. Gidoppe attin, hegaa giyogee Nohe taarikiyappenne Bashsha Haattaa wode hanidabaappe tamaarana danddayokko giyogaa gidenna.
5. (a) Bashshaa Haattaappe kase Nohee oottidobay aybee? (Ibraawe 11:7; 1 PHeexiroosa 3:20) (b) Sabbakiyo oosuwara gayttidaagan Nohe wodiyanne nu wodiya issi mala oottiyabay aybee?
5 Nohee Yihooway yootidobaa siyidi markkabiya keexxiyogan ammanuwa bessiis. (Ibraawe 11:7; 1 PHeexiroosa 3:20 nabbaba.) Hegaadankka, Xoossaa Kawotettaa mishiraachchuwa siyiya asay hegaa ammaniyogaa bantta oosuwan bessana koshshees. (Oos. 3:17-20) Pheexiroosi Noha ‘xillotettaabaa yootidaagaa’ giidi xeesiis. (2 PHe. 2:5) Shin kasetiya huuphe yohuwan nuuni beˈidoogaadan, Bashshaa Haattay yaanaappe kase Nohee saˈan deˈiya asa ubbawu sabbakidaakkonne nuuni erokko. Ha wodiyan kumetta saˈan deˈiya asawu nuuni sabbakanawu baaxetoos; qassi hegaa minni oottiiddi deˈoos. Shin nuuni ay keena baaxetikkokka, wurssettay yaanaappe kase ubba asawu sabbakana danddayokko. Aybissi?
6-7. Wurssettay yaanaappe kase nuuni mishiraachchuwa ubba asawu sabbakana danddayokko giyoy aybissee?
6 Sabbakiyo oosuwa xeelliyagan Yesuusi yootidobaa qoppa. ‘Ubba asawu markka gidana mala mishiraachchoy saˈaa ubban’ odettanaagaa I kasetidi yootiis. (Mat. 24:14) Awudeegaappenne aaruwan he hiraagay ha wodiyan polettiiddi deˈees. Xoossaa Kawotettaa mishiraachchuwabaa yootiyabay 1000ppe dariya qaalan deˈees, qassi jw.org saytiya baggaara ha wodiyan daro asay Xoossaa Kawotettaabaa yootiya mishiraachchuwa tamaarana danddayees.
7 Shin, Yesuusi bana kaalliyageeti I yaana gakkanaashin “katamata mule yuuyidi” wurssennaagaakka yootiis. (Mat. 10:23; 25:31-33) Yaaniyo gishshawu, Yesuusi asaa bolli pirddanawu yaanaappe kase nuuni ubba asawu sabbakana danddayokko. Ha wodiyan daro asay nuuni laˈatettan sabbakana danddayenna heeratun deˈees. Qassi, daqiiqan daqiiqan daro naati yelettoosona. Hegaa gishshawu, nuuni “zare ubbaayyo, qommo ubbaayyo, dumma dumma biittaa qaala ubbaayyo” mishiraachchuwa yootanawu nuussi danddayettida ubbabaa oottiyaba gidikkonne, wurssettay yaanaappe kase ubba asawu sabbakana danddayokko.—Ajj. 14:6.
8. Yihooway asaa bolli sinttappe pirddana pirddaabaa nuuni woygi oychchana danddayiyoo? (Misiliyakka xeella.)
8 Hegaappe denddidaagan, nuuni hagaadan oychchana danddayoos: Gita waayee doommanaappe kase mishiraachchuwa siyana danddayibeenna asaa bolli Yihoowaynne I sunttido A Naˈay waati pirddanee? (Yoh. 5:19, 22, 27; Oos. 17:31) Ha huuphe yohoy ekettido xiqisee Yihooway “ooninne xayana mala” koyennaagaa yootees. I “asai ubbai” attanaadan koyees. (2 PHe. 3:9; 1 Xim. 2:4) Nuuni Yihoowabaa hegaa erikkokka, mishiraachchuwa mule siyana danddayibeenna asaa bolli I waati pirddanaakko nuussi yootibeenna. Qassi I nuuyyo yootana koshshennaagee qoncce.
Gita waayee doommanaappe kase mishiraachchuwa siyana danddayibeenna asaa bolli Yihooway waati pirddanee? (Mentto 8 xeella) c
9. Geeshsha Maxaafaa baggaara Yihooway nuussi yootidobay aybee?
9 Yihooway I oottana amaridabata ba Qaalaa baggaara nuussi yootiis. Leemisuwawu, mishiraachchuwa siyiyonne bantta eeshshaa laammiyo injjiya demmibeenna ‘xillo gidenna asaa’ Yihooway hayquwappe denttanaagaa Geeshsha Maxaafay yootees. (Oos. 24:15, NW; Luq. 23:42, 43) Hagee keehi koshshiya hara oyshata oychchanaadan oottees.
10. Nuuni harabaa ay oychchana danddayiyoo?
10 Gita waayiya wode hayqqida asa ubbay dendduwa hidootay baynnan merinawu xayanee? Yihoowa eqettiya, qassi Armmageedoona olan Yihoowaynne A olanchchati xayssido asati hayquwappe denddennaagaa Geeshsha Maxaafay geeshshidi yootees. (2 Tas. 1:6-10) Leemisuwawu, gita waayiya wode, sahuwa, woy cimatettaa gaasuwan, woy daafabay gakkin, woykko asi worin hayqqida harati waananee? (Era. 9:11; Zak. 14:13) Etappe amaridaageeti ooratta alamiyan hayquwappe denddiya ‘xillo gidenna asatuura’ denddanee? Nuuni erokko.
NUUNI ERIYOBAA
11. Armmageedoona olaa wode issi uri pirddettanawu gaaso gidiyabay aybee?
11 Sinttanaabaa nuuni darobaa eroos. Leemisuwawu, Armmageedoona olaa wode asay Kiristtoosa ishanttussi oottidoban eta bolli pirddettanaagaa nuuni eroos. (Mat. 25:40) Tiyettidaageetuyyonne Kiristtoosawu exatiyogaa bessidaageeti dorssata geetettidi pirddettana. Kiristtoosa ishanttuppe amaridaageeti gita waayee doommi simmin saˈan takkanaagaanne Armmageedoona olay doommanaappe guutta kasetidi saluwa beennaagaa nuuni eroos. Kiristtoosa ishanttuppe amaridaageeti saˈan deˈido wode ubban, suure wozanay deˈiyo asay etanne eta oosuwa maaddiyo injjiya demmana danddayees. (Mat. 25:31, 32; Ajj. 12:17) Hagee keehi koshshiyoy aybissee?
12-13. Amaridaageeti ‘Gita Baablooni’ xayuwa beˈidi waanana danddayiyonaa? (Misiliyakka xeella.)
12 Gita waayee doommi simminkka, ‘Gita Baabilooni’ xayuwa beˈiya amaridaageeti Yihoowa Markkati hegee hananaagaa daro layttawu yootiiddi takkidoogaa hassayana danddayoosona. Gita waayiya wode, ‘Gita Baabilooni’ xayuwa beˈiya amaridaageeti Yihoowa ammananee?—Ajj. 17:5; Hiz. 33:33.
13 Hegaadan gidikko, Muuse wode Gibxxen hanidabaara hegee issi mala gidana. Israaˈeelati Gibxxeppe kiyiyo wode “hara daro asai” etaara kiyidoogaa hassaya. Muusee yootido Tammu Boshay polettidoogaa eti beˈido wode etappe amaridaageeti Yihoowa ammaniyogaa doommennan aggokkona. (Kes. 12:38) Gita Baabloona xaya simmin hegaa malabay hanikko, Armmageedoona olay doommanaappe guuttaa kasetidi asay nunaara walahettiyogee likke gidenna giidi nuuni qoppanee? Qoppennaagee qoncce! ‘Qaretaynne maarotay kumido, danddayanchchaa, aggenna siiqoy daridonne daro ammanettiya’ Xoossaa gidida saluwan deˈiya nu Aawaa milatanawu koyoos. b—Kes. 34:6.
‘Gita Baabilooni’ xayuwa beˈiya amaridaageeti Yihoowa Markkati hegee hananaagaa daro layttawu yootiiddi takkidoogaa hassayana danddayoosona (Mentto 12-13 xeella) d
14-15. Issi uri merinaa deˈuwa demmiyogee I hayqqiyo wodiyara woy I deˈiyo heeraara gayttidabee? Qonccissa. (Mazamure 33:4, 5)
14 Ishantti woy michchontti Yihoowawu haggaazenna bantta dabbuwa xeelliyagan issi issitoo hagaadan gaana danddayoosona: “I gita waayee doommanaappe kase hayqqikko awu loˈˈo; ayssi giikko, I hayquwappe denddana.” Loˈˈobaa qoppidi hegaadan giidoogee qoncce. Shin issi uri merinaa deˈuwa demmiyogee I hayqqiyo wodiyara gayttidaban gidenna. Yihooway wottiyobi baynna Daanna; I ubbatoo suurebaanne tumubaa kuuyees. (Mazamure 33:4, 5 nabbaba.) ‘Saˈaa ubbaa pirddiyagee’ suurebaa pirddiyogaa ammanettana danddayoos.—Doo. 18:25.
15 Issi uri merinawu deˈiyo hidootaa demmiyoy I deˈiyo heeraara gayttidaban gidenna giidi qoppiyogeekka bessiyaba. Daro miiloone asay Kawotettaa mishiraachchuwa mule siyana danddayenna biittatun deˈiyo gishshawu Yihooway eta deeshshata giidi pirddennaagaa ammanettana danddayoos. (Mat. 25:46) Saˈaa ubbaa xillotettan pirddiyagee nuuppe aaruwan etassi qoppees. Gita waayiya wode Yihooway waatanaakko nuuni erokko. Yihooway kawotettatu sinttan ba geeshshatettaa bessiyo wode, etappe amaridaageeti abaa tamaarana, A ammanananne awu exatana danddayoosona.—Hiz. 38:16.
Gita waayiya wode, ‘Gita Baabilooni’ xayuwa beˈiya amaridaageeti Yihoowa ammananee?
16. Yihoowabaa nuuni eriyobay aybee? (Misiliyakka xeella.)
16 Yihooway asaa xoqqu ootti xeelliyogaa nuuni Geeshsha Maxaafaa xannaˈidi akeekida. Nuuni ubbay merinaa deˈuwa demmanaadan I ba Naˈaa deˈuwa nuussi immiis. (Yoh. 3:16) Yihooway nuna ubbaa siiqees. (Isi. 49:15) I nuna ubbaa nu sunttan sunttan erees. Nuuni hayqqikkokka, I nuna loytti eriyo gishshawu nuna hayquwappe denttana danddayees; ayssi giikko I nubaa ubbabaanne nu hassayiyo ubbabaa dogenna! (Mat. 10:29-31) Siiqiya saluwan deˈiya nu Aaway aadhdhida eranchcha, xillonne maariyagaa gidiyo gishshawu ubba asaa wottiyobi baynna ogiyan pirddanaagaa nuuni ammanettiyo loˈˈo gaasoy deˈees.—Yaaq. 2:13.
Yihooway aadhdhida eranchcha, xillonne maariyagaa gidiyo gishshawu ubba asaa wottiyobi baynna ogiyan pirddanaagaa ammanettana danddayoos (Mentto 16 xeella)
17. Nuuni kaalliya huuphe yohuwan ay pilgganee?
17 Ha laamettida qofay sabbakuwa oosoy awudeegaappenne aaruwan eesoyiyaba gidiyogaa nuna hassayissees. Nuuni hegaadan giyoy aybissee? Qassi nuuni aggennan minni sabbakanaadan oottiyabay aybee? Kaalliya huuphe yohuwan ha oyshatu zaaruwa loytti pilggana.
MAZAMURE 76 Nena Ufayssennee?
a Laamettido gaasuwa loytta eranawu, Laappune 15, 2015 Wochchiyo Keelan sinttaa 7-11n deˈiya, “Hagee Ne Shenedan Haniis” giya huuphe yohuwa xeella.
b Gita Baabiloona xaya simmin, Maagooga Googi qohuwa gattiyo wode Yihoowa ashkkarati ubbay paacettana. Qassi Gita Baabiloona xaya simmin Xoossaa asaara walahettida ubbay paacettana.
c MISILIYA QOKNCCISSUWA: Heezzu misilee mishiraachchoy amaridaageeta gakkana danddayibeenna gaasuwa qonccissees: (1) Waannatiya haymaanootee qohuwa gattana danddayiyo heeran deˈiya issi maccaasiyo, (2) polotikaa hanotay diggiyonne qohuwa gattana danddayiyo heeran deˈiya issi azinaanne machchiyo, qassi (3) asi gakkana danddayenna keehi haaho sohuwan deˈiya issi bitaniya.
d MISILIYA QONCCISSUWA: Yihoowawu haggaaziyogaa aggida issi yelagiya ‘Gita Baabilooni’ xayuwa xeelliyagan kase tamaaridobaa hassayawusu. A Yihoowakko simmanawu kuuyada Yihoowa Markka gidida bana yelidaageetukko simmaasu. Hegaa malabay hanikko, maariyanne qarettiya, qassi nagaranchchay simmiyogan ufayttiya saluwan deˈiya nu Aawaa milatanawu koyoos.
