1. Kay ano nga makakasiring kita nga nabubuhi kita ha eksayting nga mga panahon?

 NABUBUHI kita ha eksayting nga mga panahon! Kada adlaw, nakikita naton nga natutuman an tagna han Biblia. Pananglitan, nakikita naton nga “an hadi han norte” ngan “an hadi han sur” nagkukompetensyahay kon hin-o an magkukontrol han kalibotan. (Dan. 11:​40, ftn.) Nakikita naton nga iginsasangyaw ha bug-os nga kalibotan an maopay nga sumat han Ginhadian han Dios, ngan minilyon nga tawo an nagdesisyon nga mag-alagad kan Jehova. (Isa. 60:22; Mat. 24:14) Ngan nakakakarawat kita hin hura nga espirituwal nga pagkaon “ha husto nga panahon.”—Mat. 24:​45-47.

2. Ha ano kita makakasiguro, pero ano an dapat naton akseptaron?

² Padayon kita nga ginbubuligan ni Jehova nga magkaada mas klaro nga pagsabot ha dagku nga panhitabo nga hirani na matuman. (Prob. 4:18; Dan. 2:28) Makakasiguro kita nga ha panahon nga magtikang na an daku nga kasakitan, mahibabaroan naton an ngatanan nga kinahanglan ta mahibaroan basi makailob nga matinumanon ngan magpabilin nga nagkakaurosa hiton makuri nga panahon. Pero dapat naton akseptaron nga may pipira nga butang an aton diri nahibabaroan mahitungod ha hirani na nga tiarabot. Hini nga artikulo, hihisgotan naton siyahan kon kay ano nga ginbag-o an aton mga ginsiring ha naglabay mahitungod ha pipira hito nga panhitabo. Katapos, aton rirepasuhon an pipira nga butang nga aton la nahibabaroan mahitungod ha tiarabot ngan kon paonan-o magios an aton langitnon nga Amay.

 KON ANO AN ATON DIRI NAHIBABAROAN

3. Ano an aton ginsiring hadto mahitungod ha kon san-o an mga tawo waray na higayon nga dumapig kan Jehova, ngan kay ano nga nakasiring kita hito?

³ Ha naglabay, nagsiring kita nga kon magtikang na an daku nga kasakitan, an mga diri tumuroo waray na higayon nga dumapig kan Jehova ngan matalwas ha Armagedon. Nakasiring kita hito kay ginhunahuna naton hadto nga an rekord mahitungod ha Baha may katugbang nga panhitabo ha aton panahon. Pananglitan, ginhunahuna naton hadto nga sugad la nga ginsadhan ni Jehova an purtahan han arka antes magtikang an Baha, ha pagtikang han daku nga kasakitan, iya liwat “sasadhan an purtahan” basi diri makasulod o makatalwas an bisan hin-o nga tawo nga tikang ha sistema ni Satanas.—Mat. 24:​37-39.

4. Kay ano nga diri na kita naghuhunahuna nga an ngatanan nga nahitabo ha panahon ni Noe may daku nga katumanan yana? Isaysay.

⁴ Tama ba nga hunahunaon nga an kada tagsa nga nahitabo ha panahon han Baha may ginrirepresentaran ha mahitatabo ha tiarabot? Diri. Kay ano? Kay waray ginsisiring an Biblia mahitungod hito. a Iginkompara ni Jesus an “mga adlaw ni Noe” ha panahon han iya presensya, pero waray hiya magsiring nga an ngatanan nga nahitabo ha panahon ni Noe may daku nga katumanan ha tiarabot, pananglitan, han ginsadhan ni Jehova an purtahan han arka. Kondi diri ini nagpapasabot nga waray kita mahibabaroan tikang ha rekord ni Noe ngan ha Baha.

5. (a) Paonan-o iginpakita ni Noe an iya pagtoo antes an Baha? (Hebreo 11:7; 1 Pedro 3:20) (b) May kalabotan ha pagsangyaw nga buruhaton, paonan-o an aton sitwasyon yana pariho han adlaw ni Noe?

⁵ Han nabatian ni Noe an nagpapahamangno nga mensahe ni Jehova, ginpamatud-an niya nga may-ada hiya pagtoo pinaagi ha paghimo han arka. (Basaha an Hebreo 11:7; 1 Pedro  3:20.) Ha pariho nga paagi, an mga tawo nga nakabati han maopay nga sumat mahitungod ha Ginhadian han Dios dapat gumios ha kon ano an ira nabatian. (Buh. 3:​17-20) Gintawag ni Pedro hi Noe nga “parasangyaw han katadongan.” (2 Ped. 2:5) Pero sugad han ginhisgotan ha nauna nga artikulo, diri kita maaram kon nanguna ba hi Noe ha pagsangyaw nga buruhaton basi masumatan an ngatanan nga tawo ha tuna antes an Baha. Yana, kaapi kita ha bug-os-kalibotan nga pagsangyaw nga buruhaton, ngan naniningkamot kita nga magin madasigon ha pakigbahin hito. Bisan pa han aton paningkamot, posible nga diri naton masangyawan an ngatanan antes umabot an kataposan. Kay ano?

6-7. Kay ano nga makakasiring kita nga diri naton masasangyawan an ngatanan ha bug-os nga tuna han maopay nga sumat antes umabot an kataposan? Isaysay.

⁶ Pansina kon ano an ginsiring ni Jesus mahitungod han aton pagsangyaw nga buruhaton. Hiya nagtagna nga an maopay nga sumat isasangyaw “ha bug-os nga inuukyan nga tuna sugad nga pamatuod ha ngatanan nga nasud.” (Mat. 24:14) Ito nga tagna mas natutuman na gud yana. Iginpublikar an mensahe han Ginhadian ha sobra 1,000 nga linggwahe, ngan pinaagi han jw.org nga website, available na ito ha kadak-an nga populasyon han kalibotan.

⁷ Pero ginsidngan liwat ni Jesus an iya mga disipulo nga diri nira “matatapos paglibot an mga syudad,” o masasangyawan an ngatanan, antes hiya umabot. (Mat. 10:23; 25:​31-33) An mga pulong ni Jesus tinuod liwat ha aton panahon. Minilyon nga tawo yana an naukoy ha mga lugar nga igindidiri gud an pagsangyaw nga buruhaton. Dugang pa, ginatos an natatawo kada minuto. Salit diri naton masasangyawan an ngatanan ha bug-os nga tuna antes umabot an kataposan, bisan pa kon ginhihimo naton an aton pinakamaopay basi masangyawan an mga tawo nga tikang “ha tagsa nga nasud ngan tribo ngan pinulongan.”—Pah. 14:6.

8. Ano an bangin naton igpakiana mahitungod ha mga paghukom ni Jehova ha tiarabot? (Kitaa liwat an mga piktyur.)

⁸ Salit may nabangon nga pakiana: Kumusta naman adton bangin waray higayon nga makabati han maopay nga sumat antes magtikang an daku nga kasakitan? Ano an bubuhaton ha ira ni Jehova ngan han iya Anak, nga iya gintaporan ha paghukom? (Juan 5:​19, 22, 27; Buh. 17:31) An tema nga teksto hini nga artikulo nasiring nga “diri [ni Jehova] karuyag nga mabungkag an bisan hin-o.” Lugod, karuyag niya nga “magbasol an ngatanan.” (2 Ped. 3:9; 1 Tim. 2:4) Bisan pa hito, dapat naton akseptaron nga waray pa ni Jehova isumat ha aton kon ano an iya bubuhaton sugad nga baton hini nga pakiana. Syempre, diri hiya obligado nga sumatan kita mahitungod han iya ginbuhat o bubuhaton.

9. Ano an iginsumat ha aton ni Jehova ha Biblia?

⁹ Ha Pulong ni Jehova, ginsumatan kita niya han pipira nga butang nga iya bubuhaton. Pananglitan, an Biblia nasiring ha aton nga babanhawon ni Jehova an “mga diri magtadong” nga tawo nga waray mahatagi hin higayon nga mahibaro mahitungod ha maopay nga sumat ngan bag-uhon an ira panggawi. (Buh. 24:15; Luc. 23:​42, 43) Tungod hito, nabangon an iba pa nga importante nga pakiana.

10. Ano nga iba pa nga pakiana an nabangon?

¹⁰ An ngatanan ba nga mamamatay ha daku nga kasakitan mabubungkag ha kadayonan nga waray na paglaom nga mabanhaw? Ginkaklaro han Kasuratan nga adton mga nakontra kan Jehova ngan ha iya kasundalohan bubungkagon ha Armagedon ngan diri na mababanhaw. (2 Tes. 1:​6-10) Pero kumusta man an iba nga tawo? Pananglitan, adton bangin mamatay ha panahon han daku nga kasakitan tungod han  sakit o kalagas o tungod han aksidente o ginpatay? (Ecles. 9:11; Zac. 14:13) Posible ba nga an pipira hini nga tawo kaapi han “mga diri magtadong” nga babanhawon ha bag-o nga kalibotan? Diri kita maaram.

KON ANO LA AN ATON NAHIBABAROAN

11. Ano an magigin basihan han paghukom ha mga tawo ha Armagedon?

¹¹ May pipira nga butang nga nahibabaroan naton mahitungod ha tiarabot nga mga panhitabo. Pananglitan, maaram kita nga ha Armagedon, an mga tawo huhukman pinaagi ha kon paonan-o nira gintratar an kabugtoan han Kristo. (Mat. 25:40) Ipapakita hadton ginhukman sugad nga mga karnero an ira suporta para ha mga dinihogan ngan ha Kristo. Maaram liwat kita nga an pipira han kabugtoan han Kristo aadi pa ha tuna katapos magtikang an daku nga kasakitan ngan diri pa dadad-on ha langit tubtob nga hirani na magtikang an Armagedon. Samtang an kabugtoan han Kristo aanhi pa ha tuna, posible nga an mga tawo nga may maopay nga kasingkasing may higayon pa nga suportaran hira ngan an buruhaton nga ira ginhihimo. (Mat. 25:​31, 32; Pah. 12:17) Kay ano nga importante ito nga mga kamatuoran?

12-13. Ano an bangin magin reaksyon han pipira katapos makita an kabungkagan han “Babilonya nga Gamhanan”? (Kitaa liwat an mga piktyur.)

¹² Bisan kon magtikang na an daku nga kasakitan, posible nga an pipira nga nakakita han kabungkagan han “Babilonya nga Gamhanan” makakahinumdom nga an mga Saksi ni Jehova maiha na nga nagyiyinakan hini nga panhitabo. Posible ba nga tumoo kan Jehova an pipira nga makakakita hini nga mga panhitabo?—Pah. 17:5; Ezek. 33:33.

¹³ Kon ito an mahitabo, magigin pariho ito ha kon ano an nahitabo ha Ehipto ha panahon ni Moises. Hinumdumi nga “usa ka daku hinduro nga grupo han magkadurodilain nga mga tawo” an inupod ha mga Israelita han binaya hira ha Ehipto. An pipira hini nga indibiduwal bangin nagtikang tumoo kan Jehova han nakita nira nga natuman an mga pahamangno ni Moises mahitungod han Napulo nga Peste. (Ex. 12:38) Kon puropariho hito an mahitabo katapos mabungkag an Babilonya nga Gamhanan, masusubo ba kita nga makakaupod ha aton an mga  tawo bisan kon hirani na umabot an kataposan? Syempre diri! Karuyag naton subaron an personalidad han aton langitnon nga Amay, nga “usa nga Dios nga maloloy-on ngan mapinairon, diri madagmit masina ngan hura hin maunungon nga gugma ngan kamatuoran.” b—Ex. 34:6.

14-15. An oportunidad han usa nga tawo nga mabuhi ha waray kataposan nakadepende ba kon san-o hiya mamamatay o kon diin hiya naukoy? Isaysay. (Salmo 33:​4, 5)

¹⁴ Usahay, may nababatian kita nga nasiring, “Mas maopay na la kon mamamatay an akon mga paryente antes magtikang an daku nga kasakitan basi may paglaom hira nga mabanhaw.” Sigurado nga may maopay nga mga motibo kon kay ano nga ginsiring ito. Pero an paglaom nga kinabuhi nga waray kataposan han usa nga tawo diri nakadepende kon san-o hiya mamamatay. Hi Jehova perpekto nga Hukom—matadong ngan may hustisya an iya mga desisyon. (Basaha an Salmo 33:​4, 5.) Makakasarig kita nga bubuhaton han “Hukom han bug-os nga tuna” kon ano an tama.—Gen. 18:25.

¹⁵ Makatadunganon liwat hunahunaon nga an oportunidad han usa nga tawo nga mabuhi ha waray kataposan diri nakadepende kon diin hiya naukoy. Diri gud dayon huhukman ni Jehova sugad nga “mga kanding” an minilyon nga tawo nga naukoy ha katunaan nga waray gud magkaada oportunidad nga mahibaro ha mensahe han Ginhadian. (Mat. 25:46) Diri gud naton matutupngan an gugma han matadong nga Hukom han bug-os nga tuna para hini nga mga tawo. Diri kita maaram kon paonan-o ni Jehova mamaniobrahon an mga panhitabo ha panahon  han daku nga kasakitan. Posible nga an pipira hini nga tawo magkaada oportunidad nga mahibaro mahitungod kan Jehova, tumoo ha iya, ngan dumapig ha iya kon baraanon na niya an iya kalugaringon ha atubangan han ngatanan nga nasud.—Ezek. 38:16.

16. Ano an aton nahibaroan mahitungod kan Jehova? (Kitaa liwat an piktyur.)

¹⁶ Pinaagi han aton pag-aram ha Biblia, nahibaro kita kon ano gud kaimportante kan Jehova an kinabuhi han tawo. Iginhatag niya an kinabuhi han iya Anak basi kita ngatanan magkaada oportunidad nga mabuhi ha waray kataposan. (Juan 3:16) Inaabat naton ngatanan an kan Jehova malumo nga pagpalangga. (Isa. 49:15) Maaram hiya han ngaran han kada tagsa ha aton. Ngani, kilala kita niya hin maopay sugad nga mga indibiduwal nga kon mamatay man kita, kaya kita niya larangon utro kay nahinunumdoman niya an tagsa nga detalye parte ha aton pagkatawo ngan mga eksperyensya! (Mat. 10:​29-31) Sigurado, may-ada kita maopay nga rason nga sumarig nga an aton mahigugmaon nga langitnon nga Amay maghuhukom ha kada tagsa nga tawo ha balanse gud, matadong, ngan maloloy-on nga paagi.—San. 2:13.

17. Ano an aton hihisgotan ha sunod nga artikulo?

¹⁷ Ha pagkamatuod, tungod hini nga mga pagbag-o inaabat naton nga an pagsangyaw nga buruhaton mas apurado na gud yana. Kay ano nga makakasiring kita hito? Ngan ano an makakaaghat ha aton nga padayon ngan madasigon nga isangyaw an maopay nga sumat? Hihisgotan naton hin detalyado an mga baton hini nga mga pakiana ha sunod nga artikulo.