STUDY ARTICLE 19
SONG 22 The Kingdom De Rule—Make E Come!
Wetin We Know About How Jehovah Go Judge People for Future?
“Jehovah . . . no want destroy anybody.”—2 PET. 3:9.
WETIN WE GO LEARN?
We go learn wetin go make us dey sure say when Jehovah go judge people for future, e go do-am for the correct way and e no go do partial.
1. Why we fit talk say many important things de happen for this our time?
MANY important things de happen for this our time. Everyday, we de see as wetin Bible talk de happen. For example, we de see as “the king of the north” and “the king of the south” de drag for who go control the world. (Dan. 11:40, ftn. for English.) We still de see how Jehovah people de preach the good news for the whole world and help plenty people come serve Jehovah. (Isa. 60:22; Matt. 24:14) And how Jehovah de give us wetin we need “for the correct time” to fit hold-am tight.—Matt. 24:45-47.
2. Wetin we dey sure of, but wetin we suppose know?
2 Jehovah de continue to make important things wey go soon happen clear to us. (Prov. 4:18; Dan. 2:28) We fit dey sure say before great tribulation start, Jehovah go help us know all the things wey we need to know, so that we go fit endure and continue to worship-am together. But e good make we know say, e get some things wey go happen for future wey we no know about. For this article, we go first talk about why we change some things wey we talk before say go happen for future. Then, we go talk about the things wey we know say go happen for future and wetin Jehovah go do.
WETIN WE NO KNOW
3. Wetin we be talk before say people no go fit do again when great tribulation start, and why we be talk like that?
3 We talk before say when great tribulation start, people no go fit join Jehovah organization and survive Armageddon. Why we be talk like that? Na because we be think say each person and each thing wey happen for Noah time, stand for wetin go happen for this our time. For example, we be think say just as Jehovah lock the door before the Heavy Rain start, na so e go close the chance to save people for Satan world when great tribulation start.—Matt. 24:37-39.
4. Why we no suppose talk say each thing wey happen for the time of Noah, stand for wetin go happen for future?
4 You think say e correct to talk say each thing wey happen for the time of Noah, stand for wetin go happen for future? The answer na no! Why? Because no place for Bible show say na so e be. a Na true say Jesus compare “the time of Noah” to when e go dey around. But e no talk say each thing wey happen for Noah time, stand for wetin go happen for future. For example, e no talk say just as Jehovah close the door of the ark, na so e go close the chance to save people. But, this one no mean say we no go fit learn from the story of Noah and the Heavy Rain.
5. (a) How Noah show say e get faith? (Hebrews 11:7; 1 Peter 3:20) (b) Just like Noah, no matter how we try reach for the preaching work, wetin we no go fit do?
5 When Noah hear say Jehovah want destroy wicked people, e build ark to save people, and this one show say e get faith. (Read Hebrews 11:7; 1 Peter 3:20.) For the same way, anybody wey hear the good news, suppose do wetin e de learn to show say e get faith. (Acts 3:17-20) Apostle Peter talk say, Noah “preach about wetin correct for God eye.” (2 Pet. 2:5) But as we don talk for the article before this one, we no know if Noah preach to everybody wey de live for this earth before the Heavy Rain fall. For this our time, we de try our best to make the good news spread reach everywhere for the world, and we de do-am with all our heart. But no matter how we try reach, we no go fit preach to each person for the whole world. Why we talk like that?
6-7. Why we fit talk say we no go fit preach to everybody for the whole world, before the end come? Explain.
6 Think about wetin Jesus talk when e de talk about the preaching work. E talk say im disciples go preach the good news “for the whole world, so that all the nations go hear-am.” (Matt. 24:14) This one wey Jesus talk de happen for this our time pass before. E pass 1,000 language wey Jehovah people de use preach the good news, and because of jw.org website, most people for this world today fit hear the good news about God Kingdom.
7 But Jesus still tell im disciples say them “no go fit go round all the cities,” or preach to everybody before e go come again. (Matt. 10:23; 25:31-33) Wetin Jesus talk go happen for this our time. One thing be say, millions of people de live for area wey we no get freedom to preach. Another thing be say, them de born plenty children everyday. We de do our best to fit preach to people for “every nation and tribe and language.” (Rev. 14:6) But the truth be say, we no go fit preach the good news to each person for the whole world before the end come.
8. Which question we fit ask? (Still check the picture.)
8 From wetin we don talk, we fit ask say: Wetin go happen to people wey no hear the good news before great tribulation start? How Jesus wey Jehovah don choose as Judge, go take judge their matter? (John 5:19, 22, 27; Acts 17:31) The Bible verse wey we take the topic of this article from talk say, Jehovah “no want destroy anybody but e want make everybody repent.” (2 Pet. 3:9; 1 Tim. 2:4) Even though say we know this one about Jehovah, we no know how e go judge people wey no ever get the chance to learn about-am. The truth be say no be must say Jehovah go tell us everything wey e don do and wey e go do.
How Jehovah go judge people wey no get the chance to hear the good news before great tribulation start? (Check paragraph 8) c
9. Wetin Jehovah don show us for Bible?
9 For Bible, Jehovah don tell us some of the things wey e go do. For example, Bible tell us say Jehovah go bring “people wey no do the correct thing” back to life. Them be people wey never get the chance to learn about Jehovah and change their bad life. (Acts 24:15; Luke 23:42, 43) This one fit make us ask other questions.
10. Which other questions we fit still ask?
10 Hope dey for people wey die for the time of great tribulation? Bible make-am clear say, anybody wey dey against Jehovah wey Armageddon destroy, no go come back to life. (2 Thess. 1:6-10) But what about other people? For example, some people for the time of great tribulation fit die because of sickness, old age, or accident, or e fit even be say na other people kill them. (Eccl. 9:11; Zech. 14:13) You think say some of them go dey among the “people wey no do the correct thing” wey Jehovah go bring back to life? The simple answer be say, we no know.
WETIN WE KNOW
11. Jehovah go judge people for Armageddon base on wetin?
11 We know some things about wetin go happen for future. For example, we know say for Armageddon, Jehovah go judge people base on how them treat Jesus brothers wey be the anointed. (Matt. 25:40) The people wey them go judge as sheep go don show say them support Jesus and the anointed. Another thing wey we know be say, some anointed Christians go still dey for this earth after great tribulation start, but them go go heaven just before Armageddon start. As far as say some anointed Christians go still dey this earth that time, e dey possible say people wey get good heart go still get the chance to support them and the work wey them de do. (Matt. 25:31, 32; Rev. 12:17) Why e dey important make we know this one?
12-13. Wetin some people fit do after them see say them don destroy “Babylon the Great”? (Still check the picture.)
12 Even after great tribulation start, e dey possible say some people wey see how them destroy “Babylon the Great” wey be all lie-lie religion, go remember say Jehovah Witness people don talk before say this one go happen. When some people see how them destroy all lie-lie religion, e fit make them put faith for Jehovah?—Rev. 17:5; Ezek. 33:33.
13 If e happen like that, e go just be like wetin happen for Egypt, for Moses time. Remember say “plenty different-different people” follow them comot from Egypt. E fit be say some of them start to get faith, when them see say the things wey Moses talk about the Ten Punishment really happen. (Ex. 12:38) If this kind thing happen after them destroy all lie-lie religion, e go make you feel one kind and no happy say some people join us just small time before the end come? No, we no suppose feel like that! We want be like our Papa for heaven, ‘wey get pity, get soft-heart, no de vex quick-quick, na only truth e de talk, and e de show love wey no de fail for plenty way.’ b—Ex. 34:6.
When some people see as them destroy “Babylon the Great,” them fit remember say Jehovah Witness people don talk before say e go happen (Check paragraph 12-13) d
14-15. Jehovah go judge people base on the time wey them die or where them de stay? Explain. (Psalm 33:4, 5)
14 Some people fit don talk about their family members wey no serve Jehovah before them die say, “E better as them die before great tribulation start, because hope dey say God fit bring them back to life.” We know say na the good mind wey them get make them talk like that. But Jehovah decision to bring person back to life no depend on the time wey the person die. Jehovah na Judge wey no de make mistake, so e de always judge for the correct way and e no de do partial. (Read Psalm 33:4, 5.) We dey sure say “the Judge of the whole earth” go do wetin correct.—Gen. 18:25.
15 Another thing be say, Jehovah decision to give person the chance to fit live forever no depend on where the person de stay. Plenty people dey wey never hear the good news because them de live for place wey make-am hard for them to hear-am. Jehovah no go judge them as “goats” base on where them de stay. (Matt. 25:46) Jehovah wey be the Judge of the whole earth, love them pass the way we fit ever love them or care about them. We no know how Jehovah go make things happen for great tribulation. E fit be say wetin some of them go see wey happen for great tribulation, go make them put faith for Jehovah and dey im side when e destroy wicked people.—Ezek. 38:16.
After great tribulation start, e dey possible say some people wey see how them destroy “Babylon the Great” wey be all lie-lie religion, go . . . put faith for Jehovah?
16. Wetin we know about Jehovah? (Still check the picture.)
16 Wetin we know about Jehovah from Bible help us see say e value people life well-well. E send im Son come die for us so that e go dey possible for us to live forever. (John 3:16) All of us don see how Jehovah de sofri care for us. (Isa. 49:15) E know our name one by one. The truth be say, e know each of us well-well sotey, even if we die, e go fit bring us back to life because e know everything about us, and all the things wey dey our mind when we dey alive. (Matt. 10:29-31) We get better reason to dey sure say our Papa for heaven go judge each person for the correct way because, e de always do the correct thing, e de show pity, and e get sense finish.—Jas. 2:13.
We fit dey sure say Jehovah go judge each person for the correct way because e de always do the correct thing, and e de show pity (Check paragraph 16)
17. Wetin we go talk about for the next article?
17 Now wey we don adjust wetin we believe about this things wey we don talk about, e dey clear say we need to put body for the preaching work pass before. Why we talk like that? Wetin de make us no tire to preach? We go answer this questions for the next article.
SONG 76 Tell Me How You De Feel
a To know why we adjust wetin we understand about this matter, check the article wey the topic na, “This Is the Way You Approved,” for March 15, 2015 Watchtower, pp. 7-11. (For English.)
b After them destroy Babylon the Great, all servant of Jehovah go face test of faith when Gog of Magog attack them. And anybody wey join Jehovah people after them don destroy Babylon the Great, go still face this test.
c OTHER THINGS ABOUT THE PICTURE: Three pictures wey de show why the good news fit no reach some people: (1) One woman wey de live for place wey the main religion for their country no make-am safe for Jehovah people to preach, (2) one husband and wife wey de live for place wey government don put law wey no make-am safe for Jehovah Witness to preach to people, and (3) one man wey de live for area wey far well-well and hard for person to fit reach.
d OTHER THINGS ABOUT THE PICTURE: One young woman wey don stop to serve Jehovah, remember wetin e learn about how them go destroy “Babylon the Great.” E decide to start to worship Jehovah again and come back to im papa and mama wey be Jehovah Witness. If this kind thing happen for great tribulation, e good make we copy the way Jehovah de show love and pity people. And make we happy say the person don change.
