1. Nalende kenem yipe kunum kerma ende sembar, meimen paninamen?

 KENEM YIPE kunum kerma ende sembar, meimen! Kunum dingding ne Baibel yu propet ne mokum, mongom tondo kanmen. Ende embe mal, “not king” na “saut king” namal kanpol tomon, enjel ombol kes ere ende tomene kele, ende nam mal pel kantawol enal ne enem. (Dan. 11:​40, ftn.) Ala wal ende kanmen, Got Gapman yu ka nesi mal yemyem poro punambe, alamb millien puli se tuwal wo Johova lotu erngom. (Ais. 60:22; Mat. 24:14) Ala kenem pilgi mokun puli wei, “kunum kun simen.”—Mat. 24:​45-47.

2. Wal pende kenem weieri pilkane enamen, ba nawal pende kanpol tonamen?

² Johova kenem kunum kunum pakerondo, wal kerma pende mand bulto, min wonda kanpol tonamen ne enem. (Prov. 4:18; Dan. 2:28) Kenem weieri pilkane esmen, ombun kerma wei pulnombora kunum kenem pilkane enamen, wal kanse kenjin pile pilgi dongal pande akilgi ne, ombun wonda kaunamen. Embe paim ba, wal pende eri mand bulto min wonda kenem kankanpol naromon. Yu duwom pi enamen bar, yero nalende wal kerma pende wonda pane yubol tonjin, ala omukro kanamen. Ala bulto, wal pende min wonda kenem pilkane nasmen na, Danjen min epen meim wal pende enda mal kanamen eri.

NAWAL PENDE KENEM PILKANE NASMEN

3. Yero ombun kerma wei min wonda kunum, Johova koltundo alamb wo kenem kolnango olom lotu ernangonam paninjin, nalernge embe ninjin?

³ Kenem yero yubol tonjin bar, ombun kerma wei pulnombol  min wonda kunum, Johova bol pilgi nanim alamb nganmal Amagedon min wonda tuironam kaple nanda paninjin. Kenem embe ninjin nalerim, Noa kunum Nol alamb tom mal, omukro kane embe ninjin. Nol tonal ne erim kunum yero, Johova sip “duwa koltungum,” embe pile yipe kenem kunum ombun kerma wei min wonda kunum, wal ding mal min wonda ne pilninjin. Seten alambem man bol ombun kerma wei tuinaronam nepinjin —Mat. 24:​37-39.

4. Nalende komna Noa kunum wal min wom, yipe ombun kerma wonda bar, ding mal wei min wonda ne napisamen? Yu bolto.

⁴ Komna Noa kunum wal min wom mal, yipe kunum ding mal wei min wonda paninamen kun paim mo? Ki e, pundom kun napaim. Nalende embe nimen? Nalenem, Baibel wal embe, ding mal kun min wonda panadom. Jises, wal Noa kunum min wom mal, olom wo mora kunum wal ding mal min wonda eri panim. Ba “Noa kunum” Nol tongo Got sip duwa koltungum mal, yipe kenem kunum ding mal; wei min wonda pananim. Yu embe nimen bar, Noa kunum Nol tom yubol paim bar, kenem wal ende duwom nasmen pananinamen.

5. (a) Nol narom kunum yero Noa pilgi pam, tane nalerim? (Hibru 11:​7,1 Pita 3:20) (b) Noa pilgi pam mal neori kem, yipe kenem Baibel yu neori kesmen bol, nalmal ding mal paim?

⁵ Johova mambnem kes esim alamb tonal pane Noa nengom kunum, olom pilgi nim mem tane sip tawum. (Hibru 11:7; 1 Pita 3:20 gere.) Noa erim mal, yipe Got Gapman yu ka ne alamb ngomon pilgi ne, karkar enam wal kerma paim. (Apo. 3:​17-20) Pita, Noa kin  embe nim, “mambnem dulto yu neori kerem ye panim.” (2 Pita 2:5) Embe nim ba, kenem yero yu duwom enjin bar Noa Baibel yu neori kele alamb porpor ngongo, pilkane ernge bulto Nol tom moma yubol narom. Yipe ding mal, kenem kumbol ngo Baibel yu ka neori kelpe alamb porpor kanam ne esmen. Kenem ombol ere embe esmen, ba mala alamb porpor Baibel yu kapisambe, bulto porninda kunum min wonda ne napisamen. Nalende embe nimen?

6-7. Nalende kenem Baibel yu ka neori kelpe, mala alamb porpor pisambe bulto, porninda kunum min wonda pananinamen? Yu bolto.

⁶ Kenem Baibel yu neori kesmen bar, Jises yu ende nim buro pile. Olom nim, enem Baibel yu ka neori kerambe mala alamb porpor pisambe, bulto porninda kunum min wonda panim.” (Mat. 24:14) Yu propet e nepakim ye ende mongom naroipum mal yipe ronom. Got Gapman yu alamb yujop jeljel, 1,000-pase minro pumbar neori kesim, ala websait, jw.org wusngama mala alamb pulikes yu ka e, pisim eri.

⁷ Embe paim ba, Jises olom disaipol aiyem man nengo embe nim, enem “taun porpor seim bar kongan er pornaninambe” na yem wo alamb kot erngonal panim. (Mat. 10:23; 25:​31-33) Jises nim yu, kenem kunum pra min wonda eri. Alamb millien puli yipe kulu pende meim bar, kenem piriari wane Baibel yu neori kel ngonamen kaple nanem. Ala wal ende, anj dunglom minit dingding ne ngal pulikes kangsim. Kenem ombol kes ere “alamb kantri porpor, ye dulom porpor, na yujop porpor paim bar,” Baibel yu ka nengonamen esmen. (Rev. 14:6) Ba kenem yu weieri ninamen, mala alamb porpor meim bar kenem Baibel yu ka nengopo, bulto porninda kunum min wonda ne napisamen.

8. Bulto Johova alamb kot erngonda bar, nal ki pende kenem bol min wonda? (Piksa pra kane.)

⁸ Yu pimand omukromon bar, kenem ki embe ngonamen. Alamb pende kolapis nakere, Baibel yu ka napisem alamb ombun kerma wei min wonda kunum, enjep bol nawal min wonda? Johova enjep nalmal omukro kot erngonda? (Jon 5:​19, 22, 27; Apo. 17:31) Yu duwom pi esmen Baibel yu kerma sinjip, Johova “alamb goram kanapisem.” Olom kapisem alamb “porpor kumbol to akronam nepisem.” (2 Pita 3:9; 1 Tim. 2:4) Kenem wal embe mal pilkane esmen, ba wusngam apis nakem Baibel yuwei pisam kaple narim alamb, kot ere omukronda mal pilkane nasmen. Embe pile, olom wal pende erim na bulto enda mal kenem nengonda kun napaim.

9. Johova nal yu Baibel a meim nengondo kanmen? (Piksa meim pra kane.)

⁹ Johova nal yu Baibel a meim ne kenem ngonom, Johova Yuwom Baibel a meim bar, wal pende enda mal ne kenem ngonom. Ende embe mal, Baibel yu ka si karkar enam kolapis nakem, “alamb kes” gonjup paim Johova si aksa. (Apo. 24:15; Luk 23:​42, 43) Yu embe nimen bar, ki kerma pende min wonom.

10. Nal ki pende kenem kin min wonda.

¹⁰ Ombun kerma wei min wondo goram alamb, anjanj gol porninam ala naaksam mo? Baibel nepenema kere pilkane esmen, Got nganmal Amagedon min wonda kunum, olom bol opyem esim ga na ami aijep walem, to pornesikera ala naaksam. (2 Tes. 1:​6-10) Ba ga pende bol nawal min wonda? Pende embe mal, ombun kerma wei min wom kunum ga pende, kes si gonjup, tuwa senjip, alamb enjep to gonjup, mo nolmal bo ere enjep to gom. (Ekl. 9:11; Sek. 14:13) Ga embe mal gonjup paim na “mambnem kes” karkar ere gonjup paim ga, kunum kolnga senda bar  ai aksam mo? Ki e, pundom kenem kanpolnaromon.

NAWAL KENEM PILKANE ESMEN

11. Nganmal Amagedon min wonda kunum, alamb nawal esim bar Johova omukro kot erngonda?

¹¹ Wal pende mibulto min wonda mal kanpolromon. Ende embe mal, nganmal Amagedon kunum alamb Krais angam man bol mambnem enjip mal, Johova kane enjep omukro kot erngonda. (Mat. 25:40) Got oiro sim ga na Krais Jises pakerojup ga, sipsip mal kanja. Ala wal ende pilkane esmen Krais angam man ya mala morambe, ombun kerma wei pulnombol min wonda, ala nganmal Amagedon min wonda mand wei enda kunum, semin epen punam. Krais angam man ya mala pra mol pamoram pile, kumbol kaseim alamb enjep kongan enam bar pakeronam kolapis kera mo? (Mat. 25:​31, 32; Rev. 12:17) Nalende yuwei embe mal pilkane esmen, wal kerma paim?

12-13. Alamb pende “Babilon kerma” mo Lotu Gend porpor, ombun sinambe kanam kunum, bulto nawal enam? (Piksa meim pra kane.)

¹² Ombun kerma min wondo, “Babilon kerma” mo Lotu Gend ombun sinam kanam kunum bulto, alamb pende Johova Witnis ga wal embe min wonda pane, kunum kanan wei nemonjup paninam. Wal embe min wondo kanam kunum alamb pende, kumbol to akro Johova lotu erngonam mo?—Rev. 17:5; Ese. 33:33.

¹³ Wal embe mal min womdal, komna Mosis Israil ga Isip monjup siori tum kunum, wal min wom bol ding mal panda. Kenem pilyem kel pisamen, “alamb kanem kanem puli” Israil ga kolngo Isip sikele seori wonjup. Alamb pende, Mosis Ombun Kerma, 10-poro min wonda panim weieri wom kanjip kunum, Johova bol pilgi ninjip. (Kis. 12:38) Wal embe ding mal Babilon kerma ombun sinda kunum min womdal, mambnem kes enjip alamb porninda kunum mand wei wondo, wo kenem kolngom ne kumbol ombun sinamen mo? Ma, kumbol ombun wei nasinamen! Kenem Danjen min epen meim mambnem aiyem karkar enamen, “olom mambnem ka na wandil mem seim Got, kumbol mul wamnam nasinem, mambnem ka olom bol pik weironom,  kanka memka pik weironom, ala mambnem wei enem.” a—Kis. 34:6.

14-15. Alamb ende ombun kerma min nawondo yero gora, mo kulu kolbar meim yuwei pisa kaple nanem bar, bulto kolnga aimanj mem sinda kaple enem paninamen mo? Yu bolto (Buk Song 33:​4, 5)

¹⁴ Kunum pende ne kenem pismen, pilgi ding angjen ambanjen man embe nim, “Na maiyam ding alamb Johova lotu ernangom yero gorambe, bulto ombun kerma min womdal, ala akil seyem wonam panim.” Yu embe nim memka ende pande nim. Ba alamb ende gorom kunum bulto kol aimanj mem sinda paninamen kun napaim, nalenem, Johova olom kot dulto wei enem—ala olom wal omuk kun paim mal tonom. (Buk Song 33:​4, 5 gere.) Kenem pilgi wei ninamen “mal pel Jas meim ye,” mambnem dulto karkar enem.—Stt. 18:25.

¹⁵ Ala wal ende, alamb ende yuwei sembar mand namom, kulu kolbar wei mom pilkane enda kaple narim pile, kol aimanj mem sinda paninamen kun napaim. Alamb millien puli, Got Gapman yu kapisam kolapis nakem pile, Johova wamnam enjep omukro “meme” mal meim, paninda kun napaim. (Mat. 25:46) Mala alamb pel meim, mambnem dulto karkar ere kot erngonda ye, alamb embe mal dingding ne kanpol weiro kenem kanmen e, ngonom. Ombun kerma wei min wonda kunum, Johova nal mambnem karkar enda kanpolnaromon. Alamb pende ombun kerma wei min wonda kunum, Johova ye nalmal kolapis  kere duwom erkane olom bol pilgi ne, se olom bol wo morambe olom kangem kerma paim wopenem pundo, mala alamb porpor pilkane enem.—Ese. 38:16.

16. Johova bol kenem nawal duwom erkanmen? (Piksa pra kane.)

¹⁶ Kenem Baibel yu duwom ere pilkane esmen, Johova alamb kolmem wal kerma wei mal kanem. Olom Ngangem kem wo gom bar, kenem alamb porpor kol aimanj mem sinamen kolapis kem. (Jon. 3:16) Kenem porpor Johova kanka memka taninde, pilkane esmen. (Ais. 49:15) Olom kenem dingding ne kangjen kanem, embe pile kenem gonjin dal ala si aksa kunum, bunuman na mambnem aijen kanpol weironom pile ala kun wei ngoyem kera! (Mat. 10:​29-31) Weieri, mem kapande kenem pilgi nimen, kanka mem sem Danjen min epen meim, alamb dingding ne omuk karonda nalenem, olom bunuman kapaim, mambnem dulto karkar enem, ala alamb wandil wei sinem eri.—Jems 2:13.

17. Yu duwom bulto enamen bar nawal omukro kanamen?

¹⁷ Kenem pilgi pam mal yu pende ne auninambe pilkane esmen, Baibel yu neori komna kelkel enjin ma, yipe keramen wal kerma wei paim. Nalende embe nimen? Ala nawal erkelde kenem Baibel yuka anjngo neori kele, waknaronamen? Ki embe mal meim, yu duwom bulto enamen bar pundom mane omukro kanamen.