ALATIKE AKO 19
KATIKO 22 Kua ʼAfio Te Puleʼaga
Kotea ʼAe ʼe Tou Iloʼi ʼo ʼUhiga Mo Te ʼu Fakamau ʼa Sehova ʼi Te Ka Haʼu?
“ ʼE mole loto ia [e Sehova] ke fakaʼauha he tahi.”—2 PET. 3:9.
TE MANATU TAFITO
ʼE feala ke tou falala ko te ʼu fakamau ʼae ka fai e Sehova ʼi te ka haʼu ʼe faitotonu pe anai.
1. He koʼe ʼe feala ke tou ui ʼe tou maʼuʼuli nei ʼi he temi makehe?
ʼE TOU maʼuʼuli ʼi he temi makehe. ʼI te ʼaho fuli, ʼe tou sisio ki te fakahoko ʼo te ʼu meʼa ʼae neʼe fakakikite ʼi te Tohi-Tapu. Ohage la, ʼe tou sisio ki te fetauʼaki ʼa “te hau ʼo te potu noleto” pea mo “te hau ʼo te potu saute” ki te pule ʼo te malamanei. (Tan. 11:40) ʼE tou toe sisio ki te fakamafola ʼo te logo lelei ʼo te Puleʼaga ʼo te ʼAtua ʼi te kele katoa, pea mo tona tali leleiʼi e te toko miliona hahaʼi. (Esa. 60:22; Mat. 24:14) Pea ʼe tou maʼu “ ʼi tona temi totonu” he meʼa kai fakalaumalie ʼe lahi ʼaupito.—Mat. 24:45-47.
2. Kotea ʼae ʼe tou falala ki ai, kae kotea ʼae ʼe tonu ke tou mahino ki ai?
2 ʼE kei tokoni mai pe Sehova ke tou mahino lelei age ki te ʼu aluʼaga maʼuhiga ʼae kua vave hoko mai. (Taag. 4:18; Tan. 2:28) ʼE tou falala ka hoko mai anai te mamahi lahi, ʼe tou iloʼi anai te ʼu meʼa ʼae ʼe tonu ke tou iloʼi ke tou faʼa kataki agatonu pea mo fiafia ʼi te temi faigataʼa ʼaia. Kae ʼe tonu ke tou mahino ʼe ʼi ai ni aluʼaga ʼe mole tou iloʼi pe hoko feafeaʼi anai ʼi te mamahi lahi. ʼI te alatike ʼaeni, ʼe tou vakaʼi muʼa pe koʼe neʼe tonu ke fetogi tatatou mahino ki te ʼu aluʼaga ʼaia. Hili ʼaia ʼe tou toe vakaʼi anai he ʼu faʼahi ʼe tou iloʼi ʼo ʼuhiga mo te ka haʼu pea kotea ʼae ka fai e tatatou Tamai ʼae ʼi selo.
TE ʼU FAʼAHI ʼAE ʼE MOLE TOU ILOʼI
3. Kotea ʼae neʼe tou ui ʼi te temi muʼa ʼo ʼuhiga mo te hahaʼi ʼae ʼe mole tui anai kia Sehova ʼi te kamata ʼo te mamahi lahi, pea he koʼe neʼe tou manatu feia?
3 Neʼe tou ui ʼi te temi muʼa, ka kamata anai te mamahi lahi, ʼe mole kei feala anai ki he tahi ke liliu ʼo tui kia Sehova pea ke haofaki ʼi Alamaketone. Neʼe ko tatatou manatu ʼaia he neʼe tou ui ʼe fakata e te hahaʼi mo te ʼu aluʼaga ʼae neʼe hoko ʼi te Tulivio te ʼu aluʼaga ka hoko ʼi te ka haʼu. Ohage la neʼe tou manatu, ohage pe ko te haga ʼa Sehova ʼo pupunu te matapa ʼo te aleka, ʼo toe feia pe, ka kamata te mamahi lahi ʼe ina pupunu anai te matapa ki te hahaʼi ʼae ʼi te malama ʼa Satana, pea ʼe mole feala anai ke haofaki natou.—Mat. 24:37-39.
4. He koʼe ʼe mole kei tou ui ko te ʼu aluʼaga ʼae neʼe hoko ʼi te temi ʼo Noe ʼe hoko ʼi hona aluʼaga ʼe lahi age ʼi te ka haʼu?
4 ʼE tonu koa ke tou ui ko te ʼu aluʼaga fuli ʼae neʼe hoko ʼi te Tulivio neʼe fakata he meʼa ʼe hoko anai ʼi te ka haʼu. Kailoa ia. Kotea tona tupuʼaga? He ʼe mole ui ʼi te Tohi-Tapu te faʼahi ʼaia. a Neʼe fakata e Sesu “te temi ʼo Noe” ki tana ʼi heni. Kae neʼe mole ina ui ko te ʼu faʼahi fuli ʼae neʼe hoko ʼi te temi ʼo Noe ʼe hoko anai ʼi hona aluʼaga ʼe lahi age ʼi te ka haʼu, ohage la ko te haga ʼa Sehova ʼo pupunu te matapa. Kae ʼe ʼi ai pe ni ako ʼe feala ke tou taʼofi mai te fakamatala ʼo Noe mo te Tulivio.
5. (1) Neʼe ha feafeaʼi neʼe tui ia Noe ki te ʼAtua? (Hepeleo 11:7; 1 Petelo 3:20) (2) ʼO ʼuhiga mo te gaue faifakamafola, kotea ʼae ʼe tatau ai totatou temi mo te temi ʼo Noe?
5 ʼI te ʼosi maʼu e Noe te fakatokaga mai ia Sehova, neʼe ina fakaha tana tui ki ai ʼaki tana faʼu te aleka. (Lau ia Hepeleo 11:7; 1 Petelo 3:20.) ʼO toe feia aipe, ko te hahaʼi ʼae ʼe natou logo ki te logo lelei ʼo te Puleʼaga ʼo te ʼAtua ʼe tonu ke natou fakaha ʼaki ni gaue tanatou tui ki ai. (Gaue 3:17-20) Neʼe ui e Petelo ko Noe neʼe ko he “tagata faifakamafola ʼo te faitotonu.” (2 Pet. 2:5) Kae ohage ko tatatou vakaʼi ʼi te alatike ʼi muʼa atu, ʼe mole tou iloʼi pe neʼe fakamafola ia Noe ki te hahaʼi fuli ʼo te kele ʼi muʼa ʼo te hoko mai ʼo te Tulivio. Ia ʼaho nei, ʼe tou faiga ke tou faifakamafola ki te hahaʼi fuli ʼi te kele katoa. Pea ʼe tou faʼafai ʼi te gaue ʼaia. Logo la ʼatatou faiga kae ʼe mole feala anai ke tou faifakamafola ki te hahaʼi fuli pe ʼi muʼa ʼo te hoko mai ʼo te fakaʼosi. Kotea tona tupuʼaga?
6-7. He koʼe ʼe feala ke tou ui ʼe mole feala anai ke tou fakaha te logo lelei ki te hahaʼi fuli pe ʼi te kele ʼi muʼa ʼo te hoko mai ʼo te fakaʼosi?
6 Tokagaʼi pe kotea ʼae neʼe ui e Sesu ʼo ʼuhiga mo tatatou gaue faifakamafola. Neʼe ina fakakikite ʼe fakamafola anai te logo lelei “ ʼi te kele katoa ko he fakamoʼoni ki te ʼatu puleʼaga.” (Mat. 24:14) ʼE hoko ia ʼaho nei te lea fakapolofeta ʼaia ʼo lahi age ʼi te temi muʼa. Kua maʼu te logo ʼo te Puleʼaga ia lea ʼe 1 000 tupu, pea ʼe feala ki te teitei hahaʼi fuli ʼo te malamanei ke natou iloʼi ʼaki tatatou tuʼasila ʼi te Neti, jw.org.
7 Kae neʼe toe ui e Sesu ki ʼana tisipulo ʼe mole natou ‘foli katoa anai ia te ʼu kolo’ peʼe faifakamafola ki te hahaʼi takitokotahi ʼi muʼa ʼo tana haʼu. (Mat. 10:23; 25:31-33) Koia ʼe mole tou faifakamafola anai ki te hahaʼi fuli pe ʼi muʼa ʼo te haʼu ʼa Sesu ʼo fakamauʼi te malamanei. Ko te hahaʼi ʼe toko miliona tupu ʼe maʼuʼuli ʼi he ʼu potu ʼe fakahoko fakafufu ai te gaue faifakamafola. Pea ʼi te ʼu minuta fuli, ko te toko lauʼi teau tupu ʼu kiʼi toe meamea ʼe tutupu ake. ʼE tou faiga ke kaku te logo lelei ki te hahaʼi ʼo “te ʼu puleʼaga fuli, mo te ʼu telepi fuli, mo te ʼu lea fuli.” (Fkha. 14:6) Kae ʼe mahino ia, ʼe mole feala anai ke tou fakaha ki te hahaʼi fuli pe ʼi te kele ia te logo lelei ʼi muʼa ʼo te hoko mai ʼo te fakaʼosi.
8. Kotea te fehuʼi ʼae ʼe feala ke tou fai ʼo ʼuhiga mo te ʼu fakamau ka fai e Sehova ʼi te ka haʼu? (Vakaʼi mo te ʼu pāki.)
8 Koia, ʼe tou fai ai te fehuʼi ʼaeni: ʼE feafeaʼi kia natou ʼae neʼe mole logo ki te logo lelei ʼi muʼa ʼo te mamahi lahi? ʼE fakamauʼi feafeaʼi anai natou e Sehova mo tona ʼAlo, ia ia ʼae neʼe ina fakanofo ke ina fai te fakamau? (Soa. 5:19, 22, 27; Gaue 17:31) ʼE ui ʼi te vaega ʼae ʼe fakatafito ki ai tatatou alatike “ ʼe mole loto ia [e Sehova] ke fakaʼauha he tahi, kaʼe ʼe loto ia ke kaku te hahaʼi fuli ki te fakahemala.” (2 Pet. 3:9; 1 Tim. 2:4) Logo la ʼe tou iloʼi te faʼahi ʼaia ʼo ʼuhiga mo Sehova, kae heʼeki ina fakaha mai pe feafeaʼi anai tana fakamauʼi te hahaʼi ʼae neʼe mole logo ki te logo lelei. ʼE mahino ia ʼe mole ko hona maʼua ke ina fakaha mai te ʼu meʼa fuli ʼae ʼe ina fai peʼe ko ʼae ka ina fai ʼi te ka haʼu.
ʼE feafeaʼi anai te fakamauʼi e Sehova ia natou ʼae neʼe mole maʼu he faigamalie ke natou logo ki te logo lelei ʼi muʼa ʼo te mamahi lahi? (Vakaʼi te palakalafe 8) c
9. Kotea ʼae neʼe fakaha mai e Sehova ʼi te Tohi-Tapu?
9 ʼE fakaha mai e Sehova ʼi tana Folafola ʼihi gaue ka ina fai. Ohage la ʼe ui ʼi te Tohi-Tapu ʼe fakatuʼuake anai e Sehova “te kau heʼe faitotonu” ʼae neʼe mole natou logo ki te logo lelei pea mo fetogi ai tonatou maʼuli. (Gaue 24:15; Luka 23:42, 43) ʼE lagaʼi ai te tahi ʼu fehuʼi.
10. Kotea te tahi ʼu fehuʼi ʼe feala ke tou fai?
10 Ko natou fuli ʼae ʼe mamate lolotoga te mamahi lahi, ʼe mamate anai koa ʼo talu ai, pea ʼe mole fakatuʼuake anai koa natou? ʼE fakaha lelei mai ʼi te Tohi-Tapu ko te kau fakafeagai ʼae ka pulihi anai e Sehova mo tana foʼi tau ʼi Alamaketone, ʼe mole fakatuʼuake anai natou. (2 Tes. 1:6-10) Kae ʼe feafeaʼi ki te hahaʼi ʼae ʼe mamate lolotoga te mamahi lahi ohage la ʼi he tuʼutamaki fakanatula, peʼe ʼi he fakaʼi, pe neʼe fakapogi? (Ekl. 9:11; Sakl. 14:13) ʼE feala koa ki ʼihi ia natou ʼaia ke natou kau ʼi “te kau heʼe faitotonu” ʼae ka fakatuʼuake ʼi te malama foʼou? Ko he faʼahi ʼe mole tou iloʼi.
TE ʼU FAʼAHI ʼAE ʼE TOU ILOʼI
11. ʼE mulimuli anai kitea te fakamauʼi ʼo te hahaʼi ʼi Alamaketone?
11 ʼE tou iloʼi he ʼu faʼahi ka hoko anai ʼi te ka haʼu. Ohage la, ʼe tou iloʼi ʼi Alamaketone ʼe fakamauʼi anai te hahaʼi ʼo mulimuli ki tanatou aga ʼae ki te ʼu tehina ʼo Kilisito. (Mat. 25:40) ʼI tonatou fakamauʼi, ko natou ʼae ʼe hage ko ni ovi, ʼe ko natou ʼae neʼe lagolago ki te kau fakanofo pea mo Kilisito. ʼE tou toe iloʼi ʼe kei maʼuʼuli pe anai ʼihi tehina ʼo Kilisito ʼi te kele ʼi te ʼosi kamata ʼo te mamahi lahi pea ʼe natou hake anai ki selo ʼi he kiʼi temi pe ʼi muʼa ʼo Alamaketone. ʼI te kei nonofo ʼo ʼihi tehina ʼo Kilisito ʼi te kele, ʼe kei maʼu pe anai e te hahaʼi loto fakamalotoloto te faigamalie ʼae ke natou lagolago kia natou pea mo te gaue ʼae ʼe natou fakahoko. (Mat. 25:31, 32; Fkha. 12:17) He koʼe ʼe maʼuhiga te ʼu manatu ʼaia?
12-13. Kotea ʼae ʼe lagi fai anai e ʼihi ʼi tanatou sisio ʼae ki te maumauʼi ʼo “Papiloni Lahi”? (Vakaʼi mo te ʼu pāki.)
12 Maʼia ʼi te kua ʼosi kamata ʼo te mamahi lahi, ʼe lagi sisio anai ʼihi ki te maumauʼi ʼo “Papiloni Lahi” pea natou manatuʼi neʼe tala talu mai fualoa e te kau Fakamoʼoni ʼa Sehova te aluʼaga ʼaia. ʼE feala koa ke liliu ʼihi ʼo tui ai kia Sehova?—Fkha. 17:5; Esk. 33:33.
13 ʼE hage pe anai te aluʼaga ʼaia ko ʼae neʼe hoko ʼi Esipito ʼi te temi ʼo Moisese. Manatuʼi ʼi te mavae ʼa Iselaele ʼi Esipito, neʼe toe olo mo natou “he faʼahiga hahaʼi kehekehe pea mo kaugamalie.” Neʼe lagi kamata tui ʼihi ia natou ʼaia ʼi tanatou sisio ki te hoko ʼo te ʼu Malaʼia ʼe Hogofulu ʼae neʼe tala e Moisese. (Eke. 12:38) Kapau ʼe toe feia anai ʼi te temi ʼae ka maumauʼi ai ia Papiloni Lahi, ʼe tou iita anai koa mo kapau ʼe fia fakatahi mai ʼihi ʼi muʼa pe ʼo te fakaʼosi. Kailoa ia. ʼE tou fia hage anai ko tatatou Tamai ʼae ʼi selo, ʼae ko he “ ʼAtua manavaʼofa, tuai ʼi te ita pea mo fonu ʼi te ʼofa agatonu mo te moʼoni.” b—Eke. 34:6.
ʼE lagi sisio anai ʼihi ki te maumauʼi ʼo “Papiloni Lahi” pea natou manatuʼi neʼe tala talu mai fualoa e te kau Fakamoʼoni ʼa Sehova te aluʼaga ʼaia (Vakaʼi te palakalafe 12-13) d
14-15. ʼE foaki anai koa te maʼuli heʼe gata ki he tahi ʼo mulimuli ki te temi ʼae neʼe mate ai, peʼe ko te koga meʼa ʼae neʼe maʼuli ai? Fakamahino. (Pesalemo 33:4, 5)
14 ʼE tou tau logo ki te ui fenei ʼa he tehina peʼe ko he tuagaʼane ʼo ʼuhiga mo he tahi ʼo tona famili ʼe mole tauhi kia Sehova: “ ʼE lagi lelei age ke mate ʼi muʼa ʼo te hoko mai ʼo te mamahi lahi, he toe feala pe anai ke fakatuʼuake.” ʼE mahino ia ʼe palalau feia he ʼe ʼofa ʼi ai. Kae ʼe mole foaki e Sehova te maʼuli heʼe gata ki he tahi ʼuhi pe ko te temi ʼae neʼe mate ai. Ko Sehova ʼe ko te Tuʼi Fakamau haohaoa. Ko te ʼu tonu ʼae ʼe ina fai ʼe faitotonu tuʼumaʼu pe. (Lau ia Pesalemo 33:4, 5.) Koia ʼe feala pe ke tou falala ko “te Tuʼi Fakamau ʼo te kele katoa” ʼe ina fai anai te meʼa ʼae ʼe totonu.—Sen. 18:25.
15 Pea ʼe toe fakapotopoto te ui ʼae ʼe mole foaki anai te maʼuli heʼe gata ki he tahi ʼuhi ko te koga meʼa ʼae ʼe maʼuli ai. Ka fakamauʼi anai e Sehova te hahaʼi ʼe mole feala anai ke ina ui ko ni “tao” ia te toko lauʼi miliona hahaʼi ʼae ʼe maʼuʼuli ʼi te ʼu fenua ʼe mole natou maʼu ai te faigamalie ke natou logo ki te logo lelei ʼo te Puleʼaga. (Mat. 25:46) ʼE fai pe anai e te Tuʼi Fakamau ʼo te kele katoa he meʼa moʼo tokoni kia natou ʼaia. ʼE mole tou iloʼi pe fakaalualu feafeaʼi anai e Sehova te ʼu meʼa ka hoko ʼi te mamahi lahi. ʼE lagi foaki anai ki ʼihi ia natou ʼaia te faigamalie ke natou iloʼi ia Sehova, mo tui kia te ia pea mo lagolago kia te ia ʼi te temi ʼae ka ina fakatapuha ai tona huafa ia muʼa ʼo te ʼu puleʼaga fuli.—Esk. 38:16.
ʼI te kua ʼosi kamata ʼo te mamahi lahi . . . ʼe lagi sisio anai ʼihi ki te maumauʼi ʼo Papiloni Lahi. ʼE feala koa ke liliu ʼihi ʼo tui ai kia Sehova?
16. Kotea ʼae kua tou iloʼi ʼo ʼuhiga mo Sehova? (Vakaʼi mo te pāki.)
16 ʼI tatatou ako te Tohi-Tapu, kua tou mahino ʼe maʼuhiga ʼaupito kia Sehova te maʼuli ʼo te tagata. Neʼe ina foaki te maʼuli ʼo tona ʼAlo ke tou maʼu ai te ʼamanaki ʼae ke tou maʼuʼuli ʼo heʼe gata. (Soa. 3:16) Kua tou logoʼi fuli te ʼofa ʼo Sehova kia tatou. (Esa. 49:15) ʼE ina iloʼi te ʼu higoa ʼo tatou takitokotahi. ʼEi, ʼe ina iloʼi lelei ia tatou takitokotahi. Koia, kapau ʼe tonu ke tou mamate, ʼe feala ke ina fakatuʼuake tatou he ʼe ina manatuʼi totatou agaaga mo ʼotatou suvenia. (Mat. 10:29-31) ʼE mahino ia ʼe feala ke tou falala ko tatatou Tamai ʼofa ʼae ʼi selo ʼe ina fakamauʼi anai te hahaʼi takitokotahi ʼi hona aluʼaga ʼe faitotonu pea mo manavaʼofa.—Sakp. 2:13.
ʼE feala ke tou falala ʼe fakamauʼi anai e Sehova te hahaʼi takitokotahi ʼi hona aluʼaga ʼe faitotonu pea mo manavaʼofa (Vakaʼi te palakalafe 16)
17. Kotea ka tou vakaʼi anai ʼi te alatike ka hoa mai?
17 ʼAki te ʼu fakamahino foʼou ʼaia ʼe tou iloʼi ai ʼe maʼuhiga ʼaupito age tatatou gaue faifakamafola ia ʼaho nei. He koʼe ʼe tou ui te faʼahi ʼaia? Pea kotea ʼae ʼe ina uga tatou ke hoko atu tatatou faʼafai ʼi te fakamafola ʼo te logo lelei? ʼE tou vakaʼi anai te ʼu tali ki te ʼu fehuʼi ʼaia ʼi te alatike ka hoa mai.
KATIKO 76 Te Fiafia ʼe Ke Logoʼi ʼi Tou Loto
a Kapau ʼe ke fia iloʼi te tupuʼaga ʼo te fetogi ʼaia, vakaʼi te alatike “Neʼe Ke Loto Ke Feia” ʼi Te Tule Leʼo ʼo te ʼaho 15 ʼo Malesio 2015, pas. 7-11.
b Hili te maumauʼi ʼo Papiloni Lahi, ʼe tau anai te ʼu kaugana fuli ʼa Sehova mo ni faigataʼaʼia lolotoga te ʼohofi ʼo Koke ʼo Makoke. Ko natou ʼae ka fakatahi anai mo te hahaʼi ʼa te ʼAtua hili te maumauʼi ʼo Papiloni Lahi ʼe natou toe tau anai mo ni faigataʼaʼia.
c FAKAMATALA ʼO TE PĀKI: ʼE fakaha ʼi te ʼu pāki ʼaeni ʼe tolu te ʼu tupuʼaga ʼo te mole lagi kaku ki ʼihi ia te logo lelei: (1) Heʼeki logo te fafine ki te logo lelei he ʼe maʼuli ʼi he fenua ʼe feala ke hoko ai he tuʼutamaki mo kapau ʼe faifakamafola ai te kau Fakamoʼoni ʼa Sehova, (2) ʼe maʼuʼuli he taumatuʼa ʼi he fenua ʼe tapuʼi ai e te lao te gaue faifakamafola, pea (3) ʼe maʼuli te tagata ʼi he koga meʼa ʼe tuʼu mamaʼo pea faigataʼa ʼaupito te kaku ki ai.
d FAKAMATALA ʼO TE PĀKI Ko he fafine mole kei tauhi kia Sehova ʼe ina manatuʼi te ʼu meʼa ʼae neʼe ina ako ʼo ʼuhiga mo te maumauʼi ʼo “Papiloni Lahi.” ʼE ina fai te tonu ʼae ke toe liliu kia Sehova mo ʼana matuʼā ʼae ko he ʼu Fakamoʼoni. Kapau ʼe hoko he aluʼaga feia, ʼe tou faʼifaʼitakiʼi te lotomanavaʼofa ʼo tatatou Tamai ʼae ʼi selo pea mo tou fiafia ʼi te toe liliu mai ʼo he tahi neʼe agahala.