LAHATSORATRA FIANARAN̈A 19
HIRA 22 Efa Mitondra Ilay Fanjakana
Ino Raha Haintsika Momba Didim-pitsaran̈an’i Jehovah Amin’ny Hoavy?
“Tsisy olo tian’i Jehovah ho ripaka.”—2 PET. 3:9.
HEVITRY HIDINIHIN̈Y
Matoky atsika fa tsy maintsy han̈ano raha marin̈y ndreky amy rariny fo Jehovah, lera izy han̈ano didim-pitsaran̈anany teteky iô.
1. Ino mahavy atsika mivolan̈a fa miavaka fotoan̈a iain̈antsika iziôty?
TEN̈A miavaka fotoan̈a iain̈antsika iziôty! Isan’andra atsika mahita faminanian̈an’ny Baiboly tanteraka. Ohatra, atsika mahita “mpanjakan’ny avaratra ndreky mpanjakan’ny atsimo” mifan̈oesa fo, fôtony irô samy tihamehy tany jiaby. (Dan. 11:40, l.p.a.) Hitantsika koa fa torin̈a eran-tany vaovao tsaran’ny Fanjakan̈an’ny Zan̈ahary, ke olo an-tapitrisany lôso manompo Jehovah. (Isaia 60:22; Mat. 24:14) Aviô, atsika koa mahazo hanin̈y ara-pan̈ahy treka, “amy fotoan̈a mety.”—Mat. 24:45-47.
2. Ino raha atokisantsika, fa ino ndraiky raha tsy maintsy ikentsika?
2 Jehovah tsy vôly man̈ampy atsika hahatakatra tsarabe irô raha maro matomboko handalo teteky iô. (Ohab. 4:18; Dan. 2:28) Matoky atsika fa izikoa fa hanomboko fahorian̈a be io, ho haintsika aby raha jiaby ilaintsika baka hahavitantsika hiaritry ndreky tsy hivadiky, aviô hahavitantsika hiray sain̈y fo amy fotoan̈a sarotro io. Fa ndray zen̈y, tsy maintsy ikentsika fa, misy raha sasany mbala tsy haintsika, momba raha ho avy tsy ho ela io. Hidinihintsika voanalohany amy lahatsoratra ty, nan̈ino atsika nimpody nan̈itsy raha efa nivolan̈intsika momba sasany amy raha aby zen̈y. Baka iô himpody zahavantsika koa, sasany amy raha efa haintsika amin’irô raha aby mbala ho avy io, baka iô karakôry raha handeha hataon’ny Babantsika an-dan̈itry an̈y.
INO RAHA TSY HAINTSIKA?
3. Eraka raha efa nivolan̈intsika taloha tan̈y, ombian̈a ma faran’ny amin’olo amy donian’i Satana ty afaka hanjary mpanompon’i Jehovah, aviô ino nahavy atsika nivolan̈a zen̈y?
3 Taloha tan̈y, atsika nivolan̈a fa izikoa fahorian̈a be fa manomboko, lan̈iany olo tsy mpanompon’i Jehovah efa tsy afaka hanjary mpanomponany eky, baka iô tsy ho tafitsaka velon̈o amin’ny Aramagedona. Karaha zen̈y nandraisantsika izio, fôtony atsika nieritreritry fa tsipirian-draha jiaby tamy Safodrano in̈y, mifan̈itsy amy raha mbala handalo amin’ny afara atỳ. Ohatra, atsika nieritreritry fa karaha nataon’i Jehovah ‘namody varavaran̈an’ny’ sambofiara talohan’ny Safodrano in̈y nanomboko, tsisy hisy eky olo mbala an̈isan’ny donian’i Satana ty ke mbala ho voavonjy, izikoa fa manomboko fahorian̈a be.—Mat. 24:37-39.
4. Izio ma raha tsiaraikiaraiky nandalo tamy Safodrano in̈y misy raha mifan̈itsy aminany fo afara an̈y? Hazavà.
4 Izio ma kila raha nandalo tamy Safodrano in̈y misy raha mifan̈itsy aminany fo afara atỳ? Tsy zen̈y foeky. Nan̈ino? Fôtony Baiboly tsy mivolan̈a zen̈y. a Marin̈y ndraiky fa Jesosy nampiran̈a “andran’i Noa” amy fotoan̈an’ny ‘fimpodianany’, fa izy ndraiky tsy nivolan̈a fa raha jiaby nandalo tamin’ny andran’i Noa in̈y, hisy fahatantirahany maventy amin’ny afara atỳ, karaha ataon’i Jehovah namody varavaran̈an’ny sambofiara in̈y. Fa raha zen̈y ndraiky tsy mivolan̈a fa tsisy raha foeky azontsika hianaran̈a tamy tantaran’i Noa ndreky Safodrano in̈y.
5. a) Ino raha nataon’i Noa talohan’ny Safodrano? (Hebreo 11:7; 1 Petera 3:20) b) Ino mampiran̈a fitorian̈a nataon’i Noa amy fitorian̈a ataontsika amin’ny andra iziôty?
5 Noa koa fa baka naharen̈y fampitandreman̈a baka tamy Jehovah, izy direkty nan̈ano raha nan̈aboahan̈a finoan̈anany, ke izy nan̈amboatra sambofiara. (Vakia Hebreo 11:7; 1 Petera 3:20.) Karaha zen̈y koa, lan̈iany olo maharen̈y vaovao tsaran’ny Fanjakan̈an’ny Zan̈ahary, tsy maintsy man̈ano raha mifan̈araka amy raha ren̈indrô io. (Asa. 3:17-20) Petera nivolan̈a fa Noa “mpitory fahamarin̈ana.” (2 Pet. 2:5) Kanefa, eraka nikoran̈intsika tamy lahatsoratra taloha in̈y, tsy haintsika asa Noa nahavita nitory tamin’olo tsiaraikiaraiky tambony tany teto, talohan’ny Safodrano. Fa atsika amy ziôty ndraiky, mitory eran-tany, ke mazoto mare atsika man̈ano izio. Fa atsika ndray mifen̈a karakôry, tsy ho vitantsika hitory vaovao tsara amin’olo tsiaraikiaraiky ambony tany eto, alohan’ny havian’ny farany. Fôtony nan̈ino?
6-7. Nan̈ino atsika mivolan̈a fa tsy ho vitantsika hitory amin’olo jiaby ambony tany eto alohan’ny havian’ny farany? Hazavà.
6 Diniha baka raha nivolan̈in’i Jesosy, momba asa fitorian̈a ataontsika io. Izy nivolan̈a fa hitorin̈a amy “tany jiaby vaovao tsara momba Fanjakan̈a io, amy zen̈y firenena jiaby haharen̈y.” (Mat. 24:14) Tanteraka amy ziôty faminanian̈a zen̈y sady lombolombon’ny taloha. Hafatra momba Fanjakan̈an’ny Zan̈ahary io efa misy amy volan̈a 1 000 mandilatra. Baka iô nohon’ny fisian’ny tranonkala jw.org, ankamarozan’olo ambony tany eto afaka mianatra raha momba izio.
7 Fa Jesosy koa nivolan̈a fa irô mpianatranany aby io tsy “hahavita hitety tanàna jiaby”, na hitory amin’olo tsiaraikiaraiky, alohan’ny izy avy. (Mat. 10:23; 25:31-33) Mbala marin̈y fo koa raha nivolan̈in’i Jesosy zen̈y amin’ny andrantsika iziôty. Olo an-tapitrisany baka iziôty mipetraka amy tany tsy hahafahantsika mitory malalaka foeky. Fan̈ampin’izen̈y koa, mandeha an-jatony aby tsaiky teraka, isaka minity. Atsika mifen̈y mare mikoran̈a vaovao tsara amin’olo baka amy “firenena ndreky amy karazan̈a fivolan̈ana jiaby.” (Apok. 14:6) Fa ndray zen̈y, tsy ho vitantsika hitory vaovao tsara io amin’olo tsiaraikiaraiky ambony tany eto, alohan’ny farany io avy.
8. Ino fan̈ontanian̈a mety ho avy an̈atin’ny jerintsika, mikasiky didim-pitsaran̈a handeha hataon’i Jehovah amin’ny amaray? (Zahava koa sary.)
8 Ke misy fan̈ontanian̈a araiky miboaka baka amy zen̈y: Han̈ano karakôry irô olo mbala tsiary naharen̈y vaovao tsara aby io, alohan’ny fahorian̈a be io hanomboko? Hataon’i Jehovah ndreky Jesosy Zanany nirahiny hitsara olo jiaby karakôry irô in̈y? (Jaona 5:19, 22, 27; Asa. 17:31) Andinin-teny fôtotro ioren̈an’ny lahatsoratra ty mivolan̈a fa ‘tsisy olo tian’i Jehovah ho ripaka foeky, fa tiany olo jiaby hibebaka.’ (2 Pet. 3:9; 1 Tim. 2:4) Ndray iô irô raha aby haintsika zen̈y, izy mbala tsendriky nan̈ambara atsika akôry fomba hitsarany irô olo aby mbala tsendriky naharen̈y vaovao tsara io. Sady izy lastiô koa tsy voatery han̈ambara amintsika raha efa ataony ndreky raha mbala hataony.
Hataon’i Jehovah karakôry ma irô olo mbala tsiary naharen̈y vaovao tsara alohan’ny fahorian̈a be hanomboko? (Zahava fehintsoratra 8) c
9. Ino ma raha efa nambaran’i Jehovah amintsika amy Baiboly ao?
9 Efa ambaran’i Jehovah atsika amy Volan̈anany ao sasany amy raha handeha hataony. Ohatra, Baiboly mivolan̈a amintsika fa Jehovah hamelon̈o “olo tsy marin̈y” fôtony irô mbala tsendriky naharen̈y vaovao tsara, ke tsy afaka nan̈ova fiain̈anandrô. (Asa. 24:15; Lioka 23:42, 43) Fa misy fan̈ontanian̈a hafa koa miboaka baka amy zen̈y.
10. Ino koa fan̈ontanian̈a hafa miboaka?
10 Izio ma irô olo jiaby maty amy fotoan̈an’ny fahorian̈a be io, ho ripaka mandrakizay fa tsy hivilômin̈y eky? Koran̈in’ny Soratra Masin̈y mazava tsara fa lan̈iany fahavalon’i Jehovah haripany ndreky haripakan’ny tafikinany amin’ny Aramagedona, efa tsy hivilômin̈y eky. (2 Tes. 1:6-10) Fa karakôry fo olo sasany, karaha irô natin’ny aretin̈y na aksidan na nivonen’olo tamy fahorian̈a be? (Mpito. 9:11; Zak. 14:13) Irô in̈y ma mbala ho an̈isandrô “olo tsy marin̈y” hivilômin̈y amy donia vaovao? Tsy ten̈a haintsika valiny.
INO RAHA HAINTSIKA?
11. Miôrin̈y amin’ino ma fitsaran̈a olo amin’ny Aramagedona io?
11 Efa misy raha maromaro haintsika momba ny amaray. Ohatra, haintsika fa amin’ny Aramagedona, olo hitsarain̈a arakaraka fomba nitondrasandrô irô rahalahin’i Kristy aby io. (Mat. 25:40) Ôndrikondriky ivolan̈ana lan̈iany olo nanohan̈a irô voahosotro aby io ndreky nanohan̈a Kristy. Haintsika koa fa mbala hisy rahalahin’i Kristy fo ambony tany eto, afaran’ny hanombohan’ny fahorian̈a be io. Baka iô, aloha helin’ny hanombohan’ny Aramagedona, irô hanonga an-dan̈itry an̈y. Ke izikoa mbala ambony tany eto irô rahalahin’i Kristy aby io, mety mbala hisy olo tsara fô ho afaka hanohan̈a irô ndreky asa ataondrô. (Mat. 25:31, 32; Apok. 12:17) Nan̈ino ma ten̈a raha maventy fahaizantsika raha aby zen̈y?
12-13. Mety han̈ano karakôry olo sasany izikoa fa mahita fandravan̈ana “Babylony Be”? (Zahava koa sary.)
12 Aviô ndray fa afaran’ny hanombohan’ny fahorian̈a be io, mety hisy olo sasany hahita fandravan̈ana Babylony Be, hahatsiaro raha efa nivolan̈in’ny Vavolombelon̈on’i Jehovah efa ela momba izio. Sasany amindrô io ma ho lôso mino Jehovah amy zen̈y?—Apok. 17:5; Ezek. 33:33.
13 Raha zen̈y miramiran̈a raha nandalo ta Ezipty, tamy faha Mosesy. Aleva onon̈o fa “nisy olo maro baka amy firenena hafa” lôso nan̈araka irô Israelita aby io, irô koa fa niala ta Ezipty. Nety nisy sasany tamindrô io nanjary nino Jehovah, irô koa fa nahita fa tanteraka Antambo Folo nivolan̈in’i Mosesy in̈y. (Eks. 12:38) Izikoa karaha zen̈y koa raha mandalo afaran’ny fandravan̈ana Babylony Be io, tôkony hieritreritry ma atsika fa tsy rariny izikoa misy olo mbala hambela hiaraka amintsika, efa aloha helin’ny havian’ny farany? Ehe, tsy karaha zen̈y! Tiantsika baka hangala tahaka toetrin’ny Babantsika an-dan̈itry an̈y “mamindra fô, mahay mahinakinaka, tsy mora meloko, ten̈a be fitiavan̈a ndreky tsy mivadiky sady ten̈a tia fahamarin̈ana.” b—Eks. 34:6.
Olo sasany hahita fandravan̈ana “Babylony Be” hahatsiaro raha efa nivolan̈in’ny Vavolombelon̈on’i Jehovah efa ela momba izio (Zahava fehintsoratra 12-13) d
14-15. Miankiny amy fotoan̈a hifatesan’olo araiky na tany hipitrahany ma fazahoany fiain̈ana tsisy farany? Hazavà. (Salamo 33:4, 5)
14 Ndraikindraiky atsika mety maharen̈y olo mivolan̈a: “Sitrany havako maty alohan’ny fahorian̈a be, amy zen̈y izy hantinain̈y mbala hivilômin̈y.” Mety ho fitiavan’olo havandrô mahavy olo mivolan̈a karaha zen̈y. Fa kanefa ndraiky, ny amarain’olo mandrakizay zen̈y tsy miankin̈y amin’ny fotoan̈a hahafatesany. Jehovah baka Mpitsara lavorary, ke fitsaran̈anany tsy maintsy marin̈y ndreky amy rariny fo. (Vakia Salamo 33:4, 5.) Ke matoky atsika fa “Mpitsara tany jiaby io” han̈ano ny rariny.—Gen. 18:25.
15 Tsy miankin̈y amy tany ipitrahan’olo araiky koa hazahoany fiain̈ana tsisy farany. San̈atria Jehovah foeky handeha hitsara olo an-tapitrisany ke hivolan̈a fa irô io “bengy” kanefa irô mbala tsiary nianatra hafatra momba Fanjakan̈an’ny Zan̈ahary foeky. (Mat. 25:46) Ke Mpitsara tany jiaby man̈ano ny rariny io mandiniky raha mahatsara irô olo aby io tsiaraikiaraiky, lombolombon’ny atsika. Tsy haintsika ndraiky karakôry raha handeha hataon’i Jehovah, amy fahorian̈a be an̈y. Fa raha ho hitandrô olo aby io amy fahorian̈a be mety hahavy irô ho lôso mino Jehovah, lera izy mankamasin̈y an̈aranany manoloan̈a firenena jiaby ambony tany eto.—Ezek. 38:16.
Afaran’ny hanombohan’ny fahorian̈a be io, ... ho hisy sasany amindrô olo hahita fandravan̈ana Babylony Be io ma lôso mino Jehovah?
16. Ino aby ma raha nanjary haintsika momba Jehovah? (Zahava koa sary.)
16 Izikoa atsika fa mianatra Baiboly, lôso hitantsika fa ten̈a valera amy Jehovah fahin̈anan’olombelon̈o. Namezany fahin̈anan’ny Zanany, baka atsika hahazo fiain̈ana tsisy farany. (Jaona 3:16) Atsika jiaby koa samy efa nahatsapa fa Jehovah ten̈a tia atsika. (Isaia 49:15) Hainy amin’ny an̈arantsika tsiaraikiaraiky atsika. Hainy tsarabe atsika, ke ndray atsika maty, izy mbala mahavita hamelon̈o atsika fo, fôtony tsaroany aby raha jiaby momba atsika ndreky raha jiaby tan̈atin’ny jerintsika! (Mat. 10:29-31) Ke atsika matoky fa, ho lavorary tsarabe fomba hitsaran’ny Babantsika be fitiavan̈a an-dan̈itry an̈y io olo tsiaraikiaraiky. Izy baka be fahendrena, man̈ano ny rariny, ndreky mamindra fô.—Jak. 2:13.
Matoky atsika fa ho lavorary fomba hitsaran’i Jehovah olo tsiaraikiaraiky fôtony izy hendry, man̈ano ny rariny, baka iô mamindra fô (Zahava fehintsoratra 16)
17. Ino raha hidinihintsika amy lahatsoratra fan̈araka?
17 Fan̈azavan̈a vaovao aby zen̈y mahavy asa fitorian̈a io mahaimeky fo. Nan̈ino ma atsika mivolan̈a zen̈y? Baka iô, ino ma mandrisiky atsika hazoto hitory vaovao tsara io fo? Hidinihintsika tsarabe valin’ny fan̈ontanian̈a aby zen̈y amy lahatsoratra fan̈araka.
HIRA 76 Hoatran’ny Ahoana Moa?
a Izikoa tianao hay nan̈ino natao fan̈ovoan̈a ty, zahava lahatsoratra “Izany no Sitrakao”, amy Tilikambo Fiambesan̈a 15 Marsy 2015, p. 7-11.
b Izikoa fa ravan̈a Babylony Be, hiatriky fitsapan̈a mpanompon’i Jehovah jiaby, lera Goga baka a Magoga manafiky irô. Baka iô lan̈iany olo milan̈y amy Fanjakan̈an’ny Zan̈ahary afaran’ny fandravan̈ana Babylony Be io, hiatriky fitsapan̈a koa.
c FAN̈AZAVAN̈A SARY: Sary telo man̈aboaka nan̈ino olo sasany mety tsy haharen̈y vaovao tsara torintsika io, ndray atsika mitory eran-tany: 1) Man̈angy araiky mipetraka amy tany anjakan’ny fivavahan̈a tsy tia asa fitorian̈a ataontsika 2) olo fivadiany mipetraka amy tany misy fanjakan̈a mandrova asa ataontsika 3) lelahy araiky mipetraka amy tany lavitry mare sady an̈atiala be.
d FAN̈AZAVAN̈A SARY: Tsaiky man̈angy araiky efa tsy nitory eky, mahatsiaro raha nianarany momba fandravan̈ana “Babylony Be.” Izy tapa-kevitry nimpody amy Jehovah, ndreky nimpody nipetraka amy raimandreninany Vavolombelon̈on’i Jehovah. Izikoa karaha zen̈y raha misy, tiantsika hangala tahaka Babantsika an-dan̈itry an̈y. Tiantsika hahay hamindra fô ndreky hahay hahinakinaka olo, karaha Babantsika an-dan̈itry an̈y, baka iô ho ravoravo, fôtony nisy mpanota nibebaka.
