1. Mang fan nrayog ni nga dogned ni gad be par u ba ngiyal’ ni boor ban’en ni be buch riy?

 GAD be par u ba ngiyal’ ni boor ban’en ni be buch riy! Gubin e rran ni gad be guy e pi yiiy u Bible ni be lebug. Bod ni gad be guy “fare pilung ko lel’uch” nge “pilung ko yimuch” ni yow be cham ngorow ni bochan e ra bagayow ma baadag ni nge par ni ir e ba gel lungun e am rok u fayleng. (Dan. 11:​40, NW, ftn.) Gad be guy fare thin nib fel’ ni murung’agen Gil’ilungun Got ni yibe machibnag u ga’ngin yang e fayleng, ma bokum milyon e girdi’ ni yad be motoyil ngay. (Isa. 60:22; Matt. 24:14) Ku boor e ggan ni fan ko tirok Got ban’en ni yibe pi’ ngodad “ko ngiyal’ ni yima pi’ riy.”​—Matt. 24:​45-47.

2. Mang e rayog ni nge pagan’dad ngay, machane mang e thingar da nanged?

² Ka be ulul Jehovah ni nge ayuwegdad ni ngari tamilang u wan’dad boch ban’en nib ga’ fan ni bayi buch ndab ki n’uw nap’an. (Prov. 4:18; Dan. 2:28) Rayog ni nge pagan’dad nnap’an nra tabab fare gafgow nib ga’ ma gad ra nang gubin ban’en nib t’uf ni ngad nanged ya nge yag nda pared ni gad ba yul’yul’ mab taareban’dad ko re ngiyal’ i n’em ni ke mo’maw’ e par. Machane thingar da nanged ni bay boch ban’en ndad nanged u murung’agen e n’en bayi buch boch nga m’on. Gad ra weliy ko re article  ney fan ni kad thilyeged rogon ni gad be weliy murung’agen boch e pi n’em nra buch. Ngemu’ ma gad weliy boch ban’en ni gad manang u murung’agen e n’en bayi buch boch nga m’on nge n’en nra rin’ e Chitamangidad ni bay u tharmiy.

N’EN NDAD NANGED

3. Mang e u dogned u murung’agen e ngiyal’ ndab ki pag Jehovah e girdi’ ni ngar uned ngodad? Mang fan ni u dogned e re n’ey?

³ Kafram e u dogned nnap’an nra tabab fare gafgow nib ga’, ma dabkiyog ko girdi’ ni ngar bad ko ba’ rok Jehovah mar mageygad ni yad ba fos u nap’an e Armageddon. U dogned e re n’ey ni bochan e ud lemnaged ni pi n’en ni i buch u nap’an fare Ran ni Tharey e Fayleng e be dag yaan e n’en nra buch boch nga m’on. Bod ni ud lemnaged nnap’an nra tabab fare gafgow nib ga’ ma dakuriy be’ nrayog ni nge mich Jehovah u wan’ me yag e yafos ngak, ni bod nu tomuren ni ning Jehovah e mab ko fare arke ma dakuriy be’ ni ka rayog ni nge yan nga langgin.​—Matt. 24:​37-39.

4. Ba puluw ni nga dogned ni gubin ban’en ni i buch u nap’an fare Ran ni Tharey e Fayleng ni be dag yaan e n’en nra buch boch nga m’on, fa? Mu tamilangnag.

⁴ Ere gur, ba puluw ni nga dogned ni gubin ban’en ni i buch u nap’an fare Ran ni Tharey e Fayleng ni be dag yaan e n’en nra buch boch nga m’on, fa? Danga’. Mang fan? Ya dariy ban’en riy ni be yog e Bible. a Riyul’ ni taarebrogonnag Jesus e “ngiyal’ i n’em nnap’an Noah” ko ngiyal’ ni bay riy, machane de yog ni gubin ban’en ni i buch e ngiyal’ nem ni be dag yaan e  n’en nra buch boch nga m’on ni bod fa ngiyal’ nem ni ning Jehovah e mab ko fare arke. Yugu aram rogon ma der yip’ fan ndariy ban’en nrayog ni ngad filed ko n’en ni buch u nap’an Noah nge fare Ran ni Tharey e Fayleng.

5. (a) Mang e rin’ Noah u m’on ni nge yib fare Ran ni Tharey e Fayleng? (Hebrews 11:7; 1 Peter 3:20) (b) Mang e taareb rogon ko machib ni gad be tay e ngiyal’ ney ko machib ni i tay Noah?

⁵ Nap’an ni rung’ag Noah e n’en ni yog Jehovah, me micheg ni bay e michan’ rok ni aram e ngongliy fare arke. (Mu beeg e Hebrews 11:7; 1 Peter 3:20.) Ku arrogon e piin kar rung’aged fare thin nib fel’ ni murung’agen Gil’ilungun Got nthingar ra folgad ko n’en kar rung’aged. (Acts 3:​17-20) I yog Peter ni Noah e “i machibnag e tin nib mat’aw.” (2 Pet. 2:5) Machane kad filed ko fa binem e article ndad nanged ko guy Noah rogon ni nge machibnag urngin e girdi’ ni ur moyed u fayleng u m’on ni nge yib fare Ran ni Tharey e Fayleng fa danga’. Ngiyal’ ney e gad be guy rogon ni ngad machibnaged e girdi’ u ga’ngin yang e fayleng, ma gad be rin’ e re maruwel ney u fithik’ e pasig. Yugu aram rogon, ma dabiyog ni ngad machibnaged urngin e girdi’ u m’on ni nge yib e tomur. Mang fan?

6-7. Mang fan nrayog ni nga dogned ndabiyog ni ngad weliyed fare thin nib fel’ ngak urngin e girdi’ u fayleng u m’on ni nge yib e tomur? Mu tamilangnag.

⁶ Am lemnag e n’en ni yog Jesus u murung’agen e machib ni gad ra tay. I yiiynag ni fare thin nib fel’ e yira machibnag “u gubin yang u fayleng ni nge urngin e girdi’ me nang.” (Matt. 24:14) Ngiyal’ ney e be lebug e re yiiy ney nrib fel’ rogon. Ba pag 1,000 mit e thin ni yibe wereg murung’agen Gil’ilungun Got riy, maku yooren e girdi’ u fayleng nrayog ni ngar filed fare thin nib fel’ ko fare website ni jw.org.

⁷ Machane ki yog Jesus ngak pi gachalpen ndabiyog ni ngar ‘mu’naged e maruwel rorad u lan gubin e binaw’ ara ra machibnaged urngin e girdi’ u m’on ni nge yib. (Matt. 10:23; 25:​31-33) Ku ra riyul’ e n’en ni yog Jesus e ngiyal’ ney ni gad bay riy. Bokum milyon e girdi’ ni yad ma par u yu yang nde puf rogodad ni ngad machibgad riy. Maku reb e gubin e minit ni bokum miriay e bitir ni yibe gargeleg. Ere gad ma athamgil u rogon nrayog rodad ni ngad weliyed fare thin nib fel’ ngak “urngin e pi nam, nge ganong nge thin.” (Rev. 14:6) Machane bin riyul’ riy e dabiyog ni ngad weliyed fare thin nib fel’ ngak urngin e girdi’ u fayleng u m’on ni nge yib e tomur.

8. Mang deer e rayog ni ngad fithed u murung’agen e pufthin nra tay Jehovah boch nga m’on? (Kum guy e sasing.)

⁸ Ku reb e deer ni bay e: Uw rogon e piin nde mab e kanawo’ ngorad ni ngar rung’aged fare thin nib fel’ u m’on ni nge tabab fare gafgow nib ga’? Mang e ra rin’ Jehovah nge Fak ngorad ni ir e en ke dugliy ni nge pufthinnag e girdi’? (John 5:​19, 22, 27; Acts 17:31) Be yog kenggin e thin nu Bible ni fan ko re article ney ni Jehovah e “dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” (2 Pet. 3:9; 1 Tim. 2:4) Yugu aram rogon, ma thingar da nanged ndawori yog Jehovah ngodad e fulweg ko re deer ney. Ma riyul’ ndariy rogon ni nge yog ngodad.

9. Mang e ke tamilangnag Jehovah ngodad u lan e Bible?

⁹ Ke tamilangnag Jehovah ngodad boch ban’en nra rin’ u lan e Thin rok. Bod ni be yog e Bible nra faseg Jehovah e “tin nib kireb [“de mat’aw,” NW]” e girdi’ nde mab e kanawo’ ngorad ni ngar filed fare thin nib fel’ mar thilyeged e ngongol rorad. (Acts 24:15; Luke 23:​42, 43) Bochan e re n’ey, ma aram e kki sum boch e deer nib ga’ fan.

10. Mang boch e deer ni kki sum?

¹⁰ Gur, gubin e piin yad ra yim’ u nap’an fare gafgow nib ga’ e dab kun fasegrad ko yam’, fa? Be tamilangnag e Bible ni piin yad ra togopuluw ngak Jehovah nge pi salthaw rok e yira thangrad u nap’an e Armageddon ndab kun fasegrad.  (2 Thess. 1:​6-10) Machane uw rogon e piin yad ra yim’ ni bochan e m’ar, ara bochan ni kar pilibthirgad, ara kar maad’adgad, ara ke li’rad be’ kar m’ad? (Ekl. 9:11; Zek. 14:13) Gur, bay boch i yad ni yad ba muun ko “tin nib kireb [“de mat’aw,” NW]” e girdi’ ni yira fasegrad u lan e bin nib beech e fayleng, fa? Dariy bagadad ni manang.

N’EN GAD MANANG

11. Mang e ra dugliy rogon e pufthin ni yira tay ngak be’ u nap’an e Armageddon?

¹¹ Bay in ban’en nra buch boch nga m’on ni gad manang. Bod ni gad manang ni yira pufthinnag e girdi’ u nap’an e Armageddon ni be yan u rogon e ngongol ni ur daged ngak pi walagen Kristus. (Matt. 25:40) Piin yira dugliy ni yad boch e saf e ur ayuweged e piin kan dugliyrad nge Kristus. Ku gad manang ni ka ra moy boch i walagen Kristus u fayleng u tomuren nra tabab fare gafgow nib ga’ ma dab ni fekrad nga tharmiy nge mada’ nga ba ngiyal’ u m’on ni nge tabab e Armageddon. N’umngin nap’an ni ka bay pi walagen Kristus u fayleng ma dabisiy ni ka ra mab e kanawo’ ko girdi’ ni ngar ayuweged yad nge maruwel ni yad be rin’. (Matt. 25:​31, 32; Rev. 12:17) Mang nib ga’ fan e pi n’ey?

12-13. Mang e rayog ni nge rin’ boch e girdi’ u tomuren ni yad ra guy ni kan thang fare “Babylon nib Gilbuguwan”? (Kum guy e sasing.)

¹² Mus nga tomuren nra tabab fare gafgow nib ga’, ma rayog ni bay boch e girdi’ ni yad ra guy ni kan thang fare “Babylon nib Gilbuguwan” nra yib ngan’rad e n’en ke n’uw nap’an ni ma weliy e Pi Mich Rok Jehovah. Gur, bay boch e pi girdi’ ney nra thil e tafinay rorad?​—Rev. 17:5; Ezek. 33:33.

¹³ Faanra buch e re n’ey, ma ra bod e n’en ni buch u Egypt u nap’an Moses. Dab mu pagtalin ni “boor yugu boch e girdi’” nra uned ngak piyu Israel u tomuren nra chuwgad u Egypt. Rayog ni immoy boch e pi girdi’ nem ni tabab ni nge mich Jehovah u wan’rad u nap’an nra guyed ni ke riyul’ fa Ragag i Gafgow ni yog Moses nra yib nga daken yu Egypt. (Ex. 12:38) Ere faanra buch ban’en ni aray rogon u tomuren ni kan thang fare Babylon nib Gilbuguwan, ma gur, gad ra dabuy ni ka fini un boch e girdi’ ngodad u nap’an ni kari chugur ni nge yib e tomur, fa? Danga’, ya gad baadag ni nge m’ug  rarogon e Chitamangidad rodad ni ir reb e “Got nri ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad.” b​—Ex. 34:6.

14-15. Gur, n’en nra buch rok be’ boch nga m’on e be yan u rogon e ngiyal’ nra yim’ riy ara gin ma par riy, fa? Mu tamilangnag. (Psalm 33:​4, 5)

¹⁴ Yu ngiyal’ e ma gaar boch e girdi’, “Kab fel’ ni nge yim’ reb e girdi’ rog u m’on ni nge tabab fare gafgow nib ga’ ya nge yag ni ngkun faseg ko yam’.” Rayog ni yad be yog e pi n’ey ni bochan e ba t’uf rorad e girdi’ rorad. Machane n’en nra buch rok be’ nga m’on e gathi be yan u rogon e ngiyal’ nra yim’ riy. Jehovah e ir e bin th’abi fel’ e Tapuf Oloboch, mab mat’aw e pi n’en ma dugliy. (Mu beeg e Psalm 33:​4, 5.) Ere rayog ni nge pagan’dad nib mat’aw e n’en nra rin’ fare “Tapufthin ko fayleng ni polo’.”​—Gen. 18:25.

¹⁵ Kub puluw ni nga dogned ni n’en nra buch rok be’ boch nga m’on e der yan u rogon e gin be par riy. Gad manang ni Jehovah e yugu dabi pos me dugliy ni piin yad ma par u boch e nam nde mab e kanawo’ ngorad ni ngar filed murung’agen Gil’ilungun e yad boch e “kaming.” (Matt. 25:46) Fare Tapufthin ko fayleng ni polo’ e ri kab gel feni t’uf e pi girdi’ ney rok nga rogon ni yad ba t’uf rodad. Dad nanged rogon nra rin’ Jehovah boch ban’en u nap’an fare gafgow nib ga’. Sana bay boch e pi girdi’ ney nra mab e kanawo’ ngorad ni ngar filed murung’agen Jehovah, me mich u wan’rad, mar pared ni yad ba mudugil ko ba’ rok u nap’an nra gagiyelnag ko pi nam ko ir mini’.​—Ezek. 38:16.

16. Mang e kad nanged u murung’agen Jehovah? (Kum guy e sasing.)

 ¹⁶ Kad nanged u daken e fol Bible ni gad ma tay gelngin nrib ga’ fan e yafos ko girdi’ u wan’ Jehovah. Ke pi’ e yafos rok Fak ya nge yag ni yag e athap ko yafos ni manemus ngodad ni gad gubin. (John 3:16) Gad gubin ni kad thamiyed gelngin e t’ufeg ni ke dag Jehovah ngodad. (Isa. 49:15) Manang fithingan bagadad nge bagadad. Bin riyul’ riy e ri manang rarogon bagadad nge bagadad nib fel’ rogon. Ma faanra kad m’ad ma rayog ni nge sulweg urngin ban’en u rarogodad nge pi n’en bay u lanin’dad nga rogon! (Matt. 10:​29-31) Ere bay tapgin ni nge pagan’dad ngay ni Chitamangidad ni bay u tharmiy ni gad ba t’uf rok e rib fel’ rogon nra pufthinnag be’ nge be’ ni bochan e ba gonop, mab mat’aw, ma ma runguyey.​—Jas. 2:13.

17. Mang e gad ra weliy ko bin migid e article?

¹⁷ Pi n’ey ni kan thilyeg rogon ni yibe weliy e be ayuwegdad ni ngad nanged feni ga’ fan fare maruwel ni machib ni gad be rin’. Mang fan nrayog ni nga dogned e re n’ey? Ma mang e ra k’aringdad ni ngad ululgad i machibnag fare thin nib fel’ ndab da talgad? Gad ra weliy e fulweg ko gal deer ney ko bin migid e article.