DISOLO DI NDONGOKOLO 19
NKUNGA 22 Bokonzi ezali koyangela—Tiká eya!
Diambu mbi tuzebi mu dio ditedi tsambusulu yi Yehova mu bilumbu binkuiza?
‘Yehova . . . kakadi zola ti wumosi kabungana.’—2 PI. 3:9.
MAMBU MO MADI MU KHATI DISOLO DIADI
Tulenda ba sikididi ti tsambusulu yi Yehova yela ba yifuana ayi yi busonga mu bilumbu binkuiza.
1. Bila mbi tulenda tubila ti tulembo zingi mu thangu yi zikhini?
TULEMBO zingila mu thangu yi zikhini! Bila kadika lumbu, tulembo moni zimbikudulu zi Bibila zilembo lungana mu meso meto. Mu kifuani, tulembo moni “ntinu nodi” ayi “ntinu sudi” balembo nuani mu diambu di yadila nza yayi. (Dan. 11:40, nkp.) Tulembo moni nsamu wumboti wu Kipfumu ki Nzambi wulembo samunu mu nza yi mvimba mu phila yoyi tuisi teka bu muena ko, ayi zimilio zi batu balembo kikinina tsangu beni. (Yes. 60:22; Mat. 24:14) Ayi tulembo baki bidia biwombo bi kipheve mu “thangu yifuana.”—Mat. 24:45-47.
2. Diambu mbi tulenda bela sikididi, vayi diambu mbi tufueti zaba?
2 Yehova wulembo tatamana kutusadisa tusudika mboti mboti mambu mo manneni meka nduka salama. (Zin. 4:18; Dan. 2:28) Tulenda ba sikididi ti mu thangu ziphasi zinneni ziela tona, tuela zaba mambu mo tuela ba phuila yi zaba muingi tueba ba basiama mu bukuikama boso ayi ba mu kithuadi ayi bakhomba mu thangu beni yina yi phasi. Diawu, tufueti zaba ti kuidi na ndambu mambu tuisi zaba ko matadidi bilumbu binkuiza. Mu disolo diadi, tueka teka tubila bibila bio tubaludila mambu mankaka mo tutuba mu diambu di bilumbu binkuiza. Mu buela, tueka bue tadila mua ndambu mambu mo tuzebi mu diambu di bilumbu binkuiza ayi phila yoyi Dise dieto di mazulu kela vangila mambu.
MAMBU MO KATUISI ZABA KO
3. Mambu mbi tutuba mu diambu ditedi thangu yo Yehova kela sie bue vanina ko batu diluaku mu sangana ayi beto, ayi bila mbi tutubila phila yoyi?
3 Mu thangu thama, tutuba ti buna ziphasi zinneni ziela tumu tona, batu boso bo kabawilukilanga ko Yehova bela sie baka ko diluaku diba ku ndambu’andi ayi bela sie vuka ko mu Alimangedoni. Bila tutubila phila beni yoyi yiba tubanzila ti mambu mo masalama mu Khuka yi nlangu mawu mela bue salama mu bilumbu binkuiza. Mu kifuani, tubanzila ti phila yo Yehova kakangila muelo wu nzaza Nowa tuamina Khuka yi nlangu yitona, ti buawu kela bue “kangila muelo” mu nza yayi yi Satana mu thangu ziphasi zinneni ziela tona mu diambu di kakidila batu bankaka babika vuka.—Mat. 24:37-39.
4. Tubanzila ti mambu mo masalama mu Khuka yi nlangu mawu mela bue salama mu bilumbu binkuiza? Sudikisa.
4 Tufueti banzila ti mambu mo masalama mu Khuka yi nlangu mawu mela bue salama mu bilumbu binkuiza? Nana. Bila mbi? Bila kuisi ko masonoko ma Bibila mo mathumbulu tubila diambu beni. a Bukiedika, Yesu wudedikisa “bilumbu bi Nowa” ayi ndizulu’andi, vayi kasi tuba ko ti mambu mo masalama mu Khuka yi nlangu mawu mela bue salama mu bilumbu binkuiza, ti mambu mo mabuilukulu mu kadika mutu ayi mambu mo masalama Khuka yi nlangu ti mawu mela bue salama mu bilumbu binkuiza. Ayi kasi bue tuba ko ti phila yo muelo wu kangimina mu nzaza yi Nowa buna buawu mela bue salimina mu bilumbu binkuiza. Diawu, yawu ko yin’zola tuba ti tulendi baka ko malongi mu disolo di Nowa ayi mu diambu di Khuka yi nlangu.
5. a) Mambu mbi Nowa kavanga tuamina Khuka yi nlangu yiza? (Ebelewo 11:7; 1 Piela 3:20) b) Mu diambu ditedi kisalu kieto ki tsamununu, bue mambu ma bilumbu biabi madedikini ayi mu thangu Nowa?
5 Nowa wumonisa minu mu tunga nzaza mu thangu kawa ndubu yi Yehova. (Tanga Ebelewo 11:7; 1 Piela 3:20.) Bobuawu phe lumbu kiaki, batu bobo balembo wa nsamu mboti wu Kipfumu ki Nzambi bafueti monisa minu lumbu kiaki mu sadila mambu momo balembo longuka. (Mav. 3:17-20) Piela wutedila Nowa ti “nsamuni wu busonga.” (2 Pi. 2:5) Vayi, banga phila tulongukidi mu disolo diviokidi, tuisi zaba ko ti keni Nowa wumana samunina batu boso baba va mbata ntoto tuamina Khuka yi nlangu yitona. Lumbu kiaki tulembo kivani mu kisalu ki tsamununu mu nza yimvimba, ayi tulembo tudi ngolo mu ba kipfuzi mu sala kisalu beni. Buba zingolo zio tueta tula, tulendi ko mana samunina batu boso bobo badi mu nza yi mvimba nsamu wumboti wu Kipfumu ki Nzambi tuamina tsuka yiza. Bila mbi katulendi kubutudila ko?
6-7. Bila mbi tulenda tubila ti tuedi samunina ko batu boso badi mu nza yimvimba nsamu wumboti wu Kipfumu ki Nzambi tuamina tsuka yiza? Sudikisa.
6 Tutadila mambu momo Yesu katuba mu diambu di bunneni bu kisalu kieto ki tsamununu. Wutuba ti nsamu wumboti wela samunu “va nza yimvimba mu diambu di wuba kimbangi kuidi batu ba makanda ma zitsi zioso.” (Mat. 24:14) Mbikudulu beni yilembo luti lungana mu bilumbu bieto biabi. Nsamu wu Kipfumu ki Nzambi wulembo samunu viokila mu zimbembo 1 000, ayi mu nzila siti yeto jw.org, batu bawombo mu nza yimvimba balenda wa tsangu beni.
7 Vayi Yesu wubue kamba balonguki bandi ti balendi ko mana “dukila zimbanza zioso” voti mana samunina batu boso tuamina kiza. (Mat. 10:23; 25:31-33) Ziphova zi Yesu ziela lungana phe mu bilumbu bieto. Zimilio zi batu lumbu kiaki badi mu zitsi ziozi bakandikidi buwombo kisalu kitsamununu. Mu buela, zikhama zi bana zieta butuka kadika miniti. Tueta tula mo tulenda tula mu diambu di samunina batu “ba makanda, zimvila zioso ayi zimbembo zioso” nsamu wumboti. (Tso. 14:6) Bukiedika, tulendi ko mana nunga samunina batu ba nza yi mvimba nsamu wumboti wu kipfumu ki Nzambi tuamina tsuka yiza.
8. Biuvu mbi tulenda kiyuvula mu diambu ditedi tsambusulu yi Yehova mu bilumbu binkuiza? (Tala phe zifoto.)
8 Batu bo basi baka ko diluaku di wa nsamu wumboti tuamina ziphasi zinneni ziza, bue bela sundukila ? Bue Yehova ayi muan’andi nio kavana kiyeko ki sambisa, bela kubatadila? (Yow. 5:19, 22, 27; Mav. 17:31) Verse yisimbidi disolo diadi yitubidi ti Yehova “kakadi zola ti wumosi kabungana.” Vayi, katidi ti “baboso babalula mavanga.” (2 Pi. 3:9; 1 Tim. 2:4) Ninga, tufueti kikinina ti Yehova katukembi ko mambu momo kela vanga mu diambu di kavana mvutu mu biuvu beni. Diawu, yikadi tombana ti katukamba kaka mo kame vanga voti momo kela vanga mu bilumbu binkuiza.
Bue Yehova kela tadila batu bo basi baka ko diluaku dimosi diwa nsamu wumboti tuamina ziphasi zinneni zitona? (Tala paragrafi 8) c
9. Mambu mbi Yehova katumonisini mu Bibila?
9 Mu phov’andi, Yehova wutumonisini mambu mankaka kela vanga mu bilumbu binkuiza. Mu kifuani, Bibila kitukembi ti Yehova wela fulukisa “batu bakambulu busonga” batu bo basi baka ko diluaku diyamba nsamu wumboti ayi diluaku di balula luzingu luawu. (Mav. 24:15; Luka 23:42, 43) Yawu yime totula biuvu binkaka bimfunu.
10. Biuvu mbi binkaka tulenda kiyuvula?
10 Batu boso bela fua mu mambu mo mela salama mu phasi zinneni bela fuididila mvimba mvimba mu kambu bue baka vuvu ki pfulukulu? Masonoko mamonisini mboti mboti ti Yehova ayi makesa mandi bela bunga bambeni bandi mu mvita wu Alimangedoni ayi bela sie fuluka ko. (2 Tes. 1:6-10) Vayi, mbi tulenda tuba mu diambu di batu bankaka, banga bo beta fua mu mambu mo meta totuka mu nza, bizida, voti bivonza bio bieta totula batu? (Mpo. 9:11; Zak. 14:13) Mu khati batu beni bankaka mu lenda ba na “batu bakambulu busonga” bo balenda fuluka mu nza yimona? Tuisi zaba ko.
MAMBU MO TUZEBI
11. Mu mambu mbi batu bela sambusulu mu Alimangedoni?
11 Mambu mawombo tuzebi mo mela salama mu bilumbu binkuiza. Mu kifuani, tuzebi ti mu Alimangedoni, batu bela tadulu mu phila yo bawu phe bavangila bakhomba zi Kristu mambu. (Mat. 25:40) Bo batudulu banga mamemi bela buela Kristu ayi batu bo batulu mafuta mu kipheve mioko. Tuzebi phe ti bakhomba zi Kristu bankaka bela tatamana ba va mbata ntoto kumanima ma thonono yi phasi zinneni ayi bela sie kuenda ko ku diyilu na tii bilumbu bio biela ba tuamina Alimangedoni yitona. Thangu yoso yo bakhomba zi Kristu bela tatiminina bela va mbata ntoto, yilenda ba ti batu badi mintima misonga bela baka diluaku di kubabuela mioko mu kisalu kioki balembo sadi. (Mat. 25:31, 32; Tso. 12:17) Bila mbi mambu beni madidi mfunu?
12-13. Batu bankaka mbi bela tula kumanima ma mona mbebusulu yi “Babiloni dinneni”? (Tala phe zifoto.)
12 Buba kumanima mathonono yi phasi zinneni, yilenda ba ti batu bo bela mona mbebusulu yi “Babiloni dinneni” bela bambuka moyo ti Bambangi zi Yehova batona tubila diambu beni tona thama. Yilenda ba ti batu bankaka bo bela mona mambu beni bela balula ntima?—Tso. 17:5; Yeh. 33:33.
13 Mambu ma phila yina mela dedakana ayi mo maba ku Ngipiti mu thangu Mose. Tubika zimbakana ti “nkangu wunneni wu batu” basangana ayi bana ba Iseli thangu batotuka mu Ngipiti. Batu bankaka bulendakana batona yonzula minu kiawu mu thangu bamona zindubu zi Mose mu diambu ditedi kumi ki ziphasi zio ziyiza lungana. (2 Mo. 12:38) Enati diambu di phila yoyi disalimini kumanima ma mbebusulu yi Babiloni dinneni, tuela mona phasi mu ntima mu mona ti batu beni basangana ayi beto mua thangu tuamina tsukulu yiza? Nana! Tutidi sokudila bumutu bu Sieto di mazulu, nio widi “Nzambi yi ntima kiadi ayi weta kitula va buangu ki batu bankaka, kavika fuemanga ko ayi wedi luzolo lu kuikama ayi kiedika.” b—2 Mo. 34:6.
Mua ndambu batu bo bela mona mbebusulu yi “Babiloni dinneni” bela bambuka moyo ti Bambangi zi Yehova beba tubilanga diambu beni tona thama (Tala paragrafi 12-13) d
14-15. Diluaku di zinga mvu ka mvu di mutu ditadidi thangu yo kafuidi voti buangu kio keta zingila? Sudikisa. (Minkunga 33:4, 5)
14 Thangu zinkaka, bakhomba ba babakala ayi ba baketo beta tuba mu diambu di bakhomba ziawu zi makanda bo ka basadilanga ko Yehova, “Enati bafuidi tuamina ziphasi zinneni zitona madi ba diambu dimboti mu bawu bila vuvu kipfulukulu maki ba mu diambu di bawu.” Mu kondo finda phaka, madi mayindu mamboti meta tinda batu batuba phila beni yoyi. Vayi vuvu ki luzingu lu mvu ka mvu lu mutu kisi tadila ko kaka thangu yi lufua luandi. Yehova widi nsambisi wuduka—ayi zinzengolo ziandi zikala zimboti ayi zi busonga. (Tanga Minkunga 33:4, 5.) Tulenda ba sikididi ti “nsambisi wu ntoto wumvimba” wela vanga mambu mo madi mamboti.—1 Mo. 18:25.
15 Didi diaka diambu dikiedika mu kikinina ti vuvu ki luzingu lu mvu ka mvu lu mutu kisi tadila ko buangu kio keta zingila. Didi diambu dimbimbi mu yindula ti Yehova weta thumu tadila zimilio zi batu zio zieta zingila mu zitsi ziozi kazi ketidi samununu ko nsamu wumboti wu kipfumu ki Nzambi banga “zikhombo.” (Mat. 25:46) Nsambisi wu busonga wu ntoto wumvimba weta kitatikisa buwombo mu diambu di batu beni viokila beto. Tuisi zaba ko phila yo Yehova kela vangila mambu mu ziphasi zinneni. Bulendakana batu bankaka mu batu beni bela baka diluaku di zaba Yehova, di kunwilukila, ayi diba ku ndambu’andi mu thangu yoyi kela zabikisa dizina diandi kuidi batu boso badi va mbata ntoto.—Yeh. 38:16.
Kumanima ma thonono yi phasi zinneni, . . . yilenda ba ti batu bankaka bo bela mona mambu beni bela balula ntima?
16. Mambu mbi tuzebi mu diambu di Yehova? (Tala phe foto)
16 Mu nzila yi ndongokolo’eto yi Bibila, tume sudika phila yo Yehova keta bongila luzingu lu mutu mu mfunu. Wuvana luzingu lu muan’andi muingi tubaka vuvu ki zinga luzingu lu mvu ka mvu. (Yow. 3:16) Beto boso tume mona luzolo lu ngolo lo Yehova kadi mu diambu di beto. (Yes. 49:15) Zebi wumosi mosi mu beto mu dizina diandi. Wutuzebi bumboti mboti viokila beto veka, enati tufuidi kalenda tufulukisa bila weta bambukila moyo mambu mo matutadidi ayi mo tuzaba! (Mat. 10:29-31) Bukiedika, tuidi na bibila bimfunu bio tulenda bela sikididi ti Dise dieto nio widi luzolo wela sambisa kadika mutu mu phila yiduka, yo yidi yifuana, yi busonga, ayi yi ntima kiadi.—Zaki 2:13.
Tulenda ba sikididi ti Yehova wela sambisa kadika mutu mu phila yiduka, yo yidi yifuana, yi busonga ayi yi ntima kiadi (Tala paragrafi 16)
17. Mbi tuela tadila mu disolo dinkuiza?
17 Buabu tueka na ziphisulu zimona, tume sudika ti kisalu ki tsamununu kifueti luta bue samunu nsualu nsualu viokila mimvu mime vioka. Bila mbi tutubidi buawu? Mbi bieta kututuma tutatamana samuna nsamu wumboti mu kondo bika? Tuela baka mimvutu mu disolo diodi dilandikini.
NKUNGA 76 Oyokaka nini?
a Muingi wuzaba mfunu yi tsobolo yoyi yisalama, tala disolo “Omonaki malamu kosala bongo,” mu Nzo yi Nkengidi yi 15 Mars 2015, pha. 7-11 mu dingala.
b Kumanima ma mbebusulu yi Babiloni dinneni, bisadi bioso bi Yehova biela ba mu nzomono mu thangu Ngongi yi Mangongi kela banuanisa. Batu boso bo bela ba kundambusu dikanda di Nzambi kumanima ma mbebusulu yi Babiloni dinneni bawu phe bela zomo.
c TSUDUKUSULU YI FOTO: Mambu matatu malembo monisa bila kioki batu bankaka badengininanga ko Bambangi zi Yehova mu kisalu ki tsamunu kio kilembo salama mu nza yimvimba: 1) Nketo mosi weta zingila kuma koko kuidi ti dibundu dimosi kaka dieta luta yadila ayi niandi kuenda mu dibundu dinkaka yidi vonza, 2) Bakala dimosi na nketo’andi beta vuanda mu tsi yoyi yidi na khubukulu yi politiki yo yidi na mambu mangolo ayi vonza ayi 3) bakala dimosi weta vuanda kuma ko kuidi kielo mu kutula.
d TSUDUKUSULU YI FOTO: Ntueni mosi wunketo nio wubika kiedika bambukidi moyo mu mambu mo kalonguka mu diambu ditedi mbebusulu yi “Babiloni dinneni.” Ntueni beni baludi ntima ayi vutukidi kuidi bambuta ziandi Bakristu. Enati mambu maphila yoyi masalimini, tufueti sokudila bumutu bu ntima kiadi ayi kadulu ki Disa dieto ki kukitula va buangu ki batu bankaka ayi yangalala phutukulu yi nsumuki.
