ARTÍCULO DE ESTUDIU 19
CANCIÓN 22 ¡Gueeda Reinu stiʼ Dios, ni maʼ cayuni mandar!
Xi nánnanu de ca juiciu ni chiguni Jehová huidxe
«Qué [racalaʼdxiʼ Jehová] guinítiluʼ nin tobi» (2 PED. 3:9).
TEMA
Xiñee nanna dxíchinu jneza zuni juzgar Jehová binni huidxe.
1. ¿Xiñee zanda guininu nabáninu ti tiempu ra cazaaca stale cosa ni nabé cadxagayaanu?
¡NABÁNINU ti tiempu ra cazaaca stale cosa ni nabé cadxagayaanu! Guiráʼ dxi cadúʼyanu ximodo cayaca cumplir ca profecía ni zeeda lu Biblia. Cadúʼyanu ximodo cadinde «rey del norte» ne «rey del sur» para guni mandarcaʼ guidxilayú (Dan. 11:40, nota). Laaca cayaca predicar ca noticia galán stiʼ Reinu stiʼ Dios, casi qué huayuu dxi gaca ni, ne stale binni maʼ gudixhe íquecaʼ gúnicaʼ ni ná Dios (Is. 60:22; Mat. 24:14). Ne cacaanu stale guendaró espiritual ora peʼ caquíʼñenu ni (Mat. 24:45-47).
2. ¿Xi nanna dxíchinu ne xi cadi naquiiñeʼ guiaandaʼ laanu?
2 Cayacané Jehová laanu guiene chaahuinu stale cosa ni maʼ cadi candaa chiguizaaca (Prov. 4:18; Dan. 2:28). Zanda chuʼnu seguru ante guzulú gran tribulación zápanu guiráʼ ni caquíʼñenu para chuʼnu jma gaxha de Jehová ne chuʼnu tobi si tiempu nabé nagana ca. Peru cadi naquiiñeʼ guiaandaʼ laanu nuu ni qué gánnanu de ca cosa ni chiguizaaca huidxe. Lu artículo riʼ zadúʼyanu, xiñee huadxaa modo riénenu caadxi cosa ni chiguizaaca huidxe, despué zaninu de ca cosa ni maʼ nánnanu zazaaca ne ximodo chiguni Bixhózenu ni nuu guibáʼ ni.
NI QUÉ GÁNNANU
3. ¿Xi guninu dxiqué zazaaca binni ante guzulú gran tribulación, ne xiñee guníʼ íquenu zacá?
3 Dxiqué guninu dxi guzulú gran tribulación maʼ qué zanda guyubi binni Jehová ne guilacaʼ lu Armagedón. Guninu zacá purtiʼ guníʼ íquenu naca guiráʼ ni bizaaca lu Diluvio que ti profecía ni zazaaca huidxe. Guninu cásica biseeguʼ Jehová puertaʼ stiʼ arca que ante gueeda Diluvio, casi ñaca laaca zuseegube ti puertaʼ ante guzulú gran tribulación ne maʼ guirutiʼ zanda guilá (Mat. 24:37-39).
4. ¿Xiñee maʼ qué rininu guiráʼ ni bizaaca tiempu bibani Noé zazaaca ni huidxe?
4 ¿Peru ñee naquiiñeʼ guiníʼ íquenu naca relatu stiʼ Diluvio que casi ti profecía la? a Coʼ, purtiʼ qué ruzeeteʼ Biblia ni. Dxandíʼ bichaaga Jesús «ca dxi bibani Noé» ne ca dxi ora maʼ nuunu lu presencia stibe. Peru qué nuzeetedibe guiráʼ xixé ni bizaaca lu relatu stiʼ Diluvio que —casi dxi biseeguʼ Jehová puertaʼ stiʼ arca que—, zazaaca ni huidxe. Neca zacá zanda guizíʼdinu stale de relatu riʼ.
5. a) ¿Xi biʼniʼ Noé ante gueeda Diluvio que? (Hebreos 11:7; 1 Pedro 3:20). b) ¿Ximodo zanda guchaaganu modo biʼniʼ predicar Noé ne modo runi predicarnu ca dxi riʼ?
5 Dxi bicaadiaga Noé ni guníʼ Jehová chiguizaaca la? Bisihuínnibe nápabe fe ra bizaʼbe ti arca (biindaʼ Hebreos 11:7; 1 Pedro 3:20). Zacaca nga naquiiñeʼ guni ca binni ni gucaadiaga ca noticia galán stiʼ Reinu stiʼ Dios, naquiiñeʼ gusihuínnicaʼ nápacaʼ fe pur ni gúnicaʼ (Hech. 3:17-20). Pedro guníʼ naca Noé «hombre ni biʼniʼ predicar ni jneza» (2 Ped. 2:5). Peru casi bidúʼyanu lu artículo ni gudiʼdiʼ que, qué gánnanu pa gudixhená Noé guiráʼ ne cada tobi de ca binni ni nabani lu Guidxilayú ante gueeda Diluvio. Ca dxi riʼ rúninu stipa guni predicarnu guiráʼ xixé binni lu guidubi Guidxilayú riʼ. Peru neca zacá qué zanda guni predicarnu guiráʼ ne cada tobi de ca binni ca ante gueeda fin. ¿Xiñee yaʼ?
6, 7. ¿Xiñee qué zanda diʼ guni predicarnu ca noticia galán ca ra nuu guiráʼ binni ante gueeda fin?
6 Guidúʼyanu xi bizeeteʼ Jesús de predicación cayúninu tiempu riʼ. Guniʼbe «zaca predicar ca noticia galán stiʼ Reinu lu guidubi guidxilayú para gunadiaga guiráʼ xixé guidxi ni» (Mat. 24:14). Ne yanna nga jma cayaca cumplir ca diidxaʼ riʼ. Runi predicarnu binni de Reinu stiʼ Dios lu jma de ti mil idioma, ne pur sitiu ni nápanu lu internet, jw.org, stale binni zanda gánnacaʼ de ca noticia galán ca.
7 Peru laaca gudxi Jesús ca discípulo stiʼ: «gábecaʼ laatu qué zaluxe xhiiñatu ndaaniʼ ca guidxi stiʼ Israel ante guedandá Xiiñiʼ Hombre». Ndiʼ riníʼ qué zanda gaca predicar guiráʼ binni ante guibiguetaʼ Jesús (Mat. 10:23; 25:31-33). Ca dxi riʼ nuu stale binni nabeza lugar ra qué randa gaca predicar. Ne cada minutu rale stale baʼduhuiiniʼ. Nga runi, neca gúninu stipa pur guni predicarnu ca noticia galán ca ra nuu «binni de guiráʼ nación, tribu, idioma ne guidxi» qué zanda diʼ chindanu ra nuu ca binni ca ante gueeda fin (Apoc. 14:6).
8. ¿Xi zándaca guiníʼ íquenu? (Biiyaʼ ca imagen ca).
8 Pur ni maʼ guninu ca zándaca guiníʼ íquenu: «¿Xi gaca xa de ca binni ni qué ganda gunadiaga ca noticia galán ca ante guzulú gran tribulación yaʼ? ¿Xi guizaaca de laacabe yaʼ? ¿Xi guni Jehová ne Jesús, juez ni chiguni juzgar yaʼ?» (Juan 5:19, 22, 27; Hech. 17:31). Textu stiʼ artículo riʼ rusietenalaʼdxiʼ laanu qué racalaʼdxiʼ Jehová guinitilú nin tobi. Ni racaláʼdxibe nga «gaca arrepentir guiráʼ binni» (2 Ped. 3:9; 1 Tim. 2:4). Peru laaca nánnanu caʼruʼ gabi Jehová laanu xi chiguizaaca né ca binni ca. Ne laaca qué gápabe xi pur gábibe ni laanu.
¿Xi zuni Jehová né ca binni ni qué ñanda ñunadiaagacaʼ ca noticia galán ante guzulú gran tribulación? (Biiyaʼ párrafo 8). c
9. ¿Xii nga ni nánnanu zuni Jehová?
9 Lu Biblia rabi Jehová laanu chupa chonna de ca cosa ni zuni. Guzéʼtenu chupa chonna ejemplu, rábibe laanu zandísabe ca binni ni «qué ñuni ni jneza» laaca nga ca ni qué ñapa oportunidad de ñunadiágacaʼ ca noticia galán ne nuchaacaʼ modo nabánicaʼ (Hech. 24:15; Luc. 23:42, 43). Zándaca gucaa ndiʼ laanu guiníʼ íquenu xhupa xhonna cosa risaca.
10. ¿Xiruʼ zándaca guiníʼ íquenu?
10 ¿Xi zazaaca ne guiráʼ binni ni gati lu gran tribulación yaʼ? Biblia rabi laanu ca ni qué lica ziasa de lade gueʼtuʼ nga ca binni ni gunitilú Jehová ne ca ejércitu stiʼ lu Armagedón purtiʼ laapecaʼ bicaalucaʼ laabe (2 Tes. 1:6-10). Peru ¿laga ca binni ni gatiʼ lu gran tribulación ca de guenda binnigola, lu ti accidente o guuti binni laacaʼ yaʼ? (Ecl. 9:11; Zac. 14:13). ¿Ñee zándaca né laacabe nga guiásacabe lade «ca ni qué ñuni ni jneza» ndaaniʼ guidxilayú cubi ca la? Ni dxandíʼ la? qué gánnanu ni.
NI MAʼ NÁNNANU
11. ¿Xi zuuyaʼ Jehová ora guni juzgar cada binni lu Armagedón?
11 Maʼ nánnanu stale cosa ni chigaca huidxe si. Guzéʼtenu chupa chonna ejemplu, maʼ nánnanu lu Armagedón ca nga chiguiníʼ Dios, ximodo naca cada binni pur modo biʼniʼ tratar ca biʼchiʼ Cristu (Mat. 25:40). Ca ni gucané ca ungidu ne Cristu la? zaníʼ Dios nácacaʼ casi dendxuʼ. Laaca maʼ nánnanu nuuruʼ xhupa xhonna de ca biʼchiʼ Cristu, ca ungidu, lu Guidxilayú riʼ ora guzulú gran tribulación ne ziécabe guibáʼ ora maʼ cayaadxaʼ xcaadxi si para guzulú Armagedón. Zándaca gaca nga ti oportunidad para ca binni ni nayá ladxidóʼ para gacanecaʼ laacabe ne guninecaʼ laacabe dxiiñaʼ stícabe (Mat. 25:31, 32; Apoc. 12:17). ¿Xiñee risaca guiráʼ ndiʼ pue?
12, 13. ¿Xi zándaca guni chupa chonna binni ora gúʼyacaʼ maʼ binitilú Babilonia guidxi roʼ? (Biiyaʼ ca imagen ca).
12 Ne zándaca despué de guzulú gran tribulación zuuyaʼ chupa chonna binni maʼ binitilú «Babilonia guidxi roʼ» ne óraca nga guedasilú laacaʼ maca xadxí de caníʼ ca testigu stiʼ Jehová zazaaca ni. ¿Ñee nuu tu zaca xpinni Jehová ca dxi ca la? (Apoc. 17:5; Ezeq. 33:33).
13 Guiníʼ íquenu ni bizaaca ca dxi stiʼ Moisés dxi biree ca israelita que de Egipto, laaca biree stale binni de guiráʼ clase, zinándacaʼ laacabe (Éx. 12:38). Ne zándaca nuu chupa chonna de laacabe óraruʼ bíʼyacabe cayaca cumplir chii plaga ni guníʼ Moisés que nga gúpacabe fe Jehová. Pa guizaaca xiixa zacá despué de guinitilú Babilonia guidxi roʼ, ¿ñee zadxiichinu ora guidúʼyanu chuʼ xcaadxi binni ládenu para guilacaʼ ante gueeda fin la? ¡Coʼ, ¿njaʼ?! Ni racaláʼdxinu nga chinándanu ejemplu stiʼ Bixhózenu ni nuu guibáʼ purtiʼ laa naca «ti Dios ni napa misericordia ne riá, rindaa para guidxiichi ne qué rusaana de gannaxhii ne fiel laa» (Éx. 34:6). b
Nuu binni zuuyaʼ ora guinitilú «Babilonia guidxi roʼ» ne zándaca zietenaláʼdxicaʼ maʼ stale iza de caníʼ ca testigu stiʼ Jehová zazaaca ni. (Biiyaʼ párrafo 12 ne 13). d
14, 15. ¿Xiñee nánnanu qué zacaa tuuxa guendanabani ni qué zaluxe pur tiempu ni gutiʼ o pur lugar ra nabeza? (Salmo 33:4, 5).
14 Zándaca huayunadiáganu guiníʼ tuuxa de ti familia stiʼ ni cadi naca testigu stiʼ Jehová: «Para naa la? zuluáʼ jma galán ñátibe ante gueeda gran tribulación para ganda guiásabe de lade gueʼtuʼ». Zándaca riníʼ íquebe zacá purtiʼ rábibe nga nga ni jma galán guizaaca, peru ni dxandíʼ la? qué gánnadinu pa zudii Jehová guendanabani ni qué zaluxe ca tuuxa purtiʼ si guti ante de gran tribulación. Jehová nga Juez ni runi ni jneza ne guiráʼ decisión stibe la? jneza ni ne qué ruchee ni (biindaʼ Salmo 33:4, 5). Nanna dxíchinu zuni «Juez stiʼ guidubi naca guidxilayú ni jneza» (Gén. 18:25).
15 Laaca nánnanu qué zacaa tuuxa guendanabani ni qué zaluxe pur lugar ra nabeza. Nánnanu qué ziuu dxi guiníʼ Jehová naca millón de binni casi «chiva» purtiʼ si nabézacaʼ xiixa lugar ra qué ñuu dxi ñaca predicar stiidxaʼ Reinu (Mat. 25:46). Pa laanu rusisácanu xquendanabani ca binni ca nanna dxíchinu «Juez stiʼ guidubi naca guidxilayú» jma rusisaca xquendanabánicabe. Qué gánnadinu xi chiguni Jehová lu gran tribulación ca. Zándaca nuu chupa chonna de ca binni ca zápacaʼ oportunidad para gunibiaʼcaʼ laabe ne guni crecaʼ laabe ora gusiabe labe nezalú guiráʼ guidxi (Ezeq. 38:16).
Despué de guzulú gran tribulación, ¿ñee nuu tu zaca xpinni Jehová ora guʼyaʼ ni cazaaca la?
16. ¿Xii nga ca cosa ni maʼ nánnanu de Jehová? (Biiyaʼ imagen ca).
16 Maʼ gucané Biblia laanu guizíʼdinu nabe rusisaca Jehová guendanabani stiʼ ti binni. Bidiibe Xiiñibe para gapa guiráʼ binni ti oportunidad de guibánicaʼ sin qué chuʼ dxi gáticaʼ (Juan 3:16). Guiranu huayuu ora lu xquendanabáninu huayuni sentirnu pabiáʼ nadxii Jehová laanu ne riá laanu (Is. 49:15). Nánnabe lá cada tobi de laanu ne cadi ngasi, guizáʼ runibiáʼ chaahuibe laanu purtiʼ pa gueeda gátinu la? zanda guzaabeʼ laanu stiʼ biaje casi peʼ modo laanu ne qué ziaadxaʼ gastiʼ dede ne ca cosa ni nuu lu guendabiaaniʼ stinu (Mat. 10:29-31). Nápanu stale razón para gápanu confianza jneza modo zuni juzgar Bixhózenu ni nuu guibáʼ cada binni purtiʼ nuu xpiaanibe, rúnibe ni jneza ne riabe binni (Sant. 2:13).
Nanna dxíchinu jneza modo zuni juzgar Jehová cada binni purtiʼ nuu xpiaanibe, rúnibe ni jneza ne riabe binni. (Biiyaʼ párrafo 16).
17. ¿Xi zadúʼyanu lu stiʼ artículo ca?
17 Yanna ra maʼ riene chaahuinu guiráʼ ni maʼ bizéʼtenu riʼ la? cadúʼyanu jma caquiiñeʼ guni predicarnu nagueendacaʼ. ¿Xiñee rininu zacá yaʼ? Ne ¿xi zucaa laanu cadi gusaana de guni predicarnu ca noticia galán ca yaʼ? Lu sti artículo ca zacábinu ca pregunta riʼ.
CANCIÓN 76 Ziuuluʼ nayecheʼ ora gucheecheluʼ diidxaʼ
a Lu artículo ni láʼ «Cadi nagana modo riuulaʼdxiʼ Jiobá gusiidiʼ», ni biree lu Torre stiʼ ni rapaʼ, 15 de marzo de 2015, yaza 7 hasta 11, cusiene xiñee maʼ qué ridúʼyanu caadxi historia ni zeeda lu Biblia casi profecía ni rini xiixa jma risaca ni zazaaca despué.
b Despué de guinitilú Babilonia guidxi roʼ, zucaalú Gog de Magog xquidxi Dios ne zaca ni ti prueba para guiráʼ xpinni Dios, ne tutiica binni gaca xpinni Dios despué de guinitilú Babilonia guidxi roʼ la? laaca zadíʼdicaʼ lu prueba ca.
c NI RIHUINNI LU CAADXI IMAGEN: Chonna foto ni rusihuinni xiñee qué zanda guni predicarnu cada binni: 1) nabeza ti gunaa ndaaniʼ guidxi ra nuu stale religión ni qué runi cré Cristu ne zándaca guninácabe tuuxa pa chiguni predicar racá; 2) nabeza ti guendaxheelaʼ ndaaniʼ ti guidxi ra qué rudii gobiernu lugar gaca predicar; 3) nabeza ti hombre ti lugar zitu ne lade guiʼxhiʼ.
d NI RIHUINNI LU CAADXI IMAGEN: Ti baʼdudxaapaʼ ni bixeleʼ de Jehová bietenalaʼdxiʼ biziidiʼ ximodo chiguinitilú «Babilonia guidxi roʼ». Ribiguétabe ra nuu Jehová ne ra nuu bixhózebe ne jñaabe ni naca Testigu. Pa guizaaca xiixa zacá, chinándanu ejemplu stiʼ Jehová, guiechenenu binni ni bibiguetaʼ ca, guianu laabe casi ca runi Bixhózenu ni nuu guibáʼ.
