GU KEKEAPAI DU TIPA WISIGOHO 19
BIA 22 I Ima Sigira Kindo —Si Yengo!
Ginipai Ani Nainihe Tipa Wai Yekova Nika Sapangbanga Aboro Barambeda Kumbatayo?
‘Yekova . . . akpi nga nyemu aboro kpi wa sa te.’—2 PET. 3:9.
GU MEMEAPAI DU ROGO GI KEKEAPAI RE
Ani ima rengba kadu na gu kido nga, ho Yekova nika sapangbanga aboro ni barambeda kumbatayo, ko nika mangaha ngba wene gene na ni ruruhe.
1. Tipagine rengbe ani ka pe gupai ti ni nga, ani naraka ti bawene regbo?
ANI naraka ti bawene regbo! Rogo aˈuru dunduko, ani nabi agu apai Baibiri aima gumbaha si ni da ti rengo. Ni kpiapai, ani nabi, “gu bakindo du ku nodiyo” na “gu bakindo du ku sudiyo” i ni sovura dagbatiyo tipa kadu na ome kurii zegino. (Dan. 11:40) Ani nabi gu wene pangbanga nga ga Kindo i nitungusihe rogo zegino dunduko, na badungu amirioni aboro ima sia ka iriso Yekova. (Yes. 60:22; Mt. 24:14) Na ani nagbia agu ariahe nga ga toro kpaima “ti ragoho.”—Mt. 24:45-47.
2. Ginipai rengbe ani kadu na kido tipaha, ono ginipai si aida ani inipai tipaha?
2 Yekova nandu kindi kumbatayo kaa undo rani tipa ani gi rogo gu nyanyakipa apai yo nika manga barambeda kumbatayo. (Snz. 4:18; Dan. 2:28) Ani ima rengba kadu na gu kido nga mbata fu bakere gberãngbi tona, ani nika ino agu apai aino dunduko si nika ida ani inihe tipa ani hipai ni rururani na ki nye ni kodikodi rani ti gu kpakarakpakara regbo re. Wa vura duhe wo, si naida ani ini gupai nga, kuraapai kinaho ani ainongo ho ya nga gu nika manga barambeda kumbatayo. Rogo gi kekeapai re, ani nika sakapai ni bambataha tipa ndu gupai ani namangi aˈariapai ti ni tipa agu apai ani apehe tipa bete agu apai re. Fuo gure, ani nika fugöpai tipa agu apai ani inihe tipa kumbatayo na gu gene gu Barani du ngbangbaturũ yo nika mangapai ngbaha.
GUPAI ANI AINONGOHO YA
3. Mbata kusayo, ginipai ani aberẽhe nga si nika manga agu aboro adunga na idapase ya ho bakere gberãngbi nika tona ni, na tipagine ani ada ti ni kuti gu digisopai re?
3 Mbata kusayo, ani ape gupai nga bara sa kindi bakere gberãngbi nika tona, aboro adunga na momu berewe beyo kadu na idapase kuti Yekova na ki bati ti regbo Aramegido te. Ani ada kuti gu digisopai re bambiko ani agi rogo gupai yo nga gu pangbanga du tipa ime akangbii angia sangbanebi. Ni kpiapai, ani aberẽ gupai nga kina wai boro aarengbanga ka rimo ku kurungba yo tingbafuo Yekova kisi ngbadimo kurungba ya, boro ho nika du na rengba kadu na idapase kuti Yekova na ki bati ti gu regbo bakere gberãngbi nika tona ti ni te.—Mt. 24:37-39.
4. Ya mo ani nabi gu pangbanga du tipa Ime Akangbii awere ni sangbanebi? Oni sakingo rogoyo.
4 Ya mo si rẽarẽ ani pe gupai nga agu apai dunduko namangi ti regbo Ime Akangbii aarukuba gupai nika manga kumbatayo? Karagapai nga oó. Tipagine? Bambiko Baibiri apenga ha wo te. a Kina rengo ngaha nga, Yesu aringbisi “gu rago nangia ga Noa” kuti paye ko. Ono ko aapenga gupai nga agu apai dunduko namangi ti rago Noa nika du na bakere digisidigisi sangbaha kumbatayo wagu nga wai Yekova akisi ngbadimo bakere kurungba te. Ono tie, gere ayugongo gupai nga pai ho rengbe ani ka wirikaha ti gu pangbanga nga ga Noa na Ime Akangbii te.
5. (a) Ginipai Noa amangihe mbata fu Ime Akangbii? (AEbere 11:7; 1 Petero 3:20) (b) Gini wiratise du dagba gu tungusapai nadu ti rago Noa na gu du ti gi gaani regbo re?
5 Ho Noa agi gu zahe ni Yekova afuhe, ko ayugu gupai nga ko adu na idapase ni mbakada ko kurungba. (Oni gedi AEbere 11:7; 1 Petero 3:20.) Wakina gure a, agu aboro nagia gu wene pangbanga du tipa ga Mbori Kindo du wa ka i yugu gayo idapase rogo mangaapai yo. (Amo. 3:17-20) Petero ayambu Noa nga “batungusi rurupai.” (2 Pet. 2:5) Ono tie, a wa ani asakihe rogo gu kekeapai nadu mbata fu gere, ani ainongoho singia Noa aˈasadi ka tungusapai fu agu aboro dunduko naaraka auru kpotosende mbata fu Ime Akangbii te. Areme, ani naˈasada tirani zaaza ka tungusapai fu aboro dunduko rogo zegino. Ono ka ani vura manga asadatise amanga wai vurũ, ani adunga na rengba ka tungusapai fu aboro dunduko mbata fu digido zegino ye te. Tipagine ani nikaa dunga ti ni na rengba ya?
6-7. Tipagine rengbe ani kada ti ni kuti gu digisopai nga, ani adunga na rengba ka tungusapai wene pangbanga fu aboro dunduko rogo zegino mbata fu digido rago ye te? Oni sakingo rogoyo.
6 Oni berẽnga kurii gupai Yesu apehe tipa gaani sunge tungusapai. Ko aima pe gupai kumbatayo nga, i nika tungusa gu ‘wene pangbanga nga ga ngbi rogo zegino dunduko mbiko ndika fu arikaaboro dũ.’ (Mt. 24:14) Gu sangbanebi re nadigisotihe areme susi gu nidu mbata. Gu wene pangbanga nga ga Kindo awere rogo afugo niima susa 1,000, na vurube be gaani bangiriba nga ga internet nga jw.org, badungu aboro areme ima du na rengba ka gia gu wene pangbanga nga ga ga Mbori Kindo.
7 Ono tie, Yesu ape gupai a fu gako abawiriki nga, i “atá nga rogo abaakporo dunduko” te watadu ka tungusapai fu aboro dunduko mbata fu ko ye ka sapangbanga aboro te. (Mt. 10:23; 25:31-33) Afugo Yesu nika da ada ti rengo ti gi gaani regbo re a. Badungu amirioni aboro areme naraka rogo agu aringara adunga ani na ranirii ka tungusapai rogoho ya. Kurigure, badungu akama agude i avungayo rogo aminiti ni basasa dũ. Ani naˈasada tirani ka tungusa wene pangbanga “fu arikaaboro, na ngbatunga aboro, na ngbatunga afugoyo.” (Yugo. 14:6) Ono gu rengo duho nga, ani adunga na rengba ka tungusa wene pangbanga fu aboro dunduko nibasasa auru kpotosende mbata fu digido rago ye te.
8. Gini sanahe rengbe ani ka sanaha nibipa wai Yekova nika sapangbanga aboro kumbatayo? (Oni bi asura a.)
8 Nibipa gupai ani nasakipai tipaha, ani ima rengba ka sanahe nga: Waigu Yekova na Wiriko nga guko ko nafu pa sapangbanga fuko nika mangapai na agu aboro nikaa gbianga momu ka gia wene pangbanga mbata fu bakere gberãngbi tona ya? (Yo. 5:19, 22, 27; Amo. 17:31) Gu veresi du mburu gi sakaapai re riihe nape gupai nga Yekova “akpi nga nyemu aboro kpi wa sa te.” Kuba gure, ko nakpinyemu “aboro da ti zungadi tiyo dunduko.” (2 Pet. 3:9; 1 Tim. 2:4) Wa vura duhe nga ani ima ino agi apai re tipa Yekova, ko ata penga pa wai furani ko nika sapangbanga agu aboro naadunga na momu ka gia wene pangbanga ya te. Nirengo, si aidanga ko pepa agu apai dunduko furani ko namangihe watadu ko nika mangaha te.
Waigu Yekova nika mangapai na agu aboro nikaa dunga na rengba ka gbia momu ka gia wene pangbanga mbata fu bakere gberãngbi tona ya? (Oni bi genewaraga 8) c
9. Ginipai Yekova nayuguhe furani rogo Baibiri yo?
9 Yekova ima gumba bete agu apai furani ko nika mangaha rogo Fugoko yo. Ni kpiapai, Baibiri nape gupai furani nga, Yekova nika zingisa “iraira” aboro nga agu yo naagbianga momu tipa ka gia wene pangbanga na ki mangi ariapai rogo gayo mangaapai yo ya. (Amo. 24:15; Rk. 23:42, 43) Gure nakusa kura nyanyakipa asanahe.
10. Gini kura asanahe nakura?
10 Ya mo agu aboro dunduko nika kpi ti regbo bakere gberãngbi adunga na gu maabangirise berewe nga ga zingabekpio te? Ziazia Kekeapai ima pe gupai gbaiga nga agu aboro nikaa soga Yekova nga aguyo ko nika imo yo na gako abasovura ti regbo Aramegido azinganga be kpio te. (2 Tesa. 1:6-10) Ono na ginipai nika du tipa kura aboro, ni kpiapai, aguyo ima rengba ka kpi ti regbo bakere gberãngbi mbiko kaza, gbinza, béno, watadu gu kura aboro imi yo? (Batu. 9:11; Zek. 14:13) Ya mo si rengbe kadu nga bete agi aboro re nika du dagba gu “iraira” aboro i nika zingisayo rogo vovo zegino? Ani ainongo ho te.
GUPAI ANI NAINIHE
11. Ginihe pa sapangbanga aboro nika ru riihe ti regbo Aramegido?
11 Ani ima ino dungu apai tipa agu apai nika manga kumbatayo. Ni kpiapai, ani ima ino gupai nga ti regbo Aramegido, i nika sapangbanga aboro ringbisihe kuti wai i amangipai na awirina Kristo. (Mt. 25:40) Agu aboro i nika sapangbanga yo wa akandoro nika ima yugoho rogo gayo mangaapai yo nga i nasongoda mbedimbedi aKristano na Kristo. Ani ima ino gupai a nga, kura awirina Kristo kinaho nika du kindi auru kpotosende ane tingbafuo bakere gberãngbi tona, na i nika dia yo ku ngbangbaturũ yo ngbutuko mbata fu Aramegido tona. Wa awirina Kristo nika du kindi auru kpotosende ane, agu aboro du na wene ngbaduyo yo nika du na momu kindi ka songoda yo na gu sunge i amangaha. (Mt. 25:31, 32; Yugo. 12:17) Tipagine du agu arengo re ti ni na nyanyakipaha?
12-13. Waigu rengbe kura aboro ka mangapai tingbafuo bi yo wai i nika gbarasa “Babera Duna Bakere Ome Ti Ni”? (Oni bi asura a.)
12 Zavura tingbafuo bakere gberãngbi tona, gu kura aboro nga agu yo nikaa bi wai i nika gbarasa “Babera Duna Bakere Ome Ti Ni” nika tingida gupai atingida nga aDezire Yekova aima digo nipe gipai re tipa dungu agarã nga si nika manga. Ya mo si rengbe kadu nga, pa bi kura aboro wai i nikaa gbarasa Babera Duna Bakere Ome Ti Ni asa yo tipa i du na idapase kuti Yekova?—Yugo. 17:5; Yeze. 33:33.
13 Ka pai wa gure mangi, si du wakina gupai namangi Ezipeta yo ti rago Moize. Oni tingidi gupai nga “bakere rimbasa kungba aboro” akoditiyo na aYisaraere ka kura Ezipeta yo. Si nawira gupai nga bete agi aboro re aima tona ka sonosa idapase kuti Yekova ho i abi gupai ni nga ga Moize zahe tipa agu Ambusa Nadu Bawe aima da ti rengo. (Gate 12:38) Ka ngbatungapai wa gure mangi tingbafuo i gbarasi Babera Duna Bakere Ome Ti Ni, ya mo rago agberã tirani nga aboro nika du na rengba ka kodatiyo na ani ngbutuko mbata fu Aramegido? Wagusa te! Ani naida ka yugo sino gu Barani du ngbangbaturũ yo nga gu “Mbori du adu na nunga aboro na undahe ti ko, du ni bayee ko tipa zinga, ki du na inapai kpaima na rengo.” b—Gate 34:6.
Bete agu aboro nika bi wai i nika gbarasa “Babera Duna Bakere Ome Ti Ni” ni ka tingida gupai nga aDezire Yekova aima digo ni gumba pa gipai re (Oni bi genewaraga 12-13) d
14-15. Ya mo pa ga boro raka nyeanye kindi kumbatayo naru riipa gu regbo ni akpi ti ni watadu pa gu ba ni araka rogoho? Oni sakingo rogoyo. (Atambuahe 33:4, 5)
14 Ti kura aregbo, awirina ima rengba ka pe gupai tipa boro sa rogo gayo ngbadimo kporo nga gu ni airisongo Yekova ya nga: “Si adu ni wenepai funi nga ni akpi mbata fu bakere gberãngbi tona, bambiko si nika sa gupai nga ni du na gu kido nga i nika zingisa ni azingisa be kpio.” Wene ndu apai kinaho i ape agu pai re ti ni. Ono pa ga boro nyenye unga kumbatayo arunga rii pa gu regbo ni nika kpi ti ni te. Yekova nga rengberengbe Basapungbanga—gako adiaberã ti aregbo dunduko ni ruruhe na ni wenehe. (Oni gedi Atambuahe 33:4, 5.) Ani ima rengba kadu na gu kido nga, “Basapungbanga zegino dunduko” nika manga gupai nika kadu ni ruruhe.—Bam. P. 18:25.
15 Si re are tie ani idi kuti gupai nga, padu boro na momu ka raka nyeanye kindi arunga riipa gu rago ni araka rogoho te. Yekova asapanga ngbanga amirioni aboro wa “ameme” mbiko gupai nga i naraka rogo agu adagbarago adunga yo na rengba ka wirika wene pangbanga rogoho ya te. (Mt. 25:46) Wangia ko ruru Basapungbanga zegino dunduko, ko naberã payo aberã ni basasa kisusi wai ani aberã payo. Ani ainongo wai Yekova nika mangaapai ti regbo bakere gberãngbi te. Isoke, gupai i nika bihe ti regbo bakere gberãngbi ima rengba ka fõ kpotoyo yo i du na idapase kuti Yekova ho ko nika ziasi rimoko ni auru kpotosende dunduko.—Yeze. 38:16.
Tingbafuo bakere gberãngbi tona, . . . ya mo bete agu aboro nika bi agu apai nika manga re asaberã yo?
16. Ginipai ani naye ka inoho tipa Yekova? (Oni bi sura a.)
16 Vurube gaani wirika Baibiri, ani ima ye ka ino gupai nga Yekova nabi aboro na nyanyakipa yo. Ko afu gu unga nga ga bangisa Wiriko tipa rani wa ka ani raki nyeanye kindi. (Yo. 3:16) Ani dunduko naima bi ga Yekova bakere nyemuse. (Yes. 49:15) Ko ima ino rani ni basasa dunduko ti arimo rani. Nirengo, ko ima ino rani wenengai wa du ani ni basasa na ka ani vura kpi, ko nika zingisa rani azingisa be kpio bambiko ko natingida gu futufutuapai dunduko du tipa rani na agu aberã ani adu na ni! (Mt. 10:29-31) Zanga kapa, ani na wene ndupai berani kadu na gu kido nga, gu Barani du ngbangbaturũ yo nga boro nyemuse nika sapangbanga ai boro ni ruruhe bambiko ko nga iratatamana, kidu ni ruruko, na ki ngia Mbori inapai.—Yak. 2:13.
Ani ima rengba kadu na gu kido nga Yekova nika sapangbanga ai boro ni ruruhe bambiko ko nga iratatamana, kidu ni ruruko, na ki ngia Mbori inapai (Oni bi genewaraga 16)
17. Gini apai ani nika sakapai tipaha rogo gu kekeapai ngbefuo gere?
17 Na gi vovo giarogo pai yo re, ani ima ino gupai nga si naida ani mangi gaani sunge tungusapai ni ipiipihe susi gu nidu mbata. Tipagine rengbe ani ka pe gupai re ti ni? Na ginipai nika fõ ngbaduraniyo tipa ani nye kaa tungusa wene pangbanga kindi zaaza? Ani nika saka akaragapai kuti agu asanahe re ni futufutu he rogo gu kekeapai ngbefuo gere.
BIA 76 Mo Nidu Wai Nzunzu?
a Tipa ka ino ndu gupai i namangi gi ariapai re ti ni, oni bi gu kekeapai nga, “Wo si Angba Angba Bangiro,” rogo gu Ngbaõbambu Sinziri nangia ga Marungu 1, 2015 kpe. 8-11.
b Tingbafuo i gbarasi Babera Duna Bakere Ome Ti Ni, ga Yekova amoyambu dunduko nika du ngba asada be gu zubohe nga ga Gogo boro Magogo. Ai gu boro nika ngbe na ga Mbori aboro tingbafuo gbarasayo Babera Duna Bakere Ome Ti Ni nika du ngba asada a.
c SAKAPAI TIPA ASURA: Agu apai biata namanga nayugo ndu gupai kura aboro aadunga ti ni na rengba ka gia gu gaani sunge tungusapai namanga rogo zegino dunduko ya: (1) Dee naraka rogo gu ba si naima kpakara rogoho boro du rogo kura pambori kia, (2) arogotise naraka rogo gu ba duhe ni kpakarakpakaraha na ni kerepai rogoho ka irisombori be agu aboro biri-zogarago du ho, na (3) kumba naraka rogo gu ba duhe ni kpakarakpakaraha ka da yo.
d SAKAPAI TIPA SURA: Paranga dee nga guri naima zera rogo toro yo natingida gupai ri awirikihe tipa pa gbarasa “Babera Duna Bakere Ome Ti Ni.” Ri diberã ka karaga tiri fuo Yekova na fuo agu avunguri nga aDezire Yekova. Ka ngbatungapai wa gure mangi, ani naida ka wirika gu Barani du ngbangbaturũ yo du na inapai na nunga na kidu na ngbarago nga boro ingapai karaga ti ni.
