ARTÍCULO NI GUISUIDYNO 19
CANCIÓN 22 ¡Que venga el Reino que Dios ha establecido!
¿Xí láani nanno ni gony Jehová né juicio ni gac ló dzú ni sietra?
«Jehová […] diti nainy láabu que ni toib guinitló» (2 PED. 3:9).
TEMA
¿Xigony labúu gapno confianz que ló dzú ni sietra Jehová sony juzgarbu buñ xinésni?
1. ¿Xigony labúu guinino que nabanyno ló toib tiemp ni radziguiaʼ buñ?
¡NABANYNO ló toib dzú ni radziguiaʼ buñ! Guirá dzú cabiʼno ximod cayac cumplir profecía ni sieed ló la Biblia. Por ejemplo, rabiʼno ximod racaló «rey del norte» né «rey del sur» par labúu gony mandarybu buñgudxlio (Dan. 11:40). Láaca, cayac predicar diitz sacró de Gobierno xtuny Dios xomod diti ma gocni nírcu, né xidal buñ ma cagoʼyibu guicyibu gonyibu xchiin Jehová (Is. 60:22; Mat. 24:14). Né cacaʼno galrro espiritual «órni caquiinni» (Mat. 24:45-47).
2. ¿Xí labúu gapno confianz, né xí non guidudyno cuent?
2 Jehová cayacnésa lóono par guientzaayno guirá ni mápa mer gac (Prov. 4:18; Dan. 2:28). Napno confianz que órni saló gran tribulación sapno guirá información ni raquiinno par gacno fiel ló tiemp ni nagancu. Per, non ganno que noʼ cós ni diti nanno ni gac ló dzú ni sietra. Ló artículo reʼ, primer sasuidyno xigony bitzaʼno mod rienno tipnés cós reʼ. Después sasuidyno tipnés cós ni nanno ni gac ló dzú ni sietra né mod gony Bixiosno ni noʼ guibá.
NI DITI NANNO
3. ¿Xí láani gonino gac buñ ór saló gran tribulación, né xigony bunyno pensary ngú?
3 Antes gonino que órni saló gran tribulación, buñ ma diti sapyibu oportunida par gapyibu fe lóo Jehová né tudyibu nabany ló Armagedón. Gonino ngú portín bunyno pensary que guirá ni góc órni góc Diluvio bislooyni ximod ñacni ló dzú ni sietra. Por ejemplo, gonino que, modca bisieg Jehová puert antes ni nasaló Diluvio, modcuca nasiegbu puert órni nasaló gran tribulación, né ma diti ñoʼ chú labúu nalaa (Mat. 24:37-39).
4. ¿Xigony ma diti ranino que guirá ni góc ló xtzú Noé sac cumplirni ló naareʼ?
4 ¿Per non gonyno pensary que historia xtuny Diluvio noʼ xí radudyni diitz la? a Yaca, portín la Biblia diti raniʼ láani. Nigolú, Jesús bitzak «xtzú Noé» né tiemp ni ñeedbu. Per diti bidudybu diitz que guirá ni góc ló Diluvio xomod ni nasieg Jehová xpuert arca, ñac cumplirni ló dzú ni sietra. Ná scú, labúu guisuidyno xidal cós de historia reʼ.
5. a) ¿Xí láani buny Noé antes ni ñac Diluvio? (Hebreos 11:7; 1 Pedro 3:20). b) ¿Ximod toibsi midid nac mod goniʼ Noé diitz sacró né mod ranino láani ló naareʼ?
5 Órni Noé bicadiag ni góoch Jehová láabu gac, bislooybu que gopbu fe órni bisaʼbu arca (bíil Hebreos 11:7; 1 Pedro 3:20). Modcuca, buñ ni guicadiag diitz sacró non guislooyibu que napyibu fe né mod ronyibu (Hech. 3:17-20). Pedro goniʼ que Noé buny «predicar xinésni» (2 Ped. 2:5). Per xomodca bisuidyno ló artículo ni godudy, diti nanno pal biyopy Noé mod ñaibybu guirá né tigaaga buñ ni bibany ló Gudxlio que mápa mer gac toib Diluvio. Ló naareʼ, ronyno rutirigaʼlni lóono par guinino xtiitz Dios ló guidopynac Gudxlio. Per, ná gonyno rutirigaʼlni lóono, diti labúu guinino xtiitz Dios né guiránac buñ antes de guidxin fin. ¿Xigony ranino ngú?
6, 7. ¿Xigony diti labúu sony predicarno diitz sacró a guirá buñ antes ni guidxin fin?
6 Guisuidyno ni goniʼ Jesús de predicación xtunyno. Goniʼbu que diitz sacró ñac predicarni «ló guidopynac gudxlio» (Mat. 24:14). Né diitzcu cayac cumplirni ló naareʼ. Ranino diitz sacró de Gobierno xtuny Dios ló más de tipmil diitz, né xcalrracné lagary ni napno ló internet, jw.org casi guirá buñ ni nabany ló guidopynac Gudxlio ranyibu de diitz sacró.
7 Jesús láaca gochbu xpiimbu ndeʼ: «Diti salox sasaato ló guidopy gudx Israel órni guidxin Xiin Buñgudxlio». Ni radudy diitz diti labúu ñony predicarbu guirá buñ antes de guieedbu (Mat. 10:23; 25:31-33). Ló naareʼ xidalguixo buñ rabésyibu lagary ro diti napno permís guinino xtiitz Dios. Láaca tigaaga minut rál xidal badaʼ. Ná gonyno rutirigaʼlni lóono por guinino diitz sacró a «guirá gudxrop, tribu, diitz né gudx», diti labúu guininéno guiránac buñ antes de guidxin fin (Apoc. 14:6).
8. ¿Xí labúu nanabdiitzno lóono? (Láaca bibiʼ retrat).
8 Por ngú, pentzi guinabdiitzno lóono: «¿Xí sac né buñ ni diti gop oportunida de nacadiag diitz sacró antes ni saló gran tribulación? ¿Xí láani sony Jehová né Xiimbu ni ma golúbu par gony juzgar né layibu?» (Juan 5:19, 22, 27; Hech. 17:31). Texto temático de artículo reʼ ronyni que guisetnaladxno que Jehová «diti nainy láabu que ni toib guinitló». Xalagary ngú, raniiny láabu que guiránac buñ gac arrepentir (2 Ped. 3:9; 1 Tim. 2:4). Per radudyno cuent que Jehová diti ma gochbu lóono xi gonybu né guirá buñcu. Né diti fuerspa gaibybu láani lóono.
¿Xí láani sony Jehová né guirá buñ ni diti gop oportunida de nacadiag diitz sacró antes ni saló gran tribulación? (Bibiʼ párrafo 8). c
9. ¿Xí láani ma góoch Jehová lóono ló Xtiitzbu?
9 Ló Xtiitzbu, Jehová ma goniʼ tipnés cós ni sonybu. Por ejemplo, raibybu lóono que salísbu «ni diti buny xinésni» ni diti gop oportunida par nasuidyibu diitz sacró né natzaʼyibu mod nabanyibu (Hech. 24:15; Luc. 23:42, 43). Por ngú labúu guinabdiitzno tipnés cós ni rasac.
10. ¿Xí más labúu guinabdiitzno lóono?
10 ¿Xí láani sac né guirá buñ ni gaity ló gran tribulación? ¿Sanitlóyibu por tipzó né diti sapyibu oportunida guiásyibu stoib la? La Biblia nayadit náni que buñ ni diti siás layibu ngú buñ ni Jehová né soldad xtuny sanitló portín cualó láabu (2 Tes. 1:6-10). Per ¿xí labúu guinino de buñ ni gaity ló gran tribulación xtol desgrasy o xtol stipnés buñ? (Ecl. 9:11; Zac. 14:13). ¿Tipnésyibu labúu tzoʼyibu lad buñ ni diti «buny xinésni» ni guiás ló Gudxlio copy la? Diti nanno.
NI NANNO
11. ¿Xí láani saniʼ mod gac juzgar tigaaga buñ ló Armagedón?
11 Noʼ xidal cós ni nanno ni gac ló dzú ni sietra. Por ejemplo, buñ sac né layibu de acuerdo mod bunyibu né xherman Cristo (Mat. 25:40). Buñ ni gocné a ungidos né a Cristo sac galrragobioo layibu xomod rony buñ né xiil. Láaca nanno que tipnés xherman Cristo sioʼrayibu ló Gudxlio ló gran tribulación né sieeyibu guibá antes de saló Armagedón. Laʼga noʼsa ungidos ló Gudxlio, tipnés buñ ni natzaay xcalnabany labúu gapyibu oportunida de gacnéyibu tanli Cristo né ungidos né dxiin ni ronyibu (Mat. 25:31, 32; Apoc. 12:17). ¿Xigony rasac guirá ndeʼ?
12, 13. ¿Xí láani labúu gony tipnés buñ órni guibiʼyibu guinitló Babilonia la Grande? (Láaca bibiʼ retrat).
12 Láaca después ni saló gran tribulación, tipnés buñ ni guibiʼ mod guinitló «Babilonia la Grande» guisetnaladx que testigos xtuny Jehová ma sané xidal íz caniʼyibu que ngú gac. ¿Labúu coʼyibu guicyibu tzoʼyibu xilad Jehová la? (Apoc. 17:5; Ezeq. 33:33).
13 Gonyno pensary ni góc ló xtzú Moisés. Órni israelitas bireʼyibu de gudx Egipto, né layibu láaca bireʼ «timontón de guirá clas buñ» (Éx. 12:38). Pentzi tipnésyibu gosaló gopyibu fe lóo Jehová órni bibiʼyibu que 10 plagas ni goniʼ Moisés góc cumplirni. Pal ngúca rac órni Babilonia la Grande guinitló, ¿sonyno pensary que diti xinésni ngú tzoʼ buñ ni tzoʼ ladno antes de guidxin fin la? ¡Yaca! Nainy guisuʼno Bixiosno ni nac, «Dios ni nap galrronladx né ni rien xi rasac buñ, ni nap paseins né ni nap galnadxiʼ ni diti radzaʼ né toib Dios ni nigolú» (Éx. 34:6). b
Tipnés buñ ni guibiʼ ni guinitló «Babilonia la Grande» sasetnaladxyibu que testigos xtuny Jehová ma xidzú íz de goloʼ caniʼyibu que guirá nga gac. (Bibiʼ párrafos 12 né 13). d
14, 15. ¿Xigony nanno ni labúu guibany buñ tipzó diti racni por dzú ni raity buñ o lagary ro rabésbu? (Salmo 33:4, 5).
14 Sigory ma bicadiagno toib buñ ni goniʼ modreʼ de toibtica xfamilbu ni diti rony xchiin Jehová: «Sigory más sacró ñaitybu antes de guidxin gran tribulación, par ñapbu esperanza de guiásbu». Raniʼbu ngú portín ronladxbu xfamilbu. Per ni labúu guibany buñ por tipzó diti racni por dzú ni raitybu. Jehová nac juez ni diti raché né guirá ni ronybu, ronybu láani xinésni (bíil Salmo 33:4, 5). Napno confianz que «Juez de guidopynac gudxlio» sony xinésni (Gén. 18:25).
15 Ni labúu guibany buñ por tipzó diti nacni por lagary ro rabésbu. Jehová dipa naniʼ que xidal millón buñ nac xomod «chiv» nosi portín rabésyibu lagary ro diti gopyibu oportunida de nacadiagyibu diitz sacró de Gobierno xtuny Dios (Mat. 25:46). Pal guirá buñcu rasac par lóono, más rasacyibu par juez ni noʼ ló guidopynac Gudxlio. Diti nanno ximod gony Jehová láani ló gran tribulación. Pentzi tipnés buñcu sapyibu oportunida de gapyibu fe lóo Jehová órni gac nayaabu nisló guidopynac Gudxlio (Ezeq. 38:16).
Después ni saló gran tribulación, ¿tipnés buñ labúu coʼyibu guicyibu tzoʼyibu xilad Jehová órni guibiʼyibu guirá ni gac la?
16. ¿Xí cós nanno de Jehová? (Láaca bibiʼ dibuj).
16 Né xcalrracné la Biblia, ma bisuidyno que par Jehová nigolú rasac xcalnabany buñ. Bunycuentbu Xiimbu par labúu ñapno oportunida guibanyno tipzó (Juan 3:16). Ló xcalnabanyno, guiráno ma gosacno que Jehová ronladx lóono (Is. 49:15). Rimbubu tigaagano por laano. Né rimbutzaaybu lóono que pal raityno labúu guisaʼbu lóono xomodpa gócno, né guirá cós ni bunyno (Mat. 10:29-31). Napno xidal razón par gapno confianz que Bixiosno ni noʼ guibá sony juzgarbu tigaaga buñ xomodpa racladxni, portín napbu sabiduría, ronybu xinésni né napbu galrronladx (Sant. 2:13).
Labúu gapno confianz que Jehová sony juzgar tigaaga buñ de toib mod galán, portín napbu sabiduría, ronybu xinésni né ronladxbu buñ. (Bibiʼ párrafo 16).
17. ¿Xí guisuidyno ló artículo ni sieed?
17 Nigoreʼ ni ma bienno guirá ndeʼ, radudyno cuent que más rasac guinino xtiitz Dios. ¿Xigony ranino ndeʼ? Né ¿xí sachiin lóono par diti guiañ guinino xtiitz Dios? Ló artículo ni sieed sacapy galrranabdiitz reʼ.
CANCIÓN 76 Cuéntame lo que sientes
a Ló artículo ni laa, «A Jehová le gusta enseñar de forma sencilla», ni sieed ló Guiich ni Caniʼ de 15 de marz íz 2015, páginas 7 a 11, sadzelo ximod rarexa xigony ma diti rabiʼno tipnés historias ni sieed ló la Biblia xomod profecías.
b Después ni guinitló Babilonia la Grande, ni guicaló Gog de Magog sácni toib prueby par guirá xpiin Dios. Nitisi buñ ni coʼ guic gony ni ná Jehová después ni guinitló Babilonia la Grande láaca sioʼyibu ló prueby.
c MOD RAREXA DIBUJ NÉ RETRAT: Tzón escenas ni raslooy xigony diti labúu sony predicarno guiránac né tigaaga buñ: 1) toib buñgonaʼ rabés toib lagary ro casi guirá religión diti nacni cristiana né nacni toib riesga gony predicar buñ lagarycu; 2) toib galtzeʼel rabés toib lagary ro diti napno permís né toib riesga láani gony predicar buñ lagarycu xtol buñchiin ni noʼ gudxcu; 3) toib buñguieeu rabés toib lagary ni noʼ nigolú sit de tipnés gudx né ro diti labúu rioʼ buñ.
d MOD RAREXA DIBUJ NÉ RETRAT: Toib buñgonaʼ mbioxhlas ni bisian galnigolú rasetnaladxbu ni bisuidybu mod guinitló «Babilonia la Grande». Ragoʼbu guicbu tzoʼbu xilad Jehová né guibiguetbu roʼno bixiosbu né xinaʼbu ni nac Testigos. Pal ngú rac, nainy gapno galrronladx xomod Bixiosno ni noʼ guibá né guibaladxno que toib buñ galkié coʼ guic guibiguet.
