1. ¿Kunanakas 2023 maran apaskäna uka reunión anualan yatiyasïna?

 MAYMÄRAJJ apaskäna uka reunión anualanjja, a kunanakarutï creyktan uka yaqhep kusiskañ qhanañchäwinakaw yatiyasïna, predicañ toqet ukhamarakiw kusiskañ yatiyäwinakajj yatiyasïna. Jachʼa Babiloniajj tukjatäkani uka qhepatjja, inas yaqhep jaqenakan Diosan markapar mantanipjjañapatak oportunidadajj utjaskchini sasaw qhanañchasïna. Ukatjja, noviembre de 2023 marat uksarojj janiw publicadoranakan phoqatpach informe katuyapjjañapajj wakisjjaniti sasaw yatiyasïna. Ukampis ukajj ¿janis predicañajj nayrat sipans jukʼamp importantëjjaspa janis jankʼak predicañäjjaspa ukhamt sañ muni? ¡Janiw ukhamäkiti!

2. ¿Kunatsa urut urutjamajj jukʼamp predicañasa? (Marcos 13:10).

² Niyakejjay akapachan tukusiñapajj wali jakʼankjjchejja, urut urutjamaw jukʼamp predicañasa. Kunsa Jesusajj aka qhepa urunakan predicañ toqet arsuwayäna uk amuytʼañäni (Marcos 13:10 liytʼäta). Mateo libronjja, “akapachan tukusiñapajj” janïr purinkani ukhaw suma yatiyäwinakajj oraqpachan yatiyasini sasaw Jesusajj säna (Mat. 24:14). Akapachan tukusiñapa sasinjja, Supayan apnaqat aka jan wali pachan qʼala tukjatäñapatwa parlaskäna. ‘Kuna urusa kuna horasarus’ taqe ukanakajj pasani uk Jehová Diosajj amtjjewa (Mat. 24:36; 25:13; Hech. 1:7). Urut urutjamaw uka urojj wali jakʼankjje (Rom. 13:11). Ukañkamasti akapachan tukusiñapkamajj predicaskakiñasawa.

3. ¿Kunatsa prediktanjja?

 ³ Taqeniw akham sasin jisktʼasiñasa: “¿Kunatsa suma yatiyäwinak prediktanjja?” sasa. Munasiñatwa prediktanjja. Predicktan ukhajj suma yatiyäwinakar munasitasa, jaqenakar munasitasa, jukʼampis Jehová Diosampir sutipampir munasitaswa uñachtʼaytanjja. Uka toqenakat jichhajj yatjjatañäni.

SUMA YATIYÄWINAKAR MUNASITASATWA PREDIKTANJJA

4. ¿Kunsa mä suma yatiyäwi katoqasajj lurirïta?

⁴ Mä suma yatiyäwi katoqasajj ¿kunsa lurirïta? Inas mä familiaraman jiskʼa wawapajj naschi jan ukajj necesitkayäta ukhapun mä trabajo jikjjatsta. Inas familiaranakamarus amigonakamarus wali kusisit jankʼak uk yatiyirïsta. Diosan Reinopat parlir suma yatiyäwinak yatisajj inas ukham lurañ munarakchiyäta.

5. ¿Kunjamsa cheqa yatichäwinak yateqasajj jikjjatasiyäta? (Fotonak uñjjattʼarakïta).

⁵ Diosan Arupankir cheqa yatichäwinak yatisajj kunjamas jikjjatasiyäta uk amuytʼam. Qhawqsa alajjpachankir Awkimajj munastam, qhawqsa familiap taypinkañam munaraki ukanakwa yateqpachätajja. Tʼaqesiñampir jan walinakampir tukjañ arsutapatsa, jiwapki uka munat familiaranakamana jan ukajj amigonakaman jaktanipjjañapätapsa, yaqha ukhamanaks yateqarakpachätawa (Mar. 10:29, 30; Juan 5:28, 29; Rom. 8:38, 39; Apoc. 21:3, 4). Uka cheqa yatichäwinakajj chuymaruw purtʼpachätamjja (Luc. 24:32). Uka suma yatichäwinakar munasitam laykojj taqenirurakiw yatiyañ munpachäyätajja (Jeremías 20:9 liytʼarakïta).

6. ¿Kunsa Ernest jilatampina Rose esposapampin experienciapat yateqsna?

⁶ Ernest sat jilatan experienciapat amuytʼañäni. b Jupajj tunka maranïkäna ukhaw tatapajj jiwjjäna. Jilatajj akham siwa: “Nayajj  akham sasaw jisktʼasiyäta: ‘¿Papitujajj alajjpacharut sarjjpacha, jan ukajj wiñayatakipunich jiwjjpacha?’ sasa. Yaqha wawanakar tatapamp uñjasajj llakisirïtwa” sasa. Sapa kutiw cementerior sarasajj papitupan sepulturap nayraqatan qonqortʼasirïna, akham sasaw orasirakirïna: “Mirä amp sum Dios Tata, kawkinkpachas papitujajj uk yatiñ munta” sasa. Ernest jilatajj niya 27 maranëjjäna ukhajja, Bibliat yatichañ munapkäna ukhajj jankʼakiw iyawsäna. Bibliarjamajj jiwatanakajj jiwa ik iktʼasipki, janiw kuns yatipkiti, jutïrin jaktanjjapjjaniwa sasin yatichapkäna ukhajja, jupajj wal kusisïna (Ecl. 9:5, 10; Hech. 24:15). Kunanaktï walja maranak nayrajj wal yatiñ munkäna ukanakwa yateqäna. Ernest jilatajj Biblian yatichäwinakap yateqasajj walpun kusisïna, Rose esposapajj jupamp chikaw Bibliat yateqarakïna, kuntï yateqkäna ukarojj ukhamarakiw munasïna. Jupanakajj 1978 maranwa bautisasipjjäna. Taqe chuymarakiw Biblian cheqa yatichäwinakap familiaranakaparusa, amigonakaparusa, yaqhanakarus yatiyapjjäna. Ukham lurapjjatapatjja, Ernest jilatampi Rose esposapampejj 70 jila jaqenakaruw Jehová Diosar uñtʼapjjañapatakisa bautisasipjjañapatakis yanaptʼapjjäna.

7. Biblian cheqa yatichäwinakapajj chuymar purtʼistu ukhajj ¿kun lurañs wal muntanjja? (Lucas 6:45).

⁷ Kunapachatï Biblian cheqa yatichäwinakapajj chuymar purtʼistu ukhajja, taqeniruw yatiyañ munaraktanjja (Lucas 6:45 liytʼäta). Nayra patak maranakan jakir Jesusan discipulonakapjamaw jikjjatastanjja, jupanakajj akham sapjjänwa: “Kunanaktï nanakajj uñjapkta, istʼapkarakta ukanakat parlañ janiw amuktʼapkiristti” sasa (Hech. 4:20). Niyakejjay cheqa yatichäwinakar wal munasstanjja, qhawqhanirutï yatiyañjamäki ukhaniruw yatiyañ muntanjja.

JAQENAKAR MUNASITASATWA PREDIKTANJJA

8. ¿Kunatsa yaqhanakar suma yatiyäwinak yatiyañ muntanjja? (“ Jaqenakar munasisa Jesusan discipulopar tukuyapjjañäni” sat recuadro liytʼäta; foto uñjjattʼarakïta).

⁸ Kunjamtï Jehová Diosampi Jesusampejj jaqenakar munasipkejja, ukhamarakiw jiwasajj jaqenakar munastanjja (Prov. 8:31; Juan 3:16). Khitinakatï ‘Diosar jan uñtʼapki’ jan kuna suytʼañanïpkaraki ukanakat wal sinttʼastanjja (Efes. 2:12). Niyakejjay jupanakajj kunayman jan walinakan uñjasipjjchejja, wali manqha pʼiyankapkaspas ukhamäpjjewa, ukampis jiwasajj Diosan Reinopat parlir suma yatiyäwinakat yatiyasaw jupanakar yanaptʼsna. Jupanakar munasitasata, sinttʼasitasatwa suma yatiyäwinak jupanakar yatiyañatak  wal chʼamachastanjja. Uka suma yatiyäwinakaw jupanakar mä suytʼäwi churaspa, jichha tiempon kusisitäpjjañapatakis yanaptʼaspa. Uka suma yatiyäwinakarakiw Diosan machaq mundopan ‘cheqpach jakaña’, mä arunjja wiñay jakañ jikjjatapjjañapatakejj yanaptʼarakispa (1 Tim. 6:19).

9. ¿Kunsa jutïrit yatiyasktanjja, ukat kunatsa? (Ezequiel 33:7, 8).

⁹ Jaqenakar munasitasatwa “aka jan wali pachajj niyaw tukusjjani” sasin yatiytanjja (Ezequiel 33:7, 8 liytʼäta). Taqe jaqenakatsa, Diosar jan servir familiaranakasats wal sinttʼastanjja, waljaniw kunatï niy pasañampïski uk jan yäqapkiti. Mateo 24:21 textojj akham siwa: “Jachʼa tʼaqesiñ tiempow jutani, aka mundon qalltapat jichhakamajj janipuniw ukham tʼaqesiñajj utjkänti, janirakiw mayampis utjkaniti” sasa. Kunas uka juicio tiempon pasani uk jaqenakan yatipjjañapwa muntanjja, nayraqatajj falso religionanakaw tʼunjatäpjjani, ukjjarusti aka jan wali mundojj Armagedonan tukjatarakïniwa (Apoc. 16:14, 16; 17:16, 17; 19:11, 19, 20). Ukatwa waljanin jiwasar istʼapjjañapataki, Jehová Diosar jiwasamp chik serviñ amtapjjañapatak wal orastanjja. Ukampis janitï jupanakasa munat familiaranakasas istʼapkistani ukhajj ¿kunsa lurañäni?

10. ¿Kunatsa jaqenakar jankʼak yatiyaskakiñasa?

¹⁰ Kunjamtï pasïr yatichäwin yatjjataniwayktanjja, khitinakatï Jachʼa Babilonian tukjasitap uñjasajj jakäwinakap cambiapkani ukanakarojj inas Jehová Diosajj salvañ amtchini. Uk amuyañajja, Diosan Arupat jaqenakar jukʼamp yatiyañatakiw yanaptʼistu. Ak amtapjjapuniñäni: kuntï jichha tiempon jupanakar siskañäni uk jutïrinwa amtapjjaspa (Ezequiel 33:33 liytʼarakïta). Inas jupanakajj kuntï yatiyktan uk amtapjjchispa, ukat horasäkipanwa jiwasamp chik Diosar serviñ amtapjjarakispa. Amtañäni, Filipos markankir cárcel uñjir chachajja, mä jachʼa terremotojj utjkäna ukhakiw cheqa yatichäwinak katoqasïna, inas jichha tiempon cheqa yatichäwinak jan yatiñ munirinakajj utjchi, ukampis kunapachatï Jachʼa Babiloniajj tukjaskani ukhaw yatiñ munapjjaspa (Hech. 16:25-34).

JEHOVÁ DIOSAMPIRU SUTIPAMPIR MUNASITASATWA PREDIKTANJJA

11. ¿Kunjamsa Jehová Diosarojj ‘jachʼañchäwi, honra, chʼama’ churtanjja? (Apocalipsis 4:11; fotonak uñjjattʼarakïta).

¹¹ Taqe kunat sipansa, Jehová Diosampiru santo sutipampir munasitasatwa suma yatiyäwinak prediktanjja. Munasktan uka Diosar jachʼañchañatakïkaspas ukhamwa predicación uñjtanjja. Jiwasajj taqe chuymaw  akham saraktanjja: “Jumaw jachʼañchäwi, honra katoqañatakisa, chʼamanïñatakisa derechonïtajja” sasa (Apocalipsis 4:11 liytʼäta). ¿Kunjamsa Jehová Diosar jachʼañchäwi honra churtanjja? “Jupaw taqe kuns lurawayi, juparakiw jakäws churistu” sasin jaqenakar yatiyasaw uk lurtanjja. ¿Kunjamsa chʼam churtanjja? Ukatakejj puedktan ukarjamaw predicañatak tiempsa, chʼamsa, kunanakatï utjkistu ukanaks churtanjja (Mat. 6:33; Luc. 13:24; Col. 3:23). Cheqansa munasktan uka Diosat parlañajj wal gustistu. Ukampis Diosan sutipatsa sutipajj kamsañs muni ukanakats parlañ munaraktanwa. ¿Kunatsa ukham sistanjja?

12. ¿Kunjamsa predicasajj Jehová Diosan sutip jachʼañchtanjja?

¹² Jehová Diosar munasitasatwa sutip jachʼañchañ muntanjja (Mat. 6:9). Mä arunjja, Supayajj Jehová Dios contra kʼarinak parlas sutip qʼañuchki ukwa qʼomachañ muntanjja (Gén. 3:1-5; Job 2:4; Juan 8:44). Ukatwa predicacionan Jehová Diosar taqe chuyma arjjatañ muntanjja, istʼañ munirinakarus kunatï cheqäki ukwa yatiyañ munaraktanjja. Jehová Diosajj wali munasiriwa, cheqapar apnaqeriwa, niyaw Reinopajj tʼaqesiñanak chhaqtayani, sumankaña, kusisiñwa jaqenakar churarakini, uk taqenin yatipjjañapwa munaraktanjja (Sal. 37:10, 11, 29; 1 Juan 4:8). Taqe ukanak lurasaw Jehová Diosan sutip jachʼañchasktanjja. Maysa toqetjja, Jehová Diosan Testigonakapjam phoqaskatas yatisajj wal kusisiraktanjja. ¿Kunatsa ukham sistanjja?

13. ¿Kunatsa Jehová Diosan Testigopäñajj mä jachʼa privilegiojja? (Isaías 43:10-12).

¹³ Jehová Diosaw Testigopäñasatakejj ajllisistu (Isaías 43:10-12 liytʼäta). Mä qhawqha maranak nayrajja, Cuerpo Gobernantejj mä cartan akham sänwa: “Jehová Diosan Testigonakapat uñtʼatäñajj mä jachʼa bendicionapuniwa”  sasa. c Mä juicionksnas ukham amuytʼañäni. Mä jaqew jan wals lurksna ukham juchañchistu, jiwas favor saytʼañapatakejj mä testigo munaraktanjja. Khitirutï sum uñtʼktan, confiykaraktan ukaruw testigot saytʼañapatakejj ajllissna, kuntï jupajj qhanañchkani uk creyipjjañapatakejja, jupajj suma jaqet uñtʼatäñaparakiwa. Jehová Diosajj wali sum uñtʼistu, confiyarakistuwa, ukatwa jupa sapaki cheqpach Diosätap qhanañchañatakejj jiwasar ajllisistu. Jehová Diosan Testigopäñajj jiwasatak mä jachʼa privilegiowa, ukatwa sutip uñtʼayañatakisa, kuna kʼarinaktï jupat parlapki ukanakan kʼarïtap qhanañchañatakis taqe horasan predicañatak chʼamachastanjja. Ukhamatwa kunanaktï Jehová Diosan Testigonakapjamajj lurañasäki ukanakamp phoqtanjja (Sal. 83:18; Rom. 10:13-15).

TUKUYKAMAW PREDICASKAKIÑÄNI

14. ¿Kuna kusiskañ urunakas jakʼachasisinki?

¹⁴ ¡Wali kusiskañ urunakaw jakʼachasisinki! Jachʼa tʼaqesiñ tiempo janïr purinkipanjja, Diosan cheqa yatichäwinakap waljanin istʼapjjañapwa suyasktanjja. Jehová Diosan bendicionapampejj ukajj phoqasiniwa. Ukhamarus jachʼa tʼaqesiñ tiemponjja, mä arun jaqenakajj wal tʼaqesipkani uka tiemponjja, yaqhepanakajj Supayan apnaqat pachap jaytjjapjjaniwa, jiwasamp chikaw Jehová Diosar jachʼañchapjjarakini (Hech. 13:48).

15, 16. ¿Kunsa luraskakiñäni, ukat kunapachkamasa?

¹⁵ Jachʼa tʼaqesiñ tiempo janïr purinkipanjja, mä wakiskir luräwiw utjaskistu. Ukajj Diosan Reinopat parlir suma yatiyäwinak oraqpachan predicañawa, uka luräwejj janipuniw mayampis lurasjjaniti. Ukhamarus Supayan apnaqat aka jan wali pachan tukusiñapajj wali jakʼankjjatap jaqenakar yatiyaskakiñasawa. Juicio Urojj purinkani ukhajja, kuntï yatiykayätan ukajj Jehová Diosat jutatapwa jaqenakajj amuyapjjani (Ezeq. 38:23).

¹⁶ Ukhamajj ¿kun lurañatakis chʼamachasiñasa? Niyakejjay suma yatiyäwinakarus jaqenakarus munasstanjja, jukʼampis Jehová Diosampir sutipampir munasstanjja, Jehová Diosajj “¡ukhakamakëjjpan!” sañapkamajj jankʼakiw taqe chuym predicaskakiñasa.