1. Ano an naaraman ta sa 2023 na taunan na miting?

 SA SATONG taunan na miting a kan 2023, nakaresibi kita nin nakakapahiro sa buot na mga paglilinaw sa nagkapira sa satong mga tinutubod asin nakadangog kita nin nakakaugmang mga paisi manungod sa satong ministeryo. Halimbawa, naaraman ta na an nagkapirang indibidwal puwedeng magkaigwa nin oportunidad na kumampi sa banwaan ni Jehova dawa pagkatapos na laglagon an Dakulang Babilonya. Naaraman ta man na puon Nobyembre 2023, bako nang gabos na aktibidad sa ministeryo an irereport kan mga parahayag kan Kahadian. An mga pagbabago daw na iyan nakabawas sa kahalagahan o pagkaapurado kan satong ministeryo ngunyan? Dai nanggad!

2. Taano ta mas nagigin apurado an satong ministeryo sa kada aldaw na minalihis? (Marcos 13:10)

² Mantang minalihis an kada aldaw, mas lalo pang nagigin apurado an satong ministeryo. Taano? Huling nauubos na an oras. Pag-isipan an ihinula ni Jesus manungod sa gibuhon na paghuhulit sa huring mga aldaw. (Basahon an Marcos 13:10.) Sa kaparehong pagkasaysay ni Mateo, sinabi ni Jesus na an maugmang bareta ihuhulit sa bilog na kinaban bago mag-abot “an katapusan.” (Mat. 24:14) An tataramon na iyan nanunungod sa biyong pagtapos sa maraot na sistema nin mga bagay ni Satanas. Nagtalaan si Jehova nin “aldaw asin oras” sa mga pangyayari na madali nang mag-abot. (Mat. 24:36; 25:13; Gibo 1:7) Mas nagrarani kita diyan sa kada aldaw na minalihis. (Roma 13:11) Sagkod na dai pa nag-aabot  an katapusan, dapat kitang padagos na maghulit.

3. Ano an nakakamotibar sa sato na maghulit?

³ Mantang pinag-iisipan ta an satong ministeryo, mahalagang ihapot ta sa satong sadiri: Taano ta ihinuhulit ta an maugmang bareta? Huli iyan sa satong pagkamuot—pagkamuot sa maugmang bareta, pagkamuot sa mga tawo, asin urog sa gabos, pagkamuot ki Jehova asin sa saiyang pangaran. Pag-ulayan ta an kada saro sa mga ini.

NAGHUHULIT KITA HULING NAMUMUTAN TA AN MAUGMANG BARETA

4. Ano an namamatian ta pag nakakaresibi kita nin maugmang bareta?

⁴ Nagigirumduman mo pa daw kun ano an namatian mo kan may madangog kang maugmang bareta—tibaad kan mamundag an bagong miyembro kan saindong pamilya o kan alukan ka nin sarong trabaho na kaipuhan mong marhay? Siguradong gustong-gusto mong sabihon an maugmang baretang iyan sa saimong mga kapamilya asin mga amigo. Arog man daw kaiyan an namatian mo kan madangog mo an pinakamagayon na bareta—an maugmang bareta kan Kahadian nin Diyos?

5. Ano an namatian mo kan inot mong maaraman an katotoohan hali sa Tataramon nin Diyos? (Hilingon man an mga ritrato.)

⁵ Girumdumon kun ano an namatian mo kan inot mong maaraman an katotoohan hali sa Tataramon nin Diyos. Nanudan mong namumutan kang marhay kan saimong Ama sa langit, na gusto niya na magin parte ka kan saiyang pamilya nin mga parasamba, na nanuga siya na hahalion an kulog asin pagsakit, na may paglaom na puwede mong mahiling an pagbuhay liwat sa mga mahal mo sa buhay sa bagong kinaban—asin dakul pang iba. (Mar. 10:​29, 30; Juan 5:​28, 29; Roma 8:​38, 39; Kap. 21:​3, 4) An mga katotoohan na iyan talagang nakapahiro sa puso mo. (Luc. 24:32) Gustong-gusto mo an mga nanunudan mo asin dai mo kayang sadirihon sana an mahalagang mga katotoohan na iyan!—Ikumparar an Jeremias 20:9.

6. Ano an nanudan mo sa eksperyensiya ni Ernest asin Rose?

⁶ Pag-isipan an sarong eksperyensiya. An  brother na si Ernest b mga sampulong taon pa sana kan magadan an saiyang ama. Naihahapot kaidto ni Ernest: “Yaon daw sa langit si Papa? O talagang mayo na siya? Naaara ako sa ibang mga aki na igwa pa nin ama.” Pirming nagduduman kaidto sa sementeryo si Ernest, nagluluhod sa may lubungan kan saiyang ama, asin namimibi: “Diyos ko, gusto ko pong maaraman kun hain si Papa.” Mga 17 taon pagkagadan kan saiyang ama, inalok si Ernest na mag-adal nin Bibliya, asin inako niya tulos iyan. Ugmahon siya kan maaraman niya na an mga gadan daing pag-aram, na garo baga nanok na nagtuturog, asin na an Bibliya nangangako nin pagkabuhay liwat sa maabot. (Ecl. 9:​5, 10; Gibo 24:15) Nasimbag man giraray an mga hapot na haloy na niyang pigpaparaisip! Ugmahon si Ernest sa mga katotoohan sa Bibliya na nanunudan niya. An agom niyang si Rose uminiba man saiya sa pag-adal nin Bibliya asin ugmahon man sa mensahe kan Kahadian. Nabawtismuhan sinda kan 1978. Maugmahon nindang sinabi sa saindang mga kapamilya, mga amigo, asin sa iba pa an mahalagang marhay na mga katotoohan na nanudan ninda. Bilang resulta, natabangan ni Ernest asin Rose an labing 70 indibidwal na mabawtismuhan.

7. Ano an nangyayari pag namumutan ta an katotoohan sa Bibliya? (Lucas 6:45)

⁷ Malinaw, pag namumutan o pinapahalagahan ta an katotoohan sa Bibliya, dai ta kayang magsilensiyo na sana. (Basahon an Lucas 6:45.) Namamati ta an namati kan mga disipulo ni Jesus kan inot na siglo na nagsabi: “Dai mi magigibong magpundo sa pagtaram manungod sa mga bagay na samuyang nahiling asin nadangog.” (Gibo 4:20) Namumutan tang marhay an katotoohan kaya gusto tang ihiras iyan sa pinakadakul na posible.

NAGHUHULIT KITA HULING NAMUMUTAN TA AN MGA TAWO

8. Ano an nagmomotibar sa sato na sabihon sa iba an maugmang bareta? (Hilingon an kahon na “ Mamutan an mga Tawo—Gumibo nin mga Disipulo.”) (Hilingon man an ritrato.)

⁸ Arog ni Jehova asin kan saiyang Aki, namumutan ta an mga tawo. (Tal. 8:31; Juan 3:16) Nakakamati kita nin grabeng pagmalasakit sa mga “mayong Diyos” asin “mayong paglaom.” (Efe. 2:12) Nalalamos sinda kan mga problema sa buhay, asin igwa kita kan salbabida na kaipuhan ninda—an maugmang bareta kan Kahadian nin Diyos. An satong pagkamuot asin pagmalasakit sa mga arog ninda nagpapahiro sa sato na gibuhon an gabos para mapaabutan sinda kan maugmang bareta. An mahalagang mensaheng iyan makakatao sainda nin paglaom, makakatabang sainda na magin maugma ngunyan, asin makakatao sainda nin oportunidad na makamtan an “tunay na buhay”—an buhay na daing sagkod—sa bagong kinaban nin Diyos.​—1 Tim. 6:19.

9. Ano an itinatao tang patanid mapadapit sa mangyayari sa maabot, asin taano? (Ezekiel 33:​7, 8)

 ⁹ An satong pagkamuot sa mga tawo nagpapahiro man sa sato na patanidan sinda manungod sa papaabot na katapusan kan maraot na kinaban na ini. (Basahon an Ezekiel 33:​7, 8.) Nakakamati kita nin pagkahirak sa satong kapwa asin sa satong bakong kapagtubod na mga kapamilya. Dakul na tawo an nagpapadagos lang sa saindang pang-aroaldaw na buhay na daing pag-aram sa kun ano an maabot—sarong “dakulang kasakitan na dai pang arog kaiyan na nangyari puon sa kapinunan kan kinaban sagkod ngunyan, asin dai na giraray iyan mangyayari pa.” (Mat. 24:21) Gusto tang maaraman ninda kun ano an mangyayari sa panahon nin paghukom—hahalion an palsong relihiyon dangan sa Armagedon lalaglagon an enterong maraot na sistema. (Kap. 16:​14, 16; 17:​16, 17; 19:​11, 19, 20) Ipinapamibi ta na maghimati sa satong mensahe an pinakadakul na mapupuwede asin umiba sato ngunyan sa dalisay na pagsamba. Pero paano man idtong mga dai naghihimati sa patanid ngunyan, kaiba na an satong namumutan na mga kapamilya?

10. Taano ta kaipuhan tang magin apurado sa pagpaabot kan patanid?

¹⁰ Arog kan ipinaliwanag sa sinundan na artikulo, posibleng kabutan ni Jehova na maligtas an mga tawo na nagpuon na magpahiling nin pagtubod pag nahiling ninda an paglaglag sa Dakulang Babilonya. Kun iyo, mas lalo nang kaipuhan tang magin apurado na ipaabot an mensahe. Pag-isipan ini: An ihinuhulit ta sainda ngunyan puwedeng magirumduman ninda pag-abot nin panahon. (Ikumparar an Ezekiel 33:33.) Tibaad magirumduman ninda an patanid na nadangog ninda sato asin mapahiro na umiba sa sato sa dalisay na pagsamba bago pa mahuri an gabos. Arog kan guwardiya kan presuhan sa Filipos na nagpahiling nin pagtubod pagkatapos sana na ‘magkaigwa nin makusog na linog,’ tibaad an iba sa mga dai naghihimati ngunyan magpahiling nin pagtubod pagkatapos kan nakakabiglang paglaglag sa Dakulang Babilonya.​—Gibo 16:​25-34.

NAGHUHULIT KITA HULING NAMUMUTAN TA SI JEHOVA ASIN AN SAIYANG PANGARAN

11. Paano ta itinatao ki Jehova an kamurawayan, onra, asin kapangyarihan? (Kapahayagan 4:11) (Hilingon man an mga ritrato.)

¹¹ An pagkamuot ta sa Diyos na Jehova asin sa saiyang banal na pangaran an pinakaimportanteng dahilan kaya ihinuhulit ta an maugmang bareta. Ibinibilang ta an satong ministeryo na sarong paagi para umawon an Diyos na namumutan ta. (Basahon an Kapahayagan 4:11.) Bilog na puso kitang minauyon na maninigo an Diyos na Jehova na mag-ako kan kamurawayan, onra, saka kapangyarihan hali sa saiyang maimbod na mga parasamba. Tinatawan ta siya nin kamurawayan asin onra pag ihinihiras ta sa iba  an nakakakumbinsir na ebidensiya na “linalang [niya] an gabos na bagay” asin na huli sa saiya kaya kita nag-eeksister. Itinatao ta saiya an kapangyarihan—an satong kapangyarihan—pag ginagamit ta an satong panahon, kusog, asin pagsasadiri para lubos na makikabtang sa ministeryo uyon sa itinutugot kan satong kamugtakan. (Mat. 6:33; Luc. 13:24; Col. 3:23) Sa madaling sabi, gustong-gusto tang ipakipag-ulay an manungod sa Diyos na namumutan ta. Napapahiro man kita na sabihon sa iba an manungod sa saiyang pangaran asin kun anong klaseng Diyos siya. Taano?

12. Paano ta pinapakangbanal an pangaran ni Jehova sa satong ministeryo?

¹² An satong pagkamuot ki Jehova nagpapahiro sa sato na pakangbanalon an pangaran niya. (Mat. 6:9) Gusto tang makikabtang sa paglinig kan saiyang pangaran sa katuyawan na dinara diyan ni Satanas huli sa mga kaputikan kaini. (Gen. 3:​1-5; Job 2:4; Juan 8:44) Sa satong ministeryo, gustong-gusto tang idepensa an satong Diyos, na sinasabi sa mga magdadangog an katotoohan manungod sa saiya. Gusto tang maaraman kan gabos na an saiyang pinakanangungurog na kuwalidad iyo an pagkamuot, na an saiyang paagi nin pamamahala matanos asin tama, saka na madali nang halion kan saiyang Kahadian an gabos na pagsakit asin madara iyan nin katuninungan asin kaugmahan sa katawuhan. (Sal. 37:​10, 11, 29; 1 Juan 4:8) Pag idinedepensa ta sa satong ministeryo an reputasyon ni Jehova, pinapakangbanal ta an saiyang pangaran. Nauugma man kita sa pakaaram na namumuhay kita kauyon kan apod sa sato. Paano?

13. Taano ta ipinag-uurgulyo ta na apudon na mga Saksi ni Jehova? (Isaias 43:​10-12)

¹³ Inapod kita ni Jehova na saiyang “mga Saksi.” (Basahon an Isaias 43:​10-12.) Mga pirang taon na an nakaagi, sinabi sa sarong surat hali sa Namamahalang Grupo: “An pinakadakulang  onra na puwedeng makamtan kan siisay man sa sato iyo an apudon bilang sarong Saksi ni Jehova.” Taano man? Pag-isipan an sarong ilustrasyon. Kun kaipuhan mo nin matestigo manungod sa reputasyon mo sa sarong kaso sa korte, pipilion mo an saro na bistado mo asin mapagkakatiwalaan, saro na may reputasyon na makakatao nin mapagtitiwalaan na testimonya. Paagi sa pagpili sa sato bilang saiyang mga Saksi, ipinapahiling ni Jehova na midbid niya kitang marhay asin nagtitiwala siya sato para magpatotoo na siya sana an tunay na Diyos. Dakulang onra para sa sato na magin saiyang mga Saksi kaya inaaprobetsaran ta an lambang pagkakataon para maipamidbid an saiyang pangaran asin patunayan na bakong totoo an dakul na kaputikan na sinabi manungod sa saiya. Paagi kaiyan, inuutob ta an pangaran na ipinag-uurgulyo tang iapod sa sato, mga Saksi ni Jehova!—Sal. 83:18; Roma 10:​13-15.

PADAGOS KITANG MAHULIT SAGKOD SA KATAPUSAN

14. Ano an hinahalat-halat tang mangyayari sa dai na mahahaloy?

¹⁴ Hinahalat-halat ta nanggad an mga mangyayari sa dai na mahahaloy! Sa tabang ni Jehova, naglalaom kita na mahiling an dakul pa na mag-ako kan katotoohan bago magpuon an dakulang kasakitan. Nauugma man kita sa posibilidad na dawa sa pinakamadiklom na panahon sa kasaysayan nin tawo—an dakulang kasakitan—dakul pang tawo an puwedeng magluwas sa naghihingagdan na kinaban ni Satanas asin umiba sato sa pag-umaw ki Jehova!—Gibo 13:48.

15-16. Ano an padagos tang gigibuhon, asin sagkod nuarin?

¹⁵ Miyentras tanto, may kaipuhan kitang gibuhon. May pribilehiyo kita na makikabtang sa dai na nuarin man mauutrong gibuhon—an paghuhulit kan maugmang bareta kan Kahadian nin Diyos sa bilog na kinaban. Kasabay kaiyan, dapat na padagos ta man na patanidan an mga tawo. Dapat na maaraman kan mga tawo na an katapusan kan maraot na sistemang ini nin mga bagay haranihon na. Dangan pag nag-abot na an aldaw nin paghukom, maaaraman ninda na hali sa Diyos na Jehova an mensaheng ihinulit ta.​—Ezek. 38:23.

¹⁶ Kun siring, ano an determinado tang gibuhon? Huling namumutan ta an maugmang bareta, an mga tawo, asin urog sa gabos, an Diyos na Jehova asin an saiyang pangaran—pursigido kitang padagos na maghulit na may pagkaapurado, sagkod na sabihon na ni Jehova, “Tapos na an gibuhon!”