1. Finshi twasambilile ilyo kwali ukukumana kwa pa mwaka ukwa mu 2023?

 PA KUKUMANA kwa pa mwaka ukwa mu 2023, a twalitemenwe sana ilyo twaumfwile ifyo twa-alwike mu fyo twasuminamo na pa fyo babilishe ifya-alwike mu fyo tubomba umulimo wa kubila imbila nsuma. Ku ca kumwenako, twasambilile ukuti abantu bamo nalimo bakakwata ishuko lya kuba ku lubali lwa bantu ba kwa Yehova na lintu Babiloni Mukalamba akonaulwa. Bushe ifi fyalwike filelangilila ukuti umulimo wa kubila imbila nsuma tawacindama sana kabili taulingile ukubombwa bwangu? Awe!

2. Mulandu nshi umulimo wesu uwa kubila imbila nsuma ulingile ukubombelwa bwangu bwangu? (Marko 13:10)

² Cila bushiku tulamona ukuti uyu umulimo ulingile ukubombwa bwangu bwangu. Cinshi twalandila ifi? Ni co inshita isheleko naicepa. Moneni ifyo Yesu asobele ukuti e fyo umulimo wa kubila imbila nsuma wali no kuba mu nshiku sha kulekelesha. (Belengeni Marko 13:10.) Ukulingana ne fyo Mateo alembele, Yesu atile imbila nsuma yali no kubilwa mwi sonde lyonse “e lyo impela ikesa.” (Mat. 24:14) Ishiwi lya kuti “impela” lipilibula impela ya mitekele yabipa iya kwa Satana. Yehova alibika “ubushiku nangu inshita” ilyo ifi fyonse fili no kucitika. (Mat. 24:36; 25:13; Imil. 1:7) Cila bushiku tulaya tulepalaminako kuli iyi nshita. (Rom. 13:11) Pali ino nshita tufwile ukutwalilila ukubila imbila nsuma mpaka impela ikese.

3. Mulandu nshi tubilila imbila nsuma?

 ³ Ilyo tuletontonkanya pa mulimo wesu uwa kubila imbila nsuma, tulingile no kutontonkanya pa cipusho icacindama sana ica kuti: Mulandu nshi tubilila imbila nsuma? Kuti twatila fye umulandu tubilila imbila nsuma, ni co twaliba no kutemwa. Ifyo tucita nga tulebila imbila nsuma, e filanga ifyo twatemwa imbila nsuma, ifyo twatemwa abantu ne cacilapo ukucindama, ifyo twatemwa Yehova ne shina lyakwe. Natulande pali fitatu kabili twalafilandapo cimo cimo.

ICILENGA TULEBILA IMBILA NSUMA NI CO TWALITEMWA IYI IMBILA

4. Bushe tumfwa shani nga twapokelela imbila iisuma?

⁴ Bushe mwaumfwile shani ilyo mwapokelele ilyashi ilisuma? Nalimo umo pali balupwa lwenu alikwete umwana nelyo balimwingishe incito iyo mwalekabila sana. Ukwabula no kutwishika mwalitemenwe sana ica kuti tamwaikete na ku cani mwalyebeleko balupwa lwenu ne fibusa. Bushe ifi fine e fyo cali ilyo mwaumfwile imbila iyacila pa mbila shonse, e kutila imbila nsuma ya Bufumu?

5. Bushe mwaumfwile shani ilyo mwasambilile icine ica mu Cebo ca kwa Lesa pa muku wa kubalilapo? (Moneni ne fikope.)

⁵ Tontonkanyeni pa fyo mwaumfwile ilyo mwasambilile icine icaba mu Cebo ca kwa Lesa pa muku wa kubalilapo. Mwaishileishiba ukuti Shinwe wa mu muulu alimutemwa, alafwaya ukuti mube mu lupwa lwa bantu abamupepa, alilaya ukuti akafumyapo amafya yonse na fyonse ifilenga abantu balekalipwa, alimupeela ne subilo lya kwisamona balupwa lwenu abafwa mu calo cipya e lyo na fimbi ifyo atulaya. (Marko 10:​29, 30; Yoh. 5:​28, 29; Rom. 8:​38, 39; Ukus. 21:​3, 4) Ifi fyonse fyalilengele mwaba ne nsansa. (Luka 24:32) Mwalitemenwe ifyo mwalesambilila kabili mwalefwaisha ukulaebako abantu ifyo mwalesambilila.—Linganyeniko Yeremia 20:9.

6. Finshi tulesambililako ku lyashi lya ba Ernest na ba Rose?

 ⁶ Natulande pa lyashi lya kwa munyinefwe uwe shina lya kuti Ernest b uo bawishi bafwile ninshi ali ne myaka 10. Ba Ernest batile: “Naleyipusha nati: ‘Bushe batata baya ku muulu? Nelyo calilaala calipwa balifwa?’ Nalekumbwa abana abakwete bashibo.” Ilingi line ba Ernest baleya ku nshiishi kabili balefukama pa luputa lwa bashibo e lyo bapepa abati: “Mwe Lesa napaapaata ndefwaya ukwishiba ukwaba batata.” Ilyo papitile imyaka nalimo 17 ukutula apo bashibo bafwilile, ba Ernest balibepwishe nga kuti batemwa ukusambilila Baibo, kabili ilyo line balisumine. Balitemenwe sana ilyo baishibe ukuti abafwa tabaishiba nangu cimo, baba kwati balilaala utwa mfwa. Balitemenwe na lintu baishibe ukuti Baibo itila abafwa bakabuushiwa. (Luk. Mil. 9:​5, 10; Imil. 24:15) Ba Ernest basukile basanga amasuko ayo bashaishibe pa myaka iingi! Balitemenwe sana pa cine ca mu Baibo ico balesambilila. Abena mwabo ba Rose nabo balitampile ukusambilila Baibo kabili nabo bene balitemenwe imbila ya Bufumu. Mu 1978 bonse babili balibatishiwe. Bali abacincila ilyo bale-ebako balupwa lwabo, ifibusa na bantu bambi abalefwaya ukumfwa ifyo basuminemo. Pa mulandu wa kuti ba Ernest na ba Rose balabombesha, balyafwapo abantu ukucila pali 70 ica kuti balilunduluka kabili balibatishiwa no kubatishiwa.

7. Cinshi tufwaisha ukucita nga ca kuti icine icaba mu Baibo calimba imishila mu mitima yesu? (Luka 6:45)

⁷ Cailanga fye apabuuta tuutu ukuti nga ca kuti icine caba mu Baibo calimba imishila mu mitima yesu, te kuti twikale tondolo. (Belengeni Luka 6:45.) Tumfwa nga filya abasambi ba kwa Yesu baumfwile ilyo batile: “Te kuti tuleke ukulanda pa fyo twamona ne fyo twaumfwa.” (Imil. 4:20) Twalitemwa sana icine ica kuti tufwaya ukwebako abantu abengi.

ICILENGA TULEBILA IMBILA NSUMA NI CO TWALITEMWA ABANTU

8. Cinshi cilenga tulebila imbila nsuma ku bantu? (Moneni akabokoshi akaleti “ Muletemwa Abantu—Mulelenga Baba Abasambi.”) (Moneni ne cikope.)

⁸ Twalitemwa abantu nga filya fine Yehova no Mwana wakwe babatemwa. (Amapi. 8:31; Yoh. 3:16) Tulomfwila uluse abantu ‘abashaishiba Lesa’ na ‘bashakwata isubilo.’ (Efes. 2:12) Baba nga umuntu uuli mu cilindi, kabili nifwe tukwete intambo ya kumufumishako, e kutila imbila nsuma iya Bufumu bwa kwa Lesa. Pa mulandu wa kuti twalibatemwa kabili tulabomfwila uluse, tulabomba na maka yesu yonse pa kuti tulebila imbila nsuma kuli bena. Iyi imbila nsuma ilalenga bakwata isubilo, balaikalako bwino pali ino nshita, kabili ilalenga  bakwata isubilo lya kwisakwata “umweo wine wine,” e kutila umweo wa muyayaya mu calo cipya ica kwa Lesa.—1 Tim. 6:19.

9. Finshi fikacitika ku ntanshi ifyo tusokapo abantu, kabili mulandu nshi tubasokela? (Esekiele 33:​7, 8)

⁹ Pa mulandu wa kuti twalitemwa abantu, tulabasoka no kuti impela ya cino calo cabipa naipalama. (Belengeni Esekiele 33:​7, 8.) Tulomfwila abantu bonse uluse ukubikako fye na balupwa wesu abashibombela Yehova. Abantu abengi bekala fye ukwabula no kwishiba icili no kwisa, e kutila “ubucushi ubukalamba ubushatala abubako ukutula pa ntendekelo ya cino calo ukufika na nomba, kabili tabwakatale abubako na kabili.” (Mat. 24:21) Tufwaya baishiba ifikacitika muli iyi inshita ya bupingushi. Imipepele ya bufi yonse ikaloba. Lyena abantu abacita ifyabipa bonse bakaloba ilyo kukaba inkondo ya Armagedone. (Ukus. 16:​14, 16; 17:​16, 17; 19:​11, 19, 20) Tupepa ukuti abengi abo tushimikila kabili abo tusoka, balekutika pa kuti bengasalapo ukubombela Yehova pamo na ifwe ino ine nshita. Nomba cikaba shani ku bashifwaya ukumfwa ifyo tubasoka pali ino nshita?

10. Mulandu nshi tulingile ukubombela bwangu bwangu umulimo wa kusoka abantu pa fili no kucitika nomba line?

¹⁰ Nga fintu twalondolwele mu cipande cafumineko, nalimo Yehova kuti afwaya ukupususha abantu abakaaluka nga bamona ifyo Babiloni Mukalamba akonaulwa. Ifi nga e fyo cikaba ninshi nacicindama ukuti tutwalilile ukusoka abantu. Tontonkanyeni pali ici: Ifyo tweba abantu pali ino nshita kuti baisafibukisha pali iyo nshita. (Linganyeniko Esekiele 33:33.) Nalimo bakebukisha ifyo twalebasoka kabili bakafwaya ukutendeka ukulabombela Yehova pamo na ifwe ilyo kucili inshita. Nga filya fine fyacitile uwalelinda icifungo mu Filipi uwa-alwike ilyo kwapitile “icinkukuma icikalamba,” bamo abo tusoka pali ino nshita nalimo bakaaluka nga bamona ifyo Babiloni Mukalamba akonaulwa.—Imil. 16:​25-34.

ICILENGA TULEBILA IMBILA NSUMA NI CO TWALITEMWA YEHOVA NE SHINA LYAKWE

11. Tupeela shani Yehova ubukata, umucinshi, na maka? (Ukusokolola 4:11) (Moneni ne fikope.)

¹¹ Icikalamba pali fyonse ifilenga tulebila imbila nsuma ni co twalitemwa Yehova Lesa ne shina lyakwe. Tumona umulimo wesu uwa kubila imbila nsuma ukuti ni nshila iya kulumbanishishamo Lesa uo twatemwa. (Belengeni Ukusokolola 4:11.) Tumfwa nge fyo bamalaika bomfwa abatila: “Mwalilinga mwe Yehova ukupokelela ubukata, umucinshi na maka.” Tupeela Yehova ubukata no mucinshi nga tulelanga abantu ubushininkisho bwa cine cine ubwa kuti Yehova ‘e wabumbile  ifintu fyonse’ no bwa kuti e walenga ukuti tubeko. Tumupeela amaka, e kutila amaka yesu nga ca kuti tulebomfya inshita yesu, amaka yesu na fyonse ifyo twakwata mu kubomba umulimo wa kubila imbila nsuma ukufika apo amaka yesu yengapelela. (Mat. 6:33; Luka 13:24; Kol. 3:23) Kuti twatila fye twalitemwa ukulanda pali Lesa uo twatemwa. Na kabili ukutemwa kulenga tule-ebako abantu pe shina lya kwa Lesa ne fyo aba. Mulandu nshi?

12. Bushe tulenga shani ishina lya kwa Yehova lyaba ilya mushilo ilyo tulebila imbila nsuma?

¹² Ifyo twatemwa Yehova filenga tulelenga ishina lyakwe lileba ilya mushilo. (Mat. 6:9) Tufwaya abantu baishiba ukuti ifyabipa fyonse ifyo Satana alanda pali Yehova fya bufi. (Ukute. 3:​1-5; Yobo 2:4; Yoh. 8:44) Ilyo tulebila imbila nsuma tulafwaya sana ukulandilako Yehova Lesa wesu, kabili abantu abengafwaya ukukutika tulabeba ifyo aba. Tufwaya abantu bonse baishiba ukuti imibele ya kwa Lesa iyapulamo kutemwa. Tufwaya baishiba no kuti fyonse ifyo acita fyalilungama kabili wa mulinganya. Na kabili tufwaya baishiba ukuti nomba line Ubufumu bwakwe buli no kufumyapo fyonse ifilenga abantu balecula kabili akalenga abantu bonse bakaleikala umutende. (Amalu. 37:​10, 11, 29; 1 Yoh. 4:8) Nga tule-eba abantu ifi pali Yehova ninshi tulelenga ishina lyakwe lileba ilya mushilo. Na kabili tulatemwa pantu tuleshiba ukuti tulecita ifyo tulingile ukulacita apo tuli Nte shakwe. Cinshi cilenga tuletemwa?

13. Mulandu nshi tumfwila ukuti Yehova alitucindamika pa kutusala ukuba Inte shakwe? (Esaya 43:​10-12)

¹³ Icilenga tuletemwa ni co Yehova e watusala ukuba “inte” shakwe. (Belengeni Esaya 43:​10-12.) Imyaka imo ku numa, kalata yafumine kwi Bumba Litungulula yatile: “Takwaba icacindama ukucila pa kuba Inte  ya kwa Yehova.” c Cinshi Ibumba Litungulula lyalandile ifi? Tontonkanyeni pali ici ica kumwenako. Tutile bamubepesha ubufi bwa kuti mwalicitile ifyabipa, nomba mulefwaya umuntu uwa kuti ese amulandileko ukuti bamubepeshe fye, mwalikwata imibele iisuma. E ico te kuti mucite icintu ca musango uyu. Ukwabula no kutwishika kuti mwafwaya umuntu uo mwacetekela, uwakwata imibele iisuma kabili uo abantu na bambi bengacetekela. Ifi Yehova atusala ukuba Inte shakwe filanga ukuti alitwishiba bwino kabili alicetekela ukutila kuti twamulandilako ukuti e Lesa wa cine fye eka. Tumona ukuti Yehova alitucindamika sana ifi atusala ukuba Inte shakwe kabili tufwaya abantu baishiba ukuti fyonse ifyabipa ifyo baishiba pali ena fya bufi. Nga tulecita ifi ninshi tulecita ifyalingana ne shina lyesu, pantu tuli Nte sha kwa Yehova!—Amalu. 83:18; Rom. 10:​13-15.

TUKATWALILILA UKUBILA IMBILA NSUMA MPAKA NA KU MPELA

14. Finshi nalimo fili no kucitika nomba line?

¹⁴ Tulatemwa sana nga twaishiba ifili no kucitika nomba line! Yehova nga asuminisha, tule-enekela ukuti abantu na bambi bakasambilila icine ilyo ubucushi bukalamba bushilatendeka. Na kabili natutemwa sana pa kwishiba ukuti na lintu kukaba ubucushi bukalamba ilyo ifintu fikafya icine cine, abantu na bambi nalimo bakafuma ku lubali lwa kwa Satana bakese mu kulumbanya Yehova pamo na ifwe!—Imil. 13:48.

15-16. Finshi tukatwalilila ukucita, kabili ni lilali tukaleka?

¹⁵ Ilyo ifi fishilacitika natukwata umulimo uo tufwile ukubomba. Twalikwata umulimo wa kubila imbila iishakabale aibilwapo na kabili, e kutila ukubila imbila nsuma ya Bufumu bwa kwa Lesa mwi sonde lyonse. Pa nshita imo ine tufwile no kutwalilila ukusoka abantu pa fili no kucitika nomba line. Abantu balingile ukwishiba ukuti impela ya cino calo cabipa naipalama sana. Lyena ilyo inshita ya bupingushi ikafika bakeshiba ukuti imbila twalebila yafumine kuli Yehova Lesa.—Esek. 38:23.

¹⁶ Nomba finshi tulefwaisha ukulacita? Apo twalitemwa imbila nsuma, twalitemwa abantu, ne cacilapo ukucindama twalitemwa Yehova Lesa ne shina lyakwe, tukatwalilila ukuba abacincila ilyo tulebila imbila nsuma kabili tukalabomba uyu umulimo bwangu bwangu mpaka Yehova akatile, “capwa.”