1. Peb hnov li cas ntawm lub rooj sib txoos txwm xyoo 2023?

 NYOB rau lub rooj sib txoos txwm xyoo 2023, a Yehauvas lub koom haum tau tshaj tawm txog peb txoj kev mus tshaj tawm txoj xov zoo, thiab seb tau muab dab tsi rau dab tsi hloov lawm. Peb hnov xws li tias muaj tej tug yuav cia li hloov siab los nrog Yehauvas cov tib neeg tom qab lub nroog Npanpiloos uas loj dua ntais raug rhuav tshem. Tsis tas li ntawd, peb kuj hnov tias txij ntua lub 11 Hlis xyoo 2023, txhua tus uas mus tshaj tawm tsis tas yuav xa lawv cov sij hawm txhua lub hlis lawm. Tej no puas ua rau peb txoj kev tshaj tawm tsis tseem ceeb ua luaj twg lawm? Yeej tsis muaj li ntawd hlo li!

2. Vim li cas qhov uas peb mus tshaj tawm txoj xov zoo ntawd tseem ceeb ua luaj? (Malakaus 13:10)

² Ib hnub dhau lawm zuj zus mas yim huab tseem ceeb rau peb mus tshaj tawm txoj xov zoo heev zuj zus rau qhov peb tsis tshuav sij hawm ntau pes tsawg los ua tes hauj lwm no lawm. Cia peb mus tham seb Yexus hais li cas txog qhov mus tshaj tawm txoj xov zoo ua ntej lub sim ceeb kawg. (Nyeem Malakaus 13:10.) Raws li phau Mathais, Yexus hais tias yuav muab txoj xov zoo tshaj tawm mus thoob plaws ntiaj teb ua ntej “lub sim ceeb no mam li kawg.” (Mathais 24:14) Thaum hais txog lub sim ceeb, yog hais txog Xatas txoj kev kav hauv lub qab ntuj phem no uas yuav raug puas tsuaj mus. Yehauvas twb teem tseg “hnub ntawd thiab teev ntawd” seb yuav muaj li cas rau li cas lawm. (Mathais 24:36; 25:13; Tes Haujlwm 1:7) Lub sij hawm ntawd los ze lawm zuj zus. (Loos 13:11) Ua ntej hnub ntawd los txog, peb yuav tau qhia txoj xov zoo kam tiag.

3. Dab tsi ua rau peb xav mus tshaj tawm txoj xov zoo?

 ³ Peb yuav tau ua tib zoo xav txog qhov lus nug no: Vim li cas peb ho qhia txoj xov zoo? Vim txoj kev hlub peb thiaj li mus qhia. Thaum peb mus tshaj tawm, peb qhia tias peb nyiam txoj xov zoo, hlub tib neeg, hlub Yehauvas thiab xav hwm nws lub npe kom dawb huv. Cia peb mus tham ib qeb zuj zus.

PEB NYIAM TXOJ XOV ZOO

4. Thaum peb hnov ib txoj xov zoo, peb ua li cas xwb?

⁴ Koj puas nco qab thaum koj hnov ib txoj xov zoo txog ib yam dab tsi hauv koj lub neej? Tej zaum koj kuj hnov xov tias ib tug hauv koj tsev neeg xeeb tub los sis koj tau ib txog hauj lwm uas koj xav xav tau. Ntshe koj zoo siab heev thiab koj twb mus qhia rau txhua leej txhua tus paub. Thaum koj hnov txoj xov zoo txog Vajtswv lub Nceeg Vaj, koj puas maj nrawm nroos mus qhia rau txhua tus paub?

5. Koj xav li cas xwb thaum koj nyuam qhuav los paub qhov tseeb? (Saib cov duab.)

⁵ Xav txog thaum koj nyuam qhuav los paub qhov tseeb es koj muaj kev zoo siab npaum li cas. Koj kawm tau tias koj Leej Txiv tus uas nyob saum ntuj ceeb tsheej hlub koj heev, nws xav kom koj los ua nws tsev tib neeg, nws cog lus tias yuav tsis muaj kev mob kev nkeeg thiab kev txom nyem, koj yuav rov qab pom cov uas tag sim neej dua thaum txog lub qab ntuj tshiab, thiab tseem tshuav ntau tshaj hais tsis txhij tsis txhua. (Malakaus 10:29, 30; Yauhas 5:28, 29; Loos 8:38, 39; Tshwmsim 21:3, 4) Tej uas koj kawm tau no ua rau koj zoo siab heev. (Lukas 24:32) Koj nyiam tej no tshaj plaws li ua rau koj xav muab piav rau txhua leej txhua tus paub!​—Muab piv rau Yelemis 20:9.

6. Koj khaws tau dab tsi los ntawm Awnes thiab Laus nkawd?

⁶ Cia peb mus tham txog ib tug yam ntxwv. Muaj ib tug kwv tij npe hu ua Awnes (Ernest) piav txog nws lub neej thaum nws muaj 10 xyoo uas nws txiv tag sim neej. Awnes hais tias: “Kuv pheej xav tias: ‘Puas yog nws mus  saum ntuj? Los sis nws tuag mus ib txhis?’ Kuv ntshaw cov me nyuam uas muaj txiv lub neej kawg nkaus li.” Awnes mus tsis so rau ntawm nws txiv lub ntxa thiab txhos caug thov Vajtswv tias: “Vajtswv, kuv xav paub seb kuv txiv mus dua twg lawm.” Tau 17 lub xyoos tom qab Awnes txiv tuag, muaj neeg tuaj qhia Vajlugkub rau nws. Nws zoo siab kawg li thaum nws hnov tias cov tuag tsis paub dab tsi, lawv zoo yam li ib tug neeg tsaug tsaug zog lawm xwb, thiab nyob rau hauv phau Vajlugkub qhia tias Vajtswv cog lus yuav tsa cov tuag sawv rov qab los yav tom ntej. (Tej Lus Qhia 9:5, 10; Tes Haujlwm 24:15) Tav ntuj li no nws mam li paub txog tej uas nws ib txwm xav paub ntau ntau xyoo dhau los lawm! Awnes nyiam tej uas nws kawm tau nyob hauv phau Vajlugkub kawg li. Nws tus poj niam uas hu ua Laus (Rose) kuj nrog nws kawm Vajlugkub ua ke mas nws kuj nyiam tej uas nws kawm kawg li thiab. Xyoo 1978 nkawd ob niam txiv txawm ua kev cai raus dej. Nkawd kub siab lug mus qhia tej uas nkawd kawm tau ntawd rau nkawd tsev neeg, tej phooj ywg, thiab lwm leej lwm tus uas xav mloog. Nkawd ob leeg pab tau tshaj li 70 tawm tus tib neeg los paub Yehauvas thiab ua kev cai raus dej.

7. Muaj li cas xwb thaum peb kawm tau tej yam zoo zoo hauv phau Vajlugkub? (Lukas 6:45)

⁷ Thaum peb nyiam tej yam uas peb tau kawm hauv phau Vajlugkub heev, ua rau peb xav muab qhia rau txhua leej txhua tus paub. (Nyeem Lukas 6:45.) Peb xav tib yam li Yexus cov thwj tim nyob thawj 100 xyoo tias: “Tej uas wb hnov thiab wb pom lawm, wb yeej yuav qhia, wb tsis npog li.” (Tes Haujlwm 4:20) Peb nyiam qhov tseeb uas nyob hauv phau Vajlugkub kawg li, thiaj ua rau peb xav muab piav rau txhua leej txhua tus paub li peb piav tau.

PEB HLUB TIB NEEG

8. Vim li cas peb ho xav qhia txoj xov zoo rau tib neeg? (Saib lub ntsiab “ Hlub Tib Neeg​—Coj Lawv Los Ntseeg.”) (Saib daim duab.)

⁸ Peb hlub tib neeg ib yam li Yehauvas thiab nws tus Tub nkawd. (Pajlug 8:31; Yauhas 3:16) Peb yeej hmov tshua cov tib neeg uas “tsis paub Vajtswv” thiab cov “tsis muaj chaw cia siab.” (Efexus 2:12) Lawv tej teeb meem ntau heev zoo yam nkaus li lawv poob rau hauv ib lub qhov ntuj tiam sis txoj xov zoo txog Vajtswv lub Nceeg Vaj zoo yam li txoj hlua rub tau lawv tawm los. Vim peb hlub thiab hmov tshua txog lawv, peb thiaj xav mus qhia txoj xov zoo rau lawv. Thaum lawv hnov thiaj ua rau lawv muaj kev vam kev cia siab, pab kom lawv muaj kev zoo siab tam sim no, thiab kom lawv muaj txoj sia ntev dhawv mus ib txhis nyob hauv Vajtswv lub ntiaj teb tshiab.​—1 Timautes 6:19.

9. Peb ceeb toom tib neeg txog dab tsi yav tom ntej, thiab yog vim li cas? (Exekees 33:7, 8)

 ⁹ Peb txoj kev hlub rau tib neeg yuav ua rau peb ceeb toom lawv kom paub tias lub sim ceeb phem no yuav kawg. (Nyeem Exekees 33:7, 8.) Peb yeej hmov tshua txhua leej txhua tus thiab peb tsev neeg uas tsis ntseeg Yehauvas. Muaj coob leej ntau tus rau siab ntso ua neej xwb, tsis xav txog lub sij hawm “muaj kev txom nyem loj kawg nkaus li. Txij thaum tsim neeg los txog niaj hnub nim no yeej tsis tau muaj dua thiab yav tom ntej los yuav tsis muaj ntxiv lawm.” (Mathais 24:21) Peb xav kom lawv paub tias thaum txog lub sij hawm txiav txim yuav zoo li cas. Thaum thawj, kev ntseeg cuav yuav raug puas tsuaj ces tom qab ntawd lub qab ntuj phem no yuav xaus rau thaum Amankedoos. (Tshwmsim 16:14, 16; 17:16, 17; 19:11, 19, 20) Peb vam thiab cia siab tias yuav muaj tib neeg kam mloog tej uas peb qhia lawv thiab txiav txim siab los teev tiam Yehauvas tam sim no. Yuav ua li cas rau cov uas tsis kam mloog thiab peb tsev neeg uas tsis kam los ntseeg?

10. Vim li cas zoo rau peb ceeb toom tib neeg txog tej yam yuav muaj tshwm sim sai sai tom ntej no?

¹⁰ Raws li zaj kawm tag los no hais, tej zaum Yehauvas xav cawm cov tib neeg uas hloov siab xav los pe hawm nws tom qab lub nroog Npanpiloos uas loj dua ntais raug puas tsuaj. Yog li ntawd, tseem ceeb heev rau peb qhia lawv tas zaj tas zog tam sim no. Xav li no tias: Tej uas koj qhia rau lawv tam sim no tej zaum yuav ua rau lawv nco ntsoov rau thaum ntawd. (Muab piv rau Exekees 33:33.) Tej zaud lawv yuav nco txog tej lus peb hais rau lawv thiab los teev tiam Yehauvas nrog peb ua ntej tsis tau lig. Zoo li tus zov tsev loj cuj hauv lub nroog Filipis, thaum “av txawm qeeg nkaws ua rau lub tsev lojcuj ua zog koog,” nws mam li hloov siab. Tej zaud ib txhia uas tam sim no tsis kam mloog, thaum lawv pom lub nroog Npanpiloos uas loj dua ntais raug puas tsuaj, tej zaum lawv yuav hloov siab.​—Tes Haujlwm 16:25-34.

PEB HLUB YEHAUVAS THIAB XAV HWM NWS LUB NPE KOM DAWB HUV

11. Peb hwm, muab koob meej, thiab peb lub dag zog li cas rau Yehauvas? (Tshwmsim 4:11) (Saib cov duab.)

¹¹ Tos peb mus tshaj tawm txoj xov zoo los twb yog peb hlub Vajtswv Yehauvas thiab hwm nws lub npe uas dawb huv. Peb saib txoj kev tshaj tawm zoo li ib txoj kev los mus qhuas Vajtswv. (Nyeem Tshwmsim 4:11.) Peb yeej paub zoo tias Vajtswv Yehauvas yog tus uas tsim nyog cov pe hawm nws hwm, muab koob meej, thiab muab lub dag lub zog rau nws. Peb thiaj li mus qhia rau lwm tus tias nws yog tus uas “tsim ib puas tsav yam huv  tibsi” thiab tos peb ciaj sia los twb yog nws pub txoj sia rau peb. Peb muab peb lub dag zog pub rau Yehauvas thaum peb lauj peb lub sij hawm, peb lub dag zog, thiab tej yam uas peb muaj mus qhia txoj xov zoo npaum li peb qhia tau. (Mathais 6:33; Lukas 13:24; Kaulauxais 3:23) Muab hais tshab tshab li no tias, peb yeej xav piav tuj taws txog tus Vajtswv uas peb nyiam, nws lub npe, thiab nws yog tus Vajtswv zoo li cas rau li cas. Vim li cas peb ho xav ua li ntawd?

12. Peb yuav hwm Yehauvas lub npe kom dawb huv li cas thaum peb mus tshaj tawm txoj xov zoo?

¹² Qhov uas peb hlub Yehauvas yuav ua rau peb hwm nws lub npe kom dawb huv. (Mathais 6:9) Yog li ntawd, peb thiaj xav qhia rau txhua leej txhua tus paub tias tej uas Xatas iab liam txog Yehauvas tsis muaj tseeb. (Chivkeeb 3:1-5; Yauj 2:4; Yauhas 8:44) Thaum peb qhia txoj xov zoo, peb muaj lub siab xav qhia kom txhua tus uas hnov ntawd paub tias Yehauvas zoo li cas rau li cas tiag. Peb xav kom txhua tus paub tias Yehauvas qhov yeeb yam qhuas lug uas loj tshaj yog kev hlub, nws txoj kev kav yeej ncaj ncees, thiab tsis ntev tom ntej no nws lub Nceeg Vaj yuav los muab tej kev txom nyem rhuav tshem thiab yuav muaj kev thaj yeeb thiab kev zoo siab rau txhua tus tib neeg. (Phau Ntawv Nkauj 37:10, 11, 29; 1 Yauhas 4:8) Thaum peb qhia tej no txog Yehauvas rau tib neeg, twb yog peb hwm nws lub npe. Tsis tas li ntawd, peb kuj zoo siab heev rau qhov peb ua tej yam uas tsim nyog peb ua vim peb yog Yehauvas Cov Tim Khawv. Vim li cas peb ho hais tau li ntawd?

13. Vim li cas peb ho zoo siab tias peb yog Yehauvas Cov Tim Khawv? (Yaxayas 43:10-12)

¹³ Yehauvas xaiv peb los ua nws “cov timkhawv.” (Nyeem Yaxayas 43:10-12.) Tau ntau xyoo dhau los lawm, Pab Uas Ntau  Thawj sau ib tsab ntawv hais li no tias: “Qhov txiaj ntsig uas peb tau yog lub npe hu ua Yehauvas Cov Tim Khawv.” Vim li cas ho hais li ntawd? Muab ua piv txwv li no. Muaj ib tug iab liam koj ua ib yam tsis zoo. Yog li ntawd, koj yuav tau qhia rau sawv daws paub tias tej uas nws iab liam ntawd yog lus dag thiab koj yeej yog ib tug neeg zoo, tsis ua tej uas nws liam ntawd. Koj yuav xaiv leej twg los pab daws koj zaj? Koj yeej yuav mus nrhiav tus uas koj paub thiab koj tso siab rau thiab txhua tus hwm. Zoo ib yam li ntawd, tos Yehauvas xaiv peb los ua nws cov Tim Khawv los twb yog nws paub peb zoo thiab nws tso siab tias peb yuav qhia lwm tus tias nws tib leeg xwb thiaj yog tus tseem Vajtswv. Qhov txiaj ntsig uas tau los ua nws cov Tim Khawv yuav ua rau peb siv txhua lub sij hawm los qhia nws lub npe kom tib neeg paub, thiab qhia tias nws tsis ua tej yam phem uas tau hais txog nws ntawd. Thaum peb ua li no twb yog peb ua raws li lub npe uas muab tis rau peb tias Yehauvas Cov Tim Khawv!​—Phau Ntawv Nkauj 83:18; Loos 10:13-15.

QHIA MUS TXOG NTUA THAUM KAWG

14. Muaj tej yam twg yuav tshwm sim sai sai yav tom ntej no?

¹⁴ Peb tos tsis hnyu yuav pom tej yam uas muaj tshwm sim rau yav tom ntej! Peb vam thiab cia siab tias yuav muaj coob leej ntau tus los nrog peb teev tiam Yehauvas ua ntej txoj kev txom nyem loj kawg nkaus pib. Tsis tas li ntawd, peb tos rawv tias thaum muaj txoj kev txom nyem loj kawg nkaus ntawd, coob leej ntau tus yuav los nrog peb qhuas Yehauvas!​—Tes Haujlwm 13:48.

15-16. Peb yuav ua dab tsi, thiab mus txog thaum twg?

¹⁵ Cheem lub sij hawm tseem tsis tau los txog, peb tshuav ib txoj hauj lwm uas peb yuav tau ua. Peb muaj qhov txiaj ntsig los mus qhia txoj xov zoo txog Vajtswv lub Nceeg Vaj kom mus thoob plaws lub ntiaj teb no. Tsis tas li ntawd, peb yuav tau ceeb toom tib neeg txog tej yuav tshwm sim sai sai tom ntej. Tib neeg yuav tau paub tias lub sim ceeb phem no tab tom yuav dua mus. Thaum lub sij hawm uas txiav txim ntawd los txog, lawv yuav ras txog tias tej lus peb hais ntawd yog los ntawm Vajtswv Yehauvas.​—Exekees 38:23.

¹⁶ Peb yuav tau peem tiag ua dab tsi? Vim peb nyiam txoj xov zoo, hlub tib neeg, hlub Yehauvas thiab xav hwm nws lub npe kom dawb huv, peb thiaj yuav tshaj tawm txoj xov zoo mus txog ntua thaum Yehauvas hais tias, “Txaus lawm!”