1. Oshike twe lihonga pokwoongala kwokomudo kwomo 2023?

 POKWOONGALA kwokomudo kwomo 2023, a otwa pewa po ouyelele mupe u tunhula u na sha neitavelo letu nosho yo omashiivifo e na sha noukalele wetu. Pashihopaenenwa, otwe lihonga kutya ovanhu vamwe otashi dulika va ka pewe omhito va waimine oshiwana shaKalunga, nokuli nokonima ngeenge Babilon Shinene sha hanaunwa po. Otwe lihonga yo kutya okuhovela muNovemba 2023, ovaudifi vOuhamba itava ka teelelwa vali va lopote eevili nosho yo oishangomwa oyo va yandja moukalele. Mbela omalunduluko a tya ngaho otaa ningifa oukalele wetu u kale inau fimana vali, nokukala inau endelela vali shi dulife nale? Hasho nandenande!

2. Omolwashike oukalele wetu wa endelela neenghono shi dulife nale? (Markus 13:10)

² Efiku keshe, oilonga yetu yokuudifa ohai kala ya endelela. Omolwashike? Omolwaashi efimbo ola pwa po. Diladila kwaashi Jesus a xunganeka kombinga yokuudifa momafiku axuuninwa. (Lesha Markus 13:10.) Jesus okwa popya muMateus a ti kutya onghundana iwa oi na okuudifilwa ovanhu aveshe kombada yedu ofimbo ‘exulilo’ inali uya. (Mat. 24:14) Outumbulilo oo, otau ulike kokuxulifwa po filufilu kwounyuni waSatana woukolokoshi. Jehova okwa tula po ‘efiku novili,’ omo oiningwanima oyo tai ka ningwa. (Mat. 24:36; 25:13; Oil. 1:7) Efiku keshe otali tu ehenifa popepi nefimbo olo. (Rom. 13:11) Ofimbo twa teelela, otwa pumbwa okutwikila okuudifa fiyo exulilo le uya.

3. Oshike hashi tu linyengifa tu udife?

³ Eshi hatu dilonga kombinga youkalele wetu, oshiwa okulipula  epulo olo kutya: Omolwashike hatu udifa onghundana iwa? Oku shi popya paunafangwa, ohole oyo hai tu linyengifa tu udife. Ngeenge hatu udifa ohatu ulike kutya otu hole onghundana iwa, otu hole ovanhu vakwetu, nokomesho yaaishe, otu hole Jehova nosho yo edina laye. Natu ka kundafaneni oinima oyo kooshimwe.

OHATU UDIFA MOLWAASHI OTU HOLE OSHILI

4. Ohatu linyenge ngahelipi, ngeenge twa uda onghundana iwa?

⁴ Mbela oto dimbuluka pomhito imwe eshi wa li wa uda onghundana iwa, tashi dulika umwe womovapambele voye a mona okaana, ile wa mona oilonga oyo wa li wa halelela? Nopehe na omalimbililo, owa li wa hala okulombwela ovapambele voye nosho yo ookaume koye kombinga yonghundana oyo. Mbela osho osho sha li sha ningwa, eshi wa li wa uda onghundana ya denga mbada i na sha nOuhamba waKalunga?

5. Owa li u udite ngahelipi, eshi we lihonga oshili oshikando shotete okudja mEendjovo daKalunga? (Tala yo efano.)

⁵ Diladila kunghee wa li u udite, eshi we lihonga oshili oshikando shotete okudja mEendjovo daKalunga. Owe lihonga kutya Xo womeulu oku ku hole, a hala u ninge oshitukulwa shoukwaneumbo waye, a udaneka okuxulifa po omauyahame nokumona oixuna nowe lihonga yo kutya ovaholike voye, ovo va fya, ove na eteelelo loku ka nyumuka mounyuni mupe nosho tuu. (Mark. 10:​29, 30; Joh. 5:​28, 29; Rom. 8:​38, 39; Eh. 21:​3, 4) Osho we lihonga osha li sha kuma omutima woye neenghono. (Luk. 24:32) Owa li wa tunhukilwa osho to lihongo nowa li wa halelela oku shi lombwela vamwe! — Yelekanifa Jeremia 20:9.

6. Oshike hatu lihongo moshimoniwa shaErnest naRose?

⁶ Natu ka tale koshimoniwa. Omumwatate wedina Ernest b okwa li e na omido omulongo  lwaapo, eshi xe a fya. Ernest okwa ti: “Onda li handi lipula kutya: ‘Mbela tate okwa ya meulu? Ile ota kala a fya fiyo alushe?’ Onda li nda twila ounona ondubo, ovo ve na natango ooxe ve li momwenyo.” Ernest okwa li hai pandjikilile komaendo, nokutwa eengolo pombila yaxe, ndele ta ilikana ta ti: “Alikana, Kalunga, onda hala okushiiva kutya tate oku li peni.” Konima yomido 17 okudja eshi xe a fya, Ernest okwa li a tambula ko ekonakonombiibeli. Okwa li a tunhukwa okulihonga kutya oonakufya kave na eshi ve shii, ova fa ashike va kofa eemhofi didjuu, nOmbiibeli oya udaneka kutya otaku ka kala enyumuko. (Omuud. 9:​5, 10; Oil. 24:15) Kungaho okwa li a mona omanyamukulo omapulo oo a kala te lipula oule womido! Okwa li a tunhukilwa oshili yOmbiibeli oyo te lihongo. Omukulukadi waye, Rose, naye okwa li he mu waimine pekonakonombiibeli nokwa li e hole osho te lihongo. Ova ninginifwa mo 1978. Ova li hava udifile nouladi ovapambele vavo, ookaume kavo nosho yo vamwe vali oshili i na ondilo oyo ve lihonga. Nokungaho ova dula okukonakona novanhu ve dulife po 70 fiyo va ninginifwa.

7. Oshike hashi ningwa po, ngeenge oshili oya mene omidi momitima detu? (Lukas 6:45)

⁷ Ngeenge oshili yOmbiibeli oya mene omidi momitima detu, ihatu i mwenene. (Lesha Lukas 6:45.) Ohatu kala tu udite ngaashi ovahongwa vaJesus vomefelemudo lotete, ovo va ti: “Itatu efa okupopya kombinga yoinima oyo twa mona notwa uda.” (Oil. 4:20) Otu hole oshili neenghono nohatu kala twa hala oku i lombwela ovanhu vahapu ngaashi tashi dulika.

OHATU UDIFA MOLWAASHI OTU HOLE OVANHU

8. Oshike hashi tu linyengifa tu udifile ovanhu onghundana iwa? (Tala oshimhungu “ Ulika kutya ou hole ovanhu — Moku va ninga ovahongwa.”) (Tala yo efano.)

⁸ Ngaashi Jehova nOmona waye, nafye otu hole ovanhu. (Omayel. 8:31; Joh. 3:16) Ohatu kala twa etela onghenda ovo vehe ‘shii Kalunga’ noka ve “na eteelelo.” (Ef. 2:12) Omolwomaupyakadi avo, ohava kala ve udite va fa ve li melambo, ashike otu na ongodi yopafaneko oyo tai dulu oku va shila mo, onghundana iwa ya dja kuKalunga. Molwaashi otu hole ovanhu va tya ngaho, notu va uditile onghenda, oshe tu linyengifa tu ninge eenghendabala, opo tu va udifile onghundana iwa. Etumwalaka olo li na ondilo, otali dulu oku va pa eteelelo, tali va kwafele va kale nonghalamwenyo ya denga mbada noku va pa eteelelo li na sha ‘nomwenyo washili,’ omwenyo waalushe, mounyuni mupe waKalunga. — 1 Tim. 6:19.

9. Elondwelo lilipi hatu udifa shi na sha nonakwiiwa, nomolwashike? (Hesekiel 33:​7, 8)

⁹ Molwaashi otu hole ovanhu, ohashi tu linyengifa  yo tu va lombwele kutya exulilo lounyuni, ou wa kolokosha, oli li poduka. (Lesha Hesekiel 33:​7, 8.) Otwa etela onghenda ovashiinda shetu nosho yo ovapambele vetu, ovo vehe fi eendombwedi. Ovanhu vahapu kave shii ngeenge otaku ka kala “oudjuu munene oo inau kala ko nale okudja pehovelo lounyuni noitau ka kala ko vali.” (Mat. 24:21) Otwa hala oku va lombwela kutya oshike tashi ka ningwa po pefimbo olo letokolo. Tete omalongelokalunga oipupulu otaa ka hanaunwa po, opo nee ta ku shikula ounyuni aushe oo wa kolokosha. (Eh. 16:​14, 16; 17:​16, 17; 19:​11, 19, 20) Ohatu ilikana opo ovanhu vahapu ngaashi tashi dulika va pwilikine kwaasho hatu va lombwele nova tokole paife okulongela Jehova pamwe nafye. Ndele ongahelipi shi na sha naavo itava pwilikine kufye paife, mwa kwatelwa ovapambele vetu?

10. Omolwashike sha fimana okulombwela ovanhu kombinga yaasho tashi ka ningwa po mafiku?

¹⁰ Ngaashi sha yelifwa moshitukulwa sha tetekela, otashi dulika Jehova ta ka xupifa ovo va hoolola oku mu longela, eshi va mona ehanauno laBabilon Shinene. Ngeenge osho, osha fimana shi dulife nale oku va lombwela shi na sha nelondwelo. Diladila kwaashi: Osho hatu va lombwele paife otashi dulika ve ke shi dimbuluke. (Yelekanifa Hesekiel 33:33.) Otashi dulika va ka dimbuluke elondwelo olo twa li hatu va lombwele, notashi ke ve linyengifa va longele Jehova pamwe nafye, fimbo tapa tiwa nena. Ngaashi omukeleli wodolongo womuFilippi, oo a li ashike a lundulula omutima waye konima eshi pa ningwa ekakamo ledu linene, otashi dulika vamwe ovo ihava pwilikine kufye paife tava ka lundulula omitima davo konima yehanauno laBabilon Shinene. — Oil. 16:​25-34.

OHATU UDIFA, MOLWAASHI OTU HOLE JEHOVA NEDINA LAYE

11. Ohatu longifa ngahelipi efimbo, eenghono noiniwe yetu, opo tu fimanekife Jehova? (Ehololo 4:11) (Tala yo efano.)

¹¹ Etomheno la fimanenena kutya omolwashike hatu udifa onghundana iwa ololo kutya otu hole Jehova Kalunga nedina laye liyapuki. Otwa tala ko oukalele wetu u li onghedi yokufimanekifa Kalunga oo tu hole. (Lesha Ehololo 4:11.) Ohatu tu kumwe kutya Jehova Kalunga okwa wana okupewa efimano, etumbalo neenghono kovalongeli vaye ovadiinini. Ohatu mu fimaneke noku mu tumbaleka, ngeenge hatu lombwele vamwe oushili oo kutya oye a “shita oinima aishe” nonokutya otu na omwenyo molwaashi oye eu tu pa. Ohatu longifa yo efimbo, eenghono noiniwe yetu, opo tu kufe ombinga pauyadi moilonga  yokuudifa, ngaashi eenghalo detu tadi shi pitike. (Mat. 6:33; Luk. 13:24; Kol. 3:23) Oku shi popya paunafangwa, otu hole okupopya kombinga yaKalunga oo tu hole. Ohashi tu linyengifa yo tu lombwele vamwe kombinga yedina laye, nonokutya oKalunga a tya ngahelipi. Omolwashike?

12. Ohatu yapulifa ngahelipi edina laJehova moukalele?

¹² Molwaashi otu hole Jehova, otashi ke tu linyengifa tu yapulife edina laye. (Mat. 6:9) Osho osha hala okutya otwa hala okulombwela vamwe kutya oinima inyanyalifi, oyo Satana a popya kombinga yaJehova, kai fi yoshili. (Gen. 3:​1-5; Job 2:4; Joh. 8:44) Ngeenge hatu udifa ohatu kala twa halelela okulombwela ovanhu aveshe ovo tava pwilikine kufye kutya Jehova oye lyelye, nonokutya okwa tya naanaa ngahelipi. Otwa hala keshe umwe a shiive kutya ohole oi li oukwatya waJehova wa denga mbada, ha pangele pauyuki nonokutya mafiku Ouhamba waye otau ka xulifa po okumona oixuna nokweetela ovanhu ombili nehafo. (Eps. 37:​10, 11, 29; 1 Joh. 4:8) Ngeenge hatu lombwele ovanhu kombinga yoinima oyo i na sha naJehova, kungaho ohatu yapulifa edina laye. Otwa hafa yo, molwaashi otu shii kutya ohatu longo osho tu na okulonga tu li Eendombwedi daJehova. Otu shi shii ngahelipi?

13. Omolwashike twa hafa, eshi hatu ifanwa Eendombwedi daJehova? (Jesaja 43:​10-12)

¹³ Jehova okwe tu hoolola tu ninge “eendombwedi” daye. (Lesha Jesaja 43:​10-12.) Konima yomido donhumba, Olutuwiliki ola shanga onhumwafo tai ti: “Oufembanghenda munene oo tu na okwiifanwa Eendombwedi daJehova.” c Omolwashike? Natu shi faneke ngaha. Natu tye nee ngeno owa lundilwa wa  ninga oshinima shonhumba sha puka, paife owa pumbwa umwe oo ta ka lombwela ovanhu kutya osho wa lundililwa kashi fi shoshili nonokutya ove omunhu muwa ku na efiku u ninge oshinima osho, mbela oto ka hoolola lyelye? Kape na omalimbililo, oto ka hoolola omunhu oo u shii, e shii okulineekelwa noku na edina liwa, opo ovanhu va dule oku mu itavela. Eshi Jehova e tu hoolola tu ninge eendombwedi daye okwa ulika kutya oku tu shii nawa nokwe tu lineekela tu lombwele vamwe kutya oye ashike Kalunga kashili. Otu udite etumba, eshi tu li Eendombwedi daye nohatu longifa omhito keshe tu shiivife edina laye nokuulika kutya oinima aishe ii ya popiwa kombinga yaye kai fi yoshili. Kungaho, ohatu ka kala metwokumwe nedina olo twa hafela okuhumbata, Eendombwedi daJehova! — Eps. 83:18; Rom. 10:​13-15.

OHATU TWIKILE OKUUDIFA FIYO EXULILO

14. Oinima ilipi itunhula tashi dulika i ka ningwe monakwiiwa i li popepi?

¹⁴ Otwa hafa oku ka mona osho tashi ka ningwa monakwiiwa i li popepi! Kekwafo laJehova otwa teelela oku ka mona ovanhu vahapu tave tu waimine ofimbo oudjuu munene inau hovela. Natango, otwa hafa, molwaashi pefimbo loudjuu munene, efimbo olo tali ka kala lidjuu neenghono, otashi dulika ovanhu vahapu va ka dje mo mounyuni waSatana noku tu waimina tu longele Jehova. — Oil. 13:48.

15-16. Oshike hatu twikile okuninga, nofiyo onaini?

¹⁵ Ofimbo twa teelela osho shi ningwe, otu na oshilonga sha fimana osho tu na okulonga, oshilonga osho itashi ka endululwa vali, tu na oufembanghenda wokuudifa onghundana iwa yOuhamba waKalunga mounyuni aushe. Pefimbo opo tuu opo, natu twikile okulondwela ovanhu kombinga yaasho tashi ka ningwa mafiku. Ovanhu ova pumbwa okushiiva kutya exulilo lounyuni ou wa kolokosha oli li poduka. Opo nee ngeenge efimbo letokolo ola fiki, otava ka shiiva kutya etumwalaka olo twa li hatu udifa ola dja kuJehova Kalunga. — Hes. 38:23.

¹⁶ Oshike twa tokolatoko okuninga? Molwaashi otu hole onghundana iwa, ovanhu vakwetu, nokomesho yaaishe, otu hole Jehova Kalunga nedina laye, ohatu twikile okuudifa nopehe na olufuwo nonouladi fiyo osheshi Jehova a ti “osha wana!”