1. Ihi itwa dilongo mu kyonge kya muvu ni muvu kya 2023?

 MU KYONGE kya muvu ni muvu kya 2023, a twatendela kyambote milongi ya lungu ni kixikanu kyetu ni kwila twevu ngolokela ya lungu ni kikalakalu kyetu kya kuboka. Mu kifika twadilongo kwila athu avulu anda dilonga o Bibidya kate mwene kyoso o Babilonya ya Dikota kyanda ibwika. Twevu we kwila tunde kumbeji ya Kamoxi wa 2023 o aboki kamuxinda dingi o ji ola ku jilelatodyu ja. O kwila kiki kilondekesa kuma o kikalakalu kyetu kya kuboka kikyala dingi ni valolo yavulu, mba kitwabhingi dingi kuboka ni nguzu yoso kala kitwakexile mubhanga mu ukulu? Kana kikyene!

2. Mukonda dyahi twatokala kuboka ni lusolo lwoso? (Máluku 13:10)

² Kala kizuwa kibhita twa tokala kubhanga o kikalakalu kyetu kya kuboka ni nguzu yoso. Mukonda dyahi? O kithangana kyabutu kya. Tumone ya zwela Jezú ya lungu ni kuboka mu izuwa isukidilaku. (Tanga Máluku 13:10.) Mu divulu dya Matesu Jezú wambe kwila o njimbu yambote eji kwiboka mu ngongo yoso ande dya “dizubhilu” kubhixila. (Mat. 24:14) O izwelu yiyi ilombolola o dizubhilu dya mundu wa Satanaji. Jihova  wa xindi kya o “kizuwa ni kithangana” kya ima yanda bhita ku hadya. (Mat. 24:36; 25:13; Ika. 1:7) Kala kizuwa kibhita twa mu zukama dingi kudizubhilu. (Lom. 13:11) Mu kiki twatokala kusuluka mu kuboka kate kyanda bhixila o dizubhilu.

3. Ihi ituswinisa o kuboka?

³ Ya lungu ni kikalakalu kyetu kya kuboka kima kyambote kudibhanga o kibhwidisu kiki: Mukonda dyahi tuboka o njimbu yambote? Mukidi, o henda ituswinisa o kuboka. Itubhanga mu kikalakalu kyetu kya kuboka kilondekesa o henda yetu—o henda yetu ku njimbu yambote, o henda yetu ku athu, kya beta dingi kota o henda yetu kwa Jihova ni kudijina dyê. Tudilonge o maka ya.

TUBOKA MUKONDA TWAZOLO O NJIMBU YAMBOTE

4. Kyebhi kitudivwa kyoso kitwivwa njimbu yambote?

⁴ Kyoso kitutambula njimbu yambote tusanguluka kyavulu. Nange sayi muthu ku mwiji wé wabhanduluka mba sayi muthu wakubhana salu i wabhindamene kyavulu. Sé phata, eye ukala ni hanji yavulu phala kutudila o njimbu yiyi ku jindandu jé ni ku makamba mé. O kwila kiki kyene kyabhiti n’eye kyoso ki wevu o njimbu yambote yalungu ni Utuminu wa Nzambi?

5. Kyebhi kiwadivu kyoso kiwevwile o kidi kya Mak’â Nzambi mu veji ya dyanga? (Tala we o jifoto.)

⁵ Xinganeka lwamukwa dingi kyebhi kiwadivu kyoso kiwevwile o kidi kya Mak’â Nzambi mu veji ya dyanga. Wadilongo kwila o Tat’é ya dyulu wakuzolo, wamesena kwila ubhanga mbandu ku mwiji wê, kwila wakanena kuzubha o hadi, ni kwila ku hádya eye wandamona o jindandu jé ni makamba mé kwafukununa, ni ima yakamukwá dingi. (Mál. 10:​29, 30; Nzw. 5:​28, 29; Lom. 8:​38, 39; Dij. 21:​3, 4) O milongi yoso yiyi ya kusangulukisa kyavulu. (Luk. 24:32) Wawabhela kyavulu yoso iwadilongo, yu wamesenene kutangela athu oso!—Sokesa ni Jelemiya 20:9.

6. Ihi iwadilongo ku musoso wa phange Ernest ni Rose?

 ⁶ Phange amwixana Ernest b wexile ni dikwinyi dya mivu kyoso tat’ê kyafu. Phange Ernest wambe: “Nga kexile mu dibhwidisa: ‘O kwila mwéne wayi ku dyulu? O kwila mwéne wayi kya mwene, ka-nda vutuka dingi?’ Nga kexile mu kala ni difuba dya ana-ndenge akexile ni jitata jâ.” Phange Ernest wexile muya mu mbalale, ni kufukama bhu mbandu ya mbila ya tat’ê ni kusamba: “Nzambi tata, ngi londekese kwoso kwala tat’etu.” Mu kubhita 17 dya mivu tunde kyafu tat’ê, phange Ernest amubhingi phala kudilonga o Bibidya, mwene waxikina ni lusolo lwoso. Mwene wadiwanene kyavulu mu kwijiya kwila o athu afu kyá kejiya dingi kima, edi kala ala mu kilu kyazongo ni kwila o Bibidya yamba kuma ku hádya anda fukunuka. (Ndo. 9:​5, 10; Ika. 24:15) Mwene watena kusanga o itambwijilu ya ibhwidisu yexile musota mu mivu yavulu! Phange Ernest wawabhela kyavulu o ima yexile mudilonga mu Bibidya. O muhatu wê, Rose wamateka we kudilonga o Bibidya ni kuwabhela yexile mudilonga. Ku muvu wa 1978 a abatizala. Ni kuswina kwoso, ene mubokela o jindandu jâ, o makamba mâ ni athu amukwá yalungu ni Utuminu wa Nzambi. Mukonda dya kiki, phange Ernest ni Rose akwatekesa 70 a athu ndenge, kudilonga yalungu ni Jihova ni kwabatizala.

7. Ihi ibhita kyoso kituzola o ima itwadilongo mu Bibidya? (Luka 6:45)

⁷ Kyoso kituzola o ima itwadilongo mu Bibidya, kitutena kudixibha. (Tanga Luka 6:45.) Etu tudivwa kala kyadivwile o maxibulu a Jezú ku hama ya dyanga, kyoso kyambe: “Kitutena kudixibha mu kuzwela o ima i twamono ni ima itwevu.” (Ika. 4:20) Tuzola kyavulu o kidi kiki, mukonda dya kiki tumesena ku kitangela ku athu avulu.

TUBOKA MUKONDA TWAZOLO O ATHU

8. Ihi itubhangesa kuboka o njimbu yambote ku athu? (Tala o kaxa “ Zol’o Athu—Bhanga Maxibulu.”) (Tala we ofoto.)

⁸ Kala Jihova ni Mon’ê, twazolo kyavulu o athu. (Jisa. 8:31; Nzw. 3:16) Tukala ni henda ya athu kala ni “kidyelelu,” kejiya “Nzambi.” (Efe. 2:12) Mukonda dya maka ku mwenyu, adivwa kala ala mu dikungu dya zongo, étu twala ni ngoji phala kwakatula-mu, o ngoji yiyi, o njimbu yambote ya Utuminu wa Nzambi. Mukonda dya henda yetu kwa ene, tubhanga yoso ni yoso phala kwabokela o njimbu yambote. O njimbu yiyi ya akwatekesa kukala ni kusanguluka ku mwenyu kindala, ni kukala ni kidyelelu kya kutambula o “mwenyu wa kidi” ku mundu wa ubhe.—1 Ti. 6:19.

9. Twene mudimuna o athu yalungu ni ihi? Mukonda dyahi? (Izekiyele 33:​7, 8)

 ⁹ O henda yetu ku athu ituswinisa we kwadimuna yalungu ni dizubhilu dya mundu wa Satanaji. (Tanga Izekiyele 33:​7, 8.) Twala ni henda ya jivizinyu ni ja jindandu jetu kasidivila Jihova. Avulu mudyâ kejiya kwila “kwanda kala hadi yadikota, kiluwa ibhita tundé ku dimatekenu dya ngongo katé kindala, ku hádya we ki yanda bhita dingi.” (Mat. 24:21) Twamesena kwila ene ejiya kwila ku hádya, anda bwika o jingeleja ja makutu ni kwila o mundu yú wayibha anda ubwika mu Alumajedone. (Dij. 16:​14, 16; 17:​16, 17; 19:​11, 19, 20) Tusamba phala athu avulu utwene mwabokela asidivile Jihova. Ihi yanda bhita ni yó kene mutubhana matwi, katé mwene o jindandu jetu?

10. Mukonda dyahi twatokala kusuluka mu kudimuna o athu?

¹⁰ Kala kitwadilongo mu milongi yatundu-mu, Jihova wamesena kwila o athu abhuluka kyoso kyanda mona o kibwikilu kya Babilonya ya dikota. Se kyenyiki, twatokala kubokela dingi o athu ni kuswina kwoso kindala. Xinganeka mu kidi kiki: O ima itwene mwatangela lelu, yene yanda lembalala ku hádya. (Sokesa ni Izekiyele 33:33.) Nange o ima yanda lembalala yanda kwaswinisa kusidivila Jihova kumoxi n’etu, ande dya dizubhilu. Kala o kasalelu mu mbanza ya Filipe wadyela ngó kyoso kyabhiti “kitungutu kyadikota,” nange sayi athu kene mutubhana matwi, anda twivwa ngó kyoso kyanda mona o kibwikilu kya Babilonya ya dikota.—Ika. 16:​25-34.

TUBOKA MUKONDA TWAZOLO JIHOVA NI DIJINA DYÊ

11. Kyebhi ki tubhana kwa Jihova o fuma, o kijingu ni kutena? (Dijingunwinu 4:11) (Tala we o jifoto.)

¹¹ O kima kyabetakota kitubhangesa kuboka o njimbu yambote, o henda yetu kwa Jihova Nzambi ni ku dijina dyê dikola. Tuximana o Nzambi twamuzolo, bhukaxi ka kuboka kwetu. (Tanga Dijingunwinu 4:11.) Etu tuxikina ni muxima woso kwila Jihova Nzambi yetu, kya mufwama kutambula o fuma, o kijingu ni kutena. Tumubhana o fuma ni kijingu, kyoso kitutangela ku athu o ima ilondekesa kwila mwene “wabhange o ima yoso” ni kwila twala ku mwenyu mukonda mwéne watubhanawu. Tubhana o nguzu yetu kwa Jihova kyoso kituboka ni kuswina kwoso mu ithangana yavulu. (Mat. 6:33; Luk. 13:24; Kol. 3:23) Etu twazolo o Nzambi yetu, mu kiki phe twazolo kuzwela ni athu yalungu ni mwene. Tudivwa we kyambote mu kuzwela ni athu yalungu ni dijina dyé ni dilombolwelu dya dijina didi. Mukonda dyahi?

12. Kyebhi ki tuzelesa o dijina dya Jihova mu ukunji?

¹² O henda yetu kwa Jihova itubhangesa  kuzelesa o dijina dyé. (Mat. 6:9) Etu twamesena kubhanga mbandu ku kikalakalu kya kuzelesa o dijina dyê ku itatesu ya Satanaji. (Dim. 3:​1-5; Jobe 2:4; Nzw. 8:44) Mu ukunji wetu twamesena kuzokela o kidi kyalungu ni dijina dya Nzambi yetu mu kuzwela o kidi kyalungu ni mwene ku athu amesena kwivwa. Etu twamesena kwila athu oso eza mu kwijiya o kidifwa kyê kya beta dingi kota, o henda, ni ukexilu we, wa kutumina ni kuyuka. O utuminu we wanda zubha o hadi yoso, ni kubheka kutululuka ni kisangusangu ku miji yoso. (Jisá. 37:​10, 11, 29; 1 Nz. 4:8) Kyoso ki tuzokela o kidi mu ukunji twamuzelesa o dijina dya Jihova. Tusanguluka we mu kwijiya kwila twa mubhanga yoso ikingila Jihova kokwetu. Kyebhi?

13. Mukonda dyahi ujitu wadikota kukala tu Jimbangi ja Jihova? (Izaya 43:​10-12)

¹³ Jihova wene mu twixana phala tukale tu “jimbangi” jê. (Tanga Izaya 43:​10-12.) Mivu kudima sayi mukanda watundu ku Kibuka kya Utuminu wambe: “Ujitu wakatunda phala amoxi mudyetu kwa exana kala Jimbangi ja Jihova.” c Mukonda dyahi? Tumone o kifika: Xinganeka kwila sayi muthu ukutatela makutu, kindala umesena muthu u ku zokela phala kuzwela kwila eye u muthu wambote ni kwila a mu kutatela. Nanyi weji mu sola? Se phata weji sola muthu wa mwijiya kyambote ni kwila eye wa mudyelela, wala ni idifwa yambote ni kwila o athu a mudyelela we. Mu kutusola kala tu jimbangi jê, Jihova ulondekesa kwila mwene wa twijiya kyambote ni kwila wadyelela kuma tutena kubhana umbangi kwila mwene ngo o Nzambi ya kidi. Ujitu wadikota kukala tu jimbangi jê, kyenyiki tukatula mbote mu ithangana yoso phala kuboka yalungu ni dijina dyê ni kuzokela o kidi mukonda dya makutu  ene mu mutatela. Mu kubhanga kiki tu londekesa mwene kuma tu Jimbangi ja Jihova!— Jisá. 83:18; Lom. 10:​13-15.

TWANDA SULUKA MU KUBOKA KATE KUDISUKILU

14. Ima yebhi itwamukingila ni hanji yoso kwila yanda bhita ku hadya?

¹⁴ Ima yebhi itwamukingila ni hanji yoso yanda bhita ku hadya? Ni kikwatekesu kya Jihova twadyelela kwila athu avulu anda xikina hanji o njimbu yambote ande dya hadi yadikota kumateka. Twa sanguluka we kyavulu mu kwijiya kwila sayi athu mu kithangana kya hadi ya dikota anda tunda ku mbandu ya Satanaji ni kwiza mu kusidivila Jihova kumoxi n’etu.—Ika. 13:48.

15-16. Ihi itwanda suluka o kubhanga, kate thembu kuxi?

¹⁵ Maji kindala twala hanji ni ikalakalu yavulu phala ku ibhanga, o kikalakalu kiki nuka dingi twanda kibhanga. Etu twala ni ujitu wadikota wa kuboka o njimbu yambote wa Utuminu wa Nzambi ku ixi yoso. Twatokala we kwa atangela kwila kwa kambe ngo bhofele o mundu yu wayibha anda ubwika. Kyoso o kithangana kiki kya kufundisa kyanda bhixila o athu anda kwijiya kwila o njimbu yiyi yatundu kwa Jihova Nzambi.—Ize. 38:23.

¹⁶ Kindala twala polondo phala kubhanga ihi? Mukonda dya henda yetu ku njimbu yambote, o henda ku athu, ni kya beta dingi kota o henda yetu kwa Jihova Nzambi ni ku dijina dyê, twanda suluka ni kuboka ni kuswina kwoso kate Jihova kyanda kwamba, “kwabhu kya!”