1. Ki lika mañi zene luitutile fa mukopano wa ka silimo wa 2023?

 FA MUKOPANO wa ka silimo wa 2023, a nelutaluselizwe ka za licinceho zeezizwe kwa litaba zeñwi zelulumela mi nekufilwe ni lizibiso zeñwi zetabisa ka za bukombwa bwaluna. Ka mutala, neluitutile kuli batu babañwi mwendi bakaba ni kolo ya kuba kwa lineku la batu ba Jehova Babilona Yomutuna niha saayundisizwe. Hape neluitutile kuli kukala ka kweli ya November 2023, bakutazi ba Mubuso habasa kupiwanga kubiha misebezi yabona kaufela ya mwa bukombwa. Kana licinceho zeo libonisa kuli musebezi wa kukutaza haisali wa butokwa hahulu kamba kuli halusa tokwa kuueza ka putako sina kwamulaho? Kutokwa nihanyinyani!

2. Ki kabakalañi musebezi waluna wa kukutaza hauzwelapili kuba wa butokwa hahulu zazi ni zazi? (Mareka 13:10)

² Zazi ni zazi musebezi waluna uzwelapili kuba wa butokwa hahulu nikufita. Kabakalañi? Kakuli nako yesiyezi kuli mafelelezo atahe ki yenyinyani hahulu. Halunyakisiseñi zanaapolofitile Jesu ka za musebezi wa kukutaza mwa mazazi a mafelelezo. (Mubale Mareka 13:10.) Ka kuya ka litaba zanaañozi Mateu, Jesu naabulezi kuli taba yende ikakutazwa mwa lifasi kaufela pili “mafelelezo” asika taha kale. (Mat. 24:14) Pulelo yeo iama kwa kufela kwa lifasi la Satani lelimaswe. Jehova utomile “lizazi ni nako” folika ezahalela lika zetuha liezahala. (Mat. 24:36; 25:13; Lik. 1:7) Zazi ni zazi luzwelapili kusutelela  hahulu kwa nako yeo. (Maro. 13:11) Kufitela mafelelezo ataha, luswanela kuzwelapili kukutaza.

3. Ki lika mañi zelususuezanga kukutaza?

³ Halunze lunahanisisa za bukombwa bwaluna, lukaeza hande kuipuza puzo ya butokwa ye, yeli: Ki kabakalañi halukutazanga taba yende? Lilato ki lona leli lususuezanga kukutaza. Halukutaza, lubonisa kuli lwalata taba yende, lwalata batu, mi sa butokwa nikufita kikuli, lwalata Jehova ni libizo lahae. Halunyakisiseñi yeñwi ni yeñwi ya lika zeo.

LWAKUTAZANGA KAKULI LWALATA TABA YENDE

4. Ki lika mañi zeluezanga haluutwa taba yende?

⁴ Munahane feela mone muikutwezi hane mutaluselizwe taba yeñwi yende, mwendi nemutaluselizwe kuli yomuñwi mwa lubasi lwamina unani mbututu kamba kuli mufumani musebezi one mutokwa hahulu. Kusina kukakanya, nemunyolezwi hahulu kutaluseza lubasi lwamina ni balikani bamina ka za taba yende yeo. Kana ki mona mone muikutwezi cwalo hane muutwile taba yende hahulu ka kufitisisa, yona taba yende ya Mubuso wa Mulimu?

5. Nemuikutwile cwañi hane muitutile lwapili litaba za niti ze mwa Linzwi la Mulimu? (Mubone ni maswaniso.)

⁵ Muhupule mone muikutwezi hane muitutile lwapili litaba za niti ze mwa Linzwi la Mulimu. Nemuitutile kuli Ndataa mina ya kwa lihalimu wamilata, ubata kuli muswalisane ni lubasi lwahae lwa batu baba mulapela, ukafelisa lika zemiutwisa butuku ni zemitahiseza manyando, ni kuli mwakona kuba ni sepo ya kubona balatiwa bamina habaka zusiwa kwa bafu mwa lifasi lelinca, ni zeñwi cwalo. (Mare. 10:​29, 30; Joa. 5:​28, 29; Maro. 8:​38, 39; Sin. 21:​3, 4) Litaba za niti zeo neli mitahiselize tabo yetuna. (Luka 24:32) Nemutabezi litaba zene muituta, mi nemubata kutaluseza batu kaufela ka za teñi!—Mubapanye Jeremia 20:9.

6. Muitutañi ku zeneezahezi ku bo Ernest ni bakubona bo Rose?

 ⁶ Halunyakisiseñi mutala wo. Muzwale yabizwa Ernest b naanani lilimo zebato ba 10 bo ndatahe habatimela. Bo Ernest batalusa kuli: “Neniipuzize kuli: ‘Kana baile kwa lihalimu nji? Kamba habasana kupila nikamuta?’ Neniikumbutanga banana babanani bo ndataa bona.” Bo Ernest nebayanga kwa mabita mi nebayo kubamanga fa libita la bo ndataa bona ni kulapela kuli: “Mulimu, nibata kuziba kuli bo ndate bakai.” Hamulaho wa lilimo zebato ba 17 kuzwa fobashwela bo ndataa bona, bo Ernest bakalisa kuituta Bibele. Nebatabile hahulu hane baitutile kuli babashwile hakuna sebaziba, kuswana feela inge kuli ba mwa buloko bobutuna, ni kuli Bibele isepisa kuli kwapili kukaba ni zuho. (Muek. 9:​5, 10; Lik. 24:15) Nebafitile fa kufumana likalabo kwa lipuzo zenee bakatalize ka lilimo zeñata. Bo Ernest nebatabisizwe hahulu ki litaba za niti zene baituta mwa Bibele. Bakubona bo Rose bakalisa kuituta Bibele, mi ni bona bafita fa kulata litaba zene baituta. Mi sibeli sabona bakolobezwa ka 1978. Nebataluselize ba lubasi lwabona, balikani babona, ni batu kaufela bane batabela kuteeleza, litaba za butokwa zene baitutile mi nebaezize cwalo ka kutukufalelwa. Kabakaleo, bo Ernest ni bo Rose batusize batu babafitelela 70 kueza zwelopili ni kukolobezwa.

7. Ki lika mañi zeluezanga kabakala kulata hahulu litaba za niti ze mwa Bibele? (Luka 6:45)

⁷ Kaniti luli, haiba lulata hahulu litaba za niti ze mwa Bibele, lukasusuezwa kulitaluseza babañwi. (Mubale Luka 6:45.) Luikutwa sina mone baikutwezi balutiwa ba Jesu ba mwa linako za baapositola, bane babulezi kuli: “Halukoni kutuhela kubulela lika zeluboni ni zeluutwile.” (Lik. 4:20) Lulata hahulu litaba za niti mi lubata kulitaluseza batu babañata ka mokukonahalela kaufela.

LWAKUTAZANGA KAKULI LWALATA BATU

8. Ki lika mañi zelususuezanga kukutaza taba yende ku babañwi? (Mubone mbokisi yeli, “ Mulate Batu—Mubatuse Kuba Balutiwa.”) (Mubone ni siswaniso.)

⁸ Ka kuswana ni Jehova ni Mwanaa hae, ni luna lwalata batu. (Liprov. 8:31; Joa. 3:16) Lushwelanga hahulu makeke batu ‘babasa zibi Mulimu’ ni ‘babasina sepo.’ (Maef. 2:12) Miinelo yetaata yebakopana ni yona mwa bupilo ikona kutahisa kuli baikutwe inge kuli ba mwa musima otungile, kono lunani muhala okona kubatusa kuzwa ma musima wo, yona taba yende ya Mubuso wa Mulimu. Lilato ni mukekecima waluna kwa batu bao lilususuezanga kueza molukonela kaufela kuli lukutaze taba yende ku bona. Lushango lwa butokwa lo lwakona kubatusa kuba ni sepo, kubatusa  kupila bupilo bobunde hahulu ka nako ya cwale, ni kubafa kolo ya kuto pila “bupilo sakata,” bona bupilo bobusa feli, mwa lifasi lelinca la Mulimu.—1 Tim. 6:19.

9. Ki lufi lushango lwa temuso lolutalusezanga batu ka za kwapili, mi ki kabakalañi? (Ezekiele 33:​7, 8)

⁹ Lilato laluna kwa batu hape lilususuezanga kubataluseza kuli mafelelezo a lifasi lelimaswe le afakaufi. (Mubale Ezekiele 33:​7, 8.) Lushwelanga makeke batu kaufela, kukopanyeleza cwalo ni ba mwa lubasi lwaluna babasa sebelezi Jehova. Batu babañata baipilela feela basazibi kuli kukaba ni “ñalelwa yetuna yesika bonwa kale kuzwa kwa simuluho ya lifasi kutisa cwale, mi haina kubonwa hape.” (Mat. 24:21) Lubata kuli bazibe zekaezahala ka nako ya katulo yeo—bulapeli bwa buhata bukayundiswa mi hasamulaho, ili ka nako ya ndwa ya Armagedoni, lifasi lelimaswe le likayundiswa. (Sin. 16:​14, 16; 17:​16, 17; 19:​11, 19, 20) Lulapela kuli batu babañata ka mokukonahalela kaufela bautwe lushango lwa temuso lo ni kuswalisana ni luna kulapela Jehova ka nzila yelukile. Kono ki lika mañi zekaezahala kwa batu babasa lati kuutwa lushango lwa temuso lo ka nako ya cwale, kukopanyeleza cwalo ni ba mwa lubasi lwaluna?

10. Ki kabakalañi hakuli kwa butokwa kuli luzwelepili kushaela lushango lwa temuso?

¹⁰ Sina mone kutaluselizwe mwa taba yefelile, mwendi tato ya Jehova ki kupilisa batu babaka bonisa tumelo ku yena habaka bona Babilona Yomutuna inzaa yundiswa. Haiba ki cwalo, uzibe ki kwa butokwa hahulu kuzwelapili kushaela lushango lwa temuso. Muhupule taba ye: Lika zelu bataluseza ka nako ya cwale, mwendi baka lihupula ka nako yeo. (Mubapanye Ezekiele 33:33.) Mwendi bakahupula lushango lwa temuso lone bautwile ku luna mi bakasusuezwa kuswalisana ni luna kulapela Jehova ka nzila yelukile pili nako isika fela kale. Ka kuswana ni mulibeleli wa tolongo wa kwa Filipi yanaabonisize tumelo ku Mulimu “zikinyeho yetuna” hase iezahalile, mwendi batu babañwi babasa amuheli lushango lwaluna ka nako ya cwale, bakabonisa tumelo ku Mulimu, Babilona Yomutuna hakayundiswa ka sipundumukela.—Lik. 16:​25-34.

LWAKUTAZANGA KAKULI LWALATA JEHOVA NI LIBIZO LAHAE

11. Lukona kufa cwañi Jehova kanya, likute, ni maata? (Sinulo 4:11) (Mubone ni maswaniso.)

¹¹ Libaka la butokwa hahulu halukutazanga taba yende, kikuli lwalata Jehova Mulimu ni libizo lahae lelikenile. Luunga bukombwa bwaluna sina nzila ya kulumbeka ka yona Mulimu yelulata. (Mubale Sinulo 4:11.) Lwalumelela ka pilu yaluna kaufela kuli Jehova Mulimu waswanela kufiwa kanya, likute, ni maata  ki batanga bahae babasepahala. Lumufa kanya ni likute halutaluseza babañwi bupaki bobukolwisa bwa kuli ‘naabupile lika kaufela’ ni kuli ki yena yalufile bupilo. Lumufa maata, ona maata aluna, haluitusisa nako yaluna ni lika zelunani zona kuli luabane mwa bukombwa ka kutala kulikana ni miinelo yaluna. (Mat. 6:33; Luka 13:24; Makolo. 3:23) Ka mubulelelo omuñwi, lwalata kubulelela batu ka za Mulimu yelulata. Hape lususuezwanga kutaluseza babañwi ka za libizo lahae ni zelitalusa. Kabakalañi?

12. Lukona kukenisa cwañi libizo la Jehova haluli mwa bukombwa?

¹² Lilato laluna ku Jehova lilususuezanga kukenisa libizo lahae. (Mat. 6:9) Lubata kuabana mwa musebezi wa kukenisa libizo la Mulimu, ili kutaluseza batu kuli litaba zabulezi Satani ka za Jehova ki za buhata. (Gen. 3:​1-5; Jobo 2:4; Joa. 8:44) Haluli mwa bukombwa, lunyolelwanga hahulu kubonisa kuli lu kwa lineku la Mulimu, ka kutaluseza batu kaufela babatabela kuteeleza niti ka za hae. Lubata kuli batu kaufela bazibe kuli kalemeno kahae kakatuna ka kufitisisa ki lilato, kuli nzila yabusa ka yona ki yende mi ilukile, ni kuli honacwale-cwale fa, Mubuso wahae ukafelisa manyando kaufela ni kutusa batu kuba mwa kozo ni kuba ni tabo. (Samu 37:​10, 11, 29; 1 Joa. 4:8) Haiba lutaluseza batu mwa bukombwa litaba zeo ka za Jehova, lukenisa libizo lahae. Hape lunani tabo kakuli lwaziba kuli lueza zeluswanela kueza ka kuba Lipaki za Jehova. Ki kabakalañi halubulela cwalo?

13. Ki kabakalañi haluikutwa kuli ki tohonolo kubizwa Lipaki za Jehova? (Isaya 43:​10-12)

¹³ Jehova uluketile kuli lube “lipaki” zahae. (Mubale Isaya 43:​10-12.) Lilimo lisikai kwamulaho, liñolo lelizwa kwa sitopa sesietelela nelibulezi kuli: “Hakuna tohonolo yetuna yefita  ya kubizwa Lipaki za Jehova.” c Ki kabakalañi hakuli cwalo? Halunyakisiseñi mutala wo. Haiba mubata mutu yaka mitusa kukenisa libizo lamina mwa kuta, mukaketa mutu yemuziba ni yemusepile, ili mutu yanani libizo lelinde lelika tahisa kuli batu bakolwe litaba zakabulela. Ka kuluketa kuli lube Lipaki zahae, Jehova ubonisize kuli uluziba hande hahulu mi ulusepile kuli lwakona kutaluseza batu babañwi kuli ki yena feela Mulimu anosi wa niti. Luikutwa kuli ki tohonolo yetuna kuba Lipaki zahae mi luitusisanga kolo kaufela yelubanga ni yona kuzibahaza libizo lahae, ni kubonisa kuli litaba zemaswe kaufela zebulezwi ka za hae ki za buhata. Ka nzila yeo, lueza zeluswanela kueza ka kuba Lipaki za Jehova, lona libizo lelulata kubizwa ka lona!—Samu 83:18; Maro. 10:​13-15.

LUKAZWELAPILI KUKUTAZA KUISA KWA MAFELELEZO

14. Ki lika mañi zelunyolezwi hahulu kuto bona zekaezahala kwapilinyana?

¹⁴ Lunyolezwi hahulu kuto bona lika zekaezahala kwapilinyana! Ka tuso ya Jehova, lusepa kuli batu babañata bakaamuhela niti pili ñalelwa yetuna isika kalisa kale. Hape lutabile hahulu kuziba kuli ka nako yetaata hahulu mwa lifasi, yona nako ya ñalelwa yetuna, mwendi batu babañata bakazwa mwa lifasi la Satani lelika yundiswa, ni kuswalisana ni luna kulumbeka Jehova!—Lik. 13:48.

15-16. Ki lika mañi zeluka zwelapili kueza, mi lukaeza cwalo kuisa lili?

¹⁵ Kono ka nako ya cwale, kunani musebezi oluswanela kueza. Lunani tohonolo ya kuabana mwa musebezi osike wakutelwa hape, ona musebezi wa kukutaza taba yende ya Mubuso wa Mulimu mwa lifasi kaufela. Kono ka nako yeswana, luswanela kuzwelapili kushaela lushango lwa temuso. Batu baswanela kuziba kuli mafelelezo a lifasi lelimaswe le, asutelezi hahulu. Mi nako ya katulo haika fita, bakaziba kuli lushango lone lukutaza neluzwa ku Jehova Mulimu.—Ezek. 38:23.

¹⁶ Kacwalo, ki lika mañi zeluikatulezi kueza? Bakeñisa kuli lwalata taba yende, lwalata batu, mi sa butokwa nikufita kikuli lwalata Jehova Mulimu ni libizo lahae, lukazwelapili kukutaza ka tukufalelo yetuna ni kuunga musebezi wo kuba wa butokwa hahulu kufitela Jehova abulela kuli kihona!