MWAHA WOOSOMIYA 20
NCIPO 67 “Mulaleye Masu a Muluku”
Nhihiyerere ulalyeera ninifento!
“Ilapo cotheene, ihapari comaana cihaana cilalyeeriyaka toko.”—MARK. 13:10.
ITTHU INHALEEHU WIITTHUCA
Woona mananna nifento ninaanikurumica ulalyeera woohoocya.
1. Isiyani niitthucileehu wankutthaanoni wo mwaakha wo 2023?
WANKUTTHAANONI muulupale wo mwaakha wo 2023, a ahopankiya marukunuso ootteeliha nrima ni cihohiminya citthu cotikiniha nhina ntekweehu woolalyeera. Wootakihera, uhotaphuleliya wiira atthu akhwaawe anhala upacera unswalela Yehova cakwanyulaciyaka ittiini cowootha. Ciicammo, nihocuwela wiira mweeri wo Novembro wo 2023, yanhala ukhala marukunuso nhina mananna owantikha irelatooriyu yo nteko woolalyeera. Niireke nlattu wo ala marukunuswaala, ntekweehu woolalyeera khunakhala wowaakuvyaca awula khurina ifayita? Mena!
2. Kontha isiyani ukati unnihaleela wiira nivare nteko woolalyeerya unaavira utepaka uwukuwa? (Markus 13:10)
2 Khula nihuku ninvira, ukati unnihaleela wiira nivare nteko woolalyeerya unaatepa uwukuwa. Kontha isiyani? Kontha ukati uneera uviraka. Nwehe itthu Yesu aahimilyaawe aacaka nteko woolalyeera wo ala mahuku ookhiceraala. (Nsome Markus 13:10. b) Nhina ilivuru ya Matewus, Yesu enre wiira ihapari comaana cinaahala ulalennya ntuninyani motheene unkhaliya uhinaphiya ‘wiimaleloni ituninya.’ (Mat. 24:14) Nuulumo “wiimaleloni” unaaciya umala wotuninya yootakhala inlamuleliya ni Sotwani. Yehova hohela nihuku ni iwoora inhalaaya umala. (Mat. 24:36; 25:13; Mite. 1:7) Wokhula nihuku ninvira, nineera naattamelaka wiimaleloni wo ila ituninya yomasakheela. (Aroo. 13:11) Niwehereraka uphiya nno nihukunno, hiiva nihaana nihihiyereraka ulalyeera.
3. Isiyani innikurumica ulalyeera?
3 Noopuwelaka ulalyeera, nihaana niikohaka co: Kontha isiyani ninlalyeereehu ihapari comaana? Hiiva ninaalalyeera nlattu wo nifento. Nalalyeeraka vale, ninawoonihera wiira cinaanicivela ihapari comaana, ninawaafenta atthu, ninanfenta Yehova ni ncinanawe. Vano, nttwee noopele mwaha wokhula ipontu.
NINALALYEERA KONTHA CINAANICIVELA IHAPARI COMAANA
4. Manannani cineecooneehu neewaka ihapari yomaana?
4 Nnawuupuwela mananna ceeconneenyu ukati weewileenyu ihapari yomaana? Atthunaka mwahohimeriya wiira hoyariya mwaana waamuciinyu awula nhophwanya nteko waapheeleenyu venci. Khweeliini, nyuuva mwahokhala ootteeliya ni mwahopheela waahimyera nnyo ihaparinnyo amuciinyu ni asipatthaniinyu. Atthunaka nyuuva pheeconneenyu commo ukati weewileenyu ihapari comaana co Umwene wa Nluku.
5. Manannani nyuuva ceeconneenyu ikwaha yoopacera mweetthucileenyu ikhweeli co mbiibiliyani? (Nwehe ciicammo ilatarato.)
5 Muupuwele mananna ceeconneenyu ukati mwiiwileenyu ikwaha yoopacera ikhweeli ca Nluku. Mwaheetthuca wiira Athumwaninyu o wiirimu anawuufentani cinene ni ampheela wiira nyuuva mpankele mphantte waamuci anaaswalela ntuninyani motheene. Nyuuva nheetthuca ciicammo wiira Yehova hokhuluveliha umaliha masakha otheene ni uwunweleliha atthu akhwile nyuuva mwaafenteenyu. Nnya phi citthu nyuuva ceetthucileenyu. (Mark. 10:29, 30; Joau 5:28, 29; Aroo. 8:38, 39; Apoka. 21:3, 4) Nyuuva mwahotteeliya cinene ukati mweetthucileenyu nnyo ikhweelinnyo. (Luka 24:32) Ucuwela winyu nnyo ikhweelinnyo nyuuva cahoocivelani cinene ni nnaapheela waahimyera akhunaninyu!—Nwehe ciicammo Jeremiya 20:9.
Ukati neetthucileehu ikhweeli, hiiva nampheela waahimerya atthu otheene itthu neetthuceehu! (Nwehe iparaagarafu 5)
6. Itthu yaawiirannyeele amunna Ernest ni amwaaraya, inwiitthucihani isiyani?
6 Moone itthu yaawiirannyenle amunna amoca aneehaniinya Ernest. c Ukati waarinaaya myaakha 10, athumwanaya yahokhwa. Amunna Ernest aheera: “Miiva kaanawiikohaka co: ‘Kiireke apaapa arweele wiirimu? Kiireke kinaahala woona-tho wanihukuni?’ Miiva kaanaawonela nttima asaana yaarina asithumwanaya.” Amunna Ernest yanrwaa umahiye ni yankhoroma nipuro nivithiyaaya athumwanaya ni yanlompa, yeeraka: “Sontte Nluku, kimpheela ucuwela nipuro niryaaya apaapa.” Anarina myaakha 17, amunna Ernest yahopacera usomihiya Ibiibiliya. Ayo yahokhala ootteeliya ukati weetthucilyaaya wiira atthu ookhwa khanoopuwela itthu ni wiira Ibiibiliya inawuuluma wiira unaahala ukhala wunwelelihiya waatthu akhwile. (Ekles. 9:5, 10; Mite. 24:15) Vano, yahocuwela waakhuliya waya makoho yaarinaaya! Amunna Ernest yahokhala ootikinihinya niikhweeli ceetthucilyaaya mbiibiliyani. Amwaaraya, Rose, yahopacera usoma Ibiibiliya ni ciicammo cahaacivela ikhweeli co Umwene wa Nluku ceetthucilyaaya. Mwaakha wo 1978, ooyeeli yahopattisiya. Ukhuma yooyo mwaakhooyo, amunna Ernest naamwaaraya yahopacera waahimerya ikhweeli ceetthucilyaaya amucyaaya, asimpwanaaya ni atthu akhwaawe. Amunna Ernest wamoca naamwaaraya ahaakavihera atthu oophiyaka 70 wiitthuca ikhweeli ni upattisiya.
7. Isiyani ineerannya canicivelaka ikhweeli co mbiibiliyani? (Luka 6:45)
7 Hiiva canicivelaka ikhweeli co mbiibiliyani, khaninkhitiri umaalana citthu niitthucileehu. (Nsome Luka 6:45. d) Hiiva ninawiicoona ukhala khampa atthari a Yesu, yenre co: “Khaninlamuliya uhiya wuuluma citthu conneehu ni ciiwileehu.” (Mite. 4:20) Hiiva cinaanicivela cinene ikhweeli, phimaana nimpheela wiikurumica waahimerya akhunanihu.
NINAALALYEERA KONTHA NINAAWAFENTA ATTHU
8. Isiyani innikurumica wiira naalalyeere akhunanihu ihapari comaana? (Nwehe ikwaaturu “ Mwaafenta Atthu—Mwaapanke Eetthuci.”) (Nwehe ciicammo ilatarato.)
8 Khampa Yehova ni Yesu, hiiva ninawaafenta atthu. (Miru. 8:31; Joau 3:16) Hiiva ninawoonela uthunku atthu “ahinoncuwela Nluku” ni ale ‘ahirina niweherero.’ (Efesu 2:12) Ayo atthwaayo anawaanana masakha muukumini waya, ni hi nihaana ihapari cinhala woopola ukumyaaya—ihapari comaana co Umwene wa Nluku. Waafenta ayo atthwaayo ni uwoonela uthunku phinnikurumica wiira naalalyeere ihapari comaana. Ukati uneewaaya ihapari comaana, unawaakavihera ukhalana niweherero noohoolo, ukhala otteeliya nenna co, awehereraka “ukumi womaana,” ukhanle ukumi woohimala upeephoni.—1 Tim. 6:19.
Nifento ni uthunku ninooneleehu atthwaayo hinnikurumica wiira nimananihe naahimerye ihapari comaana (Nwehe iparaagarafu 8)
9. Isiyani inhimyeehu inhala wiirannya uhoolo? (Ezekiyeli 33:7, 8)
9 Waafenta atthu phinnikurumica waahimerya wiira umalamalihiya wo ila ituninya yo masakheela uhattamela. (Nsome Ezekiyeli 33:7, 8. e) Hiiva ninaawoonela uthunku atthu otheene, waahela nhina amuciihu ahinonswalela Yehova. Atthu enci ankhala niiwasiwaasi caya ni khancuwela wiira “anaahala uwa masakha moolupale, ahinapaca wiirannya ukhuma ukati wumpiyaaya ituninya mpaka nnava, ni khanhala uwaa-tho.” (Mat. 24:21) Hiiva nimpheela waacuweliha atthu citthu cinhala wiirannya wahoolo: ittiini cowootha cinaahala umalamalihiya; vano phinhalaaya umalamalihiya ciicammo ila ituninya yoonihanaameela ukhottoni yo Harmacetom. (Apoka. 16:14, 16; 17:16, 17; 19:11, 19, 20) Hiiva ninaalompa wiira atthu otheene yiiwe ihapari cinlalyeereehu ni ciicammo alakele unswalela Yehova nkhayi nihiiva. Masi, isiyani inhala uwiirannyeela atthu akhwaawe ni amuciihu ahinniwelela nna co?
10. Kontha isiyani ninlamuliyeehu waahimerya atthwaayo citthu cinhala wiirannya uhoolo nenna co?
10 Khampa nonneehu mwaha uvinre, atthu anhala woona cimalamalihiyaka ittiini cowootha, pooti upacera umwaamini Yehova ni uhala woopoliya. Wakhalaka wiira iyo phiitthu inhala wiirannya, ikhanle itthu yofayita waahimeerya atthu itthu inhala wiirannya uhoolo. Muupuwele co: Atthwaayo anaahala urwaa wuupuwela itthu yaahimenryeehu. (Nwehe ciicammo Ezekiyeli 33:33.) Atthunaka ayo atthwaayo pooti wuupuwela itthu naahimeryeehu ni upheela unswalela Yehova nkhayi nihiiva. Khampa kwaarata o Filipo waathooyenryaawe waamini ihapari comaana uvira waya ‘uttettemela wotthaya,’ atthunaka atthu akhwaawe ahimpheela wiiwa ihapari comaana ilelo, unhalaaya woona ittiini cowootha cikwanyulaciyaka, ayo pooti upanka marukunuso muukumini waya.—Mite. 16:25-34.
NINLALYEERA KONTHA NINANFENTA YEHOVA NI NCINA NAWE
11. Manannani hiiva cinonttitthimiheehu, uhisima ni unvaha ikuru cihu Yehova? (Apokalipise 4:11) (Nwehe ciicammo ilatarato.)
11 Itthu yofayita cinene inniiriha ulalyeera ihapari comaana ukhalaka wiira ninanfenta Yehova ni ncina nawe. Ulalyeera ikhanle inanna yonttitthimiha Nluku ninonfenteehu. (Nsome Apokalipise 4:11. f) Hi ninaakupali ninrimeehu wotheene itthu inhimyaaya malayikha ookhuluvelya wiirimu, aneera co: “Thi weeva Yehova Nlukwiihu, unoophwanela uttitthimihiya, uhisimiya ni ukhalana ikuru.” Hi ninanhisima ni ninanttitthimiha Yehova ukati ninaahimeryeehu atthu wiira uyo phumpile citthu cotheene ni ciicammo phinivahile ukumi nirineehu. Hi ninanvaha Yehova itthu inkhitiriihu nivarelaka nteko ukatiihu, ikuru cihu ni citthu cirineehu wiira nikavihere ntekwaawe. (Mat. 6:33; Luka 13:24; Akol. 3:23) Nimoolumacero vakaani, hi unaanicivela umuuluma Nluku ninonfenteehu. Hiiva ciicammo unaanicivela waahimerya atthu akhwaawe ncina na Yehova ni makhalelwaawe.
Hi ninanvaha Yehova itthu nkhitiriihu nivarelaka nteko ukatiihu, ikuru cihu ni citthu cirineehu wiira nikavihere ntekwaawe (Nwehe iparaagarafu 11)
12. Manannani hiiva ninttitthimiheehu ncina na Yehova wuulalyeerani?
12 Unfenta wihu Yehova phinniiriha uttitthimiha ncina nawe. (Mat. 6:9) Iyo maanaaya wiira hiiva nimpheela waahimeerya atthwaayo wiira citthu cotheene Sotwani cihimilyaawe ca Yehova cikhanle cowoothiya. (Upha. 3:1-5; Jó 2:4; Joau 8:44) Ukati ninlalyeereehu, hiiva nimpheela waahimeerya atthu otheene ampheela univiriyana mananna Yehova ciryaawe. Hiiva nimpheela wiira atthu otheene acuwele ikhalelo yuulupale ya Yehova ukhanle ufenta ni wiira mananna uyo nolamulelaawe akhanle osariya. Hi ciicammo nimpheela waahimerya wiira woohipica, Umwennyaawe unaahala umaliha uhuva wotheene ni uwaana nnema ni waatteeliha nrima atthu otheene. (Isaa. 37:10, 11, 29; 1 Joau 4:8) Ukati ninoolumeehu ikhweeli ca Yehova, hiiva ninaattitthimiha ncina nawe. Hiiva ciicammo ninaakhala ootteeliya ucuwela wiira ninvara nteko Saahiti a Yehova nowehereriyaawe uvara. Manannani?
13. Kontha isiyani nineecooneehu uttitthimihiya cinene nlattu wo wiihaniya Masaahiti a Yehova? (Isaiya 43:10-12)
13 Yehova honithanla wiira ninkhale ‘masaahityaawe.’ (Nsome Isaiya 43:10-12. g) Myaakha civinre uttuli, iwarakha yo Mphwinko wo Mahumu Unhoolela yaheera co: “Wiihaninya Saahiti a Yehova ikhanle iparakha yoohilikananiya irinaawe khula ntthu iriyariihu.” h Kontha isiyani nineereehu commo? Muupuwele nna ntakiheronna: Waakhanle wiira nyuuva nnopheela unthanla ntthu wiira akhale Saahitiinyo utiripunali, woohaanyihacera nyuuva mwaahala unthanla ntthu nnookhuluveleenyu, noonihera ukhalana makhalelo omaana ni ohisima. Iyo phi itthu Yehova ipankilyaawe ukati nithanlilyaawe wiira nikhale Masaahityaawe. Uyo hoonihera wiira naanicuwela saana ni nanikhuluvela wiira hiiva ninaahala waahimeerya atthu akhwaawe wiira uyo phiri Nluku eekhweeli. Ikhanle iparakha yuulupale ukhala Masaahiti a Nluku ni phimaana khaninviriiha ukati wowaahimerya atthu akhwaawe ncina na Yehova ni woonihera wiira citthu cotheene cinootheriyaawe cikhanle cowoothiya. Ukati nimpankeehu iyo, hiiva ninaawoonihera atthu otheene wiira hiiva khweeliini nikhanle Masaahiti a Yehova!—Isaa. 83:18; Aroo. 10:13-15.
KHANINHIYA ULALYEERA MPAKA UMALA ILA ITUNINYA YOMASAKHEELA
14. Citthuni cootteeliha nrima cinhala wiirannya cinweherereehu?
14 Ucuwela citthu cinhala wiirannya uhoolo unaanitteeliha nrima. Nicaalihiyaka ni Yehova, hi ninaaweherera wiira atthu enci yiitthuce ikhweeli ahinaaya masakha moolupale. Hiiva ciicammo ninaatteeliya nacuwelaka wiira hataa ukati wo masakha moolupale, ukati woorika waapinaatamu, atthu akhwaawe pooti ulakela ukhuma mphantte wa Sotwani ni utakaneela nihiiva wiira ninttitthimihe Yehova!—Mite. 13:48.
15-16. Isiyani otheene cihu nihinlamuliyeehu uhiyerera upanka, ni mpaka yaakhani?
15 Niwehereraka uphiya uyo ukatyuuyo, hiiva nihaana nteko woopheela uvara ni ciicammo nihaana iparakha yoovara nteko uhinhala uvariya-tho, ulalyeera ihapari comaana co Umwene wa Nluku ntuninyani motheene. Phimaana, hiiva khaninhiyerera waahimerya atthwaayo wiira ukati woomalamalihiya ila ituninyeela uhaattamela. Uyo ukati wo masakhooyo ayo anaahala ucuwela wiira ihapari comaana caalalyeereehu caakhuma wa Yehova.—Ezek. 38:23.
16 Vano, isiyani otheene cihu inlamuliyeehu upanka? Hiiva nimpheela uhihiya ulalya ihapari comaana nlattu woonicivela nnyo ihaparinnyo, nlattu wowaafenta atthu ni venci-venci nlattu wonfenta Yehova Nluku ni ncina nawe. Hiiva nimpheela uhihiya wiikurumica ulalya mpaka Yehova nohalaawe wiira: “Paahi!”
NCIPO 54 “Ephiro” Yookumi
a Nkutthaano muulupale wo mwaakha waapankiye nihuku 7 mweeri wo Outubro 2023, Nsalau yo Mithukumano Cuulupale yo Masaahiti a Yehova yo Newburgh, Nova Iorque, u Estados Unidos. Mwapheela woona iyo iporokaraameeyo, nwehe ividiyu yo JW Broadcasting® yo Novembro 2023 mphantte 1 ni yo Janeiro 2024 mphantte 2.
b Markus 13:10 Ciicammo, nhina ilapo cotheene ihapari comaana cihaana cilalyeeriyaka toko.
c Nwehe mwaha uneera “A Bíblia Muda a Vida das Pessoas — Fiquei impressionado com as respostas da Bíblia,” nrevistani Sentinela 1 yo Fevereiro yo 2015.
d Luka 6:45 Ntthu omaana nokumiha citthu comaana mmihakhuni co wanrimani wawe, masi ntthu oohinamaana nokumiha citthu coohinamaana mmihakhuni wawe coohinamaana; kontha malakwaawe anooluma citthu cicanre wanrimani wawe.
e Ezekiyeli 33:7 Mi kihoothanla weeva, mwaana a pinaatamu, wiira ukhale nkhalenli o nloko no Isarayeli. Miiva koohimeryaka itthu, weeva uhaana waahimeryaka iyo itthwiiyo. 8 Mi kamwiirelaka ntthu oohinamaana co: ‘Unaahala ukhwa nlattu woopanka citthu cootakhala!’ vano weeva wamaalaka woohinhimerya wiira arukunuse nrimaawe, uyo naahala ukhwa khampa ntthu oohinamaana ni nlattu woottheka wawe. Masi, mi kinhala wuuhukhumu weeva kontha khwile nlattu wawaa.
f Apokalipise 4:11 Thi weeva Yehova Nlukwiihu, unoophwanela uttitthimihiya, uhisimiya ni ukhalana ikuru, kontha uhumpa citthu cotheene ni nlattu wawaa cihokhumelela ni cihumpiya.
g Isaiya 43:10 “Nyuuva nkhanle masaahityaaka,” neera Yehova, iyee, nantekwaaka nthanlalyaaka, wiira nyuuva nkicuwele ni nkaamini, ni ncuweleehe wiira thimivano. Kihinatthi ukhala, khaarivo-tho Nluku ni kakhaleru khanakhumelela-tho nkina. 11 Miiva Yehova, ni kaahikhale mi khaawo moopoli.” 12 “Miiva kiholalyaa, kihoopola ni kiholalyeera nnyo waaryeenyu nhinakhalana Nluku nkhwaawe.” Yehova neera coo: “Nyuuva nnokhala masaahityaaka, ni miiva ki Nluku.”
h Nwehe ilivuru Anuário das Testemunhas de Jeová de 2007, ipaagina 3.
