TLAMACHTIL 20
TLAKUIKALI 67 ToTajtsin Dios kineki ma nitetlapoui
Titetlapouiaj porque titetlasojtlaj
“Achto motetlapouis kuali tlajtoli para nochtin makimatikan” (MAR. 13:10).
NIN TLEN TIMOMACHTISKEJ
Titetlasojtlaj ikinon tiyolpakij ijkuak titetlapouiaj uan tikchiuaj ika nochi toyolo.
1. ¿Tlen otimomachtijkej itech ueyi nechikol tlen mochiua sejse xiuitl?
¡SAPANOUA otipakej porque 2023 otikpixkej toueyi nechikol tlen mochiua sejse xiuitl! a Ompa otechyekiluijkej seki tlamantli tlen tikneltokaj. Noijki otechiluijkej tleka miak ipati moneki titetlapouiskej. Otechyekiluijkej xamo ijkuak kipojpoloskej ueyi Babilonia sekimej ok kinekiskej kitekichiuiliskej toTajtsin Dios. Noijki otechiluijkej metstli noviembre 2023 ayakmo tikijkuiloskej keski hora titetlapouiaj. Nin amo kijtosneki ayakmo miak ipati titetlapouiskej ijkon ken achto otikchiuayaj.
2. ¿Tleka axkan okachi moneki matitetlapouikan? (Marcos 13:10).
2 Axkan okachi moneki matitetlapouikan porque ayakmo miak poliui kipojpoloskej tlen amo kuali. Matimokuayejyekokan tlen okijto Jesús ken titetlapouiskiaj ninmej tonalmej ijkon ken kijtoua Marcos 13:10 (xiktlajtolti). Noijki kajki itech Mateo tlen okijto Jesús. Okijto motetlapouiskia kuali tlajtoli ipan nochi tlaltikpak“achto tlatlamis” (Mat. 24:14). Nin kijtosneki ijkuak kipojpoloskej nochi tlen Satanás kinauatia. Jehová yokitlali “tonal iuan hora” para kichiuas tlen yokijto (Mat. 24:36; 25:13; Hech. 1:7). Axkan okachi ayakmo miak tonal poliui (Rom. 13:11). Pero ok moneki matitetlapouikan hasta ijkuak tlamis nochi tlen amo kuali.
3. ¿Tleka titetlapouiaj?
3 Tinochtin moneki matimotlajtlanikan: “¿Tleka titetlapouiaj kuali tlajtoli?”. Porque titetlasojtlaj. Titetlapouiaj porque tikteititiaj tikpatioitaj kuali tlajtoli uan tikintlasojtlaj akinmej tikintlapouiaj. Noijki okachi tiktlasojtlaj Jehová uan tiknekij tikueyichiuaskej itoka. Axkan matimomachtikan sejse tlamantli.
TITETLAPOUIAJ PORQUE TIKPATIOITAJ KUALI TLAJTOLI
4. ¿Ken timomachiliaj ijkuak ikaj techiluia itlaj tlen techpaktia?
4 Matikilnamikikan ijkuak ikaj otechilui itlaj tlen otechpakti. Xamo se tofamiliar otechilui okipixki ikone noso otechmakakej se tekitl tlen otiknekiayaj tikpiaskej. ¿Ken otimomachilijkej? Xamo otiyolpakej miak uan otiknekiayaj tikinmiluiskej tofamiliares uan toyolikniuan. Noijki otiyolpakej ijkuak otikkakej kuali tlajtoli porque kijtoua tlen iTekiuajkayo toTajtsin Dios.
5. ¿Ken otimomachilijkej ijkuak opejki timomachtiaj Biblia? (Noijki xikinmita fotos).
5 Noijki matimokuayejyekokan ken otimomachilijkej ijkuak opejki timomachtiaj tlen kijtoua Biblia. Otimomachtijkej Jehová techtlasojtla uan kineki matipouikan itech ialtepe. Noijki otimomachtijkej kineki kipojpolos nochi tlen techtlajyouiltia uan kinyolitis tofamiliares itech xochitlali (Mar. 10:29, 30; Juan 5:28, 29; Rom. 8:38, 39; Apoc. 21:3, 4). Nochi non oajsik itech toyolo (Luc. 24:32). Opejki tikintlapouiaj oksekimej porque tikpatioitaj tlen tlamachtia Biblia (noijki xikita Jeremías 20:9).
Sapanoua otipakej ijkuak opejki timomachtiaj tlen kijtoua Biblia ikinon otiknekiayaj nochtin tikintlapouiskej tlen otimomachtijtokaj. (Xikita párrafo 5).
6. ¿Tlen techmachtia tlen okinpanok Ernest uan Rose?
6 Matikitakan tlen okipanok se tokni tlen itoka Ernest. b Ipapa oixpoliuik ijkuak okipiaya majtlaktli xiuitl. Ye okijto: “¿Onimotlajtlaniaya kox oyajki iluikak noso ayakmo kanaj kajki? Onikijtouaya tleka oksekimej chokotsitsintin okatkaj inuan inpapanuan”. Ye mojmostla oyaya kanin otoktoka ipapa. Ompa omotlankuaketsaya uan omotlatlaujtiaya: “ToTajtsin Dios techilui kanin kajki nopapa”. Ijkuak okipiaya 27 xiuitl okiluijkej kox okinekiaya momachtis Biblia uan san niman okiseli. Sapanoua opaki ijkuak okimatki akinmej yoixpolikej amitlaj kimachiliaj uan yetoskia ken kochtokej. Noijki opaki ijkuak okimatki Biblia kijtoua kinyolitiskej akinmej yoixpolikej (Ecl. 9:5, 10; Hech. 24:15). Omoyolseui ijkuak okimatki tlen omotlajtlaniaya. Opakiaya porque omomachtijtoka tlen melauak tlamachtia Biblia. Isiua tlen itoka Rose opejki momachtia uan noijki okipakti tlen tlamachtia Biblia. Satepan 1978 omoapolaktijkej. Opejki kintlapouiaj infamiliares tlen kineltokaj, inyolikniuan uan nochtin akinmej okinkakiayaj. Ernest uan Rose yokinpaleuijkej kanaj 70 makixmatikan Jehová uan yomoapolaktijkej.
7. ¿Tlen tikchiuaskej tla tikpatioitaj tlen tlamachtia Biblia? (Lucas 6:45).
7 Titetlapouiskej ika nochi toyolo tla tikpatioitaj tlen tlamachtia Biblia (xiktlajtolti Lucas 6:45). Timomachiliaj ijkon ken omomachilijkej tokniuan tlen okatkaj achto siglo. Yejuan okijtojkej: “Amo uelis tikkauaskej tikijtoskej tlen yotikitakej uan yotikkakej” (Hech. 4:20). Ikinon tejuan noijki tiknekij tikintlapouiskej nochtin tlen tlamachtia Biblia.
TITETLAPOUIAJ PORQUE TITETLASOJTLAJ
8. ¿Tlen techyolinia matitetlapouikan? (Xikita recuadro “ Xitetlasojtla uan xitlamachti”; noijki xikita foto).
8 Jehová uan Jesús tetlasojtlaj ikinon tejuan noijki tikintlasojtlaj oksekimej (Prov. 8:31; Juan 3:16). Tikinmiknomatij akinmej tlajyouiaj uan amo kixmatij “toTajtsin Dios” (Efes. 2:12). Yejuan kixnamikij miak tlamantli ikinon tikintlapouiaj kuali tlajtoli tlen uelis kinmakixtis. Okachi timochijchikauaskej titetlapouiskej tla titetlasojtlaj uan titeiknomatij. Sapanoua kinpaleuis tlen tlamachtia Biblia. Kinpaleuis makichiakan tlen miak ipati, mapakikan uan noijki uelis kipiaskej “yolilistli tlen melauak” itech xochitlali (1 Tim. 6:19).
Timochijchikauaj titetlapouiskej porque titetlasojtlaj uan titeiknomatij. (Xikita párrafo 8).
9. ¿Tlen tiknekij makimatikan akinmej tikintlapouiaj uan tleka? (Ezequiel 33:7, 8).
9 Tla tikintlasojtlaj oksekimej tikinmiluiskej ayakmo miak poliui toTajtsin Dios kipojpolos nochi tlen amo kuali (xiktlajtolti Ezequiel 33:7, 8). Techyolkokoua ijkuak tikinmitaj tofamiliares tlen amo kitekichiuiliaj Jehová amo kitaj tlen panos satepan maski yotikintlapouijkej. Mateo 24:21 kijtoua: “Ijkuakon peuas ueyi tlajyouilistli. Non amo keman ijkon panoua desde ijkuak okichijchijkej tlaltikpak uan amo keman oksepa ijkon panos”. Tiknekij makimatikan oksekimej tlen panos ijkuak toTajtsin Dios tlaixkomakas. Achto kinpojpolos nochi religiones tlen tlakajkayauaj. Satepan itech Armagedón kipojpolos nochi tlen kiyekana Satanás (Apoc. 16:14, 16; 17:16, 17; 19:11, 19, 20). Tiktlatlaujtiaj Jehová miakej matechkakikan ijkuak tikintlapouiaj uan touan makitekichiuilikan. ¿Tlen kinpanos tofamiliares uan akinmej tikintlapouiaj tla axkan amo techkakij?
10. ¿Tleka ok moneki matitetlapouikan?
10 Yichikome otimomachtijkej xamo Jehová kijtos kintlapojpoluis akinmej moyolkopaskej ijkuak kitaskej kipojpoloskej ueyi Babilonia. Axkan tikajsikamatij tleka ok moneki titetlapouijtoskej. Matimokuayejyekokan tlen axkan tikinmiluiaj oksekimej xamo satepan kilnamikiskej (noijki xikita Ezequiel 33:33). Xamo akinmej axkan tikintlapouiaj satepan kilnamikiskej uan kipejpenaskej touan kitekichiuiliskej Jehová. Ijkon okipanok se tlakatl tlen otlamaluiaya ompa Filipos. Ye opejki tlaneltoka ijkuak chikauak otlalolinki. Axkan miakej amo kinekij techkakiskej. Pero xamo momachtiskej ijkuak kitaskej kipojpoloskej Ueyi Babilonia. Porque non yetos ken chikauak “tlalolinis” (Hech. 16:25-34).
TITETLAPOUIAJ PORQUE TIKTLASOJTLAJ JEHOVA UAN TIKPATIOITAJ ITOKA
11. ¿Ken tikteititiaj Jehová kipia ‘chikaualistli, kinamiki makiueyichiuakan uan matiktlakaitakan’? (Apocalipsis 4:11; noijki xikinmita fotos).
11 Tejuan titetlapouiaj kuali tlajtoli porque tiktlasojtlaj Jehová uan tiktlakaitaj itoka. Tikpatioitaj titetlapouiskej porque ijkon tikueyichiuaj Jehová uan tiktlasojtlaj. Tejuan timokuayejyekouaj san Jehová ‘kipia chikaualistli uan kinamiki makiueyichiuakan uan makitlakaitakan’ (xiktlajtolti Apocalipsis 4:11). ¿Ken tikueyichiuaj toTajtsin Dios uan tiktlakaitaj? Tikmakaj Jehová tlen tikpiaj ijkuak timajxiliaj titetlapouiskej, tiktemakaj tlen tikpiaj para mamotetlapoui noso tikchiuaj okseki tlamantli (Mat. 6:33; Luc. 13:24; Col. 3:23). Sapanoua tiyolpakij tikintlapouiskej oksekimej akin toTajtsin Dios, tlen itoka uan tlen kijtosneki. ¿Tleka?
Tikmakaj Jehová tlen tikpiaj ijkuak timajxiliaj titetlapouiskej, tiktemakaj tlen tikpiaj para mamotetlapoui noso tikchiuaj okseki tlamantli. (Xikita párrafo 11).
12. ¿Ken tikteititiaj tiktlakaitaj itoka Jehová ijkuak titetlapouiaj?
12 Tejuan tiktlasojtlaj Jehová ikinon tiknekij tiktlakaitaskej itoka (Mat. 6:9). Satanás kisokiotia itoka Jehová ijkuak tlakajkayaua ikinon tejuan tiknekij tikchipauaskej (Gén. 3:1-5; Job 2:4; Juan 8:44). Tiknekij tikinmachtiskej akin toTajtsin Dios akinmej kinekij techkakiskej. Tiknekij nochtin makimatikan Jehová tetlasojtla, ye se tekiua yolmelauak uan ijkuak ye tlanauatis kipojpolos nochi tlen techtlajyouiltia. Ijkuakon timoyolseuijtoskej uan nochipa tiyolpakiskej (Sal. 37:10, 11, 29; 1 Juan 4:8). Tiktlakaitaj itoka ijkuak ijkon tikchiuaj. Tiyolpakij porque ijkon tikteititiaj tiiTlaixpantijkauan Jehová. ¿Tleka ijkon tikijtouaj?
13. ¿Tleka tipakij timotokayotiaj tiiTlaixpantijkauan Jehová? (Isaías 43:10-12).
13 Jehová otechpejpenki matiyetokan tiiTlaixpantijkauan (xiktlajtolti Isaías 43:10-12). Yikipia seki xiuitl Cuerpo Gobernante okijto itech se carta: “Sapanoua tikpatioitaj timotokayotiaj tiiTlaixpantijkauan Jehová”. c Matikijtokan tikatej ixpan tekiua porque ikaj okijto otikchijkej itlaj amo kuali uan tiknekij ikaj topatka matlajto. Xamo tikiluiskej ikaj akin kuali tikixmatij uan tikmatij amo tlakajkayaua. Noijki tikmatij oksekimej kixmatij ye amo tlakajkayaua. Ikinon tikmatij uelis kineltokiliskej tlen kijtos para techpaleuis. Jehová noijki otechpejpenki matitetlapouikan uan ijkon nochtin makimatikan san ye melauak toTajtsin Dios. Otechpejpenki porque ye kuali techixmati uan kineltoka kuali tikchiuaskej nin tekitl. Sapanoua tikpatioitaj uan tipakij tikatej tiiTlaixpantijkauan Jehová. Ikinon nochipa timochijchikauaj para tiktematiltiskej itoka. Noijki tikinpaleuiaj oksekimej ayakmo makineltokakan ijkuak kijtouaj toTajtsin Dios tlakajkayaua. Ijkon tikteititiaj tiiTlaixpantijkauan Jehová (Sal. 83:18; Rom. 10:13-15).
TITETLAPOUISKEJ HASTA IJKUAK JEHOVÁ MAKIJTO AYAKMO MATITETLAPOUIKAN
14. ¿Tleka sapanoua tiyolpakiskej?
14 ¡Techtlajtlachialtis tlen panos satepan! Tiktlatlaujtiaj Jehová matechpaleui matitetlapouikan, porque xamo ok miakej techkakiskej ijkuak ayamo peua ueyi tlajyouilistli. Sapanoua tiyolpakiskej maski yetos ueyi tlajyouilistli. Porque miakej ayakmo kikauiliskej Satanás makinyekana uan touan kiueyichiuaskej Jehová (Hech. 13:48).
15, 16. ¿Tlen ok moneki tikchijtoskej uan hasta keman ijkon tikchiuaskej?
15 Pero axkan moneki tikchiuaskej se tekitl miak ipati. Tikpatioitaj titetlapouiskej ipan nochi tlaltikpak iTekiuajkayo toTajtsin Dios. Noijki tikinmiluiaj oksekimej ayakmo miak poliui kipojpoloskej nochi tlen kiyekana Satanás. Ijkuak ajsis tonal tlaixkomakas toTajtsin Dios, kitaskej ye otechnauati matiktematiltikan iTlajtol (Ezeq. 38:23).
16 ¿Tlen ok tiknekij tikchijtoskej? Tejuan tikpatioitaj tikinmiluiskej oksekimej kuali tlajtoli porque tikintlasojtlaj. Noijki ijkon tikchiuaj porque tiktlasojtlaj Jehová uan tikpatioitaj itoka. Tejuan ok titetlapouiskej uan tikchiuaskej ika nochi toyolo hasta ijkuak Jehová kijtos ayakmo matitetlapouikan.
TLAKUIKALI 54 “Nin ojtli”
a Nechikol tlen mochiua sejse xiuitl omochi 7 de octubre 2023. ITlaixpantijkauan Jehová okichijkej ompa Estados Unidos kanin kinchiuaj uejueyij nechikolmej ompa Newburgh Nueva York. Non tlamachtil okiski itech JW Broadcasting uan okitlajkoxelojkej. Tlajko okiski noviembre 2023 uan ok tlajko okiski enero 2024.
b Xikita revista Akin Tetlapouijtok 1 de febrero 2015 kanin kijtoua “Biblia okinpatili innemilis: Onechtlajtlachialti kuali tlanankilistli tlen kitemaka Biblia”.
