1. Ino ty raha nianarantika tamy i fivoriagne fatao isan-taogne tamy 2023-oy?

 NAHAREY fagnazavagne vaovao miomba ty raha inoantika naho fitaliliagne miomba ty fanompoagne tika tamy i fivoriagne fatao isan-taogne tamy 2023-oy. a Nianarantikagne ohatse tie va’e mbe hisy ndaty ila’e hanagne fahafahagne hiarake amo o vahoa i Jehovah-o afara ty handringanagne i Babilona Lahibey. Natalily antika ka tie tsy hanao tatetse sasa miomba ty lera, ty fitaovagne napetra’e, ty video naho ty fiheregnagne mitilike natao’e o mpitorio nanomboke tamy Novambra 2023. Midika vao zay tie tsy lahibey ndra tsy meke sasa i asa fitoriagney? Tsy izay!

2. Nagnino i asa fitoriagney ro vao mainke mihameke avao arakarake ty andehana o fotoagneo? (Marka 13:10)

² Arakarake ty andehana o fotoagneo ty mahameke i asa fitoriagney. Fa nagnino? Satria fa kedekede ty sisa le ho avy i fara’ey. Dineho moa ty raha nirehafe i Jesosy mialoha miomba ty asa fitoriagne amy ty andro fara’e. (Vakio ty Marka 13:10.) Arake ty tantaraegne amy Matio ao, le nirehake ty Jesosy tie hotoriegne amy ty tane toy iaby i talily soay aloha ty hiavia ty “fara’e.” (Mat. 24:14) Ty fara ty tontolo raty i Satana toy ty tea’e horehafegne. Fa nifarita i Jehovah mialoha ‘ty andro naho ty lera’ hisehoa izay. (Mat. 24:36; 25:13; Asa. 1:7) Vao mainke magnarine o fotoagne iohoe tika isake tie tapetse  ty andro raike. (Rom. 13:11) Mila manohy mitory avao tika amparake ty hiavia ty fara’e.

3. Ino ty mandrisike antika hitory?

³ Naho fa manao fanompoagne tika, le soa naho misaintsaigne ty fagnonteneagne toy: Nagnino tika ro mitory i talily soay? Tsotra ty vale’e: Ty hatea ty mandrisike antika hitory. Noho ty hateantika i talily soay, ty hateantika o ndatio, lohotsie fa ty hateantika i Jehovah naho ty tahina’e ty anto’e mahavy antika manao i asa fitoriagney. Andao hodinehentika tsikiraidraike reo.

MITORY TIKA SATRIA TEA I TALILY SOAY

4. Ino ty tsapantika naho fa maharey vaovao soa?

⁴ Tadidi’o vao ty raha nitsapa’o tamy tie irehe naharey vaovao soa, ohatse tamy tie irehe naharey tie nisy tamy ty keleia’areo niterake ndra nisy ndaty nagnomey asa azo? Tsy isalasalagne fa tsy niligne’o ty hirehake o vaovao soa reo tamy ty longo’o ndra ty nama’o. Nahatsapa hoe izay ka vao rehe tamy tie irehe naharey i talily soa tena mahafale miomba i Fanjakagneỳ?

5. Ino ty nitsapa’o tamy tie irehe nianatse voaloha’e ty hamarenagne agnate Baiboly ao? (Henteo i sarey.)

⁵ Eretsereto moa ty raha nitsapa’o tamy tie irehe nianatse voaloha’e ty hamarenagne agnate Baiboly ao. Nianara’o tao tie tea azo i Rae’o an-dagnitse agney, le tea’e ho agnisa ty keleia’e rehe sady hanompo aze. Nampitamà azo ka reke tie hamaragne ty alahelo naho ty fijaleagne vaho hamelogne indraike ze longo’o fa nimate amy i tontolo vaovaoy ao. Mbe misy fampitamagne hafa ka ankoatse ireo. (Mar. 10:29, 30; Jaona 5:28, 29; Rom. 8:38, 39; Apok. 21:3, 4) Nanohigne ty fo’o o hamarenagne reo. (Lioka 24:32) Nitea’o ty hamarenagne sarobily nianara’o, le nirie’o ka ty hirehake aze amy ty hafa!​—Ampitahao amy ty Jeremia 20:9.

6. Ino ty raha ianara’o boake amy ty tantara i Ernest mirovaly?

⁶ Dineho ty fitantaragne toy. Nimate ty  baba ty rahalahy raike atao tihoe Ernest b tamy tie ireke ni-folo taogne teo ho eo. Hoe reke: “Nieretseretse raho tie: ‘Nandeha an-dagnitse agne vao reke sa lelia’e ho mate nainai’e?’ Nite hanahake o ajaja ila’e mbe velon-draeo raho.” Nandeha tsy tapake tan-kibory agne ty Ernest, le nandohaleke tamy i kiborin-drae’ey eo sady nivavake tie: “Ajafady Andrianagnahare, mba teako ho fantatse tie aia ty misy i babako.” Nisy nanasa hianatse Baiboly ty Ernest, 17 taogne tafara ty nimateza i baba’e le nagneke reke. Nahafale aze ty nahafantatse tie tsy misy raha rendre’e o mateo fa manahake o ndaty miroro vata’eo. Fale ka reke naho fa nahafantatse i fampitamà ty Baiboly miomba ty famelomagne ty matey. (Mpito. 9:5, 10; Asa. 24:15) Nitrea’e avao ty vale i fagnonteneagne nampivali-doha aze tagnate ty taogne maro rey tamy ty fara’e! Tena nahafale i Ernest ty hamarenagne nianara’e tagnate Baiboly ao. Niarake nianatse tama’e ka ty Rose vali’e, le tena nitea’e ka ty raha nianara’e. Natao badisa iareo tamy 1978. Tena nazoto nitory tamy ty keleia’e, ty nama’e naho ty ndaty hafa liagne amy ty hamarenagne sarobily nianara’e iareo. Voka’e, nahavita nagnampe ndaty 70 mahery mba handroso amy ty badisa ty Ernest naho i Rose.

7. Ino ty hiseho naho mamahatse am-pontika ao ty hateantika ty hamarenagne agnate Baiboly ao? (Lioka 6:45)

⁷ Mazava areke fa naho fa mamahatse am-pontikagne ao ty hateantika ty hamarenagne, le tsy ho vitantika ty tsy hizara aze amy ty hafa. (Vakio ty Lioka 6:45.) Manahake ty nitsapa i mpiana i Jesosy tamy ty taonjato voaloha’e rey ty tsapantika. Hoe iareo: “Tsy azo’ay atao ty tsy hirehake sasa miomba ze raha nihita’ay naho nirei’ay.” (Asa. 4:20) Tena teantika ty hamarenagne le teantika ty hirehake aze amy ty ndaty maro arake ze azo atao.

MITORY TIKA SATRIA TEANTIKA O NDATIO

8. Ino ty mandrisike antika hitory i talily soay amy ty hafa? (Henteo ty efajoro tihoe “ Atorò fa Tea’o o Ndatio le Ampianaro Iareo.”) (Henteo i sarey.)

⁸ Tea o ndatio manahake i Jehovah naho i Ana-dahi’ey tika. (Ohab. 8:31; Jaona 3:16) Iferenaignantika ka ze ndaty tsy ‘managne an’Andrianagnahare’ naho ‘tsy managne raha tamaegne.’ (Efes. 2:12) Hoe agnate ty lavake laleke o ndatio naho fa miatreke olagne, le i talily soa miomba i Fanjakagney ty taly indesentika magnavotse iareo. Noho itika tea sady mitretré iareo ty mahavy antika mikezake manao ze azo atao mba hitoriagne i talily soay amy iareo. Magnomey raha tamaegne iareo o hafatse sarobily iohoe sady magnampe iareo  hanagne fiaignagne soa amy hinane zao naho hagnomey iareo i ‘tena fiaignagney’ ndra i fiaignagne nainai’e amy i tontolo vaovaon’Andrianagnaharey ao.​—1 Tim. 6:19.

9. Ino ty fampitaogne rehafentika amo o ndatio, le ino ty anto’e? (Ezekiela 33:7, 8)

⁹ Ty hateantika o ndatio ka ty mahavy antika mampitao iareo tie fa antitotse ty fara ty tontolo raty toy. (Vakio ty Ezekiela 33:7, 8.) Mitretré ty mpiara-belogne amantika naho ty longontika tsy vavolombelogne tika. Mbe manohy ty fiaigna iareo andavanandro avao iareo satria nofy iareo tie “hisy haoreagne lahibey mbe tsy nisy nanahake aze nanomboke ty nisia o ndatio, hatrake amy izao sady tsy hisy sasa ka.” (Mat. 24:21) Teantika ho fanta iareo tie ino ty raha hiseho amo o fotoam-pitsaràgne iohoe. Voaloha’e horavàgne ty fivavahan-diso iaby, le afara izay haringagne ty tontolo raty toy amy i Haramagedonay. (Apok. 16:14, 16; 17:16, 17; 19:11, 19, 20) Mivavake ka tika mba ho maro arake ze azo atao ty ndaty hitsanogne i fampitaoagney ndra hanapan-kevetse ty hanompo i Jehovah amy hinane zao. Faie akore ty miomba i ndaty tsy mitsanogne antikagne amy izao rey, agnisa izay ty keleiantika?

10. Nagnino ro meke o fampitaoagne iohoe?

¹⁰ Arake ty nihazavaegne tamy i lahatsoratse taloha itoỳ, le va’e hovonje i Jehovah ze ndaty miova, le manjare mino aze naho fa mahatrea ty fandringanagne i Babilona Lahibey. Naho izay areke le vao mainke toko’e hampitao iareo tika ty amy izao. Tadidio zao: Va’e ho tsiaro iareo amy ze fotoagne zay ty raha rehafentikagne amy iareo amy izao. (Ampitahao amy ty Ezekiela 33:33.) Va’e ho tsiaro iareo i fampitaoagne nirehafentika tamy iareoy, le izay ty hahavy iareo te hanompo i Jehovah miarake amantika, naho ohatse mbe misy fotoagne. Niova i mpiambegne gadra ta Filipy agney tafara i “horohoron-taney”, le va’e hiova hoe izay ka ty ndaty ila’e tsy mandrambe amy izao naho fa hahatrea ty fandravàgne i Babilona Lahibey.​—Asa. 16:25-34.

MITORY TIKA SATRIA TEANTIKA TY JEHOVAH NAHO TY TAHINA’E

11. Akore ty fomba agnomeantika engegne naho fagnajagne vaho hery i Jehovah? (Apokalypsy 4:11) (Henteo i sarey.)

¹¹ Ty anto’e tena lahibey mahavy antika mitory i talily soay, le noho itika tea i Jehovah Andrianagnahare naho i tahina’e masigney. Heverentika ho agnisa ty fomba ideragne i Andrianagnahare teantikay ty asa fanompoagne ataontika. (Vakio ty Apokalypsy 4:11.) Magneke tika fa fagneva ty hahazo engegne naho fagnajagne vaho hery boake amo o vahoa’e tsy mivalikeo ty Jehovah  Andrianagnahare. Magnomey engegne naho fagnajagne aze tika naho fa mirehake amy ty hafa ty porofo magnamaregne fa ireke ty “namorogne ze kila raha” sady nampisy antika. Magnomey ty herintika ho aze tika naho fa mampiasa ty fotoantika, ty herintika naho ty fanagnantika amy ty fanompoagne arakarake ty raha iaignantika. (Mat. 6:33; Lioka 13:24; Kol. 3:23) Naho atao amy ty rehake hafa, le mirehake ty miomba an’Andrianagnahare tika satria teantika reke. Tsapantika ka fa andraikintika ty mirehake miomba ty tahina’e naho ty dika izay amy ty hafa. Fa nagnino?

12. Akore ty agnamasinantika ty tahina i Jehovah amy i fanompoagney ey?

¹² Ty hateantika i Jehovah ty mandrisike antika hagnamasigne i tahina’ey. (Mat. 6:9) Teantika areke ty hirehake amo o ndatio tie diso ty raha nirehafe i Satana miomba i Jehovah. (Gen. 3:1-5; Joba 2:4; Jaona 8:44) Naho fa manompo tika, le teantika ty hirehake amy ze ndaty te hitsanogne antika tie ia maregne ze o Jehovah zao sady manao akore ty toetse’e. Teantika ho fanta o ndatio tie hatea ty toetse’e tena lahibey sady ara-drare’e naho maregne ty fitondra’e. Teantika ho fanta iareo ka tie tsy ho ela i Fanjakà’ey le hagnafake o fijaleagneo sady hagnomey fiadanagne naho fahasambaragne hoahy o ndatio. (Sal. 37:10, 11, 29; 1 Jaona 4:8) Magnamasigne ty tahina i Jehovah tika naho fa miaro ty laza’e amy i fanompoagney ey. Tena mahafale antika ka ty mahafantatse tie mifagnarake amy ty agnaragne indesentika ty fomba fiaignantika. Nagnino tika ro mirehake izay?

13. Nagnino ro voninahitse ho antika ty tokavegne tihoe Vavolombelo i Jehovah? (Isaia 43:10-12)

¹³ Finily i Jehovah ho “vavolombelo’e” tika. (Vakio ty Isaia 43:10-12.) Nisy rehake hoe izao ty taratasy boake tamy ty Filan-keve-pitantanagne,  taogne tsiampeampe lasa zay: “Voninahitse lahibey ho antika ty tokavegne tihoe Vavolombelo i Jehovah.” c Fa nagnino? Itoy misy ohatse. Andao hatao tihoe nasara o ndaty nanao raha raty rehe, le mipay ndaty ho vavolombelo’o. Azo antoke tie ndaty fanta’o naho atokisa’o vaho managne laza soa ty hofiliane’o satria izay ty atokisa o ndatio. Naho fa nifily antika ho Vavolombelo’e ka ty Jehovah, le natoro’e tie fanta’e soa tika sady atokisa’e fa hahavita hampahafantatse tie Andrianagnahare maregne reke. Voninahitse lahibey ho antika tihoe Vavolombelo’e, le manao ze azo atao tika mba hampahafantaragne ty tahina’e naho hagnaporofoagne tie tsy maregne ty fagnaratiagne aze. Naho manao izay tika, le magnaporofo tie Vavolombelo i Jehovah vata’e!​—Sal. 83:18; Rom. 10:13-15.

HITORY AVAO TIKA AMPARAKE TY HIAVIA TY FARA’E

14. Ino ty raha mahafale hiseho tsy ho ela?

¹⁴ Fa tsy lignentika ty hahatrea ty raha hiseho tsy ho ela! Mitamà tika fa hitahy antika ty Jehovah, le ho maro ty ndaty hagneke ty hamarenagne aloha ty hanomboha i haoreagne lahibeỳ. Mahafale antika ka ty mahafantatse fa ndra tie agnate i fotoan-tsarotse amy i haoreagne lahibeỳ ao aza, le mbe ho maro ty ndaty hiala amy i Satana le hiarake hidera i Jehovah amantikagne!​—Asa. 13:48.

15-16. Ino ty raha toko’e hataontikagne avao le hatrake ombia?

¹⁵ Amparake ty hiavia izay, le misy asa toko’e hataontikagne. Tsy hiheregne sasa o asa iohoeke, tsy inogne zay fa ty fitoriagne ty talily soa miomba i Fanjakàn’Andrianagnaharey magneneke ty tane toy. Mila mampitao lognandro o ndatio miomba ty raha hiseho areke tika. Mila ampahafantaregne iareo tie tena fa mihamarine ty fara ty tontolo raty toy. Le naho fa avy amy izay o fotoam-pitsaràgne iohoe, le ho fanta iareo fa boake amy i Jehovah i hafatse nitorientikagney.​—Ezek. 38:23.

¹⁶ Tapa-kevetse ty hanao inogne areke tika? Noho ty hateantika i talily soay vaho o ndatio, lohotsie fa i Jehovah naho ty tahina’e, le tapa-kevetse ty hazoto hitory naho hafana fo lognandro tika sady hanao izay tsy misy hatak’andro amparake ty hisaontsia i Jehovah tie: “Vita i asa fitoriagney!”