1. Ncinzi ncotwakaiya amuswaangano waamwaka wamu 2023?

 AMUSWAANGANO waamwaka wamu 2023, a twakamvwa kusalazyigwa kwatwaambo tukkomanisya muzintu zimwi nzyotwakali kusyoma alimwi twakamvwa zyakwaambilizya zimwi zikulwaizya kapati kujatikizya mulimo wesu wakukambauka. Mucikozyanyo, twakaiya kuti bantu bamwi ambweni bayooba acoolwe cakuba kulubazu lwabantu ba Jehova nociba ciindi Babuloni Mupati aakumana kunyonyoonwa. Alimwi twakaiya kuti kutalikila mu November 2023, basikumwaya ba Bwami tabacinooyandiki kupa lipooti yamilimo yoonse njobakabeleka mumulimo wamumuunda. Sena kucinca ooku kwaamba kuti mulimo wesu wakukambauka tauyandiki kapati alimwi taubindide kwiinda kaindi? Peepe tacili boobo!

2. Nkaambo nzi mulimo wesu wakukambauka ncoubindide mbobuceda? (Mk. 13:10)

² Mbobuceda, mulimo wesu wakukambauka wiindila buya kubinda. Nkaambo nzi? Nkaambo kakuti mamanino aswena afwaafwi kapati. Amubone Jesu ncaakasinsima kujatikizya mulimo wakukambauka kumazuba aamamanino. (Amubale Marko 13:10.) Kulugwalo lwa Matayo, Jesu wakaamba kuti makani mabotu ayookambaukwa munyika yoonse “mamanino” kaatanasika. (Mt. 24:14) Aawa Jesu wakali kwaamba mamanino abweende bwazintu bwa Saatani bubyaabi. Jehova wakabikka kale “buzuba alimwi aciindi” zintu eezyi noziya kucitika. (Mt. 24:36; 25:13; Mil. 1:7) Mbobuceda tuswena kubuzuba oobo. (Rom. 13:11) Pele calino, atuzumanane buyo kukambauka kusikila mamanino akasike.

3. Ncinzi citukulwaizya kukambauka?

 ³ Ngooyu mubuzyo uuyandika kapati toonse ngotweelede kukkalila aansi kuyeeya: Nkaambo nzi ncotukambauka makani mabotu? Bwiinguzi bufwaafwi mbwakuti, luyando ndolutukulwaizya kukambauka. Ciindi notukambauka tutondezya kuti tulaayanda makani mabotu, bantu alimwi kwiinda zyoonse tulamuyanda Jehova azina lyakwe. Lino amuleke tuzilange-lange zintu eezyi cimwi acimwi kucigama.

TULAKAMBAUKA NKAAMBO TULAAYANDA MAKANI MABOTU

4. Ino tucita buti ciindi notwatambula mulumbe uukkomanisya?

⁴ Amuyeeye mbomwakalimvwa ciindi cintu cimwi cibotu nocakacitika mubuumi bwanu. Ambweni munamukwasyi uumwi wakaba amwana naa muntu umwi wakamupa mulimo ngomwakali kuyanda. Cakutadooneka, mwakaliyandide kwaambila banamukwasyi alimwi abalongwe kujatikizya mulumbe ooyo uukkomanisya. Sena cintu cili boobu cakacitika ciindi nomwakamvwa mulumbe wiinda kubota, nkokuti makani mabotu aa Bwami bwa Leza?

5. Ino mwakalimvwa buti nomwakaiya kasimpe ciindi cakusaanguna ikajatikizya Bwami bwa Leza? (Amubone azifwanikiso.)

⁵ Amuyeeye mbomwakalimvwa nomwakaiya kasimpe ikazwa mu Jwi lya Leza ciindi cakusaanguna. Mwakajana kuti Uso wanu wakujulu ulamuyanda kapati, uyanda kuti mube cibeela camukwasyi wabakombi bakwe, wakasyomezya kumana kucisa alimwi akupenga, akuti mulakonzya kuba abulangizi bwakuyoobonana abayandwa banu bakafwa munyika mpya, mpoonya akuyootambula zilongezyo zimbi zinji. (Mk. 10:​29, 30; Joh. 5:​28, 29; Rom. 8:​38, 39; Ciy. 21:​3, 4) Nzyomwakaiya zyakamukkomanisya kapati. (Lk. 24:32) Mwakali kuziyanda nzyomwakali kwiiya, alimwi mwakali kuyanda kubaambila boonse kujatikizya nzizyo!—Amweezyanisye Jeremiya 20:9.

6. Ino ncinzi ncomwiiya kucakuluula caba Ernest aba Rose?

⁶ Amumvwe cakuluula eeci. Mukwesu wazina  lya Ernest b wakajisi myaka yakuzyalwa iili 10 ciindi bausyi nobakafwa. Ba Ernest bakaamba kuti: “Ndakali kulibuzya kuti: ‘Sena baunka kujulu? Naa sena kwamana bafwidilila?’ Ndakali kubamvwida munyono bana ibakajisi bausyi.” Ba Ernest ciindi aciindi bakali kuunka kunamaumbwe, bakali kufwugama acuumbwe cabausyi akutalika kupaila kuti: “Akaka Leza, ndiyanda kuzyiba nkobabede bataata.” Nokwakainda myaka iili 17 kuzwa ciindi bausyi nobakafwa, ba Ernest bakazumina kutalika kwiiya Bbaibbele. Bakakkomana kuzyiba kuti bafwide tabazi cintu cili coonse, bali mbuli kuti baloona, alimwi akuti Bbaibbele lisyomezya kuti kuyooba bubuke kumbele. (Muk. 9:​5, 10; Mil. 24:15) Eelo kaka cilakkomanisya kuti bakabujana bwiinguzi bwamibuzyo yakali kubakatazya kwaciindi cilamfwu! Ba Ernest bakakkomana kapati kujatikizya kasimpe kamu Bbaibbele nkobakali kwiiya. Bakaintu babo ba Rose abalo bakatalika kwiiya Bbaibbele alimwi bakazikkomanina nzyobakali kwiiya. Boonse bobilo bakabbapatizyigwa mu 1978. Cabusungu bakali kubakambaukila banamukwasyi, balongwe alimwi abamwi ibakalibambilide kuswiilila. Eeci capa kuti ba Ernest alimwi abakaintu babo bagwasye bantu bainda ku 70 kumuzyiba Jehova alimwi akubbapatizyigwa.

7. Ncinzi cicitika ciindi notuzikkomanina zintu nzyotwiiya kuzwa mu Bbaibbele? (Luka 6:45)

⁷ Cakutadooneka, kuti katuzikkomanina nzyotwakaiya kuzwa mu Bbaibbele, tuyooyanda kwaambila bamwi kujatikizya nzizyo. (Amubale Luka 6:45.) Tulimvwa mbobakalimvwa basikwiiya ba Jesu bamumwaanda wamyaka wakusaanguna ibakati: “Tatukonzyi kuleka kwaamba zintu nzyotwakabona akumvwa.” (Mil. 4:20) Tulakayanda kapati kasimpe cakuti tuyanda kwaambila bantu banji.

TULAKAMBAUKA AKAAMBO KAKUTI TULABAYANDA BANTU

8. Ncinzi citukulwaizya kwaambila bamwi makani mabotu? (Amubone kabbokesi kakuti “ Amubayande Bantu—Amubagwasye Kuba Basikwiiya.”) (Amubone acifwanikiso.)

⁸ Mbubwenya mbuli Jehova alimwi a Mwanaakwe, tulabayanda bantu. (Tus. 8:31; Joh. 3:16) Tulabafwida lweetelelo aabo ‘banyina Leza’ alimwi abaabo ‘banyina bulangizi.’ (Ef. 2:12) Balijisi mapenzi manji, mpoonya swebo tulijisi lugwasyo ndobayandika, nkokuti makani mabotu aa Bwami bwa Leza. Luyando ndotujisi kubantu alimwi alweetelelo lutukulwaizya kucita kufwumbwa ncotukonzya kutegwa tubaambile makani mabotu. Ciindi nobaatambula makani mabotu, alakonzya kubapa kuba abulangizi, kubagwasya kujana lukkomano lino  alimwi akubapa coolwe cakuyoopona “buumi bwini-bwini,” nkokuti buumi butamani munyika mpya ya Leza.—1Tim. 6:19.

9. Ino nkucenjezya kuli buti nkotwaambila bantu kujatikizya zyakumbele? Alimwi nkaambo nzi? (Ezekieli 33:​7, 8)

⁹ Luyando ndotujisi kubantu lutukulwaizya kubacenjezya kujatikizya mbwaaswena afwaafwi mamanino aabweende bwazintu oobu bubyaabi (Amubale Ezekieli 33:​7, 8.) Tulabafwida lweetelelo bantu boonse, kubikkilizya abanamukwasyi batabelekeli Jehova. Bantu banji balapona kabatazyi ciboola kumbele, nkokuti “mapenzi mapati aatanacitikide kuzwa kumatalikilo aanyika kusikila sunu, alimwi kunyina naayooba limbi pe.” (Mt. 24:21) Tuyanda kuti bazyibe ciyoocitika ciindi calubeta. Cakusaanguna bukombi bwakubeja buyoonyonyoonwa mpoonya buyootobelwa aakunyonyoonwa kwabweende bwazintu oobu bubyaabi lya Armagedoni. (Ciy. 16:​14, 16; 17:​16, 17; 19:​11, 19, 20) Tupailila kuti bantu banji bayooswiilila nzyotubaambila akusala kutusangana kubelekela Jehova. Pele ino mbuti kujatikizya baabo batatuswiilili lino, kubikkilizya abanamukwasyi?

10. Nkaambo nzi ncociyandika kapati lino kuzumanana kucenjezya bantu kujatikizya zintu ziyoocitika ino-ino?

¹⁰ Kweelana acibalo cainda, kweelede kuti nkuyanda kwa Jehova kuyoobafwutula bantu ibayootalika kusyoma nguwe baakubona kunyonyoonwa kwa Babuloni Mupati. Kuti naa mboobo, nkokuti cilayandika kapati lino kuzumanana kubacenjezya. Amubone kaambo aaka: Nzyotubaambila lino balalangilwa kuyooziyeeya caakusika ciindi eeco. (Amweezyanisye Ezekieli 33:33.) Ambweni bayookuyeeya kucenjezya nkobakamvwa kuli ndiswe akukulwaizyigwa kutusangana mubukombi busalala kacitanamana ciindi. Mbubwenya mbuli mulindizi wantolongo ku Filipi iwakacinca nowakamana kucitika “muzuzumo wanyika mupati,” ambweni aabo bataswiilili lino bayoocinca baakubona kunyonyoonwa kuyoosya kwa Babuloni Mupati.—Mil. 16:​25-34.

TULAKAMBAUKA NKAAMBO TULAMUYANDA JEHOVA ALIMWI AZINA LYAKWE

11. Mbuti mbotupa Jehova bulemu, lulemeko alimwi anguzu? (Ciyubunuzyo 4:11) (Amubone azifwanikiso.)

¹¹ Kaambo kayandika kapati ncotukambaukila makani mabotu nkakuti tulamuyanda Jehova Leza alimwi azina lyakwe lisalala. Mulimo wakukambauka tuubona kuba nzila yakutembaula Leza. (Amubale Ciyubunuzyo 4:11.) Camoyo woonse tulazuminana amajwi aakuti: “Uleelela, Jehova, O Leza wesu, ikutambula bulemu alulemeko alimwi anguzu.” Tulamupa bulemu alimwi alulemeko ciindi notwaambila bamwi bumboni butondezya kuti ‘nguwakalenga zintu zyoonse’ alimwi akuti tulapona nkaambo nguutupa buumi. Tulamupa Jehova  nguzu zyesu notubelesya ciindi cesu, buumi alimwi azintu nzyotujisi kutegwa tukambauke kusikila mpotugolela. (Mt. 6:33; Lk. 13:24; Kol. 3:23) Munzila imwi, inga twaamba kuti tulakukkomanina kwaamba kujatikizya Leza ngotuyanda. Alimwi tulakulwaizyigwa kwaambila bamwi zina lyakwe ancolyaamba. Nkaambo nzi?

12. Mbuti mbotulisalazya zina lya Jehova notuli mumulimo wamumuunda?

¹² Luyando ndotujisi kuli Jehova lulatukulwaizya kusalazya zina lyakwe. (Mt. 6:9) Eeci caamba kuti tuliyandide kwaambila bamwi kuti zintu zibyaabi nzyaakaamba Saatani kujatikizya Jehova tazili zyamasimpe pe. (Matl. 3:​1-5; Job. 2:4; Joh. 8:44) Ciindi notuli mumulimo wakukambauka tulayandisya kumuzyibya Jehova kuli baabo boonse ibalibambilide kuswiilila alimwi tulabaambila bwini mbwabede. Tuyanda kuti boonse bazyibe kuti bube bupati mbwajisi nduyando, akuti bweendelezi bwakwe buliluleme, alimwi akuti Bwami bwakwe ino-ino buyakwaamana mapenzi woonse akuleta luumuno alukkomano kubantu. (Int. 37:​10, 11, 29; 1Joh. 4:8) Ciindi notwaambila bantu zintu eezyi zijatikizya Jehova mumulimo wamumuunda, tusalazya zina lyakwe. Alimwi tulikkomene akaambo kakuti tucita cintu ncotweelede kucita mbotuli Bakamboni ba Jehova. Mubuti?

13. Nkaambo nzi ncotukkomene kwiitwa kuti Bakamboni ba Jehova? (Isaya 43:​10-12)

¹³ Jehova wakatusala kuti tube “bakamboni” bakwe. (Amubale Isaya 43:​10-12.) Myaka misyoonto yainda, lugwalo lumwi luzwa ku Kabunga Keendelezya lwakaamba kuti: “Cintu cipati cikonzya kutupa kukkomana nkwiitwa kuti Bakamboni ba Jehova.” c Nkaambo nzi ncocili boobo? Atubone cikozyanyo. Amweezeezye kuti mwatamikizyigwa kucita cintu cibyaabi. Aboobo muyandika muntu umwi kuti amwiiminine  kwaamba kuti makani woonse ngobamwaamba ngakubeja akuti muli muntu uuli kabotu uutakonzyi kucita cintu cili boobo. Ino nguni ngomukonzya kusala kuti amwiiminine? Tacidoonekwi buya kuti inga mwasala muntu ngomuzyi kabotu, ngomusyoma alimwi uujisi mpuwo mbotu kutegwa bantu bazisyome nzyakonzya kwaamba kujatikizya ndinywe. Kwiinda mukutusala kuba Bakamboni bakwe, Jehova utondezya kuti ulituzyi kabotu alimwi ulatusyoma kuti tulakonzya kwaambila bamwi kuti ngo Leza wakasimpe alikke. Tulikkomene kapati kuba Bakamboni bakwe, aboobo tulacibelesya coolwe cili coonse ncotwajana kuzyibya bantu zina lyakwe alimwi akumwiiminina kuzintu zyoonse zibyaabi nzyobaamba bantu kujatikizya nguwe. Munzila eeyi, tutondezya kuti tucita ncolyaamba zina lyesu: Tuli Bakamboni ba Jehova.—Int. 83:18; Rom. 10:​13-15.

TUYOOZUMANANA KUKAMBAUKA KUSIKILA KUMAMANINO

14. Ino nzintu nzi zikkomanisya ziyoocitika ino-ino kumbele?

¹⁴ Eelo kaka tulayandisisya kuzyiba ziyoocitika ino-ino kumbele! Kwiinda mukulongezyegwa a Jehova, tulaalusyomo lwakuti bantu banji bayootusangana kaatanatalika mapenzi mapati. Alimwi tulikkomene kapati kuti nociba ciindi cikatazya kapati camapenzi mapati, bantu banji bayoozwa munyika ya Saatani akutusangana kutembaula Jehova!—Mil. 13:48.

15-16. Mulimo nzi ngotweelede kuzumanana kucita? Alimwi kusikila lili?

¹⁵ Calino, kuli mulimo ngotweelede kucita, imulimo uutakaindulukwi. Tujisi coolwe cakukambauka makani mabotu aa Bwami bwa Leza nyika yoonse. Aciindi nciconya tweelede kuzumanana kucenjezya bantu kujatikizya zintu ziyoocitika ino-ino. Bantu beelede kuzyiba kuti mamanino aabweende bwazintu oobu bubyaabi alaafwaafwi kapati. Mpoonya ciindi calubeta caakusika, bayoozyiba kuti mulumbe ngotwakali kukambauka wakali kuzwa kuli Jehova Leza.—Ezk. 38:23.

¹⁶ Aboobo, ino makanze nzi ngotweelede kuba angawo? Kwiinda mukukulwaizyigwa aluyando, nkokuti kuyanda makani mabotu, luyando ndotujisi kubantu alimwi kwiinda zyoonse, luyando ndotujisi kuli Jehova Leza azina lyakwe, tuyoozumanana kukambauka cabusungu alimwi cakubinda kusikila Jehova akaambe kuti, “Kwamana!”