1. Hi dyondze yini eka nhlengeletano ya lembe ni lembe ya 2023?

 EKA nhlengeletano ya lembe ni lembe ya 2023, a hi byeriwe hi ta ku antswisiwa ko tsakisa ka tidyondzo ta hina naswona hi twe switiviso swo tsakisa mayelana ni ntirho wa hina wo chumayela. Hi xikombiso, hi dyondze leswaku vanhu van’wana va nga ha kuma nkarhi wo yima na vanhu va Yehovha hambi ku ri endzhaku ka loko Babilona Lonkulu a lovisiwile. Hi tlhele hi dyondza leswaku ku sukela hi November 2023, vahuweleri va Mfumo a va nge he boheki ku vika ntirho wa vona hinkwawo wa nsimu. Xana ku cinca koloko ku endla leswaku ntirho wa hina wo chumayela wu nga ha vi wa nkoka naswona wu nga ha vi wa xihatla? Doo!

2. Hikwalahokayini ntirho wa hina wo chumayela wu ya wu va wa xihatla swinene loko siku ha rin’we ri hundza? (Marka 13:10)

² Loko siku rin’wana ni rin’wana ri hundza, ntirho wa hina wo chumayela wu ya wu va wa nkoka swinene. Hikwalahokayini? Hikuva ku sale nkarhi lowutsongo. Xiya leswi Yesu a swi profeteke mayelana ni ntirho wo chumayela emasikwini yo hetelela. (Hlaya Marka 13:10.) Hi ku ya hi rungula ra Matewu, Yesu u vule leswaku mahungu lamanene a ma ta chumayeriwa emisaveni hinkwayo “makumu” ma nga si fika. (Mat. 24:14) Xiga xolexo xi  vula ku heriseriwa makumu ka misava ya Sathana yo homboloka. Yehovha u veke “siku hambi ku ri nkarhi” lowu swiendlakalo leswi swi nga ta endleka ha wona. (Mat. 24:36; 25:13; Mit. 1:7) Siku rin’wana ni rin’wana ri hi tshineta ekusuhi ni nkarhi wolowo. (Rhom. 13:11) Enkarhini wa sweswi, hi fanele hi ya emahlweni hi chumayela kukondza makumu ma fika.

3. I yini leswi endlaka hi chumayela?

³ Hi lexi xivutiso xa nkoka lexi hinkwerhu hi faneleke hi ehleketa ha xona: Hikwalahokayini hi chumayela mahungu lamanene? Hileswi hi nga ni rirhandzu. Loko hi chumayela hi kombisa leswaku hi rhandza mahungu lamanene, hi rhandza vanhu kasi xa nkoka swinene hi rhandza Yehovha ni vito rakwe. A hi buleni hi swilo leswi ha xin’we xin’we.

HA CHUMAYELA HILESWI HI RHANDZAKA MAHUNGU LAMANENE

4. Hi titwa njhani loko hi twa mahungu yo tsakisa?

⁴ Xana wa yi tsundzuka ndlela leyi u titweke hayona loko u byeriwa mahungu yo tsakisa, kumbexana loko ku velekiwa xirho xa ndyangu kumbe loko u kuma ntirho lowu a wu wu lava? A swi kanakanisi leswaku a wu swi langutele hi mahlongati ku byela ndyangu ni vanghana mahungu wolawo yo tsakisa. Xana ku endleke nchumu lowu fanaka loko u twa mahungu yo tsakisa ku tlula hinkwawo, ku nga mahungu lamanene ya Mfumo wa Xikwembu?

5. U titwe njhani loko u dyondza ntiyiso wa le Ritweni ra Xikwembu ro sungula? (Nakambe vona swifaniso.)

⁵ Ehleketa ndlela leyi u titweke hayona loko u twa ntiyiso lowu humaka eRitweni ra Xikwembu. U dyondze leswaku Tata wa wena wa le tilweni wa ku rhandza, u lava u va xiphemu xa ndyangu wa vagandzeri vakwe, u tshembise ku herisa switlhavi ni ku xaniseka nileswaku swi ta koteka ku vona maxaka ni vanghana va wena lava feke va pfuxiwa emisaveni leyintshwa ni swin’wana swo tala. (Mar. 10:​29, 30; Yoh. 5:​28, 29; Rhom. 8:​38, 39; Nhlav. 21:​3, 4) Leswi u swi dyondzeke swi ku tsakisile swinene. (Luka 24:32) U swi rhandzile naswona a wu miyelanga hi swona.—Ringanisa Yeremiya 20:9.

6. U dyondza yini eka ntokoto wa Ernest na Rose?

 ⁶ Xiya ntokoto wun’wana. Makwerhu la vuriwaka Ernest b a a ri ni malembe ya kwalomu ka khume loko bava wakwe a lova. Ernest u ri: “A ndzi tivutisa leswi: ‘Xana u ye etilweni? Kumbe, xana u file hakunene?’ A ndzi navela vana lava ha riki na va tatana.” Nkarhi ni nkarhi Ernest a a ya eswilahlweni a fika a khinsama esirheni ra tata wakwe a khongela a ku: “Xikwembu ndzi lava ku tiva laha bava a nga kona.” Endzhaku ka loko bava wakwe a ri ni malembe ya kwalomu ka 17 a lovile, Ernest u komberiwe ku dyondzeriwa Bibele naswona u pfumerile. Swi n’wi tsakisile ku tiva leswaku lava feke a va tivi nchumu, swi fana ni loko va etlele vurhongo lebyikulu naswona u twe hi xitshembiso xa le Bibeleni xa leswaku vanhu va ta pfuxiwa enkarhini lowu taka. (Ekl. 9:​5, 10; Mit. 24:15) Eku heteleleni, u kume tinhlamulo ta swivutiso leswi ku nga khale a a lava ku ti tiva. Ernest a a tsakisiwa swinene hi ntiyiso wa le Bibeleni lowu a a ri eku wu dyondzeni. Nsati wakwe Rose u n’wi joyinile eka dyondzo yakwe naswona na yena u tsakisiwe hi leswi a swi dyondzeke. Va khuvuriwe hi 1978. Va chumayele mindyangu ni vanghana va vona hi ku hiseka ku katsa ni van’wana swilo leswi a va swi dyondza. Ernest na Rose va pfune vanhu vo tlula 70 leswaku va tiva Yehovha ni ku tlhela va khuvuriwa.

7. Ku endleka yini loko leswi hi swi dyondzaka eBibeleni hi swi rhandza swinene? (Luka 6:45)

⁷ Swi le rivaleni leswaku loko hi rhandza leswi hi swi dyondzaka eBibeleni, hi titwa hi lava ku byela un’wana ni un’wana hi swona. (Hlaya Luka 6:45.) Hi titwa ku fana ni vadyondzisiwa va Yesu lava vuleke leswi: “A hi nge tshiki ku vulavula hi swilo leswi hi swi voneke ni leswi hi swi tweke.” (Mit. 4:20) Hi rhandza ntiyiso lerova hi lava ku byela vanhu vo tala hilaha hi nga kotaka hakona.

HA CHUMAYELA HILESWI HI RHANDZAKA VANHU

8. Hikwalahokayini hi lava ku byela van’wana hi mahungu lamanene? (Vona bokisi leri nge, “ Rhandza Vanhu​—Endla Vadyondzisiwa.”) (Nakambe vona xifaniso.)

⁸ Hi rhandza vanhu ku fana na Yehovha ni N’wana wakwe. (Swiv. 8:31; Yoh. 3:16) Hi va twela vusiwana vanhu lava nga ‘tiviki Xikwembu’ naswona va nga ‘riki na ntshembo.’ (Efe. 2:12) Hikwalaho ka swiphiqo swa vona, va nga ha titwa va ri egojini ro enta swinene kambe hi ni ntambhu leyi nga va kokaka va huma, ku nga mahungu lamanene ya Mfumo wa Xikwembu. Leswi hi va rhandzaka ni ku va twela vusiwana, hi endla hinkwaswo leswi hi nga swi kotaka leswaku hi va chumayela mahungu lamanene. Rungula rolero ra risima ri nga endla leswaku va va ni ntshembo, ri va pfuna leswaku va tsaka hambi ku ri sweswi  ni ku va nyika ntshembo wo tiphina hi “[vutomi] bya xiviri” ku nga vutomi lebyi nga heriki emisaveni leyintshwa ya Xikwembu.—1 Tim. 6:19.

9. Hi xihi xilemukiso lexi hi xi byelaka vanhu mayelana ni leswi nga ta endleka enkarhini lowu taka naswona hikwalahokayini hi va lemukisa? (Ezekiyele 33:​7, 8)

⁹ Ndlela leyi hi rhandzaka vanhu hayona yi tlhela yi endla hi va lemukisa leswaku makumu ya misava leyi yo homboloka ma kwala nyongeni. (Hlaya Ezekiyele 33:​7, 8.) Hi twela vanhu hinkwavo vusiwana ku katsa ni maxaka ya hina lama nga tirheliki Yehovha. Vanhu vo tala vo tihanyela ntsena naswona a va swi tivi leswaku ku ta va ni “nhlomulo lowukulu lowu nga si tshamaka wu va kona hi mpfhuka misava yi va kona ku fikela sweswi, naswona a wu nge he tlheli wu va kona.” (Mat. 24:21) Hi lava va swi tiva leswi nga ta endleka hi nkarhi wolowo wa vuavanyisi, vukhongeri bya mavunwa byi ta herisiwa naswona ku ta landzela ku lovisiwa ka misava yo homboloka ya Sathana hi nkarhi wa Armagedoni. (Nhlav. 16:​14, 16; 17:​16, 17; 19:​11, 19, 20) Hi khongelela leswaku vanhu vo tala va yingisa leswi hi va byelaka swona kutani va gandzela Yehovha swin’we na hina. Kambe ku vuriwa yini hi lava nga xi yingisiki xilemukiso lexi sweswi ku katsa ni maxaka ya hina?

10. Hikwalahokayini swi ri swa xihatla ku ya emahlweni hi lemukisa vanhu hi swilo leswi nga ta endleka ku nga ri khale?

¹⁰ Hilaha swi hlamuseriweke hakona eka nhlokomhaka leyi hundzeke, swi nga endleka ku ri ku rhandza ka Yehovha leswaku a ponisa vanhu lava sungulaka ku va ni ripfumelo eka yena loko va vona ku lovisiwa ka Babilona Lonkulu. Loko swi ri tano, i swa nkoka swinene ku ya emahlweni hi va byela mahungu lawa sweswi. Ehleketa hi leswi: Leswi hi va byelaka swona sweswi swi nga endla va tshama va ri karhi va swi tsundzuka ni le nkarhini lowu taka. (Ringanisa Ezekiyele 33:33.) Kumbexana va ta tsundzuka xilemukiso lexi va xi tweke eka hina kutani va sungula ku gandzela Yehovha swin’we na hina ri nga si va pelela. Ku fana ni murindzi wa khotso wa le Filipiya loyi a hundzukeke endzhaku ka loko “misava yi sungul[e] ku tsekatseka swinene,” swi nga endleka vanhu van’wana lava nga ma yingisiki mahungu lamanene sweswi, va hundzuka endzhaku ko vona swiendlakalo leswi tsemaka nhlana swa ku lovisiwa ka Babilona Lonkulu.—Mit. 16:​25-34.

HA CHUMAYELA HILESWI HI RHANDZAKA YEHOVHA NI VITO RAKWE

11. Hi dzunisa, hi xixima ni ku nyika Yehovha matimba ya hina hi ndlela yihi? (Nhlavutelo 4:11) (Nakambe vona swifaniso.)

¹¹ Xivangelo xa nkoka swinene lexi endlaka hi chumayela mahungu lamanene hileswi hi rhandzaka Yehovha Xikwembu ni vito rakwe ro kwetsima. Hi teka ntirho wa hina wo chumayela tanihi ndlela yo dzunisa Xikwembu lexi hi xi rhandzaka. (Hlaya Nhlavutelo 4:11.)  Hi pfumelelana ni swivumbiwa hinkwaswo swa moya swa le tilweni leswi vulaka swi ku: “Swa ku fanela Yehovha Xikwembu xa hina ku dzunisiwa ni ku xiximiwa ni ku va ni matimba.” Ha n’wi dzunisa ni ku n’wi xixima loko hi byela van’wana vumbhoni lebyi khorwisaka bya leswaku u “tumbuluxe swilo hinkwaswo” nileswaku hi kota ku hanya hileswi a hi nyikeke vutomi. Hi nyika Yehovha matimba ya hina loko hi tirhisa nkarhi, ntamu ni swilo swa hina leswaku hi chumayela hilaha hi nga kotaka hakona. (Mat. 6:33; Luka 13:24; Kol. 3:23) Kahlekahle hi rhandza ku vulavula hi Xikwembu lexi hi xi rhandzaka. Hi titwa hi boheka ku byela van’wana hi vito ra xona ni leswi ri vulaka swona. Hikwalahokayini?

12. Hi ri kwetsimisa njhani vito ra Yehovha entirhweni wo chumayela?

¹² Ndlela leyi hi rhandzaka Yehovha hayona yi endla leswaku hi kwetsimisa vito rakwe. (Mat. 6:9) Hi lava ku pfuneta ku basisa vito rakwe eka swihehlo leswi Sathana a ri phyarhekeke swona hi mavunwa yakwe. (Gen. 3:​1-5; Yobo 2:4; Yoh. 8:44) Loko hi chumayela, hi hisekela ku byela vanhu hinkwavo lava hi yingisaka leswaku Yehovha i mani nileswaku i Xikwembu xa njhani. Hi lava vanhu hinkwavo va swi tiva leswaku nchumu wa nkoka lowu Yehovha a nga na wona i rirhandzu nileswaku u fuma hi ndlela yo lulama naswona ku nga ri khale Mfumo wakwe wu ta herisa ku xaniseka hinkwako, wu tisa ku rhula ni ku endla vanhu va tsaka. (Ps. 37:​10, 11, 29; 1 Yoh. 4:8) Loko hi sirhelela ndhuma ya Yehovha entirhweni wa hina wo chumayela, hi kwetsimisa vito rakwe. Nakambe ha tsaka hikuva hi endla leswi hi faneleke hi swi endla tanihi Timbhoni ta Yehovha. Hikwalahokayini hi vula tano?

13. Hikwalahokayini hi tibuma ku vitaniwa Timbhoni ta Yehovha? (Esaya 43:​10-12)

¹³ Yehovha u hi hlawurile leswaku hi va “timbhoni” takwe. (Hlaya Esaya 43:​10-12.) Emalembeni lama hundzeke, papila leri humaka eka Huvo leyi Fumaka ri te: “Hinkwerhu hi fanele hi  tiba xifuva leswi hi nga Timbhoni ta Yehovha.” c Hikwalahokayini swi ri tano? Xiya xikombiso lexi. Loko a wu lava leswaku munhu un’wana a va mbhoni ya wena ekhoto, a wu ta hlawula munhu loyi u n’wi tivaka ni loyi u n’wi tshembeka naswona loyi ndhuma yakwe yi nga ta endla leswaku vumbhoni byakwe byi tshembiwa. Leswi Yehovha a hi hlawulaka tanihi Timbhoni takwe, swi kombisa leswaku u hi tiva kahle nileswaku wa tshemba ku hi ta byela van’wana leswaku hi yena ntsena a nga Xikwembu xa ntiyiso. Hi swi teka ku ri nkateko ku va Timbhoni takwe naswona hi tirhisa nkarhi wun’wana ni wun’wana lowu hi wu kumaka leswaku hi byela vanhu hi vito rakwe ni ku swi veka erivaleni leswaku swilo hinkwaswo swo biha leswi vuriweke mayelana na yena i mavunwa. Hi ndlela yoleyo, hi endla leswi vito ra hina leri hi tibumaka ha rona ri vulaka swona, ra leswaku hi Timbhoni ta Yehovha.—Ps. 83:18; Rhom. 10:​13-15.

HI TA YA EMAHLWENI HI CHUMAYELA KUKONDZA MAKUMU MA FIKA

14. Hi swihi swilo swo tsakisa leswi nga ta endleka enkarhini lowu taka?

¹⁴ Hi swi langutele emahlweni ku vona swilo leswi nga ta endleka enkarhini lowu taka! Hi ku katekisiwa hi Yehovha, hi tshemba leswaku hi ta vona vanhu vo tala va amukela ntiyiso, nhlomulo lowukulu wu nga si sungula. Nakambe, swa hi tsakisa ku tiva leswaku swi nga endleka hambi ku ri hi nkarhi wa nhlomulo lowukulu, ku nga nkarhi wo tika swinene, hi nga vona vanhu vo tala va huma emisaveni ya Sathana leyi yaka eku lovisiweni ivi va gandzela Yehovha swin’we na hina!—Mit. 13:48.

15-16. Hi ta ya emahlweni hi endla yini naswona ku fikela rini?

¹⁵ Sweswi hi ni ntirho wa nkoka lowu hi faneleke hi wu endla, ku nga ntirho lowu nga taka wu nga ha pfuki wu endliwile. Hi ni nkateko wo chumayela mahungu lamanene ya Mfumo wa Xikwembu emisaveni hinkwayo. Hi nkarhi lowu fanaka, hi fanele hi lemukisa vanhu. Vanhu va fanele va swi tiva leswaku ku lovisiwa ka misava leyi ku ya hi tshinela swinene. Kutani loko nkarhi wolowo wa vuavanyisi wu fika, va ta swi tiva leswaku rungula leri a hi ri chumayela a ri huma eka Yehovha Xikwembu.—Ezek. 38:23.

¹⁶ Kutani i yini leswi hi tiyimiseleke ku swi endla? Hi ku susumetiwa hi rirhandzu, ku nga ku rhandza mahungu lamanene, ku rhandza vanhu kasi xa nkoka swinene ku rhandza Yehovha Xikwembu ni vito rakwe, hi ta ya emahlweni hi chumayela hi ku tiyimisela, hi ku hiseka ni hi xihatla kukondza Yehovha a ku, “swi ringene!”