1. Bintu ki ebitwamanyisiibwe ha rusorrokano orw’omwaka 2023?

 HA RUSORROKANO orw’omwaka 2023, a tukatunga enyetegereza empyaka omu nyikiriza zaitu kandi twahurra n’ebirango ebirukusemeza ebirukukwata ha buheereza bwaitu. Ekyokurorraho, tukeega ngu abantu abamu nibasobora kutunga omugisa gw’okweteranizaaho abantu ba Yahwe hanyuma y’okuhwerekerezebwa kwa “Baburoni Orukuru.” Tukongera twamanyisibwa ngu kutandika na Novemba 2023, abatebezi tibarukwija kwetagisibwa kuhandiika byona ebibakozere omu buheereza ha ripooti zaabo ez’obuheereza. Empindahinduka zinu nizireetera obuheereza bwaitu kuzooka nk’obutali bw’omugaso, rundi nk’obutasemeriire kukorwa omu bwangu nka kara? Nangwa!

2. Habwaki omulimo gwaitu nigweyongera kuba mukuru buli kiro ekirukurabaho? (Marako 13:10)

² Buli kiro ekirabaho, omulimo gw’okutebeza nigweyongera kuba mukuru muno. Habwaki? Habwokuba obwire buliyo nibuhwayo. Wetegereze Yesu ekiyagambire ha mulimo gw’okutebeza omu biro ebya ha mpero. (Soma Marako 13:10.) Kusigikirra ha njiri ya Matayo, Yesu akagamba ngu amakuru amarungi gaakutebeziibwe omu nsi yoona ‘empero’ etakahikire. (Mat. 24:14) Ebigambo ebi nibibazaaho akasumi ensi ya Sitaani obwerihwerekerra. Yahwe ataireho ‘ekiro nesaaha’ ebintu binu obubirihikirra. (Mat. 24:36; 25:13; Eng. 1:7) Kandi buli kiro ekirabaho, tweyongera kwirra haihi n’akasumi ako. (Bar. 13:11) Baitu akasumi ako nk’oku katakahikire, tusemeriire kugumizaamu nitutebeza kuhikya empero obwerahika.

3. Kiki ekitwekambisa kutebeza?

 ³ Obuturaaba nitwecumitirizaaho obuheereza bwaitu, tusemeriire kwekaguza ekikaguzo kinu; Habwaki tutebeza amakuru amarungi? Habw’okuba, okugonza nukwo kutwekambisa kutebeza. Ebitukora obutuba tuli omu mulimo ogw’okutebeza byoleka okugonza okutwine hali amakuru amarungi, okugonza okutwiniire abantu, kandi ekirukukirayo obukuru, byoleka okugonza okutwiniire Yahwe hamu n’ibara lye. Leka tubazeeho buli kimu ha bintu binu.

TUTEBEZA HABWOKUBA NITUGONZA AMAKURU AMARUNGI

4. Twetwaza tuta obutuhurra amakuru amarungi?

⁴ Noijuka omulingo wayehuliiremu obuwatungire amakuru amarungi—obundi omu h’ab’omu ka yaawe akaba azaire omwana rundi okatunga omulimo ogw’okaba noyetaaga muno? Hataroho kugurukyagurukya, okaba oine ekihika eky’okugambiraho ab’omu ka yaawe n’abanywani baawe. Nukwo wayehuliire oti obuwahuliire amakuru agarukukirayo kusememza ag’Obukama bwa Ruhanga?

5. Okehurra ota obuwayegere amananu kuruga omu Kigambo kya Ruhanga habw’omurundi ogw’okubanza? (Rora n’ebisisani)

⁵ Tekerezaaho omulingo wayehuliire obuwayegere amananu kuruga omu Kigambo kya Ruhanga habw’omurundi ogw’okubanza. Okeega ngu So ow’omu iguru nakugonza, kandi nagonza obe omu h’abaheereza be, ekindi, okeega ngu araganiize kumaraho obusaasi n’okubonabona, naija kuhumbuura abantu baawe abaafiire hamu n’ebindi bingi. (Mar. 10:​29, 30; Yoh. 5:​28, 29; Bar. 8:​38, 39; Kus. 21:​3, 4) Ebiwayegere bikakukwataho muno. (Luk. 24:2) Okabigonza muno, kandi okahurra nogonza kubigambiraho abandi!—Lengesaniza na Yeremiya 20:9.

6. Ekyokurorraho kya Ernest na Rose nikikwegesa ki?

⁶ Tekerezaaho ekyokurorraho kinu. Ow’oruganda arukwetwa Ernest b akaba aine  emyaka ikumi ise obuyafiire. Ernest nagamba ati: “Nayekaguzaaga nti: ‘Agenzere omu iguru? Rundi ndyongera kumurora?’ Nayegombaga abaana abakyaine baisebo.” Ernest yakiraga kugenda ha kituuro kyaise nateeza amaju nasaba Ruhanga ati: “Ai Ruhanga, nkonyera mmanye isenyowe nambere ali.” Hanyuma y’okurabaho emyaka 17 ise amazire kufa, Ernest akaikiriza kwega Baibuli, akasemererwa muno kukimanya ngu abafu tibaine ekibamanyire, bali nk’abanyakuli omu turo otw’amaani kandi Baibuli eraganiza ngu omu kasumi ak’omu maiso nihaija kubaho okuhumbuuka. (Mug. 9:​5, 10; Eng. 24:15) Hakumalirra akatunga ebyokugarukamu eby’ebikaguzo ebyamutalibanizaaga kumara emyaka. Amananu ag’akaba nayega kuruga omu Baibuli gakamusemeza muno. Mukazi we Rose, nauwe akatandika kwega Baibuli kandi yagonza eby’akaba n’ayega. Omu 1978 boona babiri bakabatizibwa. N’obwekambi, bakatebeza abanyabuzaale, abanywani, hamu n’abantu abandi. Kandi Ernest na mukazi we Rose bakonyiire abantu abarukuhingura omu 70 kukurakurana bakabatizibwa.

7. Kiki ekibaho obutuba nitugonza muno amananu ag’omu Baibuli? (Luka 6:45)

⁷ Obutugonza amananu agatwegere kuruga omu Baibuli, twehurra ngu tusemeriire kugagambiraho buli muntu. (Soma Luka 6:45.) Twehurra nk’abegeswa ba Yesu ab’omu kyasa eky’okubanza abaagambire bati: “Titurukusobora okuleka okugamba ebitwaboine nebitwahuliire.” (Eng. 4:20) Habwokuba nitugonza muno amananu, tuhurra twine ekihika eky’okugagambiraho abantu baingi nk’oku kirukusoboka.

TUTEBEZA HABWOKUBA NITUGONZA ABANTU

8. Kiki ekitwekambisa kugambiraho abandi amakuru amarungi? (Rora akasanduuko “ Gonza Abantu—Obafoole Abegeswa.”) (Rora n’ekisisani.)

⁸ Kusisanaho Yahwe n’Omwana we, naitwe nitugonza abantu. (Nfu. 8:31; Yoh. 3:16) Tukwatirwa embabazi abo ‘abataine Ruhanga’ kandi ‘abataine okunihira.’ (Bef. 2:12) Habw’ebizibu ebibarukurabamu nibasobora kwehurra nk’abali omu kiina ekihamire. Baitu itwe twine omuguha ogutusobora kukozesa kubasikayo—kandi omuguha ogu nugo amakuru amarungi ag’obukama bwa Ruhanga. Okugonza n’embabazi ebitubainiire bitwekambisa kutekamu amaani kubahikyaho amakuru amarungi. Obutumwa obu obw’omuhendo nibusobora kubaleetera okunihira, nibubakonyera kuba n’obwomeezi oburungi hati, kandi bubahe okunihira okw’okutunga obwomeezi mali kandi obu nubwo obwomeezi obutahwaho omu nsi ya Ruhanga empyaka.—1 Tim. 6:19.

9. Kuhabura kwa mulingo ki okurukukwata ha kasumi ak’omu maiso okuturukugambiraho abandi kandi habwaki? (Ezekyeri 33:​7, 8)

 ⁹ Okugonza okutwiniire abantu kutuleetera kubahabura ha kuhwerekerra kw’ensi enu embi okuliyo nikwija. (Soma Ezekyeri 33:​7, 8.) Nitusaalirirwa bataahi baitu n’abanyabuzaale baitu abatali omu mananu. Abantu abarukukira obwingi bateeka omutima ha kukora ebyabo kandi tibakimanyire ngu “omuhito omwingi ogutakabahoga ensi ekaba okubaho nokuhikya hati kandi tigulibaho obwakabiri” guliyo nigwija. (Mat. 24:21) Nitugonza bamanye ekirukwija kubaho omu kasumi ako ak’okucwa omusango. Amadiini goona ag’ebisuba galiihwaho kandi hanyuma ensi enu embi erihwerekerezebwa omu bulemu obwa Haramagedoni. Kus. 16:​14, 16; 17:​16, 17; 19:​11, 19, 20) Nitunihira ngu abantu baingi nibaija kuhuliiriza ebitukubagambira kandi batweteranizeeho omu kuheereza Yahwe kasumi kanu. Baitu kiki ekirahika hali abo abarukwanga kuhuliiriza ebitukubagambira kasumi kanu, otwaliiremu n’abanyabuzaale baitu abaturukugonza?

10. Habwaki kikuru kwikara nitugambiraho abandi ebiri haihi kubaho?

¹⁰ Nk’oku twarozere omu kicweka ekyahoire, nikisobora kuba ngu kiri kigendererwa kya Yahwe kujuna abantu abalitandika kumwikiririzaamu obubalirora okuhwerekerezebwa kwa Baburoni Orukuru. Obukiraaba nukwo kiri, kikuru muno kukira na kara kwikara nituhabura abantu. Tekerezaaho kinu: Ebiturukubagambira kasumi kanu nibasobora kubiijuka kasumi ako. (Lengesaniza na Ezekyeri 33:33.) Obundi baliijuka obutumwa obutwabatebiize kandi kibekambise kutweteranizaaho omu kuramya okw’amananu obwire butakahoireyo. Nk’omulinzi w’enkomo ow’akaba ali omu Firipi ayahindukire hanyuma ‘y’omusisa omwingi,’ obundi n’abantu abatarukuhuliiriza kasumi kanu balihinduka hanyuma y’okuhwerekerezebwa kwa Baburoni Orukuru.—Eng 16:​25-34.

TUTEBEZA HABWOKUBA NITUGONZA YAHWE N’IBARA LYE

11. Tuha tuta Yahwe ekitiinisa, amaani n’okutiinwa? (Okusuku’rwa 4:11) (Rora n’ebisisani.)

¹¹ Okugonza okutwiniire Yahwe hamu n’ibara lye erirukwera, eri nsonga enkuru muno ey’etwekambisa kutebeza amakuru amarungi. Turora obuheereza bwaitu nk’omulingo ogw’okukugiza Ruhanga outugonza. (Soma Okusuku’rwa 4:11.) Hataroho kugurukyagurukya nitwikiriza ngu “[Yahwe] asemeriire okuhabwa ekitinisa nokutinwa nobusobozi.” Tumukugiza kandi tumuha ekitiinisa obutugambiraho abandi obwakaiso oburukwoleka ngu ‘nuwe yahangire byona’ kandi ngu tuli bomeezi habw’okuba nuwe yatuhangire.  Tumuha obusobozi—kandi obu nubwo obusobozi obutwine, obutukozesa obwire bwaitu, amaani, hamu n’ebintu byaitu kwejumbira omu buheereza nk’oku kirukusoboka kusigikirra ha nyikara yaitu. (Mat. 6:33; Luk. 13:24; Bak. 3:23) Tugonza kugambira abandi hali Ruhanga outurukugonza. Ekindi, kitwekambisa kugambiraho abandi ibara lye n’amakuru galyo. Habwaki?

12. Tweza tuta ibara lya Yahwe omu buheereza bwaitu?

¹² Okugonza okutwiniire Yahwe kutwekambisa kweza ibara lye. (Mat. 6:9) Eki nikimanyisa ngu ebintu Sitaani ebiyabalize ha ibara lya Yahwe tibihikire. (Kub. 3:​1-5; Yob. 2:4; Yoh. 8:44) Obutuba tuli omu buheereza, tuba n’ekihika eky’okugambiraho abandi Yahwe Ruhanga wa mulingo ki. Tugonza buli omu amanye ngu omulingo gwe omukuru nukwo okugonza, kandi ngu omulingo arukulema guhikiriire kandi gw’obwinganiza kandi ngu omu bwire obutali bwa hara Obukama bwe nibwija kumaraho okubonabona kwona buleetere abantu obusinge n’okusemererwa. (Zab. 37:​10, 11, 29; 1 Yoh. 4:8) Obutugambira abantu omu buheereza ha bintu binu ebirukukwata hali Yahwe, tuba nitweza ibara lye. Ekindi, tuba n’okumarwa kukimanya ngu nitukora ekitusemeriire kukukora nk’abakaiso be. Habwaki nitugamba tuti?

13. Habwaki tukyesiimisa kwetwa Abakaiso ba Yahwe? (Isaya 43:​10-12)

¹³ Yahwe atukomere kuba “bakaiso” be. (Soma Isaya 43:​10-12.) Omu myaka nke enyuma, ebbaruha kuraga h’Akatebe Akalemi ekagamba eti: “Omugisa ogurukukirayo buli omu hali itwe ogw’arukwegondezaamu nukwo kwetwa omu h’Abakaiso ba Yahwe.” c Habwaki nitugamba tuti? Tekerezaaho ekyokurorraho kinu. kakuba oba nogonza omuntu  kukuheera obwakaiso omu kooti, noserra omuntu ow’omanyire kandi ow’orukwesiga, kandi ow’aine engeso enungi. Habwokuba Yahwe atukomere kuba Bakaiso be, kyoleka ngu natumanya kurungi kandi natwesiga ngu nitwija kumuheera obwakaiso ngu nuwe Ruhanga wenka ow’amananu. Omugisa gunu tugutwara kuba gw’omuhendo kandi tukozesa buli kagisa tutunga kumanyisa abandi ibara lye n’okwoleka ngu ebintu ebibi byona ebimubaziibweho tibihikire. Obutukora eki, tuba nituhikiriza ekitusemeriire kukora nk’Abakaiso ba Yahwe!—Zab. 83:18; Bar. 10:​13-15.

NITWIJA KUGUMIZAAMU NITUTEBEZA KUHIKIRA KIMU HA MPERO

14. Bintu ki ebirukusemeza ebitulindiriire kurora omu kasumi ak’omumaiso?

¹⁴ Mali haroho ebintu ebirukusemeza ebitulindiriire kurora nibihikirra omu kasumi ak’omu maiso! Habw’emigisa ya Yahwe nitunihira kurora abantu baingi nibatweteranizaaho omuhito omwingi gutakatandikire. Ekindi nikitusemeza kukimanya ngu n’omu kasumi akakyakizireyo kuguma ak’omuhito omwingi nitusobora kurora abantu baingi nibecwaho ensi ya Sitaani kandi nibatweteranizaaho omu kuramya Yahwe!—Eng. 13:48.

15-16. Kiki ekitusemeriire kugumizaamu nitukora, kandi kuhikya di?

¹⁵ Baitu akasumi ako katakahikire, twine omulimo gw’okukora. Omulimo ogw’okurangirra amakuru amarungi omu nsi yoona kandi ogututalyongera kukora. Ha murundi nugwo gumu tusemeriire kugumizaamu nituhabura abantu. Abantu basemeriire kumanya ngu empero ey’obusinge bunu eri haihi kuhika. Kandi akasumi ak’omusango obu kalihika abantu balimanya ngu obutumwa obutukaba nitutebeza bukaba niburuga hali Ruhanga.—Ez. 38:23.

¹⁶ Nahabweki kiki ekitusemeriire kucweramu kimu kukora? Leka okugonza okutwiniire amakuru amarungi, okugonza okutwiniire abantu kandi ekirukukirayo, okugonza okutwiniire Yahwe n’ibara lye—bitwekambise kugumizaamu nitutebeza n’obwekambi kandi tutaireho omutima kuhikya Yahwe obwaligamba ngu, “omulimo ogw’okutebeza guhoire!”