NKHANI YAKUSAMBIRA 20
SUMU 67 “Pharazga Mazgu”
Lutilirani Kupharazga Chifukwa cha Chitemwa
“Makani ghawemi ghakwenera kupharazgika dankha mu mitundu yose.”—MRK. 13:10.
FUNDO YIKURU
Umo chitemwa chikutovwilira kuti tilutilire kuchita ntchito yakupharazga mwamwamphu kweniso na mtima wose.
1. Kasi tikasambira vichi pa ungano wapachaka wa 2023?
PA UNGANO wapachaka a wa 2023, tikakondwa chomene na kapulikiskiro kaphya ka vigomezgo vithu vinyake kweniso tikapulika vipharazgo vyakukondweska vyakukhwaskana na uteŵeti withu. Mwachiyelezgero, tikasambira kuti ŵanthu ŵanyake ŵangazakaŵa na mwaŵi wakusintha na kuŵa ku chigaŵa cha Yehova pamanyuma pa kuparanyika kwa Babuloni Mukuru. Tikaphalirikaso kuti kwambira waka mwezi wa Novembala 2023, ŵapharazgi ŵa Ufumu ŵazamukhumbikwaso yayi kulemba lipoti la vyose ivyo ŵachita mu uteŵeti. Kasi kusintha uku kupangiskenge ntchito yakupharazga kuŵa yambura kuzirwa chomene, kweniso kuti yileke kuchitika mwaluŵiro? Yayi!
2. Chifukwa wuli zuŵa lililose ilo lajumphapo likupangiska uteŵeti withu kuŵa wakuti uchitike mwaluŵiro chomene? (Mariko 13:10)
2 Zuŵa lililose ilo lajumphapo, likupangiska ntchito yithu kuŵa yakuti yichitike mwaluŵiro chomene. Chifukwa wuli? Chifukwa kwakhala nyengo yichoko chomene kuti umaliro wize. Wonani ivyo Yesu wakayowoyerathu vyakukhwaskana na ntchito yakupharazga mu mazuŵa ghaumaliro. (Ŵazgani Mariko 13:10.) Kuyana na ivyo Mateyu wakalemba, Yesu wakati makani ghawemi ghazamupharazgika pa charu chose chapasi pambere “umaliro” undize. (Mat. 24:14) Apa wakang’anamuranga umaliro wa charu chiheni cha Satana ichi. Yehova wali kutemerathu “zuŵa na ora” la vinthu ivyo vichitikenge sonosono. (Mat. 24:36; 25:13; Mil. 1:7) Zuŵa lililose para lajumphapo tikuŵa kuti tasendelera kufupi chomene na nyengo iyi. (Rom. 13:11) Apo tikulindilira nyengo iyi, tikwenera kulutilira kupharazga m’paka apo umaliro wizirenge.
3. Ntchivichi chikutituma kupharazga?
3 Apo tikughanaghanirapo vya uteŵeti withu, tingachita makora kujifumba fumbo lakuzirwa lakuti: Chifukwa wuli tikupharazga makani ghawemi? Zgoro lipusu ndakuti, chitemwa ndicho chikutituma kupharazga. Para tikupharazga tikulongora kuti tikughatemwa makani ghawemi, tikutemwa ŵanthu, kweniso kuluska vyose tikutemwa chomene Yehova na zina lake. Sono tiyeni tidumbiskane vinthu ivi chilichose pachekha.
TIKUPHARAZGA CHIFUKWA TIKUGHATEMWA MAKANI GHAWEMI
4. Kasi tikujipulika wuli para tapulika uthenga uwemi?
4 Kasi mukukumbuka umo mukajipulikira mukati mwapulika uthenga unyake uwemi, nga wakuti mubali winu munyake wali na mwana panji munyake wamusangirani ntchito iyo mukakhumbanga? Tikukayika yayi kuti mukakondwa chomene ndipo nyengo yeneyiyo mukaphalirako ŵamumbumba yinu na ŵabwezi ŵinu vya nkhani iyo. Kasi ndimo vikaŵiraso kwa imwe apo mukapulika uthenga uwemi chomene wakukhwaskana na Ufumu wa Chiuta?
5. Kasi mukajipulika wuli apo mukapulika kakwamba unenesko wa mu Mazgu gha Chiuta? (Wonaniso vithuzi.)
5 Ghanaghanirani umo mukajipulikira apo mukapulika kakwamba unenesko wa mu Mazgu gha Chiuta. Mukamanya kuti Dada winu wakuchanya wakumutemwani, ndipo wakukhumba kuti muŵe yumoza wa ŵasopi ŵake, kweniso wamulayizgani kuti vyakuŵinya na masuzgo ghose vizamumara, ndiposo mu charu chiphya muzamuwona ŵakutemweka ŵinu awo ŵali kufwa na vitumbiko vinyake vinandi. (Mrk. 10:29, 30; Yoh. 5:28, 29; Rom. 8:38, 39; Chivu. 21:3, 4) Ivyo mukasambira vikamufikani pamtima chomene. (Luka 24:32) Mukavitemwa chomene ivyo mukasambiranga, ndipo mukaŵa ŵakukhumbisiska kuphalirako ŵanji.—Yaniskani na Yeremiya 20:9.
Tikati tapulika makani ghawemi, tikakondwa chomene ndipo tikakhumba yayi kukhalapo waka chete! (Wonani ndime 5)
6. Kasi mukusambirako vichi ku ivyo vikachitikira Ernest na Rose?
6 Wonani chiyelezgero ichi. Mubali munyake zina lake Ernest b wakaŵa na vyaka 10 apo adada ŵake ŵakafwanga. Ernest wakuti: “Nkhajifumbanga kuti: ‘Kasi ndikuti ŵaluta kuchanya? Panji ŵafwirathu kwamuyirayira?’ Nkhadokeranga ŵana ŵanyane awo ŵakaŵa kuti ŵachali na adada ŵawo.” Kanandi Ernest wakalutanga pa dindi la adada ŵake na kugwada, ndipo wakalombanga kuti: “Chonde, A Chiuta, nkhukhumba kumanya uko adada ŵane ŵali!” Vyaka pafupifupi 17 vyati vyajumphapo kufuma apo adada ŵake ŵakafwira, munthu munyake wakamupempha kuti wasambirenge nayo Baibolo, ndipo Ernest wakazomera. Wakakondwa chomene kumanya kuti ŵakufwa ŵakumanya kanthu yayi, ŵakuŵa nga ŵali waka mu tulo tuzito, ndipo Baibolo likulayizga kuti ŵazamuwuskika. (Muph. 9:5, 10; Mil. 24:15) Paumaliro wakasanga mazgoro gha mafumbo agho ghakamusuzga kwa nyengo yitali. Ernest wakakondwa chomene na unenesko wa mu Baibolo uwo wakasambiranga. Muwoli wake Rose, nayo wakamba kusambira Baibolo ndipo wakavitemwa ivyo wakasambiranga. Mu 1978 ŵakabatizika. Mwamwamphu ŵakamba kupharazgira ŵamumbumba yawo, ŵabwezi ŵawo na waliyose uyo wakategherezganga. Ntheura Ernest na Rose ŵawovwira ŵanthu ŵakujumpha 70 kusambira unenesko na kubatizika.
7. Kasi ntchivichi chikuchitika usange unenesko wa mu Baibolo wajintha misisi mu mtima withu? (Luka 6:45)
7 Ntchakuwonekerathu kuti para unenesko wajintha misisi mu mtima withu, tingakhalapo waka chete yayi. (Ŵazgani Luka 6:45.) Nase tikujipulika nga umo ŵasambiri ŵa Yesu ŵakajipulikiranga apo ŵakati: “Tingaleka yayi kuyowoya vinthu ivyo tili kuwona na kupulika.” (Mil. 4:20) Tikuwutemwa chomene unenesko ndipo tikukhumba kuphalirako ŵanthu ŵanandi.
TIKUPHARAZGA CHIFUKWA TIKUTEMWA ŴANTHU
8. Kasi ntchivichi chikutikhukiska kuti tiphalireko ŵanji makani ghawemi? (Wonani bokosi lakuti “ Temwani Ŵanthu—Ŵazgorani Kuŵa Ŵasambiri.”) (Wonaniso chithuzi.)
8 Nga ni Yehova na Mwana wake, nase tikutemwa ŵanthu. (Zinth. 8:31; Yoh. 3:16) Tikuŵalengera lusungu ŵanthu “ŵambura Chiuta” kweniso awo ‘ŵalije chigomezgo.’ (Efe. 2:12) Chifukwa cha masuzgo agho ŵakusangana nagho, vili nga ŵali mu chikhululu chitali, ndipo ise tili na chingwe chakuŵawovwira kufumamo, icho ni makani ghawemi gha Ufumu wa Chiuta. Pakuti tikuŵatemwa na kuŵalengera lusungu, tikuchita vyose ivyo tingafiska kuti tiŵapharazgire makani ghawemi. Uthenga wakuzirwa uwu ungaŵawovwira kuti ŵaŵe na chigomezgo, kweniso kuŵa na umoyo uwemi sono, na kuŵapa chilindizga chakuzakasanga “umoyo wanadi,” uwo mbumoyo wamuyirayira mu charu chiphya cha Chiuta.—1 Tim. 6:19.
Tikuŵikapo mtima kuphalirako ŵanji makani ghawemi chifukwa chakuti tikuŵatemwa kweniso kuŵalengera lusungu (Wonani ndime 8)
9. Kasi tikuŵachenjezga vichi ŵanthu vyakukhwaskana na munthazi, ndipo chifukwa wuli? (Ezekiyeli 33:7, 8)
9 Chitemwa chikutovwiraso kuti tiŵachenjezge ŵanthu kuti umaliro wa charu chiheni ichi uli pafupi. (Ŵazgani Ezekiyeli 33:7, 8.) Tikuŵalengera lusungu ŵanthu wose, kusazgapo na ŵabali ŵithu awo ŵakuteŵetera Yehova yayi. Ŵanthu ŵanandi ŵakujikhalira waka kwambura kumanya ivyo vichitikenge kunthazi, nga kuti kuzamuŵa “suzgo yikuru, iyo yindachitikepo kufuma ku uyambiliro wa charu m’paka sono, ndipo yizamuchitikaso chara.” (Mat. 24:21) Tikukhumba kuti ŵamanye ivyo vizamuchitika pa nyengo ya cheruzgo, apo visopa vyose vyautesi vizamuparanyika, ndipo pamanyuma charu chiheni ichi chizamuparanyika pa Aramagedoni. (Chivu. 16:14, 16; 17:16, 17; 19:11, 19, 20) Tikulomba kuti mphanyi ŵanthu ŵanandi ŵapulikira uthenga wakuchenjezga uwu na kusankha kusopa Yehova. Kweni wuli pakuyowoya za awo ŵakupulikira yayi chenjezgo ili, kusazgapo ŵamumbumba yithu?
10. Chifukwa wuli tikwenera kulutilira kuchenjezga ŵanthu mwaluŵiro?
10 Nga umo tikawonera mu nkhani iyo yajumpha, vingazakachitika kuti Yehova wangazakaŵaponoska ŵanthu awo ŵazamwamba kuŵa na chipulikano mwa iyo para ŵawona kuti Babuloni Mukuru wakuparanyika. Para ni nthena, mbwenu ntchakuzirwa chomene kuti tilutilire kuŵachenjezga. Ghanaghanirani fundo iyi: Ivyo tikuŵaphalira pasono vingazakaŵawovwira kuti ŵazakakumbukire fundo yinyake panyengo iyo. (Yaniskani na Ezekiyeli 33:33.) Panji ŵazamukumbukira chenjezgo ilo ŵakapulika kwa ise na kuchiskika kwamba kusopa nase lumoza Yehova pambere umaliro undafike. Nga ni mulinda wa jele ku Filipi uyo wakasintha pamanyuma pakuwona “chindindindi chikuru” icho chikachitika, panji ŵanthu ŵanyake awo ŵakukana uthenga withu pasono, ŵangazakasintha pamanyuma pakuwona Babuloni Mukuru wakuparanyika.—Mil. 16:25-34.
TIKUPHARAZGA CHIFUKWA TIKUTEMWA YEHOVA NA ZINA LAKE
11. Kasi Yehova tikumupa wuli uchindami, ntchindi, na nkhongono? (Chivumbuzi 4:11) (Wonaniso vithuzi.)
11 Chifukwa chikuru chomene icho tikupharazgira makani ghawemi ntchakuti tikutemwa Yehova Chiuta na zina lake lituŵa. Tikuwona uteŵeti withu kuŵa nthowa yakulumbira Chiuta uyo tikumutemwa. (Ŵazgani Chivumbuzi 4:11.) Nase na mtima wose tikuzomerezga kuti Yehova Chiuta ngwakwenelera kupokera uchindami, ntchindi, na nkhongono kufuma ku wose awo ŵakumusopa mwakugomezgeka. Tikumupa uchindami na ntchindi para tikuphalirako ŵanji ukaboni wakukhorweska wakuti ndiyo ‘wakalenga vinthu vyose’ kweniso kuti tili na umoyo chifukwa cha iyo. Tikumupa nkhongono zithu para tikugwiliskira ntchito nyengo yithu, nkhongono, na vinthu ivyo tili navyo pakupharazga umo tingafiskira kuyana na umo vinthu viliri pa umoyo withu. (Mat. 6:33; Luka 13:24; Kol. 3:23) Unenesko ngwakuti, tikutemwa chomene kuyowoya vyakukhwaskana na Chiuta uyo tikumutemwa. Tikukondwa kuphalirako ŵanji vyakukhwaskana na zina lake kweniso ivyo likwimira. Chifukwa wuli?
Tikumupa Yehova nkhongono zithu usange tikugwiliskira ntchito nyengo yithu, nkhongono, na vinthu ivyo tili navyo kuti tichiteko mwakukwana ntchito yakupharazga kuyana na umo vinthu viliri pa umoyo withu (Wonani ndime 11)
12. Kasi tikutuŵiska wuli zina la Yehova mu uteŵeti?
12 Kutemwa Yehova kukutituma kuti tiŵikepo mtima kutuŵiska zina lake. (Mat. 6:9) Nase tikukhumba kovwirapo kutuŵiska zina lake ku mautesi ghaheni chomene agho Satana wakuliyowoyera. (Gen. 3:1-5; Yobu 2:4; Yoh. 8:44) Para tili mu uteŵeti, tikuŵikapo mtima kovwira wose awo ŵakutegherezga kumanya makora umo Yehova waliri nadi. Tikukhumba ŵanthu wose ŵamanye kuti mukhaliro ukuru chomene wa Yehova ntchitemwa, nthowa zake zose ni zaurunji na zakufikapo, kweniso kuti Ufumu wake sonosono apa umazgenge masuzgo ghose na kwiziska mtende pa charu chapasi kuti ŵanthu ŵazakaŵe ŵakukondwa. (Sal. 37:10, 11, 29; 1 Yoh. 4:8) Para tikuvikilira lumbiri lwa Yehova mu uteŵeti, tikutuŵiska zina lake. Tikuŵaso ŵakukhorwa pakumanya kuti tikuchita vinthu kuyana na zina lithu. Chifukwa wuli tikuyowoya nthena?
13. Chifukwa wuli tikuwona kuti ni mwaŵi wapadera kuchemeka Ŵakaboni ŵa Yehova? (Yesaya 43:10-12)
13 Yehova watisankha kuŵa “ŵakaboni” ŵake. (Ŵazgani Yesaya 43:10-12.) Vyaka vinandi kumasinda uku, kalata yakufuma ku Wupu Wakulongozga yikati: “Mwaŵi wapadera chomene uwo waliyose wangaŵa nawo, nkhuchemeka Kaboni wa Yehova.” c Chifukwa wuli tikuyowoya nthena? Wonani chiyelezgero ichi. Para mukukhumba munthu munyake wakaŵe kaboni winu ku khoti, kasi mungasankha munthu wuli? Ntchakuwonekerathu kuti mungasankha munthu uyo mukumumanya makora na kumugomezga, kweniso uyo wali na lumbiri luwemi, mwakuti para wakupeleka ukaboni ŵanthu ŵangamugomezga. Pakutisankha ise kuŵa Ŵakaboni ŵake, Yehova wakulongora kuti wakutimanya makora kweniso wakutigomezga kuti tingapelekera ukaboni ku ŵanji kuti iyo ndiyo ni Chiuta waunenesko pera. Tikuwona kuti ni mwaŵi wapadera chomene kuŵa Ŵakaboni ŵake, ndipo tikugwiliskira ntchito m’pata uliwose uwo wasangika kuti timanyiske ŵanthu zina lake na kususka mautesi ghanandi ghakukhwaskana na iyo. Para tikuchita nthena, tikukhala kuyana na zina lithu lakuti Ŵakaboni ŵa Yehova, ilo tikunotha nalo chomene!—Sal. 83:18; Rom. 10:13-15.
TILUTILIRENGE KUPHARAZGA M’PAKA PAUMALIRO
14. Kasi ni vinthu wuli vyakukondweska ivyo vingazakachitika munthazi?
14 Ntchakukondweska chomene kumanya vinthu vyakukondweska ivyo vingazakachitika panthazi apa! Na thumbiko la Yehova, tikugomezga kuti ŵanandi ŵazomerenge unenesko pambere suzgo yikuru yindambe. Kweniso tiliso ŵakukondwa kumanya kuti panji pa nyengo yakusuzga chomene mu mbiri ya ŵanthu, apo mpha suzgo yikuru, tizamuwona ŵanthu ŵanyake ŵakufumako ku chigaŵa cha Satana na kwiza ku chigaŵa chithu kuti tilumbire lumoza Yehova!—Mil. 13:48.
15-16. Kasi tilutilirenge kuchitachi, ndipo m’paka pawuli?
15 Ndipouli, tili na ntchito yakuti tichite. Tili na mwaŵi wa kuchitako ntchito iyo yizamuchitikaso yayi, yakupharazga makani ghawemi gha Ufumu wa Chiuta pa charu chose chapasi. Kweni pa nyengo yimozamoza, tikwenera kulutilira kuchenjezga ŵanthu. Ŵanthu ŵakwenera kumanya kuti umaliro wa charu chiheni ichi uli pafupi chomene. Ntheura para nyengo ya cheruzgo yafika, ŵazamumanya kuti uthenga uwo tikapharazganga ukafumanga kwa Yehova Chiuta.—Ezek. 38:23.
16 Ipo kasi taŵikapo mtima kuchita vichi? Chifukwa chakuti tikughatemwa makani ghawemi, tikutemwa ŵanthu, kweniso kuluska vyose tikutemwa Yehova Chiuta na zina lake, tilutilirenge kupharazga mwamwamphu, mwaluŵiro, ndiposo na mtima wose, m’paka apo Yehova wazamuyowoyera kuti, “Sono mbwenu!”
SUMU 54 “Nthowa Ni Iyi”
a Ungano wapachaka ukachitika pa Okutobala 7, 2023, ku Malo Ghakuchitirako Ungano gha Ŵakaboni ŵa Yehova gha Newburgh ku New York, U.S.A. Pamanyuma pulogiramu yose yikaŵikika mu JW Broadcasting®—Chigaŵa 1 chikaŵikika mu Novembala 2023 ndipo Chigaŵa 2 mu Janyuwale 2024.
b Wonani nkhani yakuti “Baibolo Likusintha Umoyo wa Ŵanthu—Nkhakondwa Chomene na Mazgoro Ghakupulikikwa Makora gha mu Baibolo,” iyo yili mu Gongwe la Mulinda la Febuluwale 1, 2015.
c Wonani Buku Lapachaka la Ŵakaboni ŵa Yehova la Chingelezi la 2007, peji 3.
