OCIPAMA CELILONGISO 20
OCISUNGO 67 “Kunda Ondaka”
Ecelela Okuti Ocisola ci ku Vetiya Oku Amamako Oku Kunda!
“Kolofeka viosi, tete ku kundiwa olondaka viwa.”—MAR. 13:10.
OCIMÃHO CELILONGISO
Ci lekisa ndomo ocisola ci tu vetiya oku kuata ombili kupange woku kunda kuenda oku kakatela kupange waco.
1. Nye tua lilongisa kohongele yunyamo wo 2023?
KOHONGELE yunyamo wo 2023 yina ya siata oku lingiwa anyamo osi, a tua yeva alomboluilo amue okaliye a sanjuisa calua atiamẽla kalongiso etu kuenda asapulo a komõhisa atiamẽla kupange woku kunda. Ndeci, tua lilongisa okuti, omanu vamue va ka kuata epuluvi lioku tiamẽla kafendeli va Yehova noke lio Bavulono Yinene oku kunduiwa. Tua yevavo esapulo liokuti oku upisa kosãi ya Kuvala wo 2023 akundi Vusoma, ka va ka kisikiwa vali oku eca ulandu wavo wosi woku kunda. Lapongoloko a lingiwa ndeti, ci lekisa hẽ okuti upange woku kunda ka u kuete vali esilivilo lialua kuenda ka u sukila onjanga? Sio hacoko!
2. Momo lie upange woku kunda u sukilila onjanga okuti kosimbu ci sule? (Marko 13:10)
2 Eteke leteke upange woku kunda u sukila oku lingiwa lonjanga yalua okuti kosimbu ci sule. Momo lie? Momo otembo yi kasi oku sulila. Kũlĩhĩsa eci Yesu a popia catiamẽla kupange woku kunda koloneke via sulako. (Tanga Marko 13:10.) Ndomo ca lekisiwa vulandu wa Mateo, Yesu wa popele hati, olondaka viwa via laikele oku kundiwa koluali luosi, osimbu “esulilo” ka lieyile. (Mat. 24:14) Ondaka eyi yi lomboloka esulilo lioluali lulo lua vĩha lua Satana. Yehova wa sokiya ale ‘eteke lowola’ ku ka pita ovina viaco. (Mat. 24:36; 25:13; Ovil. 1:7) Eteke leteke tu panda kotembo yaco. (Va Rom. 13:11) Pole, osimbu tu lavoka oku iya kuesulilo, tu sukila oku amamako oku kunda.
3. Nye ci tu vetiya oku kunda?
3 Poku sokolola catiamẽla kupange woku kunda, tu sukila oku lipula ndoco: Nye ci tu vetiya oku kunda olondaka viwa? Ocisola. Eci tu kunda tu lekisa ocisola cetu kolondaka viwa, komanu kuenda ca velapo vali tu lekisa ocisola ku Yehova lo konduko yaye. Tu konomuisi onepa lonepa.
ETU TU KUNDA MOMO TU SOLE OLONDAKA VIWA
4. Tu liyeva ndati eci tu tambula esapulo limue liwa?
4 Ove hẽ wivaluka ndomo wa liyeva eci wa tambula esapulo limue liwa, ndeci oku citiwa kuoñaña yimue, ale upange umue wa lavokaile calua? Citava okuti, wa yeva esanju lialua kuenje ca ku vetiya oku sapuilako lonjanga epata kuenda akamba. Anga hẽ wa kuata esanju limuamue eci wa yeva esapulo lia velapo Liusoma wa Suku?
5. Wa liyeva hẽ ndati eci wa lilongisa onjanja yatete ocili Condaka ya Suku? (Talavo ociluvialuvia.)
5 Sokolola ndomo wa liyeva eci wa lilongisa ocili Condaka ya Suku onjanja yatete. Ove wa limbuka okuti Isia yove wo kilu oku sole, eye o yongola okuti o panga onepa kepata liafendeli vaye kuenda wa likuminya oku malako evalo, ohali, loku ka mola vali vangandiove va fa kuenda ovina vikuavo voluali luokaliye. (Mar. 10:29, 30; Yoa. 5:28, 29; Va Rom. 8:38, 39; Esit. 21:3, 4) Ovina wa lilongisa via ku nenela esanju lialua. (Luka 24:32) Omo lioku sola calua ovina wa kala oku lilongisa ca ku vetiya oku kuata onjongole yoku sapuilako omanu vosi!—Sokisa Yeremiya 20:9.
Eci tu lilongisa ocili Cembimbiliya tu kuata esanju lialua kuenje tu vetiyiwa oku sapuilako vakuetu! (Tala ocinimbu 5)
6. Nye tua lilongisa kulandu wa manji Ernest kuenda Rose?
6 Kũlĩhĩsa ulandu umue. Manji umue o tukuiwa Ernest b wa fisa isiaye eci a kuata ekũi kanyamo. Manji Ernest wa popia hati: “Nda enda oku lipula ndoco: ‘Anga hẽ eye wa enda kilu? Ale wa fa otembo ka yi pui?’ Nda kuatelele onya omãla vakuavo va kuatele va isiavo.” Manji Ernest olonjanja viosi wa endaile kovilangu, loku kekamẽla keyambo lia isiaye kuenda oku likutilila hati: “A Suku, mange ohenda, njongola oku kũlĩha oku ku kasi isiange.” Eci pa pita 17 kanyamo tunde eci isiaye a fa, wa tava oku lilongisa Embimbiliya. Eye wa komõha calua poku kũlĩha okuti, omanu va fa ka va kũlĩhĩle vali cimue, ovo va kasi ndu okuti va pekela kotulo tuelume kuenda Embimbiliya li likuminya epinduko kovaso yoloneke. (Uku. 9:5, 10; Ovil. 24:15) Omo liaco, wa sanga atambululo apulilo ana o sakalasaile vokuenda kuanyamo alua! Manji Ernest wa sanjukilile calua ovina a kala oku lilongisa. Ukãi waye Rose wa likongela kokuaye kelilongiso kuenda wa solavo calua ovina a lilongisa viatiamẽla kesapulo Liusoma. Kunyamo wo 1978 kavali kavo va papatisiwa. Ovo va enda oku kundila epata liavo, akamba kuenda omanu vakuavo ocili va lilongisa. Onima yeyililako yeyi yokuti, eye kumue lukãi waye va kuatisa eci ci pitahãla 70 komanu oku kũlĩha Yehova kuenda oku papatisiwa.
7. Eci tu sola ovina tua lilongisa Vembimbiliya, tu vetiyiwa oku linga nye? (Luka 6:45)
7 Ocili okuti, eci tu sola ovina tua lilongisa Vembimbiliya, tu vetiyiwa oku sapuilako vakuetu. (Tanga Luka 6:45.) Etu tu liyeva ndeci olondonge via Yesu vio kocita catete via popia hati: “Ka tu pondola oku liwekapo oku vangula ovina tua mola levi tua yeva.” (Ovil. 4:20) Etu tu sole calua ocili Cembimbiliya okuti, tu vetiyiwa oku sapuilako omanu valua ocili caco.
ETU TU KUNDA MOMO TU SOLE OMANU
8. Nye ci tu vetiya oku sapuilako vakuetu olondaka viwa? (Tala okakasia hati, “ Sola Omanu—Linga Olondonge.”) (Talavo ociluvialuvia.)
8 Etu tu sole omanu, ndeci Yehova, lomõlaye. (Olosap. 8:31; Yoa. 3:16) Tu kuetele ocikembe vana ka va ‘kũlĩhĩle Suku’ kuenda vana ka va kuete “elavoko.” (Va Efe. 2:12) Ovo veyuka lovitangi vialua komuenyo, pole, etu tu kuete ovina va sukila okuti, olondaka viwa Viusoma wa Suku. Omo okuti tu va sole kuenda tu va kuetele ocikembe, tu likolisilako oku va sapuila olondaka viwa. Esapulo liaco, li yukisa ovitima viavo lelavoko, loku va kuatisa oku sanga omuenyo wa velapo cilo kuenda oku va ĩha elavoko liomuenyo ko pui voluali luokaliye lua Suku.—1 Tim. 6:19.
Ocisola kuenda ocikembe tu kuetele omanu ci tu vetiya oku likolisilako oku va kundila olondaka viwa (Tala ocinimbu 8)
9.Elungulo lipi lio kovaso yoloneke tua siata oku eca kuenda momo lie? (Esekiele 33:7, 8)
9 Ocisola tu kuetele omanu, ci tu vetiyavo oku va sapuila okuti esulilo lioluali lulo li kasi ocipepi. (Tanga Esekiele 33:7, 8.) Etu tu kuetele ocikembe omanu vosi, oku kongelamo epata lietu ka li vumbi Yehova. Omanu valua ka va kũlĩhĩle okuti, ku laika oku “iya ohali ya piãla okuti, ka ya la pita tunde kefetikilo lioluali toke cilo kuenda ka yi ka pitako vali.” (Mat. 24:21) Tu yongola okuti, ovo va kũlĩha eci ci ka pita vokuenda kuotembo yaco yesombiso okuti, tete oku nyõliwa kuetavo liesanda, noke oluali lulo lua vĩha ko Harmagedo. (Esit. 16:14, 16; 17:16, 17; 19:11, 19, 20) Tu likutilila oco omanu valua va yevelele ovina tu va sapuila kuenda oku nõlapo oku vumba Yehova cilo kumue letu. Pole, nye ci popiwa komanu vana ka va yongola oku yevelela, oku kongelamo apata etu?
10. Momo lie ci kuetele esilivilo oku amamako oku lungula omanu kueci ci ka pita ndopo?
10 Ndomo tua ci konomuisa vocipama ca pita, citava okuti Yehova o ka yovola omanu vana va ka linga apongoloko lutima wosi, eci va ka mola oku nyõliwa kuo Bavulono Yinene. Omo liaco, ci sukila onjanga oku amamako oku sapuila omanu catiamẽla kovina evi. Kũlĩhĩsa okuti: Ovina tu va sapuila cilo, va pondola oku vi ivaluka noke. (Sokisa Esekiele 33:33.) Pamue va ka ivaluka elungulo va yevele kokuetu kuenje va ka vetiyiwa oku likongela letu koku vumba Yehova. Ndeci ca lipita lukuakayike ko Filipoi okuti, wa linga lika apongoloko eci “kua pita ocilemawe cinene,” citava okuti vana ka va tava cilo, va ka linga apongoloko eci va ka mola oku nyõliwa kuo Bavulono Yinene.—Ovil. 16:25-34.
ETU TU KUNDA MOMO TU SOLE YEHOVA KUENDA ONDUKO YAYE
11. Tu eca ndati ku Yehova ulamba, lesumbilo kuenda unene? (Esituluilo 4:11) (Talavo ociluvialuvia.)
11 Esunga lia velapo lieci tu kundila olondaka viwa ceci okuti, tu sole Yehova kuenda onduko yaye yi kola. Etu tu tenda upange woku kunda ndonjila yimue yoku sivaya Suku una tu sole calua. (Tanga Esituluilo 4:11.) Tu tava lutima wosi okuti Yehova Suku yetu o sesamẽla oku tambula ulamba, lesumbilo kuenda unene. Tu eca ulamba kokuaye kuenda esumbilo, poku sapuila komanu okuti Suku eye wa “lulika ovina viosi” kuenda tu kasi lomuenyo omo okuti eye wa tu lulika. Tu eca kokuaye unene eci tu talavaya lotembo yetu, ongusu kuenda ovina tu kuete oco tu kunde ndomo ci likuata lepondolo lietu. (Mat. 6:33; Luka 13:24; Va Kol. 3:23) Etu tu sanjukila oku vangula catiamẽla ku Suku, una tu sole calua. Tua siatavo oku vetiyiwa oku sapuilako vakuetu catiamẽla konduko yaye kuenda eci oyo yi lomboloka. Momo lie?
Tu eca ku Yehova unene wetu eci tu talavaya lotembo yetu, ongusu kuenda ovina tu kuete oco tu kunde ndomo ci likuata lepondolo lietu (Tala ocinimbu 11)
12. Tu lekisa ndati okuti tua sumbila onduko ya Yehova kupange woku kunda?
12 Ocisola tu kuetele Yehova ci tu vetiya oku sumbila onduko yaye. (Mat. 6:9) Tu yongola oku sapuila komanu okuti, ovina vĩvi Satana a siata oku sandeka viatiamẽla ku Yehova, haviociliko. (Efet. 3:1-5; Yovi 2:4; Yoa. 8:44) Eci tu kunda tu lekisa okuti, tu yongola oku teyuila ekalo lia Suku yetu, poku sapuila komanu ocili catiamẽla kokuaye kuenda ndomo eye a tuwa. Tu yongola okuti, omanu vosi va kũlĩha okuti ocituwa caye ca velapo ocisola kuenda onjila yaye yoku viala yesunga, Usoma waye ndopo u ka malako ohali yosi, loku nena ombembua lesanju kapata omanu. (Osa. 37:10, 11, 29; 1 Yoa. 4:8) Eci tu sapuila komanu ovina viaco viatiamẽla ku Yehova, tu kasi oku lekisa esumbilo konduko yaye. Tu kuetevo esanju omo okuti, tu kasi oku tẽlisa ocikele cetu coku kala Olombangi Via Yehova. Momo lie tu ci popela?
13. Momo lie tu popela okuti Esumũlũho linene oku tukuiwa okuti Tulombangi Via Yehova? (Isaya 43:10-12)
13 Yehova wa tu nõla oco tu kale ‘olombangi’ viaye. (Tanga Isaya 43:10-12.) Kanyamo apita, ukanda umue Wosungu Yolombangi Via Yehova wa popele hati: “Esumũlũho lia velapo omunu umue a pondola oku kuata, oku tukuiwa okuti Ombangi ya Yehova.” c Momo lie? Kũlĩhĩsa ocindekaise eci. Nda ove o yongola okuti omunu umue o kala ombangi yove kocitangi cimue ci sukila oku tetuluiwa kombonge, nda wa nõla omunu una wa kũlĩha ciwa haeye wa kolela okuti, o ku imbila uvangi wa koleliwa. Yehova poku tu nõla oco tu kale Olombangi viaye, ci lekisa okuti wa tu kũlĩha ciwa kuenda wa tu kolela oco tu sapuile komanu okuti eye lika Suku yocili. Esumũlũho linene oku kala Olombangi Via Yehova. Omo liaco, kapuluvi osi tu eceleli okuti onduko yaye yi kũlĩhĩwa lomanu vosi, oco tu ece uvangi wokuti ovina viosi vĩvi via popiwa viatiamẽla Kokuaye, viuhembi. Poku ci linga, tu kasi oku tẽlisa elomboloko lionduko tuambata yokuti, Olombangi Via Yehova!—Osa. 83:18; Va Rom. 10:13-15.
TU KAMAMAKO OKU KUNDA TOKE KESULILO
14. Ocina cipi ci komõhisa tu lavoka ndopo?
14 Tu yongola calua oku ka mola ovina vi laika oku pita ndopo! Lesumũlũho lia Yehova tu lavoka okuti omanu valua va likongela kokuetu, osimbu ohali ya piãla ka ya fetikile. Handi vali, tu kuetevo esanju omo okuti, vokuenda kuohali ya piãla yina ka ya la pita voluali, omanu valua va ka tunda voluali lua Satana loku likongela kokuetu poku sivaya Yehova!—Ovil. 13:48.
15-16. Nye tu kamamako oku linga kuenda toke otembo yipi?
15 Osimbu otembo yaco ka ya pitĩlĩle, tu kuete upange wa velapo okuti, ka u ka lingiwa vali. Tu kuete esumũlũho linene lioku kunda olondaka viwa Viusoma wa Suku koluali luosi. Handi vali, tu sukila oku amamako oku lungula omanu kueci ci laika oku pita ndopo. Omanu va sukila oku kũlĩha okuti, esulilo lioluali lulo lũvi li kasi ocipepi. Omo liaco, eci otembo yaco yesombiso yi pitĩla, ovo va ka limbuka okuti esapulo etu tua enda oku kunda lia tunda muẽle ku Yehova Suku.—Esek. 38:23.
16 Oco hẽ nye tua nõlapo oku linga? Omo liocisola tu kuetele olondaka viwa, omanu, Yehova kuenda onduko yaye, tu kamamako oku kunda lesanju, kuenda lombili, toke eci Yehova a ka popia hati, “Ci tẽla!”
OCISUNGO 54 “Eyi Oyo Onjila”
a Ohongele ya siata oku lingiwa anyamo osi, ya pita keteke 7 ya Mbalavipembe yunyamo wo 2023 Konjango Yolohongele Vinene yo Newburgh Yolombangi Via Yehova ko Nova Yorke ko Estadus Unidus. Ulandu wosi wohongele, wa lekisiwa vocipama co JW Broadcasting Onepa 1 kosãi ya Kuvala wo 2023 kuenda onepa 2 kosãi ya Susu 2024.
b Tala ocipama losapi hati: “Nda Komõha Calua Atambululo Embimbiliya a Sunguluka Hao a Teta Onimbu,” ponepa Embimbiliya li Pongolola Omuenyo Womanu, Vutala Wondavululi 1 ya Kayovo wo 2015.
