1. Kongar 2023 annuel miting a kenem nawal duwom enjin?

 KONGAR 2023 annuel miting a pambar, kenem pilgi nimen wal yu pende ne auninjip. Ala, yu mulom ka Baibel yu neori kesmen bar, karkar enamen mal ninjip pinjin eri. Ende duwom erkanjin, Babilon Kerma mo Lotu Gend porpor Got tonda kunum, bulto alamb pende wo Got alambnem man kolngonam. Yu ende pinjin, Novemba 2023 pulnombol pablisa walem Baibel yu neori kel kongan enam mal ripot, porpor boll nangonam paninjip, yu embe ninjip bar Baibel yu neori kesmen kongan, komna kongan kerma mal kanjin mal, yipe embe nakanamen mo? Ma, embe napisamen!

2. Kunum dingding ne woyem punom bar, nalende Baibel yu neori kesmen kongan wal kerma paim? (Mak 13:10)

² Kunum dingding ne tang woyem punom bar, Baibel yu neori kesmen kongan wal kerma paim eri. Nalende embe nimen? Nalenem, kunum kamkam wei punom. Kunum porninda bar, Baibel yu neori keramen mal Jises yu nim, omukro kanamen. (Mak 13:10 gere.) Meitu, Jises nim yu ding mal nim, Baibel yu ka neori kelsip mal tambem yemyem punambe alamb poro pisambe, bulto, “porninda” kunum min wonda panim. (Mat. 24:14) Yu e nim, Seten yipe mal kantawol ende, mambnem kes na ombun duwom paim porninda e pilnim. Wal embe min wonda Johova, “kunum na anj dunglom” kun kanem. (Mat. 24:36; 25:13; Apo. 1:7) Kunum dingding ne wopunom kunum, min wonda kunum semand eri pumon. (Rom 13:11) Embe pile, kenem anjngo Baibel yu neori kel pupo, porninda kunum min wonda.

3. Nawal erkelde kenem Baibel yu neori kesmen?

³ Kenem Baibel yu neori kesmen bar, ki kerma ende kenem  poro buro pisamen: Nalende kenem Baibel yu ka neori kesmen? Yu onom ende ninamen, kanka mem erkelde embe esmen. Kenem Baibel yu neori kesim kongan esmen, kanka mem tanimen, e embe mal, Baibel yu ka kanmen, alamb kanka kanmen—ala wal kerma wei paim, Johova na olom kangem kanka kanmen. Pi mambnem dingding ne omukro kanamen.

KENEM BAIBEL YU NEORI KESMEN NALENEM YU KA KANKA KANMEN

4. Yu ka neori kenjip kenem pinjin kunum, nal nepinjin?

⁴ Yu ka ende ne nim ngonambe pisen kunum, nalmal pisen buro pile—pende embe mal, pemili tuwalto ngal ende kangsim mo, ku-kongan ende ambsik paim ngom kunum, nim kawei pile pemili mo senon ga nengonal nepisen. Got Gapman yu kawei nengojup—pin kunum, nim bunuman embe mal sin mo?

5. Nim pulnombolo Got Yuwom yuwei duwom erkanin kunum, nal nepin? (Piksa meim pra kane.)

⁵ Got Yuwom yuwei Baibel a mom, nim pulnombol duwom erkanin kunum, nal nepin mal buro yem kel pile. Nim pilkane erin Danem min epen meim, nim kankanem. Olom pemili kerma ende meim bar nim tuwal molo, lotu erngondol nepim, ombun duwom pi paim olom yu dongal ne to porninal panim. Ala nim kanka kanin alamb gonjup paim, kui ermolo kunum kol senda kunum, akil yem wonambe kanjel panim—ala wal pende pra enda eri. Nim yu embe mal duwom erkan, erkelde nim kumbola kawei wei pin. (Mak 10:​29, 30; Jon 5:​28, 29; Rom 8:​38, 39; Rev. 21:​3, 4) (Luk 24:32) Yuwei kawei duwom erkan, kanka kane alamb ende nengonal nepin!—Jeremaia 20:9 omukro kane.

6. Ernest na Rose bol wal min wombar, nim nawal duwom enen?

⁶ Wal ende min wom mal omukro kandpe. Pilgi ding angjen ende kangem Ernest, b kongar 10-mom kunum olom dam gom. Ernest  bu puli kele embe nim: “Na dana gom se epen punom mo, gol serai pu sikerem nepinj? Ngal pende danjep bol ai monjup mal, monu wei nepinj.” Ernest, kunum kunum kipkua pu, dam gulto pakjip bar gosmung pupbolo yane nine erim: “Olom Got ki si, kaple ende dana nanja bar meim erkeli kanal panim.” Olom dam gom kongar 17 wopungo, Baibel yu duwom erngonam paninjip, kaple panim. Baibel yu duwom erkanim, gonjup alamb kanpolnaro wurmal paim, bulto aksam panim bar kawei pim. Olom ki pende kunum kanan pundom sinal nepil mom, Baibel pundom ngom. (Ekl. 9:​5, 10; Apo. 24:15) Ernest, Baibel a yuwei pende duwom erkanim bar, kawei pim! Ambiyem Rose wo olom kolngongo, Got Gapman yu kanka kane ai duwom enjil. Kongar 1978 kunum, enjel nol panjil. Enjel kumbol weingo yu ka duwom erkanjil, pemili aijel, senonjil ga, na ga pende yu ninjil kapinjip ga, nengojil. Ernest na Rose mambnem embe enjil bar, alamb 70-poro pakerombulngo yuwei duwom erkane nol panjip.

7. Kenem Baibel yu kanka kanmen mem wose kerma punom kunum, nawal min wonom? (Luk 6:45)

⁷ Baibel yu kanka kanmen mem wose kerma punom kunum, okul erpaksamen kaple nande, ne alamb ende ngonamen nepismen. (Luk 6:45 gere.) Komna-Jises disaipol walem pinjip mal, ding mal pismen. Enjep embe ninjip: “Kin wal pende pilkane enjin bar gupo kolrugnamen kaple nanem.” (Apo. 4:20) Kenem yuwei kankawei kanmen pile, alamb pulikes nengonamen nepismen.

KENEM BAIBEL YU NEORI KESMEN NALENEM ALAMB KANKA KANMEN

8. Nawal erkelde kenem yu ka ne alamb ende ngomon? (Boks a yu pengem “ Laikim ol Man—Kamapim Ol Disaipel,” pane paim kane.) (Piksa pra kane.)

⁸ Johova, Ngangem Jises bol esbel mal, kenem alamb kanka kanmen. (Prov. 8:31; Jon 3:16) Alamb “Got kanpolnaro,” wal ka ende “kui nasim” alamb kenem enjep wandil wei simen. (Efe. 2:12) Nomolpa esim bar ombun kanem kanem min wonom, enjep tomene wei kerem ba pakeronda wal kenem kanmen—e Got Gapman yu ka. Enjep kanka kane wandil simen mem erkelde, ombol kes ere Baibel yu ka ne enjep porpor ngonamen ne esmen. Yu kawei ninamen enjep pakero kelde, yipe kamolo, pilgi ne wal ka kui enam, “e Got kunum kol simin kera kunum”—kolmem wei si—aimanj aimanj moram.—1 Tim. 6:19.

9. Nawal ende bulto min wonda alamb kanpol tonam yu nengomon, ala nalende embe esmen? (Esekiel 33:​7, 8)

⁹ Alamb kanka kanmen erkelde mambnem kes yipe ya mala ermeim alamb, Got to porninda kunum mand wonom pane alamb ngomon. (Esekiel 33:​7, 8 gere.) Kenem maiyam ding na meimen bar mand meim alamb, wandil wei simen. Enjep puli, kunum dingding ne  nomolpa esim wal pile, bulto min wonda wal pilpolnarom—kunum ele, “ombun kerma wei min wonda, Got pulnombol mal ersem kunum wo piwonom, ombun embe ende min nawoipom, ma, ala mibulto ende min nawonda eri.” (Mat. 24:21) Got alamb omukro kot erngonda kunum, nawal min wonda enjep pilkane enam kenem kapismen—yero lotu gend porpor ya mala seim to porne sikera, ala bulto, nganmal Amagedon wusngama mambnem kes porpor ya mala paim to porninda. (Rev. 16:​14, 16; 17:​16, 17; 19:​11, 19, 20) Kenem kapismen alamb puli wo kenem kolngo, Got wei lotu erngonam ne yane nimen. Ba, kenem pemili aijen, kanka kanmen ga na alamb pende, Got tonda yu nimen komol senapisim ga bol nawal min wonda?

10. Nalende Got alamb tonda kunum mand wei wonom pane alamb ngonamen, wal kerma paim?

¹⁰ Yero yu duwom enjin bar omukro kanjin, Bablion Kerma mo Lotu Gend porpor, ombun si porninda kanam kunum, kumbol ka senda alamb Got bol pilgi ninjip dal, enjep siyem ninda paninjin. Embe pile, Got alamb tonda pane pilsinam yu nengomon, yipe anjngo nengonamen wal kerma paim. Pilkane enamen: Yu yipe ne enjep ngomon erkelde, mibulto wal ende min wonda embe ninjip, ne pilkane enam. (Esekiel 33:33 omukro kane.) Ala kaple erim dal, wo kenem kolngonambe lotu wei ere, ombun wonda tuironamen wal enamen kunum yipe eri seim. Kulu Pilipai ye ende karpos pam, “kombkopo kerma weirongo” gar oloplop erim kunum, olom kumbol to akrom, embe ding mal, alamb pende yipe Baibel yu ka neori kesmen napisim alamb, Bablion Kerma mo Lotu Gend porpor ombun si porninam kunum kumbol to akronam eri.—Apo. 16:​25-34.

BAIBEL YU NEORI KESMEN NALENEM JOHOVA NA OLOM KANGEM KANKA KANMEN

11. Kenem nalmal Johova kangem ambil min kele, kangem kerma ngo, dongal ngomon? (Revelesen 4:11) (Piksa meim pra kane.)

¹¹ Mem kerma wei pande kenem Baibel yu ka neori kesmen, Got Johova na olom kangem kuru paim kanka kanmen. Kenem Baibel yu neori kesmen bar, Gotjon kanka kanmen kangem min kesmen. (Revelesen 4:11 gere.) Kenem kumbol pelngo min epen ga esim mal, Got kangem ambil min kele embe nimen: Olom lotu erngom alamb, Johova Got, kangem ambil min keramen, kangem kerma sinda, ala dongal ngonamen eri. Olom “wal porpor ersem” pane alamb ngomon bar, Johova kangem ambil min kele olom kangem kerma ngomon, ala kenem kol meimen mem olom ngom. Kenem olom dongal ngomon e—kenem dongal aijen—anj dunglom mo, kannomon wal  ngo, kolapis kerem kunum kumbol ngo Baibel yu neori kesmen. (Mat. 6:33; Luk 13:24; Kol. 3:23) Yu onom mal ende ninamen e, kanka kanmen Got, olom pane yu neori keramen kapismen. Kakanmen erkelde olom ye nalmal, na kangem yumem nalmal paim ne alamb ngomon. Nalende embe esmen?

12. Kenem Baibel yu neori kesmen kunum, nalmal Johova kangem ambil min kele erkelpe kuru sem?

¹² Johova kanka kanmen erkelde, kangem ambil min kele erkelpe kuru paim. (Mat. 6:9) Seten yu gend ne Johova kangem karo kes mokum, kenem Baibel yu neori kesmen bar ala erkun esmen. (Stt. 3:​1-5; Jop 2:4; Jon 8:44) Kenem Baibel yu neori kesmen bar ombol ere Got pakero, yu nengomon pisim alamb olom ye nalmal yuwei nengopo pilkane enam ne esmen. Kenem kapismen alamb porpor pilkane enam, Got mambnem kawei ende pase minro punom e kanka mem, embe pile, olom mambnem ka na dulto karkar ere alamb tawol enem. Ala mand wei enem olom Gapman wusngama, mambnem kes porpor yipe paim to porne, erkelde alamb porpor kapile kumbol amin moram. (Sng. 37:​10, 11, 29; 1 Jon 4:8) Ala Baibel yu neori kesmen kunum, Johova mambnem kapaim mal neori kesmen erkelpe olom kangem kuru seim. Kenem embe esmen bar kapismen nalenem, kangjen Johova Witnis pane paim konganem erkaple esmen. Nalmal embe esmen?

13. Kenem kangem Johova Witnis panim bar, nalende kapisamen? (Aisaia 43:​10-12)

¹³ Johova kenem wiro olom “witnis” moramen panim. (Aisaia 43:​10-12 gere.) Kongar pende wopunom Gapening Bodi ga, pepe ende boll ngonjup bar embe ninjip: “Alamb kenem Johova Witnis ende meimen panim bar, kenem kawei pisamen.”  c Nalende embe  pisamen? Yu ekin ende omukro kandpe. Nim kota pundol bar alamb ende witnis mora nepin dal, nim olom mambnem paim mal kanpolto, pilgi don alamb makrondol, olom mambnem kapaim erkelde yu ninda alamb pilgi ninam. Embe ding mal, Johova kenem makro olom Witnis moramen panim, olom kenem kanpolto pilgi ne olom dingeri Got wei paneori keramen pile makrom. Kenem olom Witnis meimen bar kapile, olom kangem ne auninpe alamb pilkane enam, ala yu gend puli ne olom kangem to kes moksum, erkun enamen nepisem. Kenem embe enjin dal, kawei pisamen nalenem, kangjen Johova Witnis pane paim mal konganem erkaple esmen!—Sng. 83:18; Rom 10:​13-15.

ANJNGO BAIBEL YU NEORI KELPU PORNINDA KUNUM PUNAMEN

14. Nawal ka pende mand, bulto min wonda mand enem?

¹⁴ Wal mibulto min wonda mand enem, kanamen bar kapismen! Ombun kerma min wonda mand enda kunum, Johova pakerondo alamb puli wo yuwei sinambe kanamen bar kapismen. Ala—ombun kerma wei, alamb mol woipum ende nawoipo mal min wonda kunum, kaple erim dal—alamb puli Seten mal tawol erim bar tuwal meim wakro, wo kenem kolngonambe Johova lotu erngonamen!—Apo. 13:48.

15-16. Kenem nawal ende anjngo enamen, ala erpupo nawal kunum porninda?

¹⁵ Pi kunum kenem kongan kerma wei paim. E, kongan ende ala min wondo-nanamen-kongan-enamen kongan wal kerma—e, Got Gapman Baibel yu ka neori kel sipe, mala alamb porpor pisam. Ala ding kunum, ombun kerma min wondo Got alamb tonda pane ngopo pilkane enam eri. Alamb pilkane enam, mambnem kes porpor paim Got to porninda kunum tang mand wei wonom. Got alamb omukro kot erngonda kunum, enjep pilkane enam kenem yu neori kenjin Got Johova bol wom panda.—Ese. 38:23.

¹⁶ Embe pamdal, kenem nawal enamen ne bunuman dongal wei panda? Kanka mem erkelde—kapile Baibel yu ka neori keramen, ala alamb kanka kanamen ala wal kerma wei paim, Got Johova na olom kangem kanka kanmen—embe pile, kunum tang mand wei wonom nepile, kenem kumbol ngo kapile Baibel yu neori kel pupo Johova olom “Pordom paninde, porninda!”