1. Ino ma raha nianarantsika baka tamy fivorian̈a fatao isaka taon̈o, tamy 2023 in̈y?

 TAMY fivorian̈a fatao isaka taon̈o a tamy 2023 in̈y, nisy fan̈ovoan̈a nataontsika tamy fahatakaran̈a momba raha inoantsika sasany. Naharen̈y filazan̈a ten̈a mamparavoravo momba fanompoan̈antsika koa atsika tamizin̈y. Ohatra, haintsika fa mety mbala hisy olo sasany hanompo Jehovah miaraka amintsika, nata efa afaran’ny fandravan̈ana Babylony Be. Nambara atsika koa fa nanomboko tamy Novambra 2023, tsy raha jiaby ataontsika amy fanompoan̈a eky soratintsika amy tatitry. Dikan’izen̈y ma asa fitorian̈a io efa tsy raha ten̈a maventy eky, aviô efa tsy asa meky eky ma izio? Tsy karaha zen̈y foeky!

2. Nan̈ino ma tôkony ho raha ten̈a maventy amintsika fo asa fitorian̈a io isan’andra isan’andra? (Marka 13:10)

² Tokôny hahaiho raha ten̈a maventy amintsika fo asa fitorian̈a io isan’andra. Nan̈ino? Fôtony efa tsy be eky fotoan̈a tavela, ho avy ny ten̈a farany. Diniha baka raha efa nivolan̈in’i Jesosy tsialohaloha momba asa fitorian̈a atao amin’ny andra farany io. (Vakia Marka 13:10.) Izikoa zahan̈a fitantaran̈an’i Matio, Jesosy nivolan̈a fa vaovao tsara io ambara olo jiaby ambony tany, alohan’ny havian’ny “farany.” (Mat. 24:14) Raha tiany volan̈iny amy “farany” io, faran’ny donia ratsin’i Satana, ke tsy ho hisy eky izio. Jehovah efa nan̈apetraka “andra ndreky lera” ke efa hely fo tsy havian’izio. (Mat. 24:36; 25:13; Asa. 1:7) Ke izikoa fa miteky andra araiky, dikan’izen̈y efa mahaimarikitry fo andran’i Jehovah io. (Rom. 13:11) Fa mandra-pavian’ny farany, atsika mbala tsy maintsy mitory fo.

3. Ino ma raha mandrisiky atsika hitory?

 ³ Atsika koa fa mandiniky fanompoan̈a ataontsika, ty fan̈ontanian̈a maventy tsara iritriretintsika jiaby: Nan̈ino ma atsika mitory vaovao tsara? Valiny tsotra, fitiavan̈a mandrisiky atsika hitory. Atsika koa fa man̈ano asa fitorian̈a io, aboakantsika amy zen̈y fa atsika tia vaovao tsara, tia olo, aviô an̈abon’ny jiaby, atsika tia Jehovah ndreky an̈aranany. Alô baka hidinihintsika tsiaraikiaraiky irô hevitry aby io.

MITORY ATSIKA FÔTONY TIA VAOVAO TSARA

4. Karakôry ataontsika, izikoa atsika fa maharen̈y vaovao tsara?

⁴ Asa azonao onon̈o karakôry ataonao, anao koa fa misy vaovao tsara, karaha ataon’ny izikoa fa misy havanao teraka na anao nahazo asa ten̈a mety aminao? Misora tsy din̈inao han̈ambara vaovao tsara io amin’ny havanao ndreky kamaradinao. Asa karaha zen̈y koa nataonao, tamin’ny anao naharen̈y vaovao faran’ny tsara, vaovao tsara momba Fanjakan̈an’ny Zan̈ahary?

5. Karakôry nataonao, tamin’ny anao voanalohan’ny nahay fahamarin̈ana amy Baiboly? (Zahava koa sary aby io.)

⁵ Diniha koa baka karakôry nataonao, tamin’ny anao somilan’ny nianatra fahamarin̈ana baka amy Baiboly. Nanjary hainao tamy zen̈y fa Babanao an-dan̈itry an̈y io tia anao, aviô tiany koa anao ho an̈isan’ny fianakavian̈an’ny mpirahalahy eran-tany. Aviô hainao koa fa izy mampan̈anten̈a fa han̈adoso jaly ndreky tehotehoko jiaby, baka iô koa anao nanjary nan̈anten̈a fa mbala ho velon̈o ndraiky irô olo aby tsy foenao naty aby in̈y, amy donia vaovao, ndreky raha hafa maro koa. (Mar. 10:29, 30; Jaona 5:28, 29; Rom. 8:38, 39; Apok. 21:3, 4) Irô fahamarin̈ana aby io ten̈a nankahery anao. (Lioka 24:32) Tianao mare irô fahamarin̈ana aby ten̈a valera nianaranao io, ke efa tsy din̈inao mare han̈ambaran̈a izio tamin’olo!​—Ampiràn̈a amy Jeremia 20:9.

6. Ino raha ianaranao baka amy tantaran’i Ernest ndreky Rose?

⁶ Diniha baka tantaran’ny rahalahy araiky,  Ernest b an̈arany. Tamin’izy kadiriny folo taon̈o, babany naty. Karaha ty ho izy: “Zaho nieritreritry: ‘Babako in̈y ma lôso an-dan̈itry an̈y? Izy ma fa tsy ho hitako eky?’ Nan̈iry zaho nahita irô tsaiky mbala misy baba aby io.” Ernest tamy zen̈y nandeha tamy fasan̈an’ny papany fo. Nandohaliky izy, baka iô nivavaka karaha ty: “Azafady Zan̈ahary, mba ambarà zaho kony aia babako in̈y.” Fa kadiriny 17 taon̈o tafaran’ny nifatesan’ny babany in̈y, Ernest nitahômin’olo nianatra Baiboly, ke izy nety. Ravoravo mare izy izikoa fa nahay fa olo maty efa tsisy raha hainy eky, karaha olo mandry in̈y, fa mbala hivilômin’ny Zan̈ahary amin’ny amaray an̈y. (Mpito. 9:5, 10; Asa. 24:15) Hitany koa valin’ny fan̈ontanian̈a maro nampijaly jerinany tan̈atin’ny taon̈o taon̈o! Ten̈a ravoravo Ernest tamy fahamarin̈ana baka amy Baiboly nianarany aby io. Aviô i Rose vadiny koa nanjary nianatra Baiboly, ke ten̈a tiany nitory tamin’olo raha momba Fanjakan̈an’ny Zan̈ahary. Natao batisa Ernest ndreky Rose, tamin’ny 1978. Irô iziôty ravoravo mikoran̈a fahamarin̈ana baka amy Baiboly io amin’ny havandrô, namandrô, ndreky amy zay olo tia mitandren̈y izio. Ke vokany, Ernest ndreky Rose efa nan̈ampy olo mandilatran’ny 70, nandroso firaka tamy batisa.

7. Ino vokany izikoa atsika tia mare fahamarin̈ana nianarantsika tamy Baiboly? (Lioka 6:45)

⁷ Mazava baka amy zen̈y fa atsika koa tia fahamarin̈ana nianarantsika baka tamy Baiboly, mahatsapa manan̈a adidy atsika han̈ambara izio amin’olo tsiaraikiaraiky. (Vakia Lioka 6:45.) Mira raha tsapandrô mpianatran’i Jesosy tamy taonjato voanalohany ty fo raha tsapantsika: “Zahay tsy vôly han̈ambara raha efa hitanay ndreky ren̈inay.” (Asa. 4:20) Ten̈a tiantsika fahamarin̈ana io, ke zen̈y mahavy atsika man̈ano erakan’ny efantsika hikoran̈ana izio amin’olo.

MITORY ATSIKA FÔTONY TIA OLO

8. Ino raha mandrisiky atsika han̈ambara amin’olo vaovao tsara? (Zahava efajoro “ Tiava Olo ke Ampianara.”) (Zahava koa sary.)

⁸ Karaha ataon’i Jehovah ndreky Jesosy, atsika tia olo. (Ohab. 8:31; Jaona 3:16) Mahinakinaka irô mare atsika, fôtony irô “tsy manan̈a Zan̈ahary” ndreky “tsy manan̈a fan̈antinan̈a.” (Efes. 2:12) Irô io mira olo latsaka an̈atin’ny lavaka be in̈y, nohon’ny prôblemo mahazo irô, ke atsika manan̈a tady han̈antsoritan̈a irô. Izio vaovao tsaran’ny Fanjakan̈an’ny Zan̈ahary. Fitiavantsika irô ndreky fahinakinahantsika irô mahavy atsika mifen̈y mare man̈ambara amindrô vaovao tsara. Hafatra ten̈a valera io mahavy irô manan̈a fan̈antinan̈a, aviô man̈ampy irô hanan̈a fiain̈ana faran’ ny tsara, ndreky hahazo “ten̈a fiain̈ana” amy donia vaovao, tsy ino zen̈y fa fiain̈ana tsisy farany.​—1 Tim. 6:19.

9. Ino fampitandreman̈a ambarantsika olo momba ny amaray, aviô nan̈ino? (Ezekiela 33:7, 8)

⁹ Fitiavantsika olo koa mandrisiky atsika han̈ambara amindrô fa ten̈a efa tsy ela ho avy faran’ny donia ratsy ty. (Vakia Ezekiela 33:7, 8.) Mahinakinaka olo jiaby atsika, an̈atin’izen̈y irô havantsika mbala tsy manompo Jehovah. Maro amindrô io rikian̈a amy fiain̈ana isan’andra fo fa tsy haindrô foeky fa ho avy “fahorian̈a be mbala tsiary nisy ambaka izy rango nisian’ny donia ty firaka amy iziôty, sady tsy ho hisy eky.” (Mat. 24:21) Ke tiantsika haindrô ino raha ho hisy amy fotoan̈an’ny fitsaran̈a, an̈atin’izen̈y fandravan̈ana fivavahan̈a diso jiaby ndreky fandripahan̈a olo ratsy fan̈ahy jiaby amin’ny Aramagedona. (Apok. 16:14, 16; 17:16, 17; 19:11, 19, 20) Mivavaka atsika, baka ho maro amindrô io han̈eky hafatra koran̈intsika amindrô, ke hanapa-kevitry hanompo Jehovah miaraka amintsika. Fa karakôry fo basy irô olo aby tsy mitandren̈y fampitandreman̈a io foeky, amy ziôty, an̈atin’izen̈y irô fianakavian̈antsika ten̈a tiantsika aby io?

10. Nan̈ino atsika mila mifen̈y mare fo iziôty mampitandrin̈y olo?

¹⁰ Efa nazavain̈a tamy lahatsoratra talohan’ity fa mety sitrapôn’i Jehovah hamonjy irô olo aby hiova fô, izikoa fa hahita fandravan̈ana Babylony Be. Izikoa zen̈y ny raha misy, ten̈a mila mifen̈y mare atsika mampitandrin̈y olo, rango iziôty. Aza adin̈a ty: Raha koran̈intsika amindrô amy ziôty io mety ho azondrô onon̈o amy zen̈y. (Ampiràn̈a amin’ny Ezekiela 33:33.) Mety ho azondrô onon̈o fampitandreman̈a ren̈indrô tamintsika, aviô mety handrisiky irô hanompo Jehovah miaraka amintsika, diany mbala tsendriky tara. Karaha nataon’ny mpiambin̈y prizon ta Filipy in̈y, niova izy, lera fa baka nahita ‘horohoron-tany be in̈y.’ Mety ho karaha in̈y koa hataon’olo aby tsy mitandren̈y amy ziôty. Mety hiova irô izikoa fa afaran’ny fandravan̈ana Babylony Be.​—Asa. 16:25-34.

MITORY ATSIKA FÔTONY TIA JEHOVAH NDREKY AN̈ARANANY

11. Karakôry han̈amezantsika Jehovah voninahitry, fan̈ajan̈a ndreky angôvo? (Apokalypsy 4:11) (Zahava koa sary aby io.)

¹¹ Antony araiky faran’ny maventy mahavy atsika mitory vaovao tsara io, atsika tia Jehovah Zan̈ahary ndreky an̈aranany. Atsika mihevitry fa fanompoan̈a ataontsika io, fomba hiderantsika Zan̈ahary tiantsika io. (Vakia Apokalypsy 4:11.) Man̈eky amy fô jiaby atsika, fa Jehovah zaraiky fo mendriky hahazo voninahitry, fan̈ajan̈a ndreky angôvo, fôtony  izy niasa raha jiaby. Man̈amia Jehovah voninahitry ndreky fan̈ajan̈a atsika, lera atsika mitory amin’olo ke man̈amia porofo irô fa Jehovah niasa raha jiaby, fa koa tsy izy atsika tsisy. Man̈amia izy angôvontsika atsika, izikoa atsika mampiasa fotoan̈antsika, angôvontsika ndreky fanan̈anantsika, hitorian̈a vaovao tsara, erakan’ny mety ho vitantsika. (Mat. 6:33; Lioka 13:24; Kol. 3:23) Izikoa atao amy volan̈a tsotra, atsika tia mikoran̈a momba Zan̈ahary tiantsika io. Atsika koa marisiky mikoran̈a amin’olo raha momba an̈aran’i Jehovah ndreky toetrinany. Fôtony nan̈ino?

12. Karakôry hankamasin̈antsika an̈aran’i Jehovah amy fanompoan̈a ataontsika?

¹² Fitiavantsika Jehovah koa mandrisiky atsika hankamasin̈y an̈aranany. (Mat. 6:9) Tiantsika mba an̈isan’ny man̈ambara amin’olo fa vandy raha ratsy jiaby nivolan̈in’i Satana momba Jehovah. (Gen. 3:1-5; Joba 2:4; Jaona 8:44) Ke amy fanompoan̈a ataontsika io, vôn̈ono atsika hiaro Zan̈aharintsika, han̈ambara ny marin̈y momba izy amin’olo jiaby vôn̈ono hitandren̈y. Tiantsika koa olo tsiaraikiaraiky hahay fa fitiavan̈a io toetrin’i Jehovah faran’ny maventy, aviô fitsaran̈anany koa marin̈y fo, aviô Fanjakan̈anany tsy ho ela han̈adoso jaly, ke hampisy fiadanan̈a ndreky hasambaran̈a amin’olombelon̈o jiaby eran-tany. (Sal. 37:10, 11, 29; 1 Jaona 4:8) Ke izikoa atsika miaro lazan’i Jehovah io amy fanompoan̈a ataontsika, mankamasin̈y an̈aranany atsika. Aviô koa, mamparavoravo atsika mahay fa atsika miain̈y mifan̈araka amin’ny an̈arantsika. Karakôry zen̈y?

13. Nan̈ino ma atsika mirehareha mitondra an̈aran̈a Vavolombelon̈on’i Jehovah zen̈y? (Isaia 43:10-12)

¹³ Jehovah nifidy atsika nataony “vavolombelon̈onany.” (Vakia Isaia 43:10-12.) Taon̈o vitsivitsy lôso zay, nisy taratasy baka  amy Filan-kevi-pitantan̈ana zay mivolan̈a karaha ty: “Voninahitry faran’ny maventy anan̈antsika, atsika kahian̈a Vavolombelon̈on’i Jehovah zen̈y.” c Fôtony nan̈ino? Diniha baka ohatra ty. Izikoa misy olo mivolan̈a raha tsy marin̈y momba anao, ke anao mitady vavolombelon̈o hiaro anao amy fitsaran̈a an̈y, anao hifidy olo ten̈a mahay anao ndreky hatokisanao tsarabe. Karaha zen̈y koa nataon’i Jehovah, izikoa fa nifidy atsika nataony Vavolombelon̈onany. Naboakany tamy zen̈y fa izy mahay tsarabe ndreky matoky fa atsika mahavita han̈ambara fa izy zaraiky fo Zan̈ahary marin̈y! Voninahitry maventy amintsika Vavolombelon̈onany zen̈y, fôtony atsika man̈ambara amin’olo an̈aranany ndreky mivolan̈a fa vandy fo raha jiaby volan̈in’olo momba izy. Ke atsika koa man̈ano zen̈y, miain̈y mifan̈araka amin’ny an̈aran̈a ten̈a mampirehareha atsika io atsika, tsy azôvy zen̈y fa Vavolombelon̈on’i Jehovah.​—Sal. 83:18; Rom. 10:13-15.

MITORY FO ATSIKA FIRAKA AMY FARANY

14. Ino raha ten̈a mamparavoravo miambin̈y atsika amin’ny amaray?

¹⁴ Ten̈a ravoravo atsika mahay ino raha handalo efa ten̈a tsy ho ela! Jehovah mitahy atsika, ke atsika man̈anten̈a fa maro olo mbala han̈eky vaovao tsara, alohan’ny hanombohan’ny fahorian̈a be io. Aviô koa, ravoravo koa atsika, fôtony ndray an̈atin’ny fahorian̈a be, andra faran’ny mahiziky amy tantaran’olombelon̈o io, atsika mbala hahita olo maro baka amy donian’i Satana efa miady fahin̈ana ty, hiaraka amintsika hidera Jehovah!​—Asa. 13:48.

15-16. Ino raha mbala mila ataontsika fo, aviô firaka ombian̈a atsika man̈ano izio?

¹⁵ Fa mandra-pavian’izen̈y, mbala be asa mbala mila hataontsika. Manan̈a tombontsoa atsika han̈ano asa efa tsy hampody eky io, tsy ino zen̈y fa asa fitorian̈a vaovao tsaran’ny Fanjakan̈an’ny Zan̈ahary, eran-tany. Aviô, an̈atin’izen̈y koa, atsika mila mampitandrin̈y olo amy raha handalo tsy ho ela fo koa. Olo baka mila mahay fa faran’ny donia ratsy ty efa ten̈a man̈aton̈o mare. Ke izikoa fa avy andra fitsaran̈a io, ho haindrô fa hafatra nambarantsika irô in̈y ten̈a baka amy Jehovah Zan̈ahary ankitin̈y.​—Ezek. 38:23.

¹⁶ Ke tapa-kevitry han̈ino amy zay atsika? Fitiavan̈a vaovao tsara, fitiavan̈a olo, baka iô an̈abon’ny jiaby, fitiavan̈a Zan̈ahary Jehovah ndreky an̈aranany, mandrisiky atsika hazoto mare hitory, aviô tsy hangataka andra han̈ano zen̈y, mandra-pivolan̈an’i Jehovah: “Basy amy zay!”