1. Gin ango ma konyo jo pa Jehovah me medde ki tic pire kadi bed gitye ka kato ki i pekki?

 “PINY bibedo marac”—meno aye kit ma Baibul loko kwede i kom kare ma watye ka kwo iye-ni. (2 Tem. 3:1) Jo pa Jehovah gikato ki i pekki ma dano me lobo man marac-ci bene gikato ki iye. Ento bene kiketo aunauna i komwa pien wabedo lutic pa Jehovah. Gin ango ma konyowa me medde ki tic pi Jehovah kadi bed pekki magi tye? Gin acel ma pire tek aye ni waneno kit ma Jehovah okonyowa kwede dok wangeyo ni en obedo “Lubanga makwo.”—Jer. 10:10; 2 Tem. 1:12.

2. Gin ango ma wangeyo madok i kom Jehovah ma twero miniwa kero me ciro pekki?

² Jehovah neno pekki ducu ma wakemme kwede dok kare ducu en mito konyowa. (2 Tekwaro 16:9; Jab. 23:4) Ka wiwa opo ni Lubangawa paro piwa dok ni kare ducu en tye atera me konyowa, ci wabibedo ki kero me ciro peko mo keken. Nen kong kit ma timo meno okonyo kwede Kabaka Daudi.

3. Gin ango ma onongo Daudi tye ka lok iye i kare ma en owaco ni “[Jehovah] tye kwo”?

³ Daudi onongo ngeyo Jehovah maber dok en ojenge i Kome. I kare ma Kabaka Caulo ki jo mukene gubedo ka dwaro Daudi me aneka, Daudi olego Jehovah pi kony. (Jab. 18:6) I kare ma Jehovah ogamo legane dok olare, Daudi owaco ni: “[Jehovah] tye kwo!” (Jab. 18:46) Ki lok meno, Daudi onongo pe tye ka ye keken ni Lubanga tye. Buk mo acel otito ni Daudi obedo ka nyuto tekcwiny ma en tye kwede i kom Jehovah “macalo Lubanga makwo ma kare ducu konyo jone.” Daudi onongo ngeyo ni Lubanga ngeyo gin ma timme i kome dok tye atera me konye. Meno ocuko cwiny Daudi me medde ki tic pi Jehovah  kun bene pake.—Jab. 18:​28, 29, 49.

4. Adwogi maber ango ma wanongo ka waneno Jehovah calo Lubanga makwo?

⁴ Ka wamoko matek ni Jehovah obedo Lubanga makwo, man bikonyowa me tic pire ki mit kom. Wabibedo ki teko me ciro pekkiwa kacel ki miti me medde ki tic matek pi Lubanga. Wabimoko bene tamwa me medde ki bedo cok ki Jehovah.

LUBANGA MAKWO BIMINI TEKO

5. Gin ango ma twero miniwa tekcwiny ka wakemme ki pekki? (Jo Pilipi 2:13)

⁵ Wabibedo ki teko me ciro peko mo keken, kadi bed madit nyo matidi, ka wiwa opo ni Jehovah tye makwo dok kare ducu tye atera me konyowa. En twero konyowa ki i peko mo keken, pien pe tye peko mo matek loyo Lubangawa. En aye Won Twer ducu dok twero miniwa teko me ciro. (Kwan Jo Pilipi 2:13.) Pi meno, wabedo ki tekcwiny ka wakemme ki peko. Dok ka waneno kit ma Jehovah konyowa kwede me ciro pekki matinotino, wabedo ki gen ni en bikonyowa me ciro pekki madongo bene.

6. Gin ango ma otimme i kom Daudi i kare ma en pud awobi ma oweko en ogeno Jehovah pi kare me kwone ducu?

⁶ Nen kong jami aryo ma otimme i kwo pa Daudi ma odongo genne i kom Jehovah. I kare ma Daudi onongo pud awobi, nguu ki labwor gutingo romi ki i kin romi pa wonne. Tyen aryo magi ducu, Daudi oryemo kor lee magi ki tekcwiny ci olaro romi pa wonne. Ento Daudi pe otamo ni eneko lee magi ki tekone kene. En oniang ni Jehovah aye omine teko me timo meno. (1 Cam. 17:​34-37) Wi Daudi pe owil i kom jami mutimme magi. Bedo ka lwodo lok i kom jami magi, okonye me dongo gen ni Lubanga makwo bimine teko kadi wa i anyim.

7. Gin ango ma Daudi oketo tamme iye, dok pingo man okonye me loyo Goliac?

⁷ Lacen, i kare ma Daudi onongo pud pe o mwaka 20, en olimo gony pa lumony me Icrael. En onongo ni lworo ociro lumony woko pien oluma mo ma Lapiliciti ma nyinge Goliac onongo okatti me ‘taro mony pa jo Icrael.’ (1 Cam. 17:​10, 11) Lworo omako lumony magi pien guketo tamgi i kom kit ma Goliac dit kwede kacel ki bwura ma en tye ka onyone i komgi. (1 Cam. 17:​24, 25) Ento Daudi oketo tamme i kom gin mapat. Daudi onongo ngeyo ni ka Goliac tye ka cayo mony me Icrael, nongo en tye ka“taro Lubanga makwo-ni.” (1 Cam. 17:26) Daudi obedo ka tamo pi Jehovah mukwongo. Daudi onongo tye ki gen ni Lubanga ma okonye i kare ma ebedo lakwat bikonye doki i kare man. Ki gen ni Lubanga bikonye, Daudi olwenyo i kom Goliac dok oloyo lweny man!—1 Cam. 17:​45-51.

8. Gin ango ma twero jingo tekcwinywa ni Jehovah bikonyowa ka watye ka kato ki i peko? (Nen bene cal.)

⁸ Wan bene watwero loyo pekkiwa ka wiwa opo ni Lubanga makwo tye atera me konyowa. (Jab. 118:6) Watwero dongo tekcwinywa ni Jehovah bikonyowa ka wakwanyo kare me lwodo jami ma en otimo i kare mukato. Kwan lok me Baibul ma poyo wi i kom kit ma Jehovah olaro kwede luticce. (Ic. 37:​17, 33-37) Medo i kom meno, kwan nyo nen ripot ma katti i kabedowa me Intanet me jw.org ma nyuto kit ma Jehovah okonyo kwede omegiwa ki lumegiwa i karewa-ni.  Dok bene, wi opo i kom kare mogo ma Jehovah okonyi. Gwok nyo iwinyo ni Jehovah pe otimo gin mo me aura piri, calo lari ki i cing labwor nyo nguu. Lok ada tye ni, Jehovah otimo jami mapol i kwoni! Jehovah olwongi me bedo lareme. (Jon 6:44) Kadi wa i kare-ni, itye ka medde ki tic pire keken pi kony ma en mini. Dong, leg Jehovah me konyi wek wi opo i kom kare mogo ma en ogamo legani, omini gin ma onongo imito i karene kikome, nyo ogwoki i kare ma ikato ki i peko mo malit. Lwodo lok i kom jami mutimme magi bijingo genni ni Jehovah bimedde ki konyi.

9. Gin ango ma omyero wiwa opo iye ka watye ka kato ki i peko? (Carolok 27:11)

⁹ Ka waneno Jehovah calo Ngat makwo, ci bikonyowa me bedo ki neno mupore i kom pekkiwa. Ka watye ka kato ki i peko, mitte ni waket cwinywa i kom gin ma pire tek loyo. Larac-ci omoro adot ni ka watye ka kato ki i kwo matek, ci wabikwero Jehovah woko. Pi meno, kit ma wadok kwede i kom pekkiwa gudo kit ma Jehovah winyo kwede. (Yubu 1:​10, 11; kwan Carolok 27:11.) Ento ka wamedde ki bedo lugen bot Jehovah kadi bed watye ka kato ki i peko, wanyuto marwa pi Jehovah dok wanyuto ni Catan obedo lagoba. Gwok nyo gamente ma i lobowu oketo aunauna i kom jo pa Jehovah, nyo itye ki peko me can lim, nyo jo ma itito kwena botgi mitigi nok, nyo itye ka kato ki i peko mukene. Ka tye kit meno, wi opo ni peko meno mini kare me yomo cwiny Jehovah. Wi opo bene ni, en kare ducu bimini teko me ciro peko mo keken ma itye ka kemme kwede. (1 Kor. 10:13) En bimini teko me cirone.

LUBANGA MAKWO BIMINI MOT

10. Gin ango ma Lubanga makwo bitimo pi jo ma giwore?

¹⁰ Jehovah kare ducu miyo mot bot jo ma giwore. (Ibru 11:6) En miniwa kuc  dok weko wabedo ma wayeng ki jami ma watye kwede i kare-ni, dok i kare me anyim en biminiwa kwo ma pe tum. Watye ki gen matek ni Jehovah mito miniwa mot dok en tye ki teko me timo meno. Pi tyen lok man, wamedde ki timo gin ducu ma watwero me wore, kit macalo luticce ma i kare macon gutimo kwede. Man aye gin ma Temceo otimo.—Ibru 6:​10-12.

11. Pingo Temceo obedo ka tic matek i kacokke? (1 Temceo 4:10)

¹¹ Kwan 1 Temceo 4:10. Temceo oketo genne i kom Lubanga makwo. Meno aye tyen lok mumiyo en otiyo matek pi Jehovah ki pi jo mukene. Tic ango ma en otimo? Lakwena Paulo ocuko cwinye me doko lapwony mucwiny i tic me pwony ki dok i kacokke. Paulo bene otitte ni owek lanen maber pi luye luwote, ma gitino ki ma guteggi. Dok kimine tic mogo matego me atiya, ma i kine onongo tye iye miyo tira magwar, ento i yo me mar, bot jo mogo. (1 Tem. 4:​11-16; 2 Tem. 4:​1-5) I kare mogo, jo mukene onongo pe gineno nyo pe gipwoyo tic pa Temceo, ento en onongo tye ki gen ni Jehovah bimine mot.—Rom. 2:​6, 7.

12. Pingo luelda gimedde ki tic matek i kacokke? (Nen bene cal.)

¹² Luelda ma i kare-ni bene gitwero bedo ki gen ni Jehovah neno dok pwoyo ticgi. Medo i kom tic me kwayo romi, pwony, ki tito kwena, luelda mapol gimiyo kony i tic me gedo nyo ka ma can opoto iye. Mukene gitiyo ki Gurup ma Gilimo Lutwo (Patient Visitation Groups) nyo Komitti ma Kubu kin Lucaden ki Ludaktari. Luelda ma gidyere me timo tic magi gingeyo ni kacokke obedo pa Jehovah, ento pe pa dano mo. Macalo adwogine, gitiyo ticgi ki cwinygi ducu dok gitye ki gen matek ni Lubanga bimiyogi mot pi ticgi.—Kol. 3:​23, 24.

13. Jehovah winyo nining i kom jami ma watimo pire?

 ¹³ Pe dano ducu gitwero bedo luelda. Ento wan ducu watye ki gin mo ma watwero miyone bot Jehovah. Lubanga cwinye bedo yom adada ka watute ki kerowa ducu me tic pire. En neno ka wamiyo mot me cwako kor tic ma kwako wi lobo ducu, kadi bed wamiyo manok. Cwinye bedo yom ka wailo cingwa me miyo lagam i cokke, kadi bed wabedo lulewic, dok cwinye bedo yom ka watimo kica bot jo ma gucwero cwinywa. Kadi bed iwinyo calo gin ma itimo pe dit, bed ki gen ni Jehovah pwoyo ticci. En marri pi tic ma itimo, dok bimini mot.—Luka 21:​1-4.

BED COK KI LUBANGA MAKWO

14. I yo ma nining ma bedo cok ki Jehovah konyowa me bedo lugen bote? (Nen bene cal.)

¹⁴ Ka watye ki wat macok ki Jehovah, ci wabinongo ni yot me bedo lugen bote. Meno onongo tye ada bot Yucepu. En okwero lajwac donyo i tim tarwang pien oniang ni gin ma en timo gudo Jehovah, dok onongo pe mito cwero cwiny Jehovah. (Acak. 39:9) Wek wabed ki wat macok ki Jehovah, mitte ni wakwany kare me lega kacel ki kwano Lokke i yo matut. Meno biweko watwa kwede jing matek. Ka wan bene, calo Yucepu, watye ki wat macok ki Jehovah, ci pe wabiye timo gin mo keken ma cwero Cwinye.—Yak. 4:8.

15. Pwony ango ma watwero nongo ki i gin mutimme i kom Luicrael i kare ma gitye i dye tim aroo? (Jo Ibru 3:12)

¹⁵ Jo ma giweko wigi wil woko ni Jehovah obedo Lubanga makwo, gitwero a woko ki bote oyotoyot. Nen kong gin mutimme i kom Luicrael i kare ma onongo gitye i dye tim aroo. Onongo gingeyo maber ni Jehovah tye, ento gucako bedo ki akalakala ka ce en twero minigi jami ma mitte pi kwo. Gupenyo bene ni: “[Jehovah] mono tye i kinwa nyo pe?” (Nia 17:​2, 7) Macalo adwogine, gin gujemo  i kom Lubanga. Ki lok ada, pe wamito ni walub lanengi marac meno.—Kwan Jo Ibru 3:12.

16. Gin ango ma twero temo niyewa?

¹⁶ Lobo man weko bedo tek adada me medde ki bedo cok ki Jehovah. Jo mapol pe giye ni Lubanga tye. Pol kare, jo ma gicayo cik pa Lubanga ginen calo gitye ki kwo mayot. Ka waneno gin ma kit meno, twero temo niyewa adada. Kadi bed pud waye ni Lubanga tye, ento watwero cako bedo ki akalakala ka ce en bikonyowa. Laco Jabuli 73 bene owinyo kit meno pi kare mo. En oneno kit ma jo ma gurume gicayo kwede cik pa Lubanga ento pud ginongo kwo mayot. Macalo adwogine, en ocako bedo ki akalakala ka ce tic pi Lubanga tye ki bakacic mo.—Jab. 73:​11-13.

17. Gin ango ma bikonyowa me medde ki bedo cok ki Jehovah?

¹⁷ Gin ango ma okonyo laco jabuli man me loko tamme? En olwodo matut gin ma bitimme i kom jo ma wigi wil woko i kom Jehovah. (Jab. 73:​18, 19, 27) En bene otamo i kom adwogi mabeco ma bino pi tic pi Lubanga. (Jab. 73:24) Wan bene watwero tamo i kom mot ducu ma Jehovah ominiwa. Dok igo kong kit ma kwoni onongo bibedo pat kwede ka onongo pe itye ka tic pi Jehovah. Ka wiwa opo tyen lok mumiyo watye ka tic pi Jehovah, bibedo yot botwa me medde ki bedo lugen bote. Dok calo laco jabuli man, wabiwaco ni: “Ki tung bota, bedo cok ki Lubanga aye ber.”—Jab. 73:28.

18. Pingo pe omyero walwor gin ma bitimme i anyim?

¹⁸ Watwero loyo ariya mo keken ma wakemme kwede i kare man me agikki-ni pien watye ka “woro Lubanga makwo, dok me ada.” (1 Tec. 1:9) Lubangawa paro piwa dok kare ducu en bikonyowa. En ogwoko luticce i kare macon, dok en gwokowa i kare-ni bene. Macok cok-ki, wabikemme ki twon can madit atika-ni. Ento pe wabibedo kenwa. Jehovah bibedo kwedwa. (Ic. 41:10) Dong omyero wabed ma “cwinywa tek, kun wawaco ni, ‘Rwot [Jehovah] en lakony mera, pe abibedo ki lworo.’”—Ibru 13:​5, 6.