1. Кӱчтер де болзо, Иеговага иштеерге биске не болужат?

 «УУР-КӰЧ ӧйлӧр». Мынайып Агару Бичикте бистиҥ ӧй керегинде бичилет (2 Тим. 3:1). Бӱгӱнги кӱнде кажы ла кижиде кӱчтер бар, је Кудайдыҥ албатызы бу кӱчтердиҥ ӱстине, истежӱлерге ле удурлажуларга табартып јат. Је биске Иеговага оноҥ ло ары иштеерге не болужып јат? Иегованы «тирӱ Кудай» деп, бойыстыҥ јӱрӱмисте канча катап кӧргӧни́с болужат (Иер. 10:10; 2 Тим. 1:12).

2. Иегованы тирӱ Кудай деп нениҥ учун айдарга јараар?

² Иегова чын ла бар. Ол бисте кандый кӱчтер болуп турганын билер, болужатан эбин де таап ийет (2 Лет. 16:9; Сар. 23:4). Бис Иегованы тирӱ Кудай деп ундыбай турзаас, кандый ла ченелтелерди ӧдӧ берерис. Мыны Давид каанныҥ теминеҥ кӧрӱп ийектер.

3. Давид «Иегова — тирӱ Кудай» деп сӧстӧрлӧ нени айдарга сананган?

³ Давид Иегованы сӱреен јакшы билген. Ол ого бӱдӱп туратан. Ол Саулдаҥ ла ӧскӧ дӧ ӧштӱлердеҥ качып турала, болушты Иегованаҥ сакыган (Сар. 18:6). Оноҥ Иегова ого болужып берерде, Давид сӱӱнгенине мынайып айткан: «Иегова — тирӱ Кудай!» (Сар. 18:46). Ол бу сӧстӧриле јӱк ле Кудай чын ла бар деп эмес, је бир справочникте айдылганыла, Иегова — «бойыныҥ албатызына јаантайын болужып турган тирӱ Кудай» — деп айдарга сананган. Не дезе Давид Иегованы тирӱ Кудай деп, јӱрӱминде канча катап кӧргӧн. Оныҥ учун ол Иеговага оноҥ ло ары иштеп, оны мактаарга бек шӱӱп алган (Сар. 18:28, 29, 49).

4. Иегова — тирӱ Кудай деп бӱткени́с биске канайып болужат?

 ⁴ Иегованы тирӱ Кудай деп бӱдӱп турганы́с биске ого эрчимдӱ иштеерге болужар. Анайып ченелтелерди де ӧдӧргӧ јеҥил болор, Кудайыска да оноҥ ары иштеер кӱӱнис тыҥыыр. Анайда ок бисти Иегованаҥ не де туураладып болбос.

ТИРӰ КУДАЙ ИЙДЕ-КӰЧ БЕРЕР

5. Нениҥ учун биске ченелтелердеҥ коркыбас керек? (Филиппыдагыларга 4:13).

⁵ Иегова — тирӱ Кудай, ол биске јаантайын болужарга белен. Ого бистиҥ кандый ла кӱчтеристиҥ аайына чыгып ийерге кӱч эмес. Мыны ӱзе ундыбай турзаас, биске кичинек те, јаан да ченелтелерди ӧдӧргӧ јеҥил болор. Анайда ок Иегова Кӱчтӱдеҥ Кӱчтӱ Кудай, ол ченелтелер тушта биске ийде-кӱч берер. (Филиппыдагыларга 4:13, ЈТ кычырыгар.) Оныҥ учун бисте коркыйтан шылтак јок. Иегова биске кичинек те ченелтелерде болужып турган болордо, ол биске јаан да ченелтелер тушта болужар.

6. Давидтиҥ бӱдӱмјизин кандый учуралдар тыҥыткан?

⁶ Давидтиҥ Иеговага бӱдӱмјизи тыҥыган эки учуралды эске алып ийектер. Јиит тужында ол адазыныҥ койлорын кабырган. Бир катап карагула келип, койын апарган, а база бир учуралда ӱӱрге айу табарган. Бу эки учуралда Давид јалтанбай, олордыҥ кийнинеҥ сӱрӱжип, койлорын аргадап алган. Мыны Давид бойыныҥ кӱчиле эмес, је Иегованыҥ болужыла эткен. Оныҥ учун ол бастыра макты Иеговага јетирген (1 Сам. 17:34—37). Давид Иегованыҥ мындый болужын бир де ундыбаган. Ол бу керегинде шӱӱп сананып турарда, тирӱ Кудай Иегова ого оноҥ ло ары ийде-кӱч берер деп, бӱдӱмјизи тыҥыган.

7. Давид нени сананган, бу ого Голиафка удура барарга канайып болушкан?

⁷ Кийнинде Давид Израильдиҥ черӱзидӧӧн акаларын кӧрӧргӧ барган. Ол тушта ого 20 де јаш јеткелек болгон. Анда Давид израильтяндардыҥ тыҥ коркып турганын кӧрӱп ийген. Не дезе филистимдердиҥ коркышту јаан Голиаф деп јуучылы Израильдиҥ јуучылдарына каткырып турды (1 Сам. 17:10, 11). Израильдиҥ черӱзи Голиафтыҥ јӱк ле јаан оборын ла айткан сӧстӧрин сананып, коркып тургандар (1 Сам. 17:24, 25). Је Давид Голиафты Израильдиҥ черӱзине эмес, је «тирӱ Кудайдыҥ черӱзине» каткырган деп оҥдогон (1 Сам. 17:26). Ол Иегова керегинде сананган. Нениҥ учун дезе ого јаантайын болушкан Кудай эмди де болужар деп алаҥзыбаган. Давид Кудайыла кожо Голиафка удура чыгып, јеҥӱ алган! (1 Сам. 17:45—51).

8. Иегова бисти кандый да ченелтеде артыргыспас деп бӱдерге, нени эдер керек? (Јурукты база кӧрӱгер.)

⁸ Иегова тирӱ Кудай, ол болужарга јаантайын белен деп ундыбай турзаас, биске ченелтелерди ӧдӧргӧ јеҥил болор (Сар. 118:6). Мында биске не болужар? Темдектезе, Агару Бичикти кычырып, Иегова алдындагы ишчилерин канайып аргадаганын шӱӱп сананыгар (Иса. 37:17, 33—37). Анайда ок jw.org сайттаҥ Иегова бӱгӱнги кӱнде бойыныҥ чындык ишчилерине канайып болужып турганын кычырып аларга јараар. Бого ло коштой Иегова  слерге канайып болушканын шӱӱп сананыгар. Је слер: «Мен карагулаларла да, айуларла да јуулашпагам не деп сананар болороор». Је бу эҥ ле керектӱзи эмес, эҥ ле керектӱзи дезе — Иегова јаантайын слерле кожо болгоны ла јаантайын слерге болушканы! Ол слерге оныҥ најызы болотон арга берген (Иоанн 6:44). Бӱгӱнги де кӱнде слерди чындыктаҥ туура јӱре бербезин деп болужып турган. Оныҥ учун Иегова мӱргӱӱлдереерге кандый каруу бергенин, канайып болушканын ла кӱч ӧйдӧ јаныгарда болгонын эске алынып ийерге болуш сурагар. Мынайып шӱӱп сананганаар, Иегова слерди качан да артыргыспас деп бӱдерге болужар.

9. Ченелтелер болуп турза, нени ундыбас керек? (Укаа сӧстӧр 27:11).

⁹ Иегова — тирӱ Кудай деп ундыбай турзаас, кӱчтерге чын кӧрӱмдӱ болорыс. Бистиҥ кӱчтерис Иегова ла Сатананыҥ ортозында ачык турган сурактаҥ улам болуп турган деп аайлап турарыс. Сатана бисти тӱбекке тӱжӱп калзаас, Иегованы таштап ийерис деп айдат (Иов 1:10, 11; Укаа сӧстӧр 27:11 кычырыгар). Је Иеговага чындык артып турзаас, оны сӱӱп турганысты ла Сатананы тӧгӱнчи деп кӧргӱзип јадыс. Слерде эм тура кандый кӱчтер болуп турган? Јаҥдардыҥ удурлажузы, акча-манатла кӱчтер, јарлаар иште улус укпай турган болор эмезе оноҥ до ӧскӧ кӱчтер бе? Кандый да кӱчтер болотон болзо, Иегованыҥ јӱрегин сӱӱндирерге албаданыгар. Ӧдӱп болбойтон кӱчтер јок (1 Кор. 10:13). Иегова слерге ийде-кӱчти берер.

ТИРӰ КУДАЙ КАЙРАЛДААР

10. Тирӱ Кудай ишчилерин канайып кайралдаар?

¹⁰ Иегова бойыныҥ ишчилерин јаантайын кайралдайт (Евр. 11:6). Ол биске эмди де амыр ла сӱӱнчилӱ јӱрер  арга берет, а келер ӧйдӧ ӱргӱлји јӱрӱм сыйлаар. Бис бого бир де алаҥзыбай јадыс, нениҥ учун дезе Иеговада анайып эдер кӱӱни де бар, ийде-кӱчи де бар. Мыны билгени́с бисти Кудайыска акту кӱӱнистеҥ иштеерге ле ого эҥ артыгын берерге кӱӱнзедет. Иегованыҥ јебрен ишчилери, темдектезе Тимофей, шак ла анайып иштеген (Евр. 6:10—12).

11. Тимофей јуунда нениҥ учун кӧп иш эткен? (1 Тимофейге 4:10).

¹¹ 1 Тимофейге 4:10, ЈТ кычырыгар. Тимофей тирӱ Кудайга иженген, оныҥ учун јуунда кӧп иш эткен. Ол нени эткен? Темдектезе, апостол Павелдиҥ берген јӧбиле ол јакшы ӱредӱчи болорго ло куучын-эрмектерди јакшы айдарга ӱренген. Анайда ок ол ака-эјелерге тем кӧргӱскен: јаан да јашту улуска, јииттерге де. Бого коштой ого јеҥил эмес молјулар берилген. Ол дезе чындыктыҥ јолынаҥ тууралап бараткан улусты санаа алындырган. Је мыны сӱӱштӱ ле јалакай эдетен (1 Тим. 4:11—16; 2 Тим. 4:1—5). Улус Тимофейдиҥ ижин кезикте кӧрбӧй туратан ла баалабай туратан, је Иегова оны кайрал јок артыргыспас деп, ол бир де алаҥзыбаган (Рим. 2:6, 7).

12. Аксагалдарды јуунда кӧп иштенерге не кӱӱнзедет? (Јурукты база кӧрӱгер.)

¹² Аксагалдар, Иегова слердиҥ ижеерди кӧрӱп те јат, баалап та јат. Слер јаҥыс ла кӱдӱчилер, ӱредӱчилер, јарчылар болбой јадыгар. Слердиҥ кезигер строительный проекттерде туружат, анайда ок тӱбекке тӱшкен улуска болужат. Бого коштой слердиҥ кемигер де ооруп турган улуска баратан группаларда ла больницаларла колбожор комитетте иштейт. Оныҥ да учун аксагалдар Иегова олорды кайралдаар деп билип, бойыныҥ  молјуларын акту кӱӱнинеҥ бӱдӱредилер (Кол. 3:23, 24).

13. Иегова бистиҥ албаданганысты баалайт па? Јартап беригер.

¹³ Јуунда бистиҥ кажыбыс ла аксагал болбой јат, андый да болзо, бис ончобыс Иеговага ӧскӧ дӧ кӧп неме эдер аргалу. Ол бистиҥ канча кире аргабыс бар ого иштеп турганысты баалап јат. Акту кӱӱнистеҥ Каандыктыҥ ижине, кӧп эмес те болзо, акча берип турганысты баалап јат. Уйалчаҥ да болзоос, јуундарыста колдорысты кӧдӱрип, јартамалдар айдып турганы́с ого сӱреен јарайт. Анайда ок ака-эјелериске тӱрген ле ачынбай, олордыҥ јастыразын таштап турзаас, сӱӱнет. Је бис Иеговага кӧп иштеп болбой до турган болзоос, Иегова бистиҥ албаданганысты баалап јат деп алаҥзыбайдыс. Ол бисти сӱӱп турган, оныҥ учун кайрал јок артыргыспас (Лука 21:1—4).

ТИРӰ КУДАЙДАҤ ЫРАБАГАР

14. Иеговала колбуларыс бек болгоны ого чындык артарга канайып болужат? (Јурукты база кӧрӱгер.)

¹⁴ Биске Иегова тирӱ Кудай болзо, ого чындык артарга јеҥил болор. Андый учурал Иосифтиҥ јӱрӱминде болгон. Ол Потифардыҥ ӱйиле конорго бир де јӧпсинбеген. Нениҥ учун дезе ол Иегованы ачындырарга кӱӱнзебеген (Баш. 39:9). Бис те Иеговала колбуларысты баалап турган болзоос, ого мӱргӱӱрге ле оныҥ сӧзин ӱренерге, ӧй табып турарыс. Ол тушта Иосиф ле чилеп, Иеговала колбуларыска каршу јетиргедий немелердеҥ тууралап турарыс (Иак. 4:8).

15. Израильтяндарла чӧл јерде болгон учурал бисти неге ӱредет? (Еврейлерге 3:12).

¹⁵ Иегованы тирӱ Кудай деп ундып турган улус оноҥ тууралай берердеҥ айабас. Израильтяндарла чӧл јерде не болгонын эске алып ийектер. Иегова  бар деп олор билген де болзо, оныҥ болужына алаҥзып баштаган, керек дезе: «Ортобыста Иегова бар ба, јок по?» — деп айдып баштагандар (Чыг. 17:2, 7). Анайып олор Кудайга удура барган. Бу учурал биске ӱредӱ болуп јат. Бис олор ло чылап Иеговага удура барарга кӱӱнзебейдис эмей. (Еврейлерге 3:12, ЈТ кычырыгар.)

16. Бистиҥ бӱдӱмји недеҥ улам ченелердеҥ айабас?

¹⁶ Бу телекей бисти тирӱ Кудайдаҥ туураладып саларга албаданат. Кезик улус Кудай бар деп бӱтпейдилер. Тууразынаҥ кӧрзӧ, Кудайдыҥ јасагын керексибей турган улус ырысту јӱрет ошкош. Бу ӱзе немени кӧрӱп, бистиҥ бӱдӱмјибис ченелердеҥ айабас. Кудай бар деп бӱдӱп те турзаас, кезикте оныҥ болужына алаҥзып баштаардаҥ айабазыс. Мындый алаҥзыш 73-чи Сарынды бичиген кижиде болгон. Ол айландыра јаткан улустыҥ Кудайдыҥ јасактары јогынаҥ да ырысту јӱрӱп турганын кӧргӧн. Мынаҥ улам Кудайга оноҥ ары иштейтен бе, јок по деп алаҥзый берген (Сар. 73:11—13).

17. Биске Иегованаҥ ырабаска не болужар?

¹⁷ Сарнаачыга кӧрӱм-санаазын солыырга не болушкан? Ол Иегованы ундып турган улусла не болуп турганын шӱӱп сананган (Сар. 73:18, 19, 27). Анайда ок Иегованыҥ ишчилеринде кандый алкыштар барын сананган (Сар. 73:24). Бистиҥ де јӱрӱмисти Иегова канайып солыганын шӱӱп сананактар. Иегова эмес болзо, бисле не болор эди? Мынайып шӱӱп сананганы́с биске Иеговага чындык артарга болужар. Ол тушта бис те сарнаачы чылап: «Меге Кудайга јууктаарга јарап јат!» — деп айдарыс (Сар. 73:28).

18. Нениҥ учун бисте келер ӧйдӧҥ коркыыр шылтак јок?

¹⁸ Бис билбезис, бу калганчы кӱндерде кандый кӱчтерге туштаарысты. Је бис кандый ла кӱчтерди ӧдӱп чыгарыс, нениҥ учун дезе «тирӱ ле чын Кудайга» бажырадыс (1 Фес. 1:9). Иегова бойыныҥ ишчилерин сӱӱп јат ла олорго јаантайын болужат. Ол алдында да ӧйдӧ андый болгон, бӱгӱнги де кӱнде андый ла. Удабас качан да болбогон улу тӱбек башталза, бис јаҥыскан артпазыс, нениҥ учун дезе Иегова бисле кожо болор (Иса. 41:10). Оныҥ учун: «[Иегова] — мениҥ болушчым, коркыыр немем јок» — деп айдадыс! (Евр. 13:5, 6).