1. Kii i nhôla bagwélél ba Yéhôva i ke ni bisu i bégés nye yak ikété mandutu?

 BIBEL i nkal inyu dilo di niñil le: “Mangéda m’a ba mabe, ma bak ki nledek kiyaga.” (2 Timôtéô 3:1) U héya mandutu bôt bobasôna ba mboma munu hiai hini, bagwélél ba Yéhôva ba mboma ngolba ni ndééñga. Kii i nhôla bés i ke ni bisu i bégés Yéhôva yak ikété mandutu mana? Jam jada li yé le, di nyi toi le a yé “Nyambe nu a niñ.”​—Yérémia 10:10; 2 Timôtéô 1:12.

2. Ni imbe njel Yéhôva a yé Nyambe nu a niñ?

² Yéhôva a yé nu a nhôla bés ikété mandutu més, a nyéñ yak manjel i nit bés. (2 Miñañ 16:9; Tjémbi 23:4) I tehe nye kiki Nyambe nu a niñ i nla hôla bés i yémbél to imbe ndutu di nla boma mu niñ yés. Di tehe lelaa ñañ u Kiñe David u ñunda hala.

3. Kii David a bééna i mahoñol i ngéda a bi kal le “Yéhôva a niñ”?

³ David a bé yi Yéhôva, a bôdlak nye ñem. I ngéda Kiñe Saulô ni baoo ba David bape ba bé yéñ nol nye, David a bi soohe Yéhôva inyu bat nye mahôla. (Tjémbi 18:6) I mbus le Nyambe a bi emble masoohe mé, a péyés ki nye, David a kal le: “Yéhôva a niñ!” (Tjémbi 18:46) Ni bini bibuk, David a bé unda ndik bé le Nyambe a yé. Kaat ndoñi i bibuk yada i nkal le David a bé nkwoog nkaa le Yéhôva “a yé Nyambe nu a niñ, nu a nlôl  bagwélél bé mahôla hiki ngéda.” Ñ, i mam ma bi pémél David ma bi kwés nye nkaa le Nyambe a niñ, hala a bi ti ki nye makénd i ke ni bisu i gwélél Yéhôva ni i bégés nye.​—Tjémbi 18:​28, 29, 49.

4. Umbe nseñ di nkôs i tehe Yéhôva kiki Nyambe nu a niñ?

⁴ I ba nkwoog nkaa le Yéhôva a yé Nyambe nu a niñ, i nla hôla bés i gwélél nye ni makénd. Di ga bana ngui i hônba mandutu més ni i ke ni bisu i sal ni ngui mu nson wé. Di ga yoñ ki makidik i téñbe ni Yéhôva.

NYAMBE NU A NIÑ A GA LÉDÉS WE

5. Kii i nla lédés bés i ngéda di mboma mandutu? (Filipi 4:13)

⁵ Di ga pam i hônba to imbe ndutu di mboma ibale di ntééda i mahoñol le Yéhôva a yé Nyambe nu a niñ, ni le a yé ha inyu nit bés. A nla hôla bés inyule ndutu to yada di mboma i nla bé yémbél nye. A yé Nu ngui yosôna, a nla ki ti bés ngui i hônba. (Añ Filipi 4:13.) Jon di nla hônba mandutu ni botñem le a ga hôla bés. I ngéda di ntehe lelaa Yéhôva a nhôla bés mu bon ba mandutu di mboma, di nla ba nkwoog nkaa le a ga hôla yak bés mu mandutu makeñi di nla boma.

6. I ngéda a bé mañge, mambe mam David a bi kôhna, ma ma bi boñ le a kônde bôdôl Yéhôva ñem?

⁶ Di wan mam ima ma bi pémél David, ma ma bi boñ le a kônde bôdôl Yéhôva ñem. Ngéda a bé mañge wanda, a téédaga bémba isañ, ours ni mbondo njéé i bi yéñ nol mintômba mi isañ. Ndi ni ñem ngui, David a bi noñ binuga bi, a kadal mintômba mi i manyo map. Ndi David a bi hoñol bé le a mpam i boñ hala ni ngui yé. A bé yi le Yéhôva nyen a nti nye i ngui i. (1 Samuel 17:​34-37) Kekikel, David a bi hôya bé i mam ma. I ngéda David a bé ôt pék mu mam ma, hala a bé kônde lédés botñem yé le Nyambe nu a niñ a ga hôla nye i dilo di nlo.

7. Hee David a bé bok mahoñol mé, lelaa hala a bi hôla nye i jôs Gôliat?

⁷ I mbus, ki a ngi yii mañge, David a bi ke i homa ntôñ gwét u bon ba Israel u bééne. A bi koba le bisônda bi bé kon woñi ngandak inyule i mpémba man Lôk Filistia nunu le Gôliat a bé “nyumbla mintôñ mi gwét mi Israel.” (1 Samuel 17:​10, 11) Bisônda bi bé kon woñi inyule bi bi bok mahoñol map i bikeñi bi mut nu, ni i mam a bé kal inyu nyumbla bo. (1 Samuel 17:​24, 25) Ndi David a bé tehe bé mam kiki bo. David a bé tehe bé i jam li loñge, i mis mé Gôliat a bé nyumbla ndigi bé mintôñ mi gwét mi Israel, ndi a bé nyumbla “mintôñ mi gwét mi Nyambe nu a niñ.” (1 Samuel 17:26) Yéhôva nyen David a bééna mahoñol. A bééna botñem le i Nyambe a bi hôla nye i sôñ mintômba nwé, a bé ki le a hôla nye i yémbél i mut nunu. Kiki a bé nkwoog nkaa le Nyambe a ga hôla nye, David a bi jôs Gôliat, a yémbél ki nye!​—1 Samuel 17:​45-51.

8. Kii i nla lédés botñem yés le Yéhôva a ga hôla bés i ngéda di mboma mandutu? (Béñge yak titii.)

⁸ Yak bés di nla hônba mandutu ibale di mbigda le Nyambe nu a niñ a yé bebee i hôla bés. (Tjémbi 118:6) Di nla kônde lédés botñem yés le a ga hôla bés i ngéda di nhoñol i mam a ma bôñôl bés. Añ miñañ mi Bibel mi mi mbigdaha we lelaa Yéhôva a bi sôñ bagwélél bé. (Yésaya 37:​17, 33-37) U nla yak béñge  manwin ma ma yé i jw.org inyu tehe lelaa Yéhôva a nit lôk kéé yés i bôda ni i bôlôm i len ini. U nla ki bigda mangéda Yéhôva a bi nit we. Hala a tééñga bañ we ibale i mam u nhoñol ma ta bé hélha, kiki ours ni mbondo njéé Djob a bi hôla David i jôs. Inyuki? Inyule Yéhôva a ma bôñôl we ngandak mam! A bi naña we i ba liwanda jé. (Yôhanes 6:44) Letee ni len, nyen a nhôla we i ke ni bisu i gwélél nye. Jon inyuki u nla bé bat Yéhôva le a hôla we i hoñol mangéda a bi timbhe masoohe moñ, i ngéda a bi ti we i yom i bé béda we, yak i ngéda a bi hôla we i hônba mangéda mabe? I hoñol i nya mangéda i, i nlédés botñem yoñ le Yéhôva a ga ke ni bisu i nit we.

9. Kii di nlama bé hôya i ngéda di mboma mandutu? (Bingéngén 27:11)

⁹ Ibale di ntehe Yéhôva kiki mut, hala a ga hôla bés i bana litehge lilam li mandutu més. Lelaa hala? Di ga tehe le di nkôhna mandutu inyule ndañ nkeñi u yé ipôla Satan ni Yéhôva. Nsohop a nkal le ibale di nson njonok, di ga tjôô Yéhôva. (Hiôb 1:​10, 11; añ Bingéngén 27:11.) Ndi i ngéda di nhônba mandutu més, di ñunda le di ngwés Yéhôva, di undga ki le Satan a yé mut bitembee. Baa ngomin a nkolba we, liyep li ntééñga we, ba mbep timbhe we i likalô, tole u mboma mandutu mape? Ibale hala, bigda le i ndutu u mboma i nti we pôla i kônha Yéhôva maséé. U hôya bañ le Nyambe a nla bé nwas le u kôhna manoodana iloo kiki u nla nihbe. (1 Korintô 10:13) A ga ti we ngui i hônba.

NYAMBE NU A NIÑ A GA BOM WE

10. Kii Nyambe nu a niñ a ga bôñôl bôt ba ngwélél nye?

¹⁰ Yéhôva a mbom ba ba ngwélél nye. (Lôk Héber 11:6) A nti bés nsañ, a hôlga ki bés i kon maséé ni i mam di gwé nano, i mbok yondo a ga ti bés niñ boga. Di nla bôdôl Yéhôva ñem, di  bak nkwoog nkaa le a gwé ngôñ ni ngui i bom bés. Mahoñol ma, ma nhôla bés i pagap ni minson mi mbuu kiki bagwélél bé ba kôba ba bé boñ. I jam li jon Timôtéô a boñ i hiai hi bisu.​—Lôk Héber 6:​10-12.

11. Inyuki Timôtéô a bé sal ni ngui ikété likoda? (1 Timôtéô 4:10)

¹¹ Añ 1 Timôtéô 4:10. Timôtéô a bi bii botñem yé yak Nyambe nu a niñ. Jon a bé sal ni ngui inyu Yéhôva ni inyu bôt bape. Lelaa hala? Ñôma Paul a bi ti nye makénd i ke ni bisu i hol ikété ngap yé i niiga ni i ti minkwel. Timôtéô a bé lama ki ba ndémbél ilam inyu bilôk bikéé bipe, boñge ba wanda ni mimañ mi bôt. Ikété minson a bi kôs mihogi mi bé let ngandak, a bé lama ti ngim lôk kéé maéba ma ngui, ndi ni gwéha. (1 Timôtéô 4:​11-16; 2 Timôtéô 4:​1-5) Timôtéô a bé nkwoog nkaa le to ibale bôt ba bé tehe bé minson a bé boñ ngim mangéda, tole ba bé ti bé nye mayéga, Yéhôva a bé lama bom nye.​—Rôma 2:​6, 7.

12. Kii i nla hôla mimañ i bana ngandak mam i boñ i nson u Nwet? (Béñge yak titii.)

¹² I len ini, yak mimañ mi nla ba nkwoog nkaa le Yéhôva a ntehe nson ilam ba ngwel, a ndiihe ki wo. U héya le ba nyuuga bilôk bikéé, ba niigaga bo, ba ntéé likalô, ngandak mimañ i nsal i nson u maoñ, i nlôl yak bilôk bikéé bikuu bi nkwél mahôla. Bape ba gwé nson i yuuga bakokon i dokta, tole ba nsal i Comité de Liaison Hospitalier. Mimañ mi mi neebe i nya minson i, mi nyi le likoda li yé li Yéhôva he li mut binam bé. Jon mi ngwel minson mi ni ñem wap nwonsôna, mi bak nkwoog nkaa le Yéhôva a ga sayap bo inyu biliya gwap.​—Kôlôsé 3:​23, 24.

13. Kii Yéhôva a nhoñol inyu biliya di mboñ mu nson wé?

¹³ Bésbobasôna di nla bé ba mimañ.  Ndi bésbobasôna di nla bana ngim yom i ti Yéhôva. Nyambe wés a nlôôha ba maséé i ngéda di ngwélél tik gwom di gwé i nson wé. A nyimbe makébla di nti inyu nit nson u añal ñañ nlam ni nkoñ ’isi wonsôna, to ibale di nla bé ti ngandak. A nkon maséé i ngéda di nyémbél woñi i timbhe i makoda, ni i ngéda di nwéhél i bet ba nyumbla bés. To ibale i yom di nti i nene bés sii ngandak, di nla ba nkwoog nkaa le Yéhôva a ndiihe yo. A ngwés we inyu yom u mboñ, a ga bom ki we.​—Lukas 21:​1-4.

YÉN BEBEE NI NYAMBE NU A NIÑ

14. Lelaa i yén bebee ni Yéhôva i nla hôla bés i téñbe ni nye ikepam lisuk? (Béñge yak titii.)

¹⁴ Ibale di gwé toi maada ma bas bas ni Yéhôva, hala a ga ba bés jam li ntomb i téñbe ni nye. Hala nyen mam ma bi bôña inyu Yôsep. A bi tjél kwo i nyega malal. A bé yi le maada mé ni Nyambe ma yé nseñ ngandak, a bé gwés bé boñ ngim jam i i nlémél bé nye. (Bibôdle 39:9) Inyu tééda maada ma bas bas ni Yéhôva, di nlama yoñ ngéda i soohe ni i nigil bañga yé. Hala a ga boñ le liwanda jés ni nye li kônde let. Kiki Yôsep, ibale di gwé toi maada ma bas bas ni Yéhôva, di ga yéñ bé boñ ngim jam i i nla bébél nye.​—Yakôbô 4:8.

15. Bimbe biniigana di ñôt mu jam li bi pémél bon ba Israel i ngéda ba bé i ñoñ? (Lôk Héber 3:12)

¹⁵ I bet ba nhôya le Yéhôva a yé Nyambe nu a niñ, ba nla ke haa ni nye. Di yoñ hihéga hi jam li bi pémél bon ba Lôk Israel i ngéda ba bé i ñoñ. Ba bé yi le Yéhôva a yé, ndi ba bi bôdôl pééna le a nla ti bo i mam ba gwé ngôñ. Ba bi badba yak le: “Baa Yéhôva a yé ipôla yés, tole a ta bé ipôla yés?” (Manyodi 17:​2, 7) I mbus hala, ba ndogbene Nyambe. Di gwé bé ngôñ i noñ ndémbél yap, i yé mabéhna inyu yés.​—Añ Lôk Héber 3:12.

16. Kii i nla ha hémle yés i biwénél?

 ¹⁶ Nkoñ ’isi u mboñ le hala a nlôôha ba jam li nlet i yén bebee ni Yéhôva. Ngandak bôt i ntjél yak neebe le Nyambe a yé. Ngim mangéda, i nene wengoñle i bet ba ngwélél bé Yéhôva bon ba gwé niñ ilam. I ngéda di ntehe hala, hémle yés i nla tomb. Tolakii di nyi le Nyambe a yé, di nla bôdôl pééna le a ga hôla bés. I jam li, li bi pémél i nwet a bi tila kaat Tjémbi 73. A bi tehe i bôt ba bé kéña nye, ba ba bé gwélél bé Yéhôva ba ntuk niñ. A bôdôl badba too nseñ u yé toi i gwélél Nyambe?​—Tjémbi 73:​11-13.

17. Kii i ga hôla bés i yén bebee Yéhôva?

¹⁷ Kii i bi hôla ntôp tjémbi nunu i kodol litehge jé li mam? A bi ôt pék mu jam li mpémél i bôt ba nkôm Yéhôva mbus. (Tjémbi 73:​18, 19, 27) A hoñol yak bisai mut a nkôs i ngéda a ngwélél Nyambe. (Tjémbi 73:24) Yak bés di nla yoñ ngéda i ôt pék mu bisai Yéhôva a mbôn bés. Di hoñol i yom niñ yés i bak le i ba ibale di gwéélak bé Yéhôva. Ibale di nhoñol inyuki hala a yé nseñ i gwélél Yéhôva, hala a ga hôla bés i téñbe ni nye, di ga kal kiki ntôp tjémbi le: “Ndi me, i yé me loñge le me tiige Nyambe bebee.”​—Tjémbi 73:28.

18. Inyuki di nlama bé kon woñi inyu dilo di nlo?

¹⁸ Di nla yémbél mandutu momasôna di ga boma munu dilo di nsôk inyule di yé ‘minkol mi Nyambe nu a niñ, nu a yé ki bañga Nyambe.’ (1 Tésalônika 1:9) Nyambe wés a yé toi nu a nlôl i bet ba ngwélél nye mahôla. A bi ba ni bagwélél bé ba ngéda kôba, a yé yak ni bés i len ini. Ndék ngéda wee njiiha ikeñi i mbôdôl. Ndi di ga ba bé bésbotama. (Yésaya 41:10) Bésbobasôna di nla “bana ñem ngui i kal le: ‘Yéhôva a yé nhôla wem; m’a kon bé me woñi.’”​—Lôk Héber 13:​5, 6.