1. Txini enakamihedha alabeli a Yehova odhowagavi amwebedhaga iyene masiki agumanagana makattamiho menjene?

 BIBILIA onologa wi—iyo ninkalawo masaka orutxa vaddiddi. (2 Tim. 3:1) Ottiya bahi owanana makattamiho agumanana attu ena, adhari a Yehova anogumanana ofwara-fwariwa. Kito txini enanikamihedhe odhowagavi nimulabelaga Yehova masiki nigumanagana makattamiho menjene? Elobo modha ja oziwa wi Yehova “Mulugu onkalawovi.”—Jer. 10:10; 2 Tim. 1:12.

2. Na mukalelo gani Yehova ddi Mulugu onkalawovi?

² Yehova Muttu webaribari, iyene onowona makattamiho angumanihuna vina oli womala-nawale wi anikamihedhe. (2 Map. 16:9; Masal. 23:4) Nigobuwela wi Mulugu wehu ononitanala venjene, ononizuzumela vina onofuna onikamihedha, ninokana guru ya owanana makattamiho-makattamihovi angumanihuna. Ninele wona ebaribari ya mazu aba na empadduweli Mwene Davidi vina adhari ena a Yehova a masaka awale.

3. Txini yafuna ologa Davidi mulogiliye Yehova onokalawo?

³ Davidi wannimuziwa deretu Yehova vina wannimukuluvela. Mudhidhi wafwara-fwariwiye na amwiddani aye, motagiha na Mwene Saul, Davidi wahimukumbirha Yehova nikamihedho modhela nlobelo. (Masal. 18:6) Mwakulile Yehova nlobelo na Davidi vina amukamihedha, iyene ohiloga: Yehova onokalawo! (Masal. 18:46) Davidi wafuna aloge eni na mazu aba? Nivuru dhahi nihiloga wi na mazu aba Davidi wela ologa nikuluvelo naniye nawi Yehova Mulugu webaribari vina dila dhetene onowakamihedha adhari aye. Davidi wanziwa wi Yehova wannoona dhetene dhampadduwela vina wali womala-nawale wi amukamihedhe, jijene emukamihedhile Davidi odhowagavi amulabelaga Yehova vina amuttittimihaga.—Masal. 18:​28, 29, 49.

4. Ekalele nni yamakamaka okana nikuluvelo nawi Yehova Mulugu onkalawovi?

⁴ Okuluvela wi Yehova Mulugu onkalawovi jinanikamihedhe  omulabela na murima wehu wotene. Jijuwene enanivahe guru ya owanana yoweha-yowehavi vina onikamihedha odhowagavi nikosaga mpaka vanwodhelihu mmabasani mwaye. Enele onikamihedha vina okalavi ofiyedheya na Mulugu wehu.

MULUGU ONKALAWOVI ONELE WULIBIHA

5. Elobo gani endhaga wunuwiha nikuluvelo nehu nigagumanana makattamiho? (Filipi 4:13)

⁵ Iyo ninele owodha owanana makattamiho-makattamihovi, masiki akale manddimuwa obe mang’ono, nigobuwela wi Yehova, Mulugu onkalawovi vina onele okala womala-nawale wi anikamihedhe. Ebaribariya jawi mwa Yehova, kawo makattamiho animurutxa ogomiha. Sabwani iyene ddi Namawodha-wodha vina onowodha onivaha guru enfunihu. (Kengesa Filipi 4:13.) Nona ninowodha owanana makattamiho-makattamihovi na nikuluvelo. Nigoona wi Yehova ononikamihedha mwa dhilobo dhing’ono ninokuluvela wi iyene onele owodha onikamihedha mmidhidhini dhorutxa.

6. Elobo gani empadduwele Davidi valiye muzombwe emuttukulele omukuluvela venjene Yehova?

⁶ Koona mapadduwo meeli amukamihedhile Davidi omukuluvela venjene Yehova. Davidi valiye muzombwe oku agali mukumbuzi, mwari mwa dila bili dhottiyana nikurukumwa vina poddogoma yahittukula nibila nimodha mwa abale akumbuziye. Mwa dila esi dhobili, Davidi wahafwara anenama aba bavuna nibilana. Mbwenyi Davidi kobuwele wi esiledha wawodhile na guru dhaye bahi. Iyene wanziwa wi ddi Yehova wanvahile oliba murima vina guru yafuniye wi awodhe opa dhinama esile. (1 Sam. 17:​34-37) Davidi txipo kadduwalile dila esi dhobili. Mudhidhi wobuweliye mapadduwo aba omeli, omukuluvela waye Yehova wanlibavi aziwaga wi Mulugu onkalawovi agahiwodha omukamihedha dila dhetene dhigafuniliye nikamihedho naye musogorho.

7. Txini yazuzumele Davidi vina ejoya yamukamihedhile dhavi ompemberha Goliya?

⁷ Mudhidhi mung’onovi musogorhomwa, txino Davidi agali mpali, wahidhowa vali anyakoddo ana Izrayel. Iyene wahizinddiyela wi anyakoddoya ali owovene sabwani mukango wa akadda Afilisti wakuweliwa Goliya wela wabedda anyakoddo a ana Izrayel. (1 Sam. 17:​10, 11) Awene ahova sabwani azuzumele na munuwelo wa Goliya vina na mazu alogiye. (1 Sam. 17:​24, 25) Mbwenyi Davidi, wazuzumeli elobo yottiyana. Davidi wanziwa wi Goliya kaabedda bahi anyakoddo a ana Izrayel, mbwenyi waabedda anyakoddo a Mulugu onkalawovi. (1 Sam. 17:26) Davidi wamukuluveli Yehova. Iyene wanziwa wi Mulugu wakene wamukamihedhile mudhidhi waliye mukumbuzi agahikosa yakakene dila eji. Davidi kaganyedha wi Yehova agahimukamihedha, nona iyene wahiwodha owana na Goliya vina ompemberha!—1 Sam. 17:​45-51.

8. Elobo gani endhaga wunuwiha nikuluvelo nehu nawi Yehova onele odhowavi anikamihedhaga mmidhidhini dhorutxa? (Koona vina foto.)

⁸ Enowodheya iyo vina owanana makattamiho-makattamihovi nigobuwela wi Mulugu onkalawovi, onele okala womala-nawale wi anikamihedhe. (Masal. 118:6) Enowodheya wunuwiha omukuluvela wehu Yehova nigobuwela dhilobo dhikosiliye mundduni, ninga wengesa mapadduwo a mBibiliani anoniha wi Yehova wahakamihedha adhari aye. (Iza. 37:​17, 33-37) Ottiya ejo, enowodheya weyo wengesa mapadduwo a abali na arogora anfwanyeya mu saiti jw.org, mapadduwo abo anowoniha mowakwana-mwene mukalelo Yehova onakamihedhiye alabeli aye masaka abano. Enowodheya weyo vina otanalela mudhidhi wukamihedhile Yehova. Masaka mena nikamihedhona kaninakale ninddimuwa vaddiddi  ninga owana na nikurukumwa obe poddogoma. Mbwenyi ebaribariya jawi Yehova ohukamihedha venjene mwigumini mwawo! Ddi iyene wukukusele wi okale marho waye vina onowodha okalavi oweddeyana sabwa ya nikamihedho ninuvahiye. (Jo. 6:44) Egali dhahene, onkoddela nni omukumbirha Yehova wi awukamihedhe wubuwela midhidhi dhakuliliye malobelo awo, awukamihedhaga mudhidhi wafuniwe vina vagumaniwena makattamiho orutxa? Otanalela dhilobo esi enele wukamihedha okana nikuluvelo nawi onofwanyela odhowavi omukuluvelaga Yehova.

9. Ninfwanyela otanalela eni nigagumanana makattamiho? (Gano 27:11)

⁹ Omona Yehova ninga Mulugu onkalawovi onele onikamihedha wona dhoweha na monelo wofwanyelela. Dhavi? Nigagumanagana makattamiho ninofwanyela otanalela ejile eli yamakamaka. Satana ohiloga wi nigagumanana makattamiho, ninele omunyanyala Yehova. Mukalelo onwanihuna makattamihoya, onompatta Yehova. (Job 1:​10, 11; kengesa Gano 27:11.) Nona nigadhowavi nikalaga oweddeyana na Yehova masiki na makattamiho ninotonyihedha omukwela wehu iyene vina ninolagiha wi Satana muttambi. Ki weyo onogumanana ofwara-fwariwa na alamuleli, ojombeliwa kobiri, attu kanuvuruwana mmabasani a olaleya obe onogumanana makattamiho mena? Akala pumwenemo, kobuwela wi obu mudhidhi wa weyo omuttiya Yehova wohagalalene. Mbwenyi, kudduwale wi Yehova txipo kanawuttiye ogumanena makattamiho abuwene ahinawodhiwe owanana. (1 Kor. 10:13) Iyene onele wuvaha guru enfuniwe wi owodhe opemberha.

MULUGU ONKALAWOVI ONELE WUTTUVA

10. Mulugu onapikirhela eni abale ankala oweddeyana na iyene?

¹⁰ Mudhidhi wotene Yehova onowattuva abale aneddeyana na iyene. (Aheb. 11:6) Iyene ononivaha murenddele na wagalala ovanene vina musogorho onele onivaha egumi yohimala. Iyo ninimukuluvela Yehova bahi, sabwani ninoziwa wi iyene onele onittuva vina ohikana guru ya okosa ejuwene. Nona nidhowegevi nikosaga mpaka vanwodhelihu wi nimulabele,  dhahene ninga mukoseli alabeli aye a masaka a mundduni. Jijuwene ekosile Timóteo.—Aheb. 6:​10-12.

11. Txini yamuttukulela Timóteo okosa mpaka vawodheliye wi akamihedhe mulogo? (1 Timóteo 4:10)

¹¹ Kengesa 1 Timóteo 4:10. Timóteo wannimukuluvela Mulugu onkalawovi. Nona wahikosa mpaka vawodhiliye mmabasani a Yehova vina wahakamihedha abali. Iyene wakosile dhavi ejoya? Murumiwi Paulo wahimukokomeza okala namasunziha wapama mmulogoni vina mmabasani a olaleya. Paulo vina wahimwaddela Timóteo wi wanfwanyela okala tagiha yapama mwa abali àli azombwe vina owunuwelavo. Ottiya ejo Timóteo wahakela mabasa orutxa ewanana ovaha malago ohipipiriheya mwa abale afuna, mbwenyi nokwela. (1 Tim. 4:​11-16; 2 Tim. 4:​1-5) Dila dhina ena kagawodhile ozinddiyela mabasa otene akosa Timóteo obe txino kagatamalele, mbwenyi iyene wanziwa wi Yehova wannona mabasa otene akosiye vina agahimuttuva.—Rom. 2:​6, 7.

12. Sabwaya jani anddimuwa a mmulogoni anokosa mpaka vanwodhelani wi akamihedhe mulogo? (Koona vina foto.)

¹² Masaka abano, anddimuwa a mmulogoni vina anofwanyela okana ebaribari wi Yehova onowona dhetene dhinkosani vina onovaha ttima. Ottiya waredhela, osunziha vina olaleya, anddimuwa enjene a mmulogoni anokamihedha mabasa a omaga vina a ajuda humanitária. Oku ena anokamihedha Makuru Anawaredhela Aredda obe Nikuru Ninlaba Mumodhani na Masipitale. Anddimuwa a mmulogoni anivivelela wi akamihedhe mabasa aba anoziwa wi mulogo mwinyaya ddi Yehova ottiya muttu, mwa dhahene awene anokosa mpaka munwodhelani vina anokana nikuluvelo wi iyene onele wattuva sabwa ya dhotene dhinkosani.—Kol. 3:​23, 24.

13. Yehova onviwamo dhavi agonaga guru dhinkosihu wi nimulabele?

¹³ Ebaribari wi iyo notene kaninawodhe okala anddimuwa a mmulogoni. Mbwenyi enowodheya omukosela elobo-txilobo Yehova. Mulugu  wehu onowagalala venjene nigavilibihedha wi nimulabele. Iyene onowona mivaho dhinkosihu wi nikamihedhe mabasa a Omwene masiki dhikalaga dhing’onovi. Iyene vina onohagalala venjene nigavilibihedha ovaha dhowakula dhehu mmatugumanoni masiki novaga vina murima waye onohagalala vaddiddi agoona wi iyo nihiwodha omulevelela mbali obe murogora oninyimulile. Masiki akala kunwodha okosa mpaka mwafuneliwe, kakana nikuluvelo nawi Yehova onovaha ttima dhetene dhinkosiwe. Sabwa ya ejuwene iyene onowukwela venjene vina onele wuttuva.—Lk. 21:​1-4.

KAKALA WOFIYEDHEYA NA MULUGU ONKALAWOVI

14. Okana mandano oliba na Yehova onnikamihedha dhavi odhowavi nikalagavi ororomeleya? (Koona vina foto.)

¹⁴ Enele okala yovevuwa odhowagavi nimuroromelaga Yehova akala ninomona ninga muttu webaribari. Jijene epadduwile na Jozé. Iyene ohikodda okosa mararuwo sabwani wanziwa wi agahimunyimula vaddiddi Yehova. (Wita 39:9) Akala ninofuna omona Yehova ninga muttu webaribari, ninofwanyela otamela mudhidhi wa ologa na iyene vina osunza Nzu naye. Nigakosa ejuwene mandano ehu na iyene anele okala ofiyedheya vaddiddi. Dhahene ninga Jozé, nigakana mandano oliba na Yehova txipo kaninakose elobo-txilobo enamunyimule.—Tia. 4:8.

15. Ninsunzavo eni na ejile yapadduweli ana Izrayel valani mwiddeddereni? (Ahebreu 3:12)

¹⁵ Abale ahinimona Yehova ninga muttu webaribari anodhaga ogwela vamuregani wa ottiya omulabela. Koona yapadduwele ana Izrayel mudhidhi walani mwiddeddereni. Awene anziwa wi Yehova ohikalawo, mbwenyi ahiroma waganyedha akala Yehova txibarene agahazuzumela. Nona awene ahivuza: “Nabuya oli na iyo, peno kavo?” (Obud. 17:​2, 7) Yodhelavoya, awene ahimusadduwela Mulugu. Iyo kaninfuna okosa yakene ekosile awene banittiya omwiwelela Yehova.—Kengesa Ahebreu 3:12.

16. Nroromelo nehu nindhaga wehiwa dhavi?

¹⁶ Kahiyo elobo yovevuwa odhowavi nikalaga  ofiyedheya na Yehova mwilaboni mpuno munkalihu. Attu enjene anofiyedha ologa wi Mulugu kawo. Vina enkala ninga abale ahinimwebedha Mulugu anokana egumi yapama. Nigonaga esuwene dhipadduwaga nroromelo nehu ninowehiwa. Ebaribari wi kaninafiyedhe waganyedha okalawo wa Yehova, mbwenyi ninodhaga oroma waganyedha akala iyene txibarene onele onikamihedha. Namaleba Masalmo 73 wahigumanana makattamiho aba. Attu a nsaka naye ampwaza malamulo a Mulugu vina ankalawo mowiwanana na dhifunelo dhawa. Sabwa ya ejuwene iyene wahiroma waganyedha akala yahikalawo yopurelamo ya odhowavi amulabelaga Yehova.—Masal. 73:​11-13.

17. Txini enanikamihedhe okalavi ofiyedheya na Yehova?

¹⁷ Txini yamukamihedhile munasalmo otxinja monelo waye? Iyene wahitanalela ejile egapadduweli abale animunyanyala Yehova. (Masal. 73:​18, 19, 27) Iyene vina wahitanalela dhopurelamo dhetene dhinkana abale animulabela Mulugu. (Masal. 73:24) Enowodheya iyo vina otanalela maruriho otene anivahile Yehova. Karoma otanalela mukalelo ogali egumi yawo kowiliwa kuwamulabela Yehova. Wubuwela dhilobo esi enele wukamihedha odhowagavi okalaga oweddeyana na iyene vina dhahene ninga munasalmo ninele owodha ologa dhahi: “Miyo, osanzaya waga kukala vamodha na Mulugu.”—Masal. 73:28.

18. Sabwaya jani kaninfwanyela wova dhinapadduwe musogorho?

¹⁸ Enowodheya iyo owanana makattamiho-makattamihovi angumanihuna masaka abano sabwani nili adhari a Mulugu oliwo vina webaribari. (1 Tes. 1:9) Yehova Muttu webaribari vina oli womala-nawale wi anikamihedhe. Iyene txipo kanyanyalile alabeli aye a masaka a mundduni nona onele odhowavi akosaga yakakene na iyo masaka abano. Mohigonela ninele opattiwa goyi enddimuwa. Mbwenyi kaninakale nooka Yehova onele okala na iyo. (Iza. 41:10) Egali dhahene enowodheya iyo notene ologa na oliba murima: “Nabuya ddinddikoya kaddinova elo.”—Aheb. 13:​5, 6.