1. ¿Kʼãrẽba kʼarebaseabʉ bedʼea zroma ũdupanʉnʉinʉ Jeowa ode kʼẽrẽpa bʼaita?

 DAIZEZE Bedʼeaba jarabʉ idi ewadera bedʼea zroma daya obe ẽãta ũdupanʉta (2 Tim. 3:1). Idibema ẽbẽrarãbara mejãcha ũdupanʉ bedʼea zromata, mamina Jeowa ʉ̃rʉ Kʼawuabipanʉrãbara audre ũdupanʉ ãyita pẽwãpanʉ baera. ¿Kʼãrẽba kʼarebaseabʉ mawũãsidu kʼẽrẽpa bʼaita? Dayirãba kĩrãbeibara Jeowara wãrĩnʉ bʉta, maʉ̃ba mejãcha kʼarebaseabʉ (Jer. 10:10; 2 Tim. 1:12).

2. ¿Jeowabara sãwũã ũdubibʉ iyira wãrĩnʉ zokʼaibʉta?

² Jeowara wãrĩnʉ zokʼaibʉ, maʉ̃ba iyara jʉrʉbʉ sãwũã kʼarebaita dayirãra akʉza so zarea diabʉ bedʼea zroma ũdubʉdade (2 Crón. 16:9; Sal. 23:4). Kʼawuapanʉbʉrʉ Jeowara wãrĩnʉ zokʼaibʉta kʼãrẽ bedʼea zroma zebʉmina iyiʉ̃me kʼẽrẽpa bayi. Akʉdaya kʼãrẽta berabarisita nokʼo Davidta.

3. ¿Kʼãrẽta jarakĩrãbasi Davidba jaraside Jeowara zokʼaibʉta?

³ Davidbara biʼia ũdukʼawuabasi Jeowara akʉza iyide ĩjãbasi. Saúlba akʉza wuabemara ẽbẽrarãba David pẽwãpanasidera iyara Jeowaʼa kʼarebata widisi (Sal. 18:6). Davidba ũduside Jeowaba iyi bedʼea sãwũã panʉnata akʉza sãwũã kʼarebadata, maʉ̃ne iya jarasi: «Jeowara zokʼaibʉ» (Sal. 18:46). Davidbara maʉ̃ bedʼeabara jarakĩrãkʉa ẽ basi Jeowara bari zokʼaita bʉta. Libro abaʉba jara ũrĩbibʉ Davidbara ũdubasita «Daizezera wãrĩnʉ bʉta, adewara ẽbẽrarãta badua kʼarebabʉta». Davidba ũdusi Jeowabara  sãwũã kʼarebasita, maʉ̃ba audre ĩjãsi iyara Jeowara bʉta akʉza maʉ̃ba diasita iyaʼa zareata mawũã iyiʉ̃me kʼẽrẽpa bʼaita (Sal. 18:​28, 29, 49).

4. ¿Dayirãba ĩjãpanʉbʉrʉ Jeowara wãrĩnʉ zokʼaibʉta kʼãrẽ nebiata ũduseapanʉ?

⁴ Dayirãba ĩjãbʉbʉrʉ Jeowara wãrĩnʉ zokʼaibʉta maʉ̃ba kʼarebayi iya kãgabʉta sobiade oita, badu bedʼea zroma zebʉrʉde zarea bʼaita adewara kʼarebayi okĩrã oita iya kãgabʉta akʉza kʼarebayi soidʉba iyi kʼawa panamarẽã.

DAIZEZE ZOKʼAIBɄBA ZAREATA DIAYI

5. ¿Kʼãrẽba kʼarebaseabʉ bedʼea zroma awuantaita? (Filipenses 4:13).

⁵ Dayirãba kĩrãbepanʉbʉrʉ Jeowara wãrĩnʉ zokʼaibʉta akʉza iya kʼarebakĩrãbʉta, badu bedʼea zroma zebʉrʉde awuantadayi. Daizezebara nekʼãrẽ jõma oseabʉ baera iyitara bedʼea zromara kʼãrẽ ẽ, maʉ̃ba iya dayirã diayi zareata badu bedʼea zroma awuantadamarẽã (akʉra Filipenses 4:13). Maʉ̃ kʼarea bedʼea zroma ũdubʉrʉde aduʼa baseapanʉ. Mawũẽra, Jeowaba kʼãwũã nekʼãrẽ wikade kʼarebabʉbʉrʉ nekʼãrẽ bedʼea zromanebida kʼarebaseabʉ.

6. ¿Davidbara kʼãrẽneba ũdubisi audre ĩjãbʉta Jeowa ʉ̃rʉ?

⁶ Davidbara mejãcha ĩjãbʉta ũdubisi Jeowade. Akʉdaya kʼãrẽa mawũã ũdubisita. Ewari aba iya yi zeze obejarata akʉbasi, maʉ̃ta imamata ze kʼãrãpe aba edesi. Maʉ̃ tẽã awuru ewaride zesi wita, maʉ̃bida iyaba edesi obeja aba. Maʉ̃nera Davidbara pera ẽã kʼaidu pẽwã wãsi mawũã maʉ̃ra obejara kʼarebaita. Davidbara bia kʼawuabasi Jeowa kʼarebadeba mawũã zarea erbasita, maʉ̃ kʼarea jara ẽ basi iyi zareadeba odata (1 Sam. 17:​34-37). Davidbara jipa kĩrãdua ẽ basi maʉ̃ berabaridara akʉza maʉ̃ ʉ̃rʉ bia krĩchadaba audre ĩjãbisi Jeowabara iyira kʼarebaita ʉ̃ra zeidebida.

7. (1) ¿Davidbara kʼãrẽ ʉ̃rʉ krĩchabasi? (2) ¿Maʉ̃ba sãwũã kʼarebasi Goliatʼʉ̃me yõita?

⁷ Tẽã israelitara gorogorora bʉidʉ jʉ̃ẽsidera, Davidʼra waidide kʉ̃rabasi. Mama iya ũdusi ẽbẽra Filisteadebema yi zroma chʉba yi trʉ̃ Goliatba jarabʉta kʼaita iyiʉ̃me yõkĩrãbʉta, maʉ̃ kʼarea gorogorora Israeldebemarãra mejãcha perabasi (1 Sam. 17:​10, 11). Maʉ̃ra gorogororãra perabasi ãya akʉpanasi baera maʉ̃ ẽbẽrarã kʼãrẽãba chʉta akʉza bedʼea sãwũã jarabada kʼarea (1 Sam. 17:​24, 25). Mamina Davidbara mawũã krĩchaba ẽ basi, iya krĩchasi Israelde gorogorora bʉra badu gorogorora ba ẽ basita, awuarabʉrʉ Jeowa pʉwʉrʉ gorogoro basita. (1 Sam. 17:26). Iyara audrera krĩchabasi Jeowa ʉ̃rʉ, adewara wãrĩnʉ ĩjãbasi Jeowaba iyi nãã kʼarebada kĩrãkʼa maʉ̃nebida Jeowabara iyira kʼarebaita (1 Sam. 17:​45-51).

8. ¿Kʼãrẽba kʼarebai bedʼea zroma ũdubʉrʉdera Jeowa ʉ̃rʉ audre ĩjã bʼaita? (Akʉra potota).

⁸ Davidbara ewari jõmaʉ̃nẽ kĩrãbebasi Jeowabara iyira kʼarebaita, maʉ̃ kʼarea dayirãba iyide kĩrãkʼa opanʉbʉrʉ bedʼea zroma zebʉrʉdera awuantadayi (Sal. 118:6). Dayirãba krĩchapanʉbʉrʉ Jeowaba naena sãwũã kʼareba zebʉrʉta, dayirãbara audre zarea ĩjãseabʉ. Bari jaradaita, lera nebʉra Jeowaba ẽbẽrarã iyiʉ̃me kʼẽrẽpa badarata sãwũã kʼarebasita (Is. 37:​17, 33-37). Adewara jw.org de ũduseabʉ Jeowaba sãwũã kʼareba zebʉrʉta iyi ode panʉrãra. Adewara krĩchara  bʉra Jeowabara sãwũã kʼarebasita naena. Wãrĩnʉbaira, bʉara beaka wita mia imamata, mawũã Jeowa kʼareba ũduita, mamina kĩrãbera Jeowaba bʉ sãwũã kʼareba zebʉrʉta. Bari jaradaita, iya jarabʉ iyi neũdukʼawua ba zemarẽã (Juan 6:44). Bʉra Jeowaba kʼarebabʉ baera iyi ode bʉ. Yibia bayi Jeowa widita kĩrãbebimarẽã sõbede panʉsita bʉa wididara, bʉ kʼarebadata akʉza sõbede bedʼea zromaneba ẽdrʉbidata. Bʉa kĩrãbebʉbʉrʉ Jeowaba sãwũã kʼareba zebʉrʉta audre ĩjã bayi Jeowaba bʉra tẽã kʼarebaita.

9. ¿Kʼãrẽta kĩrãbedaibara dayirãba bedʼea zroma ũdubʉrʉdera? (Proverbios 27:11).

⁹ Jeowa zokʼaibʉ kʼawuaiba kʼawuabiseabʉ kʼãrẽa berabaribʉta bedʼea zromara. ¿Sãwũã mawũãra? Dayirãbara bedʼea zromata ũdupanʉ Diaruta Jeowaʉ̃me bedʼeakasi baera. Diarubara jarabʉ ẽbẽrarãba bedʼea zroma mejãcha ũdubʉrʉdera Jeowara amaeita (Job 1:​10, 11; akʉra Proverbios 27:11). Maʉ̃ kʼarea dayirãta Jeowaʉ̃me kʼẽrẽpa panʉbʉrʉ mama ũdubidayi Jeowata wãrĩnʉ kãgabʉta akʉza Diarura sewa nebʉra omiata. ¿Bʉara ũdubʉka bedʼea zromara nokʼoba pẽwãpanʉ kʼarea, plata neẽ kʼarea akʉza jaradiabʉde ẽbẽrarãba ũrĩ ẽ kʼarea, mawũã ẽ bʉrʉ nekʼãrẽ awuru bedʼea zroma kʼarea? Maʉ̃ta mawũã bʉbʉrʉ, kĩrãbera bʉa obʉdeba Jeowata sobiabiseabʉta mawũã ẽ bʉrʉ sopʉabiseabʉta. Kĩrãbera iyara daya oẽãsidu wũẽtara obi ẽãta (1 Cor. 10:13). Jeowabara diayi zareata awuantamarẽã.

DAIZEZE ZOKʼAIBɄBARA NEBIATA DIAYI BɄARA

10. ¿Daizeze zokʼaibʉbara sãwũã kʼarebai iyi ode kʼẽrẽpa panʉrãra?

¹⁰ Jeowabara nebiata diabʉ iyiʉ̃me kʼẽrẽpa bʉara (Heb. 11:6). Idi ewade dayirãra aduʼa babibʉ akʉza sobia babibʉ. Mamina ʉ̃ra zeide kʼarebayi ewari jõmaʉ̃nẽ bʼaita. Dayirãbara soidʉba ĩjãpanʉ iya dayirãʼa nebia diakĩrãbʉta akʉza  iyira zarea barabʉta maʉ̃ oita. Soidʉba ĩjãpanʉ baera zarea opanʉ iyiʉ̃me kʼẽrẽpa bʼaita. Jeowa ode kʼẽrẽpa pananaraba maʉ̃ta osida. Akʉdaya Timoteo nebʉrata (Heb. 6:​10-12).

11. ¿Kʼãrẽa Timoteobara kʼarebakĩrãsi kongregasionʼra? (1 Timoteo 4:10).

¹¹ (Akʉra 1 Timoteo 4:10). Timoteobara ũdubisi wãrĩnʉ ĩjãbʉta Jeowaba iyira kʼarebaita, maʉ̃ kʼarea iyira mejãcha zarea osi Jeowaʉ̃me kʼẽrẽpa bʼaita akʉza wuabemara kʼarebaita. ¿Kʼãrẽta osi? Apostol Pabloba jaradiasi audre zarea omarẽã biʼia jaradiaita kongregasione akʉza jaradiade wãinebida. Adewara Pablobara jarasi yiza bia bamarẽã zõrãrãita akʉza warraraita. Akʉza iyara mebẽrãra ibiade ũrãgʼaibarabasi akʉza kãgade, maʉ̃ra iyitara zarea basi baibara (1 Tim. 4:​11-16; 2 Tim. 4:​1-5). Edaʉde Timoteoba nekʼãrẽ obʉ kʼarea wuabemara ẽbẽrarãbara biga dia ẽ basi akʉza miõba kʼãwũãena nebiata obasi, mamina iyara bia kʼawuabasi Jeowabara maʉ̃ kʼarea iyaʼa nebia diaita (Rom. 2:​6, 7).

12. ¿Kʼãrẽba kʼarebaseabʉ zõrãrãra kongregasione audre trajaita? (Akʉra potota).

¹² Jeowabara jõma akʉbasi Timoteoba kʼãrẽ nebia obadara, maʉ̃ kʼarea mejãcha kãgabasi. Idi ewadebida Jeowabara akʉbʉ zõrãrãba kʼãrẽ nebia obʉra. Zõrãrãbara akʉpanʉ mebẽrãra, jaradiabʉ kongregasione, jaradia wãpanʉ. Mamina maʉ̃ awuara ʉ̃kʉrʉbara kʼarebapanʉ Daizeze de parãita akʉza kʼarebapanʉ mebẽrã drʉade neida berabaribʉrʉde. Akʉza ʉ̃kʉrʉta medikobawara bedʼeabʉ mebẽrãbari. Zõrãrãbara bia kʼawuapanʉ kongregasionʼrara mawũã ẽbẽra neẽãta, awuarabʉrʉ Daizezedeta. Maʉ̃ kʼarea ãya obʉra soidʉba obʉ akʉza wãrĩnʉ ĩjãpanʉ maʉ̃ obʉ kʼarea Jeowabara ãyaʼa nebiata diaita (Col. 3:​23, 24).

13. ¿Dayirãba zarea obʉ kʼarea iya kãgabʉ oita Jeowara sãwũã sentibʉ?

 ¹³ Jõmaʉ̃ta zõrãrã kongregasionebema babe ẽ, mamina jõmaʉ̃ba nekʼãrẽ diaseabʉ Jeowaʼa. Jeowabara bia akʉbʉ dayirãba iyi kʼarea zarea opanʉra. Maʉ̃ kʼarea dayirãba plata kongregasionʼita diabʉrʉdera Jeowaba maʉ̃ra bia akʉbʉ, maʉ̃ra wĩkabʉmina. Jeowara sobia dayirãba zarea obʉde komentario diaita perabʉmina. Akʉza iyira sobiabʉ dayirãba mebẽrãba dayirã ʉ̃rʉ nekayirua oda kĩrãduabʉde. Bʉa Jeowaita nekʼãrẽ obʉ kʼãrẽ ẽ kĩrãkʼa akʉbʉmina kĩrãbera Jeowabara bʉa obʉra bia akʉbʉta nekʼãrẽ wĩkabʉmina. Iyara kãga bʉra akʉza nebiata diayi bʉa mawũã obʉ kʼarea (Luc. 21:​1-4).

JEOWA KʼAWA BʼAIBARA

14. ¿Kʼãrẽa Jeowa kʼawa bʉba kʼarebaseabʉ kʼẽrẽpa bʼaita? (Akʉra potota).

¹⁴ Dayirãba Jeowata wãrĩnʉ zokʼaibʉta akʉpanʉbʉrʉ zare ẽ bayi iyiʉ̃me kʼẽrẽpa bʉta ũdʉbira. Mawũã berabarisi Joséta. Joséba Jeowata wãrĩnʉ zokʼaibʉta ũdubasi baera nemitiata okĩrã ẽ basi Jeowa dabʉ nãã (Gén. 39:9). Dayirãbida kʼawua kĩrãbʉbʉrʉ Jeowa wãrĩnʉ zokʼaibʉta, ewari jʉrʉibara Daizeze Bedʼea akʉita akʉza iyaʼa yiwidʼita. Mawũã odara dayirãra audre Jeowa kʼawa bayi Joséba oda kĩrãkʼa, dayirãta Jeowa kʼawa bʉta sentibʉbʉrʉ jipa nekayiruata okĩrãna ẽ bayi (Sant. 4:8).

15. ¿Israelitaraba kʼãwũã nekayirua odadeba dayirãbara kʼãrẽta kʼawuapanʉ? (Hebreos 3:12).

¹⁵ Ẽbẽra abaʉba kĩrãduara Jeowa zokʼaibʉta maʉ̃ra mesera bai Jeowadeba jĩga wãseabʉ. Akʉdaya kʼãrẽta berabarisita israelitara ãyi drʉa ibʉawabʉde panaside. Ãyara kʼawuapanasi Jeowara zokʼaibʉta, mamina ewari berabari wãne krĩchasida Jeowabara ãya nesidabʉta dia ẽ baita. Ãya jarasida: «¿Jeowara dayirãnebʉka mawũã ẽ bʉrʉ neẽka?» (Éx. 17:​2, 7). Mawũã bʉba ãyira Jeowadeba  jĩgara wãsida, maʉ̃ kʼarea kʼãrẽ krĩcha ẽã, ãyide kĩrãkʼa oita krĩchada ẽ baibara (akʉra Hebreos 3:12).

16. ¿Kʼãrẽba daya ĩjãbʉta aduabiseabʉ?

¹⁶ Jeowa kʼawa bʼaira idi ewadera jipa zare naʉ̃ drʉade nekʼãrẽ kʼãwũã berabaribʉba. Ẽbẽrarã mejãchaʉba jarapanʉ Daizezera neẽãta. Edaʉde ẽbẽrarã nekayirua obʉra dayima bia wã kĩrãkʼa bʉ. Maʉ̃ ũdubʉba dayirãba ĩjãbʉra adua wãseabʉ. Dayirãba jaraseabʉ ĩjãbʉta Jeowara wãrĩnʉ chʉta, mamina dayirã sode krĩchaseabʉ iya dayirãra kʼareba ẽ baita. Maʉ̃ kĩrãkʼa berabarisi Salmo 73 bʉdata. Iya ũdubasi ẽbẽrarã Daizeze ode bʉ ẽãra aduʼa sobia panasita maʉ̃ kʼarea iyikʉza widisi biga bai kʼawuaita Daizeze ode baita (Sal. 73:​11-13).

17. ¿Kʼãrẽba kʼarebai Jeowa kʼawa bʼaita?

¹⁷ Maʉ̃ yumakẽrã Salmo bʉdara, ¿kʼãrẽba kʼarebasi iyi jẽda bia krĩcha bʼaita? Krĩchabasi kʼãrẽta berabaribʉta ẽbẽrarã Jeowa odeba jĩga wãbʉrʉde (Sal. 73:​18, 19, 27). Adewara krĩchasi kʼãrẽ nebiata ũduseabʉta iyi ode bʉbʉrʉ (Sal. 73:24). Dayirãbida abarika krĩchaseabʉ Jeowaba sãwũã kʼareba zebʉrʉta dayirãra akʉza krĩchaseabʉ Jeowata ũdukʼawua ẽ basibʉrʉ sãwũã bakasita, mawũã oiba kʼarebayi Jeowaʉ̃me kʼẽrẽpa bakĩrãita akʉza yumakẽrã Salmo bʉdaba jarada kĩrãkʼa jarayi: «mʉ̃itara Daizeze orraira audre yibia» (Sal. 73:28).

18. ¿Kʼãrẽa perada ẽ baibara nekʼãrẽ ʉ̃ra zei kʼareara?

¹⁸ Dayirãra Daizeze zokʼaibʉare panʉ baera nekʼãrẽ bedʼea zroma zebʉrʉdera awuantaseapanʉ (1 Tes. 1:9). Iyira wãrĩnʉ zokʼaibʉ akʉza iya dayirãra krĩchabʉ akʉza ewari jõmaʉ̃nẽ kʼarebakĩrãbʉ. Iyara kʼarebasi ẽbẽrarã iyi ode nãã kʼẽrẽpa badarãra. Idi ewadebida dayirãsida mawũã kʼarebayi. Aranʉ bai ũdudayi bedʼea zroma dayirãba ũdudakata, maʉ̃nera dayirãra doba ba ẽ bayi (Is. 41:10). Maʉ̃ kʼarea naʉ̃ bedʼeata soidʉba jaraseapanʉ: «Jeowara mʉ̃ kʼarebabari, maʉ̃ba mʉ̃ra pera ẽ» (Heb. 13:​5, 6).