1. Tera ae buokiia ana aomata Iehova bwa a na teimatoa n taromauria n aki ongei kangaanga aika a rinanoi?

 E KABWARABWARAAKI ara bong aikai n te Baibara bwa “taai aika okoro aika karuanikai.” (2Tim. 3:1) A aki tii rinanoni kangaanga aika bobo ma ngaai aomata n te waaki aei ana aomata Iehova, ma a rinanon naba te kakaaitara ao te bwainikirinaki. Tera ae buokira bwa ti na teimatoa n taromauria Iehova n aki ongei kangaanga aikai? Te bwai teuana ae kakawaki, bwa ti ataia ae Iehova bon “te Atua ae maiu.”—Ier. 10:10; 2Tim. 1:12.

2. N te aro raa ae e riki iai Iehova bwa te Atua ae maiu?

² Bon te Aomata ni koaua Iehova ae ngaia ae kakorakoraira n taai ake ti kataaki iai ao e kakaaei naba aanga ake e na boutokaira iai. (2Rong. 16:9; TaiAre. 23:4) N iaiangoan ae bon te Atua ngaia ae maiu, ti a buokaki iai n tokanikai i aoni kataaki nako aika ti boo ma ngaai. Nora koauan anne iroun te Uea are Tawita.

3. Tera are e nanonna Tawita ngke e kangai “E maiu Iehova”?

³ E ataa Iehova Tawita ao e onimakinna. E tataro Tawita nakon Iehova ibukini buokana ngke e kaeaki irouia aiana ao te Uea are Tauro. (TaiAre. 18:6) Ngke e tia te Atua ni kaekaa ana tataro ao ni kamaiua, ao e a kangai Tawita: “E maiu Iehova!” (TaiAre. 18:46) E oti n taeka aikai bwa e aki tii kakoauaa Tawita ae bon iai te Atua. E oti ni mwin te kakaae teuana bwa e oti n ana taeka aikai Tawita onimakinan Iehova bwa “te Atua ae koaua ae teimatoa n tei ibukia ana aomata.” Eng, e ataia  Tawita man te baere e riki nakoina bwa e maiu te Atua, ao ibukin anne e a kamatoaa ana motinnano bwa e na beku iroun Iehova ao n neboia.—TaiAre. 18:28, 29, 49.

4. Ti na kangaa ni kakabwaiaaki man iaiangoan ae Iehova bon te Atua ae maiu?

⁴ Ngkana ti kakoauaa ae Iehova bon te Atua ae maiu, ti na boni beku irouna ma te ingaingannano. Ti na korakora ao n nanomwaaka i aani kataaki, ao ti na aki kaingingaki n ara beku ibukina. Ti na kananomatoaira naba bwa ti na teimatoa ni kaanira ma Iehova.

E NA KAKORAKORAKO TE ATUA AE MAIU

5. Tera ae ti onimakinna ngkana ti kataaki? (I-Biribi 4:13)

⁵ Ti na kona n nanomwaaka i aani kataaki aika korakora ke aika uarereke, ngkana ti ururingnga ae e maiu Iehova ao e tauraoi ni kakorakoraira. Ngaia are bon akea te kangaanga ae riaon ana konaa Atuara. Boni Moan te Mwaaka ngaia ao e kona n anganira te korakora bwa ti na nanomwaaka. (Wareka I-Biribi 4:13.) Ibukin aei ti a kona ni kaaitarai kataakira ma te nano n onimaki. Ti kakoauaa bwa ngkai e boutokaira Iehova ni kaaitarai kataaki aika uarereke, e na boni buokira naba ni kataakira aika korakora riki.

6. Baikara baika uoua ake a riki aika a kakorakoraa onimakinan Iehova iroun Tawita?

⁶ Iangoi baika uoua ake a riki nakon Tawita aika a kakorakoraa onimakinan Iehova irouna. Ngke te tia kawakintiibu Tawita ngke e ataeinimwaane, ao e a kaoti naba te bea ma te raian bwa a na uotaanako temanna mai buakoia ana tiibu tamana. N taai akana uoua akanne, e ninikoria Tawita ni kakioianako maan akanne ao e kamanoia tiibu. Ma e bon aki iangoia bwa e tokanikai i bon irouna. E ataia ae e boni boutokaia Iehova. (1Tam. 17:34-37) E aki mwaninga taekani baikana a riki akanne Tawita. Ni kananoan ana iango iai, e a onimakinna ae e na boni kakorakoraa te Atua imwina riki.

7. Tera are e kabanea ana iango iai Tawita, are e a buokia n tokanikai i aoni Koria?

⁷ Imwina riki ngke bon te roro n rikirake naba Tawita, ao e a kawara aia kaembwa ni buaka tibun Iteraera. E noria bwa a a rangi ni maaku tautia iroun aia toa I-Biritia ae Koria are e otinako ni “kakanikoia aia taanga ni buaka tibun Iteraera.” (1Tam. 17:10, 11) A maaku tautia aikai bwa a kaatuua iangoan te toa aei ao ana kakaniko are a ongoraeia n te marae ni buaka. (1Tam. 17:24, 25) Ma Tawita e iangoa te bae riki aei n te itera teuana. E iangoia bwa tiaki tii kakanikoaia aia taanga ni buaka tibun Iteraera ma boni kakanikoan “ana taanga ni buaka te Atua ae maiu.” (1Tam. 17:26) E bane ana iango Tawita i aon Iehova. E onimakinna Tawita bwa te Atua are e buokia ngkoa ngke te tia kawakintiibu ngaia, e na boni buokia naba ngkai. E kaitaraa Koria Tawita ma onimakinan ana boutoka Iehova, ao n tokina e bon tokanikai!—1Tam. 17:45-51.

8. Ti na kangaa n teimatoa n ururinga Iehova ngkana ti kaaitara ma kataaki? (Nora naba te taamnei.)

⁸ Ti kona naba ngaira ni kaaitarai kataaki ao n tokanikai i aoia ngkana ti ururingnga ae e tatauraoi te Atua ae maiu ni buokira. (TaiAre. 118:6) Ti kona ni karikirakea onimakinan te koaua anne ngkana ti iaiangoi baike e karaoi rimoa. Wareki rongorongo n te Baibara ake a kauringko aron Iehova ni kakamaiuia ana aomata. (Ita. 37:17, 33-37) Ao nori naba ribooti ake n jw.org aika kaota aron Iehova ni boutokaiia taari ni boong aikai. Ao irarikin anne, ururing naba taai ake e a tia n tei iai ibukim Iehova. Tai raraoma ngkana akea te tai ae e a tia n riki nakoim te bwai ae kamimi n aroni kakionakoan te bea ke te  raian. Bukin tera? Ni koauana, a boni bati baika e a tia ni karaoi Iehova ibukim! E a tia ni katikiko bwa ko na riki bwa raoraona. (Ioa. 6:44) Ao ko bon riai ni kaitaua bwa ko teimatoa ngkai n te koaua man ana ibuobuoki. E aera bwa ko aki tataro nakoina bwa e na buokiko n uringi taai ake e kaekai iai am tataro, e boutokaiko iai n te tai raoi ae ko kainnanoia, ke e kakorakorako iai rinanon te kangaanga teuana? E kona ni korakora onimakinan ae e na bon tei ibukim Iehova, ngkana ko iaiangoi taai akanne.

9. Tera arora n iaiangoi kataakira? (Taeka N Rabakau 27:11)

⁹ Iaiangoan Iehova bwa te Aomata ni Koaua, e na buokira n iangoi kataakira n te aro ae eti. Ni kangaa? Ti na tarai kataakira bwa iteran naba te kauntaeka ae kakawaki are i marenan Iehova ma Tatan. E bukibuki te Riaboro n taku bwa ngkana ti rinanon te rawawata ao ti na boni kitana Iehova. (Iobi 1:10, 11; wareka Taeka N Rabakau 27:11.) Ma ngkana ti kabokorakora ma kataakira ao n tokanikai i aoia, ti a kaota iai tangiran Iehova ao kewen te Riaboro. Kam rinanon ngkai ana kakaaitara te tautaeka, te kangaanga ma kaubwain te aba, te taetae n aki akaka n ami tai n uarongorongo, ke kataaki riki tabeua? Ngkana eng, ao uringnga are anne ami tai ni kakimwareireia nanon Iehova. Uringnga naba are e na bon aki kariaia bwa kam na kataaki n ae riaon ami konaa. (1Kor. 10:13) E na bon anganingkami te korakora bwa kam na nanomwaaka.

E NA KAREKEA KANIWANGAM TE ATUA AE MAIU

10. Tera ae e na karaoia te Atua ae maiu nakoia akana a taromauria?

¹⁰ Iehova bon te tia Karekei Kaniwangaia akana a taromauria. (Ebera 11:6) E karekea nakoira te rau ao namakinan ae ti rauaki ngkai ao ai te maiu ae aki toki n te tai ae imwaira. Ti kona n onimakina Iehova, ao ni kakoauaa ae bon iai nanona ao mwaakana ni karekei kaniwangara. Ti kairaki n ara koaua  anne bwa ti na katabetabeira n ara taromauri, n aron ae a karaoia ana toro aika kakaonimaki rimoa. E oti koauan anne iroun Timoteo n te moan tienture.—Ebera 6:10-12.

11. Tera ae e kaira Timoteo bwa e na mwakuri korakora n te ekaretia? (1 Timoteo 4:10)

¹¹ Wareka 1 Timoteo 4:10. E onimakina te Atua ae maiu Timoteo. Ngaia anne bukina ae e mwakuri korakora iai ao ni kakorakoraa. N te aro raa? E kaungaaki iroun te abotoro Bauro bwa e na riki bwa te tia reirei ao te tia taetae i mataia aomata ae mwaatai. E riai naba Timoteo ni katea te katoto ae raoiroi nakoia taani kakoaua, aika rooro n rikirake ao kaara. Ao e anganaki naba mwioko tabeua aika aki bebete n aron teuana, e na anga te reirei ni kairiri ma te tangira nakoia ake a riai n anganaki. (1Tim. 4:11-16; 2Tim. 4:1-5) E kakoauaa Timoteo ae e ngae ngkana e aki noraki ana mwakuri ke e aki kaitauaki iai irouia tabemwaang, ma e na boni karekea kaniwangana Iehova.—IRom 2:6, 7.

12. Tera ae kona ni kairiia unimwaane bwa a na katabetabeia ni mwiokoaia? (Nora naba te taamnei.)

¹² Ni boong aikai, a kona naba unimwaane ni kakoauaa ae e bon nori aia mwakuri aika raraoi Iehova ao e kakaitau iai. A bati unimwaane aika ibuobuoki naba n te mwakuri ni kateitei ke imwin rikini kabuanibwai aika karina, irarikin tabeia ae kawaraia taari ibukini kaungaaia, te angareirei, ao te uarongorongo. A beku tabemwaang bwa kaaini Kurubu Ibukini Kawaraia Aoraki ke Komete Ibukin te Reitaki ma te Onnaoraki. Unimwaane aika anga ngaiia nakoni mwioko aikai, a taraa te ekaretia bwa bon ana bwai Iehova ao tiaki te aomata. Ibukin anne a a kabanea nanoia ni mwiokoaia ao a onimakinna raoi ae e na boni karekei kaniwangaia te Atua ibukini baike a karaoi.—IKoro. 3:23, 24.

13. Tera ana namakin Iehova ni kaineti ma ara kakorakora ni beku ibukina?

¹³ A aki kona n riki aomata ni kabane bwa unimwaane. Ma ti bane ni kona n anga te  bwai teuana nakon Iehova. E kakaitau Atuara ngkana ti kabanea ara konaa ni beku irouna. E nori naba ara bwaintangira ake ti anga ibukin te mwakuri ni katobibia te aonnaba, n aki ongea uarerekena. E kukurei ngkana ti kakorakoraira n tokanikai i aoni maamaara ao ni katei baira bwa ti na kaeka n te taromauri, ao e kimwareirei ngkana ti tarariaoi baika a kaunira ao n tatauraoi ni kabwarai buure. Ngkana ko namakinna naba bwa ko a aki kona ni karaoa ae bati riki, kakoauaa ae e boni kakawaki naba iroun Iehova ane ko kona ni karaoia. E tangiriko ibukin am mwakuri anne ao e na boni karekea kaniwangam.—Ruka 21:1-4.

TEIMATOA NI KAANIKO MA TE ATUA AE MAIU

14. Ti kangaa ni buokaki bwa ti na teimatoa ni kakaonimaki ngkana ti teimatoa ni kaania Iehova? (Nora naba te taamnei.)

¹⁴ Ngkana e kaan reitakira ma Iehova, e na bebete riki iroura bwa ti na teimatoa ni kakaonimaki nakoina. Anne naba aron Ioteba. E rawa ni karaoa te wene ni bure. E ataia ae e rotaki te Atua ni baike e karaoi ao e aki kani karawawataa. (KBwaai 39:9) Ngkana ti kani karekea ara reitaki ae kaan ma Iehova, ti riai ni kakarekea ara tai n tataro nakoina ao n ukeuke n reirei n ana Taeka. E na ririkirake ngkanne ni kaan reitakira ma ngaia. N aron Ioteba, ti na bon aki kani karawawataa nanon Iehova ngkana e kaan reitakira ma ngaia.—Iak. 4:8.

15. Tera reireiara man te baere e riki nakoia I-Iteraera n te rereua? (Ebera 3:12)

¹⁵ A kai kitana Iehova te koraki aika a katoka onimakinana. Iangoa te baere e riki nakoia I-Iteraera ni menaia n te rereua. A ataia ae bon iai Iehova, ma a a manga raraoma bwa e na kona ni katauraoi kainnanoia ke e na aki. A titiraki naba ni kangai: “E mena i buakora Iehova ke e aki?” (TeOti. 17:2, 7) Ao n tokina a a karitei nakon te Atua. Ti na bon aki kani kakairi n aroia n aki ongeaba aei, are e a riki bwa te reirei ni kauring nakoira.—Wareka Ebera 3:12.

16. Tera ae kona ni kataa ara onimaki?

 ¹⁶ E kangaanga n te waaki aei bwa ti na teimatoa ni kaaniaki ma Iehova. A bati aika kakewea ae iai te Atua. Ao n angiin te tai a taraa n nakoraoi maiuia te koraki aika a katinanikui ana kaetieti te Atua. Man noran anne e a kona iai ni kataaki ara onimaki. E ngae ngke ti aki kona ni kakewea ae iai te Atua, ma ti kona ni manga raraoma bwa e na buokira ke e na aki. E riki naba anne nakon te tia korea te Areru 73. E noriia aomata ake i rarikina ni kukurei ni maiuia ao a katinanikui ana tua te Atua. N tokina e a raraoma bwa e materaoi te beku iroun te Atua ke e aki.—TaiAre. 73:11-13.

17. Tera ae e na buokira n teimatoa ni kaania Iehova?

¹⁷ Tera are e buoka te tia areru bwa e na kaeta ana iango? E kananoa ana iango n te bae e na riki nakoia naake a katoka onimakinan Iehova. (TaiAre. 73:18, 19, 27) E iaiangoi naba kakabwaia aika a na reke man te beku iroun te Atua. (TaiAre. 73:24) Ti kona naba ngaira n iaiangoi kakabwaia aika e anganira Iehova. Ao kabotaua ma maiura ae e na reke ngke arona bwa ti aki beku iroun Iehova. Ni karaoan anne ti na kona ni buokaki iai n teimatoa ni kakaonimaki ao ni boraoi ma ana motinnano te tia areru ae kangai: “Irou, kaanian te Atua bon te bwai ae raoiroi ibukiu.”—TaiAre. 73:28.

18. Bukin tera bwa ti aki riai ni maaka kanoan taai aika imwaira?

¹⁸ Ti kona ni kaaitarai kangaanga aika ti boo ma ngaai ni kabaneani boong aikai ibukina bwa ti “toro iroun te Atua ae koaua ae maiu.” (1Tet. 1:9) Bon iai Atuara ae tetei ibukia taan taromauria. E a tia ni kaotia bwa e memena irouia ana toro rimoa, ao e na boni memena naba iroura ngkai. Ti nang kaaitara ma te rawawata ae korakora ae i aoni kawaina n riki n te aonnaba. Ma ti na bon aki kaitaraa n tii ngaira. (Ita. 41:10) Ti bia bane n “rangi n ninikoria ao [ni] kangai: ‘Te tia buokai Iehova, N na aki maaku.’”—Ebera 13:5, 6.