1. ¿Kasa achechereetka naaʼin na aʼyataashiikana nümüin Jehová soʼunnaa müliaa süpüla ayatüinjanain naʼyataain nümüin?

 SAASHIN tü Bibliakat «keemeerüin maʼin tü mmapaʼakat» maaʼutpünaa yaa (2 Tim. 3:1). Wayakana na aʼyataashiikana nümüin Jehová eʼrüshii waya müliaa wanaa sümaa wayuu otta eʼrüshiʼiya waya müliaa saaʼujee süpüleeruaanüin waaʼin saaʼujee wanoujain. ¿Kasa achechereetka waaʼin süpüla ayatüinjanain waʼyataain nümüin Jehová? Shia sotule waaʼin eein Jehová wamaa, chi Maleiwa matüjainkai outaa (Jer. 10:10; 2 Tim. 1:12).

2. ¿Kasa wayaawataka atuma eein Jehová wamaa?

² Nükaalinjain waya Jehová soʼunnaa müliaa süka shiimain eein nia wamaa (2 Crón. 16:9; Sal. 23:4). Jülüjale waaʼin naaʼinmajeenain waya Jehová jee nükaalinjeenain waya katchinjeerü waaʼin soʼunnaa müliaa. Wekirajaa süchiki tü naaʼinrakat Jehová nüpüleerua David, chi aluwataashikai.

3. ¿Kasa nüküjeeka achiki David wanaa sümaa nümüin: «Shiimain eein Jehová tamaa»?

³ Niʼitaain naaʼin David nünain Jehová süka niʼraajüin nia. Wanaa sümaa nuʼutuneein aaʼin David natuma na nüʼünüükana oʼuraajüshi nia nümüin Jehová süpüla nuchuntuin kaalinwaa nümüin. Naaʼinrüinña tia wanaa sümaa nuʼutuneein aaʼin nutuma Saúl, chi aluwataashikai (Sal. 18:6). «Shiimain eein Jehová tamaa», müshi David süchikijee nükaalinjain nia Jehová noulia na nüʼünüükana (Sal. 18:46). ¿Kasa nüküjeeka achiki David? Saashin wanee karaloʼuta tü nüküjeekalü achiki David shia «nükaalinjeenain waneepia Jehová na aʼyataashiikana  nümüin, jama niain chi Maleiwa shiimainshikai». Nütüjaa aaʼu David nükaalinjeechi nia Jehová soʼunnaa tü alatakat nümüin. Sükatsüinrüin naaʼin tia süpüla ayatüinjachin niʼyataain nümüin (Sal. 18:28, 29, 49).

4. ¿Jamüsü aneetkaʼa wakuwaʼipa jülüjale waaʼin eein Jehová wamaa?

⁴ Watüjaale saaʼu eein Jehová wamaa aʼyataajeena waya nümüin süka süpüshuaʼa waaʼin, wachechereerü waaʼin soʼunnaa müliaa, waaʼinmaajeerü tü waʼyataainkat nümüin otta ayateena aleewain waya nümaa.

NÜKATSÜINREERÜ PAAʼIN CHI MALEIWA MATÜJAINKAI OUTAA

5. ¿Kasa achechereetka waaʼin soʼunnaa müliaa? (Filipos 4:13).

⁵ Jaʼitairü kasain maʼin alatüin wamüin wounteerü wachecherüin waaʼin soʼunnaa tia jülüjale waaʼin eein Jehová wamaa. Nnojotsü eein wanee kasa kapüleeka nümüin chi Maleiwa Pülashikai maʼin. Nükatsüinreerü waaʼin süpüla wachecherüin waaʼin soʼunnaa müliaa (paashajeʼera Filipos 4:13). Sutuma watüjaain saaʼu tia nüchiki Jehová nnojoleena mmoluin waya sülatapa kasa mojusü wamüin. Weʼrüle nükaalinjain waya Jehová soʼunnaa müliaa weʼitaajeerü maʼin waaʼin sünain nükaalinjeenain waya mapeena jaʼitairü kasain maʼin tü alatakat wamüin.

6. ¿Jamüshi kanoulakaʼa maʼin David jintüliiwaʼaya?

⁶ Akatsüinraasü maʼin nunoula David sutuma tü naaʼinrakat Jehová nüpüleerua. Jintüliiwaʼaya David wanaa sümaa chajachin nia sünain arüleejaa, aʼluwajünüsü wanee naʼanneetse nutuma wanee león otta sutuma wanee oso. Nuwataaka David nachiirua süpüla nüsütüin tü anneetkat noulia, nuʼutaka naaʼin piamaleʼeya. Nüküjain David nuuntuin tia sükajee nükaalinjain nia Jehová, nnojotsü sükajeejatüin katchin nia (1 Sam. 17:34-37). Nnojotsü motuin naaʼin David tü naaʼinrakat Jehová nüpüleerua. Sutuma jülüjain naaʼin tia niʼitaain maʼin naaʼin sünain nükaalinjeechin nia Jehová kasale alatüin nümüin.

7. (1) ¿Jamüshi meimmoluinkaʼa David? (2) ¿Kasa nuuntaka sükajee tia?

⁷ Jimaʼaliiwaʼaya David antüshi nia eejanale jutkatüin na israelitakana süpüla atkawaa. Niʼrüin mmoluin maʼin naya neema Goliat wanee filisteo miyoʼushaata, nimeeʼerainpalashii na israelitakana (1 Sam. 17:10, 11). Mmotshii maʼin na israelitakana sutuma jülüjain naaʼin najaʼapüin Goliat otta sutuma tü nünüikikat (1 Sam. 17:24, 25). Naatapejeʼe tü jülüjakat naaʼin David süchiki tü alatakat. Süka nimeeʼerainpalain Goliat na israelitakana mojutusai Jehová nutuma, mojusü nümüin David tia (1 Sam. 17:26). Nütüjaa aaʼulu David nükaalinjeechin nia Jehová süpüla nükanajüin Goliat maʼaka nükaalinjapuʼuin nia sümaiwa. Sutuma niʼitaain naaʼin David nünain Jehová outushi Goliat nutuma (1 Sam. 17:45-51).

8. ¿Kasa waaʼinrajatka süpüla weʼitaainjatüin maʼin waaʼin sünain nükaalinjeenain waya Jehová waneepia? (Piirakaa sümüin tü ayaakuaakat).

⁸ Wachechereerü waaʼin soʼunnaa müliaa jülüjale waaʼin eein Jehová wamaa (Sal. 118:6). Kanouleena maʼin waya nünain Jehová jülüjale waaʼin tü naaʼinrüitkat wapüleerua. Paashajeʼera suluʼujee tü Bibliakat süchiki tü naaʼinrakat Jehová süpüla nükaalinjain na aʼyataashiikana nümüin (Is. 37:17, 33-37). Paashajeʼera tü eʼitaanakat suluʼu jw.org süchiki tü naaʼinrakat Jehová süpüla nükaalinjain na wawalayuukana maaʼutpünaa yaa. Jülüja paaʼin tü naaʼinrüitkat Jehová püpüleerua. Mayaainjeʼe nnojolin nuʼtteʼerüin pia Jehová nuulia wanee león jee suulia wanee oso, wainma tü kasa naaʼinrakat püpüleerua süpüla nükaalinjain pia jee nürütkeʼerüin pia  nünainmüin (Juan 6:44). Ayatayüiya pia aʼyataain nümüin Jehová süka nükaalinjain pia. Puchunta nümüin jülüjaiwa paaʼin tü naaʼinrakat süpüla nusoutuin shiʼipajee tü puchuntakat nümüin jee müsia süpüla jülüjain paaʼin wanee kasa naapaka pümüin soʼu tü kaʼi choʼujaakalü oʼu shia pümüin otta tü naaʼinrakat süpüla nükaalinjain pia soʼunnaa wanee kasa alataka pümüin. Jülüjale paaʼin süpüshuaʼa tü kasa naaʼinrakat Jehová püpüleerua, piʼitaajeerü maʼin paaʼin sünain nükaalinjeechin pia waneepia.

9. ¿Kasa jülüjainjatka waaʼin süpüla wachecherüin waaʼin soʼunnaa müliaa? (Proverbios 27:11).

⁹ Weʼrapa müliaa anasü jülüjale waaʼin tü wakuwaʼipakat nümaa Jehová. Naashin chi Yolujaakai ooʼulaajeena waya suulia aʼyatawaa nümüin Jehová weʼrüle müliaa. Talateechipejeʼe watuma Jehová wachecherüle waaʼin soʼunnaa müliaa (Job 1:10, 11; paashajeʼera Proverbios 27:11). Wachecherüle waaʼin soʼunnaa müliaa atüjaaneerü aaʼu alin wapüla Jehová otta alaain chi Yolujaakai. Eesüjaʼa süpüleeruaanüle naaʼin na aʼyataashiikana nümüin Maleiwa natuma na sülaülashiikana mma eere kepiain pia. Eeshijaʼa piʼrüle choʼujawaa, shiyoutule wayuu tü pütchi püküjakat namüin otta piʼrüle müliaa. Sülatülejeʼeya pümüin tia anasü jülüjale paaʼin talateechin Jehová putuma püchecherüle paaʼin soʼunnaa tia. Soto paaʼin nnojoleerüin nuuʼulaain Jehová suuʼulakünüin paaʼin süka wanee kasa nnojoleetka püchecherüin atuma paaʼin (1 Cor. 10:13). Nükaalinjeechi pia Jehová süpüla püchecherüin paaʼin soʼunnaa müliaa.

NAAPEERÜ JEHOVÁ KASA ANASÜ PÜMÜIN

10. ¿Kasa naapeetka Jehová namüin na aʼwaajakana nia?

¹⁰ Aapüshi Jehová kasa anasü namüin na aʼwaajakana nia (Heb. 11:6). Naapüin wamüin jimataa aaʼin, talatüshii waya nutuma otta naapeerü wamüin mapeena kataa oʼuu süpüla kaʼikat süpüshuaʼa. Watüjaa aaʼulu naapeein wamüin Jehová kasa anasü jee naaʼinreerü tia süka pülashin nia. Müshiijeseʼe waʼyataain  nümüin Jehová süka süpüshuaʼa waaʼin maʼaka naaʼinrüin shia na aʼyataapuʼukana nümüin. Shia naaʼinraka Timoteo tia (Heb. 6:10-12).

11. ¿Jamüshi niʼyataakaʼa maʼin Timoteo napüleerua na anoujashiikana? (1 Timoteo 4:10).

¹¹ (Paashajeʼera 1 Timoteo 4:10). Kanoulashi maʼin Timoteo sünain niʼreechin kasa anasü nutuma chi Maleiwakai. Müshijeseʼe niʼyataain maʼin nümüin Jehová otta namüin na waneinnua. ¿Kasa naaʼinraka süpüla nuuntuin tia? Nüküjain chi aluwataaushikai Pablo nümüin Timoteo ayatüinjachin nikirajaain waneepia süpüla nütüjain ekirajaa wayuu. Nüküjainña Pablo nümüin Timoteo anainjatüin nukuwaʼipa napüleerua na anoujashiikana. Aapünüsü nümüin Timoteo waneirua aʼyatawaa maʼaka saaʼin nüchiaainjanain waneinnua anoujashii süka anakalü akuwaʼipa (1 Tim. 4:11-16; 2 Tim. 4:1-5). Mayaainjeʼe mojutuin namüin waneinnua wayuu tü naaʼinrakat Timoteo jee shiale nnojoluin shiʼnnüin tü naaʼinrakat, nütüjaa aaʼulu kojutuin shia nümüin Jehová otta niʼreechin kasa anasü sünainjee (Roma 2:6, 7).

12. ¿Jamüshii naʼyataakaʼa maʼin na laülaashiikana napüleerua na wawalayuukana? (Piirakaa sümüin tü ayaakuaakat).

¹² Kojutusiaʼaya nümüin Jehová tü naaʼinrakat na laülaashiikana. Alapalaashii naya naaʼu na wawalayuukana, ekirajüshii naya, aküjashii naya pütchi, akaalinjashii naya sünain akumajaa miichi eeinjachire nuʼwaajünüin Jehová otta nakaalinjain na wawalayuu alatakana amüin kasa mojusü. Eeshii na akaalinjakana na wawalayuukana suulia shiʼitaanüin isha nanain. Wainma maʼin tü naʼyataainkat na laülaashiikana. Natüjaa aaʼulu niain Jehová laülaain naaʼu na anoujashiikana, nnojotsü shiain wanee wayuu. Sünainjee tia aʼyataashii naya süka süpüshuaʼa naaʼin napüleerua na wawalayuukana otta natüjaa aaʼulu neʼreenain kasa anasü nutuma Maleiwa (Col. 3:23, 24).

13. ¿Jamüsü naaʼin Jehová sümaa tü waaʼinrakat sünain aʼyatawaa nümüin?

 ¹³ Jaʼitainna nnojoliin laülaashiin waya eesü tü kasa eekat süpüla waaʼinrüin sünain aʼyatawaa nümüin Jehová. Kojutusü nümüin Jehová tü waaʼinrakat sünain aʼyatawaa nümüin. Talatüshi nia sümaa tü nneerü wasülajakat süpüla süküjünüin tü pütchi anakat maʼin sainküinpünaa mmaka, jaʼitairü palitchoin shia. Jaʼitashii japüleʼein waya talatüshi nia wamaa niʼrapa wayalerüin wajapü süpüla wasoutuin sünain tü outkajawaakat. Talatüshia nia wamaa motule waaʼin tü kasa mojusü aainjünakat wamüin. Jülüja paaʼin kojutuin nümüin Jehová tü paaʼinrakat jaʼitasü palitchoin shia saaʼin pümüin. Aishi pia nüpüla otta naapeerü kasa anasü pümüin saaʼujee tü paaʼinrakat (Luc. 21:1-4).

AYATA PIA ALEEWAIN NÜMAA JEHOVÁ

14. ¿Jamüshii waneepieenakaʼa waya nümaa Jehová aleewale maʼin waya nümaa? (Piirakaa sümüin tü ayaakuaakat).

¹⁴ Aleewale maʼin waya nümaa Jehová waneepieena waya nümaa. Jülüjataa waaʼin nukuwaʼipa José. Süka aleewain maʼin nia nümaa Jehová niyouta achiki kaainjalain nia noʼuluʼu otta nnojotsü mojeein naaʼin nutuma (Gén. 39:9). Aleeweena waya nümaa Jehová woʼuraajüle nümüin otta wekirajaale sünain tü Bibliakat. Aleewale maʼin waya nümaa Jehová maʼaka aleewapuʼuin José nümaa, nnojoleerü waaʼinrüin wanee kasa mojeetka atuma naaʼin (Sant. 4:8).

15. ¿Kasa watüjaka nanainjee na israelita chajanakana isashiipaʼa? (Hebreokana 3:12).

¹⁵ Eeshijaʼa süpüla nükayalaain wanee wawala nuulia Jehová nnojoire niʼitaain maʼin naaʼin nünain. Jülüja waaʼin tü naaʼinrakat na israelitakana wanaa sümaa chajanain naya isashiipaʼa. Natüjaa aaʼulu niain Jehová chi Maleiwa shiimainkai, shiajaʼa neʼe nnojoluin neʼitaain naaʼin sünain naapeerüin Jehová tü kasa choʼujaakat namüin. «¿Aniiyaakaijeʼe Jehová wamaa, nnojoittaapa eein nia wamaa?», müshii naya (Éx. 17:2, 7). Eʼrüijaashii naya wayumüin nümüin Jehová. Jalia  waya suulia washatüin nakuwaʼipa (paashajeʼera Hebreokana 3:12).

16. ¿Kasa eemiajeʼereetka wanoula?

¹⁶ Eesüjaʼa kapüleere wamüin waneepiain waya nümaa Jehová sünainjee tü kasa alatakat maaʼulu. Eeshii wayuu nnojoliikana anoujain nünain Maleiwa otta eeshii na wayuu anakana akuwaʼipa mayaainjeʼe nnojoliin noonooin sümaa tü nümakat Maleiwa. Weʼrüle tia eesüjaʼa süpüla seemiajaain wanoula. Mayaainjeʼe watüjaain saaʼu eein Jehová eesüjaʼa süpüla wainmajüin waaʼin shiimainre nükaalinjeenain waya. Tia shia tü jülüjakat naaʼin chi ashajakai tü pütchi suluʼukat Salmo 73. Niʼrüin anain nakuwaʼipa na wayuu nnojoliikana oonooin sümaa tü nümakat Maleiwa. Talatüshii naya sümaa nnojoluin kasain alatüin namüin saaʼujee tü kasa mojusü naaʼinrakat. Antajaasü nikiiruʼu amülain neʼe niʼyataain nümüin Maleiwa (Sal. 73:11-13).

17. ¿Kasa waaʼinrajatka süpüla aleewain waya nümaa Jehová?

¹⁷ ¿Kasa naaʼinraka chi salmistakai süpüla nunouteʼerüin tü jülüjakat naaʼin? Jülüjasü naaʼin tü kasa alateetkat namüin na wayuu nnojoliikana eʼitaain naaʼin nünain Jehová (Sal. 73:18, 19, 27). Jülüjasiaʼaya naaʼin tü kasa anasü neʼrakat na wayuu aʼyataakana nümüin Maleiwa (Sal. 73:24). Eesiaʼaya süpüla jülüjain waaʼin tü kasa anasü naapakat wamüin Jehová. Wasakira waaʼin sünain tüü: «¿Jamüsüjeʼe takuwaʼipa nnojoire taʼyataain nümüin Jehová?». Jülüjale waaʼin tia waneepieena waya nümaa Jehová, meerü wanüiki maʼaka naaʼin chi salmistakai wanaa sümaa nümüin mayaa: «Kamalainsü tamüin arütkawaa nünainmüin Maleiwa» (Sal. 73:28).

18. ¿Jamüshii nnojoliinjanakaʼa mmoluin waya seema tü alateetkat mapeena?

¹⁸ Wounteerü wachecherüin waaʼin soʼunnaa müliaa süka nüchepchiain waya «chi shiimainkaijaʼaya suluʼu Maleiwain, chi Matüjainkai outaa» (1 Tes. 1:9). Aishii waya nüpüla chi Wamaleiwasekai otta nükaalinjeena waya waneepia. Nükaalinjeena waya maaʼulu maʼaka nükaalinjain na aʼyataapuʼukana nümüin. Alüʼütsü tü kaʼi shiʼreetkat maʼin oʼu wayuu müliaa, nnojoleenapejeʼe wamüiwaʼain soʼu tia (Is. 41:10). «Shiakalaka anain aluʼu yalayalale waaʼin sünain maa: ‹Nia Jehová akaalinjaka taya, nnojoleechi mmoluin taya›» (Heb. 13:5, 6).