HOSỌ OPLỌN TỌN 25
OHÀN 7 Jehovah, Huhlọn Mítọn
Nọ Flindọ Jehovah Wẹ “Jiwheyẹwhe Ogbẹ̀nọ Lọ”
“Jehovah togbẹ̀!”—SALM. 18:46.
NUHE E BẸHẸN
Mí nọ mọaleyi taun eyin mí flindọ Jiwheyẹwhe he sẹ̀n mí te wẹ “Jiwheyẹwhe ogbẹ̀nọ lọ.”
1. Etẹwẹ nọ gọalọna omẹ Jehovah tọn lẹ nado to sinsẹ̀n ẹn zọnmii mahopọnna nuhahun he yé nọ pehẹ lẹ?
BIBLU dọ gando ojlẹ he mẹ mí to gbẹnọ te lẹ go dọ yé yin “ojlẹ awusinyẹn tọn he vẹawu nado pehẹ lẹ.” (2 Tim. 3:1) Gbọnvona avùnnukundiọsọmẹnu he mẹlẹpo nọ pehẹ to titonu ehe mẹ lẹ, omẹ Jehovah tọn lẹ sọ dona diahi hẹ nukundiọsọmẹ po homẹkẹn po. Etẹwẹ nọ gọalọna mí nado to Jehovah sẹ̀n zọnmii mahopọnna nuhahun ehelẹ? Onú titengbe dopo wẹ yindọ, mí ko wá yọ́n Jehovah taidi “Jiwheyẹwhe ogbẹ̀nọ lọ.”—Jel. 10:10; 2 Tim. 1:12.
2. Etẹwẹ mí yọnẹn gando Jehovah go he gán gọalọna mí?
2 Jehovah yin Omẹ nujọnu tọn de he nọ gọalọna mí to whlepọn mítọn lẹ mẹ, bosọ nọ dín dotẹnmẹ lẹ nado nọgodona mí. (2 Otàn. 16:9; Salm. 23:4) Eyin mí nọ mọ ewọ taidi Jiwheyẹwhe ogbẹ̀nọ lọ, enẹ gán gọalọna mí nado pehẹ whlepọn depope he mí pannukọn po kọdetọn dagbe po. Lẹnnupọndo lehe enẹ yin nugbo to whẹho Ahọlu Davidi tọn mẹ do ji.
3. Etẹ na dọ wẹ Davidi te to whenue e dọ dọ “Jehovah togbẹ̀”?
3 Davidi yọ́n Jehovah ganji bosọ nọ ganjẹ Ewọ go. Whenue kẹntọ etọn lẹ, ehe bẹ Ahọlu Sauli hẹn to ogbé etọn yàn, Davidi biọ alọgọ Jehovah tọn to odẹ̀ mẹ. (Salm. 18:6) To whenue Jiwheyẹwhe ko na gblọndo na odẹ̀ etọn bo ko sọ whlẹn ẹn godo, Davidi dọmọ: “Jehovah togbẹ̀!” (Salm. 18:46) Po hogbe ehelẹ po, Davidi ma to alọkẹyi poun dọ Jiwheyẹwhe tin gba. Owe alọdlẹndonu tọn de dọ dọ Davidi to jidide etọn dohia to Jehovah mẹ “taidi Jiwheyẹwhe ogbẹ̀nọ de he nọ yinuwa do omẹ etọn lẹ tamẹ to whepoponu.” Na nugbo tọn, Davidi yọnẹn sọn numimọ mẹdetiti tọn etọn mẹ dọ Jiwheyẹwhe togbẹ̀, podọ nujikudo enẹ nọ vọ́ gbemima etọn hẹn sinyẹn nado to Jehovah sẹ̀n bosọ nọ pà ewọ.—Salm. 18:28, 29, 49.
4. Nawẹ Jehovah pinpọnhlan taidi Jiwheyẹwhe ogbẹ̀nọ lọ nọ hẹn ale wá na mí gbọn?
4 Eyin mí kudeji dọ Jehovah wẹ Jiwheyẹwhe ogbẹ̀nọ lọ, enẹ gán gọalọna mí nado nọ sẹ̀n ewọ po zohunhun po. Mí na mọ huhlọn nado doakọnna whlepọn lẹ, bo nasọ yin whinwhàn nado zindonukọn bo to nuhe go mí pé lẹpo wà to sinsẹ̀nzọn etọn mẹ. Humọ, mí nasọ magbe nado tẹdo Jehovah go.
JIWHEYẸWHE OGBẸ̀NỌ LỌ NA HẸN WE LODO
5. Etẹwẹ gán na mí jidide whenue mí pannukọn whlepọn lẹ? (Filipinu lẹ 4:13)
5 Mí na penugo bo doakọnna whlepọn depope vlavo pẹvi kavi daho, eyin mí nọ flindọ Jehovah togbẹ̀, podọ dọ e to finẹ nado gọalọna mí. To popolẹpo mẹ, nuhahun depope he mí nọ pehẹ ma hugan Jiwheyẹwhe mítọn. Ewọ wẹ Ganhunupotọ lọ, podọ e gán na mí huhlọn nado doakọnnanu. (Hia Filipinu lẹ 4:13.) Enẹwutu, mí tindo whẹwhinwhẹ́n lẹpo nado nọ pannukọn whlepọn mítọn lẹ po jidide po. Whenue mí mọdọ Jehovah nọgodona mí to whlepọn pẹvipẹvi lẹ mẹ, enẹ nọ na mí nujikudo dọ ewọ nasọ gọalọna mí to whlepọn he sinyẹn humọ lẹ mẹ ga.
6. Nujijọ he wá aimẹ to jọja whenu Davidi tọn tẹlẹ wẹ hẹn jidide etọn to Jehovah mẹ lodo dogọ?
6 Lẹnnupọndo nujijọ awe delẹ ji he zọ́n bọ jidide he Davidi tindo to Jehovah mẹ jideji. Whenue Davidi yin lẹngbọhọtọ jọja de, beali de wle dopo to lẹngbọ otọ́ etọn tọn lẹ mẹ, podọ kinnikinni de sọ wàmọ ga. To ninọmẹ awe lọ lẹ mẹ, Davidi yí adọgbigbo do jẹgodona kanlin lọ lẹ bo whlẹn lẹngbọ lọ. Etomọṣo, e ma na gigo ede na awhàngbigba mọnkọ. E yọnẹn dọ Jehovah wẹ dádo whẹho lọ mẹ. (1 Sam. 17:34-37) Davidi ma wọn nujijọ enẹlẹ pọ́n gbede. To whenue e lẹnayihamẹpọn do yé ji, jidide etọn yin hinhẹn lodo dọ Jiwheyẹwhe ogbẹ̀nọ lọ na na ẹn huhlọn to sọgodo.
7. Nawẹ nulẹ pinpọnhlan to aliho he sọgbe mẹ gọalọna Davidi nado pehẹ Goliati gbọn?
7 To nukọn mẹ, whenue Davidi gbẹ́ to aflanmẹ, e yì dla fie awhànpa Islaelivi lẹ tọn whèsla do de pọ́n. E mọdọ awhànfuntọ lẹ to sijọsijọ ji, na Filistinu gángánsu de he nọ yin Goliati ko tọ́n wá nado “vlẹ awhànpa Islaeli tọn kò.” (1 Sam. 17:10, 11) Awhànfuntọ lọ lẹ to budi, na yé ze ayiha do hogbe vlẹko tọn he gángánsu lọ to yiyizan na yé lẹ ji wutu. (1 Sam. 17:24, 25) Amọ́, aliho devo pete mẹ wẹ Davidi pọ́n ninọmẹ lọ hlan te. E mọdọ nukundiọsọmẹ he yé pannukọn lọ ma yin sọta awhànpa Islaeli tọn poun gba, amọ́ sọta “awhànpa Jiwheyẹwhe ogbẹ̀nọ lọ tọn.” (1 Sam. 17:26) Jehovah ji wẹ Davidi ze ayiha do hugan. Davidi deji dọ Jiwheyẹwhe he gọalọna emi whenue emi yin lẹngbọhọtọ de, nasọ gọalọna emi whladopo dogọ to ninọmẹ ehe mẹ. Na Davidi dejido godonọnamẹ Jiwheyẹwhe tọn go wutu, e pehẹ Goliati bosọ gbawhàn etọn!—1 Sam. 17:45-51.
8. Nawẹ mí gán hẹn Jehovah do ayiha mẹ whenue mí to pipehẹ whlepọn lẹ gbọn? (Sọ pọ́n yẹdide lọ.)
8 Mílọsu gán pehẹ whlepọn lẹ po kọdetọn dagbe po eyin mí nọ flindọ Jiwheyẹwhe ogbẹ̀nọ lọ ko wleawufo nado gọalọna mí. (Salm. 118:6) Mí gán hẹn jidide mítọn to nugbo enẹ mẹ lodo, eyin mí nọ lẹnnupọndo nuhe e ko wà to hohowhenu lẹ ji. Nọ hia kandai Biblu tọn he nọ flinnu we gando lehe Jehovah ko whlẹn sinsẹ̀n-basitọ etọn lẹ do go ji. (Isa. 37:17, 33-37) Humọ, nọ gbadopọnna linlin he tin to nọtẹn Intẹnẹt tọn mítọn jw.org ji lẹ he do lehe Jehovah ko gọalọna mẹmẹsunnu po mẹmẹyọnnu mítọn lẹ po to ojlẹ mítọn mẹ do hia. Podọ, nọ flin ojlẹ he mẹ Jehovah ko yinuwado ota towe mẹ te lẹ. Ma hanú blo eyin a ma do numimọ nujijọ vonọtaun de tọn he gán yin yiyijlẹdo kinnikinni de kavi beali de hùhù go. Etẹwutu? Nugbo lọ wẹ yindọ Jehovah ko wà nususu na hiẹ lọsu to gbẹzan towe mẹ! E ko gọalọna we nado jihọntọn hẹ ewọ. (Joh. 6:44) Etlẹ yin todin, a ma gán pò to nugbo lọ mẹ eyin alọgọ etọn dẹ́n. Naegbọn a ma na biọ ẹ dọ ni gọalọna we nado nọ flin ojlẹ he mẹ e na gblọndo odẹ̀ towe lẹ tọn, gọalọna we to ojlẹ sisọ mẹ kavi nọgodona we to ninọmẹ sinsinyẹn de mẹ te? Nulinlẹnpọn do numimọ mọnkọ lẹ ji na hẹn nujikudo towe lodo dọ Jehovah na zindonukọn nado to nuyiwa do ota towe mẹ.
Pipehẹ whlepọn lẹ yin apadewhe whẹho he gbloada humọ de tọn (Pọ́n hukan 8, 9tọ)
9. Etẹwẹ mí dona nọ flin whenue mí pehẹ whlepọn lẹ? (Howhinwhẹn lẹ 27:11)
9 Jehovah pinpọnhlan taidi Omẹ Nujọnu tọn de na gọalọna mí nado nọ pọ́n whlepọn mítọn lẹ hlan to aliho he sọgbe mẹ. Gbọnna? Mí nọ jẹ mimọ ji dọ whlepọn mítọn lẹ yin apadewhe whẹho he gbloada humọ de tọn to Jehovah po Satani po ṣẹnṣẹn. Lẹgba sọalọakọ́n dọ mí na jo Jehovah do eyin mí pehẹ awusinyẹnnamẹnu lẹ. (Jobu 1:10, 11; hia Howhinwhẹn lẹ 27:11.) Ṣigba eyin mí pehẹ whlepọn mítọn lẹ po kọdetọn dagbe po, mí nọ dohia dọ mí yiwanna Jehovah bosọ nọ do Lẹgba hia di lalonọ. Be a to pipehẹ nukundiọsọmẹ aṣẹpatọ lẹ tọn, nuhahun akuẹzinzan tọn, nuyiwa agọ̀ sọta lizọnyizọn towe kavi whlepọn devo de wẹ ya? Eyin mọ wẹ, flindọ ninọmẹ towe nọ hùn dotẹnmẹ dote na we nado hẹn homẹ Jehovah tọn hùn. Sọ flin ga dọ e ma na dike gbede dọ a ni yin whiwhlepọn zẹ̀ dogbó towe lẹ go. (1 Kọl. 10:13) Ewọ na na we huhlọn nado doakọnnanu.
JIWHEYẸWHE OGBẸ̀NỌ LỌ NA SUAHỌ WE
10. Etẹwẹ Jiwheyẹwhe ogbẹ̀nọ lọ na wà na mẹhe nọ sẹ̀n ewọ lẹ?
10 Jehovah wẹ Ahọsumẹtọ mẹhe nọ sẹ̀n ẹn lẹ tọn. (Heb. 11:6) Ewọ nọ na mí jijọho po pekọ po todin, bo nasọ na mí ogbẹ̀ madopodo to sọgodo. Mí gán ze todido mítọn do Jehovah mẹ bo kudeji dọ ewọ do ojlo po huhlọn lọ po nado suahọ mí. Podọ, nujikudo enẹ nọ whàn mí nado hẹn alọnu mítọn ján to sinsẹ̀n-bibasi mítọn mẹ kẹdẹdile devizọnwatọ nugbonọ Jiwheyẹwhe tọn hohowhenu tọn lẹ yin whinwhàn nado wà do. Ehe yin nugbo to whẹho Timoti tọn mẹ to owhe kanweko tintan whenu.—Heb. 6:10-12.
11. Etẹwẹ whàn Timoti nado wazọ́n sinsinyẹn to agun mẹ? (1 Timoti 4:10)
11 Hia 1 Timoti 4:10. Timoti ze todido etọn do Jiwheyẹwhe ogbẹ̀nọ lọ mẹ. Enẹwutu wẹ e do wazọ́n sinsinyẹn na Jehovah, podọ do mẹdevo lẹ tamẹ. To aliho tẹlẹ mẹ? Apọsteli Paulu dotuhomẹna ẹn nado hẹn nugopipe mẹpinplọn tọn etọn pọnte to lizọnyizọn lọ mẹ podọ to agun mẹ. Timoti sọ dona ze apajlẹ dagbe dai na yisenọ hatọ etọn lẹ, yèdọ jọja po mẹho po. Podọ azọngban sinsinyẹn delẹ sọ yin didena ẹn, ehe biọ ga dọ e ni yí nujikudo po owanyi po do na ayinamẹ mẹhe do hudo etọn lẹ. (1 Tim. 4:11-16; 2 Tim. 4:1-5) Timoti gán deji dọ Jehovah na suahọ emi, eyin mẹdevo lẹ ma tlẹ nọ mọ kavi ma nọ yọ́n pinpẹn azọ́n etọn tọn to whedelẹnu.—Lom. 2:6, 7.
12. Etẹwẹ gán whàn mẹho lẹ nado hẹn alọnu yetọn ján to azọ́n yetọn kọ̀n? (Sọ pọ́n yẹdide lọ.)
12 To egbehe, mẹho agun tọn lẹ lọsu gán kudeji dọ Jehovah nọ mọ azọ́n dagbe yetọn bosọ yọ́n pinpẹn etọn. Gbọnvona azọ́n lẹngbọhọtọ, mẹpinplọn po yẹwhehodidọ po tọn, mẹho agun tọn susu sọ nọ gọalọ to azọ́n họ̀gbigbá po kọgbọ tọn lẹ po mẹ. Mẹho agun tọn devo lẹ sọ nọ sẹ̀n to Pipli He Nọ Dla Awutunọ lẹ Pọ́n kavi to Wedegbẹ́ Whẹgbọtọ Dotowhé tọn lẹ mẹ. Mẹho agun tọn he nọ ze yede jo nado wà azọ́n mọnkọ lẹ nọ pọ́n agun lọ hlan taidi awuwledainanu Jehovah tọn de, e ma yin taidi nuzedai gbẹtọvi tọn. Taidi kọdetọn de, yé nọ yí yede zan mlẹnmlẹn to azọ́ndenamẹ yetọn lẹ mẹ bosọ nọ deji petepete dọ Jiwheyẹwhe na suahọ yé na nuhe yé wà lẹ.—Kol. 3:23, 24.
Jiwheyẹwhe ogbẹ̀nọ lọ na suahọ we dile a to azọ́n sinsinyẹn wà do agun lọ tamẹ (Pọ́n hukan 12, 13tọ)
13. Etẹwẹ Jehovah nọ lẹn gando vivẹnudido dopodopo mítọn lẹ tọn to sinsẹ̀nzọn etọn mẹ go?
13 Mẹlẹpo ma gán yin mẹho agun tọn. Amọ́, mímẹpo wẹ do nude bo na na Jehovah. Jiwheyẹwhe mítọn nọ yọ́n pinpẹn etọn eyin mí wà nuhe go mí pé lẹpo nado sẹ̀n ewọ. E nọ mọ nunina he mí nọ basi nado nọgodona azọ́n lẹdo aihọn pé tọn lọ to akuẹzinzan-liho, eyin nuhe mí na lọ ma tlẹ sù sọmọ. Homẹ etọn nọ hùn eyin mí dovivẹnu nado duto winyankuku mítọn ji bo ze alọ nado na gblọndo to opli lẹ ji, podọ e sọ nọ vivi na ẹn eyin mí miọnnukundo nuṣiwa de bosọ jonamẹ. Eyin a tlẹ nọ mọdọ emi ma sọgan wà susu dile a na ko jlo do, deji dọ Jehovah nọ yọ́n pinpẹn nuhe a gán wà lẹ tọn. Ewọ yiwanna we na nuhe a nọ wà lẹ, podọ e na suahọ we.—Luku 21:1-4.
MA JO JIWHEYẸWHE OGBẸ̀NỌ LỌ DO GBEDE BLO
14. Nawẹ haṣinṣan pẹkipẹki de go hinhẹn hẹ Jehovah na gọalọna mí nado to nugbonọ yin na ẹn zọnmii gbọn? (Sọ pọ́n yẹdide lọ.)
14 Eyin mí do haṣinṣan pẹkipẹki de hẹ Jehovah, e na bọawuna mí dogọ nado to nugbonọ yin na ẹn zọnmii. Enẹ yin nugbo to whẹho Josẹfu tọn mẹ. E gbẹ́ po nujikudo po nado doalọ to fẹnnuwiwa mẹ. Jiwheyẹwhe yin omẹ nujọnu tọn de na ẹn, podọ e masọ jlo na hẹn homẹgble E. (Jen. 39:9) Na Jehovah nido yin omẹ nujọnu tọn de na mí, mí dona nọ de whenu dovo nado nọ hodẹ̀ hlan ẹn bosọ nọ plọn Ohó etọn. Enẹ na zọ́n bọ mí na vẹ́ hẹ ewọ dogọ. Eyin taidi Josẹfu mí tindo haṣinṣan pẹkipẹki de hẹ Jehovah, mí ma na jlo nado wà nudepope he na hẹn homẹgble E.—Jak. 4:8.
Dindọnsẹpọ Jiwheyẹwhe ogbẹ̀nọ lọ na gọalọna we nado to nugbonọ yin zọnmii (Pọ́n hukan 14, 15tọ)
15. Etẹwẹ mí gán plọn sọn nuhe jọ do Islaelivi lẹ go mẹ whenue yé to danfafa ji? (Heblu lẹ 3:12)
15 Mẹhe nọ wọn dọ Jehovah wẹ yin Jiwheyẹwhe ogbẹ̀nọ lọ lẹ gán danbú sọn ewọ dè po awubibọ po. Lẹnnupọndo nuhe jọ do Islaelivi lẹ go ji to whenue yé to danfafa ji. Yé yọnẹn dọ Jehovah tin, amọ́ yé jẹ ayihaawe do ji eyin ewọ na penukundo nuhudo yetọn lẹ go. Yé tlẹ kanse dọ: “Be Jehovah tin to ṣẹnṣẹn mítọn kavi lala?” (Eks. 17:2, 7) Enẹgodo, yé ṣiatẹ sọta Jiwheyẹwhe. Matin ayihaawe, mí ma na jlo nado hodo apajlẹ tolivivẹ tọn yetọn, ehe yin apajlẹ avase tọn de na mí.—Hia Heblu lẹ 3:12.
16. Etẹwẹ sọgan ze yise mítọn do whlepọn mẹ?
16 Aihọn lọ nọ hẹn ẹn vẹawuna mí nado to họntọn Jehovah tọn yin zọnmii. Mẹsusu wẹ nọ jẹagọdo linlẹn lọ dọ Jiwheyẹwhe tin. To paa mẹ, e nọ taidi dọ onú yọ́n na mẹhe nọ dovọ́na nubiọtomẹsi Jiwheyẹwhe tọn lẹ. Eyin mí mọ onú mọnkọ, yise mítọn gán biọ whlepọn mẹ. Dile etlẹ yindọ mí ma na jẹagọdo dọ Jiwheyẹwhe tin, mí gán jẹ ayihaawe do ji eyin ewọ na yinuwado ota mítọn mẹ. Nuhe jọ do mẹhe kàn Salmu 73tọ go niyẹn. E mọ bọ mẹhe lẹdo e lẹ nọ dovọ́na osẹ́n Jiwheyẹwhe tọn lẹ ṣogan bọ onú yọ́n na yé. Taidi kọdetọn de, e jẹ kinkanse ede ji eyin Jiwheyẹwhe sinsẹ̀n doale nugbonugbo.—Salm. 73:11-13.
17. Etẹwẹ na gọalọna mí nado to họntọn Jehovah tọn yin zọnmii?
17 To godo mẹ, etẹwẹ gọalọna salmu-kantọ lọ nado jla pọndohlan etọn do? E lẹnayihamẹpọn do nuhe na jọ do mẹhe wọnji Jehovah go lẹ go ji. (Salm. 73:18, 19, 27) E sọ lẹnnupọndo ale he Jiwheyẹwhe sinsẹ̀n nọ hẹnwa lẹ ji. (Salm. 73:24) Mílọsu gán nọ lẹnnupọndo dona he Jehovah ko na mí lẹ ji. Mí ni nọ yí enẹ jlẹdo lehe gbẹzan mítọn na ko ṣí eyin mí ma to Jehovah sẹ̀n dai wẹ go. Mọwiwà na gọalọna mí nado to nugbonọ yin zọnmii bosọ wá tadona dopolọ kọ̀n taidi salmu-kantọ lọ he dọmọ: “Na yẹn tọn, e yọ́n na mi nado dọnsẹpọ Jiwheyẹwhe.”—Salm. 73:28.
18. Naegbọn mí gán pannukọn sọgodo po jidide po?
18 Mí gán pannukọn nuhahun depope to azán godo tọn ehelẹ mẹ, na mí “yin afanumẹ na Jiwheyẹwhe ogbẹ̀nọ podọ nugbo lọ” wutu. (1 Tẹs. 1:9) Jiwheyẹwhe mítọn yin Omẹ Nujọnu tọn de he nọ yinuwado ota sinsẹ̀n-basitọ etọn lẹ tọn mẹ. E ko dohia to hohowhenu dọ emi ma nọ jo devizọnwatọ emitọn lẹ do, podọ e sọ topọ hẹ mí to egbehe. To madẹnmẹ din, mí na pannukọn nukunbibia daho hugan he ma ko jọ pọ́n to aigba ji. Amọ́, mí ma na pehẹ ẹ míde ṣo. (Isa. 41:10) Mì gbọ mímẹpo ni “gọ́ na adọgbigbo bo dọmọ: ‘Jehovah wẹ alọgọtọ ṣie; yẹn ma na dibu.’”—Heb. 13:5, 6.
OHÀN 3 Huhlọn Mítọn, Todido Mítọn, Jidide Mítọn
