1. Muaj dab tsi pab tau Yehauvas cov tib neeg kom lawv rau siab ntso teev tiam nws tab txawm lawv raug ntau yam teeb meem?

 NYOB hauv phau Vajlugkub hais tias peb nyob rau ib lub sij hawm uas “muaj kev ntxhov siab heev.” (2 Timautes 3:1) Yehauvas cov tib neeg yeej raug tej teeb meem uas txhua tus tib neeg nyob hauv Xatas lub sim ceeb no raug tib yam nkaus. Tsis tas li ntawd, peb raug tsim txom vim peb teev tiam Yehauvas. Muaj dab tsi pab tau peb teev tiam Yehauvas tab txawm peb raug tej teeb meem no? Yam ntawd yog peb muaj Yehauvas uas yog “tus Vajtswv uas muaj sia nyob” pab peb.​—Yelemis 10:10; 2 Timautes 1:12.

2. Peb paub li cas txog Yehauvas es thiaj txhawb tau peb lub zog?

² Yehauvas pom txhua yam kev nyuaj siab uas peb raug thiab nws yeej tos tsis hnyu yuav pab peb. (2 Xwmtxheej Vajntxwv 16:9; Phau Ntawv Nkauj 23:4) Yog peb nco ntsoov tias Vajtswv hlub peb thiab nws yeej ib txwm npaj nreg nroos pab peb ces yuav txhawb tau peb kom thev taus tej kev sim siab uas peb raug. Cia peb mus saib seb muaj li cas rau Vaj Ntxwv Daviv.

3. Daviv tus nru lus yog li cas tiag thaum nws hais tias “[Yehauvas] yog tus muaj sia nyob”?

³ Daviv paub Yehauvas zoo thiab tso siab plhuav rau Nws. Thaum Vaj Ntxwv Xa-ules thiab lwm cov xav muab Daviv tua, Daviv thov kom Yehauvas pab nws. (Phau Ntawv Nkauj 18:6) Tom qab Yehauvas teb Daviv cov lus thov thiab cawm Daviv dim, Daviv thiaj li hais li no tias: “[Yehauvas] yog tus muaj sia nyob!” (Phau Ntawv Nkauj 18:46) Daviv tus nru lus yog li cas tiag? Muaj ib phau ntawv hais txog Daviv tias tos Daviv hais li no los nws pom tias Yehauvas “yog tus vajtswv uas muaj sia nyob thiab Nws yeej ib txwm pab Nws cov tub qhe.” Daviv yeej paub zoo tias nws tus Vajtswv yeej paub txhua yam uas nws raug thiab Vajtswv yeej sawv nreg nroos yuav pab nws. Qhov no txhawb tau Daviv kom  rau siab ntso teev tiam thiab qhuas Yehauvas tas zaj tas zog.​—Phau Ntawv Nkauj 18:28, 29, 49.

4. Yog peb ntseeg tias Yehauvas yog tus Vajtswv uas muaj sia nyob, yuav pab tau peb li cas?

⁴ Yog peb ntseeg tias Yehauvas yog tus Vajtswv uas muaj sia nyob ces yuav pab tau peb kub siab lug teev tiam nws. Tsis tas li ntawd, yuav pab tau kom peb thev taus txhua yam kev sim siab thiab muaj siab ua Yehauvas tes hauj lwm. Ntxiv ntawd, peb yuav ua npaum li peb ua tau kom thiaj li tuav rawv peb txoj kev sib raug zoo nrog Yehauvas.

TUS VAJTSWV UAS MUAJ SIA NYOB YUAV TXHAWB KOJ

5. Thaum raug kev sim siab, muaj dab tsi thiaj txhawb tau peb? (Filipis 4:13)

⁵ Yog tias peb nco ntsoov tias Yehauvas yog tus Vajtswv uas muaj sia nyob thiab nws yuav pab tau peb ces peb yuav thev taus tej kev sim siab uas peb raug tab txawm yuav loj los me. Vajtswv yeej pab tau txhua yam kev sim siab vim tej kev sim siab ntawd yeej tsis nyuaj rau nws hlo li. Nws yog tus Vajtswv uas muaj hwj chim loj tshaj plaws thiab nws yeej muab tau dag zog rau peb thev txhua yam. (Nyeem Filipis 4:13.) Qhov uas peb paub li no pab tau kom peb tso siab rau Vajtswv thaum peb raug kev sim siab. Thaum peb pom tias Yehauvas pab peb thev dhau tej kev sim siab uas peb saib tias tsis loj ua luaj twg ces peb paub tias nws yeej yuav pab kom peb thev dhau tej kev sim siab uas loj.

6. Muaj li cas rau Daviv thaum nws tseem hluas, nws thiaj huab yam tso siab rau Yehauvas?

⁶ Muaj ob yam Daviv raug uas pab tau kom nws huab yam tso siab rau Yehauvas. Thaum Daviv tseem hluas muaj ib zaug nws pom ib tug dais kwv nws txiv ib tug yaj mus, hos muaj ib zaug nws pom tus tsov ntxhuav kwv nws txiv ib tug yaj mus lawm. Ob zaug no, nws puav leej mus caum tau ob tug tsiaj ntawd thiab cawm tau ob tug yaj rov qab los huv si. Daviv yeej tsis hais tias nws ua tau li no los yog nws rab peev xwm. Nws paub tias Yehauvas muab hwj chim rau nws, nws thiaj ua tau. (1 Xamuyees 17:34-37) Daviv yeej nco ntsoov ob zaj no rau nruab siab. Thaum nws xav txog tej no pab tau kom nws tso siab rau tus Vajtswv uas muaj sia nyob tias Vajtswv yeej yuav pab nws yav tom ntej.

7. Daviv tsuas xav txog dab tsi, thiab vim li cas nws ho kov yeej Nkauli-am?

⁷ Tej zaud thaum Daviv tiav hluas, nws mus xyuas cov tub rog Ixayees lub yeej. Nws hnov tias cov tub rog ntawd ntshai heev vim cov Filitees ib tug tub rog loj thiab siab npe hu ua Nkauli-am pheej tuaj “twv ntxhias cov tubrog Yixalayees.” (1 Xamuyees 17:10, 11) Cov tub rog Ixayees ntshai heev vim lawv tsuas pom tias Nkauli-am loj thiab siab thiab lawv tsuas xav txog nws tej lus hais los hem lawv. (1 Xamuyees 17:24, 25) Tiam sis Daviv xam pom tias thaum Nkauli-am hais lus los nkaug cov tub rog Ixayees ces twb yog nws hais lus nkaug “Vajtswv tus uas muaj sia nyob” ntag. (1 Xamuyees 17:26) Daviv tsuas xav txog Yehauvas nkaus nkaus xwb. Nws tso siab tias Vajtswv yeej yuav pab nws tam sim ntawd ib yam li thaum ub Vajtswv pab nws saib xyuas nws cov yaj thiab. Muaj Vajtswv tuaj nws tog lawm ces nws thiaj li tua yeej Nkauli-am!​—1 Xamuyees 17:45-51.

8. Muaj dab tsi pab tau kom koj tso siab tias Yehauvas yeej yuav pab koj thaum koj raug kev sim siab? (Saib daim duab.)

⁸ Yog tias peb nco ntsoov tias tus Vajtswv uas muaj sia nyob yeej npaj nroos yuav pab peb ces peb yeej yuav kov yeej tej kev sim siab uas peb raug. (Phau Ntawv Nkauj 118:6) Qhov uas peb xav txog tej yam uas Yehauvas tau ua yav tag los lawm yuav pab tau kom peb huab yam tso siab rau nws. Mus nyeem tej zaj uas nyob rau hauv phau Vajlugkub kom peb thiaj li nco txog tej yam uas Yehauvas twb tau ua rau nws cov tib neeg lawm. (Yaxayas 37:17, 33-37) Tsis tas li ntawd, peb kuj mus nyeem los sis saib tau tej zaj nyob hauv lub vej xaij jw.org seb Yehauvas twb  pab cov kwv tij nkauj muam li cas rau li cas niaj hnub nim no. Tej zaud koj yuav xav tias Yehauvas twb tsis tau ua ib yam dab tsi los pab koj, xws li cawm koj ntawm tsov ntxhuav los sis dais. Qhov tseeb tiag, Yehauvas twb tau ua ntau yam los pab koj lub neej lawm! Yehauvas twb caw koj los ua nws ib tug phooj ywg. (Yauhas 6:44) Txawm tam sim no los twb yog muaj nws ua tus pab koj, koj thiaj tseem teev tiam nws. Yog li ntawd thov Yehauvas pab kom koj nco ntsoov tej lub caij uas nws tau teb koj cov lus thov, pab koj raws caij raws nyoog, los sis saib xyuas koj thaum koj muaj kev nyuaj siab ntxhov plawv. Yog koj pheej xav mus xav los txog tej uas nws tau pab koj lawm ces yim huab ua rau koj ruaj siab tias Yehauvas haj tseem yuav pab koj lawm yav tom ntej.

9. Peb yuav tau nco ntsoov li cas thaum peb raug kev sim siab? (Pajlug 27:11)

⁹ Yog koj xam pom tias Yehauvas muaj sia zees nyob tiag ces koj yuav saib tej uas koj raug ntawd tsis ua luaj twg. Vim li cas ho hais li ntawd? Thaum peb raug kev sim siab, peb yuav tau xav seb dab tsi yog yam uas tseem ceeb tshaj. Dab Ntxwg Nyoog hais tias thaum peb raug ib yam twg nyuaj, peb yeej yuav tso Yehauvas tseg. (Yauj 1:10, 11; nyeem Pajlug 27:11.) Tiam sis thaum peb thev dhau peb tej kev sim siab ces peb yuav ua rau Yehauvas zoo siab heev thiab qhia tau tias Dab Ntxwg Nyoog tej lus puav leej dag xwb. Tej zaud ntawm koj nyob cov nom tswv yuav tawm tsam Yehauvas cov tib neeg, tej zaud koj kuj muaj teeb meem txog nyiaj txiag, cov tib neeg koj mus qhia Vajlugkub rau tsis nyiam txoj xov zoo, los sis koj ho raug ib yam kev nyuaj siab twg. Yog tias muaj tej no raug rau koj, nco ntsoov peem tiag rau qhov koj yuav ua rau Yehauvas zoo siab. Ntxiv ntawd, nws yuav saib xyuas kom koj thev taus tej kev sim siab uas koj raug. (1 Kauleethaus 10:13) Nws yeej yuav ntxiv dag ntxiv zog rau koj.

TUS VAJTSWV UAS MUAJ SIA NYOB YUAV MUAB NQI ZOG RAU KOJ

10. Tus Vajtswv uas muaj sia nyob yuav pub dab tsi rau cov uas teev tiam nws?

¹⁰ Yehauvas yeej ib txwm muab nqi zog rau cov uas pe hawm nws. (Henplais 11:6) Nws pub  kom peb muaj lub siab tus thiab txaus siab rau tej yam peb muaj tam sim no thiab nws tseem yuav muab txoj sia ntev dhawv mus ib txhis rau yav tom ntej. Peb yeej tso siab plhuav tias Yehauvas yuav muab nqi zog rau peb thiab nws yeej muaj hwj chim ua tau li ntawd. Vim li no peb yuav rau siab ntso ua npaum li peb ua tau los teev tiam nws zoo ib yam li nws cov tub qhe txheej puag thaum ub. Timautes kuj ua tib yam li ntawd thiab.​—Henplais 6:10-12.

11. Vim li cas Timautes ho ua hauj lwm hnyav heev los pab lub koom txoos? (1 Timautes 4:10)

¹¹ Nyeem 1 Timautes 4:10. Timautes yeej cia siab ntsoov tias Vajtswv yuav muab nqi zog rau nws. Yog li ntawd, nws thiaj sib zog ntsos ua hauj lwm rau Yehauvas thiab lwm tus. Nws ho tau ua dab tsi lawm? Tus tub txib Povlauj txhawb kom nws txawj qhia txoj xov zoo thiab txawj qhia hauv lub koom txoos. Povlauj kuj qhia kom nws coj cwj pwm zoo rau cov ntseeg, tsis hais tus hluas tus laus tau xyaum. Timautes kuj tau tej txoj hauj lwm uas nyuaj kawg li, xws li tau mus ua tib zoo qhuab ntuas cov uas tsim nyog ntuas. (1 Timautes 4:11-16; 2 Timautes 4:1-5) Qee lub sij hawm, lwm tus yeej tsis pom tej uas Timautes tau ua los sis lawv tsis ris txiaj ntsig rau tej nws ua ntawd tiam sis nws paub tias Yehauvas yeej yuav muab nqi zog rau nws.​—Loos 2:6, 7.

12. Vim li cas cov txwj laus sib zog ntsos ua hauj lwm hauv lub koom txoos? (Saib daim duab.)

¹² Cov txwj laus niaj hnub nim no yeej tso siab tau tias Yehauvas pom txhua yam thiab saib tej uas lawv ua muaj nuj nqis. Cov txwj laus tsis yog mus tshaj tawm txoj xov zoo, saib xyuas thiab cob qhia cov kwv tij nkauj muam xwb tiam sis lawv kuj tsa vaj tsa tsev thiab pab thaum muaj xwm txheej los raug rau ib qho twg. Tsis tas li ntawd, ib txhia txwj laus kuj yog pab kwv tij mus txhawb cov muaj mob los sis pab kwv tij sawv cev kev kho mob. Cov txwj laus yeej paub tias lub koom txoos yog Yehauvas ntiag tug, tsis yog ib tug neeg twg li. Lawv thiaj li sib zog ntsos ua hauj lwm pab lub koom txoos thiab tso siab plhuav tias Vajtswv yuav muab nqi zog rau txhua yam uas lawv tau ua.​—Kaulauxais 3:23, 24.

13. Yehauvas xav li cas thaum nws pom peb ua ub ua no rau nws?

 ¹³ Tsis yog txhua leej txhua tus yuav ua tau ib tug txwj laus. Tiam sis peb txhua leej txhua tus, ib leeg yeej muab tau ib yam pub rau Yehauvas. Nws yuav zoo siab heev yog tias nws pom peb ua npaum li peb ua tau los teev tiam nws. Nws yeej pom thaum peb muab dej siab los txhawb nqa tes hauj lwm thoob qab ntuj, tab txawm peb muab tsis tau ntau ua luaj twg. Yog peb txaj txaj muag los thaum peb tsa tes teb tom tej kev sib txoos, thiab peb zam lwm tus lub txim mas ua rau nws zoo siab heev. Tab txawm koj xav tias koj twb ua tsis tau ntau ua luaj twg rau Yehauvas los nco ntsoov tias Yehauvas yeej pom txhua yam koj ua rau nws thiab nws saib tej ntawd muaj nuj nqis. Nws hlub koj heev thiab nws yuav muab nqi zog rau koj.​—Lukas 21:1-4.

NROG TUS VAJTSWV UAS MUAJ SIAB NYOB SIB RAUG ZOO

14. Vim li cas nrog Yehauvas sib raug zoo ho pab kom peb muab siab npuab nws nraim? (Saib daim duab.)

¹⁴ Yog peb nrog Yehauvas sib raug zoo ces yuav yooj yim dua rau peb muab siab npuab nws. Yeej muaj tseeb li no rau Yauxej. Nws ua tawv qhawv tsis kam ua kev plees kev yi. Nws paub tias yeej muaj Yehauvas tiag thiab nws tsis xav kom Yehauvas tu siab rau nws. (Chivkeeb 39:9) Yuav kom peb nrog tau Yehauvas sib raug zoo mus li, peb yuav tau lauj sij hawm los thov nws thiab kawm nws Txoj Lus. Yog ua li no ces peb txoj kev sib raug zoo nrog nws yuav tawg paj txi txiv. Thaum peb sib raug zoo nrog Yehauvas ib yam li Yauxej ces peb yuav tsis ua ib yam dab tsi kom Yehauvas tu siab rau peb.​—Yakaunpaus 4:8.

15. Peb khaws tau li cas los ntawm cov Ixayees thaum lawv nyob rau ntawm roob moj sab qhua? (Henplais 3:12)

¹⁵ Cov uas tsis tso siab rau Yehauvas mas yeej yooj yim rau lawv tsis muab siab npuab nws. Xws li thaum cov Ixayees nyob rau ntawm roob moj sab qhua. Lawv yeej paub tias yeej muaj Yehauvas tiag tiam sis lawv tsis tso siab tias nws yuav saib xyuas tau lawv. Tsis tas li ntawd, lawv haj tseem nug tias: “[Yehauvas] nrog peb nyob los tsis nrog?” (Khiav Dim 17:2, 7) Yog li ntawd, lawv thiaj li sawv tawm tsam Vajtswv. Cia peb tsis txhob xyaum coj lawv tus cwj pwm no.​—Nyeem Henplais 3:12.

16. Tej thaud muaj dab tsi ua tau rau peb txoj kev ntseeg tsuag?

 ¹⁶ Lub qab ntuj no yeej tsis cia kom yooj yim rau peb nrog Yehauvas sib raug zoo. Muaj coob leej ntau tus qhia hais tias tsis muaj Vajtswv. Muaj ntau zaus, ntxim li cov uas tsis quav ntsej Vajtswv tej kev cai tau lub neej zoo. Thaum peb pom yam li no mas sim peb txoj kev ntseeg kawg nkaus li. Txawm peb ntseeg tias muaj Vajtswv los, tej zaud peb pib xav hais tias nws pab tsis tau peb. Muaj ib ntus tus uas sau Phau Ntawv Nkauj 73 kuj xav ib yam li ntawd thiab. Nws pom cov uas tsis quav ntsej Vajtswv tej kev cai thiab pom lawv ua neej sov siab so. Nws txawm pib xav tias puas tsim nyog rau nws teev tiam Vajtswv ntxiv lawm.​—Phau Ntawv Nkauj 73:11-13.

17. Muaj dab tsi pab tau kom peb nrog Yehauvas sib raug zoo?

¹⁷ Muaj dab tsi thiaj pab tau tus sau phau ntawv nkauj hloov nws txoj kev xav? Nws xav txog tej yam uas yuav los raug cov uas tsis tso siab rau Yehauvas. (Phau Ntawv Nkauj 73:18, 19, 27) Tsis tas li ntawd, nws kuj xav txog tej yam zoo nws yuav tau yog tias nws teev tiam Vajtswv. (Phau Ntawv Nkauj 73:24) Peb los yuav tau xav txog txhua yam uas Yehauvas twb foom koob hmoov rau peb lawm. Yog tias peb tsis teev tiam Yehauvas ntshe peb lub neej twb tsis zoo li ntawd. Qhov uas yuav pab tau peb muab siab npuab Yehauvas yog peb nco ntsoov tias vim li cas zoo rau peb teev tiam Yehauvas. Peb thiaj hais tau li tus sau phau ntawv nkauj tias: “Kuv mas zoo siab kawg, vim kuv nyob ze Vajtswv.”​—Phau Ntawv Nkauj 73:28.

18. Vim li cas peb thiaj tsis ntshai yav tom ntej?

¹⁸ Peb yuav fim taus tej yam uas los raug peb nyob rau lub sij hawm kawg vim peb “ua Vajtswv tus uas muaj sia nyob tes haujlwm.” (1 Thexalaunikes 1:9) Peb tus Vajtswv yeej txhawj txog peb thiab nws yuav pab peb. Yav thaum ub nws twb nrog nraim nws cov tub qhe ces nim no peb los nws yeej yuav pab. Tsis ntev tom ntej no peb yuav raug txoj kev txom nyem loj kawg nkaus uas yuav muaj rau hauv lub ntiaj teb no. Tiam sis Yehauvas yuav nrog nraim peb. (Yaxayas 41:10) Yog li ntawd, “tsis txhob ntshai, peb cia li hais tias, ‘[Yehauvas] yog tus uas pab kuv, kuv yuav tsis ntshai.’”​—Henplais 13:5, 6.