1. Anni i makaduffun tapenu tulu-tuloy tam nga mapasserbian si Jehova maski nu aru i problema?

 KINAGI na Biblia nga mattotolay ittam ngana ta tiempo na “ziga-riga.” (2 Tim. 3:1) Fuera paga ta problema ira nga arubangan na totolay sangawe ta mundo ni Satanas, mapeppersigi paga i totolay ni Jehova. Anni i makaduffun tapenu tulu-tuloy tam nga mapasserbian si Jehova maski egga yaw ira nga problema? I tadday ay megafu ta naekspiriensa tam ngana i panguffun ni Jehova anna ammu tam nga yayya “i sigga-matolay nga Dios.”—Jer. 10:10; 2 Tim. 1:12.

2. Anni i ammu tam meyannung kani Jehova nga mamasikan nittam?

² Kuru-kurug nga Persona si Jehova anna kakayà na ittam nga uffunan. (2 Cro. 16:9; Sal. 23:4) Nu daddammattam nga si Jehova ay sigga-matolay nga Dios anna sigga-paran nga manguffun nittam, maattammattam i maski anni nga problema. Ikonsidera nu kunnasi nabbalin tu kuru-kurug yatun kani Patul David.

3. Anni i kayà kagian ni David turi ta kinagi na nga “matolay i YAFU!”?

³ Kilala ni David si Jehova anna nattalo yayya nisa. Turi ta ikaya da yayya patayan na kalaban na ira kagitta ni Patul Saul, nappoffun si David kani Jehova gukaban na pakimallo. (Sal. 18:6) Sinabbag na Dios i pakimallo na anna nipaliag na yayya. Yatutta kinagi ni David: “Matolay i YAFU” nga Jehova! (Sal. 18:46) Anni i kayà kagian ni David ta pinakkagi na tatun ira nga uvovug? Segun ta tadday nga referensia, ipasa-pasigo ni David nga si Jehova ay “kurug nga dios anna kanayun nga manguffun ta aripan na ira.” Megafu ta ekspiriensa ira ni David, ammu na nga i Dios na ay sigga-matolay anna sigga-paran nga manguffun ta nisa. Yatun i namagaram kani David tapenu tulu-tuloy nga passerbian anna ikakua si Jehova.—Sal. 18:​28, 29, 49.

4. Anni i meyuffun na nittam nu imammatattam si Jehova nga sigga-matolay nga Dios?

 ⁴ Nu kumbinsidu ittam nga si Jehova i sigga-matolay nga Dios, moffunan ittam natun tapenu matalikarag nga passerbian si Jehova. Mapasikan ittam gapa nga attamman i problema ira anna mapaguyu ittam nga tulu-tuloy nga mallallappo ta passerbi nisa. Determinadu ittam gapa nga mattalupaddian nga madukko kani Jehova.

PASIKANNAN NAKA NA SIGGA-MATOLAY NGA DIOS

5. Ngatta makapakkomfiansa ittam nga maattammattam i problema ira? (Filipos 4:13)

⁵ Nu daddammattam nga si Jehova ay sigga-matolay anna sigga-paran nga manguffun nittam, maattammattam i maski anni nga problema, dakal man onu baddi. Moffunan na ittam ta maski anni nga problema megafu ta awan tu problema nga kitezziga para ta Dios tam. Yayya i Makapangngua-sa-Ngamin anna meddan na ittam tu pakapangngua tapenu magattam. (Bibbigan i Filipos 4:​13, NW.) Makkomfiansa ittam gafu nga maattammattam i maski anni nga problema. Habang masingattam nga uffunan ittam ni Jehova ta baraddi ira nga problema, makasiguradu ittam nga uffunan na ittam ta mas madammo ira nga problema.

6. Anni i nesimmu kani David ta kabbing na nga nanguffun ta nisa tapenu mas makkomfiansa kani Jehova?

⁶ Ikonsidera i dua nga ekspiriensa ni David nga nanguffun nisa tapenu mas makkomfiansa kani Jehova. Turi ta mappastor si David ta kabbing na, egga i tiempo nga nangitammang i oso anna leon tu karneru na yama na. Turi ta nesimmu yatun, magutu nga zinaddag ni David yatun ira nga ayam anna nipaliag na i karneru. Ngem ari vuluvuga ninono ni David nga nakua na yatun megafu ta sarili na nga sikan. Ammu na nga si Jehova i nanguffun nisa. (1 Sam. 17:​34-37) Ari vuluvuga nattaman ni David yatun nga ekspiriensa na ira. Ninonono na danatun yatutta nattalo yayya nga pasikannan yayya na sigga-matolay nga Dios ta mappange.

7. Anni i naffokusan ni David, anna ngatta nakoffun yatun ta pakillaban na kani Goliat?

⁷ Turi ta awan paga tu 20 anios ni David, binisita na i kampu na suddalu na Israelita ira nga dian na manung na ira. Nakannammuan na nga sobra i anassing na suddalu ira megafu ta higante nga Filisteo nga mangngagan tu Goliat nga ‘mangararu ta suddalu ira na Israel.’ (1 Sam. 17:​10, 11) Sobra anassing natun ira nga suddalu megafu ta naffokus ira ta kadakal ni Goliat anna ta panganchaw na ta nira. (1 Sam. 17:​24, 25) Ngem duma i naffokusan ni David. Ammu na tu ari nga suddalu na Israel i uyu-uyawan ni Goliat, nu ari lagu, uyu-uyawan na i “hilera na armada na matolay nga Dios.” (1 Sam. 17:26) Si Jehova i agga-nono ni David. Mattalo yayya nga i Dios nga nanguffun ta nisa ta kabbing na i manguffun gapa uli nisa taw nga situasion. Gafu ta siguradu si David nga uffunan yayya na Dios, nakillaban yayya kani Goliat anna siempre nangaffu yayya!—1 Sam. 17:​45-51.

8. Anni i makoffun tapenu makkomfiansa nga uffunan ittam ni Jehova nu egga i problema tam? (Innan gapa i letratu.)

⁸ Maattammattam gapa i problema ira nu daddammattam nga sigga-paran nga manguffun nittam i sigga-matolay nga Dios. (Sal. 118:6) Mas makkomfiansa ittam kani Jehova nu nonopattam i kingngua na ira ta nappasa. Bibbigan i rekord na Biblia nga mangiparaddam niko ta pangipaliag ni Jehova ta aripan na ira. (Isa. 37:​17, 33-37) Bibbigan onu girawan gapa i balita ira ta website tam nga jw.org nga mangipasingan ta panguffun ni Jehova ta wawwaragi tam sangawe. Nonopammu gapa i tiempo ira nga zinuffunan naka ni Jehova. Ngem baka manono mu nga awan paga tu  extraordinariu nga pinanguffun ni Jehova ta niko kagitta na pangipaliag ta leon onu oso. Ngem i kurug, aru ngana i neyuffun ni Jehova ta pattolem! Inimbita naka ni Jehova tapenu mabbalin tu kofun na. (Juan 6:44) Mappabalo ka ta adde sangawe, egga ka lapa ta kinakurug megafu ta uffun na. Yari ta mappoffukka kani Jehova tapenu manono mu nakuan i tiempo ira nga sinabbag na i pakimallo mu, niyawa na i mismu nga kakawagammu, anna sinangngallan naka ta mariga nga situasion. Nu nononopammu yaw ira nga gannug, makkomfiansa ka nga tulu-tuloy nga uffunan naka ni Jehova.

9. Kunnasi tam nakuan imammatan i problema tam ira? (Proverbio 27:11)

⁹ Nu kuru-kurug nittam si Jehova, mapeggan ittam tu fustu nga pagimamma ta problema tam ira. Kunnasi? Nu meparubang ittam ta problema, mawag tu maffokus ittam ta pinaka-importante nga gannug. Kagian na Diablo nga nu makkaproblema ittam, siguradu nga panawattam si Jehova. Yari ta egga i efekto na ta mataga-tageno ni Jehova nu kunnasi tam arubangan i problema tam ira. (Job 1:​10, 11; bibbigan i Proverbio 27:11.) Nu mattalupaddian ittam nga matalo kani Jehova maski nu egga i problema tam ira, mepasingattam nga iddu tam yayya anna mapakurug tam nga laddug i Diablo. Peppersigian naka kari na gobiernu? Mariga kari i pattolem? Awan kari tu interes na totolay ta ilayyagayyam? Onu attattammammu i tanakuan paga nga problema? Nu kunnatun i situasiommu, tandaanammu nga oportunidad yatun tapenu mapagayayya mu i futu ni Jehova. Nonopammu gapa nga siguraduan ni Jehova nga maattammammu i maski anni nga problema. (1 Cor. 10:13) Iddan naka tu sikan tapenu makapagattam.

BALA-BALATTAN NAKA NA SIGGA-MATOLAY NGA DIOS

10. Anni i kuan na sigga-matolay nga Dios turi ira ta maddayaw ta nisa?

¹⁰ Kanayun nga bala-balattan ni Jehova danuri i maddayaw nisa. (Heb. 11:6) Pabbalinan na ittam tu memammo anna kontentu sangawe anna iddan na ittam noka tu mannanayun  nga inango. Makasiguradu ittam nga kakayà na ittam nga bala-balattan ni Jehova anna egga i pakawayya na nga kuan yatun. Yari ta tulu-tuloy tam nga kuan i mawayya tam ta paddayaw nisa, gitta na kingngua na matalo ira nga aripan na ta nappasa. Kunnatun i kingngua ni Timoteo tagga.—Heb. 6:​10-12.

11. Ngatta nallallappo si Timoteo para ta kongregasion? (1 Timoteo 4:10)

¹¹ Bibbigan i 1 Timoteo 4:10. Masikan i pangurug ni Timoteo nga bala-balattan yayya na sigga-matolay nga Dios. Megafu tatun, nallallappo yayya para kani Jehova anna para ta tanakuan. Anni i kingngua na? Pinagaram yayya ni apostol Pablo nga mabbalin tu malalaki ta panuddu ta ministerio anna ta kongregasion. Kinagi paga ni Pablo nga makasta nakuan yayya nga ehemplo ta wawwaragi na nga abbarabbing anna manakam. Neddan gapa yayya tu mariga ira nga annungan, nelavu i prangka ngem meddu nga panabarang turi ira ta makawag tatun. (1 Tim. 4:​11-16; 2 Tim. 4:​1-5) Nu mittan, ari masingan na tanakuan i kukukuan ni Timoteo onu ariadda appresian yatun. Ngem siguradu yayya nga bala-balattan yayya ni Jehova.—Roma 2:​6, 7.

12. Ngatta mallallappo i elder ira ta annungadda? (Innan gapa i letratu.)

¹² Makasiguradu gapa i elder ira sangawe nga masingi-singan anna tagibaloran ni Jehova i lallappo da. Fuera paga ta pash-shepherding, panuddu, anna pallayyagayya, aru nga elder i massuporta paga ta construction project anna disaster relief. Masserbi gapa i tanakuan ta Patient Visitation Group onu Hospital Liaison Committee. Ammu na elder ira nga i kongregasion ay kukua ni Jehova, ari tu na maski sinni nga tolay. Yari tu mallallappo ira ta annungadda anna buu i pattalo da nga bala-balattan noka na Dios i kukukuadda.—Col. 3:​23, 24.

13. Anni i matageno ni Jehova ta kukukuattam para nisa?

¹³ Siempre ari tu ngamin ay makapasserbi bilang elder. Ngem egga i makua tam ngamin  para kani Jehova. Kuruga appresian na nu kuattam i ngamin nga mawayya tam ta passerbi nisa. Masingan na gapa nu maddona ittam para ta worldwide work, maski nu baddi laman yatun. Magayayya gapa yayya nu labanattam i pasirattam tapenu makapakkomento ta study ira anna nu pakomattam danuri nakaliwa nittam. Maski nu matageno mu nga kagitta na baddi laman i makuam, mattalo ka nga tagibaloran yatun ni Jehova. Iddeddu naka megafu tatun, yatutta bala-balattan naka noka.—Luc. 21:​1-4.

MATTALUPADDIAN NGA MADUKKO TA SIGGA-MATOLAY NGA DIOS

14. Ngatta makapattalupaddian ittam nga matalo nu kanayun ittam nga madukko kani Jehova? (Innan gapa i letratu.)

¹⁴ Nu kuru-kurug si Jehova nittam, mas mabi ngana laman nga mattalupaddian nga matalo nisa. Kunnatun i nesimmu kani Jose. Talaga pinanakitan na i mangngua tu imoralidad. Kuru-kurug nisa i Dios anna arian na ikaya nga matakitan Yayya. (Gen. 39:9) Tapenu mabbalin gapa tu kuru-kurug si Jehova nittam, mawag tu egga i tiempo tam nga makimallo nisa anna gigiammuan i Uvovug na. Siguradu nga mas maddukko ittam nisa. Nu madukko i relasiottam kani Jehova kagitta ni Jose, manaki tam mangngua tu maski anni nga makataki Nisa.—Sant. 4:8.

15. Anni i magigiammu tam ta nesimmu ta Israelita ira ta katanapan? (Hebreo 3:12)

¹⁵ Mabi laman nga mabbalin tu ari matalo danuri i nakattamadda nga sigga-matolay nga Dios si Jehova. Ikonsidera i nesimmu ta Israelita ira turi ta egga ira ta katanapan. Ammu da gapa nga kurug si Jehova, ngem pinaddudadda nu tulu-tuloy nga iyawa ni Jehova i kawagadda. Niyavu da paga lagu: “Si Jehova kari ay egga ta nallatanattam onu awan?” (Ex. 17:​2, 7) Bilang resulta, narrebelde ira kontra ta Dios. Siguradu nga ariattam kayà nga parigan i marake nga kingngua da.—Bibbigan i Hebreo 3:12.

16. Kunnasi mapurueban i pangurug tam?

¹⁶ Marigatan ittam nga mattalupaddian nga  madukko kani Jehova megafu ta marake nga mundo. Aru nga totolay i ari mangurug ta Dios. Maruddu nga gitta na makakkasta i pattolay danuri na ari tumuttul ta Dios. Nu masingattam nga mesimmu yatun, mapurueban i pangurug tam. Kurug gapa nga mangurug ittam nga egga i Dios, ngem baka madduda ittam nu uuffunan na ittam. Kunnatun i matageno na nattura ta Salmo 73. Nasingan na nga marake i kukukuan na totolay ngem kagitta na makakkasta lapa i pattoleda. Megafu tatun, nadduda yayya nu sulit kari i passerbi na ta Dios.—Sal. 73:​11-13.

17. Anni i makoffun tapenu mattalupaddian ittam nga madukko kani Jehova?

¹⁷ Anni i nakoffun ta salmista tapenu moli i pagimamma na? Pinannonopan na tu mapia nu anni i mesimmu turi ira ta nakattamadda si Jehova. (Sal. 73:​18, 19, 27) Ninono na gapa i benefisio ira na passerbi ta Dios. (Sal. 73:24) Awayya tam gapa nga nonopan i bendision ira ni Jehova nittam anna nu kumusta i pattoletam nu ari ittam masserbi kani Jehova. Nu daddammattam nga pammakapianattam i passerbi kani Jehova, makoffun yatun nittam tapenu mattalupaddian nga matalo ta nisa. Kagitta na salmista, makagi tam gapa: “Niakan ay kuruga makapabbaw tu i Dios ay aranniak-ku.”—Sal. 73:28.

18. Ngatta ariattam maganassing ta mesimmu ta mappange?

¹⁸ Marubattam i maski anni laman nga kapurueba taw nga pangurianan ira nga aggaw megafu ta ‘masserbi ittam ta kurug anna matolay nga Dios.’ (1 Tes. 1:9) Ikavurungan ittam na Dios tam anna sigga-paran yayya nga manguffun nittam. Zinuffunan na i aripan na ira tagga anna siguradu nga uffunan na ittam gapa sangawe. Arubangattam noka i kadakallan nga ziga nga mesimmu ta davvun. Ngem ari ittam magitetadday. Kavulu tam si Jehova. (Isa. 41:10) Nakuan tu sigga-makatalo nga makagi tam ngamin: “I Yafu i manguffun niakan, awan tu ek-ku nga paganassingan.”—Heb. 13:​5, 6.