EGBERITỊBỊ 25
DUMA 7 Jehovah, Our Strength
Jehovah Kị “Inyenrinmịnị Ọkpọnanaowei” Bara Ukie
“Jehovah inyenrinmịnị!”—PS. 18:46.
TOLUMỌ DỌỤMỊNỊ YEBO
Wo karịmịnị Ọkpọnanaowei kị “inyenrimịnị Ọkpọnanaowei” bara wo mọ ukiemịnị yọmị baratụa wo pịrịmịnị.
1. Bụụdọọnyeama kị emi kpọ tekẹ baratụa Jehovah kịmịbo pịrịwẹrị pẹlẹgha bara ụ karịmịnị a o?
BIBLE wo inyenrinmịnị ifiemị akị “kụrọ ifieama” kị tịịn wẹrịemi. (2Tim. 3:1) Satan akpọ duo kịmịotu laamịnị bụụdọọnyebo bụọmọdẹ kpọ, Jehovah kịmịbo, Jehovah karịmịnị yọ duonị penimọyeama a sụọ bá á pịrị ụyamọmịnị. Bei bụụdọọnyebo kị wo laamịnị kị gbaa kpọ, teeki baratụa wo pịrịwẹrị mọkpo Jehovah karịmịnị a o? Omịnị bo Jehovah kọkọ “inyenrinmịnị Ọkpọnanaowei” bara nimiyọ kị baratụa wo pịrịmịnị—Jer. 10:10; 2Tim. 1:12.
2. Jehovah tebara ka kị inyenrinmịnị Ọkpọnanaowei a paaemi a o?
2 Jehovah wo laamịnị bụụdọọnyebosẹ ẹrịmịnị bá ifiebosẹ baratụa wo pịrị kị dọụmịnị. (2Chron. 16:9; Ps. 23:4) Ọkpọnanaowei kọkọ inyenrinmịnị bara wo mọ akị adụdụ a tụamịnị yọmị, baratụa wo pịrịwẹrị bodẹ daadiyesẹ dẹịnmọ mịnị. Wo wẹrị Pẹrẹowei David ifiema paa bara ditụa.
3. David “Jehovah inyenrinmịnị” bara gbaa mị, teeki gbaamịnị a o?
3 David Jehovah nimi bá Jehovah ka sẹsẹrẹị mị. Pẹrẹ-owei Saul mọ bá zịnị egiren otuama mọ, David baá dọụtimi ifiemị, David Jehovah baratụa-pịrịye bii mị. (Ps. 18:6) Ọkpọnanaowei, David tẹẹbịbị parụwẹrị ụ zụọbụọmọ mị, anịkị duonị David gbaa mị: “Jehovah kọkọ inyenrinmịnị!” (Ps. 18:46) David, Ọkpọnanaowei inyenrinmịnị bara gbaa yọmị tekẹ bimọ wẹrịemi a o? Kẹnị fun gbaa amọ David Jehovah kị kọkọ gesii Ọkpọnanaowei bá ifiebosẹ baratụa wó kịmịbo pịrịmịnị bara biberin wẹrịemi kị duonị David bịsẹbara gbaa mị. David, ụ paamọdẹ yebo duonị Jehovah kọkọ inyenrinmịnị eti nana mị. Bịsẹ eti kị baratụa David pịrịwẹrị pẹlẹgha bara akị Jehovah tokoni mị.—Ps. 18:28, 29, 49.
4. Omịnị Jehovah akị kọkọ inyenrinmịnị Ọkpọnanaowei bara dimọ daba, te arereama kị wo laamịnị a o?
4 Wo kpọ Jehovah kị kọkọ inyenrinmịnị Ọkpọnanaowei eti nana daba, baratụa wo pịrịwẹrị angọtụa Jehovah karị mịnị. Bịsẹyọ kị bụọmọ kpọ, omịnị kụrọ nanawẹrị penimọyeama ine, bá Jehovah fịrị kpọ wẹnịmịnị. Omịnị bá Jehovah mọ kpọ naịndẹịn mịnị.
INYENRINMỊNỊ ỌKPỌNANAOWEI MỊ Ị́ KỤRỌMỌ MỊNỊ
5. Dadiye wo laa daba teeki eti akị wo pịrịmịnị a o? (Philippians 4:13)
5 Jehovah kọkọ inyenrinmịnị Ọkpọnanowei, bá ifiebosẹ wo kekeremụ bara wo mọ kẹrị ukie daba, omịnị laa dụba bá kala dadiyeama kpọ ine mịnị. Ukie, wo laamịnị bụụdọọnyebo kẹnị kpọ dụba Jehovah dẹịngha. Jehovah kị dụba-dẹịn Ọkpọnanaowei, anịduonị, Omịnị baratụa wo pịrịwẹrị laa ine mịnị. (Philippians 4:13 goo) Anịduonị, dadiyeama kị wo laa kpọ, omịnị laa inemụ eti nana wẹrịemi. Jehovah kala dadiyeama kpọ baratụa wo pịrịmịnị duonị, dụba dadiyeama kị bo kpọ Jehovah baratụa wo pịrịmụ eti wo mọ nana wẹrịemi.
6. Zaụtimi ifiebị David paamọ yebo tebara ka kị wó Jehovah a nana wẹrịemi eti mịẹ kụrọmọdẹịn ma o?
6 David mịẹ eti akị Jehovah atụa kụrọmọ maá yeama wo mọ ditụa. David wó daụ anịnabo gbalịtimi ifiemị, bou-obiri mọ adaka mọ anịnabo kẹrị fịyọ a bo mị. Bịsẹ maá ifiebosẹ, David malafagha bara á baá mị. Bịsẹ bara kị gbaa kpọ, David tokoni akị angọ pịrịgha. Jehovah kị baratụa ụ pịrị bara David mọ nimi wẹrịmị. (1Sam. 17:34-37) David bei paa yebo baragha. David mị yebo kẹrị iroromịnị duonị, Jehovah mọkpọ ụ kekeremụ eti nana mị.
7. Agbẹị bara akị ye-iroro yọmị tebara ka kị baratụa David pịrịwẹrị Goliath mọ sụụ ma o?
7 Bịsẹyọ bụọdẹ mị, David Israel-otu sụụmịnị gbene bọọ amúmị. Bịsẹ ifiemị David naa sia kụraị kpọ laagha bara kị paaemi. Goliath “Israel-otu sụụ-bọlọụ bị diseimọ kụrọmọ mị,” anịduonị Israel sụụ-otubo malafamịnị bara David mọ ẹrị mị (1Sam. 17:10, 11) Israel otubo ánị ịkịọụsẹ akị Goliath gbaamịnị egberibo mọ bá wó dụbaemi bara mọ kọọ tụa mị, anịduonị ámịnị malafa mị. (1Sam. 17:24, 25) Anịa, David, zịnị bara ka kị paamịnị ye dimọ mị. David, Goliath gbaamịnị egberibo, Goliath “inyenrinmịnị Ọkpọnanaowei sụụ-bọlọụ” kị diseimọmịnị bara ka kị yebị dimọ mị (1Sam. 17:26) David Jehovah kị kẹrị iroro mị. Anịna gbalịtimi ifiemị Jehovah baratụa David pịrị mị, anịduonị Ọkpọnanaowei mọkpọ baratụa ụ pịrịmụ eti David mọ nana mị. Anịduonị David eti akị Jehovah atụawẹrị Goliath mọ sụụ wẹrị Goliath baa mị!—1Sam. 17:45-51.
8. Dadiyeama wo laa daba, teeki baratụa wo pịrịwẹrị eti akị Jehovah a tụa mịnị a o? (Foto kpọ dii.)
8 Wo kpọ inyenrinmịnị Ọkpọnanaowei mị baratụa wo pịrịmụ bara ukie daba, omịnị laa dadiye dẹịnmọ mịnị. (Ps. 118:6) Omịnị, Jehovah bụọdẹ ifiebị mịẹdẹ yebo kẹrị iroro daba, wo nana wẹrịemi eti mịẹkụrọmọ mịnị. Jehovah akị wó kịmịbo zụọbụọmọ bara gbaa wẹrịemi Bible yọama goo angọ ukiemọ. (Isa. 37:17, 33-37) Jw.org duosụọdá Jehovah akị wo bịnaotubo zụọmịnị bara goo, bá vidiobo kpọ dii. Jehovah baratụa ị́ pịrịdẹ ifieama kpọ kẹrị iroro. Jehovah baratụa ị́ pịrịdẹ ifieama kị ị́ mọ ukiegha kpọ, anịghakpọ ị́mịnị naa bou-obiri mọ adaka mọ baágha kị gbaa kpọ malafakụmọ. Jehovah biin yeama kị mịẹ ị́ pịrịdẹ! Jehovah ị́ tịịnbo wó ikieowei ka paadẹ. (John 6:44) Bei tịẹkiri kpọ, Jehovah baratụa ị́ pịrịmịnị kị duonị ị́mịnị laa ụ karịmịnị. Bụọdẹ ifiemị, Jehovah iné tẹẹbịbịbo parụ, agbẹị ifie baratụa ị́ pịrị, bá kụrọ ifieama kpọ ị́ kekere bara ị́ mọ ukiegha ifiesẹ, tẹẹ Jehovah pịrị, ómịnị baratụa ị́ pịrịwẹrị ukie mịnị. Bịsẹ yebo kẹrị iroromịnị yọbị, ị́ mịẹwẹrị Jehovah ifiebosẹ baratụa ị́ pịrịmụ eti nana mịnị.
Dadiye bo wo laa daba wo mịẹmịnị bara mị Jehovah gbelemịnị (Gooyọ 8-9 dii)
9. Dadiye wo laa daba omịnị teeki kẹrị iroro agbẹị-emi a o? (Proverbs 27:11)
9 Omịnị Jehovah inyenrinmịnị kịmị bara iroromịnị yọ kị baratụa wo pịrịwẹrị agbẹị bara akị wo dadiyebo diimịnị. Anịduonị dadiye wo laa daba, omịnị Satan gbaa Jehovah pịrị egberi kị kẹrị iroro mịnị. Satan gbaa amọ dadiye wo laa daba, omịnị ba Jehovah karịgha fa. Anịduonị dadiye bo daba, wo mịẹmịnị bara mị Jehovah gbelemịnị. (Job 1:10, 11; Proverbs 27:11 goo.) Wo laamịnị dadiyebo wo mọ dẹịnmọ daba, omịnị Jehovah tarịemi bara mịẹdịamịnị bá Satan kọkọ ekpe-owei bara kpọ mịẹgaanmịnị. Daabụọ otu ị́ penimọdẹ a? Sịlị bụụdọọnyeama ị́ paamọdẹ a? kịmịotu iné gbaamịnị egberi peigha anịghakpọ zịnị dadiyeama ị́ paamọdẹ a? Mị dadiyebo ị́ paamọ daba, ukie, Jehovah adụdụ mịẹ pọwẹịmụ fomuun kị ị́ laadẹ. Bodẹ dadiyesẹ, Jehovah baratụa ị́ pịrị mịnị. (1Cor. 10:13) Ómịnị kụrọ akị ị́ pịrịwẹrị ine mịnị.
INYENRINMỊNỊ ỌKPỌNANAOWEI MỊ Ị́ GBẸẸ MỊNỊ
10. Inyenrinmịnị Ọkpọnanaowei mị teeki mịẹ ụ karịmịnị otubo pịrị mịnị a o?
10 Jehovah ụ karịmịnị otubosẹ gbẹẹmịnị. (Heb. 11:6) Bei tịẹkiri kpọ Jehovah dọọ mọ pọwẹị mọ kọn wo pịrịmịnị, bá mị bọlọụ mị, fagha fagha ụndụ akị wo pịrịmịnị. Jehovah tarịama akị wo pịrịmụ kụrọ mọ, dịsẹ mọ nana wẹrịemi, anịduonị wosẹ eti akị Jehovah ka tụa wẹrịemi. Wo nana wẹrịemi eti kị baratụa wo pịrịwẹrị, Timothy mọ bá bụọdẹ peibolou nana otubo mịẹtimi bara dimịẹ mịnị, pẹlẹgha bara Ọkpọnanaowei karịmịnị.—Heb. 6:10-12.
11. Teeki Timothy dịnẹmọ wẹrị angọtụa itu bọọ fịrịwẹnị ma o? (1Timothy 4:10)
11 Timothy, Ọkpọnanaowei ụ gbẹẹmụ peibolou nana mị. 1Timothy 4:10 (goo.) Anị kị duonị, omịnị angọtụa fịriwẹnị Jehovah mọ zịnị otuama mọ pịrị mị. Timothy te yeama kị mịẹ ma o? Fịrịmọpaaowei Paul, Timothy kụrọmọ mị ebi kịmị tolumọ-owei bá ebi mịẹdịaye ka paa bịnaotubosẹ pịrịmụ yọbị akị Timothy kụrọmọmị. Kụrọ fịrịama kpọ akị Timothy pịrị mị, gbaamaba tarịnana bara, zezemọye akị bịnaotuama pịrịmụ fịrị kpọ akị ụ pịrị mị. (1Tim. 4:11-16; 2Tim. 4:1-5) Zụa ifieama kịmịotu Timothy wẹnịtimi fịrịbo ẹrịgha, zụa otu ba tọrụkẹrịyọ kpo mịẹdịagha, bịsẹbara kị paa kpọ, Jehovah kị ụ gbẹẹmụ bara Timothy mọ nimi wẹrịmị.—Rom. 2:6, 7.
12. Teeki baratụa itu-kosuotu pịrịwẹrị ifiebosẹ fịrịwẹnị mịnị a o? (Foto kpọ dii.)
12 Wo itu-okosuotubo kpọ Jehovah ánị wẹnịmịnị fịrịbọsẹ ẹrịmịnị bá tọrụkẹrị emi eti nana. Itu bọọ emi bịnaotubo kụrọmọ, á tolumọ, bá egberigbaa fịrị wẹnimịnị yọkị bụọmọ kpọ, biin itu-okosuotuama warịkẹrị fịrị wẹnịmịnị, bá baratụa vurudu akpọtu laaemi otu pịrịmịnị. Zụa otu hospital amú dọọnmịnị otu dii fịrị kị wẹnịmịnị anịghakpọ Hospital Liaison Committee ka sụọwẹrị fịrị wẹnịmịnị. Angọpaamọ bei fịrịbo wẹnịmịnị itu-kosuotubo, Jehovah kị itu nana wẹrịemi bara nimiwẹrịemi. Anịduonị, ámịnị ánị adụdụsẹ ka kị fịrị wẹnịmịnị, bá Jehovah tarịama kọn á pịrịmụ eti kpọ nana wẹrịemi.—Col. 3:23, 24.
Ị́mịnị angọtụa wẹrị itu barịmịnị yọmị, inyenrinmịnị Ọkpọnanaowei mị tarịama akị ị́ pịrị mịnị (Gooyọ 12-13 dii)
13. Jehovah tebara ka kị iné wẹnị ụ pịrịmịnị fịrịbọ dimọ wẹrịemi a o?
13 Kịmịsẹ itu-kosuotu a paamụ fomuun nanagha. Anịa wosẹ fịrịwẹnị Jehovah pịrịmụ fomuun nana wẹrịemi. Omịnị wo adụdụsẹ akị Jehovah karịmịnị mị, otuoye mịẹ akị baratụa egberigbaa fịrị pịrịmịnị. Jehovah wo otuomịnị yebosẹ ẹrịmịnị, wo otuwoyebị zaụemi kpọ Jehovah a tọrụkẹrị emi. Omịnị bụzegha bara yetolumọyọ bọọ bara-serimọ biibịbị parụmịnị anịghakpọ kịmị ye mịẹ wo dọọnmọ wẹrị omịnị ụbọ bụọmọ daba, Jehovah mịẹ pọwẹịmịnị. Iné mịẹmịnị yebo dụba iné dọụbara laagha kpọ, Jehovah a tọrụkẹrịemi bara nimi. Jehovah ị́ tarịemi, bá tarịama kọn ị́ pịrị mịnị.—Luke 21:1-4.
INYENRINMỊNỊ ỌKPỌNANAOWEI MỌ NAỊNTIMI
14. Ifiebosẹ Jehovah mọ naịnmịnị yọmị tebara ka kị wo peibolou mịẹ kụrọmọmịnị a o? (Foto kpọ dii.)
14 Jehovah kọkọ wo ikieowei aba, peibolou akị Jehovah atụamụ yọbị bọụbọụ wo pịrị dẹịnmịnị. Anị Joseph paamọ bara bị. Joseph, yebị Jehovah dịsẹgha bara nimi kị duonị erema mọ bụnụgha. (Gen. 39:9) Wo kpọ kọkọ Jehovah mọ palịdọụmịnị ifiesẹ, omịnị ifie miẹpaamọ wẹrị tẹẹ akị ụ pịrị bá Bible tolumọ angọ pịrị. Bịsẹbara wo mọ mịẹ daba, omịnị Jehovah mọ palịdẹịn mịnị. Omịnị kpọ Joseph bara Jehovah mọ naịn daba, benebene Jehovah dịsẹgha yeama mịẹgha fa.—Jas. 4:8.
Angọ akị inyenrimịnị Ọkpọnanaowei mọ naịnmịnị yọmị baratụa ị́ pịrịwẹrị iné peibolou kẹrị kụrọmọ mịnị (Gooyọ 14-15 dii)
15. Ogbo-abadị bọọ Israel-otubo paamọ yebị te ka kị wo tolumọ ma o? (Hebrews 3:12)
15 Jehovah kị kọkọ inyenrinmịnị Ọkpọnanaowei. Bịsẹyọ barafamịnị otubo Jehovah a barasinmụ yọmị kụrọgha. Israel-otubo ogbo-abadị duo wẹnịtimi ifiema paaye mị kẹrị iroro. Jehovah yọ emi bara ámịnị mọ nimi wẹrịemi, anịa Jehovah kọkọ ánị dọụ wẹrịemi yebo mịẹ á pịrịmụ bara ámịnị mọ peigha. Ámịnị tamanaịyọ nana mị. Ámịnị bii mị: “Jehovah kọkọ wo mọ mọ́ emi a o?” (Ex. 17:2, 7) Tamanaịyọ nana duonị, ámịnị tịbịkụrọ inyenrinbụọ nana mị. Israel-otubo mịẹ yebị berifaanye ka paa wo pịrịemi duonị, omịnị a dimịẹgha fa.—Hebrews 3:12 goo.
16. Teeki wo peibolou dadi a paaemi a o?
16 Mị akpọ mị, wo Jehovah mọ naịnmụ yọ mịẹkụrọmọ wo pịrịmịnị. Biin kịmịama Ọkpọnanaowei kẹnịyọ kpọ faa bara kị gbaamịnị. Anịa ị́ dii daba, bịsẹ kịmịbo kị bọlọụbụọ dẹịnmịnị. Bịsẹ yọmị wo peibolou dadi kpọ paaemi. Gbaamaba, Ọkpọnanaowei inyenrinmịnị bara wo mọ pei wẹrịemi kpọ, Jehovah wo dọụ wẹrịemi yebo kọn wo pịrịgha fa bara wo mọ iroro kpọ paaemi. Bo kẹnị ifie laa mị, Psalm 73 gẹẹowei kpọ bịsẹ kpekẹnị iroroye kị nana mị, Jehovah olokobo diwẹnịgha otubo pọwẹị nanamịnị bara ụ mọ ẹrị mị. Anịduonị Ọkpọnanaowei karịmịnị yọmị afẹn fịrị kị ụ mọ tọn mị.—Ps. 73:11-13.
17. Teeki baratụa wo pịrịwẹrị ifiebosẹ Jehovah mọ naịntimi mịnị a o?
17 Teeki baratụa Psalm 73 gẹẹowei pịrịwẹrị wo iroroye dei ma o? Eti akị Jehovah atụagha otubo paamọmụ yebo kẹrị iroro yọ kị baratụa ụ pịrị mị. (Ps. 73:18, 19, 27) Bá Jehovah karịmịnị yọ duo paamịnị arerebo kẹrị iroro yọ kpọ baratụa ụ pịrị mị. (Ps. 73:24) Wo kpọ Jehovah karịmịnị yọ duo wo laadẹ arerebo kẹrị iroro agbẹị-emi, bá wo Jehovah karịgha wẹrịgha wo laamụtimi ụyabo kpọ kẹrị iroro agbẹị-emi. Bịsẹbara wo mọ mịẹ daba, baratụa wo pịrịwẹrị wo peibolou kẹrị kụrọmọ mịnị. Omịnị laa Psalm fun gẹẹowei gbaa bara gbaa kpọ paaemi: “Ịmịnị aba Ọkpọnanaowei mọ naịntimimụ yọkị ebi ị pịrịemi.”—Ps. 73:28.
18. Omịnị tebara ka kị malafagha bara tịẹkụrọ timi bọlọụ bọọ paamụ yebo koru mịnị a o?
18 Omịnị “odubogban akị inyenrinmịnị bá gesii Ọkpọnanaowei kị pịrịmịnị” duonị, bei kunumọ ereinbo, wo laadẹ bụụdọọnyesẹ, omịnị laa dẹịnmọ mịnị. (1Thess. 1:9) Wo Ọkpọnanaowei mị, bụọdẹ ifie kpọ ụ karịtimi otubo mọ timi mị, mị tịẹkiri kpọ Jehovah wo mọ mọ́ emi. Jehovah inyenrinmịnị Ọkpọnanaowei, ifiebosẹ baratụa ụ karịmịnị otubo pịrịmịnị. Wosẹ alaghatimi opu akpotu duosụọ mịnị, bịsẹbara kị paa kpọ, omịnị bẹtịbị fa, Jehovah wo mọ mọ́ timi mịnị. (Isa. 41:10) Anịduonị, pebidá wosẹ “ebibara boloukụrọtimi gbaa: ‘Jehovah kị baratụa ị pịrịmịnị owei; ịmịnị malafagha fa.’”—Heb. 13:5, 6.
DUMA 3 Our Strength, Our Hope, Our Confidence
