1. Mayak mahkak ni nga tim, Yehowa hpe matut nawku na matu hpa gaw karum ya ai kun?

 ANHTE asak hkrung nga ai aten hpe “yak la ai aten” ngu, Chyum Laika hta tsun da ai. (2 Tm 3:1) Dai zawn yak la ai aten hta masha yawng hkrum ai mayak mahkak ni sha n-ga, Yehowa hpe nawku ai majaw ninghkap ai lam, zingri zingrat ai lam ni hpe mung anhte hkrum ai. Mayak mahkak ni nga tim, Yehowa hpe matut nawku na matu hpa gaw karum ya ai kun? Yehowa gaw “a hkrung nga ai” Karai Kasang re ai hpe dum ai lam re.—Yer 10:10; 2 Tm 1:12.

2. Yehowa hte seng nna hpa hpe dum ai gaw hkamjan na matu n-gun lu shangun ai kun?

² Anhte hkrum ai mayak mahkak yawng hpe, Yehowa mu nna karum ya mayu ai. (2 Hl 16:9; Shk 23:4) Dai hpe dum ai gaw, kaning re ai mayak mahkak ni hkrum wa tim hkamjan lu na matu n-gun lu shangun ai. Dai hpe Dawi shi nan hkrum wa ai.

3. “Yehowa a hkrung nga ai” ngu Dawi tsun ai gaw hpa lachyum kun?

³ Dawi gaw Yehowa hpe chye ai. Shi hpe kamhpa ai. Hkawhkam Shawlu hte hpawn, hpyen ni hkan sat ai shaloi, karum shingtau lu na matu Yehowa kaw akyu hpyi ai. (Shk 18:6) Akyu hpyi ga hpe htai ya ai majaw, tinang hpe hkye la ai majaw, “Yehowa a hkrung nga ai” ngu ndau shana wa ai. (Shk 18:46) Dawi hpa hpe tsun mayu ai kun? Yehowa gaw “shi a mayam ni hpe, galoi mung karum ya ai a hkrung nga ai Karai re ai hpe madun ai re” ngu lakap da ai laika buk langai hta tsun ai. Teng ai. Tinang hkrum ai yawng hpe chye ai, karum ya na matu jin jin re ai, “a hkrung nga ai” Karai Kasang re ai lam, Dawi shi nan chye wa ai majaw, Yehowa hpe matut nawku  nna shakawn na ngu ai dawdan lam grau ngang kang wa ai.—Shk 18:28, 29, 49.

4. Yehowa gaw a hkrung nga ai Karai Kasang re ai hpe kam ai gaw hpa akyu lu shangun ai kun?

⁴ Yehowa gaw a hkrung nga ai Karai Kasang re ai hpe kam ai gaw, shi hpe myit rawt let nawku na matu karum ya ai. Mayak mahkak ni hpe hkamjan na matu n-gun lu shangun ai. Shi a magam hpe shakut nna matut gun hpai na matu shadut hkrum ai. Shi hte matut hku hkau hkra galaw na ngu ai dawdan lam hpe mung shangang ya ai.

A HKRUNG NGA AI KARAI GAW NANG HPE SHANGANG SHAKANG YA NA

5. Mayak mahkak hkrum ai aten hpa gaw kam ai myit nga shangun ai kun? (Hpilipi 4:13)

⁵ Yehowa gaw a hkrung nga ai, anhte hpe karum ya na matu jin jin rai nga ai hpe dum yang, mayak mahkak kaji kaba yawng hpe hkamjan lu na re. Chyahtum Chyalai N-gun Rawng Ai Karai Kasang n lu hparan ai manghkang ngu ai gaw n nga ai. Dai hta n-ga, anhte hkamjan lu na matu n-gun atsam mung jaw lu ai. (Hpilipi 4:13 hpe hti u.) Dai majaw, mayak mahkak ni hpe, kam ai myit hte hkamjan lu ai. Kaji ai mayak mahkak hkrum ai aten, Yehowa karum ya ai hpe tinang nan hkamsha wa ai rai yang, kaba ai mayak mahkak hkrum ai aten hta mung karum ya na hpe kam wa ai.

6. Ramma prat na gara mahkrum madup ni a majaw Yehowa hpe Dawi grau kam wa ai kun?

⁶ Ramma prat na mahkrum madup 2 a majaw, Yehowa hpe Dawi grau kam wa ai. Dawi gaw ramma prat hta, kawa a sagu ni hpe rem ya ra ai. Kalang mi hta, sagu langai hpe tsap sa dun mat ai. Hpang kalang gaw, sagu langai hpe hkanghkyi sa dun mat ai. Masa 2 yan hta nden marai hte hkan shachyut nna, sagu ni hpe hkye la wa ai. Tinang a majaw hkye la lu wa ai ngu Dawi n myit ai. Yehowa a majaw re ai hpe hkap la ai. (1 Sa 17:34-37) Ndai mahkrum madup ni hpe Dawi galoi mung n malap ai. Ayan bai myit ai. Asak hkrung nga ai Karai Kasang gaw, htawm hpang hta mung tinang hpe karum ya na, ngu ai hpe kam wa ai.

7. Dawi hpa hpe myit maju jung ai kun? Dai gaw Goliat hpe awng dang na matu gara hku karum ya ai kun?

⁷ Dawi gaw ramma prat daram hta, Israela hpyen dap kaw magam gun nga ai kahpu ni hpe sa jahkrum ai. Goliat ngu ai Hpilisti hpyen la langai gaw, “Israela hpyen laba ni hpe dakat nga” ai majaw, hpyen la ni hkrit gari nga ai hpe Dawi mu ai. (1 Sa 17:10, 11) Goliat a hkum grai galu kaba ai, dakat nga ai lam hpe sha myit maju jung ai majaw, hkrit gari nga ai re. (1 Sa 17:24, 25) Dawi a myit maju jung ai lam gaw hpyen la ni hte n bung ai. Israela hpyen dap hpe Goliat dakat ai gaw, “dinggrin a nga nga ai Karai Kasang a luksuk ni hpe roi” nga ai lam Dawi chye ai. (1 Sa 17:26) Ngut nna Yehowa a lam hpe myit dat ai. Sagu rem ai prat hta, tinang hpe karum ya ai Karai Kasang gaw, ndai masa hta mung karum ya na lam, kam mat ai. Karai Kasang a karum shingtau hte, Goliat hpe Dawi gasat awng dang lu wa ai.—1 Sa 17:45-51.

8. Mayak mahkak hkrum ai aten Yehowa karum ya na ngu ai hpe grau kam wa na matu hpa galaw mai ai kun? (Sumla hpe mung yu u.)

⁸ A hkrung nga ai Karai gaw anhte hpe karum ya na matu, jin jin rai nga ai hpe dum yang, mayak mahkak ni hpe awng dang let tawt lai lu na re. (Shk 118:6) Yehowa karum ya wa ai moi aten na lam ni hpe bai myit ai mung, kam ai myit grau jat wa shangun ai. Mayam ni hpe Yehowa hkye la wa ai lam, Chyum Laika labau ni hpe hti u. (Esa 37:17,  33-37) Ya aten hpunau nauna ni hpe Yehowa karum ya wa ai labau ni hpe, jw.org website hta hti u, yu u. Tinang hpe karum ya wa ai lam ni hpe mung bai myit yu u. Tsap hpyen, hkanghkyi hpyen kaw na makawp maga ya ai zawn re ai, mauhpa lam hte tinang hpe n hkye la ga ai ngu, hkamsha hkrup chye ai. Raitim, na matu Yehowa galaw ya wa ai ni grai law hkra nga ai. Shi a jinghku byin na matu lau la wa ai. (Yhn 6:44) Ya tengman ai lam hta nga nga ai mung, Yehowa karum ya ai majaw re. Kyu hpyi ga ni htai ya wa ai lam, ra ai aten ra kadawn ai lam ni hpe aten hkrak jaw wa ai lam, mayak mahkak hkrum ai aten madi shadaw ya wa ai lam ni hpe bai dum hkra karum ya na matu akyu hpyi u. Dai ni hpe dum yang, tinang hpe Yehowa matut nna karum ya na ngu ai hpe grau kam wa na re.

9. Mayak mahkak ni hkrum ai aten hta hpa hpe dum ra ai kun? (Ga Shagawp 27:11)

⁹ Yehowa gaw a hkrung nga ai lam chye da ai gaw, mayak mahkak ni hte seng nna jaw ai ningmu nga na matu karum ya ai. Mayak mahkak hkrum yang, Yehowa hpe anhte kau da na re ngu Satan tsun ai. Dai majaw, mayak mahkak hkrum ai aten tinang bai htang ai lam gaw, Yehowa hpe pyaw shangun lu ai zawn yawn shangun lu ai. (Yob 1:10, 11; Ga Shagawp 27:11 hpe hti u.) Mayak mahkak ni hkrum tim, Yehowa hpe matut sadi dung ai gaw, shi hpe tsawra ai lam madun ai re. Satan a ga shut ai hpe mung, sakse madun ai. Asuya a ninghkap ai lam, ja gumhpraw mayak mahkak ni hpe nang hkrum nga ai kun? Hkaw tsun bungli hta kabu gara shiga hpe masha ni myit n lawm ai kun? Shing nrai, kaga mayak mahkak ni nga ai kun? Rai yang, dai gaw Yehowa myit pyaw hkra galaw na matu ahkaw ahkang re ai hpe dum u. Nang n dang hkam ai mayak mahkak ni hkrum na matu, Yehowa ahkang jaw na n re ai hpe mung dum u. (1 Ko 10:13) Hkamjan lu ai atsam Yehowa jaw na re.

 A HKRUNG NGA AI KARAI KASANG GAW NANG HPE SHAMAN CHYEJU JAW NA

10. A hkrung nga ai Karai gaw shi hpe nawku ai ni a matu hpa galaw ya lu ai kun?

¹⁰ Yehowa gaw shi hpe nawku ai ni hpe, galoi mung shaman chyeju jaw ai. (Heb 11:6) Ya aten, simsa lam, myit dik lam jaw ai. Htawm hpang hta mung htani htana asak jaw na re. Shaman chyeju jaw mayu ai myit, jaw lu ai atsam Yehowa hta nga ai hpe anhte tsep kawp kam ai. Dai zawn kam ai gaw, moi aten na Yehowa a mayam ni zawn, Yehowa a matu dang lu ai made magam gun na matu shadut ya ai. Tsa ban langai na Timohti mung dai zawn shadut hkrum wa ai.—Heb 6:10-12.

11. Nawku hpung hta Timohti hpa majaw shakut nna magam gun ai kun? (1 Timohti 4:10)

¹¹ 1 Timohti 4:10 hpe hti u. Timohti gaw, a hkrung nga ai Karai Kasang shi hpe shaman chyeju jaw na hpe kam ai. Dai majaw, Yehowa hte kaga ni a matu, shakut nna magam gun ai. Hkaw tsun bungli hta, nawku hpung hta atsawm sharin ya chye ai wa byin na matu, Hkristan yawng a kasi ningli tai na matu, Timohti hpe Pawlu n-gun jaw ai. Yak ai lit nkau mi mung jaw ai. Dai hta, daru sharin ra ai ni hpe tsawra myit hte gwi gwi sharin ra ai lit lawm ai. (1 Tm 4:11-16; 2 Tm 4:1-5) Tinang shakut nna galaw ai lam ni hpe, masha ni n sadi hkrup ai raitim pyi, manu n shadan ai raitim pyi, Yehowa manu shadan ai hpe Timohti kam ai.—Rom 2:6, 7.

12. Nawku hpung hta myitsu salang ni hpa majaw myit masin mahkra hte magam gun ai kun? (Sumla hpe mung yu u.)

¹² Dai ni aten hta mung, myitsu salang ni shakut nna magam gun ai hpe Yehowa mu ai, manu shadan ai. Myitsu salang law law gaw, sagu kawan ai lam, sharin achyin ai lam, hkaw tsun ai lam, gawgap bungli, hkye mawai bungli ni hta karum ya nga ai. Nkau gaw, Machyi Masha Kawan Katsan Ai Hpung Ni,  Tsi Rung Matut Mahkai Komiti Ni hta magam gun ai. Masha a lamang n re ai sha, Karai a lamang re ai hpe chye da ai majaw, dai zawn myit masin mahkra hte magam gun nga ai re. Yehowa shaman chyeju jaw na hpe mung tsep kawp kam ai.—Kol 3:23, 24.

13. Yehowa gaw shi a magam hta dang lu ai made shang lawm ai hpe gara hku sawn la ai kun?

¹³ Anhte yawng gaw myitsu salang n mai byin ai. Raitim, Yehowa a matu sak jaw lu ai lam ni nga ai. Dang lu ai made magam gun ai hpe Yehowa manu shadan ai. Anhte hku nna grai law hkra n lu jaw ai raitim, mungkan grup alu shang lawm ai hpe sadi hkrup ai. Kaya chye tim, lata sharawt nna mahtai jaw ai hpe mu ai shaloi kabu ai. Kaga ni hpe mara raw ya ai hpe mu ai shaloi mung kabu ai. Yehowa a matu grai law hkra n lu galaw ya ai ngu hkamsha yang pyi, nang galaw lu ai hpe Yehowa manu shadan ai hpe kam u. Nang hpe tsawra ai, shaman chyeju jaw na ngu ai hpe kam u.—Luk 21:1-4.

A HKRUNG NGA AI KARAI KASANG HTE MATUT HKU HKAU NGA U

14. Yehowa hte hku hkau ai gaw sadi dung na matu gara hku karum ya ai kun? (Sumla hpe mung yu u.)

¹⁴ Yehowa hte hku hkau yang, shi hpe sadi dung na matu loi ai. Yosep a lam hpe myit yu u. Ngang akyang hten ai lam hpe ngang ngang kang kang nyet kau ai. Karai Kasang gaja wa nga ai hpe kam ai. Karai Kasang hpe myit n pyaw hkra n galaw mayu ai. (Nin 39:9) Anhte mung Karai Kasang hte hku hkau mayu yang, aten jaw nna kyu hpyi ra ai. Chyum Laika hkaja ra ai. Karai hte hku hkau ai rai yang, Yosep zawn, Karai Kasang myit n pyaw na lam hpa hpe mung galaw na n re.—Yak 4:8.

15. Nam mali hta byin wa ai Israela ni a mabyin kaw na hpa sharin la lu ai kun? (Hebre 3:12)

¹⁵ A hkrung nga ai Karai re ai hpe malap mat yang, shi hte aloi sha tsan mat chye ai. Israela ni nam mali hta hpa byin mat ai hpe myit yu u. Yehowa gaja wa nga ai hpe shanhte chye ai. Raitim, shanhte hpe gaja wa karum ya na kun? ngu, ntsen ai myit shang wa  ai. “Yehowa anhte hta nga nga ai kun, n nga nga ai kun” ngu nna pyi ga san san wa ai. (Pru 17:2, 7) Dai hpang, gumlau wa ai. Dai gaw sadi jaw ai lam re. N madat mara ai Israela ni hte anhte n bung mayu ai.—Hebre 3:12 hpe hti u.

16. Gara lam ni a majaw makam masham chyam dinglik hkrum chye ai kun?

¹⁶ Ndai mungkan gaw, Karai Kasang hte matut hku hkau yak hkra galaw nga ai. Karai Kasang nga ai lam hpe masha law malawng n kam ai. Masa law malawng hta Karai Kasang hpe n chye ai ni gaw, lusu nga ai zawn re. Dai hpe mu ai shaloi, anhte a makam masham chyam dinglik hkrum chye ai. Karai Kasang gaja wa nga ai hpe kam tim, tinang hpe karum ya na kun? ngu ntsen ai myit shang wa chye ai. Shakawn 73 hpe ka ai wa mung, dai zawn ntsen ai myit nga wa ai. Karai a tara ni hpe n hkan ai ni lusu nga ai hpe mu ai majaw re. Dai majaw, Karai a magam gun ai gaw akyu nga na kun? ngu myit wa ai.—Shk 73:11-13.

17. Yehowa hte matut hku hkau nga na matu hpa gaw karum ya na kun?

¹⁷ Shakawn kungdawn sara gaw, jaw ai ningmu nga na matu hpa galaw wa ai kun? Yehowa hpe malap mat ai ni hpa hkrum ai hpe bai myit ai. (Shk 73:18, 19, 27) Karai a magam gun nga ai ni hpa akyu lu ai hpe mung myit ai. (Shk 73:24) Anhte mung Yehowa a shaman chyeju ni hpe myit yu mai ai. Yehowa hpe she n nawku wa yang, nye prat gara hku rai nga na kun? ngu ai hpe shingran yu mai ai. Dai zawn shingran yu ai gaw, Yehowa hpe matut sadi dung hkra karum ya ai. “Karai Kasang kaw sit wa na, nye a ngamai shara rai nga ai” ngu shakawn kungdawn sara zawn lu tsun na re.—Shk 73:28.

18. Htawm hpang hpe hpa majaw n hkrit ra ai kun?

¹⁸ “A hkrung nga nna teng man ai Karai Kasang hpe daw jau nga” ai majaw, jahtum nhtoi ni laman gara zawn mayak mahkak mi hkrum tim tawt lai lu ai. (1 Ht 1:9) Anhte nawku ai Karai Kasang gaw anhte hpe galoi mung lanu lahku na, karum ya na re. Moi na mayam ni hte nga wa ai zawn, dai ni aten hta mung anhte hte rau nga nga ai. Kade n na yang mungkan hta kalang mung n byin ga ai ru tsang kaba byin sana re. Raitim, anhte langai hkrai sha n re, Yehowa anhte hte rau nga na re. (Esa 41:10) ‘Yehowa ngai hpe karum ai wa rai nga ai, Ngai hpa mung n hkrit nga nngai’ ngu gwi gwi tsun lu u ga.—Heb 13:5, 6.