1. Inki ke sadisaka bansadi ya Yehowa na kulanda kusambila yandi ata bo ke kutana ti bampasi?

 BIBLIA ke tuba nde beto ke zinga ‘na bantangu ya mpasi mpi ya nku.’ (2 Tim. 3:1) Katula bampasi yina bantu yonso ke kutana ti yo na nsi-ntoto yai ya Satana, bansadi ya Yehowa ke kutanaka ti bampasi ya nkaka sambu bantu ke teleminaka bo mpi ke niokulaka bo sambu bo ke sambilaka Yehowa. Inki ke sadisaka beto na kulanda kusambila Yehowa ata beto ke kutana ti bampasi yina? Kima ya mfunu yina ke sadisaka beto kele sambu beto me zaba nde, Yehowa kele “Nzambi ya moyo.”​—Yer. 10:10; 2 Tim. 1:12.

2. Inki mutindu Yehowa kele Nzambi ya moyo?

² Yehowa ke monaka bampasi yonso yina beto ke kutanaka ti yo mpi yandi ke zolaka kusadisa beto ntangu yonso. (2 Bans. 16:9; Nk. 23:4) Kana beto ke yibuka nde yandi kele Nzambi ya moyo, yo ta sadisa beto na kukanga ntima na konso mpasi yina beto ke kutana ti yo. Beto tala mutindu mambu yina ntotila Davidi kutanaka ti yo ke monisa nde yo kele mutindu yina.

3. Inki Davidi zolaka kutuba ntangu yandi tubaka nde “Yehowa kele na luzingu”?

³ Davidi zabaka Yehowa mpi yandi vandaka kutudila yandi ntima. Ntangu bambeni na yandi vandaka kulanda yandi, mu mbandu ntotila Saule, Davidi sambaka Yehowa sambu yandi sadisa yandi. (Nk. 18:6) Ntangu Yehowa pesaka mvutu na kisambu ya Davidi mpi gulusaka yandi, yandi tubaka nde: “Yehowa kele na luzingu!” (Nk. 18:46) Ntangu Davidi tubaka mambu yina, yandi vandaka kundima kaka ve nde Nzambi kele. Mukanda mosi ke monisa nde Davidi vandaka kumonisa nde yandi vandaka kundima kibeni nde Yehowa “kele Nzambi ya moyo yina ke sadisaka bansadi na yandi ntangu yonso.” Davidi zabaka nde Yehowa vandaka kuzaba mambu yina vandaka  kukumina yandi mpi yandi vandaka ya kuyilama na kusadisa yandi. Yo pesaka Davidi kikesa ya kulanda kusadila Yehowa mpi ya kukumisa yandi.​—Nk. 18:28, 29, 49.

4. Inki mambote beto ta baka kana beto ke ndima kibeni nde Yehowa kele na luzingu?

⁴ Kana beto ke ndima kibeni nde Yehowa kele na luzingu, yo ta sadisa beto na kusadila yandi na kikesa yonso. Yo ta pesa beto ngolo ya kukanga ntima na bampasi mpi yo ta pusa beto na kulanda kusala ngolo na kisalu na yandi. Diaka, beto ta landa kukangama ngolo ti yandi.

NZAMBI YA MOYO TA PESA NGE KIKESA

5. Inki lenda sadisa beto na kutudila Yehowa ntima ntangu beto ke kutana ti bampasi? (Bafilipi 4:13)

⁵ Kana beto ke yibuka nde Yehowa kele na luzingu mpi yandi kele ya kuyilama na kusadisa beto, yo ta sadisa beto na kukanga ntima na konso mpasi yina, yo vanda ya nene to ya fioti. Yandi ta sadisa beto na konso mpasi yina beto ke kutana ti yo sambu ata mpasi mosi ve me luta yandi na ngolo. Yandi kele Nkwa-Ngolo Yonso mpi yandi lenda pesa beto ngolo ya kukanga ntima. (Tanga Bafilipi 4:13.) Yo ke sadisa beto na kutudila yandi kibeni ntima ntangu beto ke kutana ti bampasi. Ntangu beto ke monaka mutindu Yehowa ke sadisaka beto ntangu beto ke kutanaka ti bampasi ya fioti, yo ke sadisaka beto na kundima kibeni nde yandi ta sadisa beto mpi kana beto me kutana ti bampasi ya ngolo.

6. Ntangu Davidi vandaka leke, nki mambu kuminaka yandi yina pusaka yandi na kutudila diaka Yehowa ntima mingi?

⁶ Beto tadila mambu zole yina Davidi kutanaka ti yo yina pusaka yandi na kutudila diaka Yehowa ntima mingi. Ntangu yandi vandaka leke mpi ngungudi, kilumbu mosi urse kangaka dimeme ya papa na yandi. Mpi kilumbu ya nkaka, ntambu kangaka mpi dimeme ya papa na yandi. Na mabaku yina yonso zole, Davidi landaka bambisi yina ti kikesa yonso mpi yandi gulusaka mameme yina. Kansi Davidi yindulaka ve nde yandi salaka mambu yina na ngolo na yandi mosi. Yandi zabaka nde Yehowa muntu pesaka yandi ngolo ya kusala yo. (1 Sam. 17:34-37) Davidi vilaka ve mambu yina ata fioti. Ntangu yandi vandaka kuyindula mambu yina, yandi ndimaka kibeni nde Nzambi ya moyo ta pesa yandi ngolo na bilumbu ke kwisa.

7. Davidi tulaka dikebi na nki mpi sambu na nki yo sadisaka yandi na kunwanisa Goliati?

⁷ Na nima, ntangu Davidi vandaka leke mpi yandi lungisaka ntete ve bamvula 20, yandi kwendaka kutala basoda ya Izraele na camp. Yandi bakisaka nde basoda ya Izraele vandaka kuwa boma mingi sambu Goliati, muntu mosi ya Filistia ya nda kibeni, kwisaka ‘kusosila ndonga ya bitumba ya Izraele.’ (1 Sam. 17:10, 11) Basoda yina waka boma mingi sambu bo tulaka dikebi na nda mpi na nene ya Goliati mpi na mambu yina yandi vandaka kusonga bo. (1 Sam. 17:24, 25) Kansi Davidi tulaka dikebi na kima ya nkaka. Yandi zabaka nde ntangu Goliati vandaka kuseka basoda ya Izraele, yandi vandaka kufinga “ndonga ya bitumba ya Nzambi ya moyo.” (1 Sam. 17:26) Yo yina, Davidi vandaka kuyindula Yehowa. Yandi ndimaka kibeni nde Nzambi yina sadisaka yandi ntangu yandi vandaka ngungudi, ta sadisa yandi diaka na diambu yina. Nzambi sadisaka yandi na kunwana ti Goliati mpi yandi nungaka.​—1 Sam. 17:45-51.

8. Inki ta sadisa beto na kundima kibeni nde Yehowa ta sadisa beto ntangu beto ke kutana ti bampasi? (Tala mpi kifwanisu ya ke wakana ti paragrafe yai.)

⁸ Beto mpi lenda kanga ntima na bampasi kana beto ke vila ve nde Nzambi ya moyo kele ya kuyilama na kusadisa beto. (Nk. 118:6) Beto ta ndima kibeni nde yandi ta sadisa beto kana beto ke yibuka mambu yina yandi me sadilaka beto na bilumbu me luta. Tanga masolo ya Biblia yina ta yibusa nge mutindu Yehowa gulusaka bansadi na yandi. (Yez. 37:17, 33-37) Tala mpi mambu yina kele na site Internet na beto jw.org yina ke monisa mutindu Yehowa me sadisaka bampangi na beto ya bilumbu yai. Diaka, yibuka bantangu yina Yehowa me sadisaka nge. Mbala ya nkaka nge ke yindula nde yandi me sadilaka nge ve kima mosi ya kuyituka bonso yina yandi sadilaka Davidi, mu  mbandu kunwana ti urse to ntambu. Kansi diambu ya kieleka kele nde Yehowa me sadilaka nge mambu mingi ya mbote na luzingu na nge. Yandi me bendaka nge na kuta kinduku ti yandi. (Yoa. 6:44) Diaka, kana nge ke landa kusadila yandi tii bubu yai, yo kele kaka sambu yandi ke sadisa nge. Nge lenda lomba yandi na kusadisa nge na kuyibuka bantangu yina yandi pesaka mvutu na bisambu na nge, ntangu yina yandi sadisaka nge ntangu nge vandaka ti mfunu ya lusadisu to ntangu yandi sadisaka nge na diambu mosi ya mpasi. Kana nge ke yindula mambu yina, yo ta sadisa nge na kundima kibeni nde Yehowa ta landa kusadisa nge.

9. Inki beto fwete yibuka ntangu beto ke kutana ti bampasi? (Bingana 27:11)

⁹ Kana beto ke zaba nde Yehowa kele na luzingu, yo ta sadisa beto na kudiyangisa ve ntangu beto ke kutana ti bampasi. Inki mutindu? Diabulu ke tubaka nde kana beto ke kutana ti bampasi, beto ta yambula Yehowa. Yo yina, mambu yina beto ta sala ntangu beto ke kutana ti bampasi ta sepedisa Yehowa to ta pesa yandi mpasi. (Yobi 1:10, 11; tanga Bingana 27:11.) Kana beto ke kanga ntima na bampasi yina beto ke kutana ti yo, beto ta monisa nde beto ke zolaka Yehowa mpi nde Diabulu kele luvunu. Keti bamfumu ya luyalu ke telemina Bambangi ya Yehowa kisika yina nge ke zingaka? Keti nge ke kutana ti mpasi ya mbongo? Keti bantu ke ndima ve nsangu ya mbote yina nge ke longa to keti nge ke kutana ti bampasi ya nkaka? Kana mpidina, kuvila ve nde mambu yina ke pesa nge dibaku ya kusepedisa Yehowa. Kuvila mpi ve nde yandi ta bika ve ata fioti nde nge kutana ti bampasi yina nge ta kuka ve kukangila ntima. (1 Bak. 10:13) Yandi ta pesa nge ngolo ya kukanga ntima.

NZAMBI YA MOYO TA SAKUMUNA NGE

10. Inki Nzambi ya moyo ta sala sambu na bantu yina ke sambilaka yandi?

¹⁰ Yehowa ke pesaka bantu yina ke sambilaka yandi matabisi. (Baeb. 11:6) Yandi ke pesaka beto ngemba mpi yandi ke sadisaka beto na kuvanda na kiese bubu yai. Diaka, na bilumbu ke kwisa yandi ta pesa beto luzingu ya mvula na mvula. Beto fwete tula kivuvu na Yehowa mpi beto fwete ndima kibeni nde yandi kele ti nzala mpi ngolo ya kusakumuna beto. Yo ke pusaka beto na kulanda  kudipesa na kusadila yandi mutindu bansadi na yandi ya ntangu ya ntama salaka. Timoteo salaka mpi mutindu yina.​—Baeb. 6:10-12.

11. Inki pusaka Timoteo na kusala ngolo na dibundu? (1 Timoteo 4:10)

¹¹ Tanga 1 Timoteo 4:10. Timoteo tulaka kivuvu na Nzambi ya moyo. Yo yina yandi salaka ngolo sambu na Yehowa mpi sambu na bantu ya nkaka. Inki yandi salaka? Ntumwa Polo songaka yandi na kukuma longi ya mbote na kisalu ya kulonga nsangu ya mbote mpi na dibundu. Ntumwa Polo songaka yandi mpi na kuvanda mbandu ya mbote sambu na bampangi-Bakristu ya baleke mpi ya bambuta. Bo pesaka yandi mpi mwa mikumba ya mpasi, mu mbandu kupesa bampangi bandongisila na pwelele yonso mpi na zola yonso. (1 Tim. 4:11-16; 2 Tim. 4:1-5) Bantangu ya nkaka, bantu ya nkaka vandaka ve kumona kisalu yina Timoteo vandaka kusala to bo vandaka ve kumonisila yandi ntonda, kansi yandi zabaka kibeni nde Yehowa ta futa yandi.​—Bar. 2:6, 7.

12. Sambu na nki bankuluntu ke kudipesaka na kulungisa mikumba na bo? (Tala mpi kifwanisu ya ke wakana ti paragrafe yai.)

¹² Bubu yai, bankuluntu mpi fwete ndima kibeni nde Yehowa ke monaka kisalu na bo ya mbote mpi yandi ke bakaka yo na valere. Katula kusala baviziti ya kingungudi, kulonga na dibundu mpi kulonga nsangu ya mbote, bankuluntu mingi ke pesaka maboko na bisalu ya kutunga bisika na beto ya lusambu mpi na kusadisa bampangi yina me bwila bisumbula. Bankaka ke salaka na Bimvuka ya Kutala Bambefu to na Bakomite ya Kuwakana ti Balupitalu. Bo ke kudipesaka na kusala mambu yina yonso sambu bo ke zaba nde dibundu kele ya Yehowa kansi ya muntu ve. Yo yina, bo ke kudipesaka na ntima ya mvimba na kulungisa mikumba na bo mpi bo ke ndimaka kibeni nde Yehowa ta sakumuna bo sambu na mambu yina bo ke sala.​—Bakol. 3:23, 24.

13. Inki mutindu Yehowa ke waka sambu na bikesa yina beto ke salaka na kisalu na yandi?

¹³ Bantu yonso ve lenda kuma bankuluntu. Kansi beto yonso lenda pesa Yehowa kima mosi. Nzambi na beto ke sepelaka mingi kana beto ke  sala bikesa ya kusadila yandi. Yandi ke monaka makabu yina beto ke pesaka sambu na kisalu ya ke salama na ntoto ya mvimba ata makabu yango kele fioti. Yandi ke sepelaka ntangu beto ke salaka bikesa ya kukatula nsoni mpi kunangula musapi sambu na kupesa mvutu na balukutakanu. Yandi ke sepelaka mpi ntangu beto ke lolulaka bantu yina me sala beto mbi. Ata nge ke yindula nde nge ta kuka ve kusala mingi sambu na Yehowa mutindu nge ke zola, ndima kibeni nde yandi ke bakaka na valere mambu yina nge ke sala sambu na yandi. Yandi ke zolaka nge sambu na mambu yina nge ke sala mpi yandi ta sakumuna nge.​—Luka 21:1-4.

LANDA KUKANGAMA TI NZAMBI YA MOYO

14. Inki mutindu kukangama na Yehowa ta sadisa beto na kulanda kusadila yandi na mutindu ya mbote? (Tala mpi kifwanisu ya ke wakana ti paragrafe yai.)

¹⁴ Kana beto kele ti kinduku ya mbote ti Yehowa, yo ta sadisa beto na kulanda kusadila yandi na mutindu ya mbote kukonda mpasi. Yozefi monisaka nde yo kele kieleka. Yandi buyaka ti kikesa yonso na kusala mansoni. Yandi vandaka ti kinduku ya ngolo ti Yehowa mpi yandi vandaka ve kuzola kusala kima yina ta sepedisa ve Yehowa. (Kuy. 39:9) Sambu beto kuma ti kinduku ya ngolo ti Yehowa, beto fwete baka ntangu ya kusamba yandi mpi ya kulonguka Ndinga na yandi. Kana beto sala mutindu yina, kinduku na beto ti yandi ta landa kuyela. Bonso Yozefi, kana beto kele ti kinduku ya ngolo ti Yehowa, beto ta sala ve kima yina ta sepedisa yandi ve.​—Yak. 4:8.

15. Inki dilongi beto ke baka na mambu yina kuminaka bantu ya Izraele na ntoto ya zelo na zelo? (Baebreo 3:12)

¹⁵ Bantu yina ke vilaka nde Yehowa kele Nzambi ya moyo, lenda yambula kusadila yandi na mutindu ya mbote kukonda mpasi. Beto tadila mambu yina kuminaka bantu ya Izraele ntangu bo vandaka na ntoto ya zelo na zelo. Bo zabaka nde Yehowa kele, kansi bo yantikaka kuyindula nde yandi ta lungisa ve bampusa na bo. Nkutu bo yulaka nde: “Keti Yehowa kele na kati na beto to ve?” (Kub. 17:2, 7) Yo yina bo lemfukilaka ve Nzambi. Ya kieleka, beto fwete landa ve mbandu na bo yina ya mbi.​—Tanga Baebreo 3:12.

16. Inki lenda meka lukwikilu na beto?

¹⁶ Yo lenda vanda mpasi na kukangama na Yehowa na nsi-ntoto yai ya mbi. Bantu mingi ke tubaka  nde Nzambi kele ve. Mbala mingi, yo ke monanaka bonso nde bantu yina ke zitisaka ve bansiku ya Nzambi ke vandaka ti luzingu ya mbote. Kana beto me mona mutindu yina, lukwikilu na beto lenda mekama. Ata beto ke ndimaka nde Nzambi kele, beto lenda yantika kudiyula kana yandi ta sadisa beto kibeni to ve. Muntu yina sonikaka Nkunga 73 vandaka kudiyula mpi mutindu yina. Yandi vandaka kumona mutindu bantu yina vandaka kuzitisa ve bansiku ya Nzambi vandaka ti luzingu ya mbote. Yo yina, yandi yantikaka kudiyula kana yo vandaka kibeni mfunu na kusadila Nzambi.​—Nk. 73:11-13.

17. Inki ta sadisa beto na kulanda kukangama na Yehowa?

¹⁷ Inki sadisaka muyimbi-bankunga yina na kusoba mabanza na yandi? Yandi yindulaka mambu yina ta kumina bantu yina ke vilaka Yehowa. (Nk. 73:18, 19, 27) Yandi yindulaka mpi mambote yina beto ke bakaka kana beto ke sadila Nzambi. (Nk. 73:24) Beto mpi lenda yindula mambu ya mbote yina Yehowa me sadilaka beto. Diaka, beto lenda yindula mutindu luzingu na beto zolaka kuvanda kana beto vandaka ve kusadila Yehowa. Kana beto sala mutindu yina, yo ta sadisa beto na kulanda kusadila Yehowa na mutindu ya mbote mpi na kutuba mambu yai ya muyimbi-bankunga tubaka: “Sambu na mono, kupusana pene-pene ya Nzambi kele mbote.”​—Nk. 73:28.

18. Sambu na nki beto fwete wa ve boma sambu na bilumbu ke kwisa?

¹⁸ Beto lenda kanga ntima na konso mpasi yina beto lenda kutana ti yo na bilumbu yai ya nsuka sambu beto ke “sadila Nzambi ya moyo mpi ya kieleka bonso bampika.” (1 Bate. 1:9) Nzambi na beto ke tudilaka beto dikebi mpi yandi ta sadisa beto ntangu yonso. Yandi sadisaka bansadi na yandi ya ntangu ya ntama mpi yandi ta sadisa beto bubu yai. Kubika fioti, beto ta kutana ti mpasi ya kuluta nene yina ta salama na ntoto. Kansi beto ta vanda ve beto mosi, Yehowa ta vanda ti beto. (Yez. 41:10) Yo yina, beto yonso fwete “vanda ti kikesa mingi mpi kutuba nde: ‘Yehowa kele nsadisi na mono; mono ta wa boma ve.’”​—Baeb. 13:5, 6.