OMWATSI W’ERIGHA 25
OLHWIMBO 7 Yehova Ni Kaghalha Kethu
Ibuka Ngoku Yehova Ni “Nyamuhanga Oyuliho”
“Omwami Mukulhu aneho!”—ESY. 18:46.
EKIGHENDERERWA
Thukaghasirawa kutsibu thwamibuka ngoku Nyamuhanga oyo thukaramaya ni “Nyamuhanga oyuliho.”
1. Ni kyahi ekikawathikaya abandu ba Yehova erilholha embere erimuramya nomubakanabana ebitsibu?
“EMIGHULHU eyikalire”—e Biblia ku yikabugha yithya okwa biro ebya thulimo. (2 Tim. 3:1) Eryongera okwa bindi bitsibu ebya obuli mughuma akabana omwa mughulhu mubi ono, abandu ba Yehova batholere ibaghumira erihakanisibwa n’eriendereribwa. Ni kyahi ekikathuwathikaya erilholha embere eriramya Yehova nomwakine indi thunemubana ebitsibu ebi? Ekindu kikulhu kutsibu kiri kithi thwabiriminya Yehova nga “Nyamuhanga oyuliho.”—Yer. 10:10; 2 Tim. 1:12.
2. Ni kyahi ekikaleka Yehova iniabya Nyamuhanga oyuliho?
2 Yehova ni Mundu oyukathutheghaya omughulhu thukalengawako kandi akasondekanaya ehighisa ehy’erithuwathikya. (2 Emy. 16:9; Esy. 23:4) Erimulhangira nga Nyamuhanga oyuliho kyangana thuwathikya erithoka erighumira ekitsibu kyosi-kyosi ekikathwasira. Thulebaye ngoku ekyo kyabya okwa Mwami Dawudi.
3. Dawudi amanyisayaki akabugha athi “Yehova ni Nyamuhanga oyuliho”?
3 Dawudi abya asi Yehova kandi iniakamuyikethera. Omughulhu esyonzighu siwe syabya sikamuhigha-highania, imwamune Omwami Saulo, Dawudi mwasaba Yehova y’obuwathikya. (Esy. 18:6) Nyamuhanga abere abirisubirya omusabe wiwe n’erimulhamya, Dawudi mwabugha athi: “Omwami Mukulhu aneho!” (Esy. 18:46) Ebinywe ebi, sibiri kwama ky’akangania bithi Dawudi abya inianasi ngoku Nyamuhanga aneho. Ekitabu kighuma kikabugha kithi abya akakangania kw’ayikethere Yehova nga “Nyamuhanga oyukawathikaya abandu biwe mughulhu wosi.” Ni kwenene, busana n’ebyo abya iniabirilhabamo, Dawudi abya inianasi ngoku Nyamuhanga wiwe aliho, kandi erikakasya eryo mulyaleka iniathasyakolera Yehova n’erimupipa.—Esy. 18:28, 29, 49.
4. Thukaghasirawa thuthi omw’ilhangira Yehova nga Nyamuhanga oyuliho?
4 Ithwe eribya ithunakakasirye ngoku Yehova ni Nyamuhanga oyuliho kyangana thuwathikya erimukolera n’omuhwa. Eki ikikendi leka ithwabya n’akaghalha k’eriyiyinirya ebitsibu n’omuhwa w’erilholha embere erikolha kutsibu omwa mubiiri wiwe. Kandi ithukendi thwamu eribya ithune bughuma na Yehova.
NYAMUHANGA OYULIHO AKENDI KUGHUMYA
5. Ni kyahi ekyangaleka ithwasika thukabana ebitsibu? (Abanya Filipi 2:13)
5 Thukendi thoka eriyiyinirya ebitsibu ebinene-binene n’ebike-bike, thwamibuka ngoku Yehova aneho kandi ngoku akendi thoka erithutheya. Kandi ekyo kine aho, Nyamuhanga angana thw’iha omwa kitsibu kyosi-kyosi, kundi sihali ekitsibu ekyanga mulema erighunzaho. Iyo ni Muthoki w’Ebyosi, kandi angana thuha amaaka w’eribighumira. (Soma Abanya Filipi 2:13.) Busana n’ekyo, thuwithe enzumwa mbuya eyangaleka ithwaghumira ebitsibu byethu ithunasikire. Eriyilhangirira obuwathikya bwa Yehova thukabana ebitsibu ebike-bike kikathukakasaya ngoku akendi thuwathikya thukabana n’ebitsibu ebinene-binene.
6. Ni byahi ebyo Dawudi alhabamu iniakine mulhwana ebyaleka iniongera eriyikethera Yehova?
6 Thalengekania okwa bibiri by’okwa ebyo Dawudi alhabamu ebyaleka iniongera eriyikethera Yehova. Dawudi iniakine mulhwana, edubu n’endale obuli nguma muyaheka enguma y’okwa syombuli sya thatha wiwe inianemulisya. Engendo syosi ibiri, omwa buthubaha Dawudi mwathibitha okwa bisoro ebyo n’erilhamya esyombuli. Aliwe, Dawudi mwathalengekania athi amasingura ahabwiwe. Mwaminya ngoku Yehova yuwamuwathikaya. (1 Sam. 17:34-37) Dawudi mwath’ibirirwa ebyo alhabamu ebyo. Omw’ibighaniryako, Dawudi mwayikethera ngoku Nyamuhanga oyuliho angamughumirye n’omwa buthuku obukasa.
7. Eribya namalengekania awuwene mukyawathikya kithi Dawudi eriyalhwa na Goliata?
7 Enyuma waho, obundi iniakine mulengwa, Dawudi mwaya omwa kilhaliriro ky’amahe w’Abaisraeli. Mweya abasirikali ibabiryubaha busana n’Omufilisitini w’akaghalha oyukahulhawamo Goliata oyuwasa ‘ery’ohya emilhondo ya Israeli.’ (1 Sam. 17:10, 11) Eryubaha ly’abasirikali lyabya busana n’erihwerya amalengekania okwa mundu oyuwithe akaghalha oyu n’erisekererya erya bowa ibane ahabya amalhwa. (1 Sam. 17:24, 25) Aliwe Dawudi iyo mwahwerya amalengekania w’okwa kindi kindu. Mwathalhangira ekyamabya mwa kitsibu okwa mahe w’Abaisraeli basa, aliwe ng’ekitsibu okwa “emilhondo ya Nyamuhanga oyuliho.” (1 Sam. 17:26) Yehova yuwabya embere-mbere omwa bulengekania bwa Dawudi. Dawudi mwayikethera ngoku Nyamuhanga oyuwamuwathikaya iniakine mulisya, akendi muwathikya n’omwa mibere eyi. Busana n’eriyikethera eryo, Dawudi mwayalhwa na Goliati, kandi mwasingura!—1 Sam. 17:45-51.
8. Thwanga ghumya thuthi eriyikethera lyethu omu Yehova omughulhu thukabana ebitsibu? (Lebaya n’ekisasani.)
8 Nethu thwangana thoka erighumira ebitsibu thwamibuka ngoku Nyamuhanga oyuliho anayitheghekire erithuwathikya. (Esy. 118:6) Thwangana ghumya eriyikethera lyethu omw’ekyo omw’ilengekania okwa by’abirithakolha. Soma emyatsi ye Biblia eyikakw’ibukaya ngoku Yehova alhamaya abaramya biwe. (Isa. 37:17, 33-37) Kandi, lebaya kutse erisoma esyoripoti okwa muthahulha wethu we jw.org esikakanganaya ngoku Yehova anemuwathikya balikyethu munabwire. Eryongera okw’ekyo, ibuka emighulhu Yehova akuwathikirayamu. Wamabya isiwang’ibuka ekyo Yehova akulhabayamo ekikalire kutsibu ekyanga sosekanibwa n’erilhwa n’edubu kutse endale, isiwahwa amani. Busana naki? Omo kwenene, hane bingyi ebyo Yehova abirikukolera! Abirikuyira mo munywani wiwe. (Yn 6:44) Nibya na lino, busana n’obuwathikya bwiwe wukinamukolera. Busana naki iwuthamusaba wuthi akuwathikaye eryibuka omughulhu asubiraya emisabe yawu, omughulhu akuwathikaya okwa buthuku obutholere, kutse erikuwathikya erilhaba omwa kitsibu ekikalire? Erilengekania okwa byalholirweko ng’ebyo kikendi ghumya eriyikethera lyawu ngoku Yehova akendi lholha embere erikuwathikya.
Ithwe erilhaba omwa bitsibu ni kitsweka ky’okwa mwatsi mukulhu (Lebaya enungu 8-9)
9. Thutholere ithwathunga malengekaniaki okwa bitsibu byethu? (Emisyo 27:11)
9 Erilhangira Yehova ng’omundu oyuliho kikendi leka ithwathunga amalengekania awatholere okwa bitsibu byethu. Thuthi? Thukatsuka erilhangira ebitsibu byethu ng’ekitsweka ky’omwatsi mukulhu owali ahakathi-kathi ka Yehova na Sitani. Diabolo akabugha athi thwamaghalhwa, ithukendi sighania Yehova. (Yobu 1:10, 11; Soma Emisyo 27:11.) Aliwe thukabya thukathoka erighumira ebitsibu byethu, thukakanganaya ku thwanzire Yehova kandi ithwakangania ngoku Diabolo ni mubehi. Mbwino wunemuhakanisibwa n’egavumente, eribya omwa bunakwa, abandu erithendi hulikirira omw’ithulira, kutse ebindi bitsibu? Kyamabya ikwakiri kithya, wibuke ngoku emibere eyo wulimo yikakuha akaghisa ak’eritsemesya Yehova. Kandi wibuke ngoku, syanga ligha wukahikwako ekitsibu ekya wuthe wangathoka erighumira. (1 Kor. 10:13) Akendi kuha akaghalha k’eriyiyinia.
NYAMUHANGA OYULIHO AKENDI KUHEMBA
10. Ni kyahi ekya Nyamuhanga oyuliho akendi syakolera abaramya biwe?
10 Yehova akahemba abakamuramaya. (Ebr. 11:6) Lino akathuha obuholho n’etseme kandi akendi syathuha engebe y’erikotha omwa buthuku obukasa. Thwangana yikethera Yehova ithunakakasirye ngoku anawithe eriyisunza n’amaaka w’erithuhemba. Erikakasya eryo likaleka ithwabya ithune bbize omw’iramya lyethu, ngoku abaghombe abatheleghulha ba Nyamuhanga abakera bakolha. Ekyo kya Timoteo akolha omwa kighana eky’erimbere.—Ebr. 6:10-12.
11. Ni kyahi ekyahira omu Timoteo mw’omuhwa ow’erikolha kutsibu omwa kithunga? (1 Timoteo 4:10)
11 Soma 1 Timoteo 4:10. Timoteo mwayikethera Nyamuhanga oyuliho. Busana n’ekyo, aby’awithe enzumwa mbuya eyangaleka iniakolha kutsibu n’erihiraho akaghalha kanene. Omwa nziraki? Omukwenda Paulo mwamuhira mw’omuhwa ow’erikulha-kulhana ng’omukangirirya kandi mbuyi. Kandi Timoteo abya w’erihiriraho abikirirya balikyabo, abalere n’abakulhu, eky’erileberyako ekyuwene. Kandi mwahebwa emibiiri eyikalire, imwamuli eriha erihabulha erikalire okwa bakaliyithagha aliwe omwa lhwanzo. (1 Tim. 4:11-16; 2 Tim. 4:1-5) Timoteo abya inianasi ngoku Yehova akendisya muhemba nomwakine indi ihakanayira emibiiri yiwe iyaghana erilhangirwa, kutse abandi ibaghana erisimayo.—Abar. 2:6, 7.
12. Ni kyahi ekyanga hira omwa basyakulhu mw’omuhwa ow’erikolha bingyi omwa mubiiri wabu? (Lebaya n’ekisasani.)
12 Munabwire, abasyakulhu nabu batholere ibaminya ngoku Yehova akalhangira kandi akasima omubiiri wabu. Eryongera okw’ibungira balikyethu, erikangirirya, erithulira, abasyakulhu bangyi bakawathikaya okwa by’obuhimbe bw’ekiteokrasi n’ahakabya ebitsinduli. Abandi bali okwa hithunga Ehikabungira Abalhwere kutse Ehikakolongana n’Amathambiriro. Abasyakulhu abakabya ibanayitheghekire erikolha emibiiri eyi bakalhangira ekithunga ng’endegheka ya Yehova, butsira ng’ekithunga eky’omundu. Busana n’ekyo, bakaberereraya esyongwamirwa syabu n’omuhwa kandi bayikethere ngoku Nyamuhanga akendi syabahemba busana n’ebyo bakakolha.—Kol. 3:23, 24.
Nyamuhanga oyuliho akendi kuhemba wukakolera ekithunga kya kutsibu (Lebaya enungu 12-13)
13. Yehova akayowa athi okwa kaghalha ak’obuli mundu akahiraho omwa mubiiri wiwe?
13 Ithwe bosi sithwangabya basyakulhu. Aliwe ithwe bosi thunawithe ekya thwangaha Yehova. Nyamuhanga wethu akasima thukalengaho erimukolera. Akalhangira ebya thukakolha omwa mubiiri w’ekihugho kyosi, nomuthwangabya isithwangathoka erihayo bingyi. Akatsema thukalengaho erisingura esisoni n’erisumba ebyalha nuku thusubiraye okwa muhindano, kandi akatsema thukakyurukya ebisobyo by’ameso n’erighanyira. Nibya nomuwanga yowa isiwanga kolha bingyi ngoku ku wanzire, yikethere ngoku Yehova akasima ebya wanga kolha. Bikaleka iniakwanza kandi akendi syakuhemba.—Lk 21:1-4.
SIGHALHA IWUNE BUGHUMA NA NYAMUHANGA OYULIHO
14. Erisighalha ithune bughuma na Yehova likathuwathikaya lithi erisighalha ithune bathaleghulha? (Lebaya n’ekisasani.)
14 Yehova amabya iniane munywani wethu, ikikendi thw’olhobera erisighalha bathaleghulha okw’iyo. Ekyo ky’ekyahika oku Yozefu. Inianasikire mwaghana erikolha obusingiri. Nyamuhanga abya munywani wiwe kandi syabya anzire akamuponesya. (Enz. 39:9) Yehova eribya munywani wethu, thutholere ithwathunga endambi y’erisaba n’eriyeghesya Ekinywe kiwe. Neryo obughuma bwethu nayu ibukendi y’ongera. Nga Yozefu, thwamathunga obughuma obwa hakuhi na Yehova, isithwendi kolha ekyosi-kyosi ekyanga muponesya.—Yak. 4:8.
Eriyithunda hakuhi na Nyamuhanga oyuliho kikendi kuwathikya erisighalha muthaleghulha (Lebaya enungu 14-15)
15. N’isomo lyahi erya thwang’ighira okwa kyahika okwa Baisraeli ibane omwa mbwarara? (Abaebrania 3:12)
15 Abak’ibirirawa ngoku Yehova ni Nyamuhanga oyuliho kyangana bolhobera erimusighania. Thalengekania okwa kyahika okwa Baisraeli omughulhu babya omwa mbwarara. Babya ibanasi ngoku Yehova aneho, aliwe mubatsuka erithika-thika ng’anemwendi baha ebiyithawa byabu. Nibya mubabulya bathi: “Omwami Mukulhu ali haghuma nethu kutse eyihi kwehi?” (Eri. 17:2, 7) N’enyuma waho, mubayisamambulha oku Nyamuhanga. Omo kwenene, thwanzire ithwayihighulha okwa buthowa bwabu, obwabiribya eky’erileberyako ekikathukunga.—Soma Abaebrania 3:12.
16. Ni kyahi ekyanga lenga okw’ikirirya lyethu?
16 Ekihugho kikaleka ikyakalha erisighalha ithune bughuma na Yehova. Abanene bakaghana eky’eribugha indi Nyamuhanga aneho. Mughulhu mungyi, kikalhangirika ngoku abakaghana ebya Yehova akabayithaghako bakabya nga bali omwa ngebe eyuwene. Thukabya thukalhangira eki kikabya, erikirirya lyethu lyangana lengwako. Nomuthwangabya isithwanga ghania eky’eribya Nyamuhanga inianeho, ithwangana tsuka erithika-thika ng’anemwendi thuwathikya. Omuhandiki we Esyonyimbo 73 mwayisanga iniabiriyowa athya ahabw’obuthuku. Mwalhangira abamuthimbireko ibanemugheghena ebihano bya Nyamuhanga aliwe ibane mutsemera engebe. Busana n’ekyo, mwatsuka eriyibulya nga kinahikire erikolera Nyamuhanga.—Esy. 73:11-13.
17. Ni kyahi ekyanga thuwathikya erisighalha ithune bughuma na Yehova?
17 Ni kyahi ekyawathikaya omuhandiki w’esyonyimbo erihengulha amalengekania wiwe? Mwaghanirya okwa kyangabya okw’abo abak’ibirirawa Yehova. (Esy. 73:18, 19, 27) Kandi mwalengekania okwa mighisa eyanga lhwiririra omw’ikolera Nyamuhanga. (Esy. 73:24) Nethu thwangana lengekania okwa mighisa eya Yehova abirithuha. Linganisaya ekyo n’engebe yethu nga yangabere yithi ku thwabya isithuli kolera Yehova. Erikolha ekyo kyangana thuwathikya erisighalha bathaleghulha n’eribugha ng’omuhandiki w’esyonyimbo thuthi: “Nikwa ingye, ni kibuya eribya hakuhi na Nyamuhanga!”—Esy. 73:28.
18. Busana naki thutholere ithwalindirira obuthuku obukasa ithunasikire?
18 Thwangana ghumira ekitsibu ekyosi-kyosi ekyo thukabana omwa biro by’enyuma-nyuma bino kundi thukakolera “Nyamuhanga w’okwenene, oyuliho.” (1 Tes. 1:9) Nyamuhanga wethu ni Mundu oyukawathikaya abakamuramaya. Mwakangania ngoku ali bughuma n’abaghombe biwe abakera, kandi ane nethu munabwire. Thukisiya ithwalhaba omwa bulighe bunene obukendibya okwa kihugho. Aliwe sithwendi bulhabamo ahabwethu. (Isa. 41:10) Ithwe bosi thubye n’obuthubaha n’eribugha thuthi: ‘Yehova ni muwathikya waghe, sinendi syubaha!’—Ebr. 13:5, 6.
OLHWIMBO 3 Amaha, Amaaka, n’Erisika Lyethu
