1. Wetin de ɛp Jiova in pipul dɛn fɔ kɔntinyu fɔ wɔship am pan ɔl we dɛn de gɛt prɔblɛm dɛn?

 DI BAYBUL tɔk se wi de na tɛm we “tin . . . tranga ɛn bad.” (2 Tim. 3:1) Apat frɔm di prɔblɛm dɛn we de mit ɔlman insay dis wɔl, pipul dɛn de agens Jiova in savant dɛn ɛn dɛn de mek dɛn sɔfa. Wetin de ɛp wi fɔ kɔntinyu fɔ wɔship Jiova pan ɔl we wi de gɛt dɛn prɔblɛm dɛn ya? Wan men tin we de ɛp wi na we wi no se Jiova na “Gɔd we de alayv.”​—Jɛr. 10:10; 2 Tim. 1:12.

2. Wetin wi no bɔt Jiova we de ɛp wi fɔ gɛt trɛnk?

² Jiova na rial Pɔsin we de ɛp wi di tɛm we wi gɛt prɔblɛm dɛn ɛn i de luk fɔ we dɛn fɔ sɔpɔt wi. (2 Kro. 16:9; Sam 23:4) We wi si am as Gɔd we de alayv, dat de ɛp wi fɔ bia ɛni prɔblɛm we de mit wi. Lɛ wi tɔk bɔt aw dat bin ɛp Kiŋ Devid.

3. Wetin Devid bin min we i tɔk se “Jiova de alayv”?

³ Devid bin sabi Jiova ɛn i bin abop pan Am. We Kiŋ Sɔl ɛn ɔda pipul dɛn bin de tray fɔ kil Devid, i bin pre to Jiova fɔ ɛp am. (Sam 18:6) Afta Gɔd ansa Devid in prea ɛn sev am, i bin tɔk se: “Jiova de alayv!” (Sam 18:46) Dɛn wɔd dɛn ya we Devid tɔk sho se i nɔ bin jɔs biliv se Gɔd de. Wan rɛfrɛns tɔk se Devid bin de sho di kɔnfidɛns we i gɛt pan Jiova “as gɔd we de alayv we rɛdi fɔ sev in pipul dɛn ɔltɛm.” Fɔ tru, Devid bin no  se in Gɔd de alayv frɔm di tin dɛn we bin apin to am ɛn dat bin mek i mekɔp in maynd fɔ sav ɛn prez Jiova.​—Sam 18:​28, 29, 49.

4. We wi de si Jiova as Gɔd we de alayv, aw dat de bɛnifit wi?

⁴ We wi biliv tranga wan se Jiova na Gɔd we de alayv, dat de ɛp wi fɔ sav am wit zil. I de gi wi trɛnk fɔ bia prɔblɛm dɛn ɛn mek wi kɔntinyu fɔ wok tranga wan fɔ am. I de ɛp wi bak fɔ mekɔp wi maynd fɔ kɔntinyu fɔ de nia Jiova.

DI GƆD WE DE ALAYV GO GI YU TRƐNK

5. Wetin go mek wi gɛt kɔnfidɛns we wi gɛt prɔblɛm dɛn? (Filipians 4:13)

⁵ If wi mɛmba se Jiova de alayv ɛn i rɛdi fɔ ɛp wi ɔltɛm, dat go mek wi ebul bia ɛni prɔblɛm, ilɛk i big ɔ smɔl. Afta ɔl, no prɔblɛm nɔ de we i nɔ go ebul sɔlv. Na in na di Ɔlmayti, ɛn i go gi wi di trɛnk we wi nid fɔ bia. (Rid Filipians 4:13.) So dis de mek wi gɛt kɔnfidɛns we prɔblɛm dɛn mit wi. We wi si aw Jiova de sɔpɔt wi we wi gɛt smɔl prɔblɛm, dat go ɛp wi fɔ biliv se i go ɛp wi bak we wi gɛt big prɔblɛm dɛn.

6. Wetin bin apin to Devid we i bin yɔŋ we bin mek i gɛt kɔnfidɛns pan Jiova mɔ ɛn mɔ?

⁶ Lɛ wi tɔk bɔt tu tin dɛn we bin apin to Devid we bin mek i gɛt kɔnfidɛns pan Jiova mɔ ɛn mɔ. We Devid na bin shɛpad di tɛm we i bin yɔŋ, wan bia ɛn wan layɔn bin kech in papa in ship dɛn. Ɔltu dɛn tɛm dɛn de, Devid bin gɛt maynd fɔ rɔnata di animal dɛn ɛn sev di ship dɛn. Bɔt i nɔ bin tek di prez fɔ wetin i du. I bin no se na Jiova ɛp am. (1 Sam. 17:​34-37) Devid nɔ bin ɛva fɔgɛt dɛn tin dɛn de we bin apin. We i bin de tink gud gud wan bɔt dɛn, dat bin ɛp am fɔ gɛt kɔnfidɛns se Gɔd we de alayv go ɛp am tumara bambay.

7. We Devid bin de si tin di rayt we, aw dat bin ɛp am fɔ fɛt Golaya?

⁷ Leta, we Devid na bin stil tineja, i bin go waka na di Izrɛlayt sojaman dɛn kamp. I bin si se di sojaman dɛn bin de rili fred bikɔs wan Filistin jayant we nem Golaya bin de “chalenj di Izrɛlayt fɛtman dɛn.” (1 Sam. 17:​10, 11) Di sojaman dɛn bin de fred bikɔs dɛn bin de pe atɛnshɔn pan di jayant ɛn di chalenj we i bin de chalenj dɛn. (1 Sam. 17:​24, 25) Bɔt Devid bin de si tin difrɛn we. I nɔ bin jɔs si wetin de apin as chalenj agens di Izrɛlayt sojaman dɛn, bɔt i bin si am as chalenj agens “di Gɔd we de alayv.” (1 Sam. 17:26) Devid bin de tink bɔt Jiova. I bin biliv se di Gɔd we bin ɛp am we in na bin shɛpad go ɛp am bak fɔ fɛt dis jayant. Bikɔs Devid bin shɔ se Gɔd go ɛp am, i bin fɛt Golaya ɛn i bin win!—1 Sam. 17:​45-51.

8. Aw wi go kɔntinyu fɔ tink bɔt Jiova we wi gɛt prɔblɛm dɛn? (Luk bak di pikchɔ.)

⁸ Wisɛf go ebul bia prɔblɛm dɛn if wi mɛmba se Gɔd we de alayv rɛdi fɔ ɛp wi. (Sam 118:6) Wi go ebul gɛt kɔnfidɛns se Jiova go ɛp wi we wi tink bɔt wetin i bin dɔn du fɔ wi trade. Rid bɔt Baybul akawnt dɛn we go mɛmba yu bɔt aw Jiova bin sev in savant dɛn trade. (Ayz. 37:​17, 33-37) Ɛn yu kin rid ɛn wach bak ripɔt dɛn na wi jw.org wɛbsayt we de sho aw Jiova dɔn sɔpɔt wi brɔda ɛn sista dɛn insay wi yon tɛm. Dɔn bak, tink bɔt tɛm dɛn we Jiova dɔn ɛp yu. Nɔ wɔri if yu nɔ ebul mɛmba ɛni big tin we Jiova dɔn du fɔ ɛp yu we yu  go kɔmpia to we i de sev yu frɔm bia ɔ layɔn. Wetin mek? Di tru na dat, Jiova dɔn du bɔku tin dɛn fɔ yu! I dɔn mek yu gɛt tayt padi biznɛs wit am. (Jɔn 6:44) Ivin rayt naw, di rizin we mek yu stil de sav am na bikɔs i de ɛp yu. Wetin mek yu nɔ go aks am fɔ ɛp yu fɔ mɛmba tɛm dɛn we i bin ansa yu prea dɛn, gi yu di sɔpɔt we yu bin nid di rayt tɛm, ɔ ɛp yu we yu bin gɛt prɔblɛm we nɔ bin izi? We yu de tink bɔt dɛn tin dɛn de, i go ɛp yu fɔ biliv tranga wan se Jiova go kɔntinyu fɔ ɛp yu.

9. Aw wi fɔ si wi prɔblɛm dɛn? (Prɔvabs 27:11)

⁹ We wi de si Jiova as Pɔsin we de alayv, dat de ɛp wi fɔ si wi prɔblɛm dɛn di rayt we. Aw? Wi go bigin fɔ si wi prɔblɛm dɛn as chans fɔ sho if wi de sɔpɔt Jiova ɔ Setan. Setan dɔn tɔk se we wi gɛt prɔblɛm, wi go tɔn wi bak pan Jiova. (Job 1:​10, 11; rid Prɔvabs 27:11.) Bɔt we wi kɔntinyu fɔ de biɛn Jiova pan ɔl we wi gɛt prɔblɛm dɛn, wi de sho se wi lɛk Jiova ɛn pruv se Setan na layman. Yu de na kɔntri usay di gɔvmɛnt de agens Jiova Witnɛs dɛn, yu gɛt mɔni prɔblɛm, pipul dɛn de tɔk bad tin bɔt di prichin wok we yu de du, ɔ yu gɛt ɔda prɔblɛm dɛn? If na so i bi, mɛmba se di prɔblɛm we yu gɛt de gi yu chans fɔ mek Jiova gladi. Mɛmba bak se, i nɔ go alaw sɔntin fɔ tɛst yu we yu nɔ go ebul fɔ bia. (1 Kɔr. 10:13) I go gi yu di trɛnk we yu nid fɔ bia.

DI GƆD WE DE ALAYV GO PE YU

10. Wetin di Gɔd we de alayv go du fɔ di wan dɛn we de wɔship am?

¹⁰ Na Jiova de pe di wan dɛn we de wɔship am. (Ibru. 11:6) I de gi wi pis ɛn satisfay maynd naw ɛn i go gi wi layf we go de sote go tumara bambay. Wi kin abop pan Jiova ɛn biliv tranga wan se i want fɔ pe wi ɛn i gɛt di pawa fɔ du dat. So na dat mek wi de kɔntinyu fɔ gi  wi bɛst we wi de wɔship am jɔs lɛk aw in savant dɛn bin de du trade. Na dat Timoti we bin de insay di fɔstɛm Kristian dɛn tɛm bin du.​—Ibru. 6:​10-12.

11. Wetin mek Timoti bin de wok tranga wan na di kɔngrigeshɔn? (1 Timoti 4:10)

¹¹ Rid 1 Timoti 4:10. Timoti bin abop pan di Gɔd we de alayv. So, i bin gɛt gud rizin fɔ wok tranga wan fɔ Jiova ɛn ɔda pipul dɛn. Wetin i bin du? Apɔsul Pɔl bin ɛnkɔrej am fɔ sabi prich ɛn tich gud gud wan. Pɔl bin tɛl Timoti bak fɔ sɛt fayn ɛgzampul fɔ in kɔmpin Kristian dɛn ilɛk dɛn yɔŋ ɔ ol. Ɛn dɛn bin gi am sɔm wok dɛn we nɔ bin izi fɔ du, lɛk fɔ gi strɔng advays to di wan dɛn we nid am di kayn we we de sho se i lɛk dɛn. (1 Tim. 4:​11-16; 2 Tim. 4:​1-5) Timoti bin shɔ se ivin if sɔntɛnde, dɛn nɔ de si di wok we i de du ɔ dɛn nɔ gladi fɔ di wok we i de du, Jiova go pe am.​—Rom. 2:​6, 7.

12. Wetin mek ɛlda dɛn de kɔntinyu fɔ wok tranga wan na di kɔngrigeshɔn? (Luk bak di pikchɔ.)

¹² Ɛlda dɛn bak tide biliv se Jiova de si ɛn valyu di gud wok we dɛn de du. Apat frɔm di wok we dɛn gɛt fɔ kia fɔ di brɔda ɛn sista dɛn, fɔ tich, ɛn fɔ prich, bɔku ɛlda dɛn de sɔpɔt bildin projɛkt dɛn ɛn dizasta rilif wok dɛn. Ɔda wan dɛn de na di Patient Visitation Groups ɔ Hospital Liaison Committees. Ɛlda dɛn no se na Jiova gɛt di kɔngrigeshɔn, nɔto mɔtalman. Na dat mek dɛn de wok tranga wan na di kɔngrigeshɔn ɛn biliv tranga wan se Jiova go pe dɛn fɔ wetin dɛn de du.​—Kol. 3:​23, 24.

13. Aw Jiova de fil bɔt di tin dɛn we wi de du fɔ sav am?

¹³ Nɔto ɔlman go bi ɛlda. Bɔt wi ɔl gɛt sɔntin fɔ gi Jiova. Wi Gɔd de gladi we wi de du wi bɛst fɔ sav am. I de notis di kɔntribyushɔn dɛn we wi de gi fɔ sɔpɔt di wok we de apin ɔlsay na di wɔl,  ilɛksɛf i smɔl. I kin gladi we wi de tray tranga wan fɔ lɛf fɔ shem ɛn put wi an ɔp fɔ gi kɔmɛnt na mitin. Ɛn i kin gladi we wi nɔ de pe atɛnshɔn pan di mistek dɛn we ɔda pipul dɛn de mek ɛn rɛdi fɔ fɔgiv dɛn. Ilɛksɛf yu fil se yu nɔ ebul du bɔku tin dɛn fɔ Jiova lɛk aw yu go want, biliv se Jiova valyu wetin yu ebul fɔ du. I lɛk yu fɔ dat, ɛn i go pe yu.​—Lyuk 21:​1-4.

KƆNTINYU FƆ DE NIA DI GƆD WE DE ALAYV

14. We wi kɔntinyu fɔ de nia Jiova, aw dat go ɛp wi fɔ kɔntinyu fɔ fetful to am? (Luk bak di pikchɔ.)

¹⁴ If wi de si Jiova as rial pɔsin, i go izi fɔ mek wi kɔntinyu fɔ fetful to am. Na dat bin ɛp Josɛf. I bin tinap tranga wan ɛn nɔ du mami ɛn dadi biznɛs di we aw Gɔd nɔ want. Gɔd bin rial to am, ɛn i nɔ bin want fɔ du tin we go mek Gɔd nɔ gladi. (Jɛn. 39:9) Fɔ mek Jiova bi pɔsin we rial to wi, wi nid fɔ mek tɛm fɔ pre to am ɛn stɔdi in Wɔd. Na dat go mek wi padi biznɛs wit am tayt mɔ ɛn mɔ. We wi gɛt tayt padi biznɛs wit Jiova jɔs lɛk Josɛf, wi nɔ go want fɔ du ɛnitin we go mek I nɔ gladi.​—Jems 4:8.

15. Us lɛsin wi lan frɔm wetin bin apin to di Izrɛlayt dɛn we dɛn bin de na di wildanɛs? (Ibruz 3:12)

¹⁵ Di wan dɛn we de fɔgɛt se Jiova na Gɔd we de alayv nɔ go kɔntinyu fɔ de biɛn am. Tink bɔt wetin bin apin to di Izrɛlayt dɛn we dɛn bin de na di wildanɛs. Dɛn bin no se Jiova de, bɔt dɛn bigin fɔ dawt if Gɔd go gi dɛn di tin dɛn we dɛn nid. Dɛn bin ivin aks se: “Fɔ se Jiova de wit wi ɔ i nɔ de wit wi?” (Ɛks. 17:​2, 7) So dat mek dɛn nɔ bin obe Gɔd. Fɔ tru, wi want fɔ avɔyd di bad ɛgzampul we dɛn bin sɛt bikɔs dɛn nɔ bin obe Gɔd, ɛn dɛn ɛgzampul na wɔnin fɔ wi.​—Rid Ibruz 3:12.

16. Wetin go tɛst wi fet?

¹⁶ Di wɔl we wi de tide de mek i nɔ izi fɔ lɛ wi kɔntinyu fɔ de nia Jiova. Bɔku  pipul dɛn nɔ biliv se Gɔd de. Bɔku tɛm, i kin tan lɛk se di wan dɛn we nɔ de du wetin Gɔd want de go bifo. We wi si dat de apin, i kin tɛst wi fet. Pan ɔl we wi biliv se Gɔd de, sɔntɛm wi go bigin fɔ dawt if i go ɛp wi. Tɛm bin de we di pɔsin we rayt Sam 73 bin de fil da we de. I bin si se di wan dɛn we de arawnd am nɔ bin de obe Gɔd in lɔ dɛn, bɔt dɛn bin stil de ɛnjɔy dɛn layf. So dat mek i bigin fɔ dawt if i rili mek sɛns fɔ sav Gɔd.​—Sam 73:​11-13.

17. Wetin go ɛp wi fɔ kɔntinyu fɔ de nia Jiova?

¹⁷ Wetin bin ɛp di man we rayt Sam 73 fɔ chenj di we aw i bin de tink? I bin tink gud gud wan bɔt wetin go apin to di wan dɛn we nɔ kɔntinyu fɔ abop pan Jiova. (Sam 73:​18, 19, 27) I bin tink bak bɔt di bɛnifit dɛn we pɔsin de gɛt we i de sav Gɔd. (Sam 73:24) Wisɛf kin tink bɔt di difrɛn we dɛn we Jiova dɔn blɛs wi. Wi kin kɔmpia di blɛsin dɛn we wi dɔn gɛt to aw wi layf bin fɔ dɔn de if wi nɔ bin de sav Jiova. We wi du dat, i go ɛp wi fɔ kɔntinyu fɔ sav Jiova fetful wan ɛn tɔk di sem wɔd dɛn we di man we rayt Sam 73 bin tɔk, we i se: “As fɔ mi, we a de go nia Gɔd, dat gud fɔ mi.”​—Sam 73:28.

18. Wetin mek wi nɔ nid fɔ fred wetin go apin tumara bambay?

¹⁸ Wi go ebul bia ɛni prɔblɛm we go mit wi insay dis las dez bikɔs wi de “wok lɛk slev” fɔ “di tru Gɔd . . . we de liv.” (1 Tɛs. 1:9) Wi Gɔd na rial Pɔsin we de ɛp di wan dɛn we de wɔship am ɔltɛm. I bin ɛp in savant dɛn trade, ɛn i de ɛp wi bak tide. I nɔ go te igen, big big trɔbul we nɔ wande bi yet go apin. Bɔt Jiova go de wit wi. (Ayz. 41:10) Lɛ wi ɔl “gɛt maynd ɛn tɔk se: ‘Na Jiova de ɛp mi; a nɔ go fred.’”—Ibru. 13:​5, 6.