၁. ယဟိဝၤယွၤ အခ့အပှၤတဖၣ် ထံၣ်ဘၣ်တၢ်ကီတၢ်ခဲ သနာ်က့ ဒ်သိးအဝဲသ့ၣ် ကဆဲး ဘူၣ်ထီၣ်ဘါထီၣ် ယဟိဝၤယွၤအဂီၢ် တၢ်မနုၤကမၤစၢၤ အဝဲသ့ၣ်လဲၣ်.

 လံာ်စီဆှံ တဲဝဲလၢ ပအိၣ်မူဘၣ်လၢ “တၢ်ဆၢကတီၢ်လီၤဆီလၢ အကီအခဲသပှၢ်တၢၢ်.” (၂ တံၤ ၃:၁) ခီဖျိလၢ မုၣ်ကီၤလံၢ် ပၢဟီၣ်ခိၣ်အဃိ ယဟိဝၤယွၤ အခ့အပှၤတဖၣ် ထံၣ်ဘၣ် တၢ်ကီတၢ်ခဲ ဒ်သိးပှၤဂၤထံၣ်ဘၣ်ဝဲ. တကးဒံးဘၣ် ခီဖျိလၢ ပဘူၣ်ထီၣ်ဘါထီၣ် ယဟိဝၤယွၤအဃိ ပထံၣ်ဘၣ် တၢ်ထီဒုၣ်ထီဒါ ဒီးတၢ်မၤအၢမၤနး. ဘၣ်ဆၣ် ပသ့ၣ်ညါလၢ ယဟိဝၤယွၤန့ၣ် အကဲ “ကစၢ်ယွၤလၢအမူဝဲ” အဃိ ပမ့ၢ်ထံၣ်ဘၣ် တၢ်ကီတၢ်ခဲ သနာ်က့ အကမၤစၢၤပှၤဒ်သိး ပကဆဲးတီဒီးအီၤ ဒီးဘူၣ်ထီၣ်ဘါထီၣ်အီၤ.—ယံး ၁၀:၁၀; ၂ တံၤ ၁:၁၂.

၂. ဒ်သိးပလဲၤခီဖျိ တၢ်မၤကွၢ် ကန့ၢ်အဂီၢ် ပကဘၣ်သ့ၣ်ညါ တၢ်ဂ့ၢ်မနုၤလဲၣ်.

^၂ ယဟိဝၤယွၤန့ၣ် အကဲပှၤနီၢ်ကီၢ် တဂၤအဃိ အအိၣ်ကတီၤသးလၢ အကမၤစၢၤပှၤထီဘိ ဒီးဖဲပထံၣ်ဘၣ် တၢ်ကီတၢ်ခဲအခါ အကမၤစၢၤပှၤ သပှၢ်တၢၢ်. (၂ ကွဲး ၁၆:၉; စံး ၂၃:၄) တကးဒံးဘၣ် ယဟိဝၤယွၤန့ၣ် အကဲ ကစၢ်ယွၤလၢ အမူဝဲတဂၤ ဒီးအသးအိၣ်မၤစၢၤပှၤ. ပမ့ၢ်သ့ၣ်ညါတၢ်ဂ့ၢ်အံၤန့ၣ် ကမၤစၢၤပှၤလၢ ပကလဲၤခီဖျိ တၢ်မၤကွၢ် တမံၤဂ့ၤ တမံၤဂ့ၤ လၢပထံၣ်ဘၣ်တဖၣ်. အဒိ စီၤပၤဒၤဝံး လဲၤခီဖျိ တၢ်မၤကွၢ်န့ၢ်ဝဲ သပှၢ်တၢၢ်ဒ်လဲၣ်န့ၣ် ခဲအံၤ ပကကွၢ်သကိး.

၃. ဖဲစီၤဒၤဝံး တဲဝဲလၢ “ယဟိဝၤယွၤန့ၣ် မူဝဲ” အခါ အအဲၣ်ဒိးတဲ မနုၤလဲၣ်.

^၃ စီၤဒၤဝံးသ့ၣ်ညါ ယဟိဝၤယွၤ ဒီးသန့ၤအသးလၢအီၤ. ဖဲစီၤပၤစီလူး ဒီးဒုၣ်ဒါအဂၤတဖၣ် ဂုာ်ကျဲးစၢး လူၤမၤသံ စီၤဒၤဝံးအခါ စီၤဒၤဝံး ဃ့ထုကဖၣ်လၢ ယဟိဝၤယွၤအအိၣ် ဒ်သိး ယဟိဝၤယွၤ ကမၤစၢၤအီၤ. (စံး ၁၈:၆) ယဟိဝၤယွၤ စံးဆၢအတၢ်ထုကဖၣ် ဒီးမၤပူၤဖျဲးအီၤ ဝံၤအလီၢ်ခံ စီၤဒၤဝံးတဲဝဲလၢ “ယဟိဝၤယွၤန့ၣ် မူဝဲ.” (စံး ၁၈:၄၆) ဖဲစီၤဒၤဝံး တဲဝဲလၢ ယဟိဝၤယွၤ မူဝဲအခါ အတအဲၣ်ဒိး တဲဝဲထဲ ကစၢ်ယွၤမူဝဲ အဂ့ၢ်ဘၣ်. လံာ်တဘ့ၣ် ပာ်ဖျါထီၣ်ဝဲလၢ ဖဲစီၤဒၤဝံး တဲဝဲဒ်န့ၣ်အခါ အပာ်ဖျါထီၣ် အတၢ်နာ်လၢ ယဟိဝၤယွၤန့ၣ် “မ့ၢ်ကစၢ်ယွၤလၢ အမ့ၢ်အတီ ဒီးအဘၣ်သးမၤစၢၤ အခ့အပှၤထီဘိ.” ခီဖျိလၢ စီၤဒၤဝံး သ့ၣ်ညါဝဲလၢ ယဟိဝၤယွၤ ထံၣ်ဝဲ တၢ်ကဲထီၣ်သးဒီးအီၤ ဒီးမၤစၢၤအီၤအဃိ စီၤဒၤဝံး အဂံၢ်အဘါ  ဆူၣ်ထီၣ်လၢ အကဆဲးမၤ ယဟိဝၤယွၤ အတၢ်မၤ ဒီးကဆဲးစံးထီၣ်ပတြၢၤ ယဟိဝၤယွၤ.—စံး ၁၈:၂၈, ၂၉, ၄၉.

၄. ပနာ်လၢ ယဟိဝၤယွၤ မ့ၢ်ကစၢ်ယွၤလၢ အမူဝဲအဃိ မၤစၢၤပှၤဒ်လဲၣ်.

^၄ ပနာ်လၢ ယဟိဝၤယွၤ မ့ၢ်ကစၢ်ယွၤလၢ အမူဝဲအဃိ မၤစၢၤပှၤလၢ ပကဆဲးမၤ အတၢ်မၤ လၢတၢ်သးဆူၣ်အပူၤ. တကးဒံးဘၣ် ပတၢ်နာ်အံၤ ကဟ့ၣ်ဆူၣ်ထီၣ် ပဂံၢ်ပဘါလၢ ပကလဲၤခီဖျိ တၢ်ကီတၢ်ခဲ ဒီးကထိၣ်ဟူးထိၣ်ဂဲၤထီၣ်ပှၤလၢ ပကဆဲးမၤယဟိဝၤယွၤ အတၢ်မၤဆူၣ်ဆူၣ်. တကးဒံးဘၣ် ပတၢ်နာ်အံၤ ကမၤစၢၤစ့ၢ်ကီးပှၤလၢ ပကဆဲးမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤထီဘိ.

ကစၢ်ယွၤလၢ အမူဝဲတဂၤ ကမၤဆူၣ်ထီၣ် နဂံၢ်နဘါ

၅. ဖဲပထံၣ်ဘၣ် တၢ်ကီတၢ်ခဲအခါ တၢ်မနုၤ ကမၤစၢၤပှၤလဲၣ်. (ဖံလံးပံၤ ၄:၁၃)

^၅ ပမ့ၢ်သ့ၣ်နီၣ်ထီၣ်လၢ ယဟိဝၤယွၤ မ့ၢ်ကစၢ်ယွၤလၢ အမူဝဲ ဒီးအမၤစၢၤပှၤ သ့ထီဘိန့ၣ် ဖဲပထံၣ်ဘၣ် တၢ်ကီတၢ်ခဲ ဒိၣ်မ့ၢ်ဂ့ၤ ဆံးမ့ၢ်ဂ့ၤအခါ ပလဲၤခီဖျိအီၤန့ၢ်. ယဟိဝၤယွၤ ကဲဝဲ သ့တၢ်လၢာ်ကစၢ်အဃိ တၢ်ကီတၢ်ခဲလၢ အမၤစၢၤပှၤ တသ့ဘၣ်န့ၣ် တအိၣ်နီတမံၤဘၣ်. တကးဒံးဘၣ် ဒ်သိးပလဲၤခီဖျိ တၢ်ကီတၢ်ခဲ ကန့ၢ်အဂီၢ် အဟ့ၣ်ပှၤ တၢ်ဂံၢ်တၢ်ဘါသ့. (ဖး ဖံလံးပံၤ ၄:၁၃.) အဃိ ပလဲၤခီဖျိ တၢ်ကီတၢ်ခဲ ဒူဒူဘူၣ်ဝဲ သပှၢ်တၢၢ်. ဖဲပထံၣ်ဘၣ် တၢ်ကီတၢ်ခဲ ဆံးဆံးဖိအခါ ခီဖျိလၢ ယဟိဝၤယွၤ မၤစၢၤပှၤအဃိ ပနာ်သပှၢ်တၢၢ်လၢ ပမ့ၢ်ထံၣ်ဘၣ် တၢ်ကီတၢ်ခဲဖးဒိၣ်န့ၣ် အကဆဲးမၤစၢၤပှၤဒံး.

၆. ဖဲစီၤဒၤဝံး သးစၢ်အခါ အတၢ်လဲၤခီဖျိခံခါ လၢအမၤအါထီၣ် အတၢ်နာ်န့ၢ် ယဟိဝၤယွၤန့ၣ် မ့ၢ်မနုၤလဲၣ်.

^၆ ပကတဲသကိး စီၤဒၤဝံး အတၢ်လဲၤခီဖျိ ခံခါလၢ အမၤစၢၤအီၤဒ်သိး အကနာ်န့ၢ်အါထီၣ် ယဟိဝၤယွၤ. ဖဲစီၤဒၤဝံး သးစၢ်အခါ အကွၢ်အပါအသိ. ဘၣ်တဘျီ ခ့ယုၢ်တဒုဟဲဝဲ ဒီးစိာ်ကွံာ်ဝဲ အပါအသိတဒု. ဒီးလၢအဂၤတဘျီန့ၣ် တၤသူတဒု ဟဲမၤဝဲဒ်န့ၣ်စ့ၢ်ကီး. လၢတၢ်ကဲထီၣ်သး ခံဘျီလၢာ်အံၤန့ၣ် စီၤဒၤဝံး လဲၤလူၤဝဲ ခ့ယုၢ် ဒီးတၤသူဒူဒူ ဒီးမၤပူၤဖျဲးဝဲအသိဖိ. ဘၣ်ဆၣ် စီၤဒၤဝံး တတဲဝဲလၢ အမၤနၢၤတၢ်လၢ အနီၢ်ကစၢ်ဂံၢ်ဘါ အဃိဘၣ်. အသ့ၣ်ညါဝဲလၢ ယဟိဝၤယွၤ ဟ့ၣ်အီၤ တၢ်ဂံၢ်တၢ်ဘါအဃိ အမၤနၢၤတၢ်. (၁ မူၤ ၁၇:၃၄-၃၇) ခီဖျိလၢ စီၤဒၤဝံး ဆိကမိၣ်ထံက့ၤ အတၢ်လဲၤခီဖျိတဖၣ်အံၤအဃိ အနာ်ဝဲ သပှၢ်တၢၢ်လၢ ခါဆူညါစ့ၢ်ကီး ကစၢ်ယွၤလၢ အမူဝဲတဂၤ ကဟ့ၣ်အီၤ တၢ်ဂံၢ်တၢ်ဘါ.

၇. ဖဲစီၤဒၤဝံး ဒုးတၢ်ဒီး စီၤကၤလယးအခါ အအိၣ်ဒီး တၢ်ထံၣ်ဒ်လဲၣ်.

^၇ လၢခံ ဖဲစီၤဒၤဝံး ကဲဒံးပှၤသးစၢ် ဒီးအအိၣ်အနံၣ် တဆံဘျဲၣ်အခါ အလဲၤလီၤလၢ အံၣ်စရ့လးအသုး အိၣ်တၢ်အလီၢ်. ဖဲစီၤဒၤဝံး လဲၤဖဲန့ၣ်အခါ အထံၣ်ဝဲလၢ အံၣ်စရ့လးအသုးတဖၣ် ပျံၤတၢ်ဒိၣ်မး ခီဖျိလၢ ပှၤဖလ့ၡသးဖိ စီၤကၤလယး ဟဲ “ဃ့ဘူၣ် အံၣ်စရ့လးအသုး” အဃိ. (၁ မူၤ ၁၇:၁၀, ၁၁) အံၣ်စရ့လးအသုးတဖၣ် သးစၢၢ်ဆၢဝဲလၢ စီၤကၤလယး အနီၢ်ဒိၣ်နီၢ်ထီ ဒီးတၢ်လၢ စီၤကၤလယး တဲဝဲအဃိ အဝဲသ့ၣ်ပျံၤတၢ်. (၁ မူၤ ၁၇:၂၄, ၂၅) မ့မ့ၢ် စီၤဒၤဝံးန့ၣ် အတသးစၢၢ်ဆၢတၢ် ဒ်သိးဒီး အံၣ်စရ့လးအသုးတဖၣ်ဘၣ်. စီၤဒၤဝံး ထံၣ်ဝဲလၢ စီၤကၤလယး ဟဲဃ့ဘူၣ် အံၣ်စရ့လးအသုးန့ၣ် လီၤဂာ်ဒ်သိးဒီး အဟဲ “ဃ့ဘူၣ် ယွၤလၢအမူဝဲတဂၤ အသုးဖိတဖၣ်.” (၁ မူၤ ၁၇:၂၆) စီၤဒၤဝံးနာ်ဝဲလၢ ဒ်ယဟိဝၤယွၤ မၤစၢၤအီၤလၢညါ ဖဲအကွၢ်သိအခါအသိး ခဲအံၤတဘျီစ့ၢ်ကီး အနာ်ဝဲလၢ ယဟိဝၤယွၤ ကမၤစၢၤအီၤဒံး. ယဟိဝၤယွၤ မၤစၢၤဝဲ စီၤဒၤဝံး သပှၢ်တၢၢ်အဃိ စီၤဒၤဝံး မၤနၢၤကွံာ် စီၤကၤလယး.—၁ မူၤ ၁၇:၄၅-၅၁.

၈. ဖဲပထံၣ်ဘၣ် တၢ်ကီတၢ်ခဲအခါ ဒ်သိးပတၢ်နာ်န့ၢ် ယဟိဝၤယွၤ ကအါထီၣ်အဂီၢ် ပကဘၣ် မၤဒ်လဲၣ်. (ကွၢ်စ့ၢ်ကီးတၢ်ဂီၤ.)

^၈ ပမ့ၢ်သ့ၣ်နီၣ်ထီၣ်လၢ ကစၢ်ယွၤလၢ အမူဝဲတဂၤ အိၣ်ကတီၤအသး လၢကမၤစၢၤပှၤ ထီဘိန့ၣ် ပလဲၤခီဖျိ တၢ်တၢ်ကီတၢ်ခဲ ကန့ၢ်ဝဲသပှၢ်တၢၢ်. (စံး ၁၁၈:၆) ဒီးပမ့ၢ် ဆိကမိၣ်ထံက့ၤ ကစၢ်ယွၤ မၤစၢၤတ့ၢ်ပှၤလၢ အပူၤကွံာ် ဒ်လဲၣ်န့ၣ် ပတၢ်နာ်န့ၢ်အီၤ ကအါထီၣ်စ့ၢ်ကီး. လၢလံာ်စီဆှံပူၤန့ၣ် ဖးဘၣ်ဃးဒီး ယဟိဝၤယွၤ မၤစၢၤအခ့အပှၤ လၢညါတဖၣ် ဒ်လဲၣ်အဂ့ၢ်. (ၡါ ၃၇:၁၇, ၃၃-၃၇) တကးဒံးဘၣ် ဖးဒီးကွၢ် တၢ်ဂ့ၢ်လၢ jw.org အပူၤ လၢအပာ်ဖျါထီၣ် ဘၣ်ဃးဒီး ယဟိဝၤယွၤ ဆီၣ်ထွဲမၤစၢၤ ဒီပုၢ်ဝဲၢ်မုၣ်ခွါလၢ ပစိၤခဲအံၤ ဒ်လဲၣ်အဂ့ၢ်. ဒီးယဟိဝၤယွၤ မၤစၢၤတ့ၢ်နၤ လၢနတၢ်အိၣ်မူအပူၤ ဒ်လဲၣ်န့ၣ် က့ၤဆိကမိၣ်ထံက့ၤ. ဘၣ်သ့ၣ်သ့ၣ် နကဆိကမိၣ်လၢ ယဟိဝၤယွၤ တမၤစၢၤဘၣ်နၤ ဒိၣ်ဒိၣ်မုၢ်မုၢ် ဒ်သိးဒီး အမၤပူၤဖျဲး စီၤဒၤဝံးလၢ တၤသူဒီးခ့ယုၢ် အစုပူၤဘၣ်. အမ့ၢ်တမၤစၢၤဘၣ် နၤ ဒ်န့ၣ်ဘၣ် သနာ်က့ တဘၣ်သးဟးဂီၤတဂ့ၤ. နီၢ်ကီၢ်ဒု နမ့ၢ်ဆိကမိၣ်က့ၤ ထံထံန့ၣ် ယဟိဝၤယွၤ မၤစၢၤတ့ၢ်နၤ ဒီဒူၣ်ညါ. အဒိ ယဟိဝၤယွၤ မၤစၢၤနၤဒ်သိး နကကဲထီၣ် အသကိး. (ယိၤ ၆:၄၄) ခဲအံၤစ့ၢ်ကီး ခီဖျိလၢ ယဟိဝၤယွၤ မၤစၢၤနၤအဃိ နအိၣ်ဘၣ်လၢ တၢ်မ့ၢ်တၢ်တီအပူၤဒံး. အဃိ ဖဲနဃ့ထုကဖၣ်အခါ ဃ့လၢယဟိဝၤယွၤ ကမၤစၢၤနၤ ဒ်သိး နကသ့ၣ်နီၣ်ထီၣ်က့ၤ တၢ်ဆၢကတီၢ်ဖဲ အစံးဆၢ နတၢ်ထုကဖၣ်, ဖဲနလိၣ်ဘၣ် တၢ်မၤစၢၤအခါ အမၤစၢၤနၤ မ့တမ့ၢ် ဖဲနလဲၤခီဖျိ တၢ်ကီတၢ်ခဲအခါ အဟ့ၣ်နၤ တၢ်ဂံၢ်တၢ်ဘါ. နမ့ၢ်သ့ၣ်နီၣ်ထီၣ်က့ၤ တၢ်ဂ့ၢ်တဖၣ်အံၤန့ၣ် နကနာ် သပှၢ်တၢၢ်လၢ ယဟိဝၤယွၤ ကဆဲးမၤစၢၤနၤ ထီဘိ.

၉. ဖဲပထံၣ်ဘၣ် တၢ်ကီတၢ်ခဲအခါ ပကဘၣ် သ့ၣ်နီၣ်ထီၣ် တၢ်ဂ့ၢ်မနုၤလဲၣ်. (ကတိၤဒိ ၂၇:၁၁)

^၉ ပမ့ၢ်ထံၣ် ယဟိဝၤယွၤဒ် ကစၢ်ယွၤလၢ အမူဝဲတဂၤန့ၣ် ဖဲပထံၣ်ဘၣ် တၢ်ကီတၢ်ခဲအခါ ပကအိၣ်ဒီး တၢ်ထံၣ်အကြၢးအဘၣ် လၢပတၢ်ကီတၢ်ခဲ အဖီခိၣ်. ဘၣ်မနုၤအဃိ ပတဲဒ်န့ၣ်လဲၣ်. မုၣ်ကီၤလံၢ် တဲဝဲလၢ ပှၤဟီၣ်ခိၣ်ဖိ မ့ၢ်ထံၣ်ဘၣ် တၢ်ကီတၢ်ခဲန့ၣ် အဝဲသ့ၣ် ကပာ်တ့ၢ်ကွံာ် ယဟိဝၤယွၤ. ဒီးတၢ်လၢ ပမၤတဖၣ်န့ၣ် မၤသးခု မ့တမ့ၢ် မၤသးအုး ယဟိဝၤယွၤ အသးသ့အဃိ ဖဲပထံၣ်ဘၣ် တၢ်ကီတၢ်ခဲအခါ ပကဘၣ်သးစၢၢ်ဆၢ တၢ်လၢအရ့ဒိၣ်တခါအံၤ. (ဘး ၁:၁၀, ၁၁; ဖး ကတိၤဒိ ၂၇:၁၁.) ဖဲပထံၣ်ဘၣ် တၢ်ကီတၢ်ခဲအခါ ပမ့ၢ်ဆဲးတီဒီး ယဟိဝၤယွၤန့ၣ် ပပာ်ဖျါထီၣ်လၢ ပအဲၣ်ယဟိဝၤယွၤ ဒီးပာ်ဖျါထီၣ်လၢ မုၣ်ကီၤလံၢ်တဲတၢ်န့ၣ် တဘၣ်ဘၣ်. ဘၣ်သ့ၣ်သ့ၣ် နကထံၣ်ဘၣ် ပဒိၣ်ပပှၢ် အတၢ်ထီဒါ, ကျိၣ်စ့တၢ်ကီတၢ်ခဲ, ပှၤတဘၣ်သးဒိကနၣ် တၢ်သးခုကစီၣ်လၢ နစံၣ်တဲၤတဲလီၤဘၣ် မ့တမ့ၢ် နကထံၣ်ဘၣ် တၢ်ကီတၢ်ခဲ အဂၤတဖၣ်. နမ့ၢ်ထံၣ်ဘၣ် တၢ်ကီတၢ်ခဲ ဒ်လဲၣ်ဂ့ၤ ဒ်လဲၣ်ဂ့ၤ သ့ၣ်နီၣ်ထီၣ်လၢ တၢ်ကီတၢ်ခဲလၢ နထံၣ်ဘၣ်တဖၣ်န့ၣ် မ့ၢ်ဝဲတၢ်ခွဲးတၢ်ယာ်လၢ နကပာ်ဖျါထီၣ်လၢ နဘၣ်သး မၤသးခု ယဟိဝၤယွၤအသး. ဒီးသ့ၣ်နီၣ်ထီၣ်လၢ တၢ်ကီတၢ်ခဲလၢ နတူၢ်တကဲဘၣ်န့ၣ် ယဟိဝၤယွၤ တပျဲတူၢ်နၤဘၣ်. (၁ ကရံၣ် ၁၀:၁၃) ဒ်သိးနလဲၤခီဖျိ တၢ်မၤကွၢ်တဖၣ် ကန့ၢ်အဂီၢ် အကဟ့ၣ်နၤ တၢ်ဂံၢ်တၢ်ဘါ.

ကစၢ်ယွၤလၢ အမူဝဲတဂၤန့ၣ် ကဆိၣ်ဂ့ၤက့ၤနၤ

၁၀. ပှၤလၢအဘူၣ်ထီၣ်ဘါထီၣ် ကစၢ်ယွၤလၢ အမူဝဲတဂၤန့ၣ် ကစၢ်ယွၤ ကဟ့ၣ်အီၤ မနုၤလဲၣ်.

^၁၀ ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် ယဟိဝၤယွၤ ကဆိၣ်ဂ့ၤအီၤထီဘိ. (ဧ့ၤ ၁၁:၆) ဆၢကတီၢ်ခဲအံၤ ယဟိဝၤယွၤ ဟ့ၣ်ပှၤ တၢ်ဃူတၢ်ဖိး ဒီးတၢ်သူၣ်မံသးမုာ်. တကးဒံးဘၣ် ခါဆူညါစ့ၢ်ကီး အကဟ့ၣ်ပှၤ တၢ်မူအထူအယိာ်. ပနာ်သ့ သပှၢ်တၢၢ်လၢ  ယဟိဝၤယွၤ ဘၣ်သးဟ့ၣ်ပှၤခိၣ်ဖး ဒီးအအိၣ်ဒီး တၢ်စိတၢ်ကမီၤလၢ ကဟ့ၣ်ပှၤခိၣ်ဖး. အဃိ ပဆဲးမၤ ယဟိဝၤယွၤ အတၢ်မၤ လၢအဂ့ၤကတၢၢ် ဒ်အခ့အပှၤလၢ အသးတီ လၢညါတဖၣ် မၤဝဲအသိးသ့. လၢညါ ဖဲတၢ်မၢဖိအစိၤန့ၣ် စီၤတံၤမသ့း မၤဝဲဒ်န့ၣ်.—ဧ့ၤ ၆:၁၀-၁၂.

၁၁. ဘၣ်မနုၤအဃိ စီၤတံၤမသ့း မၤတၢ်ဆူၣ်ဆူၣ်လၢ တၢ်အိၣ်ဖှိၣ်အဂီၢ်လဲၣ်. (၁ တံၤမသ့း ၄:၁၀)

^၁၁ ဖး ၁ တံၤမသ့း ၄:၁၀. စီၤတံၤမသ့း နာ်ဝဲနီၢ်ကီၢ်လၢ ကစၢ်ယွၤလၢ အမူဝဲတဂၤ ကဟ့ၣ်အီၤခိၣ်ဖး အဃိ အမၤတၢ်ဆူၣ်ဆူၣ်လၢ ယဟိဝၤယွၤ ဒီးဒီပုၢ်ဝဲၢ်မုၣ်ခွါအဂီၢ်. အမၤတၢ်ဆူၣ်ဆူၣ်ဒ်လဲၣ်. တၢ်မၢဖိပီလူး ဟ့ၣ်ဂံၢ်ဟ့ၣ်ဘါ စီၤတံၤမသ့းလၢ အကမၤဂ့ၤထီၣ် အတၢ်သိၣ်လိ လၢတၢ်စံၣ်တဲၤတဲလီၤတၢ်မၤ ဒီးလၢတၢ်အိၣ်ဖှိၣ်ပူၤ. စီၤပီလူး တဲစ့ၢ်ကီးအီၤလၢ အကဘၣ်ပာ်လီၤ တၢ်ဒိတၢ်တဲာ်အဂ့ၤလၢ ဒီပုၢ်ဝဲၢ်မုၣ်ခွါလၢ အသးပှၢ် ဒီးအသးစၢ်တဖၣ်အဂီၢ်. ဒီးအဒိးန့ၢ်ဘၣ် မူဒါလၢအကီတနီၤ ဒ်သိးဒီး ဖဲဒီပုၢ်ဝဲၢ်မုၣ်ခွါလိၣ်ဘၣ် တၢ်သိၣ်က့ၤသီက့ၤအခါ အကဘၣ် သိၣ်က့ၤသီက့ၤဝဲလိၤလိၤ လၢတၢ်အဲၣ်တၢ်ကွံအပူၤ. (၁ တံၤ ၄:၁၁-၁၆; ၂ တံၤ ၄:၁-၅) စီၤတံၤမသ့း နာ်ဝဲလၢ တဘျီတခီၣ် ပှၤဂၤမ့ၢ်တထံၣ် ဒီးမ့ၢ်တပာ်လုၢ်ပာ်ပှ့ၤ တၢ်လၢအမၤဝဲတဖၣ်ဘၣ် သနာ်က့ ယဟိဝၤယွၤ ကဟ့ၣ်အီၤခိၣ်ဖး.—ရိ ၂:၆, ၇.

၁၂. ဘၣ်မနုၤအဃိ တၢ်အိၣ်ဖှိၣ်သးပှၢ်တဖၣ် မၤတၢ်ဆူၣ်ဆူၣ်လၢ တၢ်အိၣ်ဖှိၣ်အဂီၢ်လဲၣ်. (ကွၢ်စ့ၢ်ကီးတၢ်ဂီၤ.)

^၁၂ ဆၢကတီၢ်ခဲအံၤစ့ၢ်ကီး တၢ်အိၣ်ဖှိၣ်သးပှၢ်တဖၣ် နာ်ဝဲသပှၢ်တၢၢ်လၢ ယဟိဝၤယွၤ ထံၣ်ဒီးပာ်လုၢ်ပာ်ပှ့ၤ တၢ်လၢအဝဲသ့ၣ်မၤဝဲ. တၢ်အိၣ်ဖှိၣ်သးပှၢ်တဖၣ် လဲၤဟးအိၣ်သကိး ဒီးဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ်, သိၣ်လိနဲၣ်လိတၢ်လၢ တၢ်အိၣ်ဖှိၣ်ပူၤ ဒီးဟးစံၣ်တဲၤတဲလီၤတၢ်. တကးဒံးဘၣ် တၢ်အိၣ်ဖှိၣ်သးပှၢ် အါဂၤန့ၣ် အဝဲသ့ၣ် ဆီၣ်ထွဲမၤစၢၤတၢ်လၢ တၢ်သူၣ်ထီၣ်ဘှီထီၣ် ဒီးန့ဆၢၣ် တၢ်ဘၣ်ဒိဘၣ်ထံး တကပၤစ့ၢ်ကီး. ဒီးအဂၤတနီၤန့ၣ် မၤစၢၤတၢ်လၢ တၢ်လဲၤဟးအိၣ်သကိးပှၤဆါ အကရူၢ် မ့တမ့ၢ် ကမံးတံာ်လၢ အဆဲးကျိးဒီး တၢ်ဆါဟံၣ်. ဒီးတၢ်ရဲၣ်တၢ်ကျဲၤတဖၣ်အံၤ တၢ်အိၣ်ဖှိၣ်သးပှၢ်တဖၣ် ထံၣ်ဝဲလၢ ယဟိဝၤယွၤဒုးအိၣ်ထီၣ်ဝဲ ဒီးတမ့ၢ်ပှၤဟီၣ်ခိၣ်ဖိ ဒုးအိၣ်ထီၣ်ဝဲဘၣ်. အဃိ အဝဲသ့ၣ် မၤတၢ်ဆူၣ်ဆူၣ်လၢ တၢ်အိၣ်ဖှိၣ်အဂီၢ် ဒီးနာ်ဝဲသပှၢ်တၢၢ်လၢ ယဟိဝၤယွၤ ကဆိၣ်ဂ့ၤ တၢ်လၢအဝဲသ့ၣ်မၤဝဲ.—ကလီး ၃:၂၃, ၂၄.

၁၃. တၢ်လၢပမၤန့ၢ်လၢ ယဟိဝၤယွၤအဂီၢ်န့ၣ် ယဟိဝၤယွၤ ထံၣ်ဝဲဒ်လဲၣ်.

^၁၃ ပှၤကဲထီၣ် တၢ်အိၣ်ဖှိၣ်သးပှၢ် တသ့ကိးဂၤဒဲးဘၣ်. ဘၣ်ဆၣ်  ပဝဲကိးဂၤဒဲး ပဟ့ၣ်ယဟိဝၤယွၤ တၢ်တမံၤမံၤသ့. ပမ့ၢ်ဟ့ၣ်ယဟိဝၤယွၤ တၢ်လၢအအိၣ်ဒီးပှၤ လၢအဂ့ၤကတၢၢ်န့ၣ် ယဟိဝၤယွၤ ပာ်လုၢ်ပာ်ပှ့ၤဝဲဒိၣ်မး. ပထၢနုာ်တၢ်မၤဘူၣ်လၢ ဟီၣ်ခိၣ်ဒီဘ့ၣ်အဂီၢ် မ့ၢ်န့ၢ်ထဲတစဲးဖိ သနာ်က့ ယဟိဝၤယွၤထံၣ်ဝဲ. ပမဲာ်ဆှးသ့ဘၣ်ဆၣ် ဖဲပထီၣ်တၢ်အိၣ်ဖှိၣ်အခါ ပဂုာ်ကျဲးစၢး ယူာ်ထီၣ်ပစုလၢ ကဟ့ၣ်ထီၣ် တၢ်စံးဆၢ ဒီးဖဲပှၤမၤကမၣ်ပှၤအခါ ပပျၢ်ကွံာ်အဝဲသ့ၣ် တၢ်ကမၣ်. ဖဲယဟိဝၤယွၤ ထံၣ်လၢ ပမၤဒ်န့ၣ်အခါ အသးခုဒိၣ်မး. ပမ့ၢ်တူၢ်ဘၣ်လၢ ပမၤတၢ်လၢ ယဟိဝၤယွၤအဂီၢ် န့ၢ်ထဲတစဲးဖိ သနာ်က့ ပကဘၣ် နာ်သပှၢ်တၢၢ်လၢ ယဟိဝၤယွၤ အဲၣ်ပှၤ, ပာ်လုၢ်ပာ်ပှ့ၤ တၢ်လၢပမၤ ဒီးအကဟ့ၣ်ပှၤခိၣ်ဖး.—လူၤ ၂၁:၁-၄.

ဆဲးမၤဂ့ၤဒိၣ်ထီၣ် နတၢ်ရ့လိာ်သးဒီး ကစၢ်ယွၤလၢ အမူဝဲတဂၤ

၁၄. နမ့ၢ် ဆဲးမၤဂ့ၤဒိၣ်ထီၣ် နတၢ်ရ့လိာ်သးဒီး ယဟိဝၤယွၤ ထီဘိန့ၣ် ကမၤစၢၤနၤဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၄ ပတၢ်ရ့လိာ်သးဒီး ယဟိဝၤယွၤမ့ၢ်ဂ့ၤန့ၣ် ကမၤစၢၤပှၤလၢ ပကဆဲးတီဒီးအီၤ. ပကဆိကမိၣ်ကွၢ် စီၤယိၤသးအဂ့ၢ်. စီၤယိၤသးန့ၣ် အတၢ်ရ့လိာ်သးဒီး ယဟိဝၤယွၤ ဂ့ၤဝဲအဃိ အတအဲၣ်ဒိး မၤသးအုး ယဟိဝၤယွၤအသးဘၣ်. အဃိ အဂ့ၢ်လိာ်ဝဲ သပှၢ်ပှၢ်လၢ အတမၤကမၣ်မုၣ်ကမၣ်ခွါဘၣ်. (၁ မိၤ ၃၉:၉) ပမ့ၢ်ဘၣ်သးလၢ ပတၢ်ရ့လိာ်သးဒီး ယဟိဝၤယွၤ ကဂ့ၤန့ၣ် ပကဘၣ်ပာ်လီၤ တၢ်ဆၢကတီၢ်လၢ ကဃ့ထုကဖၣ် လၢအအိၣ် ဒီးမၤလိလံာ်စီဆှံ. ပမ့ၢ်မၤဒ်န့ၣ်မၣ် ပတၢ်ရ့လိာ်သးဒီးအီၤ ကဂ့ၤဒိၣ်ထီၣ်. ပတၢ်ရ့လိာ်သးဒီး ယဟိဝၤယွၤ မ့ၢ်ဂ့ၤဒ် စီၤယိၤသးအသိးန့ၣ် ပတဘၣ်သးမၤတၢ်လၢ အမၤသးအုး ယဟိဝၤယွၤအသး နီတမံၤဘၣ်.—ယၤ ၄:၈.

၁၅. တၢ်ကဲထီၣ်သးဒီး ပှၤအံၣ်စရ့လးဖိ ဖဲပှၢ်မုၢ်ကနၢန့ၣ် ပဒိးန့ၢ်ဘၣ် တၢ်မၤလိဒ်လဲၣ်. (ဧ့ၤဘြံၤ ၃:၁၂)

^၁၅ ပှၤတဂၤ မ့ၢ်တသန့ၤအသးလၢ ယဟိဝၤယွၤလၢၤဘၣ်န့ၣ် အကယံၤထီၣ်ဒီး ယဟိဝၤယွၤ. အဒိ ဖဲပှၤအံၣ်စရ့လးဖိ အိၣ်လၢ ပှၢ်မုၢ်ကနၢအခါ တၢ်ကဲထီၣ်သးဒီး အဝဲသ့ၣ်ဒ်န့ၣ်. အဝဲသ့ၣ် သ့ၣ်ညါဝဲလၢ ယဟိဝၤယွၤ အိၣ်ဝဲနီၢ်ကီၢ် ဘၣ်ဆၣ်လၢခံ အဝဲသ့ၣ်တနာ်ဝဲလၢ ယဟိဝၤယွၤ ကမၤစၢၤအဝဲသ့ၣ် အါအါလၢၤဘၣ်. အဃိ အဝဲသ့ၣ် တဲဝဲလၢ “မ့ၢ်ယဟိဝၤယွၤ အိၣ်လၢပကျါဧါ တအိၣ်ဘၣ်ဧါ.” (၂ မိၤ ၁၇:၂, ၇) လၢခံ အဝဲသ့ၣ် ထီဒါက့ၤ ယဟိဝၤယွၤ. အဃိ ပှၤအံၣ်စရ့လးဖိ အဒိအတဲာ်လၢ အတဂ့ၤဘၣ်န့ၣ် ပတဘၣ်သးကွၢ်လိဘၣ်.—ဖး ဧ့ၤဘြံၤ ၃:၁၂.

၁၆. တဘျီတခီၣ် ပတၢ်နာ် ကဘၣ်တၢ်မၤကွၢ်အီၤဒ်လဲၣ်.

 ^၁၆ ခီဖျိလၢ ဟီၣ်ခိၣ်တၢ်အိၣ်သးအဃိ ပကဆဲး မၤဂ့ၤဒိၣ်ထီၣ် ပတၢ်ရ့လိာ်သးဒီး ယဟိဝၤယွၤ ထီဘိအဂီၢ် တညီဝဲဘၣ်. ပှၤအါဂၤန့ၣ် တနာ်ဝဲလၢ ကစၢ်ယွၤအိၣ်ဘၣ်. ပှၤလၢအတကနၣ်ဃုာ် ကစၢ်ယွၤ အတၢ်သိၣ်တၢ်သီ အါတက့ၢ်န့ၣ် ဖျါလၢအဝဲသ့ၣ် အိၣ်ဘၣ် မုာ်မုာ်ခုၣ်ခုၣ်. အဃိ ဖဲပထံၣ်ဘၣ် ဒ်န့ၣ်အခါ အကဲထီၣ် တၢ်မၤကွၢ် လၢပဂီၢ်သ့. တကးဒံးဘၣ် ဖဲပထံၣ်ဘၣ် ဒ်န့ၣ်အခါ ပမ့ၢ်နာ်လၢ ကစၢ်ယွၤအိၣ်ဝဲ သနာ်က့ ဘၣ်သ့ၣ်သ့ၣ် ပသးကဒ့ဒီလၢ မ့ၢ်အကမၤစၢၤပှၤဧါ. ဘၣ်တဘျီ ပှၤကွဲးထါစံးထီၣ်ပတြၢၤ ၇၃ န့ၣ် အတူၢ်ဘၣ်ဝဲ ဒ်န့ၣ်စ့ၢ်ကီး. အထံၣ်ဝဲလၢ ပှၤလၢအခိၣ်အဃၢၤလၢ တမၤထွဲ ကစၢ်ယွၤ အတၢ်သိၣ်တၢ်သီဘၣ်န့ၣ် အဝဲသ့ၣ်အိၣ်ဘၣ် မုာ်မုာ်ခုၣ်ခုၣ်. အဃိ အဆိကမိၣ်ဝဲလၢ မ့ၢ်အဘူၣ်ထီၣ်ဘါထီၣ် ကစၢ်ယွၤန့ၣ် အကဲဘျုးဒံးဧါ.—စံး ၇၃:၁၁-၁၃.

၁၇. ဒ်သိးပကဆဲးတီဒီး ယဟိဝၤယွၤအဂီၢ် တၢ်မနုၤ ကမၤစၢၤပှၤလဲၣ်.

^၁၇ ဒ်သိး ပှၤကွဲးထါစံးထီၣ်ပတြၢၤ အတၢ်ထံၣ် ကဘၣ်ထီၣ်က့ၤအဂီၢ် တၢ်မနုၤ မၤစၢၤအီၤလဲၣ်. အဆိကမိၣ်ထံဝဲ ဘၣ်ဃးဒီး တၢ်လၢကကဲထီၣ်အသးဒီး ပှၤလၢအတနာ် ကစၢ်ယွၤဘၣ်တဖၣ်. (စံး ၇၃:၁၈, ၁၉, ၂၇) တကးဒံးဘၣ် အဆိကမိၣ်ထံဝဲ ဘၣ်ဃးဒီး အမၤဘၣ် ကစၢ်ယွၤအတၢ်မၤအဃိ အန့ၢ်ဘၣ်အဘျုးဒ်လဲၣ်အဂ့ၢ်. (စံး ၇၃:၂၄) ပဝဲစ့ၢ်ကီး ပကဘၣ် ဆိကမိၣ်ထံ တၢ်ဆိၣ်ဂ့ၤလၢ ယဟိဝၤယွၤဟ့ၣ်ပှၤ. ဒီးဖဲပဆိကမိၣ်ထံလၢ ပမ့ၢ်တမၤ ကစၢ်ယွၤ အတၢ်မၤဘၣ်န့ၣ် ပတၢ်အိၣ်မူ ကမၤအသးဒ်လဲၣ်အခါ ကမၤစၢၤပှၤလၢ ပကဆဲးတီဒီး ယဟိဝၤယွၤ. ဒ်ပှၤကွဲးထါစံးထီၣ်ပတြၢၤ တဲဝဲအသိး ပကတဲလၢ “မ့မ့ၢ်ယၤန့ၣ် ယသုးဘူးသးလၢ ကစၢ်ယွၤအအိၣ်န့ၣ် ဂ့ၤဝဲလၢယဂီၢ်.”—စံး ၇၃:၂၈.

၁၈. ဘၣ်မနုၤအဃိ ပတလိၣ် ဘၣ်ယိၣ်တၢ် ဘၣ်ဃးဒီး ခါဆူညါ အဂီၢ်ဘၣ်လဲၣ်.

^၁၈ ပကဲဘၣ် “ကစၢ်ယွၤလၢ အမ့ၢ်အတီ ဒီးအမူဝဲတဂၤအကုၢ်” အဃိ ဖဲမုၢ်နံၤခံကတၢၢ် အဆၢကတီၢ် ပမ့ၢ်ထံၣ်ဘၣ် တၢ်ကီတၢ်ခဲ တမံၤဂ့ၤ တမံၤဂ့ၤ သနာ်က့ ပလဲၤခီဖျိအီၤ ကန့ၢ်. (၁ သ့း ၁:၉) ပကစၢ် ယဟိဝၤယွၤန့ၣ် အမ့ၢ်ကစၢ်ယွၤလၢ အအိၣ်နီၢ်ကီၢ်, အသးအိၣ်ပှၤ ဒီးကမၤစၢၤပှၤထီဘိ. ဒ်အမၤစၢၤ အခ့အပှၤလၢညါတဖၣ်အသိး ဆၢကတီၢ်ခဲအံၤစ့ၢ်ကီး အကမၤစၢၤပှၤ. တယံာ်လၢၤဘၣ်န့ၣ် ပကထံၣ်ဘၣ် တၢ်နးတၢ်ဖှီၣ်ဖးဒိၣ် လၢတကဲထီၣ်အသးလၢ ဟီၣ်ခိၣ်ချၢနီတဘျီဒံးဘၣ်. ဘၣ်ဆၣ် ပတအိၣ်ထဲတဂၤဘၣ်, ယဟိဝၤယွၤ ကအိၣ်ဒီးပှၤ. (ၡါ ၄၁:၁၀) မ်ပဝဲကိးဂၤဒဲး တဲဒူဒူလၢ “ယဟိဝၤယွၤ မ့ၢ်ပှၤလၢ အမၤစၢၤယၤအဃိ ယတပျံၤတၢ်ဘၣ်.”—ဧ့ၤ ၁၃:၅, ၆.