1. Yinke a yi vatere vakareli vaJehova va twikire kumukarera nampili kuna kuligwanekera nomaudigu?

 BIBELI kuuyunga asi ose kuna kuparuka ‘poyiruwo yoyidigu.’ (2 Tim. 3:1) Vakareli vaJehova kuligwanekera nomaudigu aga ava ligwanekere nago vantu navenye mouzuni ou woudona waSatana ntani awo hena kuvahepeka morwa kukarera Jehova. Yisinke ayi tu vatere tu twikire kukarera Jehova nampili momaudigu? Konda zimwe kuna kara asi Jehova kutuvatera ntani hena twa diva asi age ‘Karunga gomunamwenyo.’​—Jer. 10:10; 2 Tim. 1:12.

2. Yinke twa diva kuhamena Jehova eyi nayi tu nkondopeka?

² Jehova kumona nkenye udigu ou atu ligwanekere nawo ntani ga liwapaikira kutuvatera. (2 Hist. 16:9; Epis. 23:4) Apa atu diworoka asi Karunga kutupakera sinka ntani ga liwapaikira kutuvatera, ose kukara nononkondo dokulididimikira nkenye udigu. Tu zeni tu ka konakone omu ya horokerere hompa Ndafita.

3. Yisinke ga tembe Ndafita apa ga uyungire asi Jehova ‘Karunga gomunamwenyo’?

³ Ndafita ga divire Jehova ntani ga mu huguvarere. Apa hompa Sauru navamwe va hetekerere ko kudipaga Ndafita, age kwa kanderere kwaJehova yipo a mu vatere. (Epis. 18:6) Apa Karunga ga limbwilire ekanderero lyendi nokumupopera, Ndafita yipo ga tente asi “Karunga munamwenyo.” (Epis. 18:46) Yisinke ga tembe Ndafita apa ga uyungire nonkango odo? Ndafita kwa nkondopekere asi Jehova, Karunga gousili ntani ga liwapaikira kuvatera vakareli vendi. Ndafita ga divire  asi Karunga ga divire eyi ya mu horokerere ntani ga liwapaikilire kumupopera. Ayo kwa korangedere Ndafita a twikire kukarera Jehova nokumuyererepeka.​—Epis. 18:28, 29, 49.

4. Mauwa musinke natu gwanena mo nsene tu dimburura asi Jehova, Karunga gomunamwenyo?

⁴ Apa atu diva asi Jehova age kuna kara Karunga gomunamwenyo, ayo kutuvatera tu mu karere noupampi. Ose ngatu kara nononkondo tu lididimikire maudigu ntani ngayi tu korangeda yipo tu twikire kurugana unene mosirugana saKarunga. Ntani ngatu tokomena kuhedera pepi Jehova.

KARUNGA GOMUNAMWENYO NGA KU NKONDOPEKA

5. Yisinke ayi tu pe ehuguvaro apa atu ligwanekere nomaudigu? (Vafilipi 4:13)

⁵ Kuvhura tu lididimikire nkenye maudigu nsene tu diworoka asi Jehova age Karunga gomunamwenyo ntani kuvhura a tu vatere nkenye apa. Age kuvhura a tu vatere kwa nkenye udigu morwa kwato udigu ou au mu tjindire. Age Munankondo nadinye ntani ngatu pa nonkondo yipo tu lididimikire. (Resa Vafilipi 4:13.) Eyi kutupa ehuguvaro apa atu ligwanekere nomaudigu. Apa Jehova a tu vatere momaudigu gomanunu, eyi kutupa ehuguvaro asi ngatu vatera nampili mwaga gomanene.

6. Yisinke ya horokerere Ndafita apa ga kere munona eyi ya mu ninkisire a huguvare mwaJehova?

⁶ Tu konakoneni yihorokwa yivali eyi ya vaterere Ndafita a huguvare mwaJehova. Apa Ndafita ga kere musita pounona, embungu ntani nyime, nkenye esi kwa kwete po nzwi zoguhwe. Poyihorokwa nayinye oyo, Ndafita kwa kere nouradi pokutjida yikasama yipo a popere nonzwi. Nye Ndafita kapi ga ligazarere asi pwamwene ga yi rugene. Ga yi divire asi Jehova yige ga mu pere nonkondo. (1 Sam. 17:34-37) Ndafita kapi ga divarere yihorokwa oyo. Pokuteda ko koyihorokwa oyo, ya mu pere ehuguvaro asi Karunga gomunamwenyo nga mu nkondopeka komeho.

7. Kosinke ga demenene Ndafita ntani ngapi ya mu vaterere a funde Golyata?

⁷ Ano konyima apa Ndafita ga kere simpe munona, age simpe kapi ana siki konomvhura 20, age kwa zire a ka dingure kamba zovakwayita woVaisraeli. Yipo ga ka gwene vakwayita vana kara nowoma morwa eturungu lyoVafilisiti lyedina Golyata eli lya sensere ‘vakwayita woVaisraeli.’ (1 Sam. 17:10, 11) Vakwayita kwa tukukire morwa kwa demenene kounene waGolyata ntani kweyi ga va uyungire. (1 Sam. 17:24, 25) Nye nampili ngoso, Ndafita kwa demenene kweyi yapeke. Ndafita ga yi divire asi apa Golyata ga swawire vakwayita woVaisraeli age kwa swawire ‘Karunga gomunamwenyo.’ (1 Sam. 17:26) Ndafita kwa gazadarere Jehova. Ndafita kwa huguvarere asi Karunga ogu ga mu vaterere apa ga kere musita, na mu vatera hena moukaro ou. Jehova kwa mu vaterere Ndafita yipo a rwe naGolyata ntani nokufunda.​—1 Sam. 17:45-51.

8. Yisinke nayi tu vatera tu huguvare asi Jehova nga tu vatera apa ngatu ligwanekera nomaudigu?

⁸ Nose kuvhura tu funde po nkenye maudigu nsene tu diworoka asi Karunga gomunamwenyo ga liwapaikira kutuvatera. (Epis. 118:6) Kuvhura tu huguvare mwaJehova asi kuvhura a tu vatere nsene tu gazadara ko kweyi ga tu ruganena. Resa yihorokwa yomoBibeli yipo yi ku diworokese omu Jehova ga poperere vakareli vendi. (Jes. 37:17, 33-37) Ntani hena resa nokutarera marapoto gokointaneta zetu jw.org omu Jehova ana kuvatera vanavazinyetu mosiruwo setu.  Mokugwederera ko, diworoka omu Jehova ga ku vatera. Nampo kuvhura o lizuvhe asi Jehova kapi ga ku ruganena yoyinene a ku popere kwanyime ndi embungu, nye usili woowu asi Jehova yinzi ga ku ruganena meparu lyoge. Yige ga kukoka o kare kaume kendi. (Joh. 6:44) Morwa evatero lyendi, yiyo yina kukuninkisa o twikire kumukarera. Pura Jehova a ku vatere o diworoke yiruwo omu ga limbwilire makanderero goge ntani nomu ga ku pere eyi wa hepere posiruwo oso ntani nokukupakera mbili posiruwo soudigu. Pokugazadara yihorokwa oyo, ayo ngayi nkondopeka ehuguvaro lyoge mwaJehova asi age nga twikira kukuvatera.

9. Ngapi omu twa hepa kutara maudigu? (Yisewe 27:11)

⁹ Pokutara Jehova ngomuntu ayo ngayi tu vatera tu kare nomutaro gomuwa komaudigu getu. Monkedi musinke? Ose ngatu dimburura omu maudigu getu ga likwatakana nonompata edi da kara pokatji kaJehova naSatana. Muzonaguli kwa tente asi apa a tu ligwanekere nomaudigu, ose kuvhura kuzumba Jehova. (Joba 1:10, 11; resa Yisewe 27:11.) Nye apa atu limburukwa Jehova nampili momaudigu, ose kuyilikida asi muzonaguli munayimpempa. Ove kuna kuligwanekera nomarwaneso gepangero noudigu woyikwaeparu ndi nampo vantu kapi vana kupurakena kombudi zongwa ndi nomaudigu hena gamwe? Nsene yimo ngoso, diworoka asi ukaro woge kuku pa mpito yipo o hafesa Jehova. Ntani diworoka asi age nga ku vatera o lididimikire nkenye udigu ono kuligwanekera nawo. (1 Kol. 10:13) Age nga kupa nonkondo yipo o lididimikire.

KARUNGA GOMUNAMWENYO NGA KU FUTA

10. Yisinke Karunga gomunamwenyo nga ruganena ava ava mu karere?

¹⁰ Jehova kutungika ava ava mu karere. (Heb. 11:6) Age kutupa mbili ntani kutuvatera tu kare yina tu gwanene po ngesi ntani nga ka tu pa hena mwenyo gwanarunye komeho. Twa huguvara Jehova asi ngatu futa ntani age ga kara nononkondo dokuyirugana. Morwa  konda ozo, ose kutwikira kumukarera ngwendi moomu ngava yi rugana vakareli vendi vanare. Eyi yiyo ya horokerere Timoteusa mosiruwo sanare.​—Heb. 6:10-12.

11. Yisinke ya tumangedere Timoteusa a rugane unene mombungakriste? (1 Timoteusa 4:10)

¹¹ Resa 1 Timoteusa 4:10. Timoteusa kwa tulire ehuguvaro lyendi mwaKarunga gomunamwenyo. Eyi yiyo nye ga litulire mo unene a ruganene Jehova nava wopeke. Yisinke ga rugene? Mupositoli Paurusa kwa mu korangedere a kare murongi gomuwa mokuzuvhisa ntani mombungakriste. Paurusa kwa korangedere hena Timoteusa a kare sihonena sosiwa kovapuli vakwawo, yikare asi vakondi ndi vanona. Age hena kwa mu pere yitumbukira youdigu, kukwatera mo kugava mapukururo geharo gononkondo kwava va ga hepere. (1 Tim. 4:11-16; 2 Tim. 4:1-5) Poyiruwo yimwe, wopeke kapi ngava mono nokugava rupandu kosirugana saTimoteusa, nye age ga kere nehuguvaro asi Jehova nga mu tungika.​—Rom. 2:6, 7.

12. Morwasinke vakuronambunga ava ruganene unene mombungakriste? (Tara hena efano.)

¹² Neina, Vakuronambunga nawo kuvhura va kare nehuguvaro asi Jehova kumona ntani kutara yirugana yawo asi mulyo. Kugusa ko kugava ekorangedo nokuronga nokuzuvhisa, vakuronambunga wovanzi kukwatesa ko sirugana sokutunga ntani nokuvatera moyimpagwa. Vamwe kurugana mombunga zokudingura vaveli ndi komitiye zeruganeno kumwe nosipangero. Vakuronambunga owo va dimburura asi mbungakriste kwa hamena kwaJehova, nye kapisi komuntu. Ngoyitundwamo, awo kurugana unene mombungakriste ntani va huguvara mwaKarunga asi ngava tungika kweyi ava rugana.​—Koros. 3:23, 24.

13. Ngapi a lizuvhu Jehova kuhamena eyi atu mu ruganene?

¹³ Kapisi natuvenye kuvhura tu kare  vakuronambunga. Nye natuvenye kuvhura tu gave yuma kwaJehova. Karunga kumuhafesa apa atu rugana paapa twa hulira mokumukarera. Age kumona yigava eyi atu gava kombunga zendi nampili yi kare yoyinunu. Age kuhafa apa atu gava malimbururo komapongo nampili ngomu atu kara nonomuga ntani napa atu gusire po ava ava tu zonene. Nampili o lizuvhe asi eyi ono kuruganena Jehova kapisi yinzi, kara nehuguvaro asi Jehova kumona eyi o vhuru kurugana asi mulyo. Age ga ku hara ntani nga ku tungika.​—Ruk. 21:1-4.

KARA PEPI NAKARUNGA GOMUNAMWENYO

14. Ngapi omu kukara pepi naJehova ayi tu vatere tu mu limburukwe? (Tara hena efano.)

¹⁴ Nsene tu kara nelikwatakano lyenene naJehova ngayi tu rerupira ku mu limburukwa. Oyo yiyo ya horokerere Josefa. Age kwa nyokere kuhondera. Ga yi divire asi nkenye eyi nga rugana ngayi kundama Jehova ntani age kapi ga here kumuguvisa. (Gen. 39:9) Mokuninka asi Jehova a kare kaume gwetu, twa hepa kukanderera nokulironga Nonkango dendi. Nsene tu yi rugana oyo, elikwatakano lyetu ngali kura. Ngwendi Josefa, ngatu kara nelikwatakano lyenene naJehova ntani kapi ngatu rugana nkenye eyi ngayi mu guvisa.​—Jak. 4:8.

15. Sirongwa musinke natu lirongera ko kweyi ya horokerere Vaisraeli momburundu? (Vahebeli 3:12)

¹⁵ Ava ava hageke kuhuguvara Jehova, kuvhura kuvakarera ureru kudira kumulimburukwa. Tu tareni eyi ya horokerere Vaisraeli apa va kere momburundu. Va yi divire asi Jehova yipo ga kere, nye awo kwa kere nomasinganyeko nsene asi kuvhura a va pakere mbili. Awo kwa pulire asi: “Enye sili Jehova mweli mokatji ketu ndi?” (Ex. 17:2, 7) Ngoyitundwamo, awo kwa rwanesere Karunga. Yosili tuna hara kunyokera po sihonena sawo sosidona. Eli kuna kara erondoro kwetu.​—Resa Vahebeli 3:12.

16. Yisinke nayi heteka epuro lyetu?

¹⁶ Uzuni kuna kutuninkisa yi tu digopere kukara pepi naJehova. Vamwe kapi va tambura  eli egano asi Karunga yipo ga kara. Rorunzi, owo ava ncenuna eyi ana tu harere Karunga, kwa kara neparu lyewa. Apa atu yi mono oyo, epuro lyetu kuvhura kuliheteka. Nampili ngomu twa yi pura asi Karunga yipo ga kara, kuvhura tu tameke kukara nomasinganyeko nsene asi ngatu vatera. Mutjangi gEpisarome 73, nage yimo ga lizuvhire sikando simwe. Age ga mwene omu vantu vancenwine nompangera daJehova nye simpe va kere noruhafo. Ngoyitundwamo yipo ga tamekere kukara nomasinganyeko nsene asi kuvhura a karere Jehova.​—Epis. 73:11-13.

17. Yisinke nayi tu vatera tu kare pepi naJehova?

¹⁷ Yisinke ya vaterere Muepisarome a tjindje magazaro gendi? Age kwa tedere ko eyi ngayi horokera ava va hagekere kuhuguvara Jehova. (Epis. 73:18, 19, 27) Age hena kwa gazadarere ko mauwa aga aga tundu mokukarera Jehova. (Epis. 73:24) Nose kuvhura tu gazadare ko nonkedi dononzi omu ga tu tungika Jehova. Ntani gazara asi ngapi omu eparu lyetu nalifana nsene kapi tuna kukarera Jehova. Nsene tu diworoka eyi ya karera nomulyo kukarera Jehova, ngayi tu vatera tu mu limburukwe. Ntani ngwendi Muepisarome, ose ngatu uyunga asi: “Nye yoyiwa po kwange ame, yokukara pepi naKarunga!”​—Epis. 73:28.

18. Morwasinke natu dilira kukara nowoma kuhamena meho?

¹⁸ Ose kuvhura kufunda nkenye maudigu aga ngatu ligwanekera nago momazuva aga gopouhura morwa ose ‘kukarera Karunga gosili gomunamwenyo.’ (1 Tes. 1:9) Karunga gwetu kutupakera mbili ntani nga tu vatera nkenye apa. Age kwa kere novakareli vendi posiruwo sanare ntani nose ana kara neina. Ntaantani ngatu ligwanekere noudigu wounene ou wa dira kuhoroka rumwe. Kapi ngatu kara nyoselike. (Jes. 41:10) Yipo nye natu uyungira nehuguvaro asi “Jehova yige mukwafi gwange, kapi ngani tjira.”​—Heb. 13:5, 6.