SULA MAR PUONJRUOK 25
WER 7 Jehova En Tekowa
Ng’e Kinde Duto ni Jehova En “Nyasaye Mangima”
“Jehova en Nyasaye mangima!”—ZAB. 18:46.
GIMA SULANI WUOYE
Wabiro nono ber mathoth ma wanyalo yudo ka wiwa ok owil ni Jehova en “Nyasaye mangima.”
1. Ang’o mosekonyo jotich Jehova mondo gidhi nyime lame kata obedo ni giromo gi chandruoge moko?
MUMA wacho ni kinde ma wadakiegi ne dhi bedo “kinde matek ahinya.” (2 Tim. 3:1) Mopogore gi chandruoge ma ji duto romogago e pinyni, jotich Jehova romoga bende gi akwede kod sand. Ang’o mosekonyowa dhi nyime lamo Jehova kata bed ni waromo gi chandruoge kaka mago? Achiel kuom gik mosekonyowa en ng’eyo ni Jehova Nyasaye ma walamo en “Nyasaye mangima.”—Jer. 10:10; 2 Tim. 1:12.
2. Jehova en Nyasaye mangima e yo mane?
2 Jehova en Nyasaye mantie adier kendo oikore konyowa sa asaya ma wantie e bwo tem moro. (2 We. 16:9; Zab. 23:4) Ka waneno Jehova kaka Nyasaye mangima, to mano biro konyowa nyagore maber gi pek moro amora ma waromogo. Wane ane kaka mano notimore e ngima Ruoth Daudi.
3. Weche ma Daudi nowacho ni “Jehova en Nyasaye mangima” tiendgi ang’o?
3 Daudi nong’eyo Jehova kendo nogeno kuome. E kinde ma ne wasike dwaro nege moriwo nyaka Ruoth Saulo, nolamo Jehova mondo okonye. (Zab. 18:6) Bang’ ka Nyasaye nosedwoko lamone morese, Daudi nowacho kama: “Jehova en Nyasaye mangima!” (Zab. 18:46) Weche ma Daudi nowachogo ne ok nyis mana ni noyie ni Nyasaye nitie. Buk moro ma lero Muma nowacho ni weche ma Daudi nowachogo ne nyiso ni en gadier ni Jehova “en Nyasaye mangima kendo ma resoga joge kinde duto.” Kuom adier, gik ma Daudi noneno e ngimane nomiyo obedo gadier ni Jehova en Nyasaye mangima kendo mano nomiyo odhi nyime lame kendo pake.—Zab. 18:28, 29, 49.
4. Gin gueth mage ma wayudo ka waneno Jehova kaka Nyasaye mangima?
4 Ka wabedo gadier ni Jehova en Nyasaye mangima, mano biro konyowa tiyone gi chunywa duto. Wabiro yudo teko mar dhi nyime nano e chandruogewa kendo dhi nyime timo kinda e tij Nyasaye. Bende, wabiro ng’ado e chunywa mar siko ka wan machiegni gi Jehova.
NYASAYE MANGIMA BIRO TEGI
5. Ang’o ma nyalo miyo wabed gadier ni wabiro nano e bwo chandruoge ma waromogo? (Jo-Filipi 4:13)
5 Wabiro dhi nyime nano e tembe ma waromogo, gibed madongo kata matindo, ka waketo e paro ni Jehova en Nyasaye mangima kendo oikore konyowa. Chutho-chutho, chandruoge ma waromogo gin gik matindo e wang’e. En Nyasaye Manyalo Duto kendo onyalo miyowa teko mar nano. (Som Jo-Filipi 4:13.) Ng’eyo mano konyowa nyagore gi chandruoge ma waromogo ka wan gadier ni wabiro loyogi. Neno kaka Jehova konyowa nano e chandruoge ma waromogo sani kata gibed mana matindo, miyo wabedo gadier ni obiro konyowa nano e chandruoge madongo ma wanyalo romogo e kinde mabiro.
6. Gin weche mage ma notimore e ngima Daudi ma nomiyo omedo geno Jehova?
6 Ne ane weche moko ariyo ma notimore e ngima Daudi ma nomiyo omedo geno Jehova. E kinde ma nokwayo rombe mag wuon-gi ka ne en rawera, nitie chieng’ ma dubu nomaye rombo, kae to nitie chieng’ ma sibuor bende notimo kamano. Daudi nokedo gi dubu kendo gi sibuor, moreso rombe ma ne gikawogo. Kata kamano, ne ok owacho ni notimo kamano kuom tekone owuon. Nong’eyo ni Jehova e ma nokonye. (1 Sa. 17:34-37) Daudi wiye ne ok owil gi chal ma nokaloego. Noparo matut e wi wechego, kendo mano nomiyo obedo gadier ni Jehova en Nyasaye mangima kendo ma ne nyalo tege e kinde mabiro.
7. Bedo ni Daudi noketo pache kuom Jehova sama nodhi kedo gi Goliath, mano nokonye nade?
7 Kinde moko bang’e, nenore ni ka ne pod en rawera, Daudi nodhi kama jolweny mag Jo-Israel nogoyoe kambi. Noyudo ka jolweny mag Jo-Israel ne luor ahinya nikech ne nitie Ja-Filistia moro ma rabet ma niluongo ni Goliath ma ne ‘thianonegi.’ (1 Sa. 17:10, 11) Jolwenygo ne luor nikech ne giketo pachgi kuom ng’at ma rabetno kod kaka ne othianonegi e paw lweny. (1 Sa. 17:24, 25) Kata kamano, Daudi to ne neno weche e yo mopogore ahinya. Nong’eyo ni Ja-Filistiano ne ok thian mana ne Jo-Israel kende, to ‘nothiano ne Nyasaye mangima’ bende. (1 Sa. 17:26) Daudi noketo pache kuom Jehova. Ne en gadier ni mana kaka Nyasaye nosekonye e kinde moko ka nokwayo rombe, nodhi konye bende e kindeni. Bedo gadier ma kamano nokonye mokedo gi Goliath monege!—1 Sa. 17:45-51.
8. Ere kaka wanyalo keto pachwa kuom Jehova sama waromo gi tembe? (Ne picha bende.)
8 Wan bende wanyalo kedo maber gi tembe ma waromogo ka waketo pachwa kuom Nyasachwa mangima kendo ka wabedo gadier ni obiro konyowa. (Zab. 118:6) Wanyalo tego geno ma wan-go kuome ka waparo kaka osekonyowa e kinde mokalo. Inyalo somo sigendni manie Muma ma wuoyo kuom jotich Jehova ma Nyasaye nosegareso. (Isa. 37:17, 33-37) Bende, inyalo somo ripode manie websaitwa mar jw.org ma nyiso kaka Jehova osekonyo owete gi nyimine e kindewagi. E wi mago, inyalo paro kaka Jehova osekonyi e kinde mokalo. Kata ka po ni onge wach maduong’ mosetimore e ngimani ma nyiso kaka Jehova nosekonyi, kik ibed ma luor. Adiera en ni nitie yore mang’eny ma Jehova osebedo ka konyigo e ngimani! Oseywayi mibedo gi winjruok maber kode. (Joh. 6:44) Kata mana e kindewagi, pod wan e adiera nikech en e mosebedo ka okonyowa. Donge inyalo kwaye mondo okonyi paro kinde moro ma nodwokoe lamoni kata nomiyie kony sama nidwaree, kuom ranyisi, nano e bwo tem moro matek? Paro matut kuom kinde kaka mago nyalo tego genoni kuom Jehova kendo konyi dhi nyime bedo gadier ni obiro konyi e kinde ma weche tek.
Chandruoge ma wayudo, otudore gi wach moro maduong’ (Ne paragraf mar 8-9)
9. En paro mane monego wabedgo e wi tembe ma waromogo? (Ngeche 27:11)
9 Ka waneno Jehova kaka Nyasaye mantie adier, mano biro konyowa bedo gi paro mowinjore e wi tembe ma waromogo. E yo mane? Wabiro chako neno kaka tembe ma waromogo otudore achiel kachiel gi wach maduong’ manie kind Jehova gi Satan. Jachien wachoga ni sama wan e bwo tem, to wabiro jwang’o Jehova. (Ayub 1:10, 11; som Ngeche 27:11.) Kata kamano, ka wanyagore gi tembe ma romogo ma waloyogi, wanyiso ni wahero Jehova kendo ni Jachien en jamiriambo. Dibed ni sirkal kwedi, idhier, joma ilendonegi ok rwak wach maber milandonegi, kata dibed ni iromo gi tem moro machielo? Ka en kamano, par ni chal ma intieno miyi thuolo mar nyiso ni ihero Jehova kendo idwaro moro chunye. Par bende ni Jehova ok bi weyi mondo otemi mokalo minyalo nanoe. (1 Kor. 10:13) Obiro miyi teko mar nano.
NYASAYE MANGIMA BIRO GUEDHI
10. En ang’o ma Nyasaye mangima biro timo ne jotichne momakore kode?
10 Jehova guedhoga jotichne. (Hib. 11:6) Omiyowa kuwe ma rito chunywa sani, kendo obiro miyowa ngima mochwere e kinde ma biro. Wanyalo geno Jehova ka wan gadier ni ogombo guedhowa kendo en-gi teko mar timo kamano. Bedo gadier ma kamano, konyowa dhi nyime bedo modich e tije mana kaka jotichne machon notimo. Mano bende e gima Timotheo ma nodak e kinde Jokristo mokwongo notimo.—Hib. 6:10-12.
11. Ang’o ma nokonyo Timotheo mondo otim migepe ma nomiye e kanyakla gi chunye duto? (1 Timotheo 4:10)
11 Som 1 Timotheo 4:10. Timotheo nogeno kuom Nyasaye mangima. Mano nomiyo otiyo ne Jehova gi chunye duto. E yore mage? Jaote Paulo nojiwe mondo otim dongruok e puonjo kod golo twege. Bende, Timotheo noketo ranyisi maber ne Jokristo wetene, bed ni ne gin joma tindo kata joma dongo. Nomiye bende migepe moko matek ma noriwo rieyo Jokristo wetene kendo siemogi. (1 Tim. 4:11-16; 2 Tim. 4:1-5) Timotheo ne ni gadier ni kata ka ne onge ng’ama ne nyalo fwenyo gik mabeyo ma notimo, Jehova to nong’eyo gigo duto kendo nodhi guedhe.—Rumi 2:6, 7.
12. Ang’o ma nyalo chwalo jodong-kanyakla mondo gitim migepegi gi chunygi duto? (Ne picha bende.)
12 E kindewagi bende, jodong-kanyakla nyalo bedo gadier ni Jehova neno tich maber ma gitimo. Mopogore gi tij kwath, puonjo, kod lendo, owete mang’eny ma gin jodong-kanyakla konyo e tije mag gero utewa mag lamo, kendo gikonyo owete gi nyimine moyudo masiche. Moko tiyo e Grube Mowal ne Limo Jotuwo kata e Komiti Matudore gi Osiptende. Owete ma tiyo e migepe kaka mago neno kanyakla kaka chenro ma Jehova e moketo, to ok mar dhano moro amora e piny ka. Mano e momiyo gitimo migepego gi chunygi duto kendo gigeno Jehova Nyasachwa ma biro guedho kindagi.—Kol. 3:23, 24.
Nyasaye mangima biro guedhi kaka idhi nyime konyo kanyaklane (Ne paragraf mar 12-13)
13. Jehova winjoga nade sama watimo duto ma wanyalo e tije?
13 En adier ni nitie joma ok nyal bedo jodong-kanyakla. Kata kamano, waduto nitie gima wanyalo miyo Jehova. Jehova mor ahinya ka watimo duto ma wanyalo e tije. Oneno gimoro amora ma watimo mondo wasir tij piny ngima kata bed mana ni en gima tin ma rom nade. Omorga neno ka watimo kinda kendo loyo luoro mar ting’o badwa mondo wachiw paro e chokruogewa. Bende, omorga sama wafwayo gima rach motimnwa kendo ng’wono ne jowetewa. Kata kineno ni ok itim mathoth kaka diher, bed gadier ni Jehova mor gi matin minyalo timo. Oheri nikech kinda mitimono kendo obiro guedhi.—Luka 21:1-4.
SIK MACHIEGNI GI NYASAYE MANGIMA
14. Ere kaka siko ka wan machiegni gi Jehova, biro konyowa siko ka wamakore kode? (Ne picha bende.)
14 Ka waneno Jehova kaka Nyasaye mantie adier, biro bedonwa mayot siko ka wamakore kode. Mano e gima Josef notimo. Notamore donjo e tim mar terruok nikech noneno Nyasaye kaka ng’at mantie adier kendo ne ok odwar chwanye. (Cha. 39:9) Mondo wan bende wane Jehova kaka Nyasaye mantie adier, dwarore ni walos thuolo mar wuoyo kode e lamo kendo wapuonjre Wachne. Ka watimo kamano, to osiep manie kindwa kode biro bedo motegno. Mana kaka Josef, ka wabedo gi osiep machiegni gi Jehova, ok wabi timo gimoro amora ma nyalo chwanye.—Jak. 4:8.
Siko machiegni gi Nyasaye mangima biro konyi siko kimakori kode (Ne paragraf mar 14-15)
15. Ang’o ma wanyalo puonjore kuom Jo-Israel e wi gima notimorenegi ka ne gin e thim? (Jo-Hibrania 3:12)
15 Yot ahinya mondo joma wigi wil gi Jehova Nyasaye mangima ochak bedo mabor kode. Wane ane ranyisi mar Jo-Israel e kinde ma ne gin e thim. Ne ging’eyo ni Jehova nitie, kata kamano, ne gichako bedo gi kiawa ka be obiro sirogi. Ne gipenjo nyaka niya: “Be Jehova ni kodwa koso oonge?” (Wuok 17:2, 7) Mano nomiyo ging’anyone. Kuom adier, ok dwaher luwo ranyisi mar Jo-Israel mar wich-teko.—Som Jo-Hibrania 3:12.
16. En ang’o ma nyalo temo yiewa?
16 Nikech wadak e piny marach, ok en gima yot siko ka wan machiegni gi Jehova. Ji mang’eny ok oyie ni Nyasaye nitie. Kinde mang’eny, ngima joma kamago nyalo nenore mana ka gima dhi maber. Mano nyalo temo yiewa. Kata obedo ni ok wabi bedo gi paro ni Nyasaye onge, wanyalo chako bedo gi kiawa ka be Nyasaye oikore konyowa. Jandik-zaburi mar 73 noyudore e chal ma kamano. Noneno ka ngima joma ne kwedo chike Nyasaye ne dhi mana maber. Mano nomiyo ochako penjore ka be nowinjore odhi nyime tiyo ne Nyasaye.—Zab. 73:11-13.
17. Ang’o ma biro konyowa siko ka wan machiegni gi Jehova?
17 En ang’o ma bang’e nokonyo jandik-zaburino loko paro ma ne en-go? Noparo matut e wi joma wigi wilga ni Jehova en Nyasaye mantie. (Zab. 73:18, 19, 27) Noparo bende e wi gueth ma ng’ato nyalo yudo sama otiyo ne Jehova. (Zab. 73:24) Wan bende wanyalo paro matut e wi gueth ma Jehova osemiyowa. Kae to wapim gueth ma waseyudogo gi kaka dikoro ngimawa chal ka dine ok wati ne Jehova. Ka watimo kamano, wabiro siko ka wamakore gi Jehova kendo wacho kaka jandik-zaburi ma nowacho niya: “An to sudo machiegni gi Nyasaye berna moloyo.”—Zab. 73:28.
18. Ang’o momiyo wanyalo bedo gadier ni wabiro nyagore maber gi chandruoge ma pod oritowa nyime?
18 Wanyalo nyagore maber gi tem moro amora ma waromogo e kinde mag gikogi nikech wan “wasumbni mag Nyasaye mangima kendo madier.” (1 The. 1:9) Jehova Nyasachwa en Nyasaye mantie adier kendo oikore konyo joma lame. Nokonyo jotichne ma kinde mokalo, to wan bende pod okonyowa e kindewagi. Machiegnini, wabiro romo gi masira maduong’ ma pok none nyaka nene. Kata kamano, ok wabi luor nikech ok wan kendwa. (Isa. 41:10) Omiyo, wabeduru “gi chir maduong’ kendo wacho niya: ‘Jehova e jakonyna; ok abi luor.’”—Hib. 13:5, 6.
WER 3 Jehova e Tekowa Kendo e Genowa
